ಬೆಂಗ್ಲೂರ್ SMS ಫ್ಯಾಮಿಲಿ ಅಟ್ಟಣೆ ಮಲ್ತಿನ SMS TROP HY-2023ದ ಲೆಕ್ಕೊಡು ವಾಲಿಬಾಲ್ ಬೊಕ್ಕ ತ್ರೋಬಾಲ್ ಮ್ಯಾಚ್ ಡ್ ಬಡಪತ್ತ್ ದ ಕ್ರೀಡಾಪಟುಲೆಗ್ ಉತ್ತೇಜನ ಕೊರ್ಪುನ ದಿಟ್ಟಿಡ್ ಸ್ಪಂದನ ಚಾರಿಟೇಬಲ್ ಟ್ರಸ್ಟ್ ದ ವಾಲಿಬಾಲ್ ಕೂಟ ಪಾಲ್ ಪಡೆತ್ಂಡ್.
ಬೆಂಗ್ಲೂರ್ ಸ್ಪಂದನ ಚಾರಿಟೇಬಲ್ ಟ್ರಸ್ಟ್ (ರಿ.) ಕರಿನ 5 ವರ್ಷೊದಿಂಚ ಪ್ರತಿ ಮೂಜಿ ತಿಂಗೊಲ್ ಗೊರ ಒಂಜೊಂಜೇ ಯೋಜನೆನ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆದ ಬಡಪತ್ತ್ ಜನಕ್ಲೆನ ಏಳಿಗೆಗಾದ್ ಎಡ್ಡೆ ಮನಸ್ಸ್ ರ್ದ್ ಬೆನೊಂದು ಉಂಡು.
ಉಪ್ಪು ಜಾಸ್ತಿ ತಿನ್ಪುನೆರ್ದ್ ಟೈಪ್-1 ಮಧುಮೇಹ ಬರ್ಪುಂಡು ಪಂದ್ ಅಮೆರಿಕದ ಲಾಸ್ ಏಂಜಲೀಸ್ ದ ಟುಲೇನ್ ವಿಶ್ವವಿದ್ಯಾಲಯ ನಡಪಾಯಿನ ಸಂಶೋಧನೆ ತೆರಿಪಾದ್ಂಡ್.
ಸುಮಾರ್ ವರ್ಷೊ ಮುಟ್ಟ ಬೇತೆ ಬೇತೆ ದೇಶದ 4 ಲಕ್ಷ ಜನನ್ ಸಮೀಕ್ಷೆ ಮಲ್ಪುನಗ ಉಂದು ಗೊತ್ತಾತ್ಂಡ್. ಉಪ್ಪು ತಿನ್ಪುನೆರ್ದ್ ಎಂಚ ಸಕ್ಕರೆ ಕಾಯಿಲೆ ಬರ್ಪುಂಡು ಪನ್ಪುನ ಬಗೆಟ್ಟ್ ಒವ್ವೇ ಸರಿಯಾಯಿನ ಕಾರಣ ಇಜ್ಜಿ. ಆಂಡ ಉಪ್ಪುರ್ದ್ ಬೊಜ್ಜು ಬೊಕ್ಕ ಚರ್ಬಿ ಎಚ್ಚಾಪುನವು ಸಕ್ಕರೆ ಸೀಕ್ ಬರಿಯೆರೆ ಕಾರಣ ಆದಿಪ್ಪು ಪಂದ್ ವರದಿ ಆತ್ಂಡ್.
ಸೋಮೇಶ್ವರ: ಕೊಲ್ಯ ಬಿಲ್ಲವ ಸೇವಾ ಸಮಾಜ ಟ್ರಸ್ಟ್ (ರಿ.) ಸಂಸ್ಥೆ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿನ್ ಪಡೆತ್ಂಡ್.
ಉಂದು ಧಾರ್ಮಿಕ ಬೊಕ್ಕ ಸಾಮಾಜಿಕ ಸೇವೆನ್ ಮಲ್ತ್ ದ್ ಗುರುತಿಸಾಯಿರ್ನೆದಾವೆರ ಈ ಪ್ರಶಸ್ತಿ ಬೈದ್ಂಡ್. ನೆತ್ತ ಗುರ್ಕಾರೆರೆಗ್, ಪದುಕೆರೆಗ್ ಬೊಕ್ಕ ಸರ್ವಸದಸ್ಯೆರೆಗ್ ಮಾತೆರೆಗ್ಲಾ ಅಭಿನಂದನೆ ಸಂದಾದೆರ್.
ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಅಂಗಸಂಸ್ಥೆ ನಿಟ್ಟೆ ಮಹಾಲಿಂಗ ಅಡ್ಯಂತಾಯ ಸ್ಮಾರಕ ತಾಂತ್ರಿಕ ಶಿಕ್ಷಣ ಸಂಸ್ಥೆದ ಗ್ರಂಥಪಾಲಕೆರ್ ಪ್ರೀತಮ್ ಶೆಟ್ಟಿ ಕೆ.ವಿ ಮೆರೆನ ಕರ್ನಾಟಕದ ತಾಂತ್ರಿಕ ಕಾಲೇಜ್ ದ ಶೈಕ್ಷಣಿಕ ಸಮುದಾಯಡ್ ವಿಟಿಯು ಒಕ್ಕೂಟದ ಉಪಯುಕ್ತತೆ ಬೊಕ್ಕ ಪರಿಣಾಮ ಪನ್ಪುನ ಇಸಯದ ಬಗೆಟ್ಟ್ ಮಂಡಿಸಾಯಿನ ಸಂಶೋಧನಾ ಮಹಾಪ್ರಬಂಧಗ್ ಬೆಳಗಾವಿದ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯ ಪಿಎಚ್.ಡಿ ಕೊರ್ತುಂಡು.
ಈ ಸಂಸ್ಥೆದ ಸ್ಥಾಪಕ ಗ್ರಂಥ ಪಾಲಕೆರಾದಿತ್ತಿನ ಯಾಜಿ ಡಾ.ಹೆಚ್ ದಿವಾಕರ ಭಟ್ ಮೆರೆನ ಮಾರ್ಗದರ್ಶನಡ್ ಈ ಪ್ರಬಂಧನ್ ಮಂಡಿಸಾಯಿನ ಮೇರ್ ಬೆದ್ರ ಆಳ್ವಾಸ್ ಶಿಕ್ಷಣ ಸಂಸ್ಥೆಡ್16 ವರ್ಷ ಗ್ರಂಥಪಾಲಕೆರಾದ್ ಸೇವೆ ಸಂದಾದೆರ್. ಮೇರ್ ಒಡಿಪು ದೆಂದೂರ್ ಕಟ್ಟೆ ಕೌಸ್ತುಭ ನಿಲಯದ ಟಿ. ವಿಠಲ್ ಶೆಟ್ಟಿ ಬೊಕ್ಕ ಸುಮಾ ವಿ ಶೆಟ್ಟಿ ದಂಪತಿಲೆನ ಮಗೆ.
ಮಿಜಾರ್ ತುಳುನಾಡ ಪೊರ್ಲು ಚಾರಿಟೆಬಲ್ ಟ್ರಸ್ಟ್ (ರಿ.) ದ 33ನೇ ತುರ್ತು ಸೇವಾ ಯೋಜನೆನ್ ಒಂಜಿ ಸರ್ಕಾರಿ ಶಾಲೆಗ್ ಕೊರಿಯೆರ್.
ಕುಡ್ಲ ತಾಲೂಕ್ ದ ಬಡಗ ಎಡಪದವು ಸರಕಾರಿ ಕಿರಿಯ ಪ್ರಾಥಮಿಕ ಶಾಲೆ ತಿಪ್ಲಬೆಟ್ಟುದ ಕಟ್ವಾನದ ಗೋಡೆದ ಸುಣ್ಣ ಬಣ್ಣ ಪೋದಿತ್ತ್ಂಡ್. ಅಂಚಾದ್ ಗೋಡೆಗ್ ಸುಣ್ಣ ಬಣ್ಣ ಪಾಡ್ದ್ ಪೊರ್ಲು ಮಲ್ಪೊಡು ಪಂದ್ ಶಾಲೆದ ಮುಖ್ಯ ಶಿಕ್ಷಕೆರ್ ಬಿನ್ನಾಪು ಮಲ್ತ್ ದ್ ಇತ್ತೆರ್. ಮೆರೆನ ಬಿನ್ನಾಪುನು ಮಾನ್ಯ ಮಲ್ತಿನ ಅಕುಲು ಸರ್ಕಾರಿ ಶಾಲೆನ್ ಒರಿಪಾವುನ ದಿಟ್ಟಿಡ್ ಶಾಲೆದ ಗೋಡೆದ ಸುಣ್ಣ ಬಣ್ಣ ಕೊರ್ದು ಪೊರ್ಲು ಮಲ್ತ್ ಕೊರಿಯೆರ್.
ಈ ಪೊರ್ತುಡು ಊರುದ ಮುಖ್ಯಸ್ಥೆರ್ ಸುದರ್ಶನ್ ಪೂಂಜ, ಬಡಗ ಎಡಪದವು ಪಂಚಾಯತ್ ದ ಮಾಜಿ ಗುರ್ಕಾರೆ ಹರೀಶ್ ಕೆವಿ, ಒತ್ತು ಗುರ್ಕಾರೆ ಚಂದ್ರಹಾಸ್ ಉರ್ಕಿ, ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ದ ಸಲಹೆಗಾರೆ ತಾರನಾಥ ಸಪಲಿಗ ಮಿಜಾರ್ ಬೊಕ್ಕ ಕಾರ್ಯದರ್ಶಿ ದಯಾನಂದ ಮಿಜಾರ್, ಕೇಶವ ಮೇಸ್ತ್ರಿ, ಆದಿ ದ್ರಾವಿಡ ಸಂಘ ಮಿಜಾರ್ ದ ಗುರ್ಕಾರೆ ರಾಜೇಶ್ ಲತ್ರಟ ಬೊಕ್ಕ ಸದಸ್ಯೆರ್, ಶಾಲೆದ ಮುಖ್ಯ ಅಧ್ಯಾಪಕೆರ್ ವೀಣಾ ರೇಗೋ, ಶಾಲಾ ಶಿಕ್ಷಕಿ ಚಂದ್ರಿಕಾ, ಶಾಲೆದ ಜೋಕುಲು, ಜೋಕುಲೆನ ಪೋಷಕೆರ್, ಟ್ರಸ್ಟ್ ದ ಪದುಕೆರ್ ಪಾಲ್ ಪಡೆದಿತ್ತೆರ್.
ಕನ್ನಡ ಸೇವಾ ಸಂಘ ಪೊವಾಯಿ ಸದಸ್ಯರಾಯಿನ ಪ್ರಕಾಶ್ ಶೆಟ್ಟಿ ಪನಿಯೂರ್ ಬೊಕ್ಕ ಮೂಡಬಿದ್ರಿ ಅಶ್ವಥಪುರ ಕೊಂಡಬೆಟ್ಟು ಶ್ರೀಮತಿ ಅಂಬಿಕಾ ಶೆಟ್ಟಿ ದಂಪತಿಲೆನ ಮಗಲ್ ಕು. ಅನ್ವಿ ಶೆಟ್ಟಿಗ್ 2023ನೇ ಕಲ್ಕೂರ ಪ್ರತಿಷ್ಠಾನ ದಕ್ಷಿಣ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿನ್ ಪಡೆಯೊಂದೆರ್.
ಮೇರ್ ಎಸ್ ಎಂ ಶೆಟ್ಟಿ ಹೈ ಸ್ಕೂಲ್ ಪೊವಾಯಿ, 8 ನೇ ತರಗತಿಡ್ ಕಲ್ತೊಂದು ಉಲ್ಲೆರ್. ಕರಿನ 4 ವರ್ಷರ್ದ್ ಚಿಣ್ಣರ ಬಿಂಬದ ವಿದ್ಯಾರ್ಥಿಯಾದ್ ಉಲ್ಲೆರ್.
ಮಾಟುಂಗಾ (ಪೂರ್ವ) ದ ಬೊಂಬೈ ಕನ್ನಡ ಸಂಘದ ಮುತಾಲಿಕೆಡ್ ಪ್ರತಿ ವರ್ಷಲ ಜೋಕುಲೆನ ದಿನಾಚರಣೆದ ಪೊರ್ತುಡು ಲೇಖನಿ ಸಾಮಗ್ರಿ ದೆತೊನಿಯೆರೆ ಬೊಂಬೈದ ಕನ್ನಡ ಮಾಧ್ಯಮದ ಒಂಜಿ ಶಾಲೆಗ್ ಪನವುದ ಸಕಾಯನ್ ಕೊರೊಂದು ಉಂಡು.
ಈ ವರ್ಷದ ಲೆಕ್ಕೊಡು ಆಂಧೇರಿದ ನಿತ್ಯಾನಂದ ಮಾರ್ಗ ಹಿರಿಯ ಮಾಧ್ಯಮಿಕ ಮುನಿಸಿಪಲ್ ಕನ್ನಡ ಶಾಲೆನ್ ಆಯ್ಕೆ ಮಲ್ದ್ಂಡ್. ಬೊಂಬೈ ಕನ್ನಡ ಸಂಘದ ಕಾರ್ಯದರ್ಶಿ ಸೋಮನಾಥ ಎಸ್.ಕರ್ಕೇರ ಬೊಕ್ಕ ಜತೆ ಕಾರ್ಯದರ್ಶಿ ಮಲ್ಲಿಕಾರ್ಜುನ ಬಡಿಗೇರೆರ್ ಪನವುದ ಸಕಾಯನ್ ಶಾಲೆದ ಶಿಕ್ಷಕೆರ್ ಸಂಜಯ ಮಾಸ್ಯಾಳ ಬೊಕ್ಕ ರಮೇಶ ದೂದಗಿ ಮೆರೆಗ್ ಕೊರಿಯೆರ್.
ಈ ಪೊರ್ತುಡು ಶಾಲೆದ ಪ್ರತಿಭಾವಂತ ವಿದ್ಯಾರ್ಥಿನಿ ಚಂದ್ರಕಲಾ ಚವ್ಹಾನ್‌ರೆಗ್ ಸೋಮನಾಥ ಎಸ್ ಕರ್ಕೇರ ಬೊಕ್ಕ ಪ್ರತಿಭಾವಂತ ವಿದ್ಯಾರ್ಥಿ ಸಿದ್ಧಾರ್ಥ ಕುಂಬಾರ ಮೊಕ್ಲೆಗ್ ಸಂಘದ ಕೋಶಾಧಿಕಾರಿ ರಾಜೇಂದ್ರ ಗಡಿಯಾರ ಮೆರೆನ ಮುತಾಲಿಕೆಡ್ ವಿಶೇಷ ನಗದು ಪನವುದ ಸಕಾಯನ್ ಕೊರಿಯೆರ್.
ಕಾರ್ಲ: ಇತ್ತೆದ ಪುಗರ್ತೆದ ಕಲಾವಿದೆರೆನೊಟ್ಟಿಗೆ ಒಂಜಿ ದಿನ ಕಳೆವೊನೇ ಕಷ್ಟ ಪನ್ಪುನ ಪರಿಸ್ಥಿತಿ ಇತ್ತ್ಂಡ್. ಯಕ್ಷಗಾನ ಕ್ಷೇತ್ರಡ್ 23 ವರ್ಷೊದಿಂಚ ಸೇವೆ ಸಂದಾವೊಂದು ಉಲ್ಲೆ. ಕಲಾವಿದೆರೆನ ಕಷ್ಟನ್ ಮಸ್ತ್ ಕೈತಲ್ ರ್ದ್ ತೂಯಿನಾಯೆ ಯಾನ್. ಕಲಾವಿದೆರೆಗ್ ಪನವುದ ಸಕಾಯ ಕೊರ್ಪುನ ದಿಟ್ಟಿಡ್ ಪಟ್ಲ ಫೌಂಡೇಶನ್ ಟ್ರಸ್ಟ್ ಸುರು ಆಂಡ್. ಟ್ರಸ್ಟ್‌ದ ಕಾರ್ಯವೈಖರಿಡ್ ಯಾನ್ ಕೇವಲ ನಿಮಿತ್ತ, ಮಾತಲ ಕಟೀಲ್ ಅಮ್ಮನ ಕೃಪೆ. ಹೃದಯ ಶ್ರೀಮಂತ ದಾನಿಲೆರ್ದ್ ನಮ್ಮ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಕಲಾಸೇವೆಡ್ ದುಂಬಾರಿವೊಂದು ಉಂಡು ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್‌ದ ಸ್ಥಾಪಕಾಧ್ಯಕ್ಷೆರ್ ಸತೀಶ್ ಶೆಟ್ಟಿ ಪಟ್ಲ ಪಂಡೆರ್.
ಮೇರ್ ನ.2 ಕ್ಕ್ ಗೋವಾ ಪಣಜಿ ಇನ್ಸಿಟ್ಯೂಟ್‌ ಮೆನೆಜಸ್‌ ಬ್ರಗಾನ್ಸಾ ಸಭಾಗೃಹಡ್ ನಡತಿನ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಗೋವಾ ಘಟಕದ ಉದಿಪನ ಲೇಸ್ ಡ್ ಪಾತೆರಿಯೆರ್.
ಲೇಸ್ ದ ಉದಿಪನ ಮಲ್ತಿನ ಬೈಂದೂರು ವಿಧಾನ ಸಭಾ ಕ್ಷೇತ್ರದ ಶಾಸಕೆರ್ ಗುರುರಾಜ್‌ ಗಂಟಿಹೊಳೆ ಪಾತೆರ್ದ್, ಯಕ್ಷಗಾನ ನಮ್ಮ ಕರಾವಳಿಗ್ ದೇವೆರ್ ಕೊರ್ನ ಕಾಣಿಕೆ. ಯಕ್ಷಗಾನ ಸಂಸ್ಕಾರನ್ ಕಲ್ಪಾವೊಂಡು. ಉಂದು ಎಡ್ಡೆ- ಆಳ್ ದ ಬಗೆಟ್ಟ್ ಜನಕ್ಲೆಗ್ ತೆರಿಪಾವೊಂಡು. ಯಕ್ಷಗಾನ ಸಾಂಸ್ಕೃತಿಕವಾದ್, ಸಾಮಾಜಿಕವಾದ್ ಘನತೆನ್ ಎಚ್ಚ ಮಲ್ಪೊಂಡು ಪನ್ಪುನೆಕ್ಕ್ ಪಟ್ಲ ಫೌಂಡೇಶನ್ ದ ಲೇಸ್ ಲೇ ಸಾಕ್ಷಿ ಪಂದ್ ಪಂಡೆರ್.
ಕಂಬುಲ ಕ್ಷೇತ್ರದ ಸಾಧನೆಗಾದ್ ಸದಾನಂದ ಶೆಟ್ಟಿ ಬೆಳುವಾಯಿ ಬೊಕ್ಕ ಅಶೋಕ್‌ ಶೆಟ್ಟಿ ಬೇಲಾಡಿ, ಕ್ರೀಡಾ ಕ್ಷೇತ್ರದ ಸಾಧನೆಗಾದ್ ಜಯ ಶೆಟ್ಟಿ ಗೋವಾ, ಯಕ್ಷಗಾನ ಭಾಗವತೆರ್ ಸದಾಶಿವ ಅಮಿನ್‌ ಕೊಕ್ಕರ್ಣೆ, ಯಕ್ಷಗಾನ ಕಲಾವಿದೆರ್ ಸತೀಶ್ ಮೊಗವೀರ ಹಾಲಾಡಿ, ವಿಶ್ವನಾಥ ಪೂಜಾರಿ ಎಣ್ಣೆಬೈಲು, ರಾಕೇಶ್‌ ಶೆಟ್ಟಿ ಮೇಘರವಳ್ಳಿ, ನವೀನ್‌ ಶಾನುಭೋಗ್‌, ಒಡಿಪು ಜಿಲ್ಲಾ ಪ್ರಶಸ್ತಿ ಪುರಸ್ಕೃತೆರ್ ಉಪ್ಪುಂದ ನಾಗೇಂದ್ರ ರಾವ್‌, ಸತೀಶ್ ಶೆಟ್ಟಿ ಪಟ್ಲ ಬೊಕ್ಕ ಶಶಿಧರ್‌ ಶೆಟ್ಟಿ ಬರೋಡಾ ಮೊಕ್ಲೆಗ್ ಸನ್ಮಾನ ಮಲ್ತೆರ್.
ದೇಣಿಗೆ ಕೊರ್ಪುನ ಗೋವಾ ಘಟಕರ್ದ್ ಪಟ್ಲ ಫೌಂಡೇಶನ್‌ದ ಕೇಂದ್ರ ಘಟಕಗ್ 1 ಲಕ್ಷ ರೂ. ದೇಣಿಗೆನ್ ಪಟ್ಟಿಯೆರ್. ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್‌ದ ಗೋವಾ ಘಟಕದ ಮಾನಾದಿಗೆದ ಗುರ್ಕಾರೆ ವಿಜಯೇಂದ್ರ ಶೆಟ್ಟಿ ದಂಪತಿನ್ ಬೊಕ್ಕ ಗುರ್ಕಾರೆ ಗಣೇಶ್‌ ಶೆಟ್ಟಿ ಇರ್ವತ್ತೂರು ದಂಪತಿಗ್ ಅಭಿನಂದನೆ ಮಲ್ತೆರ್.
ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್‌ದ ಪ್ರಧಾನ ಸಂಚಾಲಕೆರ್, ತುಳುಕೂಟ ಬರೋಡದ ಗುರ್ಕಾರೆ ಶಶಿಧರ್‌ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಈ ಪೊರ್ತುಡು ಕುಡ್ಲ ಘಟಕದ ಗುರ್ಕಾರೆ ತಾರನಾಥ ಶೆಟ್ಟಿ, ಗುಜರಾತ್‌ ಘಟಕದ ಅಜಿತ್‌ ಶೆಟ್ಟಿ, ಗೋವಾ ಬಂಟರ ಸಂಘದ ಗುರ್ಕಾರೆ ಶಶಿಧರ್‌ ನಾಯಕ್, ಬಿಲ್ಲವ ಸಂಘದ ಗುರ್ಕಾರೆ ನಾಗೇಶ್‌ ಪೂಜಾರಿ, ಆರ್‌ಎಸ್‌ಎಸ್‌ ಗೋವಾ ವಿಭಾಗದ ಸಂಘ ಸಂಚಾಲಕೆರ್ ಸಿಎ ರಾಜೇಂದ್ರ ಬೊಬೈ, ನಾರಾಯಣಗುರು ಸೇವಾ ಟ್ರಸ್ಟ್ ಗುರ್ಕಾರೆ ಪ್ರಕಾಶ್ ಪೂಜಾರಿ, ಕೋಶಾಧಿಕಾರಿ ಸುದೇಶ್‌ ಕುಮಾರ್‌ ರೈ, ಸಂಘಟನಾ ಕಾರ್ಯದರ್ಶಿ ಕದ್ರಿ ನವನೀತ ಶೆಟ್ಟಿ, ಜತೆ ಕಾರ್ಯದರ್ಶಿ ರವಿಚಂದ್ರ ಶೆಟ್ಟಿ, ಸಂಘಟನಾ ಕಾರ್ಯದರ್ಶಿ ಜಗನ್ನಾಥ ಶೆಟ್ಟಿ, ಪ್ರದೀಪ್‌ ಆಳ್ವ, ಪ್ರಸನ್ನ ಶೆಟ್ಟಿ ಬೈಲೂರು, ಪಳ್ಳಿ ಘಟಕದ ಗುರ್ಕಾರೆ ಸುನಿಲ್‌ ಶೆಟ್ಟಿ, ರಾಜೇಶ್ ಶೆಟ್ಟಿ, ಕರ್ನೂರು ಸುಭಾಷ್‌ ರೈ, ಗೋವಾ ಘಟಕದ ಕಾರ್ಯದರ್ಶಿ ಸುನಿಲ್‌, ಖಜಾಂಚಿ ಮೋಹನ್‌ದಾಸ್ ಶೆಟ್ಟಿ, ಸಂಚಾಲಕೆರ್ ಅಶೋಕ್‌ ಶೆಟ್ಟಿ ಪಾಲ್ ಪಡೆದಿತ್ತೆರ್.
ಆನಂದ್ ಶೆಟ್ಟಿ ಬೊಕ್ಕ ಕೂಟದಕುಲು ಪ್ರಾರ್ತನೆ ಮಲ್ತೆರ್. ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್‌ದ ಗೋವಾ ಘಟಕದ ಗುರ್ಕಾರೆ ಗಣೇಶ್‌ ಶೆಟ್ಟಿ ಇರ್ವತ್ತೂರು ಎದ್ಕೊಂಡೆರ್. ಕುಡ್ಲ ಯಕ್ಷಧ್ರುವ ಪಟ್ಲ ಫೌಂಡೇಶನ್‌ದ ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಕೆ. ಭಂಡಾರಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ನಿತೇಶ್ ಶೆಟ್ಟಿ ಎಕ್ಕಾರು ಲೇಸ್ ದ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್.
ಬೊಂಬೈ ಬಿಲ್ಲವರ ಸಂಘದ ಮುತಾಲಿಕೆಡ್ ಯುವ ಕಲ್ಯಾಣ ಉಪ ಸಮಿತಿ ಆಯೋಜನೆ ಮಲ್ತಿನ ಕಾಂತಾಬಾರೆ-ಬೂದಬಾರೆ ಒಳಾಂಗಣ ಗೊಬ್ಬುದ ಕೂಟ ನ.19 ಕ್ಕ್ ಸಾಂತಾಕ್ರೂಜ್ ಬಿಲ್ಲವ ಭವನಡ್ ನಡಪರೆ ಉಂಡು.
ಈ ಕೂಟೊಡು ಕೇರಂ, ಚೆಸ್, ಡ್ರಾಯಿಂಗ್, ರಂಗೋಲಿ ಪಂತೊ ನಡಪರೆ ಉಂಡು.
