ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ಸರಣಿ ಲೇಸ್ ನ.2 ಗುರುವಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾಲ್ ಪಡೆಯೆರೆ ಉಲ್ಲೆರ್. ನ.3 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕುಡ್ಲ: ತುಳು ರಾಜ್ಯದ ವಿಚಾರಡ್ ಜನಜಾಗೃತಿಗಾದ್ ನವೆಂಬರ್ 1 ಕ್ಕ್ ಟ್ವಿಟರ್ (X) ಡ್ ದಿನ ಇಡೀ #TulunadState ಅಭಿಯಾನ ನಡತ್ಂಡ್.
ತುಳು ಭಾಷೆಗ್ ಅಧಿಕೃತ ಸ್ಥಾನಮಾನ ಕೊರ್ಪುನ ವಿಚಾರಡ್ ಸರ್ಕಾರೊರ್ದು ನಂಬಿಕೆದ್ರೋಹ ಆವೊಂದುಂಡು. ದಾಯೆ ಪಂಡ ಕರ್ನಾಟಕ ಬೊಕ್ಕ ಕೇರಳ ರಾಜ್ಯರ್ದ್ ಲ ಎಲ್ಯ ರಾಜ್ಯಲೆಡ್ 2-19 ಭಾಷೆನ್ ಅಧಿಕೃತ ಮಲ್ದೆರ್.
ಸಂವಿಧಾನದ ವಿಧಿ 347ತ್ತ ಪ್ರಕಾರ ರಾಜ್ಯ ಸರಕಾರಗ್ ಅಧಿಕೃತ ಮಲ್ಪುನ ಮಾತ ಅವಕಾಶನ್ ನಮ್ಮ ಸಂವಿಧಾನನೇ ಕೊರ್ತುಂಡು. ಆಂಡಲ ಪದೇ ಪದೇ ಇಂಚ ಅಧಿಕೃತ ಮಲ್ಪುವೆ ಪಂದ್ ತಡ ಮಲ್ಪುನೆನ್ ತೂಂಡ ಮೊಕ್ಲೆಗ್ ತುಳುನು ಅಧಿಕೃತ ಮಲ್ಪುನ ಮನಸ್ಸಿಜ್ಜಿ ಪನ್ಪುನವು ಗೊತ್ತಾಪುಂಡು.
ಅಂಚಾದ್ ಅಧಿಕೃತ ತಾನಮಾನದ ಬೇಡಿಕೆರ್ದ್ ತುಳುರಾಜ್ಯದ ಬೇಡಿಕೆನೇ ಎಚ್ಚ ಪರಿಣಾಮಕಾರಿ ಆತ್ಂಡ್.ಒಂಜಾತ್ ಒಂಜಿ ದಿನ ನಮ ನಟ್ಟುನೆರ್ದ್, ನಮಕ್ ದಕ್ಕೊಡಾಯಿನೆನ್ ಪಡೆಯೆರೆ ನಮ ಸ್ವತಂತ್ರರಾವೊಡು.ಸಂವಿಧಾನಿಕವಾದ್ ರಾಜ್ಯದ ಬೇಡಿಕೆ ದೀವೊಡು. ಉಂದು ಸಂವಿಧಾನಬದ್ಧವಾಯಿನ ಹಕ್ಕು ಆತ್ಂಡ್. ಅಂಚಾದ್ ತುಳುರಾಜ್ಯನ್ ಅವ್ವೆ ಸಂವಿಧಾನ ಕೊರ್ನ ಅವಕಾಶದ ಮುಕೇನ ಪಡೆಕ ಪಂದ್ ಭಾರತದ ಸಂವಿಧಾನನ್ ಗೌರವಿಸಾವೊಂದು ಸುರುಕು ತುಳುರಾಜ್ಯದ ವಿಚಾರಡ್ ಜನಜಾಗೃತಿಗಾದ್ X ಅಭಿಯಾನ ಮಲ್ತ್ ದ ಪಂದ್ ತುಳು ಸಂಘಟನೆದಕುಲು ತೆರಿಪಾದೆರ್.
ಕನ್ನಡ ಸಾಂಸ್ಕೃತಿಕ ಕೇಂದ್ರ ಕಲ್ಯಾಣ್ (ರಿ.) ದ 21 ನೇ ವರ್ಷದ ಉಚ್ಚಯ ಬೊಕ್ಕ ಕರ್ನಾಟಕ ರಾಜ್ಯೋತ್ಸವ ಲೇಸ್ ನ.19 ಐತಾರ ಮಧ್ಯಾಹ್ನ ಕಲ್ಯಾಣ್ ಪಶ್ವಿಮದ ಮಾತೋಶ್ರೀ ಸಭಾಗೃಹಡ್ ನಡಪರೆ ಉಂಡು.
ಈ ಲೇಸ್ ಡ್ ಬೊಂಬೈ ಪರಿಸರದ ಸಮಸ್ತ ಕನ್ನಡ ಸಂಘ, ಸಂಸ್ಥೆಲು, ಬೇತೆ ಬೇತೆ ಜಾತಿ ಸಮುದಾಯ ಸಂಸ್ಥೆಲು, ಬೇತೆ ಬೇತೆ ಕಲಾಮಾಧ್ಯಮ ಕೂಟಲೆಗ್ ಸಮೂಹ ಭಕ್ತಿಸುಗಿಪು ಪಂತೊನ್ ಆಯೋಜನೆ ಮಲ್ದೆರ್.
ಈ ಪಂತೊಡು ಪಾಲ್ ಪಡೆಪುನ ಆಸಕ್ತೆರ್ ತನ್ನ ಪುದರ್ ನ್ ಸಂಸ್ಥೆದ ಗೌರವ ಪ್ರಧಾನ ಕಾರ್ಯದರ್ಶಿ ಪ್ರಕಾಶ್ ಕುಂಠಿನಿ 9322400251 ಅತ್ತಂಡ ಜತೆ ಕಾರ್ಯದರ್ಶಿ ಕುಮುದಾ ಡಿ. ಶೆಟ್ಟಿ 9619026965 ಮೆರೆನ್ ಸಂಪರ್ಕ ಮಲ್ತ್ ದ್ ನೊಂದಣಿ ಮಲ್ಪೊಲಿ.
ತಮಿಳುನಾಡು: ಭಾರತೀಯ ಚಿತ್ರರಂಗದ ಸೂಪರ್ ಸ್ಟಾರ್ ತಮಿಳು ನಟೆ ರಜನಿಕಾಂತ್ ಮೆರೆಗ್ ಅಭಿಮಾನಿಯೊರಿ ದೇವಲ್ಯನ್ ನಿರ್ಮಾಣ ಮಲ್ದೆರ್.
ತಮಿಳುನಾಡ್ ದ ಮಧುರೈನ ಕಾರ್ತಿಕ್ ತನ್ನ ಇಲ್ಲದ ಜಾಲ್ ಡೇ ತಲೈವಾಗ್ ದೇವಲ್ಯನ್ ಕಟ್ಟ್ ದೆರ್. ಈ ದೇವಲ್ಯದೊಲಯಿ 250 ಕೆ.ಜಿ ತೂಕದ ರಜನಿಕಾಂತ್ ಮೂರ್ತಿ ಪ್ರತಿಷ್ಠಾಪನೆ ಮಲ್ದೆರ್.
ಯಾನ್ ರಜನಿಕಾಂತ್ ಬುಡ್ದ್ ಬೇತೆ ಒವ್ವೇ ನಟೆರೆನ ಪಿಕ್ಚರ್ ತೂಪುಜಿ. ಎಂಕ್ ಆರ್ ದೇವೆರ್. ಯಾನ್ ದೇವಲ್ಯ ನಿರ್ಮಾಣ ಮಲ್ದೆ. ರಜಿನಿಕಾಂತ್ ಮೆರೆನ್ ಮಸ್ತ್ ಮೋಕೆ ಮಲ್ಪುವೆ. ಎನ್ನ ಕುಟುಂಬದ ಐನ್ ತರೆಮಾರ್ ರ್ದಿಂಚಲ ಎಕುಲು ರಜಿನಿಕಾಂತ್ ಮೆರೆನ ಅಭಿಮಾನಿಲು ಪಂದ್ ಅಭಿಮಾನಿ ಕಾರ್ತಿಕ್ ಪಂತೆರ್.
ಪುತ್ತೂರು: ನ. 13 ದಾನಿ ರೈ ಎಸ್ಟೇಟ್ಸ್ ಎಜುಕೇಶನಲ್ ಆಂಡ್ ಚಾರಿಟೇಬಲ್ ಟ್ರಸ್ಟ್ ನೆತ್ತ ಮುತಾಲಿಕೆಡ್ ನಡಪುನ ಟ್ರಸ್ಟ್‌ದ ಮಹಾಸಭೆ ಬೊಕ್ಕ ಟ್ರಸ್ಟ್‌ದ ಫಲಾನುಭವಿಲೆಗ್ ವಸ್ತ್ರ ವಿತರಣಾ ಕಾರ್ಯಕ್ರಮ ಕೊಂಬೆಟ್ಟು ತಾಲೂಕು ಕ್ರೀಡಾಂಗಣಡ್‌ ನಡಪರೆ ಉಂಡು.
ಈ ಕಾರ್ಯಕ್ರಮಡ್ ಸುಮಾರು 50 ಸಾವಿರರ್ದ್‌ ಎಚ್ಚ ಫಲಾನುಭವಿಲು ಪಾಲ್ ಪಡೆಯುನ ನಿರೀಕ್ಷೆ ಉಂಡು. ನೆಕ್ಕ್‌ ಬೋಡಾಪಿನ ಮಾತ ಸಿದ್ದತೆಲು ನಡತೊಂದು ಉಂಡು ಪಂದ್ ಟ್ರಸ್ಟ್‌ದ ಅಧ್ಯಕ್ಷೆರ್ ಶಾಸಕೆರ್ ಅಶೋಕ್ ರೈ ತೆರಿಪಾದೆರ್. ಶಾಸಕರ ಸಭಾಭವನಡ್ ನಡತ್ತಿನ ಟ್ರಸ್ಟ್‌ದ ಪ್ರಮುಖೆರ್ನ ಸಭೆಟ್ ಈ ಮಾಹಿತಿ ಕೊರಿಯೆರ್. ಸಭೆಟ್ ಪಾಲ್ ಪಡೆಯುನ ಮಾತೆರೆಗ್‌ ವಸ್ತ್ರ ವಿತರಣೆ ನಡಪೆರೆ ಉಂಡು. ಒಟ್ಟಿಗೆ ಸಹಭೋಜನ ಉಂಡು. ಗ್ರಾಮ ಗ್ರಾಮಡ್ ಸ್ವಾಗತ ಸಮಿತಿನ್‌ ರಚನೆ ಮಲ್ತ್‌ದ್‌, ಕಾರ್ಯಕ್ರಮಗ್ ಎಚ್ಚಿನ ಸಂಖ್ಯೆಡ್ ಫಲಾನುಭವಿಲು ಪಾಲ್ ಪಡೆಯುನಂಚ ಶಾಸಕೆರ್ ಬಿನ್ನಾಪು ಮಲ್ತೆರ್.
ಸಭೆಟ್ ಟ್ರಸ್ಟ್‌ದ ಕಾರ್ಯಾಧ್ಯಕ್ಷೆರ್ ಸುದೇಶ್ ಶೆಟ್ಟಿ. ಪ್ರಮುಖೆರಾಯಿನ ಸುಮಾ ಅಶೋಕ್ ರೈ, ನಿಹಾಲ್ ಶೆಟ್ಟಿ, ರಾಕೇಶ್ ರೈ ಕುದ್ಕಾಡಿ ಈ ಪೊರ್ತುಡು ಇತ್ತೆರ್.
ನೈರೋಬಿ( ಕೀನ್ಯಾ): ಪೂರ್ವ ಆಫ್ರಿಕಾದ ಬಂಟರ ಸಂಘ ಸುರುತ್ತ ವಾರ್ಷಿಕ ಉಚ್ಚಯ ಅ.28 ಸನಿಯಾರ ಕೀನ್ಯಾ ರಾಜ್ಯದ ನೈರೋಬಿದ ಹೋಟೆಲ್ ರೆಡ್ ಜಿಂಜರ್ ಡ್ ನಡತ್ಂಡ್.
ಸಂಘದ ಮಹಿಳಾ ಸದಸ್ಯೆರ್ ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್. ಕುಡ್ಲ ಮೀನನಾಥ ಪುಗರ್ತೆದ ರಾಘವೇಂದ್ರ ರೈ ಕುಂಜತ್ತೂರು ಮೆರೆರ್ದ್ ಬೊಕ್ಕ ಸಂಘದ ಸದಸ್ಯೆರ್ದ್ ಸಂಗೀತ, ನೃತ್ಯ ಸಾಂಸ್ಕೃತಿಕ ಲೇಸ್ ನಡತ್ಂಡ್. ಅಕ್ಷಯ ರಾಜೇಶ್ ಶೆಟ್ಟಿ ಮೆರೆನ ಸನ್ಮಾನ ಪತ್ರ ವಾಚನದೊಟ್ಟಿಗೆ ನಟೆ ಬೊಕ್ಕ ರಂಗಭೂಮಿ ಕಲಾವಿದೆರ್ ರಾಘವೇಂದ್ರ ರೈ ಮೆರೆಗ್ ಸನ್ಮಾನ ನಡತ್ಂಡ್.
ಲೇಸ್ ದ ಸುರುರ್ದ್ ಅಕೇರಿ ಮುಟ್ಟ ತುಳು ಭಾಷೆಗ್ ಎಚ್ವ ಪ್ರಾಧಾನ್ಯತೆ ಕೊರಿನವು ವಿಶೇಷ ಆದಿತ್ತ್ಂಡ್. ಈ ಪೊರ್ತುಡು ಮೂಡಾಯಿ ಆಫ್ರಿಕಾದ ಪೆರ್ಮೆದ ಬಂಟೆರ್ ಆಲ್ಬಮ್ ಸಾಂಗ್‌ ಬುಡುಗಡೆ ಆಂಡ್.
ಶಾಂತಿ ಯಶವಂತ್ ಶೆಟ್ಟಿ, ಶುಭ ಶೈಲೇಶ್ ಶೆಟ್ಟಿ ಪ್ರಾರ್ತನೆ ಮಲ್ತೆರ್. ಸಂಘದ ಗುರ್ಕಾರೆ ಶೈಲೇಶ್ ಶೆಟ್ಟಿ ಎದ್ಕೊನಿಯೆರ್. ಸಂಘದ ಮತ ಸದಸ್ಯೆರೆಗ್ ಸುರುತ್ತ ವರ್ಷದ ಸವಿನೆಂಪುಗಾದ್ ಶಾಲ್ ಬೊಕ್ಕ ಸ್ಮರಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್. ಸಪ್ನ ಅಶೋಕ್ ಭಂಡಾರಿ, ಗಾಯತ್ರಿ ಶೆಟ್ಟಿ, ಸಾಂಸ್ಕೃತಿಕ ಕಾರ್ಯದರ್ಶಿ ಸಂದೀಪ್ ಸಾಮಾನಿ ಲೇಸ್ ನ್ ಸುಧಾರಿಕೆ ಮಲ್ತೆರ್. ಕಾರ್ಯದರ್ಶಿ ಅಭಿಜಿತ್ ಸೂಡ ಸೊಲ್ಮೆ ಸಂದಾಯೆರ್.
ಡೆಲ್ಲಿ ಬೊಕ್ಕ ಬೊಂಬೈಡ್ ವಾಯು ಮಾಲಿನ್ಯ ಎಚ್ಚಾವೊಂದು ಇಪ್ಪುನೆರ್ದಾವರ ಬಿಸಿಸಿಐ ಮಹತ್ವದ ನಿರ್ಧಾರ ದೆತೊಂದುಂಡು.
ಬೊಂಬೈ ಬೊಕ್ಕ ಡೆಲ್ಲಿದ ಸ್ಟೇಡಿಯಂಡ್ ನಡಪರೆ ಇಪ್ಪುನ ಮ್ಯಾಚ್ ಡು ಪಟಾಕಿ ಗಲಸುನೆನ್ ನಿಷೇಧ ಮಲ್ದ್ಂಡ್. ಎಲ್ಲೆ ವಾಂಖೆಡೆಡ್ ಭಾರತ ಬೊಕ್ಕ ಶ್ರೀಲಂಕಾ ಮ್ಯಾಚ್ ಉಂಡು. ಸೋಮಾರ ಬಾಂಗ್ಲಾದೇಶ ಬೊಕ್ಕ ಶ್ರೀಲಂಕಾ ಮ್ಯಾಚ್ ಫಿರೋಜ್ ಶಾ ಕೋಟ್ಲಾಡ್ ನಡಪರೆ ಉಂಡು. ಈ ರಡ್ಡ್ ಮ್ಯಾಚ್ ಡ್ ಪಟಾಕಿ ಪುಡಾಪೆರೆ ಬಲ್ಲಿ ಪಂದ್ ಜಯ್ ಶಾ ತೆರಿಪಾದೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಮುತಾಲಿಕೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 31ನೇ ಸಂಚಿಕೆ ಅ.31 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡು.
ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರ್. ನ.1 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಬೆಂಗಳೂರು: ಹಿರಿಯ ಪತ್ರಕರ್ತೆರ್ ದಿನೇಶ್ ಅಮೀನ್ ಮಟ್ಟು, ಯಕ್ಷಗಾನ ಕ್ಷೇತ್ರದ ಸುರೂತ್ತ ಮಹಿಳಾ ಭಾಗವತೆರ್ ಲೀಲಾವತಿ ಬೈಪಾಡಿತ್ತಾಯ ಮೊಕ್ಲೆಗ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಘೋಷಣೆ ಆತ್ಂಡ್.
ಲೀಲಾವತಿ ಬೈಪಾಡಿತ್ತಾಯ ಯಕ್ಷಗಾನ ಕ್ಷೇತ್ರಡ್ ಮಲ್ಲ ಸಾಧನೆ ಮಲ್ದೆರ್. ದಿನೇಶ್ ಅಮೀನ್ ಮಟ್ಟು ಮಾಧ್ಯಮ ಕ್ಷೇತ್ರಡ್ ಮಲ್ಲ ಸಾಧನೆ ಮಲ್ದೆರ್.
ಬೆಂಗ್ಲೂರ್: ನವೆಂಬರ್ 25 ಬೊಕ್ಕ 26 ಕ್ಕ್ ನಡಪರೆ ಇಪ್ಪುನ ಸುರುತ್ತ ಕಂಬುಲದ ಲೇಸ್ ನ್ ನಟಿ ಅನುಷ್ಕಾ ಶೆಟ್ಟಿ ಉದಿಪನ ಮಲ್ಪುವೆರ್.
ಲೇಸ್ ಡ್ ನಟೆ ರಜನಿಕಾಂತ್, ಸುನೀಲ್‌ ಶೆಟ್ಟಿ, ಶಿಲ್ಪಾ ಶೆಟ್ಟಿ, ಯಶ್ ಬೊಕ್ಕ ದರ್ಶನ್, ಕ್ರಿಕೆಟಿಗೆ ಕೆಎಲ್ ರಾಹುಲ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪುತ್ತೂರು ಶಾಸಕೆರ್ ಬೊಕ್ಕ ಬೆಂಗ್ಲೂರು ಕಂಬುಲ ಸಮಿತಿದ ಗುರ್ಕಾರೆ ಅಶೋಕ್ ಕುಮಾರ್ ರೈ ಮೇರ್ ಪಂಡೆರ್.
ಸುದ್ದಿಗಾರೆರ್ನ ಒಟ್ಟಿಗೆ ಪಾತೆರ್ನ ಮೇರ್, ಅರಮನೆ ಮೈದಾನಡ್ ನಡಪುನ ಲೇಸ್ ಗ್ 8 ಲಕ್ಷರ್ದ್ ಎಚ್ಚ ಜನ ಸಾಕ್ಷಿ ಆಪಿನ ನಿರೀಕ್ಷೆ ಉಂಡು. ಕಂಬುಲಡ್ ಪಾಲ್ ಪಡೆಯೆರೆ 116 ಕಂಬುಲ ಎರುಕ್ಲೆನ ಮಾಲೀಕೆರ್ ತನ್ನ ಪುದರ್ ನ್ ನೋಂದಣಿ ಮಲ್ದೆರ್. ಈ ಮುಖೇನ ರಡ್ಡ್ ದಿನತ್ತ ಕಂಬುಲ ಸುಮಾರ್ ದಾಖಲೆನ್ ದೆಪ್ಪುನ ಅಂದಾಜಿ ಉಂಡು ಪಂದ್ ಪಂಡೆರ್.
