Sun. Nov 22nd, 2026

ಕುಡ್ಲದ ಸುದ್ದಿ | Mangalore News

ಜು.19: ಕಿನ್ನಿಗೋಳಿದ ತಾರಿಪಾಡಿ ಮಂಜಲ್ ಪಾದೆಡ್ ತುಲುನಾಡ ಕೆಸರ್ ದ ಗೊಬ್ಬು

ತಾರಿಪಾಡಿ ಜವನೆರೆ ಕಲ, ಪೊಂಜೋವುಲೆನ ಕಲತ್ತ ಮುತಾಲಿಕೆಡ್, ಕುಡ್ಲ ಎಗ್ಗೆದ ಜೈ ತುಲುನಾಡ್ ದ ಒಟ್ಟುಸೇರಿಗೆಡ್ ತೆಲಿಕೆ ನಲಿಕೆಡ್ ತುಲುನಾಡ ಮಣ್ಣ ಕಮ್ಮೆನ ಪಸರುನ ಗೊಬ್ಬುಕೂಟ ತುಲುನಾಡ ಕೆಸರ್ ದ ಗೊಬ್ಬು ಜು.19 ಐತಾರ ಕಿನ್ನಿಗೋಳಿದ ತಾರಿಪಾಡಿ ಮಂಜಲ್ ಪಾದೆಡ್ ನಡಪರೆ ಉಂಡು.

ಅಂಚೆನೆ ಈ ಲೇಸ್ ಡ್ ವಾಲಿಬಾಲ್, ಚೆಂಡ್ ಅಡಕ್ಕುನು (ತ್ರೋಬಾಲ್), ಬಲ್ಲ್ ಒಯಿಪುನ ಕೂಟೊದ ಪಂತೊಲು, ಲಿಂಬೆ ಚಮಚ, ಪಾಲೆ ಒಯಿಪುನು, ಕೊಪ್ಪರಿಗೆ ನಾಡುನು, ಕರ ದರ್ಪುನು, ಪಾಲೆಡ್ ಒಯಿಪುನು, ಮೂಜಿ ಕಾರಡ್ ಬಲಿಪುನು, ಪಿರ ಪಿರ ಬಲಿಪುನು, ಗಿರಿಗಿಟ್ ಬಲಿಪು, ಚೆಂಡ್ ಕೈಪಗಪುನು (ಬಾಲ್ ಪಾಸಿಂಗ್), ಬಲಿಪುನ ಪಂತೊ, ರಿಲೇ ಬೊಕ್ಕ 10 ವರ್ಷೊದ ತಿರ್ತ್ ದ ಆನ್ ಜೋಕುಲು, ಪೊಂಜೋಕುಲು ಒಟ್ಟಿಗೆ ಬಲಿಪುನು, 20 ವರ್ಷೊದ ತಿರ್ತ್ ದ ಆನ್ ಜೋಕುಲು, ಪೊಂಜೋಕುಲು ಬೇತೆ ಬೇತೆ ಬಲಿಪುನು, 20 ಮಿತ್ತ್ ದ ಆನ್ ಜೋಕುಲು, ಪೊಂಜೋಕುಲೆಗ್ ಬೇತೆ ಬೇತೆ ಬಲಿಪುನ ಪಂತೊ, ಅತ್ತಂದೆ ಉಪ್ಪು ಮುಡಿ, ತಪ್ಪಂಗಾಯಿ, ಸಬಿಸವಲ್ ತಾರಿಪಾಡಿ, ಎಳತ್ತೂರ್ ಜೈ ತುಲುನಾಡ್ (ರಿ.) ಕೂಟದಕ್ಲೆಗ್ ಮಾತ್ರ ಈ ಪಂತೊ ನಡಪರೆ ಉಂಡು.

ಈ ಲೇಸ್ ನ್ ತಾರಿಪಾಡಿ ಗುತ್ತು ನಂದಿನಿದ ಟಿ.ರಾಮಚಂದ್ರ ಎನ್ ಶೆಟ್ಟಿ ಉದಿಪನ‌ ಮಲ್ಪೆರೆ ಉಲ್ಲೆರ್. ತಾರಿಪಾಡಿ ಜವನೆರೆ ಕಲತ್ತ ಮಾರ್ಗದರ್ಶಕೆರ್ ಕುಶನ್ ಪೂಜಾರಿ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನುವೆರ್. ಮಣಿಪಾಲ‌ ಒಡಿಪು ಸಮೂಹ ಶಿಕ್ಷಣ ಸಂಸ್ಥೆದ ಸಹ ಪ್ರಾಧ್ಯಾಪಕೆರ್ ಅರ್ಪಿತಾ ಪ್ರಶಾಂತ್ ಶೆಟ್ಟಿ ತುಲು ಕೊಡಿ ರಾಪಾಯೆರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ಕಿನ್ನಿಗೋಳಿ ಪಟ್ಟಣ ಪಂಚಾಯಿತಿ ಗುರ್ಕಾರ್ಲು ಗುರುರಾಜ್ ಮಲ್ಲಿಗೆಯಂಗಡಿ, ತಾರಿಪಾಡಿ ಶ್ರೀ ಧರ್ಮ ಜಾರಂದಾಯ ಜುಮಾದಿ ಬಂಟ ದೈವಸ್ಥಾನದ ಗುರ್ಕಾರ್ಲು ಸುನಿಲ್ ಭಟ್ ತಾರಿಪಾಡಿ, ಭಾಸ್ಕರ ಶೆಟ್ಟಿ ತಾರಿಪಾಡಿ ಗುತ್ತು, ತಾಳಿಪಾಡಿ ಶ್ರೀ ಕೋರ್ದಬ್ಬು ದೈವಸ್ಥಾನದ ಗುರ್ಕಾರ್ಲು ಧನಪಾಲ ಶೆಟ್ಟಿ ತಾಳಿಪಾಡಿ ಗುತ್ತು, ನಿರ್ಮಾಪಕೆರ್, ನಟೆ ಶೋಧನ್ ಶೆಟ್ಟಿ ಪೇಟೆ ಮನೆ ಪಡ್ಡೆದ್ರ, ಪೊಂಪೆ ಪದವಿ ಕಾಲೇಜ್ ದ ಪ್ರಾಂಶುಪಾಲೆರ್ ಪುರುಷೋತ್ತಮ ಕೆವಿ, ನಾರಾಯಣ ಅಂಚನ್ ತಾರಿಪಾಡಿ,  ಜೈ ತುಲುನಾಡ್ ಕೇಂದ್ರ ಸಮಿತಿದ ಗುರ್ಕಾರ್ಲು ಅಶ್ವತ್ ತುಲುವೆ, ಮಾಜಿ ತಾಲೂಕ್ ಪಂಚಾಯಿತಿ ಪದುಕೆರ್ ದಿವಾಕರ ಕರ್ಕೇರ, ಕಿನ್ನಿಗೋಳಿ ಪಟ್ಟಣ ಪಂಚಾಯಿತಿ ಪದುಕೆರ್ ಪ್ರಣೀಕ್ ಕಿನ್ನಿಗೋಳಿ ಪಾಲ್ ಪಡೆಯೆರೆ ಉಲ್ಲೆರ್.

ಜೈ ತುಲುನಾಡ್ (ರಿ.) ಕುಡ್ಲ ಎಗ್ಗೆದ ಗುರ್ಕಾರ್ಲು ರಾಜಶ್ರೀ ಚಂದ್ರಶೇಖರ್ ತುಲುನಾಡ್, ತಾರಿಪಾಡಿ ಯುನೈಟೆಡ್ ಫ್ರೆಂಡ್ಸ್ ದ ರಾಕೇಶ್ ಸುವರ್ಣ, ತಾರಿಪಾಡಿ ಜವನೆರೆ ಕಲತ್ತ ಗುರ್ಕಾರ್ಲು ಉದಯ ಪೂಜಾರಿ, ತಾರಿಪಾಡಿ ಪೊಂಜೋವುಲೆನ ಕಲತ್ತ ಗುರ್ಕಾರ್ಲು ಮೀರಾ ಪೂಜಾರಿ ಒತ್ತು ಪಾಲ್ ಪಡೆಯೆರೆ ಉಲ್ಲೆರ್.

ಪಡ್ಡೆದ್ರ : ಸ್ವರ್ಣ ಸೌಹಾರ್ದ ಸಹಕಾರಿ ಸಂಘದ ವತಿರ್ದ್ ಕಣ್ಣ್ ತಪಾಸಣೆ ಶಿಬಿರ

ಪಡ್ಡೆದ್ರ :ಸ್ವರ್ಣ ಸೌಹಾರ್ದ ಸಹಕಾರಿ ಸಂಘ ನಿಯಮಿತ ಬೊಕ್ಕ ಘಾಟ್ಗೆ ಕರ್ಕೇರ ಪವರ್ ಇಂಡಸ್ಟ್ರೀಸ್ ಪಡ್ಡೆದ್ರ,
ಜೆ ಸಿ ಐ ಸುರತ್ಕಲ್ ಬೊಕ್ಕ ಡಾಕ್ಟರ್ ಅಗರ್‌ವಾಲ್ ಕಣ್ಣಿನ ಆಸ್ಪತ್ರೆ, ಕುಡ್ಲ ಮೊಕ್ಲೆನ ಒಟ್ಟುಸೇರಿಗೆಡ್ ಉಚಿತ ಕಣ್ಣ್ ತಪಾಸಣಾ ಶಿಬಿರ ಜು.12 ಐತಾರ ಸ್ವರ್ಣ ಸೌಹಾರ್ದ ಸಹಕಾರಿ ಸಂಘದ ಪ್ರಧಾನ ಕಚೇರಿ, ಕರ್ಕೇರ ಟವರ್ಸ್, ಕಣ್ಣಂಗಾರ್ ಬೈಪಾಸ್ ಪಡ್ಡೆದ್ರ ಮೂಲು ನಡತ್ಂಡ್.
ಕಾರ್ಯಕ್ರಮದ ಅಧ್ಯಕ್ಷತೆನ್ ಸ್ವರ್ಣ ಸೌಹಾರ್ದ ಸಹಕಾರಿ ಸಂಘದ ಅಧ್ಯಕ್ಷೆರ್ ಶೇಖರ್ ಕೆ. ಕರ್ಕೇರ ವಹಿಸ್‌ದಿತ್ತೆರ್. ಜೆಸಿಐ ಸುರತ್ಕಲ್ ಅಧ್ಯಕ್ಷೆರ್ ಅಶೋಕ್ ಎನ್., ಕಾರ್ಯದರ್ಶಿ ರಾಹುಲ್, ಡಾಕ್ಟರ್ ಅಗರ್ವಾಲ್ ಕಣ್ಣಾಸ್ಪತ್ರೆದ ಕಸ್ಟಮರ್ ರಿಲೇಶನ್ ಆಫೀಸರ್ ಆಶೀಕ್ ಸಾಲ್ಯಾನ್, ಸಹಕಾರಿ ಸದಸ್ಯೆರಾಯಿನ ಗಿರಿಧರ ಪೂಜಾರಿ, ನಿರ್ದೇಶಕಿ ಪ್ರಿಯದರ್ಶಿನಿ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಲೇಸ್‌ದ ಅಧ್ಯಕ್ಷತೆ ವಹಿಸ್‌ದಿತ್ತಿನ ಶೇಖರ್ ಕೆ ಕರ್ಕೇರ ಪಾತೆರ್ದ್, ಬ್ಯಾಂಕಿಂಗ್ ಕ್ಷೇತ್ರಗ್ ಮಾತ್ರ ಸೀಮಿತ ಆವಂದೆ ಸಾಮಾಜಿಕ ಕಳಕಳಿ ದೀವೊಂದು ಆರೋಗ್ಯ ಶಿಬಿರದ ಮುಕೇನ ಜನ ಸೇವೆ ಮಲ್ಪೊಡು ಪಂಡೆರ್.
ಕಾರ್ಯಕ್ರಮೊಗು ಐ ನೀಡ್ಸ್ ಮಾಲೀಕೆರಾಯಿನ ಎಚ್. ಯೋಗೀಶ್ ನಾಯಕ್ ಭೇಟಿ ಕೊರ್ದು ಎಡ್ಡೆಪ್ಪು ಬಯಕಿಯೆರ್.
ಒಟ್ಟು 95 ಜನ ಶಿಬಿರದ ಪ್ರಯೋಜನ ದೆತೊಂಡೆರ್. 40 ಜನಕ್ಕ್ ಕನ್ನಡಕದ ಅವಶ್ಯಕತೆ ಇತ್ತ್‌ದ್ ಅಕ್ಲೆಗ್ ಉಚಿತವಾದ್ ಕನ್ನಡಕ ಕೊರ್ಪಿನ ಭರವಸೆ ಕೊರಿಯೆರ್.
ಹಿರಿಯ ಸಿಬ್ಬಂದಿಲಾಯಿನ ಅಶ್ವಿನಿ ಬೊಕ್ಕ ದೀಪ ಪ್ರಾರ್ಥನೆ ಮಲ್ತೆರ್. ಪ್ರಭಾರ ಮುಖ್ಯ ಕಾರ್ಯನಿರ್ವಹಣಾಧಿಕಾ ಭಾಸ್ಕರ್ ಅಮೀನ್ ತೋಕೂರು ಕಾರ್ಯಕ್ರಮ ನಿರೂಪಣೆ ಮಲ್ತೆರ್.

“ಶ್ರೀ ವಿಠೋಬ ಕ್ಷೇಮ ನಿಧಿ” ಸ್ಥಾಪನೆ, ಹಾರ್ಮೋನಿಯಂ ಕ್ಲಾಸ್‌ಗ್ ಚಾಲನೆ

ಪಂಜ ಕೊಯಿಕುಡೆ : ಶ್ರೀ ವಿಠೋಬ ಭಜನಾ ಮಂದಿರಡ್ “ಶ್ರೀ ವಿಠೋಬ ಕ್ಷೇಮ ನಿಧಿ” ಉದಿಪನ ಅಂಚೆನೆ ಹಾರ್ಮೋನಿಯಂ ಕಲ್ಪಾವುನ ಕ್ಲಾಸ್‌ಗ್ ಚಾಲನೆ ಕೊರ್ಪಿನ ಲೇಸ್ ಮಂದಿರದ ಶಾಂತಾರಾಮ ಶೆಟ್ಟಿ ಸಭಾಂಗಣಡ್ ನಡತ್ಂಡ್.
ಪಂಜ ಶ್ರೀ ಮಹಾಗಣಪತಿ ಮಂದಿರದ ಅರ್ಚಕೆರ ಸುರೇಶ್ ಭಟ್ ದೀಪ ಬೆಳಗಾದ್ ಉದಿಪನ ಮಲ್ತ್‌ದ್ ಶುಭ ಹಾರೈಕೆ ಮಲ್ತೆರ್.
ಈ ಪೊರ್ತುಡು ಶ್ರೀ ವಿಠೋಬ ಭಜನಾ ಮಂದಿರದ ಗೌರವಾಧ್ಯಕ್ಷೆರಾಯಿನ ಸದಾನಂದ ಎಮ್. ಶೆಟ್ಟಿ, ಸುಧಾಕರ್ ಎಸ್. ಪೂಂಜ, ಶ್ರೀ ಚಾಮುಂಡೇಶ್ವರಿ ಸನ್ನಿಧಿ ಪಂಜದ ಸೀತಾರಾಮ ಅಮೀನ್, ಶಿವಸಂಜೀವಿನಿ ಸುರಗಿರಿ ಅಧ್ಯಕ್ಷೆರ್ ನವೀನ್ ಭಂಡಾರಿ, ಶ್ರೀ ಶನೈಶ್ಚರ ಮಂಡಳಿ ಅಧ್ಯಕ್ಷೆರ್ ಸುರೇಶ್ ಪಂಜ ಬೊಕ್ಕ ಹಾರ್ಮೋನಿಯಂ ಗುರು ದಿನೇಶ್ ಎರ್ಮಾಳ್ ಬಿನ್ನೆರಾದ್ ಪಾಲ್ ಪಡೆಯೆರ್.
ಈ ಸಂದರ್ಭಡ್ ಸಮಾಜಸೇವಕೆರ್, ಶಿವ ಸಂಜೀವಿನಿ ಅಧ್ಯಕ್ಷೆರ್ ನವೀನ್ ಭಂಡಾರಿ ಮೆರೆನ್ ಸನ್ಮಾನ ಮಲ್ತೆರ್.
ಉಂದುವೇ ಪೊರ್ತುಡು ಅಂಚೆ ಇಲಾಖೆದ ಅಧಿಕಾರಿಲು ಸಾರ್ವಜನಿಕೆರೆಗ್ ಅಗತ್ಯವಾಯಿನ ಆರೋಗ್ಯ ವಿಮೆತ್ತ ಬಗೆಟ್ ಮಾಹಿತಿ ಕೊರಿಯೆರ್.
ಶ್ರೀ ವಿಠೋಬ ಭಜನಾ ಮಂಡಳಿದ ಅಧ್ಯಕ್ಷೆರ್ ಭರತ್ ರಾಜ್ ಶೆಟ್ಟಿ ಸ್ವಾಗತ ಮಲ್ತೆರ್. ಭಜನಾ ಸಂಚಾಲಕೆರಾಯಿನ ಸತೀಶ್ ಎಂ. ಶೆಟ್ಟಿ ಬೈಲಗುತ್ತು ಲೇಸ್‌ ಸುದಾರಿಕೆ ಮಲ್ತೆರ್. ಕೋಶಾಧಿಕಾರಿ ಪದ್ಮನಾಭ ಪೂಜಾರಿ ಧನ್ಯವಾದ ಕೊರಿಯೆರ್. ಕಾರ್ಯದರ್ಶಿ ಅವಿನಾಶ್ ಶೆಟ್ಟಿ ಬೊಕ್ಕ ಸರ್ವ ಸದಸ್ಯೆರ್, ಮಹಿಳಾ ಸಮಿತಿದಕುಲು, ಹಾರ್ಮೋನಿಯಂ ಕಲ್ಪುನಕುಲು ಪಾಲ್ ಪಡೆದಿತ್ತೆರ್.

“ಪರಮ‌” ಪಾದ ಸೇರಿನ ಪರಮಾನಂದ ಸಾಲ್ಯಾನ್

ಉಡಲ್‌ದ ಬೇನೆನ್ ದಿಂಗೊಂಡೆರ್..ಮನಸ್‌ನ್ ಕಡಲ್ ಮಲ್ತೊಂಡೆರ್…

ಅವು ಅರೆನ ಮರಣದ ಪ್ರಾಯ ಅತ್ತ್. 64 ವರ್ಷ ಪ್ರಾಯ ಕರಿನಾತೆ. ಆಂಡ ಅನಾರೋಗ್ಯ ಪನ್ಪಿನವು ಬೆರಿ ಬುಡಂದಿನ ಕಾರಣೊಗು ಇನಿಕ್ಕಾನಗ ಆರ್ ದೇವೆರೆನ ಪಾದ ಸೇರಿಯೆರ್…!
ಅಂದ್ ಹಿರಿಯ ಪತ್ರಕರ್ತೆ, ರಂಗ ನಿರ್ದೇಶಕೆರ್, ಸಾಂಸ್ಕೃತಿಕ ಲೋಕದ ರಾಯಭಾರಿ ಪರಮಾನಂದ ವಿ. ಸಾಲ್ಯಾನ್ (ಜನನ 25-1-1962) ಮೇರ್ ಜುಲೈ 13 ಸೋಮವಾರ ಜಾಮಂದ ಪೊರ್ತುಡು ದೇವೆರೆ ಪಾದ ಸೇರಿಯೆರ್. ಆರ್ ನನ ನಮಕ್ಕ್ ನೆಂಪು ಮಾತ್ರ.
ಸಾಧಾರಣ 2 ವರ್ಷರ್ದಿಂಚಿ ಅನಾರೋಗ್ಯ ಇತ್ತ್ಂಡಲ, ಅರೆನ “ವಿಲ್ ಪವರ್” ಇದಮುಟ್ಟ ಅರೆನ್ ಬದ್‌ಕಾದ್ಂಡ್ಂದೇ ಪನೊಲಿ. “ಉಡಲ್‌ದ ಬೇನೆನ್ ದಿಂಗೊಂಡೆರ್ … ಮನಸ್‌ನ್ ಕಡಲ್ ಮಲ್ತೊಂಡೆರ್…” ಪನ್ಪಿನ ಅರೆನನೇ ಒಂಜಿ ಗೀತಾ ನಾಟಕದ ಪದತ್ತ ಸಾಲ್‌ದ ಲೆಕ ಅರೆನ ಬೇನೆನ್ ಮನಸ್‌ಡೇ ದೀವೊಂದು ಗಟ್ಟಿ ಮನಸ್ ಮಲ್ದಿತ್ತೆರ್. ಬೊಡೆದಿಗ್‌, ಮಗಕ್ಕ್‌ ಬೊಕ್ಕ ಕುಟುಂಬದಕ್ಲೆಗ್ ಧೈರ್ಯ ಪನೊಂದಿತ್ತೆರ್.
ಸಸಿಹಿತ್ಲು ಶ್ರೀ ಸಾರಂತಾಯ ಗರೊಡಿ ಉಳ್ಳಾಯ ದೈವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಕಾರ್ಯಾಧ್ಯಕ್ಷೆರಾದ್ ಸಕ್ರಿಯವಾದ್ ಬೇಲೆ ಮಲ್ತ್‌ದ್ ಬ್ರಹ್ಮಕಲಶೋತ್ಸವದ ಸಂದರ್ಭಡ್ ಕುಡ ಅಸೌಖ್ಯ ಇತ್ತ್ಂಡಲ ಶ್ರೀ ಉಳ್ಳಾಯ ದೇವೆರೆನೇ ಸದಾ ನೆನೆತೊಂದಿತ್ತೆರ್. ಸಸಿಬಿತ್ತ್‌ಲ್ದ ಸಿರಿ ಭಗವತಿ ಅಪ್ಪೆನ್ ದಿನಲ ಸುಗಿತೊಂದಿತ್ತೆರ್. ಅಕುಲೇ ಎನ್ನ ಶಕ್ತಿ, ಭಕ್ತಿ, ಪ್ರೀತಿ ಪಂದ್ ಎನ್ನ್‌ದಿನಾರ್ ಪರಮಾನಂದ ಸಾಲ್ಯಾನ್.
ಪತ್ರಿಕಾ ರಂಗದ ವಿಚಾರೊಡು ಬನ್ನಗ ಮುಂಗಾರು, ಹೊಸದಿಗಂತ ಪತ್ರಿಕೆಗ್ ತನ್ನ ಕ್ರೀಡಾ ವರದಿಗಾರಿಕೆಡ್ ಪುದರ್ ಕನದಿನಾರ್. “ಅಜೇಯ” ಪನ್ಪಿನ ಪತ್ರಿಕೆದ ಸಂಪಾದಕೆರಾದ್ ಅವೆನ್ ಕೆಲವು ವರ್ಷ ನಡಪಾದೆರ್. ಕಡೆ ಕಾಲ ಮುಟ್ಟಲ ಪರಮ ಸತ್ಯ ಪನ್ಪಿನ ಅಂಕಣ ಬರೆದ್ ತನ್ನ ಬರವುದ ತಾಕತ್ತ್‌ನ್ ತೊಜಪಾದಿನಾರ್.
ವಿಜಯಕುಮಾರ್ ಕೊಡಿಯಾಲ್ ಬೈಲ್‌ರೆನ “ಶಿವದೂತೆ ಗುಳಿಗೆ” ನಾಟಕದ ಸಂಭಾಷಣೆ ಅರೆಗ್ ಮಲ್ಲ ಪುದರ್‌ನ್ ಕನತ್ ಕೊರುಂಡು. ಅವೆರ್ದ್ ಪರಮ ಪದ್ಮ ಕಲಾವಿದರು ಕೂಟನ್ ಪುಟ್ಟುಪಾಡ್ದ್ ” ಶಿವ ಪುರ್ಸಾದ ಬೊಬ್ಬರ್ಯೆ” ನಾಟಕ ರಚನೆ, ನಿರ್ದೇಶನ ಮಲ್ತ್‌ದ್ ಪ್ರದರ್ಶನ ಕೊರಿಯೆರ್.
ಮಸ್ತ್ ವರ್ಷದ ಪಿರವುಡು ಸಸಿಹಿತ್ಲು ಡು ತನ್ನ ಕರಿದ್ ಪೋಯಿನ ಅರುವತ್ತೆ, ಕಲಾವಿದೆ ಸುದರ್ಶನ್‌ನ ನೆಂಪುಗಾದ್ ರಂಗ ಸುದರ್ಶನ (ರಿ) ಪನ್ಪಿನ ಕಲಾ ಕೂಟ ಕಟ್‌ದ್ ಊರುಡು ಮಾತ್ರ ಅತ್ತಾಂದೆ ಬೊಂಬೈ, ಬೆಂಗಳೂರು, ದುಬೈ, ಕುವೈತ್, ಮಸ್ಕತ್ ಇಂಚ ಪಿದಯಿ ದೇಶೊಡ್ಲ ರಂಗ ಪ್ರದರ್ಶನ ಮಲ್ತ್‌ದ್ ತುಳುನಾಡ ಮಣ್ಣ್‌ದ ಸಾಂಸ್ಕೃತಿಕ ವೈಭವೊನು ಜಗತ್ತ್‌ಗ್ ಪಸೆರ್‌ದೆರ್. ಅವೇತೋ ಯುವ ಕಲಾವಿದೆರೆನ್ ತಯಾರ್ ಮಲ್ದೆರ್. ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನದ ಆವರಣೊಡು ಪ್ರತಿವರ್ಷ ಅಸ್ಟೆಮಿದಾನಿ ಸಾಂಪ್ರದಾಯಿಕವಾದ್ ನಡತೊಂದಿತ್ತಿನ ಮಸುಲುಡಿಕೆಗ್ (ಮೊಸರುಕುಡಿಕೆ) ಪೊಸ ದೇಖಿದ ರೂಪಕೊಲೆನ್ ಬರೆದ್ ನಿರ್ದೇಶನ ಮಲ್ತ್‌ದ್ ಪೊಸ ರಂಗ್ ಕೊರ್ತಿನಾರ್ ಪರಮಾನಂದ ಸಾಲ್ಯಾನ್.
ಇಂಚಿತ್ತಿನ ಬಹುಮುಖ ಪ್ರತಿಭೆ, ತುಳು ಬಾಸೆದ ಪ್ರೇಮಿ ಆದಿತ್ತಿನ ಪರಮಾನಂದ ಸಾಲ್ಯಾನ್‌ರೆನ ಆತ್ಮೊಗು ಸದ್ಗತಿ ತಿಕ್ಕಡ್ ಪಂದ್ “ಟೈಮ್ಸ್ ಆಫ್ ಕುಡ್ಲ” ಪತ್ರಿಕೆದ ಪರವಾದ್ ದೇವೆರೆ‌ಡ ಪ್ರಾರ್ಥನೆ ಮಲ್ಪುವ.

ಶ್ರೀ ದುರ್ಗಾದೇವಿ ಇಂಗ್ಲಿಷ್ ಮೀಡಿಯಂ ಶಾಲೆಡ್ ವನಮಹೋತ್ಸವ, ಹಸಿರು ದಿನಾಚರಣೆ

ನಿಡ್ಡೋಡಿದ ಜ್ಞಾನರತ್ನ ಎಜುಕೇಶನ್ ಆಂಡ್ ಚಾರಿಟೇಬಲ್ ಟ್ರಸ್ಟ್ (ರಿ.) ದ ಶ್ರೀ ದುರ್ಗಾದೇವಿ ಇಂಗ್ಲಿಷ್ ಮೀಡಿಯಂ ಶಾಲೆಡ್ ವನಮಹೋತ್ಸವ ಬೊಕ್ಕ ಹಸಿರು ದಿನಾಚರಣೆ ಗೌಜಿಡ್ ನಡತ್ಂಡ್.

ಲೇಸ್ ದ ಅಧ್ಯಕ್ಷತೆನ್ ಒಯಿಸೊನ್ನ ಟ್ರಸ್ಟ್ ಕಾರ್ಯದರ್ಶಿ ಸಂಗೀತಾ ಭಾಸ್ಕರ್ ದೇವಸ್ಯ ಮೇರ್ ದೈ ನಡ್ಪುನ ಮುಕೇನ ಚಾಲನೆ ಕೊರಿಯೆರ್. ಬೊಕ್ಕ ವಿದ್ಯಾರ್ಥಿಲೆಗ್ ದೈ ನ್ ಪಟ್ಟ್ ದ್, ಪರಿಸರ ರಕ್ಷಣೆದ ಸಂದೇಶ ಕೊರಿಯೆರ್.

ಈ ಪೊರ್ತುಡು ಶಾಲೆದ 7ನೇ ತರಗತಿದ ವಿದ್ಯಾರ್ಥಿಲು ವನಮಹೋತ್ಸವದ ಬಗೆಟ್ಟ್ ಬೇತೆ ಬೇತೆ ಸಾಂಸ್ಕೃತಿಕ ಲೇಸ್ ನ್ ಪ್ರದರ್ಶನ ಮಲ್ತೆರ್.

ಲೇಸ್ ಡ್ ಆಡಳಿತಾಧಿಕಾರಿ ಶ್ರೀ ಸಾಗರ್, ಪ್ರಾಂಶುಪಾಲೆರ್ ಅನುರಾಧಾ ಸಾಲಿಯಾನ್, ಮುಖ್ಯೋಪಾಧ್ಯಾಯಿನಿ ಸೀಮಾ ಬೊಕ್ಕ ಸಹ- ಮುಖ್ಯೋಪಾಧ್ಯಾಯಿನಿ ಕುಮಾರಿ ಜಯಶ್ರೀ ಪಾಲ್ ಪಡೆದಿತ್ತೆರ್.

ಸಾಹಿತಿ, ಪತ್ರಕರ್ತೆರ್ ಚಿದಂಬರ ಬೈಕಂಪಾಡಿ ಮೆರೆಗ್ ಕೊ.ಅ. ಉಡುಪ ಪ್ರಶಸ್ತಿ

ಕಿನ್ನಿಗೋಳಿ: ಯುಗಪುರುಷ ಸಂಸ್ಥಾಪಕೆರ್ ದಿ| ಕೊ.ಅ. ಉಡುಪೆರೆನ ನೆಂಪುಗಾದ್ ಪ್ರತಿ ವರ್ಷ ಗೌರವಪೂರ್ವಕವಾದ್ ಕೊರ್ಪಿನ ಕೊ.ಅ.ಉಡುಪ ಪ್ರಶಸ್ತಿನ್ ಈ ಸರ್ತಿ ಸಾಹಿತಿ, ಪತ್ರಕರ್ತೆರ್ ಚಿದಂಬರ ಬೈಕಂಪಾಡಿ ಮೆರೆಗ್ ಕೊರಿಯೆರೆ ಉಂಡು.

ಪ್ರತಿಭಾವಂತ ಕವಿಯಾದ್, ಸಾಹಿತಿಯಾದ್, ಪತ್ರಕರ್ತೆರಾದ್ ಸಮಾಜಡ್ ಗುರುತಿಸಾಯಿನ ಚಿದಂಬರ ಬೈಕಂಪಾಡಿ ಮೇರ್ ಸುಮಾರ್ ವರ್ಷ ಪತ್ರಿಕೋದ್ಯಮ ಕ್ಷೇತ್ರಡ್ ಸೇವೆ ಸಂದಾದೆರ್. 8 ಕೃತಿನ್ ರಚನೆ ಮಲ್ತ್ ದ್, ಸಾಹಿತ್ಯ ಲೋಕಗ್ ಅರ್ಪಣೆ ಮಲ್ದೆರ್.

ದ.ಕ.ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಪ್ರಧಾನ ಕಾರ್ಯದರ್ಶಿಯಾದ್, ಕರ್ನಾಟಕ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ರಾಜ್ಯ ಸಮಿತಿ ಸದಸ್ಯೆರಾದ್, ದ.ಕ.ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಕಟ್ವಾನ ಸಮಿತಿದ ಕಾರ್ಯದರ್ಶಿಯಾದ್, ಸರ್ಕಾರಿ ಲೇಡಿಗೋಷನ್ ಆಸ್ಪತ್ರೆದ ಸಲಹಾ ಸಮಿತಿದ ಸದಸ್ಯೆರಾದ್, ಕುಡ್ಲ ವಿಶ್ವವಿದ್ಯಾನಿಲಯದ ಸೆನೆಟ್ ಸದಸ್ಯೆರಾದ್, ಕುಡ್ಲ ವಿವಿ ಪತ್ರಿಕೋದ್ಯಮ ವಿಭಾಗದ ಸಂದರ್ಶಕೆರಾದ್, ಪ್ರಾಧ್ಯಾಪಕೆರಾದ್ ಸೇವೆ ಸಂದಾದೆರ್. ಕರ್ನಾಟಕ ಸಂಘದ ಕನ್ನಡ ಅಭಿವೃದ್ಧಿ ಸಮಿತಿದ ಬೊಕ್ಕ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾತೆರ್.

ಚಿದಂಬರ ಬೈಕಂಪಾಡಿ ಮೆರೆಗ್ ದ.ಕ. ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಕರ್ನಾಟಕ ಪತ್ರಕರ್ತೆರೆನ ಸಂಘದ ಅತ್ಯುತ್ತಮ ತನಿಖಾ ವರದಿಗಾರೆ ಪ್ರಶಸ್ತಿ, ಅಖಿಲಭಾರತ ಆಕಾಶವಾಣಿ ವರ್ಷೊದ ಪ್ರಶಸ್ತಿ, ಬನ್ನಂಜೆ ರಾಮಾಚಾರ್ಯ ಪತ್ರಿಕೋದ್ಯಮ ಪ್ರಶಸ್ತಿ, ಇನ್‌ಲ್ಯಾಂಡ್ ಪ್ರಶಸ್ತಿ, ಕರ್ನಾಟಕ ಮಾಧ್ಯಮ ಅಕಾಡೆಮಿ ವರ್ಷೊದ ಪ್ರಶಸ್ತಿ, ಕೋಟ ಶಿವರಾಮ ಕಾರಂತ ಪ್ರಶಸ್ತಿ, ಪಟ್ಲ ಪ್ರಶಸ್ತಿ, ನಿಟ್ಟೆ ಯುನಿವರ್ಸಿಟಿ ಮಾಧ್ಯಮ ಪ್ರಶಸ್ತಿದೊಟ್ಟಿಗೆ ಸುಮಾರ್ ಪ್ರಶಸ್ತಿ ತಿಕ್ ದ್ಂಡ್.

ಕರಿನ ಸರ್ತಿದ ದ.ಕ. ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷತೆನ್ ಒಯಿಸೊಂದಿತ್ತೆರ್. ಕೊ.ಅ. ಉಡುಪ ಪ್ರಶಸ್ತಿನ್ ಉಂದುವೇ ಜುಲೈ 24ಕ್ಕ್ ಕಿನ್ನಿಗೋಳಿ ಯುಗಪುರುಷ ಸಭಾಭವನಡ್ ನಡಪರೆ ಇಪ್ಪುನ ಲೇಸ್ ಡ್ 10,000/- ರೂ. ನಗದು, ಗೌರವ ಫಲಕ, ಪ್ರಶಸ್ತಿ ಪತ್ರದೊಟ್ಟಿಗೆ ಪ್ರಧಾನ ಮಲ್ಪೆರೆ ಉಂಡು ಪಂದ್ ಯುಗಪುರುಷದ ಪ್ರಧಾನ ಸಂಪಾದಕೆರ್ ಕೊಡೆತ್ತೂರು ಭುವನಾಭಿರಾಮ ಉಡುಪೆರ್ ತೆರಿಪಾಯೆರ್.

ದೇವೆರೆ ಪಾದೊ ಸೇರಿಯೆರ್ ನಿವೃತ್ತ ಬ್ಯಾಂಕ್ ಅಧಿಕಾರಿ, ಉತ್ಕಟ ಕಲಾ ಪ್ರೇಮಿ ವಕ್ವಾಡಿ ಶೇಖರ ಶೆಟ್ಟಿ

ಕುಡ್ಲ : ವಿಜಯಾ ಬ್ಯಾಂಕ್ ದ ನಿವೃತ್ತ ಅಧಿಕಾರಿ, ಯಕ್ಷಗಾನ ಬೊಕ್ಕ ಬೇತೆ ಬೇತೆ ಸಾಂಸ್ಕೃತಿಕ, ಸಾಮಾಜಿಕ ಸಂಘಟನೆಲೆಡ್ ಬೇನೊಂದು ಇಪ್ಪುನ ವಕ್ವಾಡಿ ಶೇಖರ ಶೆಟ್ಟಿ (86) ಇನಿ ಬೊಲ್ಪುಗು ತೀರಿಯೆರ್.

ಕದ್ರಿದ ಶ್ರೀಕೃಷ್ಣ ಯಕ್ಷ ಸಭಾ ಬೊಕ್ಕ ಯಕ್ಷಾಂಗಣ ಕುಡ್ಲ ಸಂಸ್ಥೆಲೆಡ್ ಸದಸ್ಯೆರಾದ್ ಬೇತೆ ಬೇತೆ ಜಬದಾರಿನ್ ದೆತೊನ್ನ ಮೇರ್ ಸಾರ್ವಜನಿಕ ರಂಗಡ್ ಇಸೇಸವಾದ್ ಗುರುತಿಸಾದೆರ್. ಬ್ಯಾಂಕಿಂಗ್ ಬೊಕ್ಕ ಸಾಮಾಜಿಕ ಸೇವೆಗಾದ್ ಸುಮಾರ್ ಸನ್ಮಾನ – ಗೌರವಲೆಗ್ ಪಾತ್ರರಾತೆರ್.

ಮೂಲತಃ ಕುಂದಾಪುರ ತಾಲೂಕ್ ದ ವಕ್ವಾಡಿದ ಪುಗರ್ತೆದ ಕೃಷಿಕೆರೆನ ಕುಟುಂಬಡ್ ಪುಟ್ಟಿನ ಶೇಖರ ಶೆಟ್ರ್ ಸುಮಾರ್ ವರ್ಷೊದಿಂಚ ಕುಡ್ಲಡ್ ಇತ್ತೆರ್. ದೇಶದ ಬೇತೆ ಬೇತೆ ಭಾಗಡ್ ಬ್ಯಾಂಕಿಂಗ್ ಸೇವೆ ಸಂದಾದ್, ತನ್ನ ಸ್ನೇಹಶೀಲ ಬೊಕ್ಕ ವಿನೋದವಾಯಿನ ಪಾತೆರರ್ದ್ ಸಾರ್ವಜನಿಕೆರೆನ ವಿಶ್ವಾಸ ಗಳಿಸಾದೆರ್.

ಪತ್ನಿ ವಸಂತಿ ಶೆಟ್ಟಿ, ಮೂಜಿ ಆನ್ ಜೋಕುಲು ಡಾ| ವಿದ್ಯಾಧರ್ ಶೆಟ್ಟಿ, ರೂಪೇಶ್ ಕುಮಾರ್ ಶೆಟ್ಟಿ, ಹರ್ಷಿಷ್ ಕುಮಾರ್ ಶೆಟ್ಟಿ, ಕುಟುಂಬದಕುಲು ಬೊಕ್ಕ ಸುಮಾರ್ ಬಂಧು – ಮಿತ್ರೆರೆನ್ ಕಳೆವೊಂದೆರ್.

ಕದ್ರಿ ಹಿಲ್ಸ್ ಪ್ರವಾಸಿ ಮಂದಿರದ ಎದುರುದ ಸಂಗೀತಾ ಅಪಾರ್ಟ್ ಮೆಂಟ್ ಡ್ ಇಪ್ಪುನ ಮೆರೆನ ನಿವಾಸಡ್ ಮೆರೆನ ಆಪ್ತೆರ್ ಬೊಕ್ಕ ಹಿತೈಷಿಲು ಅಕೇರಿದ ದರ್ಶನ ಪಡೆಯೆರ್. ಬೆಂಗ್ಲೂರುಡು ಉದ್ಯೋಗಿ ಆದಿಪ್ಪುನ ಮೆರೆನ ರಡ್ಡನೇ ಮಗೆ ಬರೊಡಾಯಿನೇರ್ದಾವೆರ ಬಯ್ಯಗ್ ಕದ್ರಿ ರುದ್ರಭೂಮಿಡ್ ಅಂತ್ಯಕ್ರಿಯೆಗ್ ತಯಾರಿ ನಡತ್ ದ್ಂಡ್ ಪಂದ್ ಮೆರೆನ ಎಲ್ಯ ಮಗೆ ಹರ್ಷಿಷ್ ಕುಮಾರ್ ಶೆಟ್ಟಿ ತೆರಿಪಾದೆರ್.

ವಕ್ವಾಡಿ ಶೇಖರ ಶೆಟ್ಟಿ ಮೇರ್ ತೀರಿನೆಕ್ಕ್ ಯಕ್ಷಾಂಗಣ ಕುಡ್ಲ, ಶ್ರೀಕೃಷ್ಣ ಯಕ್ಷ ಸಭಾ ಕದ್ರಿ, ಕಲ್ಕೂರಾ ಪ್ರತಿಷ್ಠಾನ ಕುಡ್ಲ, ವಿಜಯಾ ಬ್ಯಾಂಕ್ ದ ಸಹೋದ್ಯೋಗಿಲು ಬೊಕ್ಕ ದಕ್ಷಿಣ ಕನ್ನಡ, ಒಡಿಪು ಜಿಲ್ಲೆದ ಬೇತೆ ಬೇತೆ ಬಂಟರ ಸಂಘಲು ಸಂತಾಪ ತೆರಿಪಾದೆರ್.

ಆತ್ಮೀಯ ಬಳಗಡ್ ‘ಮೀಸೆ ಮಾವ’ ಪನ್ಪಿನ ಅಕ್ಕರೆಗ್ ಪಾತ್ರರಾಯಿನ ವಕ್ವಾಡಿ ಮೇರ್ ಯಕ್ಷಾಂಗಣದ ಸಪ್ತಾಹ ಲೇಸ್ ಡ್ ಜವನೆರೆಲೆಕ್ಕ ಸುದರ್ತ್ ದ್ ಸಹಕಾರ ಕೊರೊಂದು ಇತ್ತೆರ್ ಪಂದ್ ಯಕ್ಷಾಂಗಣ ಕುಡ್ಲ, ಯಕ್ಷಗಾನ ಚಿಂತನ – ಮಂಥನ ಬೊಕ್ಕ ಪ್ರದರ್ಶನ ವೇದಿಕೆದ ಕಾರ್ಯಾಧ್ಯಕ್ಷೆರ್ ಭಾಸ್ಕರ ರೈ ಕುಕ್ಕುವಳ್ಳಿ ಪಂಡೆರ್.

2024ಟ್ಟ್ ಕದ್ರಿ ಶ್ರೀ ಮಂಜುನಾಥ ದೇವಸ್ಥಾನಡ್ ನಡತಿನ 11ನೇ ವರ್ಷೊದ ‘ಯಕ್ಷಗಾನ ತಾಳಮದ್ದಳೆ ಸಪ್ತಾಹ ‘ ಡ್ ಹಿರಿಯ ಸದಸ್ಯೆರೆನ ದುಂಬಾತ್ತಿಗೆಡ್ ಶೇಖರ ಶೆಟ್ಟಿ ಮೆರೆಗ್ ಸನ್ಮಾನ ಮಲ್ದ್ಂಡ್. ಶೆಟ್ರ್ ತೀರಿರ್ನೆದಾವೆರ ಹಿರಿಯ ಮಾರ್ಗದರ್ಶಕೆರೆನ್ ಒರಿಯಾನ್ ಕಳೆವೊನ್ನಲೆಕ್ಕ ಆತ್ಂಡ್ ಪಂದ್ ನುಡಿನಮನ ಸಂದಾದೆರ್.

“ತುಳುವ ಮಹಾಸಭೆ ಇಂಟರ್‌ನ್ಯಾಷನಲ್‌ದ ರಾಜ್ಯ ಗುರ್ಕಾರೆ ಆದ್ ದೇವೇಂದ್ರ ಹೆಗ್ಡೆ ಕೊಕ್ರಾಡಿ ನೇಮಕ”

 

 

ಕುಡ್ಲ : ತುಳುವ ಮಹಾಸಭೆ ಇಂಟರ್‌ನ್ಯಾಷನಲ್ ಕೂಟದ ಕರ್ನಾಟಕ ರಾಜ್ಯ ಗುರ್ಕಾರೆ ಆದ್
ದೇವೇಂದ್ರ ಹೆಗ್ಡೆ ಕೊಕ್ರಾಡಿ ಬೆಂಗಳೂರು ಮೇರ್ ನೇಮಕ ಆತೆರ್.
1928 ನೇ ಇಸ್ವಿಡ್ ಸ್ಥಾಪನೆ ಆದ್ 2028ನೇ ಇಸ್ವಿಡ್ ನೂದು ವರ್ಷದ ಸಂಬ್ರುಮೊ ಆಚರಿಪುನ ಐತಿಹಾಸಿಕ “ತುಳುವ ಮಹಾಸಭೆ”ತ್ತ ಜಾಗತಿಕ ಸಂಘಟನೆ ಆದುಪ್ಪುನ ತುಳುವ ಮಹಾಸಭೆ ಇಂಟರ್‌ನ್ಯಾಷನಲ್ ‌ದ ಕರ್ನಾಟಕ ರಾಜ್ಯ ಮಟ್ಟದ ಸಂಘಟನೆನ್ ನನಾತ್ ಗಟ್ಟಿ ಮಲ್ಪುನ ಉದ್ದೇಶಡ್ ದೇವೇಂದ್ರ ಹೆಗ್ಡೆರೆನ್ ಕೇಂದ್ರೀಯ ಸಮಿತಿ ತಾತ್ವಿಕವಾದ್ ನೇಮಕ ಮಲ್ದ್ಂಡ್.
ತುಳು ಭಾಷೆ, ಸಂಸ್ಕೃತಿ, ಪರಂಪರೆ ಬೊಕ್ಕ ಸಮಾಜಸೇವಾ ಕ್ಷೇತ್ರಡ್ ಸಕ್ರಿಯವಾದುಪ್ಪುನ ಹೆಗ್ಡೆರ್‌ನ ಅಮೂಲ್ಯ ಸೇವೆ, ನಾಯಕತ್ವ ಗುಣ ಬೊಕ್ಕ ಸಂಘಟನೆದ ಚಾತುರ್ಪುನು ತೂದು ಕರ್ನಾಟಕ ರಾಜ್ಯದ ಗುರ್ಕಾರೆ ಆದ್ ನೇಮಕ ಮಲ್ತ್‌ದ ಪಂದ್
ತುಳುವ ಮಹಾಸಭೆ ಇಂಟರ್ನ್ಯಾಷನಲ್ ಅಂತರರಾಷ್ಟ್ರೀಯ ಗುರ್ಕಾರೆ ಸರ್ವೋತ್ತಮ ಶೆಟ್ಟಿ, ಕೇಂದ್ರೀಯ ಸಮಿತಿದ ಗುರ್ಕಾರೆ ಡಾ. ಅವಿನ್ ಬಿ. ಆರ್. ಆಳ್ವ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.

ಪಕ್ಷಿಕೆರೆ- ಪಂಜ ಮಾರ್ಗ ರಿಪೇರಿ ಮಲ್ತಿನ ಜವನೆರ್

ಪಂಜ ಕೊಯಿಕುಡೆ ಶ್ರೀ ವಿಠೋಭ ಭಜನಾ ಮಂದಿರದ ನೇತೃತ್ವಡ್ ಶ್ರಮದಾನ, ಸ್ವಚ್ಛತೆದ ಬೇಲೆ

ಹಳೆಯಂಗಡಿ: ಪಂಜ- ಕೊಯಿಕುಡೆ ಶ್ರೀ ವಿಠೋಭ ಭಜನಾ ಮಂದಿರದ ಆಶ್ರಯೊಡು ಐತಾರದಾನಿ ಪಕ್ಷಿಕೆರೆ- ಪಂಜ ಮಾರ್ಗದ ಕೆಂಪುಗುಡ್ಡೆರ್ದ್ ನಂದಿನಿ ತುದೆತ್ತ ಅಣೆಕಟ್ಟ ಮುಟ್ಟ ಮಾರ್ಗದ
ಗುಂಡಿ ಮುಚ್ಚಿದ್ ರಿಪೇರಿ ಮಲ್ತ್‌ದ್ ಪರಿಸರ ನಿರ್ಮಲ ಮಲ್ಪುನ ಶ್ರಮದಾನದ ಬೇಲೆ ನಡತ್ಂಡ್. ಮಾರ್ಗೊಡು ಇತ್ತಿನ ಗುರಿ ಗುಂಪುಲೆಗ್ ಕಾಂಕ್ರೀಟ್ ಮಿಶ್ರಣನ್ ದಿಂಜಾದ್ ಗಾಡಿಡ್ ಸುಗಮವಾದ್ ಸಂಚಾರ ಮಲ್ಪುಲೆಕ ಅನುಕೂಲ ಮಲ್ತ್ ಕೊರಿಯೆರ್. ಅಂಚೆನೆ ಮಾರ್ಗದ ಬರಿಟ್ ಬುಳೆದಿನ ಬಲ್ಲೆ , ಗೆಲ್ಲ್ ಲೆನ್ ಕಡ್ತ್‌ದ್ , ಕಜವು ಕನಕ್ಲೆನ್ ದೆತ್ತ್‌ದ್ ನಿರ್ಮಲ ಮಲ್ತೆರ್.
ಕರಿನ ಕೆಲವು ಸಮಯೊರ್ದಿಂಚಿ ಪಕ್ಷಿಕೆರೆ- ಪಂಜ ಮಾರ್ಗದ ಕೆಂಪುಗುಡ್ಡೆರ್ದ್ ನಂದಿನಿ ತುದೆತ್ತ ಮಧ್ಯ ಅಣೆಕಟ್ಟ ಮುಟ್ಟದ ಮಾರ್ಗ ಗುರಿ ಗುಂಪು ಬೂರ್ದು ಗಾಡಿ ಪೋವರೆ ಬರಿಯರೆ ಜನಕ್ಲೆಗ್ ಭಾರಿ ಕಷ್ಟ ಆವೊಂದಿತ್ತ್ಂಡ್. ಈ ಸಮಸ್ಯೆಗ್ ಕೂಡ್ಲೆ ಸ್ಪಂದನೆ ಕೊರಿನ ಶ್ರೀ ವಿಠೋಭ ಭಜನಾ ಮಂದಿರದ ಪದಾಧಿಕಾರಿಲು, ಊರುದಕುಲು ಶ್ರಮದಾನದ ಮುಕೇನ ಮಾರ್ಗ ರಿಪೇರಿ ಮಲ್ತೆರ್.
“ನಮ್ಮ ಊರು ನಮ್ಮ ರಸ್ತೆ” ಪನ್ಪಿನ ಸಾಮುದಾಯಿಕ ಜವಾಬ್ದಾರಿದ ಒಟ್ಟುಗು ಮಲ್ತಿನ ಈ ಬೇಲೆ ಸಾರ್ವಜನಿಕೆರೆರ್ದ್ ಭಾರಿ ಮೆಚ್ಚುಗೆ ಪಡೆಂಡ್. ಶ್ರಮದಾನಡ್ ಪಾಲ್ ಪಡೆಯಿನಕ್ಲೆಗ್ ಬೊಕ್ಕ ಅಯಿಕ್ ಬೋಡಾಪಿನ ಸೊತ್ತುಲೆನ್ ಒದಗಾದ್ ಕೊರ್ನ ದಾನಿಲೆಗ್ ಊರುದ ಆರಾಧ್ಯ ದೇವೆರ್ ಶ್ರೀ ವಿಠೋಭ ರುಕುಮಾಯಿ ಆಯುಷ್ಯ, ಆರೋಗ್ಯ, ಸುಖ, ಶಾಂತಿ ಬೊಕ್ಕ ನೆಮ್ಮದಿ ಕೊರ್ದು ಅನುಗ್ರಹ ಮಲ್ಪಡ್ ಪಂದ್ ಶ್ರೀ ವಿಠೋಬ ಭಜನಾ ಮಂದಿರದ ಆಡಳಿತ ಸಮಿತಿದಕುಲು ಪ್ರಾರ್ಥನೆ ಮಲ್ದೆರ್.

ಬೈಕಂಪಾಡಿ ದರೋಡೆ ಕೇಸ್‌ದ ಆರೋಪಿಲೆನ ಫೊಟೊ ಬಿಡುಗಡೆ

ಕುಡ್ಲ : ಬಂಗಾರ್‌ದ ವ್ಯಾಪಾರಿ ಕುಟುಂಬನ್ ಬೈಕಂಪಾಡಿದ ಕೈತಲ್ ದರೋಡೆ ಮಲ್ದಿನ ಕೇಸ್‌ದ ಮಾಸ್ಟರ್ ಮೈಂಡ್ ಪಾಂಡಿಚೇರಿ ಮೂಲದ ಶಿಬಿನ್ ಗಂಗಾಧರನ್ ಬೊಕ್ಕ 14 ಆರೋಪಿಲೆನ ಗುರ್ತ್ ಪತ್ತೆ ಮಲ್ತ್‌ದ್ ಅಕ್ಲೆನ ಫೊಟೊ ಬಿಡುಗಡೆ ಮಲ್ದಿನ ಕುಡ್ಲ ಪೊಲೀಸೆರ್ ಆರೋಪಿಲೆನ ಪತ್ತೆಗ್ ಸಹಕಾರ ಮಲ್ಪರೆ ಸಾರ್ವಜನಿಕೆರೆಡ ಬಿನ್ನಾಪು ಮಲ್ದೆರ್.
ಕೇರಳ ಬೊಕ್ಕ ಕೊಡಗು ಪ್ರದೇಶಡ್ ಆರೋಪಿಲೆನ ಪತ್ತೆ ಮಲ್ಪುನ ಬೇಲೆ ನಡತೊಂದುಂಡು.
ಜೂನ್ 29 ಪುಲ್ಯಕಾಂಡೆ ಕೇರಳದ ಬಂಗಾರ್‌ದ ಉದ್ಯಮಿ ವಿಕಾಸ್ ತನ್ನ ಕುಟುಂಬದ ಜತೆಟ್ಟ್ ಬೊಂಬೈರ್ದ್ ಕೇರಳಗ್ ಬೈಕಂಪಾಡಿದಲ್ಪ ಪೋವೊಂದುಪ್ಪುನಗ ಆರೋಪಿಲು ಕಾರ್‌ನ್ ಅಡ್ಡ ಕಟ್ಟ್‌ದ್ ವಿಕಾಸ್, ಬೊಕ್ಕ ಅರೆನ ಬೊಡೆದಿ, ಮಗನ್ ಅಪಹರಣ ಮಲ್ತ್‌ದ್ 180 ಗ್ರಾಂ ಬಂಗಾರ್ ಬೊಕ್ಕ ಲೂಟಿ ಮಲ್ತ್‌ದ್ ಪರಾರಿ ಆದಿತ್ತೆರ್.

You Missed