ತುಳು ಸುದ್ದಿ

ಆಶಾ ಪ್ರಕಾಶ್ ಶೆಟ್ಟಿ ಸಹಾಯ ಹಸ್ತ ಕೊರ್ಪಿನ “ನೆರವು” ಲೇಸ್

ದಾನ ಮಲ್ತ್‌ದ್ ಬದ್ಕ್‌ನ್ ಪೊರ್ಲು ಮಲ್ಪುಲೆ; ರಮೇಶ್ ಅರವಿಂದ್

ಕುಡ್ಲ: ನಿಷ್ಠೆಡ್ ಬೇಲೆ ಮಲ್ತ್‌ದ್ ಜನಕ್ಲೆನ ವಿಶ್ವಾಸ ಪಡೆಂಡ ಸಮಾಜಡ್ ಮಿತ್ತ್‌ದ ತಾನೊಗ್ ಪೋಯರೆ ಸಾಧ್ಯ. ಇಂಚಿನ ವಿಶೇಷ ಗುಣ ಇಪ್ಪುನ ಉದ್ಯಮಿ ಪ್ರಕಾಶ್ ಶೆಟ್ಟಿ ಮೇರ್ ತನ್ನ ನಿಸ್ವಾರ್ಥವಾಯಿನ ದಾನ ಧರ್ಮದ ಮುಕೇನ ಬದ್ಕ್‌ನ್ ಸಾರ್ಥಕತೆ ಮಲ್ತ್‌ದೆರ್ ಪಂದ್ ಪುಗರ್ತೆದ ಸಿನೆಮಾ ನಟೆ ರಮೇಶ್ ಅರವಿಂದ್ ಪಂಡೆರ್.

ಮೇರ್ ಪೇಂಟೆದ ಬಂಗ್ರಕೂಳೂರ್‌ದ ಗೋಲ್ಡ್ ಫಿಂಚ್ ಸಿಟಿಟ್ಟ್ ಡಿ.25 ಕ್ಕ್ ನಡತಿನ 5ನೇ ವರ್ಷದ ಎಂ.ಆರ್.ಜಿ. ಗ್ರೂಪ್ ಆಶಾ ಪ್ರಕಾಶ್ ಶೆಟ್ಟಿ ಸಹಾಯ ಹಸ್ತ “ನೆರವು” ಲೇಸ್‌ನ್ ಉದಿಪನ ಮಲ್ತ್‌ದ್ ಪಾತೆರಿಯೆರ್. ನನೊರಿಯಗ್ ಸಹಾಯ ಮಲ್ಪುನವ್ವೇ ಬದ್‌ಕ್‌ದ ಮಾಮಲ್ಲ ಗೆಲ್ಮೆ. ಬಂಗಡ್ ಇತ್ತಿನಕ್ಲೆಗ್ ಮನಪೂರ್ವಕವಾದ್ ನೆರವು ಕೊರ್ಪಿನ ಮುಕೇನ ಪ್ರಕಾಶ್ ಶೆಟ್ಟಿ ಮೇರ್ ಅಸಹಾಯಕೆರೆನ ಮನಸ್ಸ್‌ನ್ ಗೆಂದ್‌ದೆರ್. ಪ್ರಕಾಶ್ ಶೆಟ್ಟಿ ಮೆರೆನ ಪುದರ್‌ಡ್ ಇಪ್ಪುಲೆಕ್ಕನೆ ಅರೆನ ಜೀವನಲ ಪ್ರಕಾಶಮಾನವಾದ್ ಉಂಡು. ಮನಸ್ಸ್‌ನ್ ಗೆಂದುನ ಅರೆನ ಪಯಣ ನನಲ ಇಂಚನೇ ದುಂಬರಿಯಡ್. ಅರೆನ ನೆರವು ಪಡೆಯಿನಕುಲು ಬದ್‌ಕ್‌ಡ್ ಎಡ್ಡೆ ಆವಡ್ ಪಂದ್ ರಮೇಶ್ ಅರವಿಂದ್ ಪಂಡೆರ್.

ಆಳ್ವಾಸ್ ಶಿಕ್ಷಣ ಸಂಸ್ಥೆದ ಅಧ್ಯಕ್ಷೆರ್ ಡಾ.ಎಂ.ಮೋಹನ್ ಆಳ್ವ ಪಾತೆರ್ದ್, ಪ್ರಕಾಶ್ ಶೆಟ್ಟಿ ಮೇರ್ ಒವ್ವೇ ಭಾಷೆ, ಜಾತಿ, ಮತ, ಧರ್ಮನ್ ತೂವಂದೆ ಮಾನವೀಯ ದೃಷ್ಠಿಡ್ ಬಡವೆರೆಗ್, ಅಶಕ್ತೆರೆಗ್ ಪಣವುದ ಸಹಾಯನ್ ಮಲ್ತೊಂದುಲ್ಲೆರ್. ತನ್ನ ಸಂಪಾದನೆದ ಒಂಜಿ ಭಾಗನ್ ದಾನವಾದ್ ಕೊರ್ಪಿನ ಅರೆನ ಮಾನವೀಯ ಸೇವೆ ಮಾತೆರೆಗ್ಲಾ ಮಾದರಿ ಆವಡ್ ಪಂದ್ ಪಂಡೆರ್.

ಎಂ.ಆರ್.ಜಿ ಗ್ರೂಪ್ ಸಮೂಹ ಸಂಸ್ಥೆದ ಚೇರ್ಮನ್ ಕೆ.ಪ್ರಕಾಶ್ ಶೆಟ್ಟಿ ಪಾತೆರ್ದ್, ತುಳುನಾಡ್‌ಡ್ ಪುಟ್ಟಿನವೇ ಯನ್ನ ಭಾಗ್ಯ. ಯಾನ್ ಬಡತನರ್ದ್ ಕತ್ತಲೆದ ಸಾದಿನ್ ಕಡತ್ತ್‌ದ್ ಇತ್ತೆ ದೇವೆರೆನ ಅನುಗ್ರಹರ್ದ್ ಬೊಲ್ಪುನ್ ತೋಜುಲೆಕ್ಕ ಆತ್ಂಡ್. ಹಂತಹಂತವಾದ್ ಬದ್‌ಕ್‌ಡ್ ಯಶಸ್ಸ್‌ನ್ ತೋಜಿದ್ ಸುರುಕ್ಕ್ ಎನ್ನ 60ನೇ ಪುಟ್ಟುಪರ್ಬದಾನಿ ಅಶಕ್ತೆರೆಗ್ 1.25 ಕೋಟಿ ರೂಪಾಯಿ ನೆರವುನ್ ಕೊರಿಯೆ. ಈ ವರ್ಷ 1,828 ಜನಕ್ಕ್ 4 ಕೋಟಿ 90 ಲಕ್ಷರ್ದ್‌ಲ ಮಸ್ತ್ ರೂಪಾಯಿನ್ ನೆರವು ಕೊರ್ಪುನ ಶಕ್ತಿ ಬೈದ್ಂಡ್. ಎನ್ನ ಕುಟುಮದಕುಲುಲ ಉಂದೆನ್ ದುಂಬರಿಸಾವೊಂದ್ ಪೋವೊಡು ಪನ್ಪಿನ ಆಶಯ ಎನ್ನ ಪಂದ್ ಪಂಡೆರ್.

ಲೇಸ್‌ಡ್ ಎಂ.ಆರ್.ಜಿ ಸಮೂಹ ಸಂಸ್ಥೆದ ಆಡಳಿತ ನಿರ್ದೇಶಕೆರ್ ಗೌರವ್ ಪಿ. ಶೆಟ್ಟಿ, ಆಶಾ ಪ್ರಕಾಶ್ ಶೆಟ್ಟಿ ಇತ್ತೆರ್. ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಅನುಷ್ಕಾ ಗೌರವ್ ಶೆಟ್ಟಿ ಸೊಲ್ಮೆ ಸಂದೈತ ಮಲ್ತೆರ್. ನಿತೇಶ್ ಶೆಟ್ಟಿ, ಪುರುಷೋತ್ತಮ ಭಂಡಾರಿ ಲೇಸ್ ಸುಧಾರಿಕೆ ಮಲ್ತೆರ್.

ಗೋಲ್ಡ್‌ಫಿಂಚ್ ಟೌನ್‌ಶಿಪ್:

ವರ್ಷಲ ನೆರವು ಪನ್ಪಿನ ಲೇಸ್‌ರ್ದ್ ಗೋಲ್ಡ್‌ಫಿಂಚ್ ಇತ್ತೆ ಪುಣ್ಯ ಭೂಮಿ ಆತ್ಂಡ್. ನನದ ದಿನಟ್ಟ್ ಮಾಮಲ್ಲ ಟೌನ್‌ಶಿಪ್ ಈ ಜಾಗೆಡ್ ನಿರ್ಮಾಣ ಆವರೆ ಉಂಡು. ಆಸ್ಪತ್ರೆ, ಶಾಲೆ, ಮಾಲ್, ಹೋಟೆಲ್, ವೃದ್ದಾಶ್ರಮ, ಐಟಿ ಪಾರ್ಕ್ ಇಂಚಿತ್ತಿನ ಯೋಜನೆಲೆನ್ ಈ ಟೌನ್‌ಶಿಪ್‌ಡ್ ಮಲ್ಪರೆ ಉಂಡು. ಟೌನ್‌ಶಿಪ್‌ರ್ದ್ ಬರ್ಪಿನ ಆದಾಯದ ಒಂಜಿ ಭಾಗನ್ ಬಡವೆರೆಗ್ ನೆರವು ಕೊರ್ಪುನ ಕಾರ್ಯ ಆಯರೆ ಉಂಡು ಪಂದ್ ಕೆ. ಪ್ರಕಾಶ್ ಶೆಟ್ಟಿ ಪಂಡೆರ್.

ಶೈಕ್ಷಣಿಕ ಕ್ಷೇತ್ರಡ್ ಸಾಧನೆ ಮಲ್ತಿನಕ್ಲೆಗ್ ವಿದ್ಯಾರ್ಥಿ ವೇತನ

ಎಸ್.ಎಸ್.ಎಲ್.ಸಿ ಡ್ 625/625 ಅಂಕ ಪಡೆಯಿನ ವೀಕ್ಷಿತಾ ಬೊಕ್ಕ ಪಿ.ಯು.ಸಿ. ಡ್ ವಾಣಿಜ್ಯ ವಿಭಾಗಡ್ 600/600 ಅಂಕ ಪಡೆಯಿನ ಅನನ್ಯ ಮೊಕಲೆಗ್ ಶೈಕ್ಷಣಿಕ ಸಾಧನೆಗಾದ್ ಮಾನಾದಿಗೆ ಮಲ್ತ್‌ದ್ ವಿದ್ಯಾರ್ಥಿ ವೇತನ ಕೊರಿಯೆರ್.

ಯೇಸು ಕ್ರಿಸ್ತೆರ್ನ ಆದರ್ಶ ಪಾಲನೆ ಮಲ್ಪುಗ: ರೆ. ಅಮೃತ ರಾಜ್ ಖೋಡೆ

ಹಳೆಯಂಗಡಿ : ಯೇಸು ಕ್ರಿಸ್ತೆರ್ ಶಾಂತಿದ ದೂತೆರಾದ್ ಈ ಲೋಕಗ್ ಬತ್ತೆರ್. ಅರೆನ ಜೀವಿತಾವಧಿಡ್ ಕ್ಷಮೆತ್ತ ಮಲ್ಲ ಗುಣತ್ತ ಒಟ್ಟಿಗೆ ಶಾಂತಿದೂತೆರಾದಿತ್ತೆರ್. ಮೆರೆನ ಆದರ್ಶನ್ ನಮ ಪಾಲನೆ ಮಲ್ಪುಗ ಪಂದ್ ಹಳೆಯಂಗಡಿ ಸಿಎಸ್ಐ ಅಮ್ಮನ್ ಮೆಮೋರಿಯಲ್ ಚರ್ಚ್ ದ ಸಭಾ ಪಾಲಕೆರ್ ರೆ. ಅಮೃತ್ ರಾಜ್ ಖೋಡೆ ಪಂಡೆರ್.

ಮೇರ್ ಹಳೆಯಂಗಡಿ ಸಿಎಸ್ಐ ಅಮ್ಮನ್ ಮೆಮೋರಿಯಲ್ ಚರ್ಚ್ ಡ್ ನಡತಿನ ಕ್ರಿಸ್ಮಸ್ ಇಸೇಸ ಲೇಸ್ ಡ್ ಪಾತೆರಿಯೆರ್.

ಮಣಿಪಾಲದ ಸಿಎಸ್ಐ ಇಂಗ್ಲಿಷ್ ಚರ್ಚ್ ದ ಸಭಾ ಪಾಲಕೆರ್ ರೆ.ಜಾನ್ ಬೆನಾಡಿಕ್ಟ್ ಪ್ರಾರ್ತನೆ ಮಲ್ತೆರ್. ಶಾಲೆದ ಕಲ್ಪಾರ್ಥಿಲೆರ್ದ್ ಸಾಂಸ್ಕೃತಿಕ ಲೇಸ್ ನಡತ್ಂಡ್. ಸಭಾ ಪಾಲನ ಸಮಿತಿದ ಕಾರ್ಯದರ್ಶಿ ಲಾವಣ್ಯ ಕೋಟ್ಯಾನ್ ಎದ್ಕೊನಿಯೆರ್. ಕೋಶಾಧಿಕಾರಿ ಶರ್ಲಿ ಬಂಗೇರ ಸೊಲ್ಮೆ ಸಂದಾಯೆರ್. ಈ ಪೊರ್ತುಡು ಸಭಾ ಪರಿಪಾಲನಾ ಸಮಿತಿದ ಸದಸ್ಯೆರ್ ಆಸ್ಟಿನ್ ಕರ್ಕಡ, ವಸಂತ ಬರ್ನಾಡ್, ಜೇಮ್ಸ್ ಕರ್ಕಡ, ಸಿಡ್ನಿ ಕರ್ಕಡ ಚಾವಡಿಡ್ ಇತ್ತೆರ್.

ಕೇರಳಡ್ ಕ್ರಿಸ್ ಮಸ್ ಆಚರಣೆಗ್ ನಿರ್ಮಾಣ ಮಲ್ತಿನ ಸಂಕ ಬೂರ್ದು ಸುಮಾರ್ ಜನಕ್ಕ್ ಪೆಟ್ಟ್

ತಿರುವನಂತಪುರಂ: ತಿರುವನಂತಪುರಂದ ನೆಯ್ಯಾಟಿಂಕರಾಡ್ ಡಿ.25 ಸೋಮಾರ ಕ್ರಿಸ್ ಮಸ್ ಆಚರಣೆಗಾದ್ ಸ್ಥಾಪನೆ ಮಲ್ತಿನ ತಾತ್ಕಾಲಿಕ ಸಂಕ ಬೂರ್ದು ಸುಮಾರ್ ಜನಕ್ಕ್ ಪೆಟ್ಟಾತ್ಂಡ್.

ಈ ಘಟನೆಡ್ ಪೆಟ್ಟಾಯಿನಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಈ ಬಗೆಟ್ಟ್ ಎಚ್ಚದ ಪೊಲಬು ನನ ಗೊತ್ತಾವೊಡಾತೆ.

ಪೆಲಕಾಯಿ ಆರೋಗ್ಯಗ್ ಎಡ್ಡೆ

ಖನಿಜಾಂಶ, ವಿಟಮಿನ್ ಬೊಕ್ಕ ನಾರಿನಾಂಶ ಇಪ್ಪುನ ಪೆಲಕಾಯಿಡ್ ನೈಸರ್ಗಿಕ ವಿರೇಚಕ ಗುಣ ಉಂಡು.

ಉಂದು ಜೀರ್ಣಕ್ರಿಯೆ ವ್ಯವಸ್ಥೆದ ಸಮಸ್ಯೆನ್ ದೂರ ಮಲ್ಪುಂಡು. ವಿಟಮಿನ್-ಎ ಇಪ್ಪುನ ಈ ಪರ್ಂದ್ ತಿನ್ಪುನೆರ್ದ್ ಕಣ್ಣ್ ಗ್ ಎಡ್ಡೆ.

ಪೆಲಕಾಯಿ ಪರ್ಂದ್ ಡ್ ಕೊಲೆಸ್ಟ್ರಾಲ್ ಬೊಕ್ಕ ಅನಾರೋಗ್ಯಕರ ಕೊಬ್ಬು ಇಜ್ಜಂದಿನ ಗುಣ ಉಂಡು. ನಾರ್ ದ ಅಂಶ ಎಚ್ಚ ಇಪ್ಪುರ್ನೆದಾವೆರ ಕರ್ಲ್ ನ್ ರಕ್ಷಣೆ ಮಲ್ಪುಂಡು. ಮಲಬದ್ಧತೆನ್ ನಿವಾರಣೆ ಮಲ್ಪುಂಡು. ಅತ್ತಂದೆ, ಶ್ವಾಸಕೋಶ ಬೊಕ್ಕ ಕೆಲವು ರೀತಿದ ಕ್ಯಾನ್ಸರ್ ನ್ ಬರಂದಿಲೆಕ್ಕ ತೂವೊನೊಂಡು.

ಎಲ್ಲೆ ಬಿಜೆಪಿದ ಪೊಸ ಪದುಕೆರೆನ ಸಭೆ

ಬಿಜೆಪಿ ಕೇಂದ್ರ ಕಚೇರಿಡ್ ಎಲ್ಲೆ ಪೊಸ ಪದುಕೆರೆನ ಸಭೆನ್ ಆಯೋಜನೆ ಮಲ್ದ್ಂಡ್ ಪಂದ್ ರಾಜ್ಯಾಧ್ಯಕ್ಷೆರ್ ಬಿ.ವೈ ವಿಜಯೇಂದ್ರ ತೆರಿಪಾದೆರ್.

ಬೆಂಗ್ಲೂರ್ ಡ್ ಮೇರ್ ಪಾತೆರ್ದ್, ಪೊಸ ಪದುಕೆರೆನ ಪಟ್ಟಿಡ್ ಮತ ಸಮುದಾಯಗ್ ಸೇರಿನ ಪ್ರತಿ ಭಾಗದ ಜವನೆರ್ ಬೊಕ್ಕ ಹಿರಿಯೆರ್ ಉಲ್ಲೆರ್.

ನಂದಳಿಕೆ ಇಂಚರ ಸೇವಾ ಬಳಗದಕ್ಲೆರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಒಡಿಪು: ನಂದಳಿಕೆ ಇಂಚರ ಸೇವಾ ಬಳಗ (ರಿ.) ದಕುಲು ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.

ಕಾರ್ಲ ತಾಲೂಕ್ ದ ಪಡ್ಡೆದ್ರದ ಸುರೇಖಾ ಬೊಕ್ಕ ಪ್ರಶಾಂತ್ ದಂಪತಿಲೆನ 8 ತಿಂಗೊಲ್ದ ಬಾಲೆ ದ್ರುವಿ ಪೂಜಾರಿ ಲಿವರ್ ದ ಸಮಸ್ಯೆರ್ದ್ ನರಲೊಂದು ಉಂಡು. ಈ ಬಾಲೆದ ಚಿಕಿತ್ಸೆಗ್ 30 ಲಕ್ಷ ರೂ. ದ ಅವಶ್ಯಕತೆ ಉಂಡು ಪಂದ್ ಬೆಂಗ್ಲೂರ್ ಕೆ.ಎಂ.ಸಿ ಆಸ್ಪತ್ರೆದ ವೈದ್ಯೆರ್ ತೆರಿಪಾದೆರ್.

ಅಂಚಾದ್ ಆಸ್ಪತ್ರೆದ ಚಿಕಿತ್ಸೆಗ್ ಡಿ.17 ಬೊಕ್ಕ 18 ಕ್ಕ್ ಶ್ರೀ ಕೊಡಮಣಿತ್ತಾಯ ದೈವೊಲ್ಯ ಶಿಬರೂರು ಬೊಕ್ಕ ಡಿ‌.18 ಕ್ಕ್ ಶ್ರೀ ಸುಬ್ರಮಣ್ಯ ದೇವಲ್ಯ ಸೂಡಡ್ ನಿಧಿ ಸಂಗ್ರಹಣೆ ಮಲ್ತೆರ್. ನೆಟ್ಟ್ ಸಂಗ್ರಹ ಆಯಿನ ಕಾಸ್ 1,18,075/- ರೂ.ದ ಚೆಕ್ ನ್ ಶಿರ್ವಕೋಡು ಜಯಶೀಲ ಹೆಗ್ಡೆ ಸುಬ್ರಮಣ್ಯ ಸೂಡ ಮೆರೆನ ಮುಕೇನ ಕೊರಿಯೆರ್.

ಈ ಪೊರ್ತುಡು ಕೂಟದ ಮಾನಾದಿಗೆದ ಗುರ್ಕಾರೆ ಶೈಲೇಶ್ ಕೋಟ್ಯಾನ್ ಸೂಡ, ಗುರ್ಕಾರೆ ದೀಕ್ಷಿತ್ ದೇವಾಡಿಗ ನಂದಳಿಕೆ, ಸದಸ್ಯೆರ್ ಶಂಕರ್ ಕುಂದರ್ ಸೂಡ, ಸುದೇಶ್ ಸೂಡ, ಜಾನ್ ಕಡಾರಿ, ಹಿತೇಶ್ ಕಲ್ಯಾ, ಕಿರಣ್ ಬೋಳ, ದೀಕ್ಷಾ, ಜೇರಿಯಲ್ ಡಿ ಸೋಜಾ ಸೂಡ, ರೋಹಿತ್ ಸೂಡ, ಸಂತೋಷ್ ಹೊಕ್ಕಾಡಿಗೋಳಿ, ಗುರು ಭಟ್ ಅರ್ಚಕೆರ್ ಸೂಡ ಬೊಕ್ಕ ಬ್ರೈಟ್ ಗ್ರೂಪ್ ಫ್ರೆಂಡ್ಸ್(ರಿ.) ಸೂಡದ ಗುರ್ಕಾರೆ, ಸದಸ್ಯೆರ್ ಪಾಲ್ ಪಡೆದಿತ್ತೆರ್.

ರೇಡಿಯೊ ಮಣಿಪಾಲಡ್ ಯೋಗ ಸುಯೋಗ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 39ನೇ ಸಂಚಿಕೆ ಡಿ.25 ಕ್ಕ್ ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನಡ್ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಡಿ.26 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಕುಸಲ್ದರಸೆ ನವೀನ್ ಡಿ ಪಡೀಲ್ ಗ್ ಅತ್ಯುತ್ತಮ ನಟ ಪ್ರಶಸ್ತಿ

ಮೂಗಜ್ಜನ ಕೋಳಿ ಪಿಕ್ಚರ್ ಡ್ ಮೂಗನ ಪಾತ್ರಡ್ ಅಭಿನಯ ಮಲ್ತಿನ ಪಡೀಲ್

ಕುಡ್ಲ: ಕರ್ನಾಟಕ ಅಂತರಾಷ್ಟ್ರೀಯ ಚಲನಚಿತ್ರ ಅಕಾಡೆಮಿದ ಮುತಾಲಿಕೆಡ್ ಹುಬ್ಬಳ್ಳಿಡ್ ನಡತಿನ ಕರ್ನಾಟಕ ಅಂತರಾಷ್ಟ್ರೀಯ ಚಲನಚಿತ್ರೋತ್ಸವಡ್ ತುಳುನಾಡ ಅದ್ಭುತ ಕಲಾವಿದೆ ಕುಸಲ್ದರಸೆ ನವೀನ್ ಡಿ ಪಡೀಲ್ ಮೆರೆಗ್ ಅತ್ಯುತ್ತಮ ನಟ ಪ್ರಶಸ್ತಿ ತಿಕ್ ದ್ಂಡ್.

ರಾಷ್ಟ್ರಪ್ರಶಸ್ತಿ ಗೆಂದಿನ ಪಿಕ್ಚರ್ ‘ಜೀಟಿಗೆ’ ದ ಬೊಕ್ಕ ಸಂತೋಷ್ ಮಾಡ ಮೇರ್ ನಿರ್ದೇಶನ ಮಲ್ತಿನ ಸುರುತ್ತ ಅರೆಭಾಷೆ ಪಿಕ್ಚರ್ ಮೂಗಜ್ಜನ ಕೋಳಿ, ಈ ಪಿಕ್ಚರ್ ಡ್ ಮೂಗಜ್ಜನ ಪಾತ್ರಡ್ ನವೀನ್ ಡಿ ಪಡೀಲ್ ಮೇರ್ ಅಭಿನಯ ಮಲ್ದೆರ್. ಮೇರ್ ಇಡೀ ಪಿಕ್ಚರ್ ಡ್ ಒಂಜೇ ಒಂಜಿ ಪಾತೆರಂದೆ, ಕೋರಿನ್ ಮೋಕೆ ಮಲ್ಪುನ ಒರಟ್ ಅಜ್ಜನ ಪಾತ್ರ ಮಲ್ದೆರ್.

ಈ ಪಿಕ್ಚರ್ ನ್ ‘ನಮ್ಮಕನಸು ಪ್ರೊಡಕ್ಷನ್ಸ್‌’ ಪನ್ಪುನ ಬ್ಯಾನರ್ ಡ್ ಕೆ.ಸುರೇಶ್‌ ಮೇರ್ ನಿರ್ಮಾಣ ಮಲ್ದೆರ್. ರಾಷ್ಟ್ರಪ್ರಶಸ್ತಿ ಗೆಂದಿನ ಖ್ಯಾತ ಸಂಕಲನಕಾರೆ ಸುರೇಶ್‌ ಅರಸ್ ಪಿಕ್ಚರ್ ದ ಸಂಕಲನ ಮಲ್ದೆರ್. ಕಾಂತಾರ-2, ಸಲಾರ್ ದಂಚಿನ ಬಿಗ್ ಬಜೆಟ್ ಪಿಕ್ಚರ್ ಡ್ ಕೆಲಸ ಮಲ್ತಿನ ಖ್ಯಾತ ಮೇಕಪ್ ಮ್ಯಾನ್‌ ರಂಜಿತ್‌ ಅಂಬಾಡಿ ಮೇಕಪ್‌ ಮಲ್ದೆರ್. ಖ್ಯಾತ ಸಾಹಿತಿ ಸುಬ್ರಾಯ ಚೊಕ್ಕಾಡಿ ಸಾಹಿತ್ಯ ಬರೆತೆರ್. ಪಿ.ವಿಷ್ಣುಪ್ರಸಾದ್ ಛಾಯಾಗ್ರಾಹಕೆರಾತೆರ್. ಕಥಾಕಲ್ಪನೆ ವಿನೀತ್‌ ವಟ್ಟಂಕುಳತ್‌ ಮೇರೆನವು. ಚಿತ್ರಕಥೆ ಬೊಕ್ಕ ಸಂಭಾಷಣೆನ್ ಕಾದಂಬರಿಕಾರೆ ರಮೇಶ್‌ ಶೆಟ್ಟಿಗಾರ್ ಬರೆತೆರ್. ಈ ಪಿಕ್ಚರ್ ಗ್ ಸುಳ್ಯದ ಯುವ ಕವಯತ್ರಿ ರಮ್ಯಶ್ರೀ ನಡುಮನೆ ಮೇರ್ ಅರೆಭಾಷೆದ ಸಕಾಯ ಮಲ್ದೆರ್. ಹಿನ್ನೆಲೆ ಸಂಗೀತ ದೀಪಾಂಕುರನ್, ಪದ್ಯ ಅರುಣ್ ಗೋಪನ್, ಕಲಾ ನಿರ್ದೇಶನ ರಾಜೇಶ್ ಬಂದ್ಯೋಡ್, ವಸ್ತ್ರಾಲಂಕಾರ ಮೀರಾ ಸಂತೋಷ್ ಮಲ್ದೆರ್.

ಸಹ ನಿರ್ದೇಶಕೆರಾದ್ ಅವಿನಾಶ್ ರೈ ಕಾಸ್ರೋಡು, ಸಹಾಯಕ ನಿರ್ದೇಶಕೆರಾದ್ ರವಿ ವರ್ಕಾಡಿ, ಗಿರೀಶ್ ಸುಳ್ಯ ಬೊಕ್ಕ ಕಾರ್ಯ ನಿರ್ವಹಣೆನ್ ವಿಜಯ್ ಮಯ್ಯ ಮಲ್ದೆರ್. ಈ ಪಿಕ್ಚರ್ ಗ್ 23ನೇ ಯುಫ್ಎಂಸಿ ಗೋವಾ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಡ್ ಬೇಬಿ ಗೌರಿಕಾಗ್ ಉತ್ತಮ ಬಾಲನಟಿ ಪ್ರಶಸ್ತಿ, ಜಾಗರಣ್ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಡ್ ಉತ್ತಮ ನಿರ್ದೇಶಕ ಪ್ರಶಸ್ತಿ, ಫ್ರಾನ್ಸಿನ ಫೆಸ್ಟಿವಲ್‌ ಡೆ ಸಿನಿಮಾ ಡಿ ಸಿಫಾಲು, ಇಟಲಿದ ಗೋಲ್ಡನ್‌ ಫೆಮಿ ಫಿಲ್ಮ್‌ ಫೆಸ್ಟಿವಲ್‌ 2023, ಜಮ್ಮು ಕಾಶ್ಮೀರ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ 2023, ಸ್ಟೂಡೆಂಟ್‌ ವರ್ಲ್ಡ್‌ಇಂಪಾಕ್ಟ್‌ ಫೀಲ್ಮ್‌ ಫೆಸ್ಟಿವಲ್‌, ಬಿರಿಸಮುಂಡ ಚಿತ್ರೋತ್ಸವ, ತಮೀಝಗಂ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಡ್ ಬೆಸ್ಟ್ ಇಂಟರ್ ನ್ಯಾಷನಲ್ ಫಿಲಂ ಅವಾರ್ಡ್, ರೋಹಿಪ್ ಇಂಟರ್ ನಲ್ ನ್ಯಾಷನಲ್ ಫಿಲಂ ಫೆಸ್ಟಿವಲ್ ಡ್ special jury mention, UK ದ ಲಿಫ್ಟ್ ಆಫ್‌ ಗ್ಲೋಬಲ್‌ ನೆಟ್‌ವರ್ಕ್‌ ಚಲನಚಿತ್ರೋತ್ಸವ ಬೊಕ್ಕ ಭಾರತದ ಪ್ರತಿಷ್ಠಿತ ಫಿಲಂ ಫೆಸ್ಟಿವಲ್ ಆಯಿನ ಈ ಪಿಕ್ಚರ್ 29ನೇ ಕೊಲ್ಕತ್ತಾ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಗ್ ಆಯ್ಕೆ ಆತ್ಂಡ್.

ಈ ಪಿಕ್ಚರ್ ಡ್ ಬಾಬೆಕ್ಕ ಪನ್ಪುನ ಬಾಲೆದ ಪಾತ್ರಡ್ ಕುಮಾರಿ ಗೌರಿಕಾ ನಟನೆ ಮಲ್ದೆರ್. ಬೊಕ್ಕದ ಪಾತ್ರಲಡ್ ಪುಗರ್ತೆದ ನಟೆ, ನಟಿಯೆರಾಯಿನ ಪ್ರಕಾಶ್‌ ತೂಮಿನಾಡು, ದೀಪಕ್‌ ರೈ ಪಾಣಾಜೆ, ರೂಪಶ್ರೀ ವರ್ಕಾಡಿ, ಸುಕನ್ಯ, ರಾಘವೇಂದ್ರ ಭಟ್‌, ಡಾ. ಜೀವನ್ ರಾಮ್‌ ಸುಳ್ಯ, ಕುಮಾರಿ ಸಾನಿಧ್ಯ ಬೊಕ್ಕ ಸುಮಾರ್ ಜೋಕುಲು ಅಭಿನಯ ಮಲ್ದೆರ್.

ಡಾ. ಜೀವನ್‌ ರಾಮ್‌ ಸುಳ್ಯ ನಿರ್ದೇಶನ ಮಲ್ತಿನ ಅಮರಸುಳ್ಯ ಸ್ವಾತಂತ್ರ್ಯ ಹೋರಾಟ 1837 ನಾಟಕದ ಕೆಲವೊಂಜಿ ದೃಶ್ಯಲ ಈ ಪಿಕ್ಚರ್ ಡ್ ಉಂಡು. ಅಂಚೆನೆ ಸುಳ್ಯ ಪೇಟೆ, ಕೇರ್ಪಳ, ಕುಡೆಕಲ್ಲು, ಪದ್ಮಶ್ರೀ ಗಿರೀಶ್‌ ಭಾರಧ್ವಜ್‌ ಮೇರ್ ನಿರ್ಮಾಣ ಮಲ್ತಿನ ತೂಗು ಸೇತುವೆ ಇಂಚ ಮ
ಸುಳ್ಯದ ಸುತ್ತಮುತ್ತ ಈ ಪಿಕ್ಚರ್ ದ ಶೂಟಿಂಗ್ ನಡತ್ಂಡ್. ಅತ್ತಂದೆ ಈ ಪಿಕ್ಚರ್ 2024 ಟ್ಟ್ ರಿಲೀಸ್ ಆಪುಂಡು ಪಂದ್ ನಿರ್ಮಾಪಕೆರ್ ಕೆ. ಸುರೇಶ್ ತೆರಿಪಾದೆರ್.

ರೇಡಿಯೊ ಮಣಿಪಾಲಡ್ ಕ್ರಿಸ್ಮಸ್ ಇಸೇಸ

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಕ್ರಿಸ್ಮಸ್ ಇಸೇಸ ಲೇಸ್ ಡಿ.25 ಸೋಮಾರ ಮಧ್ಯಾಹ್ನ 12.15 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಒಡಿಪು ಶೋಕಮಾತಾ ಇಗರ್ಜಿದ ಪ್ಯಾರಿಷ್ ಪ್ರಿಸ್ಟ್ ರೆ |ಫಾ| ಚಾರ್ಲ್ಸ್ ಮಿನೇಜಸ್ ಎಡ್ಡೆ ಸಂದೇಶ ಕೊರಿಯೆರೆ ಉಲ್ಲೆರ್. ಡಿ.25 ಕ್ಕ್ ಬಯ್ಯಗ್ 6.55 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಕುಕ್ಕೆ ಸುಬ್ರಹ್ಮಣ್ಯಡ್ 24×7 ಆಸ್ಪತ್ರೆ ಸೇವೆಗಾದ್ ಮಾಜಿ ಸ್ಪೀಕರ್ ರಮೇಶ್ ಕುಮಾರ್ ಗ್ ಬಿನ್ನಾಪು

ಪ್ರಪಂಚದ ಮಾತ ಕಡೆರ್ದ್ಲಾ ಪ್ರತಿ ದಿನೊಲ ಸಾರರ್ದ್ ಎಚ್ಚ ಭಕ್ತೆರ್ ಬರ್ಪುನ ಪುಣ್ಯಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯಗ್ ಭಕ್ತೆರೆನ ಅನುಕೂಲಗಾದ್ ಸರಿಯಾಯಿನ 24×7 ಆಸ್ಪತ್ರೆ ಸೇವೆಗಾದ್ ವಿಧಾನಸಭೆ ಮಾಜಿ ಸ್ಪೀಕರ್ ರಮೇಶ್ ಕುಮಾರ್ ಗ್ ರವಿ ಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್ ದ ಸಂಸ್ಥಾಪಕೆರ್ ಡಾ|ರವಿ ಕಕ್ಕೆಪದವು ಮೇರ್ ಬಿನ್ನಾಪು ಸಂದಾಯೆರ್.

ಐತಾರ ಕುಕ್ಕೆ ಸುಬ್ರಹ್ಮಣ್ಯಗ್ ಬತ್ತಿನ ವಿಧಾನಸಭೆ ಮಾಜಿ ಸ್ಪೀಕರ್ ರಮೇಶ್ ಕುಮಾರ್ ಮೆರೆಗ್ ಮುಲ್ಪದ ಇತ್ತೆದ ಆಸ್ಪತ್ರೆದ ಪರಿಸ್ಥಿತಿನ್ ವಿವರವಾದ್ ತೆರಿಪಾದ್ ಈ ಕ್ಷೇತ್ರಗ್ ಬರ್ಪುನ ಭಕ್ತೆರ್ ಆರೋಗ್ಯ ಸೇವೆಗಾದ್ ಕಷ್ಟ ಪಡೆಪುನ ಪರಿಸ್ಥಿತಿನ್ ತೆರಿಪಾಯೆರ್. ಬೊಕ್ಕ ಬಿನ್ನಾಪು ಸಂದಾಯೆರ್. ಬಿನ್ನಾಪುನ್ ಸ್ವೀಕಾರ ಮಲ್ತಿನ ಮಾಜಿ ಸ್ಪೀಕರ್ ಈ ಸರಕಾರದ ತೆರಿಪಾವೆ ಪಂದ್ ಪಂಡೆರ್.

ಈ ಪೊರ್ತುಡು ಸುಬ್ರಹ್ಮಣ್ಯ ಸೇವಾ ಸಹಕಾರಿ ಸಂಘದ ಒತ್ತು ಗುರ್ಕಾರೆ ಮಾದವ ದೇವರಗದ್ದೆ ಪಾಲ್ ಪಡೆದಿತ್ತೆರ್.