ಕಾಸ್ರೋಡ್ ಸುದ್ದಿ | Kasargod News

ಯಶಸ್ವಿಯಾಯಿನ “ಟ್ವೀಟ್‌ ತುಳುನಾಡು” ಅಭಿಯಾನ: 4 ಲಕ್ಷರ್ದ್ ಜಾಸ್ತಿ ಟ್ವೀಟ್

ಕುಡ್ಲ, ಜೂನ್ 14:: ಪಂಚ ದ್ರಾವಿಡ ಭಾಷೆಡ್ ಒಂಜಾಯಿನ ತುಳು ಭಾಷೆ ರಾಜ್ಯದ ಅಧಿಕೃತ ಭಾಷೆ ಆವೊಡು ಪನ್ಪಿನ ಸೊರೊ ತುಳುನಾಡ್ ಡ್ ಏಪಲಾ ಕೇನೊಂದು ಉಂಡು. ಈ ಬಗ್ಗೆ ಹೋರಾಟಲಾ ನಡತೊಂದು ಉಂಡು. ಆಂಡ ಕಡೆತ ಹಂತ ಮಾತ್ರ ನನಲ ಮುಟ್ಟು ದಿಜಿ . ತುಳು ಭಾಷೆ ಸಂವಿಧಾನದ ಎನ್ಮನೆ ಪರಿಚ್ಛೇದಗ್ ಸೇರ್ಪಡೆ ಅವೊಡೆ . ಅಧಿಕೃತ ಭಾಷಾ ಮಾನ್ಯತೆ ತಿಕ್ಕೊಡೆ ಪನ್ಪಿನ ನೆಲೆಟ್ಟ್ ಸರಕಾರದ ಗಮನ ಸೆಳೆಯುನ ನೆಲೆಟ್ಟ್ ಜೂನ್ ೧೩ನೇ ಐತಾರ ದಾನಿ ಜೈತುಳುನಾಡು ಸಂಘಟನೆ ಬೊಕ್ಕ ಬೇತೆ ತುಳು ಪರ ಸಂಘಟನೆದ ಒಟ್ಟು ಸೇರಿಗೆಡ್ ಟ್ವಿಟರ್ ಅಭಿಯಾನ ಸುರು ಆದಿತ್ತುಂಡು .

ಕಾಂಡೆರ್ದ್ ರಾತ್ರಿ ಮುಟ ನಡತಿನ ಈ ಅಭಿಯಾನಡ್ ನಾಲ್ ಲಕ್ಷರ್ದ್ ಜಾಸ್ತಿ ಜನ ಟ್ವೀಟ್ ಮಲ್ಪುನ ಮುಖೇನ ಭಾಷೆದ ಮಹತ್ವ ಸಾರ್ದೆರ್ . .ತುಳು ಅಫೀಶಿಯಲ್ ಇನ್ ಕೆಎ,ಕೆಎಲ್’ ಪನ್ಪಿನ ಹ್ಯಾಷ್‌ಟ್ಯಾಗ್ ಅಡಿಟ್ ಅಭಿಯಾನ ನಡತುಂಡು . ಜೈ ತುಳುನಾಡು, ಯುವ ತುಳುನಾಡು ಸಂಘಟನೆದ ಮುತಾಲಿಕೆಡ್ ಅವ್ವೆತೋ ಸಂಘ ಸಂಸ್ಥೆಲು ಈ ಅಭಿಯಾನಡ್ ಪಾಲ್ ಪಡೆದಿತ್ತೆರ್.

ಕೊರೋನ ಪರೀಕ್ಷೆ ಜಾಸ್ತಿ ಮಲ್ಪರೆ ಜಿಲ್ಲಾಧಿಕಾರಿ ಸೂಚನೆ

ಕುಡ್ಲ, ಜೂನ್ 14 : ದಕ್ಷಿಣ ಕನ್ನಡ ಜಿಲ್ಲೆಡ್ ಪಾಸಿಟಿವಿಟಿ ಪ್ರಮಾಣ ಕಮ್ಮಿ ಆವಂದಿನ ನೆಲೆಟ್ಟ್ ಜಿಲ್ಲೆಡ್ ಟೆಸ್ಟಿಂಗ್ ಪ್ರಮಾಣ ಜಾಸ್ತಿ ಮಲ್ಪರೆ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ಡಾ.ಕೆ.ವಿ.ರಾಜೇಂದ್ರ ಅಧಿಕಾರಿಲೆಗ್ ಸೂಚನೆ ಕೊರ್ತೆರ್ .

ಜಿಲ್ಲಾಧಿಕಾರಿ ಕಚೇರಿಡ್ ನಡತಿನ ನಡತಿನ ಅಧಿಕಾರಿಲೆನ ಸಭೆಟ್ ಡಿಸಿ ಈ ಸೂಚನೆನ್ ಕಟ್ಟುನಿಟ್ಟಾದ್ ಪಾಲನೆ ಮಲ್ಪರೆ ಸೂಚನೆ ಕೊರ್ತೆರ್ . ಜಿಲ್ಲೆಡ್ ನನ ಪಾಸಿಟಿವ್ ಬತ್ತಿನ ಸೋಂಕಿತೆರ್ನ ಇಲ್ಲದ ಕೈತಲ್ ಉಪ್ಪುನ 50 ಇಲ್ಲಡ್ ಮಾತೆರೆಗ್ಲಾ ಖಾಡ್ಡಾಯವಾದ್ ಕೊರೊನಾ ಟೆಸ್ಟ್ ನಡಪಾವೊಡು ಪಂದ್ ಪಂಡೆರ್.

ಸುಬ್ರಮಣ್ಯಡ್ ರಿಕ್ಷಾ,ಟ್ಯಾಕ್ಸಿ ಚಾಲಕೆರೆಗ್ ಕೋವಿಡ್ ಕಿಟ್

ಸುಬ್ರಹ್ಮಣ್ಯ, ಜೂನ್ 14 : ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಡ್ ವ್ಯವಸ್ಥಾಪನಾ ಸಮಿತಿ ಗುರ್ಕಾರ್ಲಾಯಿನ ಮೋಹನ್‌ರಾಮ್ ಸುಳ್ಳಿ ಮೆರ್ನ ಮುತಾಲಿಕೆಡ್ ಕಿಟ್ ವಿತರಣೆ ನಡತುಂಡು .’

ಕಡಬ ಬೊಕ್ಕ ಸುಳ್ಯ ತಾಲ್ಲೂಕುಡು ಇತ್ತೇ ನಾಲ್ ಆಂಬುಲೆನ್ಸ್‌ನ್ ಉಚಿತವಾದ್ ಕೊರ್ತೆರ್ . ಸಾರ್ವಜನಿಕೆರ್ ನೆತ್ತ ಉಪಯೋಗನ್ ಪಡೆಯೊಂದು ಉಲ್ಲೆರ್. ಸರ್ಕಾರದ ಆದೇಶದ ಪ್ರಕಾರ ‘ಸಿ’ ಗ್ರೇಡ್ ದೇವಸ್ಥಾನದ ಸಿಬ್ಬಂದಿಲೆಗ್ ಇತ್ತೇ ಆಹಾರ ಸಾಮಗ್ರಿ ಕಿಟ್ ಕೊರ್ತೆರ್ .

ಸಹಾಯಕ ಕಾರ್ಯ ನಿರ್ವಹಣಾಧಿಕಾರಿ ಪುಷ್ಪಲತಾ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರಾಯಿನ ಶೋಭಾ ಗಿರಿಧರ್, ವನಜಾ ವಿ. ಭಟ್, ದೇವಸ್ಥಾನದ ಸಿಬ್ಬಂದಿ, ಸುಬ್ರಹ್ಮಣ್ಯ ಗ್ರಾಮ ಪಂಚಾಯಿತಿ ಸದಸ್ಯೆರ್ ಪಾಲ್ ಪಡೆತೆರ್.

ಭಾರತೀಯ ಫುಟ್ಬಾಲ್ ಕೂಟದ ಮಾಜಿ ನಾಯಕ, ಒಡಿಪುದ ಶೇಖರ್ ಬಂಗೇರ ಕೊರೋನಾಗ್ ಬಲಿ

ಒಡಿಪು, ಜೂನ್ 13: ಭಾರತೀಯ ಫುಟ್ಬಾಲ್ ಕೂಟದ ಮಾಜಿ ನಾಯಕ, ಒಡಿಪು ಮೂಲದ ಶೇಖರ್ ಪದ್ದು ಬಂಗೇರ (74) ಕೊರೋನಾಗ್ ಬಲಿಯಾತೆರ್.

ಕೋವಿಡ್ ಸೋಂಕುಗು ಇತ್ತಿನ ಶೇಖರ್ ಬಂಗೇರ ಮೇರ್ ಬ್ರಹ್ಮಾವರದ ಮಹೇಶ್ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದು ಇತ್ತೆರ್ . ಚಿಕಿತ್ಸೆ ಫಲಕಾರಿ ಆವಂದೆ ಗುರುವಾರ ಕಾಂಡೆ ತೀರ್ ಪೋಯೆರ್.

ಒಡಿಪುದ ಬಡಾನಿಡಿಯೂರು ಮೂಲದ ಶೇಖರ್ ಬಂಗೇರ ಮೇರ್ ಭಾರತೀಯ ಫುಟ್ಬಾಲ್ ಕೂಟದ ಗೋಲ್ ಕೀಪರ್ ಆದಿತ್ತೆರ್ . ಇಂದುವೆ ಪೊರ್ತುಡು ಆರ್ ಕೂಟದ ಗುರ್ಕಾರ್ಲುಲಾ ಆದಿತ್ತೆರ್ . ಬಹುಕಾಲ ಮುಂಬೈಯಿಡೆ ಇತ್ತಿನ ಆರ್ ಅವ್ವೆತೋ ಫುಟ್ಬಾಲ್ ಸಂಘಸಂಸ್ಥೆಡ್ ಕೋಚ್ ಆದ್ ಬೇಲೆ ಮಲ್ದೆರ್.

ಮಿರಾರೊಡ್ ಶ್ರೀ ಶನೀಶ್ವರ ಮಂದಿರಡ್ ವಿಶೇಷ ಮಹಾಪೂಜೆ

ಬೊಂಬಾಯಿ, ಜೂನ್ 13: ಮಿರಾರೊಡ್ ಶ್ರೀ ಶನೀಶ್ವರ ಮಂದಿರಡ್ ವಿಶೇಷ ಮಹಾಪೂಜೆ ಮಂದಿರಡ್ ಶ್ರೀ ಶನೀಶ್ವರ ಜಯಂತಿದ ಪೂಜೆ ವಿಶೇಷ ರೀತಿಡ್ ನಡತುಂಡು.

ಆನಿ ಕಾಂಡೆ 6 ಗಂಟೆರ್ದ್ ಕ್ಷೇತ್ರ ಶುದ್ಧೀಕರಣ ಐರ್ದ್ ಬೊಕ್ಕ ಕ್ಷೇತ್ರದ ಮಾತಾ ದೇವೆರೆಗ್ ಪಂಚಾಮೃತ ಅಭಿಷೇಕ,ಆರತಿ, ಪ್ರಸಾದ ವಿತರಣೆ ನಡತುಂಡು.ಬೈಯ್ಯ 4 ಗಂಟೆರ್ದ್ ಹನುಮಾನ್ ಚಾಲಿಸ್ ಬೊಕ್ಕ ಶ್ರೀ ಶನೀಶ್ವರ ಜಪ ಪಠಣೆ ಅಂಚನೇ ಮಂದಿರದ ಶ್ರೀ ಶನೀಶ್ವರ ಭಜನಾ ಸಮಿತಿ ಬೊಕ್ಕ ಇನ್ನಿತರ ಭಜನಾ ಮಂಡಳಿ ಸದಸ್ಯೆರೆರ್ದ್ ಭಜನೆ ಬೈಯ್ಯ 6:30 ರ್ದ್ ಮೀರಾರೊಡ್ ದ ಅವ್ವೆತೋ ಧಾರ್ಮಿಕ ಸಂಸ್ಥೆದ ಸದ್ಯಸ್ಯೆರೆರ್ದ್ ಕುಣಿತ ಭಜನೆರ್ದ್ ಬೊಕ್ಕ ದೀಪಾರಾಧನೆ, ಮಹಾ ಮಂಗಳಾರತಿ,ತೀರ್ಥ ಪ್ರಸಾದ, ಅನ್ನ ಸಂತರ್ಪಣೆದೊಟ್ಟುಗು ನಡತುಂಡು. ಈ ಮಾತಾ ಧಾರ್ಮಿಕ ಲೇಸ್ ದ ಅನ್ನಸಂತರ್ಪಣೆದ ಸೇವಾಕರ್ತರ್ತೆರಾಯಿನ ಆಶಾ ಪದ್ಮನಾಭ ಶೆಟ್ಟಿ ಬೊಕ್ಕ ಅಲಂಕಾರದ ಸೇವಾಕರ್ತೇರಾಯಿನ ಮಾಲಾ ಜೈನ್ ಮೆರೆನ್ ಮಂದಿರದ ಪರವಾದ್ ಮಾನದಿಗೆ ಮಲ್ತೆರ್ . ಈ ಪೊರ್ತುಡು ಗೌರವ ಗುರ್ಕಾರ್ಲಾಯಿನ ವಿನೋದ್ ವಾಘಷಿಯ,ಗುರ್ಕಾರ್ಲಾಯಿನ ವಿದ್ಯಾ ಅಶೋಕ್ ಕರ್ಕೇರಾ, ಉಪಾಧ್ಯಕ್ಷ ಗುಣಕಾಂತ್ ಶೆಟ್ಟಿ, ಕೋಶಾಧಿಕಾರಿ ಅಚ್ಯತ ಕೋಟ್ಯಾನ್,ಜತೆ ಕಾರ್ಯದರ್ಶಿ ಸುಜಾತ. ಜಿ. ಶೆಟ್ಟಿ ಕಾಪು ಬೊಕ್ಕ ಉಪಾ ಡಿ. ಶೆಟ್ಟಿಗಾರ್,ಜತೆ ಕೋಶಾಧಿಕಾರಿ ಜಯಕರ್ ಮುದ್ರಡಿ,ಬೊಕ್ಕ ಭಾರತಿ ಅಂಚನ್,ಪೂಜಾ ಸಮಿತಿದ ಗುರ್ಕಾರ್ಲಾಯಿನ ಆಶಾ ಪಿ. ಶೆಟ್ಟಿ, ಉಪಾಧ್ಯಕ್ಷೆ ಜಯಲಕ್ಷ್ಮಿ ಸುವರ್ಣ,ವಿಜಯಲಕ್ಷ್ಮಿ ಶೆಟ್ಟಿಗಾರ್,ಭುವಜಿ ನಾರಾಯಣ ಶೆಟ್ಟಿ,ಮಹಿಳಾ ಸಮಿತಿದ ಗುರ್ಕಾರ್ಲಾಯಿನ ಮಲ್ಲಿಕಾ ಶೆಟ್ಟಿ, ಉಪಾಧ್ಯಕ್ಷೆ ಮಾಲಾ ಜೈನ್‌ , ಕಾರ್ಯದರ್ಶಿ ವಸಂತಿ ಶೆಟ್ಟಿ, ಬೊಕ್ಕ ಹೇಮಾ ಶೆಟ್ಟಿ, ಸುಂದರಿ ಕೋಟ್ಯಾನ್, ಯಶೋದ ಪೂಜಾರಿ, ಮೋಹಿತಾ. ಸಿ ಅಮೀನ್. ಆರತಿ ರಾವ್, ಪ್ರೇಮ ಶೇಖರ್ ಪೂಜಾರಿ, ರೇಖಾ ಕುಮಾರ್,ರಿಷೀಕಾ ಮೂಲ್ಯ, ಶಶಿಕಲಾ ಶೆಟ್ಟಿ,ಸಾರೀಕಾ, ಪೂಜಾರಿ,ಸಂದ್ಯ.ನೈಕ್,ಪ್ರಿಯ ವಿ. ಗುಪ್ತ, ಯಕ್ಷಗಾನ ಸಮಿತಿದ ರಾಜೇಶ್ ಶೆಟ್ಟಿ ಕಾಪು ಬೊಕ್ಕ ದಿನೇಶ್ ಶೆಟ್ಟಿಗಾರ್, ಚೇತನ್ ಶೆಟ್ಟಿ,ಸುಭಾಷ್ ಶೆಟ್ಟಿ,ಚಂದ್ರ ಪೂಜಾರಿ,ಆರ್. ಕೆ ಕರ್ಕೇರಾ, ಜಗದೀಶ್ ಶೆಟ್ಟಿ ಪಂಜಿನಡ್ಕ, ಹರೀಶ್ರೈ. ಕುಂಭ್ಲೆ , ಯುವ ಸಮಿತಿದ ರಿಚೀನ್ ಅಮೀನ್, ಜಯೇಶ್ ಸುವರ್ಣ, ಹಿಮಾಂಶ್ ಅಮೀನ್, ಶ್ರೇಯಶ್ ಶೆಟ್ಟಿ,ಆಶಾ ಮೂಲ್ಯ, ಜಾಗ್ರತಿ ಸುವರ್ಣ, ವಿಜೇತಾ ಪೂಜಾರಿ,ರಿಷೀತ್ ಮೂಲ್ಯ, ಕಾವ್ಯ ಶೆಟ್ಟಿ ಗಾರ್, ಬಾವಾನಾ ಪೂಜಾರಿ,ಪ್ರಜ್ಞಾ ಶೆಟ್ಟಿ ಗಾರ್,ಕಾರ್ತಿಕ್ ಮಚೂರು, ಅರ್ಚಕೆರಾಯಿನ ನಿರಾವ್ ಭಟ್ ಬೊಕ್ಕ ಶುಶಿಲ್ ಮಿಶ್ರ ಪಾಲ್ ಪಡೆದಿತ್ತೆರ್.

ಸಾಕಾರ ಕೊರಿನ ಸರ್ವೇರೆಗ್ಲಾ ಸೊಲ್ಮೆ ಸಂದೈತನ್ ಗುಣಕಾಂತ್ ಶೆಟ್ಟಿ ಕರ್ಜೆ ಮಲ್ತೆರ್.

ವಿಜಯ್ ಕೊಡವೂರು ಮುತಾಲಿಕೆಡ್ ವಸತಿ ನಿರ್ಮಾಣ

ಗೀತಾ ದಿನೇಶ್ ದಂಪತಿಲು ಲಕ್ಷ್ಮೀನಗರ ಪರಿಸರಡ್ ಸುಮಾರ್ 7-8 ವರ್ಷರ್ದ್ ವಾಸ ಮಲ್ತೊಂದು ಉಲ್ಲೆರ್ . ಬಾರಿ ಕಷ್ಟದ ಜೀವನ ನಡಪಾವೊಂದು ಉಪ್ಪುನ ಮೆಕುಲು ಎಲ್ಯ ಮಟ್ಟ್ ದ ಇಲ್ಲ್ ಅವುಲಾ ಮಡಲ್ ಬೊಕ್ಕ ಚಪ್ಪರ ಅಂಚನೇ ಪ್ಲಾಸ್ಟಿಕ್ ಹೊದಿಕೆನ್ ಪಾರ್ದ್ ಆ ಇಲ್ಲಡ್ ವಾಸ ಮಲ್ತೊಂದು ಇತ್ತೆರ್.

ಕಂಡನಿಗ್ಲ ಆರೋಗ್ಯ ಸ್ಥಿತಿ ಆತ್ ದಾಲ ಸರಿ ಇಜ್ಜಿ . ಬಾರಿ ಕಷ್ಟದ ಜೀವನ ಸಾಗವೊಂದು ಉಪ್ಪುನ ಮೆಕುಲು ಬರ್ಸದ ಪೊರ್ತುಡು ಇಲ್ಲಡ್ ಜೆಪ್ಪೆರೆ ಸಾಧ್ಯ ಇಜ್ಜಿ . ಬರ್ಸ ಬತ್ತುಂಡ ಇಲ್ಲದ ನೀರ್ ನ್ ಪಿದಾಯಿ ಪಾಡುನ ಬೇಲೆನ್ ಬಂದರೆ ಮಲ್ಪೋಡಾಪುಂಡು. ಉಚ್ಚು ವಿಷ ಜಂತುಲುಲಾ ಮೆಕ್ಲೆನ ಇಲ್ಲಗ್ ಪೋಪುಂಡು ನೆರ್ದಾವರ ಅಕ್ಲೆಗ್ ವಾಸ ಮಲ್ಪರೆ ಬಾರಿ ಬಂಗ ಆವೊಂದು ಉಂಡು. ಉಂದೆನ್ ಗೇನಗ್ ದೆತೊನಿನ ನಗರಸಭಾ ಸದಸ್ಯಯೆರಾಯಿನ ಕೆ ವಿಜಯ್ ಕೊಡವೂರು ಮೇರ್ ಮಾತಾ ಸಂಘ ಸಂಸ್ಥೆಲೆನ್ ಒಟ್ಟು ಸೇರದ್ ಅಕ್ಲೆಡ ಬೇಡಿಕೆ ದೀನಗ ಕಲ್ಯಾಣಪುರ ರೋಟರಿ ಕ್ಲಬ್ ಮೆಕುಲು ವಸತಿ ನಿರ್ಮಾಣ ಮಲ್ದಿನ ಕಾರ್ಯಗ್ ದುಂಬು ಬತ್ತೆರ್.
ದಾನಿಲೆನ ಸಕಾರಡ್ ತಾರೀಖ್ 11-06-2021 ಕ್ಕ್ ಗುದ್ದಲಿ ಪೂಜೆ ನಡತುಂಡು . ಈ ಲೇಸ್ ಡ್ ನಗರಸಭಾ ಸದಸ್ಯೆರಾಯಿನ ಕೆ ವಿಜಯ್ ಕೊಡವೂರು, ಕಲ್ಯಾಣಪುರ ರೋಟರಿ ಕ್ಲಬ್ ದ ಸದಸ್ಯೆರ್ ಬೊಕ್ಕ ಲಯನ್ಸ್ ಕ್ಲಬ್ ದ ಸದಸ್ಯೆರ್ ಪಾಲ್ ಪಡೆದಿತ್ತೆರ್.

ಎಕ್ಕೂರು ಬಾಬಣ್ಣ ಧೀನ ಬಂಧು ಸಂಸ್ಥೆದ ವತಿರ್ದ್ ಸಹಾಯಹಸ್ತ

ಕುಡ್ಲ, ಜೂನ್ 12: ಶ್ರೀ ರೂಪೇಶ್ ಶೆಟ್ಟಿ ಮೆರ್ನ ಸಾಕಾರ ಬೊಕ್ಕ ಮುತಾಲಿಕೆಡ್ `ಎಕ್ಕೂರು ಬಾಬಣ್ಣ ಧೀನ ಬಂಧು ಸಂಸ್ಥೆದ ವತಿರ್ದ್ ಲಾಕ್ ಡೌನ್ ಪೊರ್ತುಡು ಆರ್ಥಿಕವಾಡ್ ಕಷ್ಟಡ್ ಉಪ್ಪುನ ಸುಮಾರ್ 30 ಕುಟುಂಬಗ್ ದಿನಸಿ ಕಿಟ್ ಕೊರಿಯೆರ್ .

ಈ ಪೊರ್ತುಡು ಬಿಜೆಪಿ ಮುಖಂಡೆರಾಯಿನ ರಾಜ್ ಗೋಪಾಲ್ ರೈ, ಬಿಜೆಪಿ ಯುವ ಮೋರ್ಚಾ ಕುಡ್ಲ ನಗರ ದಕ್ಷಿಣದ ಗುರ್ಕಾರ್ಲಾಯಿನ ಸಚಿನ್ ರಾಜ್ ರೈ, ಹಾಗೂ ಎಕ್ಕೂರು ಬಾಬಣ್ಣ ಮಹಿಳಾ ವೇದಿಕೆದ ಸದಸ್ಯೆರ್ ಪಾಲ್ ಪಡೆದಿತ್ತೆರ್.