ಕುಡ್ಲ : ದ.ಕ.ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಸಮಾಜ ಸೇವಾ ಸಂಸ್ಥೆ ಕದ್ರಿ ಕ್ರಿಕೆಟರ್ಸ್ (ರಿ) ಮುತಾಲಿಕೆಡ್ ಸೆ.7 ತಾರೀಕ್ ಗ್ ರಾತ್ರೆ 7 ಗಂಟೆಗ್ ಕದ್ರಿ ಮೈದಾನಡ್ ಮೊಸರು ಕುಡಿಕೆ ಉಚ್ಚಯದ ಅಂಗವಾದ್ 14 ನೇ ವರ್ಷದ ಕದ್ರಿ ಸ್ಟಾರ್ ನೈಟ್ ಸಂಗೀತ ರಸ ಸಂಜೆ ಕಾರ್ಯಕ್ರಮ ನಡಪರೆ ಉಂಡು ಪಂದ್ ಸಂಸ್ಥೆದ ಅಧ್ಯಕ್ಷೆರ್ ಕದ್ರಿ ಮನೋಹರ ಶೆಟ್ರ್ ತೆರಿಪಾಯೆರ್.
ಸೋಮಾರ ಪತ್ರಿಕಾಗೋಷ್ಠಿಡ್ ಪಾತೆರ್ನ ಆರ್, ಈ ಸ್ಟಾರ್ ನೈಟ್ ಲೇಸ್ ಡ್ ಪುಗರ್ತೆದ ಹಿನ್ನೆಲೆ ಗಾಯಕೆರ್ ಕುನಾಲ್ ಗಾಂಜವಾಲಾ, ಸ್ಟಾರ್ ಚಿತ್ರನಟೆ ರಿಷಭ್ ಶೆಟ್ಟಿ, ನಟಿ ರುಕ್ಮಿಣಿ ವಸಂತ,ನಿರ್ದೇಶಕೆರ್ ಹೇಮಂತ ರಾವ್, ರಾಜ್ಯ ಪ್ರಶಸ್ತಿ ವಿಜೇತ ಹಿನ್ನೆಲೆ ಗಾಯಕೆರ್ ಅನುಪ್ ಸಿಲಿನ್, ಮಣಿಕಾಂತ್ ಕದ್ರಿ, ಡಾ.ಕಿರಣ್ ತೊಟ್ಟಂಬೈಲ್, ಗಾಯಕೆರಾಯಿನ ವಸುಶ್ರೀ ಹಳೆಮನೆ, ಕರಿಬಸವ ತಡಕಲ್, ತನುಶ್ರೀ ಮೊಕುಲು ಮಾತ ಪಾಲ್ ಪಡೆವರೆ ಉಲ್ಲೆರ್. ಈ ಲೇಸ್ ಡ್ ನಾಲ್ ಜನ ನಿವೃತ್ತ ಸೈನಿಕೆರ್ ಬೊಕ್ಕ ಯಕ್ಷಗಾನ ಭಾಗವತೆರ್ ಪುತ್ತಿಗೆ ರಘುರಾಮ ಹೊಳ್ಳ ಮೆರೆನ್ ಮಾನಾದಿಗೆ ಮಲ್ಪರೆ ಉಂಡು ಪಂದ್ ಪಂಡೆರ್.
ಮಲ್ಲ ಬಿನ್ನೆರಾದ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಶಾಸಕೆರ್ ಬೊಕ್ಕ ವಿಧಾನ ಪರಿಷತ್ ಸದಸ್ಯೆರ್, ಪೊಲೀಸ್ ಕಮಿಷನರ್, ಪಾಲಿಕೆ ಕಮಿಷನರ್ ಮಾತ ಬೊಕ್ಕ ಸಾರ್ವಜನಿಕೆರ್ ಮಲ್ಲ ಸಂಖ್ಯೆಡ್ ಪಾಲ್ ಪಡೆವರೆ ಉಲ್ಲೆರ್ ಪಂಡೆರ್.
ಸುದ್ದಿಗೋಷ್ಠಿಡ್ ಸಂಸ್ಥೆದ ಕಾರ್ಯದರ್ಶಿ ರಾಘವೇಂದ್ರ ಬರ್ವತ್ತಾಯ,ಉಪಾಧ್ಯಕ್ಷೆರ್ ಹೇಮಾನಂದ ಕೊಡಿಯಾಲ್ ಬೈಲ್, ಸದಸ್ಯೆರಾಯಿನಚೇತನ್ ಶಶಾಂಕ್, ತಾರಾನಾಥ್ ಶೆಟ್ಟಿ, ಜಗದೀಶ್ ಕದ್ರಿ, ಸಹನ್ ಕದ್ರಿ, ಸಚಿನ್ ಕದ್ರಿ, ಶರಣ್, ಸುಜಿತ್ ಸಾಲ್ಯಾನ್, ಅವಿನಾಶ್ ರೈ ಇತ್ತೆರ್.
ಸುರೂತ್ತ ಸರ್ತಿ ಸಾರ್ವಜನಿಕ ಗಣೇಶೋತ್ಸವ
ಕದ್ರಿ ಕ್ರಿಕೆಟರ್ಸ್ ಮುತಾಲಿಕೆಡ್ ಉಂದುವೇ ಸುರೂತ್ತ ಸರ್ತಿ ಸಾರ್ವಜನಿಕ ಗಣೇಶೋತ್ಸವ ಮಲ್ಪರೆ ನಿರ್ಧಾರ ಮಲ್ತ್ ದ. ಸಾರ್ವಜನಿಕೆರ್ನ ಇಚ್ಚೆದ ಪ್ರಕಾರ ಈ ನಿರ್ಧಾರ ಆತ್ಂಡ್. ಕಿರೀಟ ಬುಡ್ದು ದೇವೆರೆಗ್ ಬೋಡುತ್ತಿನ ಬೊಳ್ಳಿದ ಆಭರಣಲ ತಯಾರಾತ್ಂಡ್.
ಸೆ.19 ಗು ಕದ್ರಿ ಮೈದಾನಡ್ ಗಣಪತಿ ದೇವೆರ್ನ ಪ್ರತಿಷ್ಠಾಪನೆ, ಭಜನೆ, ಪೂಜೆ ಆದ್ ಸೆ.20 ಗು ಬಯ್ಯಗ್ ಶೋಭಾಯಾತ್ರೆ ನಡತ್ ದ್ ಕದ್ರಿಕಂಬಳ ಕೆರೆಟ್ಟ್ ಮೂರ್ತಿ ವಿಸರ್ಜನೆ ಆವರೆ ಉಂಡು ಪಂದ್ ಕದ್ರಿ ಮನೋಹರ ಶೆಟ್ರ್ ತೆರಿಪಾಯೆರ್.
