ಒಡಿಪು: ತುಳುನಾಡ್ ದ ಪುಗರ್ತೆದ ‘ಆಭರಣ’ ಬಂಗಾರ್ ರ ಅಂಗಡಿಗ್ ಬೊಲ್ಪು ಬೊಲ್ಪುಗು ಐಟಿ ಅಧಿಕಾರಿಲು ದಾಳಿ ಮಲ್ದೆರ್.
ತುಳುನಾಡ್ ದ ಸುಮಾರ್ ಕಡೆಟ್ಟ್ ತನ್ನ ಶೋರೂಮ್ ಇಪ್ಪುನ ಪುಗರ್ತೆದ ಬಂಗಾರ್ ದ ಅಂಗಡಿ ಉಂದಾತ್ಂಡ್. ಪಿದಯಿ ಜಿಲ್ಲೆಡ್ಲಾ ನೆತ್ತ ಅಂಗಡಿ ಉಂಡು. ಇನಿ ಬೊಲ್ಪುಗು ಒಡಿಪು, ಕಾರ್ಲ, ಕುಂದಾಪುರ, ಪುತ್ತೂರು, ಪಡ್ಡೆದ್ರ, ಬೊಲ್ತೇರ್, ಬ್ರಹ್ಮಾವರ ಸೇರಿನಂಚೆನೆ ಸುಮಾರ್ ಕಡೆಟ್ ದಾಳಿ ನಡತ್ ದ್ಂಡ್. ಸುಮಾರ್ ಅಂಗಡಿದ ಮಿತ್ತ್ ದಾಳಿ ಮಲ್ತಿನ ಅಧಿಕಾರಿಲು ದಾಖಲೆನ್ ಪರಿಶೀಲನೆ ಮಲ್ತೊಂದು ಉಲ್ಲೆರ್.
ಬೊಂಬೈ: ಮಹಾರಾಷ್ಟ್ರ ಸರ್ಕಾರದ ಪ್ರವಾಸೋದ್ಯಮ ಬೊಕ್ಕ ಸಾಂಸ್ಕೃತಿಕ ವ್ಯವಹಾರ ಇಲಾಖೆದ ರಂಗಭೂಮಿ ಪ್ರಯೋಗಲೆನ ತಪಾಸಣಾ (ಸೆನ್ಸಾರ್) ಮಂಡಳಿ ಸದಸ್ಯೆರಾದ್ ಪತ್ರಕರ್ತೆ ರೋನ್ಸ್ ಬಂಟ್ವಾಳ್ ಮೇರ್ ನೇಮಕ ಆತೆರ್.
ಸರ್ಕಾರದ ಸಾಂಸ್ಕೃತಿಕ ವ್ಯವಹಾರದ ಇಲಾಖೆ ನಾಟಕ, ಏಕಾಂಕ ನಾಟಕ ಬೊಕ್ಕ ಬೇತೆ ಬೇತೆ ಮನರಂಜನೆದ ಸಂಹಿತೆನ್ ತೂಯೆರೆ ಭಾಷಾ ತಜ್ಞೆರೆನ ನೇಮಕ ನಡಪಾದ್ ಮಂಡಳಿ ತನ್ನ ಆದೇಶ ಕೊರ್ತುಂಡು. ಸರ್ಕಾರದ ನಿರ್ಧಾರದಂಚೆನೆ ರಾಜ್ಯದ ಮರಾಠಿ ಬೊಕ್ಕ ಹಿಂದಿ ಬುಡ್ದ್ ಬೇತೆ ಭಾಷೆಡ್ ಸ್ವೀಕಾರ ಮಲ್ಪುನ ಮನರಂಜನಾ ಪ್ರಯೋಗದ ಸಂಹಿತೆನ್ ಪರಿಶೀಲನೆ ಮಲ್ಪರೆ ಬೇತೆ ಭಾಷೆಗ್ ಭಾಷಾ ತಜ್ಞೆರೆನ ನಿರೀಕ್ಷಕೆರೆನ್ ನೇಮಕ ಮಲ್ತ್ ದ್ ಸರಕಾರ ಆದೇಶ ಕೊರ್ತುಂಡು. ಕನ್ನಡ, ತುಳು ಬೊಕ್ಕ ರೋಮನ್ ಲಿಪಿ ಇಪ್ಪುನ (ಗೋವಾ) ಕೊಂಕಣಿ ಭಾಷೆಗ್ ರೋನ್ಸ್ ಬಂಟ್ವಾಳ್ ಮೆರೆನ್ ನೇಮಕ ಮಲ್ದ್ಂಡ್. ಕರಿನ ಸುಮಾರ್ ವರ್ಷೊದಿಂಚ ಕನ್ನಡ ಬೊಕ್ಕ ತುಳು ಭಾಷಾ ಪರಾಮರ್ಶಕೆರಾದಿತ್ತಿನ ರಂಗ ಎಸ್.ಪೂಜಾರಿ ಮೆರೆನ್ ಕುಡೊರ ನೇಮಕ ಮಲ್ದ್ಂಡ್.
ಬೆಂಗಾಲಿ, ಇಂಗ್ಲಿಷ್, ಪಂಜಾಬಿ, ಗುಜರಾತಿ, ತೆಲುಗು, ತಮಿಳು, ಮಾಲ್ವಾನಿ, ರಾಜಸ್ಥಾನಿ, ಸಿಂದಿ ಗೋವಾ, ಮಲಯಾಳಂ ಭಾಷೆಗ್ ಭಾಷಾತಜ್ಞೆರೆನ್ ನೇಮಕ ಮಲ್ತ್ ದ್ ಆದೇಶ ಕೊರ್ತುಂಡು. ಬೋರ್ಡ್ ಆಫ್ ಇನ್‌ಸ್ಪೆಕ್ಷನ್ ಆಫ್ ಥಿಯೇಟರ್ ದ ಕಾರ್ಯದರ್ಶಿ ಎಸ್.ಪಿ ಖಮರ್ ಅಧಿಕೃತ ಸುತ್ತೋಲೆಡ್ ತೆರಿಪಾದೆರ್.
ಹಳೆಯಂಗಡಿ: ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಸಮಗ್ರ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶ ಉಚ್ಚಯ ಲೇಸ್ ಮಾತೆರ್ನಲ ಸಹಕಾರರ್ದ್ ಯಶಸ್ವಿಯಾತ್ಂಡ್. ಉಂದುವೇ ಪೊರ್ತುಡು ನ.2 ಕ್ಕ್ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಮೂಜಿ ವರ್ಷದ ಕಾರ್ಯ ಅವಧಿ ಮುಗಿದ್ ಆಡಳಿತಾಧಿಕಾರಿ ನೇಮಕ ಆವರೆ ಉಂಡು.
ಈ ನಿಲೆಟ್ಟ್ ಅ.29 ಐತಾರ ಬಯ್ಯಗ್ 4 ಗಂಟೆಗ್ ದೇವಲ್ಯದ ಸಭಾಂಗಣಡ್ ಜೀರ್ಣೋದ್ಧಾರ, ಬ್ರಹ್ಮಕಲಶ ಉಚ್ಚಯದ ಸಂಪೂರ್ಣ ಲೆಕ್ಕಪತ್ರ, ನನದ ಕಾರ್ಯ ಯೋಜನೆದ ಬಗೆಟ್ಟ್ ಊರುದ ಪರವೂರುದ ಭಕ್ತೆರೆನ ಬೊಕ್ಕ ಗ್ರಾಮಸ್ಥೆರೆನ ಇಸೇಸ ಸಭೆ ನಡತ್ಂಡ್.
ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ, ಜೀರ್ಣೋದ್ಧಾರ ಸಮಿತಿದ ಪ್ರಧಾನ ಕಾರ್ಯದರ್ಶಿ ಹರಿದಾಸ್ ಭಟ್ ಮೇರ್ ಗುರ್ಕಾರ್ಮೆಡ್ ಭಕ್ತೆರೆಗ್ ಜೀರ್ಣೋದ್ಧಾರ, ಬ್ರಹ್ಮಕಲಶ ಉಚ್ಚಯದ ಬೊಕ್ಕ ಮೂಜಿ ವರ್ಷೊದ ವ್ಯವಸ್ಥಾಪನಾ ಸಮಿತಿದ ಖರ್ಚಿ ವೆಚ್ಚದ ಮಾಹಿತಿ ಕೊರಿಯೆರ್.
ಬೊಕ್ಕ ಮೇರ್ ಪಾತೆರ್ದ್, ದಾನಿಲು ಕೊರ್ನ ಕೊಡುಗೆ ಬೊಕ್ಕ ಕಾಸ್ ದ ರೂಪಡ್ ಕೊರ್ನ ದೇಣಿಗೆದ ಪಟ್ಟಿನ್ ವಿವರವಾದ್ ಕೊರಿಯೆರ್. ಬೊಕ್ಕ ಕರ ಸೇವಕೆರೆನ ಸೇವೆನ್ ಮೆಚ್ಚಿಯೆರ್. ನನದ ಕಾರ್ಯ ಯೋಜನೆದ ಬಗೆಟ್ಟ್ ಸವಿಸ್ತಾರವಾದ್ ತೆರಿಪಾಯೆರ್. ಗೋಪುರದ ಕೆಲಸ, ಉಲಯಿ ಬೊಕ್ಕ ಪಿದಯಿದ ದೊಂಪದ ಕೆಲಸ ಕಾರ್ಯ ನನದ ದಿನಟ್ಟ್ ಮಲ್ಪರೆ ಉಂಡು ಪಂದ್ ಪಂಡೆರ್. ವ್ಯವಸ್ಥಾಪನಾ ಸಮಿತಿದ ಮೂಜಿ ವರ್ಷದ ಅವಧಿ ನ.2 ಕ್ಕ್ ಅಕೇರಿ ಆಪುಂಡು. ಬೊಕ್ಕ ಆಡಳಿತಾಧಿಕಾರಿ ನೇಮಕ ಆಯೆರೆ ಉಂಡು. ಮೂಜಿ ವರ್ಷದ ಅವಧಿಡ್ ಸಹಕಾರ ಕೊರಿನ ಮತ ಭಕ್ತೆರೆಗ್ ಅಭಿನಂದನೆ ಸಂದಾಯೆರ್.
ಜೀರ್ಣೋದ್ಧಾರ ಸಮಿತಿದ ಒತ್ತು ಗುರ್ಕಾರೆ ಮೋಹನ್ ದಾಸ್ ಪಾತೆರ್ದ್, ತೋಕೂರು ದೇವಲ್ಯದ ಜೀರ್ಣೋದ್ಧಾರರ್ದ್ ಮಸ್ತ್ ಕಾಲದ ಭಕ್ತೆರೆನ ಕನ ನನಸಾತ್ಂಡ್ ಪಂದ್ ಪಂಡೆರ್. ಬೊಕ್ಕ ಸಹಕಾರ ಕೊರಿನ ಮಾತೆರೆಗ್ಲಾ ಅಭಿನಂದನೆ ಸಂದಾಯೆರ್.
ಜೀರ್ಣೋದ್ಧಾರ ಸಮಿತಿದ ಸದಸ್ಯೆರ್, ತೋಕೂರುಗುತ್ತು ಹೊಸಮನೆತ್ತ ಹರಿಪ್ರಸಾದ್ ಜಿ. ಶೆಟ್ಟಿ ಬೆಂಗ್ಲೂರು ಮೇರ್ ಪಾತೆರ್ದ್, ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಆಯಿನ ಹರಿದಾಸ್ ಭಟ್ ಮೆರೆನ ಮುತಾಲಿಕೆಡ್, ದೇವಲ್ಯದ ಸಮಗ್ರ ಜೀರ್ಣೋದ್ಧಾರದ ಕೆಲಸ ಕಾರ್ಯಡ್ ಮತ ಸಮಿತಿನ್ ಒಟ್ಟು ಸೇರ್ಸಾದ್, ತಾನ್ ಲ ಇತ್ತ್ ದ್ ದೇವೆರೆನ ಸೇವೆನ್ ಶ್ರದ್ಧೆ ಭಕ್ತಿ ಪೂರ್ವಕವಾದ್ ಮಲ್ತೆರ್ ಪಂದ್ ಅಭಿನಂದನೆ ಮಲ್ತೆರ್ ಬೊಕ್ಕ ಕರಸೇವಕೆರೆನ ಕೆಲಸ ಕಾರ್ಯಲೆನ ಬಗೆಟ್ಟ್ ಮೆಚ್ವಿಯೆರ್.
ಜೀರ್ಣೋದ್ಧಾರ ಸಮಿತಿದ ಸದಸ್ಯೆರ್ ಸುಗಂಧಿ ಡಿ.ಕೊಂಡಾಣ, ಪುರುಷೋತ್ತಮ ಕೋಟ್ಯಾನ್ ಅಕ್ಲೆನ ಅಭಿಪ್ರಾಯನ್ ತೆರಿಪಾಯೆರ್.
ಈ ಪೊರ್ತುಡು ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ಮಧುಸೂದನ್ ಆಚಾರ್, ಪುರುಷೋತ್ತಮ ರಾವ್, ವಿಪುಲ ಡಿ. ಶೆಟ್ಟಿಗಾರ್, ಪಡುಪಣಂಬೂರು ಗ್ರಾಮ ಪಂಚಾಯತ್ ದ ಒತ್ತು ಗುರ್ಕಾರೆ ಹೇಮನಾಥ ಅಮೀನ್, ಸದಸ್ಯೆರ್ ಸಂತೋಷ್ ಕುಮಾರ್ ತೋಕೂರು, ಯುವಕ ಸಂಘದ ಗುರ್ಕಾರೆ ಶೇಖರ್ ಶೆಟ್ಟಿಗಾರ್, ಮಹಿಳಾ ಮಂಡಲದ ಗುರ್ಕಾರ್ದಿ ಅನುಪಮಾ ಭಟ್, ಶ್ರೀ ಸುಬ್ರಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ದ ಪ್ರಧಾನ ಕಾರ್ಯದರ್ಶಿ ದೀಪಕ್ ಸುವರ್ಣ, ಬೇತೆ ಬೇತೆ ಸಂಘ ಸಂಸ್ಥೆಲೆನ ಪದುಕೆರ್, ಸದಸ್ಯೆರ್, ಬೊಕ್ಕ ಗ್ರಾಮಸ್ಥೆರಾಯಿನ ಸುಂದರ್ ಸಾಲಿಯನ್, ದಿನಕರ್ ಸಾಲಿಯಾನ್, ಕೃಷ್ಣ ಹೆಬ್ಬಾರ್, ನರೇಂದ್ರ ಕಿರೋಡಿಯನ್, ರಾಜೇಶ್ ದಾಸ್, ವಿನೋದ್ ಕುಮಾರ್, ಸತೀಶ್ ಭಟ್, ಪರಮೇಶ್ವರ್ ಶೆಟ್ಟಿಗಾರ್, ದಾಮೋದರ ಶೆಟ್ಟಿ, ಯಶೋಧ ಪಿ. ರಾವ್, ವಿನೋದ ಭಟ್, ದೇವಲ್ಯದ ಸಿಬ್ಬಂದಿ ವರ್ಗ, ಊರುದ ಪರವೂರುದ ಭಕ್ತೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್.
ಕುಡ್ಲ ಅಮೃತಸಂಜೀವಿನಿ (ರಿ.)ದ ಮುಖೇನ ಬಡಪತ್ತ್ ಕುಟುಂಬಲೆಗ್ ಪನವುದ ಸಕಾಯ ಮಲ್ತೆರ್.
ನೆತ್ತ 95ನೇ ಮಾಸಿಕ ಯೋಜನೆದ ಅಕ್ಟೋಬರ್ ತಿಂಗೊಲ್ದ ಸೇವಾಯೋಜನೆಡ್ ಸಂಜೀವಿನಿರ್ದ್ ಒಟ್ಟು ಮಲ್ತಿನ ಒಟ್ಟು 1,47,000.00 ರೂ.ನ್ 4 ಮಾಸಿಕ ಸೇವಾಯೋಜನೆಗ್ ಬೊಕ್ಕ 5 ತುರ್ತು ಯೋಜನೆದಡಿಟ್ಟ್ ಒಟ್ಟು 9 ಫಲಾನುಭವಿಗ್ ಕೊರಿಯೆರ್.
ಕುಡ್ಲ: ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ (ರಿ.) ಕುಡ್ಲದ ಮುತಾಲಿಕೆಡ್ ಜಾಗತಿಕ ಬಂಟೆರೆನ ಕ್ರೀಡಾಕೂಟ ನಡತ್ಂಡ್.
ಈ ಕ್ರೀಡಾಕೂಟಡ್ ಆಂಜೋವುಲೆನ ವಿಭಾಗದ ಬಲ್ಲ್ ಒಯಿಪುನ ಪಂತೊಡು ಬಜಗೋಳಿ ಬಂಟೆರೆನ ಸಂಘ 1 ಲಕ್ಷ ರೂ. ದ ಸುರುತ್ತ ಇನಾಮು ಗೆಂದ್ ದ್ ಬಂಟ ಟ್ರೋಫಿನ್ ಪಡೆವೊಂದೆರ್.
ಮುಲ್ಕಿ: ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಲ್ಯರ್ದ್ ಪಿದಾಡಿನ ಧರ್ಮ ಸಂರಕ್ಷಣಾ ರಥ ಯಾತ್ರೆ ಶುಕ್ರವಾರ ರಾತ್ರೆ 8 ಗಂಟೆಗ್ ದಕ್ಷಿಣ ಕನ್ನಡ ಜಿಲ್ಲೆದ ಗಡಿಭಾಗದ ಮುಲ್ಕಿಗ್ ಬತ್ತ್ಂಡ್.
ಈ ಪೊರ್ತುಡು ಮುಲ್ಕಿ ಸೀಮೆದ ಒರ್ಂಬ ಮಾಗಣೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಅರ್ಚಕೆರ್ ನರಸಿಂಹ ಭಟ್ ಇಸೇಸ ಪೂಜೆ ಸಂದಾದ್ ಎದ್ಕೊನಿಯೆರ್.
ಮುಲ್ಕಿ ಸೀಮೆದ ಅರಸೆರಾಯಿನ ದುಗ್ಗಣ್ಣ ಸಾವಂತೆರ್ ಪಾತೆರ್ದ್, ಧರ್ಮ ಕ್ಷೇತ್ರಲೆಗ್ ಆಕ್ರಮಣ ಆನಗ ಸಮಾಜ ಅಲ್ಲೋಲ ಕಲ್ಲೋಲ ಆಪುಂಡು. ನೆನ್ ಉಂತಾಯೆರೆ ಧರ್ಮಕ್ಷೇತ್ರ ಸಂರಕ್ಷಣೆ ಮಲ್ಪುನ ಸದುದ್ದೇಶದೊಟ್ಟಿಗೆ ಧರ್ಮ ಸಂರಕ್ಷಣ ಯಾತ್ರಾ ಸಮಿತಿ ಯಾತ್ರೆ ಆಯೋಜನೆ ಮಲ್ದ್ಂಡ್. ರಥಯಾತ್ರೆನ್ ಯಶಸ್ವಿ ಮಲ್ಪರೆ ಬಿನ್ನಾಪು ಮಲ್ತೆರ್.
ಈ ಪೊರ್ತುಡು ಸಂಸದೆರ್, ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್, ಕುಡ್ಲ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಧರ್ಮದರ್ಶಿ ಡಾ. ಹರಿಕೃಷ್ಣ ಪುನರೂರು, ಮಾಜಿ ಧಾರ್ಮಿಕ ಪರಿಷತ್ ಸದಸ್ಯೆರ್ ಭುವನಾಭಿರಾಮ ಉಡುಪ, ದೇವಲ್ಯದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಗೌತಮ್ ಜೈನ್ ಮುಲ್ಕಿ ಅರಮನೆ, ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಮುಲ್ಕಿ ವಲಯದ ಗುರ್ಕಾರೆ ಬೊಕ್ಕ ಪದುಕೆರ್, ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.
ಬಂಟೆರ್ ಮುಟ್ಟಂದಿನ ಕ್ಷೇತ್ರನೇ ಇಜ್ಜಿ: ಗೃಹಸಚಿವೆರ್ ಡಾ.ಜಿ. ಪರಮೇಶ್ವರ್
ಒಡಿಪು: ವಿಶ್ವ ಬಂಟರ ಸಂಘಲೆನ ಒಕ್ಕೂಟದ ಮುತಾಲಿಕೆಡ್ ರಡ್ಡ್ ದಿನ ನಡತಿನ ವಿಶ್ವ ಬಂಟ ಸಮ್ಮೇಳನದ ಮುಗಿತಲದ ಲೇಸ್ ಅಮ್ಮಣ್ಣಿ ರಾಮಣ್ಣ ಮೈದಾನದ ಕನ್ಯಾನ ಸದಾಶಿವ ಶೆಟ್ಟಿ ಚಾವಡಿಡ್ ಐತಾರ ಬಯ್ಯಗ್ ನಡತ್ಂಡ್.
ಲೇಸ್ ದ ಚಾವಡಿಡ್ ರಾಜ್ಯ ಗೃಹಸಚಿವೆರ್ ಡಾ.ಜಿ. ಪರಮೇಶ್ವರ್ ಮೆರೆನ್ ತಮ್ಮನ ಮಲ್ತೆರ್. ಸನ್ಮಾನ ಸ್ವೀಕಾರ ಮಲ್ತಿನ ಮೇರ್ ಪಾತೆರ್ದ್, ಯಾನ್ ಮಸ್ತ್ ಸಂತೋಷಡ್ ಈ ಲೇಸ್ ಡ್ ಪಾಲ್ ಪಡೆವೊಂದು ಉಲ್ಲೆ. ಏಡ್ ಮುಟ್ಟಂದಿನ ಸೊಪ್ಪು ಇಜ್ಜಿ, ಬಂಟೆರ್ ಮುಟ್ಟಂದಿನ ಕ್ಷೇತ್ರನೇ ಇಜ್ಜಿ. ಕೈಗಾರಿಕೋದ್ಯಮ, ಬ್ಯಾಂಕಿಂಗ್ ಕ್ಷೇತ್ರ, ಸಿನಿಮಾ, ಕಲೆ, ಕೃಷಿ, ಹೋಟೆಲ್ ಇಂಚ ಮಾತೆಟ್ಲಾ ಬಂಟೆರ್ ಉಲ್ಲೆರ್. ನಮ್ಮ ದೇಶಗ್ ಕೀರ್ತಿನ್ ಕನತಿನಕುಲು ಬಂಟೆರ್. ಅಕ್ಲೆನ್ ಏತ್ ಪುಗರ್ಂಡಲ ಯಾವಂದ್. ಮಾತೆರೆನ್ಲಾ ಪ್ರೀತಿಸಾದ್ ಗೌರವಿಸಾವುನ ಬಂಟೆರೆ ಸಮ್ಮೇಳನ ಯಶಸ್ವಿ ಆವಡ್ ಪಂದ್ ಪಂಡೆರ್.
ಕುಡ್ಲ- ಬೆಂಗ್ಲೂರ್ ಕಾರಿಡಾರ್ ಡ್ ದಕ್ಷಿಣ ಕನ್ನಡ, ಒಡಿಪು ಜಿಲ್ಲೆಲು ಬೇಗಡ್ ಅಭಿವೃದ್ಧಿ ಆವರೆ ಉಂಡು. ಕೋಡೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೇರ್ ಬಂಟ ನಿಗಮ ಸ್ಥಾಪನೆ ಮಲ್ಪುವ ಪಂದ್ ಪಂಡೆರ್. ನಮ ಕೊರ್ನ ಪಾತೆರದಂಚೆನೆ ನಡತೊಂದು ಉಲ್ಲ. ಪ್ರಣಾಳಿಕೆಡ್ ಇಪ್ಪುನ ಮಾತ ಭರವಸೆನ್ ಈ 5 ವರ್ಷಡ್ ಖಂಡಿತ ಈಡೇರಿಸಾವ ಪಂದ್ ಭರವಸೆ ಕೊರಿಯೆರ್.
ಈ ಪೊರ್ತುಡು ರಾಜ್ಯ ಗೃಹಸಚಿವೆರ್ ಡಾ.ಜಿ. ಪರಮೇಶ್ವರ್, ಹೇರಂಬ ಇಂಡಸ್ಟ್ರಿಸ್ ಸಿಎಂಡಿ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಮಹಾದಾನಿ ಕನ್ಯಾನ ಸದಾಶಿವ ಶೆಟ್ಟಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ಟಿ, ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ್ ಶೆಟ್ಟಿ, ಖ್ಯಾತ ನಟೆ ರಿಷಭ್ ಶೆಟ್ಟಿ, ಬಂಜಾರ ಗ್ರೂಪ್ ದ ಸಿಎಂಡಿ ಕೆ. ಪ್ರಕಾಶ್ ಶೆಟ್ಟಿ, ಎಂಎಲ್ ಸಿ ಮಂಜುನಾಥ್ ಭಂಡಾರಿ, ಉದ್ಯಮಿ ಡಾ.ಎ. ಸದಾನಂದ ಶೆಟ್ಟಿ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಖ್ಯಾತ ಸಂಗೀತ ನಿರ್ದೇಶಕೆರ್ ಗುರುಕಿರಣ್, ಮಾಜಿ ಸಚಿವೆರ್ ರಮಾನಾಥ್ ರೈ, ಉದ್ಯಮಿ ಮುನಿಯಾಲ್ ಉದಯ ಕುಮಾರ್ ಶೆಟ್ಟಿ,
ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಇಂದ್ರಾಳಿ ಜಯಕರ ಶೆಟ್ಟಿ, ಕೋಶಾಧಿಕಾರಿ ಉಳ್ತೂರು ಮೋಹನ್ ದಾಸ್ ಶೆಟ್ಟಿ, ಜತೆ ಕಾರ್ಯದರ್ಶಿ ಚಂದ್ರಹಾಸ ಡಿ. ಶೆಟ್ಟಿ, ಕ್ರೀಡಾ ಸಂಚಾಲಕೆರ್ ಗಿರೀಶ್ ಶೆಟ್ಟಿ ತೆಳ್ಳಾರ್, ಸಹ ಸಂಚಾಲಕೆರ್ ಡಾ.ರೋಶನ್ ಕುಮಾರ್ ಶೆಟ್ಟಿ, ವಿಶ್ವ ಬಂಟರ ಸಾಂಸ್ಕೃತಿಕ ವೈಭವದ ಸಹ ಸಂಚಾಲಕೆರ್ ಕರ್ನೂರು ಮೋಹನ್ ರೈ, ಸಂಯೋಜಕೆರ್ ಸುಪ್ರಸಾದ್ ಶೆಟ್ಟಿ ಬೈಕಾಡಿ, ಮೋಹನ್ ಶೆಟ್ಟಿ ಒಡಿಪು ಪಾಲ್ ಪಡೆದಿತ್ತೆರ್.
ಚೀನಾದ ಮಾಜಿ ಪ್ರಧಾನಿ ಲಿ ಕೆಕಿಯಾಂಗ್ ತಿಗಲೆ ಬೇನೆಡ್ ತೀರ್ ಪೋಯೆರ್.
ಮೆರೆಗ್ 69 ವರ್ಷ ಆದಿತ್ತ್ಂಡ್. ಮೆರೆಗ್ ಕೋಡೆ ಒರಾನೇ ತಿಗಲೆ ಬೇನೆ ಬೈದ್ಂಡ್. ಕೂಡ್ಲೆ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಮೆರೆನ್ ಒರಿಪಾಯೆರೆ ಮಾತ ಪ್ರಯತ್ನಲ ನಡತ್ಂಡ್ ಆಂಡ ಇನಿ ಬೊಲ್ಪುಗು ತೀರ್ ಪೋಯೆರ್.
ಮೇರ್ 2022 ಮುಟ್ಟ CCP ಡ್ 2ನೇ ಮಲ್ಲ ಶಕ್ತಿಶಾಲಿ ವ್ಯಕ್ತಿ ಆದಿತ್ತೆರ್. ಮೇರ್ 2013-2023 ಮುಟ್ಟ ಚೀನಾದ ಪ್ರಧಾನಿಯಾದ್ ಸೇವೆ ಸಂದಾದೆರ್.
ಮೀರಾ ಭಾಯಂದರ್ ಟೀಮ್ ಯುವ ಬ್ರಿಗೇಡ್ ದ ಮುತಾಲಿಕೆಡ್ ಪಾವಂಜೆ ಮೇಳದಕ್ಲೆರ್ದ್ ಶ್ರೀ ದೇವಿ ಮಹಾತ್ಮೆ ಆಟ ನ.4 ಸನಿಯಾರ ಮೀರಾ ಭಾಯಂದರ್ ಇಂದ್ರಲೋಕ ಸ್ವರ್ಗೀಯ ಬಾಳ ಸಾಹೇಬ್ ಠಾಕ್ರೆ ಮೈದಾನಡ್ ನಡಪರೆ ಉಂಡು.
ತ್ರಿರಂಗ ಸಂಗಮದ ಒಟ್ಟುಸೇರಿಗೆಡ್ ಯಕ್ಷಧ್ರುವ ಪಟ್ಲ ಸತೀಶ್ ಶೆಟ್ಟಿ ಮೆರೆನ ಭಾಗವತಿಕೆಡ್ ಯಕ್ಷಗಾನ ನಡಪುಂಡು ಪಂದ್ ಮಾರ್ಗದರ್ಶಕೆರ್ ಸಚ್ಚಿದಾನಂದ ಶೆಟ್ಟಿ, ಗುರ್ಕಾರೆ ಅರುಣ್ ಶೆಟ್ಟಿ ಪಣಿಯೂರು ಬೊಕ್ಕ ಮಹಿಳಾ ವಿಭಾಗ, ಯುವ ವಿಭಾಗದ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
ನನ ಶಾಲೆದ ಮಾತ ಪಾಠ ಬೂಕುಡು ಇಂಡಿಯಾ ಪುದರ್ ದ ಬದಲ್ ಭಾರತ್ ಪಂದ್ ಸೇರ್ಸಾಯೆರೆ NCERT ಸಮಿತಿ ಶಿಫಾರಸು ಮಲ್ದ್ಂಡ್.
ವಿಪಕ್ಷಲು I.N.D.I.A ಮೈತ್ರಿಕೂಟ ಮಲ್ತಿನ ಬೊಕ್ಕ ಇಂಡಿಯಾ ಪದದ ಬಗೆಟ್ಟ್ ಪ್ರಧಾನಿ ಮೋದಿ ವ್ಯಂಗ್ಯ ಮಲ್ತ್ ದ್ ಇತ್ತೆರ್. ಬೊಕ್ಕ ರಾಷ್ಟ್ರಪತಿ ಭವನದ ಲೆಪ್ಪೋಲೆಡ್ ಭಾರತ್ ಪಂದ್ ನೊಂದಣಿ ಮಲ್ತಿನ ಮುಖೇನ ಈ ಪದ ಬಳಕೆಗ್ ಬೈದ್ಂಡ್. ಇತ್ತೆ ಪ್ರಧಾನಿ ಕಚೇರಿ ಸೇರಿನಂಚೆನೆ ಸುಮಾರ್ ಕೆಡೆಟ್ಟ್ ಇಂಡಿಯಾ ಬದಲ್ ಭಾರತ್ ಪನ್ಪುನ ಪದನ್ ಗಲಸೊಂದು ಉಲ್ಲೆರ್.
