ನಿನ್ನಿಕಲ್ಲ್ ಪಾದೆ ಶ್ರೀಚಕ್ರ ಸಾನ್ನಿಧ್ಯ ಆದಿತ್ತ್ಂಡಾ ?

ಬರಿಟ್ಟ್ ಗುಪ್ತಗಾಮಿನಿ ತುದೆತ್ತ ಪರಪು, ನಾಗ ಯಕ್ಷಿಗ್ ಬಂಧನ?

ಜಾಗತಿಕ ಪ್ರಾಕೃತಿಕ ಪಾರಂಪರಿಕ ಅಧ್ಯಯನ, ಧ್ಯಾನ ಬೊಕ್ಕ ಆರಾಧನಾ ಕೇಂದ್ರ ಸ್ಥಾಪನೆಗ್ ಪ್ರಶ್ನೆ ಚಿಂತನೆಡ್ ಒಪ್ಪಿಗೆ

ನಂದಿಕೂರು : ತುಳುನಾಡ್‌ದ ಅಪರೂಪದ ಪವಿತ್ರ ಸಾನ್ನಿಧ್ಯ ಆದಿಪ್ಪುನ ಪಡ್ಡೆದ್ರ- ನಂದಿಕೂರು ಮಾರ್ಗದ ನಿನ್ನಿಕಲ್ಲ್ ಪಾದೆದ ಐತಿಹಾಸಿಕ ಹಿನ್ನೆಲೆದ ಬಗೆಟ್ಟ್ ಇಂಚೊಗು ನಡತಿನ ತಾಂಬೂಲ ಪ್ರಶ್ನೆಡ್ ಮಹತ್ವದ ವಿಚಾರ ಬೊಲ್ಪುಗು ಬತ್ತ್‌ದ್, ಈ ಜಾಗೆನ್ ಜಾಗತಿಕ ಮಟ್ಟದ ಪ್ರಾಕೃತಿಕ ಪಾರಂಪರಿಕ ಅಧ್ಯಯನ, ಧ್ಯಾನ ಅಂಚೆನೆ ಆರಾಧನಾ ಕೇಂದ್ರವಾದ್ ಅಭಿವೃದ್ಧಿ ಮಲ್ಪರೆ ಪ್ರಶ್ನೆ ಚಿಂತನೆಡ್ ಸಂಪೂರ್ಣ ಒಪ್ಪಿಗೆ ತಿಕ್‌ದ್ಂಡ್.
ಪ್ರಶ್ನೆ ಚಿಂತನಾ ಫಲಿತಾಂಶದ ಪ್ರಕಾರ, ನಿನ್ನಿಕಲ್ಲ್ ಪಾದೆ ಪ್ರಾಕೃತಿಕವಾದ್ ಶ್ರೀಚಕ್ರ ನೆಲೆ ಆತಿನ ಪವಿತ್ರ ಕ್ಷೇತ್ರವಾದಿತ್ತ್‌ದ್, ಭೂಮಿ ಉಂಡಾನಗನೇ ಸಹಜವಾದ್ ನಿರ್ಮಾಣ ಆತಿನ ದೇವಲ್ಯ ಪನ್ಪಿನ ಅಭಿಪ್ರಾಯ ವ್ಯಕ್ತವಾಂಡ್. ಈ ಜಾಗೆ ತುಳುನಾಡ್‌‌ದ ಪಂಚಭೂತ, ಪಂಚತತ್ವ ಬೊಕ್ಕ ಪಂಚಶಕ್ತಿಲೆನ ನೆಲೆ ಆದಿತ್ತ್‌ದ್, ಅಯಿತ್ತ ಕಾಲ ನಿರ್ಣಯ ಸಾಧ್ಯ ಆವಂದಿನಾತ್ ಪಿರಾಕ್‌ದ ಆದುಂಡು ಪಂದ್ ತೆರಿದ್ ಬತ್ತ್ಂಡ್.
ಈ ಜಾಗೆಡ್ ದುಂಬುದ ಕಾಲೊಡ್ ಪಾಪನಾಶಿನಿ ತುದೆ ಪರತೊಂದಿತ್ತ್‌ದ್, ಇನಿಕ್ಕ್‌ಲ ಅವು ಭೂಮಿದ ಉಲಯಿ ಅಗೋಚರವಾದುಂಡು ಪನ್ಪಿನ ನಂಬಿಕೆ ಉಂಡು. ಪ್ರಧಾನ ದೇವತೆಯಾದ್ ತುಳುವೇಶ್ವರಿ ಪೂಜೆ ಪಡೆಯೊಂದಿತ್ತ್‌ದ್, ಇನಿಕ್ಕ್‌ಲ ಕೆಲವೆರ್ ಗುಪ್ತವಾದ್ ಪೂಜೆ ಮಲ್ತೊಂದುಲ್ಲೆರ್. ಇಂಚೊಗು ಈ ದೇವಿನ್ ಖಡ್ಗೇಶ್ವರಿ ಪನ್ಪಿನ ಪುದರ್‌ಡ್‌ಲ ಲೆಪ್ಪುವೆರ್.
ಮುಲ್ತ ವೈಶಿಷ್ಟ್ಯಲೆಡ್ ಸೌರಮಾನ ಬೊಕ್ಕ ಚಂದ್ರಮಾನ ಕಾಲಗಣನೆದ ಬಳಕೆ ಮಾತ್ರ ಅತ್ತಾಂದೆ, ಪೊರ್ತುದ ಆವಿಷ್ಕಾರ, ಗಡಿಯಾರ, ಪಂಚಾಂಗ ಬೊಕ್ಕ ಕ್ಯಾಲೆಂಡರ್ ಪದ್ಧತಿದ ಮೂಲಾಭಿವೃದ್ಧಿಲ ಈ ಪ್ರದೇಶದ ಒಟ್ಟುಗು ಸಂಬಂಧ ಪಡೆತ್ಂಡ್ ಪನ್ಪಿನ ಮಹತ್ವದ ಅಂಶ ಬೊಲ್ಪುಗು ಬೈದ್ಂಡ್.
ತುಳುನಾಡ್‌ದ ಪ್ರಾಚೀನ ವಿದ್ಯೆಲು ಬೊಕ್ಕ ಜ್ಯೋತಿಷ್ಯ ಶಾಸ್ತ್ರದ ಮೂಲ ಈ ಮಣ್ಣ್ ಡ್ ಆವಿಷ್ಕಾರ ಆತ್ಂಡ್. ಉಂದು ಅತ್ತಾಂದೆ, ಶಾಸ್ತ್ರ ಬೊಕ್ಕ ಶಸ್ತ್ರ ವಿದ್ಯೆ, ಕಳರಿ ಪರಂಪರೆ ಈ ಮಣ್ಣ್‌ಡ್ ವ್ಯಾಪಕವಾದ್ ಸಂಶೋಧನೆ ಆತ್ಂಡ್. ನಾಥ ಪಂಥದ ನವ ನಾಥೆರ್‌ನ ಶಕ್ತಿಕೇಂದ್ರಲ ಉಂದುವೇ ಆದಿತ್ತ್ಂಡ್.
ಉಂದು ಬಜಿ ಕಲ್ಲ್ ಬಂಡೆ ಅತ್ತ್; ತುಳು ನಾಡ್‌ದ ಆತ್ಮ ನಿರ್ಭರತೆಗ್ ಸಾಕ್ಷಿ ಪನ್ಪಿನ ವಿಚಾರ ಪ್ರಶ್ನೆ ಚಿಂತನೆಡ್ ಸ್ಪಷ್ಟ ಆಂಡ್.
ಈ ಪ್ರದೇಶಡ್ ಪವಿತ್ರ ತೀರ್ಥಭಾವಿ, ಹನುಮಂತನ ಪಾದಸ್ಪರ್ಶ, ಬೆರ್ಮೆರೆ ಆಲಡೆ ಬೊಕ್ಕ ಬೇತೆ ದೈವ ದೇವೆರ್‌ನ ಸಾನಿಧ್ಯ ಬೊಕ್ಕ ಪೌರಾಣಿಕ – ಜನಪದ ಇತಿಹಾಸದ ಸಾಕ್ಷ್ಯಲ ಉಂಡು ಪಂದ್ ತೆರಿದ್ ಬೈದ್ಂಡ್.
ಈ ಜಾಗೆಡ್ ಮಸ್ತ್ ಋಷಿ–ಮುನಿಕುಲು, ಸಾಧಕೆರ್ ಧ್ಯಾನ – ಸಾಧನೆ ಮಲ್ತ್‌ದ್, ಇನಿಕ್ಕ್‌ಲ ಗುಪ್ತವಾದ್ ಸಾಧಕೆರ್ ಬತ್ತ್‌ದ್ ಧ್ಯಾನ ಮಲ್ತೊಂದುಲ್ಲೆರ್ ಪನ್ಪಿನವು ಕೈತಲ್ದಕ್ಲೆನ ನಂಬಿಕೆ. ಪ್ರಾಕೃತಿಕವಾದ್ ಕಲ್ಲ್‌ಲೆಡ್ ದೈವಸಾನ್ನಿಧ್ಯ ಉಪ್ಪುನೆರ್ದಾವರ ಮೂಲು ಪ್ರತ್ಯೇಕ ದೇವಾಲಯದ ಅವಶ್ಯಕತೆ ಇಜ್ಜಿ ಪಂದ್ ಪ್ರತಿ ಕಲ್ಲ್ ದೈವಿ ಸಾದೃಶವಾದುಂಡು ಪಂದ್ ವ್ಯಕ್ತವಾದುಂಡು. ಮೂಲು ಪ್ರಾರ್ಥನೆ ಮಲ್ತಿನಕ್ಲೆಗ್ ಭಯ ನಿವಾರಣೆ, ಶತ್ರು ನಿವಾರಣೆ ಬೊಕ್ಕ ಇಷ್ಟಾರ್ಥ ಸಿದ್ಧಿ ಆಪುಂಡು ಪನ್ಪಿನ ನಂಬಿಕೆ ಇತ್ತ್‌ದ್ ಬಪ್ಪನಾಡ್ ಕ್ಷೇತ್ರಡ್ ಉಂದುವೇ ಪಂಚ ದುರ್ಗೆಯೆರ್ನ ಸಾನಿಧ್ಯ ಉಂಡು ಪಂದ್ ತೆರಿದ್ ಬತ್ತ್ಂಡ್.
ಪಿರಾಕ್‌ದ ಕಾಲಡ್
ಈ ಜಾಗೆದ ಅಪೂರ್ವ ನಿಧಿ ಸಂಗ್ರಹ ಆದಿತ್ತ್‌ದ್, ಅವೆನ್ ಅಪಹರಣ ಮಲ್ಪರೆ ಮುಲ್ತ ನಾಗ ಯಕ್ಷಿನ್ ಬಂಧನ ಮಲ್ತ್‌ದೆರ್ ಪನ್ಪಿನ ವಿಚಾರಲ ಪ್ರಶ್ನೆ ಚಿಂತನೆಡ್ ತೋಜಿದ್ ಬತ್ತ್ಂಡ್. ಈ ಹಿನ್ನೆಲೆಡ್ ನಾಗಶಕ್ತಿದ ವಿಮೋಚನೆ ಬೊಕ್ಕ ಜಾಗೆಡ್ ಉಪ್ಪುನ ಶಿಲಾ ಸಾನ್ನಿಧ್ಯದ ದೈವಿಕ ಗುರುತ್ವ ಬೊಕ್ಕ ಸಂಕಲ್ಪದ ಬೇಲೆ ಮಲ್ಪೊಡಾಪುಂಡು.
ತಾಂಬೂಲ ಪ್ರಶ್ನಾ ಚಿಂತನೆನ್ ಖ್ಯಾತ ಜ್ಯೋತಿಷಿಲಾಯಿನ ಶಶಿಧರ ಮಾಂಞಾಡ್ ಬೊಕ್ಕ ಸೂರಜ್ ಕೆ. ಪಿ. ನಡಪಾದ್ ಕೊರಿಯೆರ್. ಕಾಸ್ರೋಡು ತುಳುವೆರೆ ಆಯನಕೂಟದ ಅಧ್ಯಕ್ಷೆರ್ ಗೋಪಾಲಕೃಷ್ಣ ವಾಂತಿಚಾಲ್ ಭಾಷಾಂತರ ಮಲ್ತೆರ್.
ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಎನ್ ಮಧ್ವರಾಯ ಭಟ್, ಡಾ. ವೈ. ಎನ್ ಶೆಟ್ಟಿ, ಲಕ್ಷ್ಮಣ ಶೆಟ್ಟಿ, ನಾಗರಾಜ್ ಭಟ್, ಸುರೇಶ್ ಆಚಾರ್ಯ, ಉದಯ ರೈ, ಕಿರಣ್ ಚೌಟ, ಪ್ರಮೋದ್ ಸಪ್ರೆ, ಮಾಧವ ಉಳ್ಳಾಲ್, ಕೃಷ್ಣಮೂರ್ತಿ ರಾವ್ ಪಾದೆಬೆಟ್ಟು, ಡಾ. ರಾಜೇಶ್ ಆಳ್ವ, ಅರವಿಂದ ಬೆಳ್ಚಡ ಹರಿಪ್ರಸಾದ್ ರೈ ಜಿ.ಕೆ, ರವಿಕುಮಾರ್, ಗಣೇಶ್, ನಾಗೇಶ್ ಭಂಡಾರಿ ಮೊಕುಲು ಮಾತ ಅಭಿಪ್ರಾಯ ಪಟ್ಟೊಂಡೆರ್.
ತುಳುವ ಮಹಾಸಭೆದ ಸಂಚಾಲಕೆರಾಯಿನ ವಸಂತ ರೈ ಸೂರಿಂಜೆ, ಭಾನುಮತಿ ಶೆಟ್ಟಿ ಕಕ್ವಗುತ್ತು, ಪ್ರಶಾಂತ್ ಶೆಟ್ಟಿ, ಪ್ರವೀಣ್ ಕಂದಾವರ, ಡಾ. ಅವಿನ್ ಆಳ್ವ, ಉತ್ತಮ್ ಸಿಂಗ್, ಜ್ಯೋತಿ ಶೆಟ್ಟಿ ಬೊಕ್ಕ ಸ್ಥಳೀಯೆರ್ ಬೊಕ್ಕ ಗಣ್ಯೆರ್ ಪಾಲ್ ಪಡೆದಿತ್ತೆರ್. ಪತ್ತೆರ್ ಕೂಡ್ದು ಪ್ರಾರ್ಥನೆ ಮಲ್ತ್‌ದ್ ತಾಂಬೂಲ ಪ್ರಶ್ನೆ ಕಾರ್ಯಕ್ರಮನ್ ಸಮಾಪನ ಮಲ್ತೆರ್.

ನವೆಂಬರ್ 2,3 ಬೊಕ್ಕ 4 ತಾರೀಕ್‌ಗ್ ಪ್ರಶ್ನಾ ಚಿಂತನೆ

ನಿನ್ನಿಕಲ್ ಪಾದೆ ಪವಿತ್ರ ಭೂಮಿದ ಬಗೆಟ್ಟ್ ರಡ್ಡನೇ ಹಂತದ ವಿಮರ್ಶೆ ಬೊಕ್ಕ ಚಿಂತನೆ ಮಲ್ಪರೆ ನವೆಂಬರ್ 2, 3 ಬೊಕ್ಕ 4 ತಾರೀಕ್‌ದಾನಿ ಮೂಜಿ ದಿನತ್ತ ಅಷ್ಟಮಂಗಲ ಪ್ರಶ್ನೆ ಚಿಂತನೆ ಮಲ್ಪರೆ ತೀರ್ಮಾನ ಮಲ್ತೆರ್.