ಕುಡ್ಲದ ಸುದ್ದಿ | Mangalore News

ತುಳುಕ್ಕ್ ಹೆಚ್ಚುವರಿ ಭಾಷೆ ಸ್ಥಾನಮಾನಗ್ ಪ್ರಯತ್ನ: ಸಿಎಂ

ಬೆಂಗಳೂರು: ಬೆಂಗಳೂರುಡು ಪ್ರತಿ ವರ್ಷ ಕಂಬುಲ ನಡಪುಲಕ ಆವಡ್ ಪಂದ್ ಸಲಹೆ ಕೊರ್ನ ಸಿಎಂ ಸಿದ್ದರಾಮಯ್ಯ, ತುಳು ಭಾಷೆಗ್ ಹೆಚ್ಚುವರಿ ಭಾಷೆದ ಸ್ಥಾನಮಾನ ಕೊರಿಯೆರೆ ಪ್ರಯತ್ನ ಮಲ್ಪುವೆ ಪಂದ್ ಪಂಡೆರ್.

ಬೆಂಗಳೂರು ಕಂಬುಲ ಸಮಿತಿ ಬೆಂಗಳೂರುದ ಅರಮನೆ ಮೈದಾನ ಡ್ ಆಯೋಜನೆ ಮಲ್ತಿನ ಕಂಬುಲ ಉತ್ಸವ ಬೊಕ್ಕ ತುಳುನಾಡ್ ದ ಸಾಂಸ್ಕೃತಿಕ ಕಾರ್ಯಕ್ರಮನ್ ಶನಿವಾರ ಬಯ್ಯಗ್ ಉದಿಪನ ಮಲ್ತ್ ಪಾತೆರಿಯೆರ್.

ತುಳು ಭಾಷೆಗ್ ಕರ್ನಾಟಕಡ್ ಹೆಚ್ಚುವರಿ ಭಾಷೆ ಸ್ಥಾನಮಾನ ತಿಕ್ಕೊಡು ಪಂದ್ ಭಾರಿ ವರ್ಷದ ಕೋರಿಕೆ ಆತ್ಂಡ್. ಈ ಬಗ್ಗೆ ಕನ್ನಡ ಬೊಕ್ಕ ಸಂಸ್ಕೃತಿ ಸಚಿವೆರ್ನ ಒಟ್ಟಿಗೆ ಚರ್ಚೆ ಮಲ್ತ್ ತೀರ್ಮಾನ ಮಲ್ಪುವ ಪಂದ್ ಪಂಡೆರ್. ಅಂಚನೆ ಸಾಂಸ್ಕೃತಿಕ ಕಾರ್ಯಕ್ರಮ ನಡಪಾಯೆರೆ ತುಳು ಭವನಗಾದ್ ಬೆಂಗಳೂರುಡು ಜಾಗೆ ದೆಪ್ಪಾದ್ ಕೊರ್ರೆ ಪ್ರಯತ್ನ ಮಲ್ಪುವ ಪಂದ್ ಮುಖ್ಯಮಂತ್ರಿಲು ಭರವಸೆ ಕೊರಿಯೆರ್.

ಬೆಂಗ್ಲೂರು ಕಂಬುಲ ತೂದು ಪಿರ ಬನ್ನಗ ಆಕ್ಸಿಡೆಂಟ್: ರಡ್ಡ್ ಜನ‌ ಕಲಾಸ್

ಬೆಂಗಳೂರು ಕಂಬುಲ ತೂದು ಪಿರ ಬನ್ನಗ
ಬೋರ್ ವೆಲ್ ಲಾರಿ ಬೊಕ್ಕ ಕಾರ್ ದ ನಡುಟು ಆಯಿನ ಆಕ್ಸಿಡೆಂಟ್ ಡ್ ರಡ್ಡ್ ಜನ ಜವನೆರ್ ತೀರ್ ಪೋತೆರ್.

ಕುಣಿಗಲ್ ಪೊಲೀಸ್ ಸ್ಟೇಶನ್ ವ್ಯಾಪ್ತಿದ ರಾಜ್ಯ ಹೆದ್ದಾರಿ ಕೊತ್ತಗೆರೆ ಹೋಬಳಿ ಚಿಗಣಿಪಾಳ್ಯ ಗ್ರಾಮದ ಕೈತಲ್ ಈ ಘಟನೆ ನಡತ್ಂಡ್.

ಬಜಪೆ ಮೂಲದ ಕಿಶಾನ್ ಶೆಟ್ಟಿ, ಭಟ್ಟರ ತೋಟ ಗ್ರಾಮದ ಫಿಲಿಪ್ ನೇರಿ ಲೋಬೋ ತೀರ್ ಪೋಯಿನಕುಲು.

ಮಸ್ತ್ ಪೆಟ್ಟ್ ಆಯಿನ ನಿತೀಶ್ ಭಂಡಾರಿ, ಪ್ರೀತಿ ಲೋಬೋ, ಹರೀಶ್ ಆದಿಚುಂಚನ ಗಿರಿ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದು ಉಲ್ಲೆರ್.

ಬೆಂಗಳೂರು ಕಂಬುಲ ತೂದು ಪಿರ ಬನ್ನಗ ಈ ಘಟನೆ ನಡತ್ಂಡ್. ಕುಣಿಗಲ್ ಪೊಲೀಸ್ ಸ್ಟೇಷನ್ ಡ್ ಕೇಸ್ ದಾಖಲ್ ಮಲ್ತ್ ತನಿಖೆ ಮಲ್ತೊಂದು ಉಲ್ಲೆರ್.

ತಿಮಿಂಗಿಲದ ಉಬ್ಬಿ ನೀರ್ ಅಂಬರ್ ಗ್ರೀಸ್ ಮಾರ್ರೆ ಬತ್ತಿನ 3 ಜನ ಅರೆಸ್ಟ್

ಕುಡ್ಲ ಪೇಂಟೆದ ಪಂಪ್ ವೆಲ್ ಇಂಡಿಯಾನ ಆಸ್ಪತ್ರೆದ ಕೈತಲ್ 4 ಜನ ವ್ಯಕ್ತಿಲು ಸ್ವಿಫ್ಟ್ ಕಾರ್ ಡ್ ಮಸ್ತ್ ಬಿಲೆತ್ತ ತಿಮಿಂಗಿಲ ಕಕ್ಕ್ ದಿನ (ಅಂಬರ್ ಗ್ರೀಸ್ ನ್) ಗಿರಾಕಿಲೆಗ್ ಮಾರಾಟ ಮಲ್ಪೆರೆ ಪ್ರಯತ್ನ ಮಲ್ತೊಂದು ಇತ್ತಿನ ಗೊತ್ತಾದ್ ಜಾಗೆಗ್ ದಾಳಿ ಮಲ್ತಿನ ಕುಡ್ಲದ ಸಿಸಿಬಿ ಪೊಲೀಸೆರ್ ಮೂಜಿ ಜನ ಆರೋಪಿಲೆನ್ ದಸ್ತಗಿರಿ ಮಲ್ತ್ ದ್, ದಸ್ತಗಿರಿ ಮಲ್ತಿನ ಮೂಜಿ ಆರೋಪಿತೆರೆರ್ದ್ 1,57,50,000/- ರೂ ಬಿಲೆತ್ತ 1.575 ಕೆಜಿ ಅಂಬರ್ ಗ್ರೀಸ್, ಕಾರ್ ಬೊಕ್ಕ ಮೊಬೈಲ್ ಫೋನ್ ನ್ ವಶಕ್ ಪಡೆಯೊಂದೆರ್.

ಪ್ಯಾರೇಜಾನ್, ಬದ್ರುದ್ದೀನ್
ರಾಜೇಶ್.ಆರ್, ಅರೆಸ್ಟ್ ಆಯಿನ ಆರೋಪಿಲು.

ಈ ಪತ್ತೆ ಕಾರ್ಯಡ್ ಕುಡ್ಲ ಪೊಲೀಸ್ ಆಯುಕ್ತೆರ್ ಅನುಪಮ್ ಅಗರ್ವಾಲ್ ಐಪಿಎಸ್ ಮಾರ್ಗದರ್ಶನದಂಚ ಸಿದ್ದಾರ್ಥ ಗೋಯಲ್ ಐಪಿಎಸ್ ಬೊಕ್ಕ ಅಪರಾಧ ಬೊಕ್ಕ ಸಂಚಾರ ವಿಭಾಗದ ಡಿಸಿಪಿ ದಿನೇಶ್ ಕುಮಾರ್ ಅರೆನ ನಿರ್ದೇಶನದಂಚ ಕುಡ್ಲ ಸಿಸಿಬಿ ಘಟಕದ ಎಸಿಪಿ ಪಿ.ಎ.ಹೆಗಡೆ ಮೊಕ್ಲೆನ ನೇತೃತ್ವಡ್ ಈ ಆರೋಪಿಲೆನ್ ಬೊಕ್ಕ ಸೊತ್ತು ಪತ್ತೆ ಕಾರ್ಯಡ್ ಸಿಸಿಬಿ ಘಟಕದ ಅಧಿಕಾರಿ ಸಿಬ್ಬಂದಿಲು ಇತ್ತೆರ್.

ಕುಡ್ಲ ಪೇಂಟೆದ ಬುಲೆಚ್ಚಿಲ್‌ಗ್ 75 ಕೋಟಿ ರೂಪಾಯಿ : ಭೈರತಿ ಸುರೇಶ್

ಕುಡ್ಲ : ಕುಡ್ಲನ್ ಪ್ರವಾಸಿತಾಣ ಮಲ್ಪರೆ 50 ಕೋಟಿ ರೂಪಾಯಿ ವಿಶೇಷ ಅನುದಾನ ಅಂಚೆನೆ ಕುಡ್ಲ ಪೇಂಟೆದ ಅಭಿವೃದ್ದಿಗ್ ಪಾಲಿಕೆಗ್ 25 ಕೋಟಿ ರೂಪಾಯಿ ಅನುದಾನೊನು ಬೇಗೊಡು ಬುಡುಗಡೆ ಮಲ್ಪುವ ಪನ್ದ್ ನಗರಾಭಿವೃದ್ದಿ ಸಚಿವೆರ್ ಭೈರತಿ ಸುರೇಶ್ ಪಂಡೆರ್.

ಕುಡ್ಲದ ಅಭಿವೃದ್ಧಿ ಡ್ ಒವ್ವೇ ರಾಜಕೀಯ ಇಜ್ಜಿ. ಜನಕ್ಲೆನ ತೀರ್ವೆದ ಪನವು ಜನಕುಲೆಗೇ ಗಲಸುಲೆಕ್ಕ ಆವೊಡು. 749 ಕೋಟಿ ರೂ. ಕರ್ಚಿಡ್ ಕುಡ್ಲದ ಸ್ಮಾರ್ಟ್ ಸಿಟಿ ಬೇಲೆಲು ಆವೊಂದುಲ್ಲ, 24 ಬೇಲೆಲು ಆವೊಂದುಲ್ಲ. ರಾಜ್ಯೊಡೇ ಅತ್ಯುತ್ತಮ ಪನ್ಪಿನಂಚ ಎಮ್ಮೆಕೆರೆ ಸ್ವಿಮ್ಮಿಂಗ್ ಪೂಲ್ ನಿರ್ಮಾಣ ಆತ್ಂಡ್ ಪನ್ಡೆರ್. ಈ ಪೊರ್ತುಡು ಸ್ವಿಮ್ಮಿಂಗ್ ಪೂಲ್ ಉದಿಪನ ಲೇಸ್ ದ ಗುರ್ಕಾರ್ಮೆ ವೈಸೊಂದಿತ್ತಿನ ವೇದವ್ಯಾಸ ಕಾಮತೆರ್ ಪಾತೆರ್ದ್, ಸ್ಮಾರ್ಟ್ ಸಿಟಿ ಯೋಜನೆದ ಮೂಲಕ ಕುಡ್ಲ ಅಭಿವೃದ್ದಿದಂಚಿ ಮಲ್ಲ ಬಕ್ಕರ್ ಪಾಡೊಂದುಂಡು. ಪಿಪಿಪಿ ಮಾದರಿಡ್ ಕುಡ್ಲದ ಸೆಂಟ್ರಲ್ ಮಾರ್ಕೆಟ್ ಬುಲೆಚ್ಚಿಲ್ ಆವೊಂದುಂಡು ಪನ್ದ್ ಪನ್ಡೆರ್.

ಕುಕ್ಕರ್ ಬಾಂಬ್ ಪುಡಾದಿನ ಕೇಸ್ : ಬೇಗೊಡೆ ಆರೋಪಪಟ್ಟಿ

 ಕುಡ್ಲ ಕುಕ್ಕರ್ ಬಾಂಬ್ ಸ್ಪೋಟದ ಜಡ್ತೆದ ಅಕೇರಿಗ್ ಎತ್ತಿನ ರಾಷ್ಟ್ರೀಯ ತನಿಖಾ ದಳ, ಆರೋಪಿ ಶಾರೀಕ್ ಸೇರ್ದ್ ಐನ್ ಜನತ ಮಿತ್ತ್ ಆರೋಪಪಟ್ಟಿನ್ ಬೇಗನೆ ಸಲ್ಲಿಕೆ ಮಲ್ಪರೆ ಉಂಡು. ಈ ಕೇಸ್ ಡ್ ಸದ್ಯೊಗು ಶಾರೀಕ್, ಮುನೀರ್, ಯಾಸೀನ್, ಅರಾಫತ್ ಒಟ್ಟುಗು ಐನ್ ಜನನ್ ಅರೆಸ್ಟ್ ಮಲ್ದೆರ್.

ಈ ಆರೋಪಿಲೆನ ಮಿತ್ತ್ ಐವೊರ್ದುಲಾ ಎಚ್ಚಿನ ಸಾಕ್ಷಿಲೆನ ಹೇಳಿಕೆ ಅಂಚೆನೆ ತಾಂತ್ರಿಕ ಸಾಕ್ಷಿಲೆನ್ ಒಟ್ಟು ಮಲ್ದ್ಂಡ್. ಆರೋಪಿಲು ಕದ್ರಿ ದೇವಲ್ಯೊಗು ಬಾಂಬ್ ಪಾಡುನ ಅಟ್ಟನೆಡ್ ಇತ್ತೆರ್ ಪನ್ದ್ ತನಿಕೆಡ್ ಬೈದಿತ್ತ್ಂಡ್. ಕದ್ರಿರ್ದ್ ಬೊಕ್ಕ ಒಡಿಪುದ ಕೃಷ್ಣ ಮಠ, ಚಿಕ್ಕಮಗಳೂರುದ ಬಿಜೆಪಿ ಕಚೇರಿಲಾ ಮೊಕಲೆನ ಟಾರ್ಗೆಟ್ ಡ್ ಇತ್ತ್ಂಡ್. ಈ ಬಗೆಟ್ ಆಜಿ ತಿಂಗೊಲು ತರಬೇತಿ ದೆತೊನ್ದಿನ ಉಲ್ಲೇಖಲಾ ಉಂಡು.

ಕುಡ್ಲಡ್ ನನ ಈ ಜಾಗೆಲೆಡ್ ಹಾರ್ನ್ ಪಾಡಿಯರ್ಡ ದಂಡ ಕಟ್ಟೊಡು! No Horn Zoneದ ಬಗೆಟ್ ಪೋಲೀಸ್ ಪ್ರಕಟನೆ!

ಕುಡ್ಲಡ್ ಲೆಕ್ಕೊರ್ದು ಜಾಸ್ತಿ ಟ್ರಾಫಿಕ್ ಆವೊಂದುಂಡು. ಗಾಡಿಡ್ ಪೋಪಿನಕುಲು ಒಟ್ಟಾರೆ ಹಾರ್ನ್ ಪಾಡುನೆರ್ದ್ ಮಸ್ತ್ ಅನಾನುಕೂಲ ಆಪುಂಡು. ಅಂಚಾದ್ ಕುಡ್ಲದ ಕೆಲವು ಜಾಗೆಲೆಡ್ ಹಾರ್ನ್ ಪಾಡರೆ ಬಲ್ಲಿ ಪನ್ದ್ ಪೋಲೀಸೆರ್ ಪ್ರಕಟಣೆ ಕೊರ್ತೆರ್. ಉಂದೆನ್ ಮೀರ್ ‌ದ್ ಪೋಂಡ ಫೈನ್ ಬೂರುಂಡು.

ಹೈಕೋರ್ಟ್‌ದ ಅನು ಗೆತೊಂದು ಬೆಂಗ್ಳೂರ್‌ ದ ಪರೀಕ್ಷೆನ್ ಕುಡ್ಲಡ್ ಬರೆಯಿನ ದಿಂಜಿ ಬಂಜಿನಾಲ್

ಕುಡ್ಲ: ಬೆಂಗ್ಳೂರ್‌ಡ್ ಬರೆಯೊಡಿತ್ತಿನ ನ್ಯಾಯಾಂಗ ಸೇವೆದ ಪರೀಕ್ಷೆನ್ ದಿಂಜಿ ಬಂಜಿನಾರ್ ಒರ್ತಿ ಕುಡ್ಲಡೇ ಬರೆಯಿನ ಅಪರೂಪೊದ ನಡಕೆ ನಡತ್‌ದ್ಂಡ್. ಬೆಂಗ್ಳೂರ್‌ಡ್ ಅಟ್ಟನೆ ಆದಿತ್ತಿನ ನ್ಯಾಯಾಂಗ ಸೇವೆದ ಪರೀಕ್ಷೆಗ್ ಕುಡ್ಲದ ನ್ಯಾಯವಾದಿ ನೇತ್ರಾವತಿ ಅಜತ್ ಬತ್ತಿತ್ತೆರ್. ಎಣ್ಮರೆ ತಿಂಗೊಲ್ದ ದಿಂಜಿ ಬಂಜಿನಾಲ್ ನ್ಯಾಯವಾದಿ ನೇತ್ರಾವತಿ ಎಂಕ್ ಬೆಂಗ್ಳೂರ್‌ಗ್ ಪೋದು ಪರೀಕ್ಷೆ ಬರೆಯೆರೆ ಸಾಧ್ಯ ಇಜ್ಜಿ.

ಅಂಚಾದ್ ಕುಡ್ಲಡೇ ಪರೀಕ್ಷೆ ಬರೆಯೆರೆ ಅನು ಮಲ್ತ್ ಕೊರೊಡು ಪಂದ್ ನೇತ್ರಾವತಿ ಮೇರ್ ಹೈಕೋರ್ಟ್‌ಗ್ ಬಿನ್ನಾಪು ಸಂದಾದಿತ್ತೆರ್. ಸಿವಿಲ್ ನ್ಯಾಯಾಧೀಶೆರೆನ ನೇಮಕಾತಿ ಸಂಬಂಧಿತಿನ ಹೈಕೋರ್ಟ್‌ದ ಸಮಿತಿ ಈ ಅರ್ಜಿನ್ ಪುರಸ್ಕರಿತ್‌ದ್ ಅಭ್ಯರ್ಥಿನ ಬಿನ್ನಾಪುದಂಚ ಕುಡ್ಲಡೇ ಪರೀಕ್ಷೆ ಬರೆಯೆರೆ ಅನು ಕೊರ್ದಿತ್ತ್ಂಡ್. ರಾಜ್ಯ ಹೈಕೋರ್ಟ್‌ದ ವಿಶೇಷ ಅನುವುಡು ನೇತ್ರಾವತಿ ನ್ಯಾಯಾಂಗ ಸೇವೆದ ಮುಖ್ಯ ಪರೀಕ್ಷೆನ್ ಕುಡ್ಲ ನ್ಯಾಯಂತಡೆದ ಕಟ್ವಾನೊಡು ಸನಿಯಾರ ಬೊಕ್ಕ ಐತಾರ ಬರೆತೆರ್. ಎಚ್ಚರ್ಗೆದ ಕ್ರಮ ಆದ್ ನ್ಯಾಯಂತಡೆತಲ್ಪ ಆ್ಯಂಬುಲೆನ್ಸ್‌ನ್ಲಾ ತಯಾರ್ ದೀದಿತ್ತೆರ್.

ಹ್ಯಾಕರ್‌ನಕಲೆನ ಬಲೆಕ್ಕ್ ತಿಕ್ಕ್‌ದ್ ಜೈಲ್ ಸೇರ್ದಿತ್ತಿನ ಜವನೆ ಇನಿ ತುಳುನಾಡ್‌ಗ್

ಬ್ಯಾಂಕ್ ಖಾತೆದ ಹ್ಯಾಕರ್ನಕುಲು ತಿಕ್ಕಾದ್ ಪಾಡ್ದ್ ಸೌದಿ ಅರೇಬಿಯಾದ ರಿಯಾದ್ ಜೈಲ್‌ಡ್ ಕರಿನ 11 ತಿಂಗೊಲುಡು ಬಂಧಿಯಾದಿತ್ತಿನ ಕಡಬದ ಐತ್ತೂರು ಗ್ರಾಮ ಮಜೂರುದ ಚಂದ್ರಶೇಖರ್ ಮೇರ್ ಬುಡುಗಡೆ ಆದ್ ಊರುಗು ಬರೊಂದುಲ್ಲೆರ್. ರಿಯಾದ್‌ದ ಪೋಲೀಸೆರ್ ಅರೆನ್ ವಿಮಾನೊಡು ಮುಂಬೈಗ್ ಕಡಪುಡುವೆರ್, ಅಲ್ತ್ ಬಯ್ಯಗ್ ಕುಡ್ಲ ವಿಮಾನ ಉಂತಡೆಕ್ ಬರ್ಪೆರ್.

ಚಂದ್ರಶೇಖರ್ ಮೇರ್ ದಾಲಾ ತಪ್ಪು ಮಲ್ಪಂದೆ ಹ್ಯಾಕರ್‌ನಕಲೆನ ವಂಚನೆಗ್ ತಿಕ್ಕ್‌ದ್ ಬೂರ್ದು ಮಸ್ತ್ ಬಂಗ ತಿಂಡೆರ್. ಕಡೆಕ್ಲಾ ಉಂದೆಟ್ ಮೆರೆನ ದಾಲಾ ತಪ್ಪು ಇಜ್ಜಿ ಮೇರ್ ನಿರಪರಾಧಿ ಪನ್ದ್ ತೆರಿನ ರಿಯಾದ್ ಪೋಲೀಸೆರ್ ಮೆರೆನ್ ಬುಡುಗಡೆ ಮಲ್ತ್ ಊರುಗು ಕಡಪುಡುದೆರ್.