ಕಾರ್ಲದ ಸುದ್ದಿ Karkala News

ಫೆ.21: ಶ್ರೀ ಕೊಂಡೇಲ್ತಾಯ, ರಕ್ತೇಶ್ವರಿ, ಪಂಜುರ್ಲಿ ದೈವದ ಪ್ರತಿಷ್ಠೆ ಬೊಕ್ಕ ಕಲಶಾಭಿಷೇಕ

ಕಟೀಲು ಕೈತಲ್ದ ಕೊಂಡೇಲ ಶ್ರೀ ಕೊಂಡೇಲ್ತಾಯ ದೈವಸ್ಥಾನ ಸಂಪೂರ್ಣ ಜೀರ್ಣೋದ್ಧಾರ ಆದ್ ಇತ್ತೆ ಸುಮಾರ್ 400 ವರ್ಷರ್ದ್ ಬೊಕ್ಕ ನೇಮೋತ್ಸವ ನಡಪರೆ ಉಂಡು ಪಂದ್ ಕೊಂಡೇಲ್ತಾಯ ದೈವಸ್ಥಾನದ ಅಧ್ಯಕ್ಷೆರ್ ಲೋಕಯ್ಯ ಸಾಲಿಯಾನ್ ಕೊಂಡೇಲ ಪಂಡೆರ್ .

ಆರ್ ಶ್ರೀ ಕೊಂಡೇಲ ದೈವಸ್ಥಾನಡ್ ನಡತಿನ ಪತ್ರಿಕಾಗೋಷ್ಠಿಡ್ ಈ ಬಗೆಟ್ಟ್ ಮಾಹಿತಿ ಕೊರಿಯೆರ್.

ಫೆ.21 ಬುಧವಾರ ಕಾಂಡೆ 11.37ಕ್ಕ್ ಸಿತ್ಲ ಶ್ರೀ ರಾಮಚಂದ್ರ ರಾವ್ ಮೆರೆನ ಪೌರೋಹಿತ್ಯಡ್ ಶ್ರೀ ಕೊಂಡೇಲ್ತಾಯ, ರಕ್ತೇಶ್ವರಿ ಬೊಕ್ಕ ಪಂಜುರ್ಲಿ ದೈವಲೆನ ಪ್ರತಿಷ್ಠೆ ಬೊಕ್ಕ ಕಲಶಾಭಿಷೇಕ ನಡಪರೆ ಉಂಡು ಪಂದ್ ತೆರಿಪಾಯೆರ್.

ನೆತ್ತ ಹಿನ್ನೆಲೆಡ್ ಫೆ.19 ಸೋಮವಾರ ಕಾಂಡೆ 9 ಗಂಟೆಗ್ ಆಲಯ ಪರಿಗ್ರಹ 10 ಗಂಟೆಗ್ ದೇವತಾ ಪ್ರಾರ್ಥನೆ, ತೋರಣ ಮುರ್ತ, ಉಗ್ರಾಣ ಮುರ್ತ ಬಯ್ಯಡ್ 5.39 ಗು ಸ್ವಸ್ತಿ ಪುಣ್ಯಾಹ, ಪ್ರಾಸಾದ ಶುದ್ಧಿ, ರಾಕ್ಷೋಘ್ನ ಹೋಮ, ವಾಸ್ತುಹೋಮ, ವಾಸ್ತು ಪೂಜೆ, ದಿಕ್ಪಾಲ ಬಲಿ ಇಂಚಿನ ಧಾರ್ಮಿಕ ವಿಧಿಕ್ಕುಲು ನಡಪರೆ ಉಂಡು. ಫೆ.20 ಅಂಗಾರೆ ಕಾಂಡೆ 8 ಗಂಟೆಗ್ ಗಣಹೋಮ, ನವಗ್ರಹ ಶಾಂತಿ, ಶಾಂತಿ ಪ್ರಾಯಶ್ಚಿತ್ತ ಹೋಮ ಬಯ್ಯಗ್ 5.30 ಗು ಭೂವರಾಹ ಹೋಮ, ಭದ್ರಕ ಮಂಡಲ ಪೂಜೆ, ದುರ್ಗಾನಮಸ್ಕಾರ ಪೂಜೆ, ದೈವಲೆನ ಬಿಂಬ ಶುದ್ಧಿ, ಅಧಿವಾಸ, ಕಲಶ ಮಂಡಲ ರಚನೆ ಇಂಚಿನ ಧಾರ್ಮಿಕ ವಿಧಿವಿಧಾನ ಫೆ.21 ಬುಧವಾರ ಕಾಂಡೆ 8 ಗಂಟೆರ್ದ್ ಗಣಪತಿ ಹೋಮ, ದೈವಲೆನ ಕಲಶಾಧಿವಾಸ, ಅಧಿವಾಸ ಹೋಮ ಇಂಚ ಧಾರ್ಮಿಕ ಕಾರ್ಯಕ್ರಮ ಅಂಚೆನೆ ರಾತ್ರೆ 9 ರ್ದ್ ಶ್ರೀ ಕೊಂಡೇಲ್ತಾಯ ಅಂಚೆನೆ ಪರಿವಾರ ದೈವೊಲೆನ ನೇಮೋತ್ಸವ ಬೊಕ್ಕ ಪ್ರತೀ ದಿನ ಮಧ್ಯಾಹ್ನ ಬೊಕ್ಕ ರಾತ್ರೆ ಅನ್ನಸಂತರ್ಪಣೆ ನಡೆಪರೆ ಉಂಡು ಪಂಡೆರ್.

ಸಮಿತಿದ ಪ್ರಧಾನ ಕಾರ್ಯದರ್ಶಿ ಈಶ್ವರ್ ಕಟೀಲ್ ಪಾತೆರ್ದ್, ಬ್ರಹ್ಮ ಕಲಶೋತ್ಸವದ ನಿಲೆಟ್ಟ್ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಇತ್ತ್ ದ್ ಫೆ.19 ರಾತ್ರೆ 7 ಗಂಟೆಗ್ ಸಭಾ ಕಾರ್ಯಕ್ರಮ ನಡಪರೆ ಉಂಡು. ಲೇಸ್ ದ ಅಧ್ಯಕ್ಷತೆನ್ ಕೆ.ಪಿ.ಸಿ.ಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ವಹಿಸರೆ ಉಲ್ಲೆರ್ ಪಂದ್ ಕಟೀಲು ದೇವಲ್ಯದ ಪ್ರಧಾನ ಅರ್ಚಕೆರಾಯಿನ ವೆಂಕಟರಮಣ ಆಸ್ರಣ್ಣ, ಕಮಲಾದೇವಿಪ್ರಸಾದ್ ಆಸ್ರಣ್ಣ, ನಿವೃತ್ತ ಶಿಕ್ಷಕೆರ್ ಬಾಲಕೃಷ್ಣ ಉಡುಪ ಆಶೀರ್ವಚನ ಕೊರಿಯರೆ ಉಲ್ಲೆರ್. ಕೊಡೆತ್ತೂರು ಭುವನಾಭಿರಾಮ ಉಡುಪ ಧಾರ್ಮಿಕ ಉಪನ್ಯಾಸ ಕೊರಿಯರೆ ಉಲ್ಲೆರ್. ಕೊಡೆತ್ತೂರು ಜಯರಾಮ ಮುಕಾಲ್ದಿ ನಿತಿನ್ ಹೆಗ್ಡೆ ಕಾವರಮನೆ ಬೊಕ್ಕ ಮಲ್ಲ ಮಲ್ಲ ಬಿನ್ನೆರ್ ಪಾಲ್ ಪಡೆಯರೆ ಉಲ್ಲೆರ್. ಫೆ.21 ರಾತ್ರೆ 7 ಗಂಟೆಗ್ ನಡಪುನ ಸಭಾ ಕಾರ್ಯಕ್ರಮಡ್ ಶಾಸಕೆರ್ ಉಮಾನಾಥ ಕೊಟ್ಯಾನ್ ಅಧ್ಯಕ್ಷತೆ ವಹಿಸರೆ ಉಲ್ಲೆರ್. ಕಟೀಲ್ ದೇವಳದ ಅರ್ಚಕೆರಾಯಿನ ಲಕ್ಷೀನಾರಾಯಣ ಆಸ್ರಣ್ಣ, ಅನಂತಪದ್ಮನಾಭ ಆಸ್ರಣ್ಣ, ಕೊಡೆತ್ತೂರು ದೇವಸ್ಯ ಮಠ ವೇದವ್ಯಾಸ ಉಡುಪ ಆಶೀರ್ವಚನ ಮಲ್ಪರೆ ಉಲ್ಲೆರ್. ಹರಿನಾರಾಯಣ ದಾಸ ಆಸ್ರಣ್ಣ ಧಾರ್ಮಿಕ ಉಪನ್ಯಾಸ ಮಲ್ಪರೆ ಉಲ್ಲೆರ್. ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಕಟೀಲ್ ದೇವಳದ ಮೊಕ್ತೇಸರೆರ್ ಸನತ್ ಕುಮಾರ್ ಶೆಟ್ಟಿ ಕೊಡೆತ್ತೂರುಗುತ್ತು ಸೇರ್ದ್ ಮಸ್ತ್ ಜನ ಬಿನ್ನೆರ್ ಪಾಲ್ ಪಡೆಯರೆ ಉಲ್ಲೆರ್. ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾದ್ ಫೆ.19ಕ್ಕ್ ಕೈತಲ್ದ ಜೋಕ್ಲೆರ್ದ್ ಸಾಂಸ್ಕೃತಿಕ ವೈಭವ, ರಾತ್ರೆ 9ರ್ದ್ ಶಾರದಾ ಆರ್ಟ್ಸ್ ಕಲಾವಿದರೆರ್ದ್ “ಕಥೆ ಎಡ್ಡೆಂಡು” ತುಳು ನಾಟಕ ಫೆ.20 ಬಯ್ಯಡ್ 7 ರ್ದ್ ಯಕ್ಷಗಾನ ನಾಟ್ಯ ವೈಭವ ಫೆ. 21 ಕ್ಕ್ ಕಟೀಲ್ ಶಿಕ್ಷಣ ಸಂಸ್ಥೆದ ವಿದ್ಯಾರ್ಥಿಲೆರ್ದ್ ನೃತ್ಯ ವೈಭವ ನಡಪರೆ ಉಂಡು. ಈ ಮಾತ ಕಾರ್ಯಕ್ರಮೊಗು ಭಕ್ತೆರ್ನ ಪ್ರೋತ್ಸಾಹ ಅಗತ್ಯ ಪಂದ್ ಪಂಡೆರ್.
ಪತ್ರಿಕಾ ಗೋಷ್ಠಿಡ್ ಗಣೇಶ್ ಶೆಟ್ಟಿ ಮಿತ್ತಬೈಲ್ ಗುತ್ತು, ದೊಡ್ದಯ್ಯ ಶೆಟ್ಟಿ ಪಾದೆಮನೆ, ವಿಕೇಶ್ ಕೋಟ್ಯಾನ್ ಜಲ್ಲಿಗುಡ್ಡೆ, ನವೀನ್ ಶೆಟ್ಟಿ ಪಾದೆಮನೆ, ಅಶೋಕ್ ಸುವರ್ಣ ಕಟೀಲು ಇತ್ತೆರ್.

ಜಾತಿ,ಮತ, ಧರ್ಮ ಸೌಹಾರ್ದತೆಗ್ ಸಾಕ್ಷಿಯಾಯಿನ ಬಲ್ಲಂಗುಡೇಲು ಶ್ರೀ ಪಾಡಂಗರೆ ಭಗವತೀ ಕ್ಷೇತ್ರ ಸಮಿತಿ

 ಮಂಜೇಶ್ವರ : ನಮ್ಮ ನಾಡ್‌ಡ್ ಜಾತಿ,ಮತ,ಧರ್ಮದ,ರಾಜಕೀಯದ ನೆಪಟ್ಟ್ ಪರಸ್ಪರ ಜನಕ್ಕುಲು ಕಂಟ್ಯೊಂದು ಇಪ್ಪುನಗ ಮಂಜೇಶ್ವರದ ಮಣ್ಣ್‌ಡ್ ಮತ ಸೌಹಾರ್ದತೆನ್ ಕಾಪುನ ಧಾರ್ಮಿಕ ಶ್ರದ್ಧಾ ಕೇಂದ್ರ ಶತಾಯ ಗತಾಯ ಪ್ರಯತ್ನ ಮಲ್ತೊಂದು ಉಂಡು ಪನ್ಪುನೆಕ್ಕ್ ಬಲ್ಲಂಗುಡೇಲು ಶ್ರೀ ಪಾಡಂಗರೆ ಭಗವತೀ ಕ್ಷೇತ್ರ ಪಟ್ಟತ್ತೂರು ಜುಮಾ ಮಸೀದಿ ಸಾಕ್ಷಿಯಾದ್ ನಾಡ್‌ಗ್‌ ಮಾದರಿಯಾತ್‌ಂಡ್.‌

ಬಲ್ಲಂಗುಡೇಲು ಶ್ರೀ ಪಾಡಂಗರೆ ಭಗವತೀ ಕ್ಷೇತ್ರಡ್ ಫೆ.24 ರ್ದ್ ಫೆ.26 ಮುಟ್ಟ ಪುನರ್ ಪ್ರತಿಷ್ಠ ಬ್ರಹ್ಮಕಲಶೋತ್ಸವ ಬೊಕ್ಕ ಮಾ.1 ರ್ದ್‌ ಮಾ.8 ಮುಟ್ಟ ಕಳಿಯಾಟ ಮಹೋತ್ಸವ ನಡಪೆರೆ ಉಂಡು. ನೆತ್ತ ಪ್ರಯುಕ್ತ ಆಸ್ತಿಕ ಬಂಧುಲೆನ್ ಆಹ್ವಾನ ಮಲ್ಪುನ, ಅಂಚನೆ ಪಟ್ಟತ್ತೂರು ಜುಮಾ ಮಸೀದಿದ ಅಧ್ಯಕ್ಷೆರ್ ಬೊಕ್ಕ ಪದಾಧಿಕಾರಿಲೆನ್ ವಿಶೇಷ ಆಹ್ವಾನ ಮಲ್ಪೆರೆ ಶುಕ್ರವಾರ ಜುಮಾ ನಮಾಜು ನಡಪುನ ಪೊರ್ತುಡು ಕ್ಷೇತ್ರದ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಪದಾಧಿಕಾರಿಲು ಲೆಪ್ಪೋಲೆ ಪತ್ರನ್‌ ಕೊರಿಯೆರ್.

ಈ ಪೊರ್ತುಡು ಬಲ್ಲಂಗುಡೇಲು ಕ್ಷೇತ್ರ ಜೀರ್ಣೋದ್ಧಾರ ಸಮಿತಿದ ಕಾರ್ಯಾಧ್ಯಕ್ಷೆರ್ ರವೀಂದ್ರ ಶೆಟ್ಟಿ ಕರಿಬೈಲ್, ಕಾರ್ಯದರ್ಶಿ ಜಗದೀಶ್ ಮೂಡಂಬೈಲ್, ರಾಮ್ ಪ್ರಕಾಶ್ ಆಳ್ವ ಪಟ್ಟತ್ತಮೊಗರು, ರಮೇಶ್ ಸುವರ್ಣ, ಕಾರ್ತಿಕ್ ಶೆಟ್ಟಿ ಮಜಿಬೈಲ್,ರಾಜೇಶ್ ಬಲ್ಲಂಗುಡೇಲು, ಪ್ರದೀಪ್ ಶೆಟ್ಟಿ ಬಲ್ಲಂಗುಡೇಲು,ಅಖಿಲೇಶ್ ಕಂಗುಮೆ ,ಶಿವಪ್ರಸಾದ್ ಇತ್ತೆರ್.ಮಸೀದಿದ ಅಧ್ಯಕ್ಷೆರ್ ಅಬ್ದುಲ್ಲ ಕೆ., ಮೂಸ ಪಿ.ಅಜ್ಜಿಹಿತ್ತಲು,‌ ಮೂಸ ಎ. ವೆಳಿಯಲಿಪ್ಪು,ಅಬ್ದುಲ್ ರಹಮಾನ್‌, ಬಶೀರ್ ಮೂಡಂಬೈಲ್, ಅಬುಬಕ್ಕರ್ ಪಟ್ಟತ್ತೂರು, ಮಹಮ್ಮದ್ ಅಶ್ರಫ್ ಮೂಡಂಬೈಲ್, ಇಬ್ರಾಹಿಂ ಆಶೀಕ್ ಮೂಡಂಬೈಲ್ ಇತ್ತೆರ್. 🖋️ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)