ತುಳು ಸುದ್ದಿ

ಕುಂಭನಿಧಿ ಕ್ರೆಡಿಟ್ ಕೋ ಆಪರೇಟಿವ್ ಸೊಸೈಟಿದ ಪಾಲ್ ಬಂಡವಾಳ ಸಂಗ್ರಹಣೆ, ಬಿನ್ನಾಪು ಪತ್ರ ಬುಡುಗಡೆ ಲೇಸ್

ಕಾರ್ಲ ತಾಲೂಕ್ ದ ಮುಂಡ್ಕೂರುದ ಮುಲ್ಲಡ್ಕ ನಾನಿಲ್ತಾರು ಕುಲಾಲ ಸಂಘ (ರಿ.) ದ ಮುತಾಲಿಕೆಡ್ ಸಹಕಾರಿ ಸಂಸ್ಥೆ ಆಯಿನ ಕುಂಭ ನಿಧಿ ಕ್ರೆಡಿಟ್ ಕೋ ಆಪರೇಟಿವ್ ಸೊಸೈಟಿ ಸ್ಥಾಪನೆದ ಪಾಲ್ ಬಂಡವಾಳ ಸಂಗ್ರಹಣೆ ಬೊಕ್ಕ ಬಿನ್ನಾಪು ಪತ್ರ ಬುಡುಗಡೆ ಲೇಸ್ ಡಿ.24 ನಾನಿಲ್ತಾರು ಕುಲಾಲ ಭವನಡ್ ನಡತ್ಂಡ್.

ಸಂಘದ ಮಾಜಿ ಗುರ್ಕಾರೆ ಮಂಜಪ್ಪ ಮೂಲ್ಯ ಉದಿಪನ ಮಲ್ತ್ ದ್, ಪಾತೆರ್ದ್, ಸಂಘ ಸುಮಾರ್ 36 ವರ್ಷೊದಿಂಚ ಏಪಲ ಸಮಾಜಮುಖಿ ಲೇಸ್ ನ್ ಆಯೋಜನೆ ಮಲ್ತ್ ದ್ ಬರೊಂದು ಉಂಡು. ಇತ್ತೆ ಸಹಕಾರಿ ಸಂಸ್ಥೆ ಸ್ಥಾಪನೆ ಮಲ್ತ್ ದ್ ಸಮಾಜಗ್ ನನಾತ್ ಆರ್ಥಿಕ ಶಕ್ತಿನ್ ಕೊರ್ಪುನಂಚಿನ ಲೇಸ್ ನ್ ಆಯೋಜನೆ ಮಲ್ಪರೆ ಉಂಡು ಪಂಡೆರ್.

ಮುಖ್ಯ ಪ್ರವರ್ತಕೆರ್ ಕುಶ ಆರ್ ಮೂಲ್ಯ ಇನ್ನಾ ಪಾತೆರ್ದ್, ಸುಮಾರ್ ವರ್ಷೊದಿಂಚ ಸಹಕಾರಿ ಸಂಘ ಸ್ಥಾಪನೆ ಮಲ್ಪುನ ಉದ್ದೇಶಲು ಯೋಜನೆಲು ಪ್ರತಿ ಗ್ರಾಮಲೆನ ಜನಾಭಿಪ್ರಾಯನ್ ಸಂಗ್ರಹ ಮಲ್ತ್ ದ್ ಸದೃಢ ಆಯಿನ ಸೊಸೈಟಿ ರಚನೆಗ್ ಸಮಾಜದ ಮಾತ ಬಂಧುಲು ಸದಸ್ಯತ್ವನ್ ಪಡೆಯೆರೆ ಬಿನ್ನಾಪು ಮಲ್ತೆರ್.

ಈ ಲೇಸ್ ದ ಗುರ್ಕಾರ್ಮೆನ್ ಸಂಘದ ಗುರ್ಕಾರೆ ಜಯರಾಮ್ ಕುಲಾಲ್ ಅಗರಟ್ಟ ಒಯಿಸ್ ದಿತ್ತೆರ್. ಸುಧಾಕರ್ ಕುಲಾಲ್ ಮುಂಡ್ಕೂರು, ಪ್ರಭಾಕರ್ ಇನ್ನಾ, ಸಂತೋಷ್ ಬೆಲ್ಮನ್ ಶಿಕ್ಷಕೆರ್ ಸುರೇಶ್ ಕುಲಾಲ್ ಕೆಮುಂಡೆಲ್ ಎಡ್ಡೆಪ್ಪು ಬಯಕಿಯೆರ್.

ಈ ಪೊರ್ತುಡು ಸಂಘದ ಮಹಿಳಾ ಗುರ್ಕಾರ್ದಿ ಪ್ರತಿಮಾ ಶ್ರೀಧರ್, ಸಹಾಯಕಿ ಆಶಾ ವರದರಾಜ್, ಯುವ ವೇದಿಕೆ ಗುರ್ಕಾರೆ ಲೋಕೇಶ್ ಕುಲಾಲ್ ಮುಂಡ್ಕೂರು, ಸೊಸೈಟಿ ಪ್ರವರ್ತಕೆರ್ ಜಗನ್ನಾಥ ಮೂಲ್ಯ ಬೆಳ್ಮಣ್, ಬೊಗ್ಗು ಮೂಲ್ಯ ಬೇಲಾಡಿ, ಗೋಪಾಲ್ ಮೂಲ್ಯ ಮುಲ್ಲಡ್ಕ, ಗಣೇಶ್ ಕುಲಾಲ್ ಬೋಳ, ಸುರೇಶ್ ಮೂಲ್ಯ ಕೆದಿಂಜೆ, ದೀಪಕ್ ಬೆಳ್ಮಣ್, ರಮಾನಂದ ಮೂಲ್ಯ ಬೆಳ್ಮಣ್, ಸುಗಂಧಿ ಬೋಳ ಶಂಕರ್ ಮೂಲ್ಯ ಇನ್ನಾ, ಅಶೋಕ್ ಕುಲಾಲ್ ಮುಂಡ್ಕೂರು ಪಾಲ್ ಪಡೆದಿತ್ತೆರ್.

ಶಿಕ್ಷಕೆರ್ ಶ್ರೀಕಾಂತ್ ಲೇಸ್ ನ್ ಸುಧಾರಿಕೆ ಮಲ್ತೆರ್. ರಾಜೇಶ್ ಕುಲಾಲ್ ಸಾಂತೂರು ಸೊಲ್ಮೆ ಸಂದಾಯೆರ್.

ಶಾಲಾ ಪ್ರವಾಸದ ಜೋಕ್ಲೆಗ್ ವನಸ್ ದ ವ್ಯವಸ್ಥೆ ಮಲ್ತಿನ ಸಮಾಜಸೇವಕೆ ಡಾ|ರವಿ ಕಕ್ಕೆಪದವು

ಕುಕ್ಕೆ ಸುಬ್ರಹ್ಮಣ್ಯಗ್ ದೂರದ ಹಾವೇರಿ ಜಿಲ್ಲೆದ ಹಳ್ಳಿ ಒಂಜೆರ್ದ್ ಶಾಲೆದ ಪ್ರವಾಸದ ಬಸ್ ಡಿ.19 ಅಂಗಾರೆ ರಾತ್ರೆ ತಡವಾದ್ ಬತ್ತಿನೆರ್ದಾವರ ಕುಕ್ಕೆ ದೇವಲ್ಯದ ವನಸ್ ವ್ಯವಸ್ಥೆ ಬೊಕ್ಕ ಹೋಟೆಲ್ ಮುಚ್ಚಿದ್ ಇತ್ತ್ಂಡ್.

ಈ ಪೊರ್ತುಡು ಆಕಸ್ಮಿಕವಾದ್ ಭೇಟಿ ಕೊರ್ನ ಡಾ| ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಗುರ್ಕಾರೆ ಡಾ|ರವಿ ಕಕ್ಕೆಪದವು ಮೇರ್ ಬಡವುಡು ಕಂಗಾಲಾಯಿನ ಜೋಕ್ಲೆನ್ ತೂದು ಅಕ್ಲೆಡ ಪಾತೆರ್ದ್ ಅಕ್ಲೆನ್ ವನಸ್ ಗ್ ತನ್ನ ಇಲ್ಲಡೆ ಲೆತೊಂದು ಪೋದು ಸುಮಾರ್ 65 ಜೋಕುಲು ಬೊಕ್ಕ ಶಿಕ್ಷಕೆರೆಗ್ ಆರೆನ ಬೊಡೆದಿ ಗೀತಾ ಮೇರ್ ವನಸ್ ದ ವ್ಯವಸ್ಥೆ ಮಲ್ತೆರ್. ಬೊಕ್ಕ ಮೆರೆನ ಇಲ್ಲಲೇ ಜೆಪ್ಪುನ ವ್ಯವಸ್ಥೆಲ ಮಲ್ತೆರ್.

ಈ ಪೊರ್ತುಡು ಟ್ರಸ್ಟ್ ದ ಕೋಶಾಧಿಕಾರಿ ಮಣಿಕಂಠ, ಸದಸ್ಯೆರ್ ವಸಂತ್ ಬೊಕ್ಕ ಕಾರ್ತಿಕ್ ಸಹಕಾರ ಕೊರಿಯೆರ್.

ಪ್ರತಿಯೊರಿಯಾನ್ ತೆರಿವೊನಿಯೆರೆ ಪಂತೊಲು ಸಹಕಾರಿ ಆಪುಂಡು: ಮೊಹಮ್ಮದ್ ಹಬೀಬುಲ್ಲಾ

ಕಲ್ಪಾರ್ಥಿಲೆನ ನಡುಟ್ಟ್ ಪಂತೊ ಇತ್ತ್ಂಡ ಅವು ಪ್ರತಿಯೊರಿಯಾನ್ಲಾ ನನಾತ್ ತೆರಿವೊನಿಯೆರೆ, ಎಚ್ಚ ಕಲ್ಪರೆ ಬೊಕ್ಕ ಉತ್ಕೃಷ್ಟ ಮಲ್ಪರೆ ಹೆಚ್ಚುವರಿ ಪ್ರಯತ್ನನ್ ಮಲ್ಪರೆ ಪ್ರೇರೇಪಣೆ ಮಲ್ಪುಂಡು. ಕ್ರೀಡೆ ಅವಡ್ ಅತ್ತಂಡ ಅಧ್ಯಯನ ಅವಡ್ ಕಲ್ಪಾರ್ಥಿಲು ಸಾಧಕೆರಾಯೆರೆ ಪ್ರೇರೇಪಣೆ ಮಲ್ಪು ಒಂಜಿ ಮಾರ್ಗ ಆತ್ಂಡ್. ಕ್ರೀಡೆಡ್ ಪಾಲ್ ಪಡೆನಗ ಪ್ರತಿಯೊರಿಡ್ಲಾ ಗೆಂದುನ ಜಬದಾರಿ ಇಪ್ಪುಂಡು. ಈ ಜಬದಾರಿದ ಪ್ರಜ್ಞೆ ಜೀವನದ ಬೇತೆ ಕ್ಷೇತ್ರಗ್ ಪಸರುಂಡು ಪಂದ್ ಮುಲ್ಕಿ ಶಾಂಭವಿ ಜೇಸೀ ಟ್ರಸ್ಟ್ ದ ಗುರ್ಕಾರೆ ಮೊಹಮ್ಮದ್ ಹಬೀಬುಲ್ಲಾ‌ ಪಂಡೆರ್.

ಮೇರ್ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ಶಿಮಂತೂರುದ ಶಾಲಾ ವಾರ್ಷಿಕ ಇನಾಮು ಪಟ್ಟುನ ಲೇಸ್ ದ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.

ಮಲ್ಲ ಬಿನ್ನೆರಾದ್ ಪಾಲ್ ಪಡೆಯಿನ ಉದ್ಯಮಿ ಜನಕರಾಜ್ ರಾವ್ ಪಾತೆರ್ದ್, ಪಂತೊ ಮಲ್ಲ ತಾನನ್ ಪೋಪುನ ಬಗೆಟ್ಟ್ ಇಪ್ಪುಂಡು. ಆಂಡ ಉಂದು ಸಾಧಕೆರೆಗ್ ತನ್ನ ಪ್ರಯತ್ನನ್ ಗುರಿತಿಸಾವೊಂಡು ಬೊಕ್ಕ ಪುರಸ್ಕಾರ ಮಲ್ಪುನ ಪನ್ಪುನ ತೃಪ್ತಿ ಆಯೆರೆ ಒಂಜಿ ಮಾರ್ಗ ಆತ್ಂಡ್ ಪಂದ್ ಪಂಡೆರ್. ಬೊಕ್ಕ ಈ ವರ್ಷರ್ದ್ ಉತ್ತಮ ವಿದ್ಯಾರ್ಥಿ ಪ್ರಶಸ್ತಿಗ್ 5000 ರೂ. ಇನಾಮುನ್ ಕೊರ್ಪ ಪಂದ್ ಘೋಷಣೆ ಮಲ್ತೆರ್.

ಈ ಲೇಸ್ ದ ಗುರ್ಕಾರ್ಮೆನ್ ಶ್ರೀ ಶಾರದಾ ಸೊಸೈಟಿದ ನಿರ್ದೇಶಕೆರ್ ಸುರೇಶ್ ರಾವ್ ನೀರಳಿಕೆ ಒಯಿಸ್ ದಿತ್ತೆರ್. ಈ ಪೊರ್ತುಡು ಶಾಲಾ ಸಂಚಾಲಕೆರ್ ದೇವಪ್ರಸಾದ್ ಪುನರೂರು, ಪ್ರಾಂಶುಪಾಲೆರ್ ಜಿತೇಂದ್ರ ವಿ ರಾವ್, ಶಿಕ್ಷಕ ರಕ್ಷಕ ಸಂಘದ ಗುರ್ಕಾರೆ ದೀಪಕ್ ಭಂಡಾರಿ ಪಾಲ್ ಪಡೆದಿತ್ತೆರ್.

ಕ್ರೀಡೆ ಬೊಕ್ಕ ಸಾಂಸ್ಕೃತಿಕ ಲೇಸ್ ಡ್ ಪಾಲ್ ಪಡೆಯಿನ ಕಲ್ಪಾರ್ಥಿಲೆಗ್ ಇನಾಮುನ್ ಕೊರಿಯೆರ್. ಬೊಕ್ಕ ಮಾತ ವಿಭಾಗಡ್ ಎಡ್ಡೆ ಪ್ರದರ್ಶನ ಕೊರ್ನ ಶಾಲೆದ ಮಂಜಲ್ ಬಣ್ಣದ ಕೂಟಗ್ ಚಾಂಪಿಯನ್ ಶಿಪ್ ಇನಾಮು ಕೊರಿಯೆರ್.

ಸಹ ಶಿಕ್ಷಕಿ ಪ್ರತಿಭಾ ಭಟ್ ಎದ್ಕೊನಿಯೆರ್. ದೀಪಿಕಾ ಬೊಕ್ಕ ನಿಶ್ಮಿತಾ ಗೆಂದಿನಕ್ಲೆನ ಪಟ್ಟಿನ್ ಓದಿಯೆರ್. ಅಶ್ಮಿತ ಸೊಲ್ಮೆ ಸಂದಾಯೆರ್. ದೀಕ್ಷಿತ ಲೇಸ್ ದ ಸುಧಾರಿಕೆ ಮಲ್ತೆರ್.

ಡಿ.24: ಕುದ್ರೋಳಿದ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೊರಗಪ್ಪ ಸಭಾಭವನಡ್ ಆತ್ಮಶಕ್ತಿ ದ್ವಿದಶಮಾನೋತ್ಸವ 2023 ಲೇಸ್

ಬ್ರಹ್ಮಶ್ರೀ ನಾರಾಯಣ ಗುರುಸ್ವಾಮಿ ಪ್ರಕಾಶನ ಬೊಕ್ಕ ಕುಡ್ಲ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಒಟ್ಟು ಸೇರಿಗೆಡ್ ಆತ್ಮಶಕ್ತಿ ದ್ವಿದಶಮಾನೋತ್ಸವ 2023 ಲೇಸ್ ಡಿ.24 ಐತಾರ ಕುದ್ರೋಳಿದ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೊರಗಪ್ಪ ಸಭಾಭವನಡ್ ನಡಪರೆ ಉಂಡು.

ಈ ಲೇಸ್ ಡ್ ಕಂಕನಾಡಿ ಶ್ರೀ ಬ್ರಹ್ಮಬೈದರ್ಕಳ ಗರೋಡಿದ ಗುರ್ಕಾರೆ ಚಿತ್ತರಂಜನ್ ಕೆ ಮೆರೆಗ್ ಆತ್ಮಶಕ್ತಿ ಪ್ರಶಸ್ತಿ ಪುರಸ್ಕಾರ ಮಲ್ಪರೆ ಉಂಡು.

ಡಿ.23-24: ಇರಾ ಯುವಕ ಮಂಡಲ (ರಿ.) ದ ಬಯಲು ರಂಗಮಂದಿರಡ್ ಸುವರ್ಣ ಮಹೋತ್ಸವ

ಇರಾ ಯುವಕ ಮಂಡಲ (ರಿ.) ದ ಸುವರ್ಣ ಮಹೋತ್ಸವ ಡಿ.23 ಬೊಕ್ಕ 24 ಕ್ಕ್ ಇರಾ ಯುವಕ ಮಂಡಲ (ರಿ.) ದ ಬಯಲು ರಂಗಮಂದಿರಡ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಇರಾ ಯುವಕ ಮಂಡಲ (ರಿ.) ದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಬೈಂದೂರು ಕಂಬುಲದ ಲೆಪ್ಪೋಲೆ ಬುಡುಗಡೆ

ಬೈಂದೂರು: ಬೈಂದೂರು ತಾಲೂಕ್ ರೈತ ಸಂಘ, ಸಾಂಪ್ರದಾಯಿಕ ಕಂಬುಲ ಸಮಿತಿ ಬೊಕ್ಕ ಊರುದ ಗ್ರಾಮಸ್ಥೆರೆರ್ದ್ ಜ.7 ಕ್ಕ್ ಬೈಂದೂರುದ ಗಂಗನಾಡು ಕೈತಲ್ ದ ಕ್ಯಾರ್ತೂರು ಕಂಬುಲ ಕಂಡಡ್ ಕಂಬುಲ ನಡಪರೆ ಉಂಡು‌.

ಈ ಕಂಬುಲದ ಲೆಪ್ಪೋಲೆನ್ ಬೈಂದೂರು ಪ್ರವಾಸಿ ಮಂದಿರಡ್ ಬೈಂದೂರು ಶಾಸಕೆರ್ ಗುರುರಾಜ ಗಂಟಿಹೊಳೆ ಬುಡುಗಡೆ ಮಲ್ತೆರ್. ಅವೆರ್ದ್ ಬೊಕ್ಕ ಪಾತೆರಿನ ಆರ್ ಕಂಬುಲಲು ತುಳುನಾಡ್ ದ ಸಾಂಸ್ಕೃತಿಕ ಸಿರಿವಂತಿಕೆನ್ ಎಚ್ಚ ಮಲ್ದ್ಂಡ್. ಅತ್ಯಾಧುನಿಕ ವ್ಯವಸ್ಥೆನ್ ಗಲಸುನೆರ್ದ್ ಬದಲಾವಣೆದ ಮುಕೇನ ಕಂಬುಲಲು ಯುವ ಸಮುದಾಯನ್ ಒಯಿತೊಂದು ಉಂಡು. ಬೈಂದೂರು ಕಂಬುಲ ಗ್ರಾಮೀಣ ಭಾಗದ ರೈತೆರೆನ ಸಮಾಗಮ ಅವಡ್ ಬೊಕ್ಕ ಕೃಷಿಕೆರೆನ ಸಾಂಸ್ಕೃತಿಕ ಹಿರಿಮೆನ್ ಎಚ್ಚ ಮಲ್ಪಡ್ ಪಂದ್ ಪಂಡೆರ್.

ಬೈಂದೂರು ರೈತ ಸಂಘದ ಗುರ್ಕಾರೆ ದೀಪಕ್ ಕುಮಾರ್ ಶೆಟ್ಟಿ ಪಾತೆರ್ದ್, ಸುರುತ್ತ ಸರ್ತಿ ಬೈಂದೂರುಡು ಗೌಜಿದ ರಾಜ್ಯಮಟ್ಟದ ಕಂಬುಲ ನಡಪರೆ ಉಂಡು. ಇತ್ತೆನೇ ಕಂಬುಲದ ತಯಾರಿ ನಡತೊಂದು ಉಂಡು. ರಾಜ್ಯಮಟ್ಟದ ಸುಮಾರ್ ನಾಯಕೆರ್ ಬರೊಂದು ಉಲ್ಲೆರ್ ಪಂದ್ ಪಂಡೆರ್.

ಈ ಪೊರ್ತುಡು ಕಂಬುಲದ ಸಂಚಾಲಕೆರ್ ಗಣಪ ಮರಾಠಿ ಪಾಲ್ ಪಡೆದಿತ್ತೆರ್.

ರೇಡಿಯೊ ಮಣಿಪಾಲಡ್ ‘ಸಂಗೀತ ಪಾಠ’ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 39ನೇ ಸಂಚಿಕೆ ಡಿ.22 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಕಲ್ಪಾರ್ಥಿಯಾದ್ ಪುಟಾಣಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಡಿ.23 ಸನಿಯಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಮತ್ತು ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ನಿಟ್ಟೆ ಮಾತೃಜಾ ಸೇವಾ ಸಿಂಧುದಕ್ಲೆರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ನಿಟ್ಟೆ ಮಾತೃಜಾ ಸೇವಾ ಸಿಂಧುದಕುಲು 2 ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.

ಕಲ್ಲಮುಂಡ್ಕೂರು ಕುದ್ರಿಪದವ್ ದ 4 ವರ್ಷದ ಯಶಿಕಾ ಬೊಕ್ಕ ಕಿನ್ನಿಗೋಳಿದ 6 ತಿಂಗೊಲ್ದ ಬಾಲೆ ಪೂಜಿತ್ ಶೆಟ್ಟಿಗಾರ್ ನ ವೈದ್ಯಕೀಯ ಚಿಕಿತ್ಸೆಗ್ ನಿಟ್ಟೆ ಮಾತೃಜಾ ಸೇವಾ ಸಿಂಧುದಕುಲು ನಿಧಿ ಸಂಗ್ರಹ ಮಲ್ತೆರ್.

ಈ ಸೇವಾ ಕೂಟ ಶ್ರೀ ಕ್ಷೇತ್ರ ಕಡಂದಲೆ ದೇವಲ್ಯಡ್ 62,522 ರೂ. ಬೊಕ್ಕ ಶ್ರೀ ಕ್ಷೇತ್ರ ಸೂಡಡ್ 58,433 ರೂ., ಒಟ್ಟು 120955 ರೂ. ನ್ ಸಂಗ್ರಹ ಮಲ್ದ್ಂಡ್.

ಡಿ.23: ಬೊಂಬೈದ ಸ್ವರ್ಗೀಯ ರಾಧಾ ಭೋಜ ಶೆಟ್ಟಿ ಸುರತ್ಕಲ್ ವೇದಿಕೆಡ್ ಕರ್ನಾಟಕ ಮಹಾರಾಷ್ಟ್ರ ಪತ್ರಕರ್ತರ ಸಹಮಿಲನ, ಉದಿಪನ ಲೇಸ್

ಬೊಂಬೈ: ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘ (ರಿ.) ಬೊಕ್ಕ ಕನ್ನಡಿಗ ಪತ್ರಕರ್ತರ ಸಂಘ ಮಹಾರಾಷ್ಟ್ರದ ಒಟ್ಟುಸೇರಿಗೆಡ್ ಕರ್ನಾಟಕ ಮಹಾರಾಷ್ಟ್ರ ಪತ್ರಕರ್ತರ ಸಹಮಿಲನ ಬೊಕ್ಕ ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಮಹಾರಾಷ್ಟ್ರ ಘಟಕದ ಉದಿಪನ ಲೇಸ್ ಡಿ.23 ಸನಿಯಾರ ಬೊಂಬೈದ ಚಕಲಾ-ಅಂಧೇರಿದ ಸ್ವರ್ಗೀಯ ರಾಧಾ ಭೋಜ ಶೆಟ್ಟಿ ಸುರತ್ಕಲ್ ವೇದಿಕೆಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಗುರ್ಕಾರೆ ಶಿವಾನಂದ ತಗಡೂರು ಒಯಿಸೊನ್ವೆರ್. ಕೃಷಿ ಖಾತೆ ಸಂಪುಟ ಸಚಿವೆರ್ ಎನ್. ಚೆಲುವರಾಯ ಸ್ವಾಮಿ ಲೇಸ್ ನ್ ಉದಿಪನ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ವಿಧಾನಸಭೆ ಸಭಾಪತಿ ಯು.ಟಿ ಖಾದರ್, ಕರ್ನಾಟಕ ಜಾನಪದ ಪರಿಷತ್ ದ ಗುರ್ಕಾರೆ ಡಾ/ ಆರ್ ಕೆ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

ಮಾನಾದಿಗೆದ ಬಿನ್ನೆರಾದ್ ಮಾಜಿ ಸಚಿವೆರ್ ಡಾ/ ಕೆಸಿ ನಾರಾಯಣ ಗೌಡ, ಬೊಂಬೈ ಬಂಟ್ಸ್ ಸಂಘದ ಗುರ್ಕಾರೆ ಪ್ರವೀಣ್ ಭೋಜ ಶೆಟ್ಟಿ, ಬಿಲ್ಲವ ಅಸೋಸಿಯೇಶನ್ ದ ಗುರ್ಕಾರೆ ಹರೀಶ್ ಜಿ. ಅಮಿನ್, ಫ್ರಾನ್ಸಿಸ್ ಶಿಪ್ಪಿಂಗ್ ಏಜೇನ್ಸಿ ಪ್ರೈವೇಟ್ ಲಿಮಿಟೆಡ್ ದ ಕಾರ್ಯಾಧ್ಯಕ್ಷೆರ್ ಫ್ರಾನ್ಸಿಸ್ ರಸ್ಕೀನ್ಹಾ, ವೈಬ್ರೆಂಟ್ ಎಕ್ಸ್ ಪೋರ್ಟೆಕ್ಸ್ ಪ್ರೈವೇಟ್ ಲಿಮಿಟೆಡ್ ದ ಕಾರ್ಯಾಧ್ಯಕ್ಷೆರ್ ಬಿ.ಆರ್ ರಾವ್, ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಹಿರಿಯ ಸಾಹಿತಿ ಡಾ/ ಸುನೀತಾ ಎಂ ಶೆಟ್ಟಿ, ದ.ಕ ಕಾರ್ಯನಿರತ ಪತ್ರಕರ್ತರ ಸಂಘದ ಗುರ್ಕಾರೆ ಶ್ರೀನಿವಾಸ ನಾಯಕ್ ಇಂದಾಜೆ, ಮಹಾರಾಷ್ಟ್ರ ಕನ್ನಡಿಗ ಪತ್ರಕರ್ತರ ಸಂಘದ ಗುರ್ಕಾರೆ ರೋನ್ಸ್ ಬಂಟ್ವಾಳ್ ಬರಿಯೆರೆ ಉಲ್ಲೆರ್ ಪಂದ್ ಗೌರವ ಪ್ರಧಾನ ಕಾರ್ಯದರ್ಶಿ ಸಾ. ದಯಾ (ದಯಾನಂದ್) ಒತ್ತು ಗುರ್ಕಾರೆ ಡಾ/ ಶಿವ ಮೂಡಿಗೆರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.