Sun. Nov 22nd, 2026

ಕಾರ್ಲದ ಸುದ್ದಿ Karkala News

ತುಳು ಭಾಷೆನ್ ರಾಜ್ಯದ 2ನೇ ಅಧಿಕೃತ ಭಾಷೆಯಾದ್ ಮಲ್ಪರೆ ಒತ್ತಾಯ ಸದನಡ್ ತುಳುಟ್ಟೇ ಪಾತೆರಿನ ತುಳುನಾಡ್‌ದ ಶಾಸಕೆರ್

ಬೆಂಗ್ಲೂರ್: ತುಳು ಭಾಷೆನ್ ರಾಜ್ಯದ ರಡ್ಡನೇ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪರೆ ತುಳುನಾಡ್‌ದ ಶಾಸಕೆರ್ ಪಕ್ಷ ಬೇಧ ಮದತ್ತ್‌ದ್ ಸರ್ಕಾರೊಗು ಒತ್ತಾಯ ಮಲ್ತೆರ್. ಉಂದೆಕ್ ವಿಧಾನಸಭಾಧ್ಯಕ್ಷೆರ್ ಯು.ಟಿ.ಖಾದರ್‌ಲ ಸ್ವರ ಕೂಡಾದೆರ್.

ಅಂಗಾರೆ ವಿಧಾನಸಭೆಟ್ ಈ ವಿಷಯದ ಬಗೆಟ್ ಪಾತೆರಿನ ಕಾಂಗ್ರೆಸ್‌ದ ಅಶೋಕ್ ಕುಮಾರ್ ರೈ, ರಾಜ್ಯಡ್ 1 ಕೋಟಿರ್ದ್‌ಲ ಎಚ್ಚದ ಜನ ತುಳು ಭಾಷೆ ಪಾತೆರುನಕುಲು ಉಲ್ಲೆರ್. 1994 ಟ್ ಡಾ| ಎಂ.ವೀರಪ್ಪ ಮೊಯಿಲಿ ಮೇರ್ ಸಿಎಂ ಆದಿಪ್ಪುನಗ ತುಳು ಅಕಾಡೆಮಿ ಸ್ಥಾಪನೆ ಮಲ್ತ್‌ದಿತ್ತೆರ್. ಕೇರಳಡ್‌ಲ ತುಳು ಭಾಷಾ ಅಕಾಡೆಮಿ ಉಂಡು. ಅಮೆರಿಕ ವಿಶ್ವವಿದ್ಯಾಲಯಡ್ ತುಳು ಭಾಷೆಡ್ ಅರ್ಜಿ ನಮೂನೆ ಭರ್ತಿ ಮಲ್ಪರೆ ಅವಕಾಶ ಕೊರ್ತೆರ್. ಕರ್ನಾಟಕಡ್ ತುಳು ಭಾಷೆನ್ ರಡ್ಡನೇ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪೊಡು ಪಂದ್ ಒತ್ತಾಯ ಮಲ್ತೆರ್.

ಈ ಬಗೆಟ್ ನನೊರಿ ಬಿಜೆಪಿ ಶಾಸಕೆರ್ ವೇದವ್ಯಾಸ ಕಾಮತ್ ಪಾತೆರ್ದ್, ನಮ್ಮ ಸರ್ಕಾರ ಇಪ್ಪುನಗ ತುಳು ಭಾಷೆಗ್ ಅಧಿಕೃತ ಭಾಷೆದ ಸ್ಥಾನಮಾನ ಕೊರಿಯರೆ ಮಾತ ಪ್ರಕ್ರಿಯೆನ್‌ಲ ಮಲ್ತ್‌ದಿತ್ತ. ಇತ್ತೆ ಸರಕಾರ ಸಚಿವ ಸಂಪುಟ ಸಭೆಟ್ ನಿರ್ಣಯ ಮಲ್ತ್ಂಡ ಉಂದು ಸಾಧ್ಯ ಆಯರೆ ಉಂಡು ಪಂದ್ ಪಂಡೆರ್.

ಅಶೋಕ್ ರೈ ಪಾತೆರ್ದ್, ಇತ್ತೆ ಈ ಬಗೆಟ್ ಡಾ| ಅಶೋಕ ಆಳ್ವ ಅರೆನ ಸಮಿತಿಲ ವರದಿ ಕೊರ್ತ್ಂಡ್. ತುಳು ಭಾಷೆನ್ ರಾಜ್ಯದ 2ನೇ ಭಾಷೆ ಮಲ್ಪರೆ ಆರ್ಥಿಕವಾಗಿ ಹೊಣೆಗಾರಿಕೆಗ್‌ಲ ಬರ್ಪುಜಿ ಪಂದ್ ತುಳುಟ್ಟೇ ಪಾತೆರನ್ ಸುರು ಮಲ್ತೆರ್. ಅಪಗ ವೇದವ್ಯಾಸ ಕಾಮತ್ ಮೇರ್‌ಲ ತುಳು ಭಾಷೆಡೇ ಪಾತೆರಿಯೆರ್. ಸ್ಪೀಕರ್ ಮೇರ್ ತುಳು ಭಾಷೆ ಪಾತೆರೊಂದೇ ಇನಿ ಈ ಸ್ಥಾನದ ಮುಟ್ಟ ಬೈದೆರ್. ಈ ಬಗೆಟ್ ಪಾತೆರಿಯರ ಎಚ್ಚದ ಅವಕಾಶ ಕೊರೊಡು ಪಂದ್ ಒತ್ತಾಯ ಮಲ್ತೆರ್.

ಬೆಳ್ಮಣ್: ಡ್ರೈವರ್‌ನ ಕೈ ತತ್ತ್‌ದ್ ಕಾರ್ ಚರಂಡಿಗ್

ಬೆಳ್ಮಣ್: ಡ್ರೈವರ್‌ನ ಕೈ ತತ್ತ್‌ದ್ ಕಾರ್ ಒಂಜಿ ಮಾರ್ಗದ ಬರಿತ್ತ ಚರಂಡಿಗ್ ಬೂರ್ದಿನ ಘಟನೆ ಬೆಳ್ಮಣ್ ಕೈತಲ್‌ದ ಕೆದಿಂಜೆ ಪಕ್ಕಳ ಚರ್ಚ್ ದ ಕೈತಲ್ ನಡತ್ಂಡ್.

ಐತಾರ ನಡುರಾತ್ರೆ ಈ ಘಟನೆ ನಡತ್ಂಡ್. ಕಾರ್‌ಡ್ ಪ್ರಯಾಣ ಮಲ್ತೊಂದಿತ್ತಿನರೆಗ್ ಎಲ್ಯ ಪೆಟ್ಟಾತ್ಂಡ್. ಕಾರ್ಲರ್ದ್ ಕುಡ್ಲಗ್ ಬರೊಂದಿತ್ತಿನ ಕುಡ್ಲ ಖಾಸಗಿ ಕಾಲೇಜಿದ ಕಲ್ಪಾರ್ಥಿಲು ಪ್ರಯಾಣ ಮಲ್ತೊಂದಿತ್ತಿನ ಕಾರ್ ಪಂದ್ ತೆರಿದ್ ಬೈದ್ಂಡ್. ಪೆಟ್ಟಾತಿನರೆನ್ ಕೂಡ್ಲೆ ಆಸ್ಪತ್ರೆಗ್ ದಾಖಲ್ ಮಲ್ತ್‌ದೆರ್.

Karkala: Two persons die in a ghastly accident in Agumbe Ghat ಆಗುಂಬೆ ಘಾಟಿಡ್ ಆ್ಯಕ್ಸಿಡೆಂಟ್: ತೀರ್ ಪೋಯೆರ್ 2 ಜನ

ಕಾರ್ಲ: ಬಸ್ ಬೊಕ್ಕ ಬೈಕ್ ಗುದ್ದುದು ಬೈಕ್ ಡಿತ್ತಿನ ಆಣ್ ಬೊಕ್ಕ ಪೊಣ್ಣು ತೀರ್ ಪೋಯಿನ ಘಟನೆ ಹೆಬ್ರಿ ಆಗುಂಬೆ ಘಾಟಿದ ತಿರ್ಗಸ್‌ಡ್ ನಡತ್ಂಡ್.

ಸಿವಿಲ್ ಇಂಜಿನಿಯರಿಂಗ್ ಮುಗಿಪಾದ್ ಕಂಟ್ರಾಕ್ಟರ್ ಒಟ್ಟುಗು ಬೇಲೆ ಮಲ್ತೊಂದಿತ್ತಿನ ಬಾರ್ಕೂರು ನಿವಾಸಿ ಶಶಾಂಕ್ (21) ಅಲ್ಪನೇ ತೀರ್ ಪೋದಿತ್ತ್‌ದ್, ಮಸ್ತ್ ಪೆಟ್ಟಾಯಿನ ನಿರ್ಮಿತಾ(19) ಮೇರ್ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋತೆರ್.

ಶಶಾಂಕ್ ಬೊಕ್ಕ ಅರೆನ ಅಕ್ಕನ ಮಗಲ್ ನಿರ್ಮಿತಾ ಬೈಕ್‌ಡ್ ತೀರ್ಥಹಳ್ಳಿರ್ದ್ ಒಡಿಪುಗ್ ಪೋವೊಂದಿತ್ತೆರ್. ಅಪಗ ಎದುರುರ್ದು ಬತ್ತಿನ ಬಸ್ ಬೈಕ್ ಗ್ ಗುದ್ದುದುಂಡು. ಹೆಬ್ರಿ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

Karkala: Two persons die in a ghastly accident in Agumbe Ghat

In a collusion between a bus and bike two siblings on the bike lost lives on the spot at the turning in the Agmbe ghat Section.

Karkala: Engineering student dies by suicide at home ಕಾರ್ಲ : ಬಲ್ಲ್ ದೆತೊಂದು ಆತ್ಮಹತ್ಯೆ ಮಲ್ತಿನ ಇಂಜಿನಿಯರಿಂಗ್ ಕಲ್ಪಾರ್ಥಿ

ಕಾರ್ಲ ತಾಲೂಕ್‌ದ ಕುಕ್ಕುಂದೂರು ಗ್ರಾಮದ ಜೋಡುರಸ್ತೆಡ್ ಇಂಜಿನಿಯರಿಂಗ್ ಕಲ್ಪಾರ್ಥಿ ಒರ್ತಿ ಆತ್ಮಹತ್ಯೆ ಮಲ್ತಿನ ಘಟನೆ ನಡತ್ಂಡ್.

ಅಶೋಕ್ ಶೆಟ್ಟಿ ಮೆರೆನ ಮಗೆ ಅಮೃತ್ ಶೆಟ್ಟಿ (21) ಆತ್ಮಹತ್ಯೆ ಮಲ್ತಿನ ಕಲ್ಪಾರ್ಥಿ.

ಮೇರ್ ಖಾಸಗಿ ಕಾಲೇಜಿಡ್ ಇಂಜಿನಿಯರಿಂಗ್ ಕಲ್ತೊಂದಿತ್ತೆರ್. ಮನಸ್ಸ್‌ಗ್ ಬೇಜಾರ್ ಆದ್ ಜೋಡುರಸ್ತೆಡ್ ಇಪ್ಪುನ ತನ್ನ ಇಲ್ಲಡ್ ಆತ್ಮಹತ್ಯೆ ಮಲ್ತ್‌ದೆರ್. ಕಾರ್ಲ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

Women availing free ride in government buses can show a xerox of their Identification card details- Government specifies ಫ್ರೀ ಬಸ್‌ಟ್ ಪೋಯರೆ ಪೊಂಜೊವುಲು ಐಡಿ ಜೆರಾಕ್ಸ್, ಸಾಫ್ಟ್ ಕಾಪಿ ತೋಜಾಂಡಲ ಯಾವು: ಸರ್ಕಾರ ಸ್ಪಷ್ಟನೆ

ಬೆಂಗ್ಲೂರ್: ರಾಜ್ಯ ಸರ್ಕಾರದ ಶಕ್ತಿ ಯೋಜನೆಡ್ ರಾಜ್ಯದ ಮಾತ ಪೊಂಜೊವುಲೆಗ್ ಫ್ರೀ ಆದ್ ಬಸ್‌ಟ್ಟ್ ಪ್ರಯಾಣ ಮಲ್ಪರೆ ಕರ್ನಾಟಕ ಸರ್ಕಾರದ ಒವ್ವೇ ಐಡಿದ ಜೆರಾಕ್ಸ್ ತೋಜ್ಪಾಂಡ ಯಾವು ಪಂದ್ ಅಧಿಕಾರಿಲು ಸ್ಪಷ್ಟನೆ ಕೊರ್ತೆರ್.

ರಾಜ್ಯದ ಮಸ್ತ್ ಕಡೆಟ್ಟ್ ಐಡಿ ಪ್ರೂಫ್ ವಿಚಾರಗ್ ಸಂಬಂಧಿಸಾದ್ ಕಂಡಕ್ಟರ್ ಬೊಕ್ಕ ಪೊಂಜೊವುಲೆನ ನಡುಟ್ಟ್ ಗಲಾಟೆ ಆದಿತ್ತ್ಂಡ್. ಉಂದೆನ್ ತೂದು ಸಾರಿಗೆ ಇಲಾಖೆ ಕರ್ನಾಟಕ ಸರ್ಕಾರಗ್ ಸಂಬಂಧ ಪಟ್ಟಿನ ಐಡಿದ ಜೆರಾಕ್ಸ್‌ನ್ ತೋಜ್ಪಾಂಡ ಯಾವು ಪಂದ್ ತೆರಿಪಾದೆರ್.

ಎಪ್ರಿಲ್ 14 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು “ಗೌಜಿ ಗಮ್ಮತ್” ತುಳು ಪಿಚ್ಚರ್

ಮೋವಿನ್ ಫಿಲಂಮ್ಸ್ ಲಾಂಭನಡ್ ಮೋಹನ್ ಭಟ್ಕಳ್, ವಿನಾಯಕ ತೀರ್ಥಹಳ್ಳಿ ನಿರ್ಮಾಣಡ್, ಮಣಿ ಎಜೆ ಕಾತೀಕೇಯನ್ ನಿರ್ದೇಶನಡ್ ತಯಾರ್ ಆಯಿನ “ಗೌಜಿ ಗಮ್ಮತ್” ತುಳು ಪಿಚ್ಚರ್ ಎಪ್ರಿಲ್ 14 ಕ್ಕ್ ತುಳುನಾಡ್‌ಡ್ ಬುಡುಗಡೆ ಆಯರೆ ಉಂಡು.

ಈ ಬಗೆಟ್ ನಡತಿನ ಪತ್ರಿಕಾಗೋಷ್ಠಿಡ್ ತೆಲಿಕೆದ ಬೊಳ್ಳಿ ದೇವದಾಸ್ ಕಾಪಿಕಾಡ್ ಪಾತೆರ್ದ್, ಕುಡ್ಲದ ರೂಪವಾಣಿ, ಬಿಗ್ ಸಿನಿಮಾಸ್, ಪಿವಿಆರ್, ಸಿನಿಪೊಲಿಸ್, ಒಡಿಪುಡ್ ಕಲ್ಪನ, ಮಣಿಪಾಲದ ಭಾರತ್ ಸಿನಿಮಾ, ಐನಾಕ್ಸ್, ಪಡುಬಿದ್ರೆದ ಭಾರತ್ ಸಿನಿಮಾ, ಸುರತ್ಕಲ್‌ದ ನಟರಾಜ್, ಸಿನಿ ಗ್ಯಾಲಕ್ಸಿ, ಪುತ್ತೂರ್‌ದ ಅರುಣಾ, ಭಾರತ್ ಸಿನಿಮಾ, ಬೆದ್ರದ ಅಮರಶ್ರೀ, ಕಾರ್ಲದ ರಾಧಿಕಾ ಇಂಚಿನ ಕಡೆಟ್ಟ್ ಈ ಪಿಚ್ಚರ್ ಬುಡುಗಡೆ ಆಯರೆ ಉಂಡು. ತುಳುನಾಡ್‌ದ ಪೊಸ ಕಲಾವಿದೆರ್ ಈ ಪಿಚ್ಚರ್‌ಡ್ ನಟನೆ ಮಲ್ತ್‌ದೆರ್. ಈ ಪಿಚ್ಚರ್ ಒಂಜೇ ಪಂತೆಡ್ 19 ದಿನತ್ತ ಕಾಲ ಚಿತ್ರೀಕರಣ ಆದಿತ್ತ್ಂಡ್ ಪಂದ್ ಪಂಡೆರ್.

ತುಳುನಾಡ ಮಾಣಿಕ್ಯ ಅರವಿಂದ ಬೋಳಾರ್ ಪಾತೆರ್ದ್, ಈ ಪಿಚ್ಚರ್‌ಗ್ ಯು ಎ ಸರ್ಟಿಫಿಕೇಟ್ ತಿಕ್ಕ್‌ದ್ಂಡ್. ಗೌಜಿ ಗಮ್ಮತ್ ಪಿಚ್ಚರ್ ಮಸ್ತ್ ಹಾಸ್ಯಮಯವಾದ್ ಉಂಡು. ಇತ್ತೆದ ಪೀಳಿಗೆದ ಜನಕುಲು ಇಷ್ಟ ಪಡುನ ಕತೆನ್ ಹಾಸ್ಯಭರಿತವಾದ್ ನಿರ್ದೇಶನ ಮಲ್ತ್‌ದೆರ್. ಸಮಾಜಗ್ ಎಡ್ಡೆ ಸಂದೇಶನ್ ಈ ಪಿಚ್ಚರ್ ಕೊರ್ಪುಂಡು ಪಂದ್ ಪಂಡೆರ್.

ಕುಸಲ್ದರಸೆ ನವೀನ್ ಡಿ ಪಡೀಲ್, ನಾಯಕ ನಟೆಯಾದ್ ಕರ್ಣ ಉದ್ಯಾವರ್, ನಾಯಕಿಯಾದ್ ಸ್ವಾತಿ ಪ್ರಕಾಶ್ ಶೆಟ್ಟಿ ಅಭಿನಯ ಮಲ್ತ್‌ದೆರ್. ಪ್ರಸನ್ನ ಶೆಟ್ಟಿ ಬೈಲೂರ್, ಉಮೇಶ್ ಮಿಜಾರ್, ಜಯಶೀಲಾ ಮರೋಳಿ, ಪ್ರಭಾಕರ್ ಬ್ರಹ್ಮಾವರ, ಚಂದ್ರಹಾಸ ಶೆಟ್ಟಿ ಮಾಣಿ, ಸುಜಾತ ಶಕ್ತಿನಗರ, ಕಿಶೋರ್ ಶೆಟ್ಟಿ ಪಿಲಾರ್, ಹರೀಶ್ ಪೂಜಾರಿ ಕಡ್ತಲ, ಹರೀಶ್ಚಂದ್ರ ಪೆರಾಡಿ ಪ್ರಭಾಕರ್ ಆಚಾರ್ಯ ಮೂಡುಬೆಳ್ಳೆ, ಅಶ್ವತ್ ಶೆಟ್ಟಿ, ವಿಕ್ಕಿ ರಾವ್, ಮಿರ್ಚಿ ಸಂದೇಶ್ ದೇವಾಡಿಗ, ಅಶ್ವತ್ಥಪುರ, ಶಿವರಾಮ್ ವಿಟ್ಲ, ರಾಧಿಕಾ ಭಟ್, ವನಿತಾ ಸುವರ್ಣ, ನರಸಿಂಹ ನಾಯಕ್, ರಶ್ಮಿತಾ ಸಾಲಿಯಾನ್ ಪಿಲಾರ್, ಸುರಕ್ಷಾ ಕೋಟ್ಯಾನ್ ಪಿಲಾರ್ , ಲೊಕೇಶ್ ಮಾಣಿಲ, ಅನುಷಾ ಶೆಟ್ಟಿ,
ಬೇಬಿ ಚಿತ್ರಿತಾ ದೇವಾಡಿಗ ಹಳೆಯಂಗಡಿ, ಲೊಕೇಶ್ ಶೆಟ್ಟಿ, ಜ್ಞಾನೇಶ್ ಆಚಾರ್ಯ, ಶಶಿರಾಜ್ ಆಚಾರ್ಯ, ಮಧು ಪೂಜಾರಿ ವಿಷ್ಣುನಗರ, ನಿಲೇಶ್ ಶೆಟ್ಟಿ ಇನ್ನ, ಈ ಪಿಚ್ಚರ್‌ಡ್ ನಟನೆ ಮಲ್ತ್‌ದೆರ್.

ಪತ್ರಿಕಾಗೋಷ್ಠಿಡ್ ಪಿಚ್ಚರ್‌ದ ನಟಿ ಸ್ವಾತಿ ಪ್ರಕಾಶ್, ಕರುಣಾಕರ್ ಉಡುಪಿ, ನಿರ್ಮಾಪಕೆರ್ ವಿನಾಯಕ ತೀರ್ಥಹಳ್ಳಿ, ಮೋಹನ್ ಭಟ್ಕಳ್, ಸಂದೀಪ್, ಪ್ರಭಾಕರ ಬ್ರಹ್ಮಾವg, ಜಯಶೀಲ ಮರೋಳಿ, ಛಾಯಾಗ್ರಹಕೆರ್ ರಾಮಾಂಜನೇಯ ಇತ್ತೆರ್.

ಮುಲ್ಕಿ -ಬೆದ್ರಗ್ ಉಮಾನಾಥ್, ಉತ್ತರೊಗು ಡಾ.ಭರತ್ ಶೆಟ್ಟಿ

ಕುಡ್ಲ : ಭಾರಿ ಚರ್ಚೆಗ್ ಕಾರಣ ಆಯಿನ ಮುಲ್ಕಿ- ಬೆದ್ರ ವಿಧಾನಸಭೆ ಕ್ಷೇತ್ರಗ್ ಕಡೆಕ್ಕ್ ಲ ಬಿಜೆಪಿ ಅಭ್ಯರ್ಥಿಯಾದ್ ಉಮಾನಾಥ ಕೋಟ್ಯಾನ್ ಕುಡೊರ ಆಯ್ಕೆ ಆತೆರ್ ಪಂದ್ ತೆರಿದ್ ಬೈದ್ಂಡ್.

ಬಿಜೆಪಿದ ಅಭ್ಯರ್ತಿಲೆನ ಪಟ್ಟಿದ ಪ್ರಕಾರ, ಕುಡ್ಲ ಕ್ಷೇತ್ರ, ಪುತ್ತೂರು, ಸುಳ್ಯಗ್ ಪೊಸ ಅಬ್ಯರ್ತಿಲೆಗ್ ಅವಕಾಶ ಕೊರ್ತೆರ್.

ಬೊಲ್ತೇರ್ ಗ್ ಹರೀಶ್ ಪೂಂಜ, ಮುಲ್ಕಿ ಬೆದ್ರಗ್ ಉಮಾನಾಥ ಕೋಟ್ಯಾನ್, ಕುಡ್ಲ ( ಉಳ್ಳಾಲ) ಕ್ಷೇತ್ರಗ್ ಸತೀಶ್ ಕುಂಪಲ ಕುಡ್ಲ ದಕ್ಷಿಣ ವೇದವ್ಯಾಸ ಕಾಮತ್, ಕುಡ್ಲ ಉತ್ತರ ಡಾ.ಭರತ್ ಶೆಟ್ಟಿ, ಬಂಟ್ವಾಳ ಗ್ ರಾಜೇಶ್ ನಾಯ್ಕ್, ಪುತ್ತೂರುಗು ಆಶಾ ತಿಮ್ಮಪ್ಪ, ಸುಳ್ಯ ಗ್ ಭಾಗೀರಥಿ ಅಭ್ಯರ್ತಿಯಾದ್ ಆಯ್ಕೆ ಆತೆರ್ .

ಹಳೆಯಂಗಡಿದ ಪ್ರಿಯದರ್ಶಿನಿ ಸೊಸೈಟಿಗ್ ಕರ್ನಾಟಕ ಇನ್‌ಸ್ಟಿಟ್ಯೂಟ್ ಆಫ್ ಕೋ-ಆಪರೇಟಿವ್ ಮ್ಯಾನೇಜ್‌ಮೆಂಟ್ ಅಧ್ಯಯನ ತಂಡ ಭೇಟಿ

ಕರ್ನಾಟಕ ಇನ್‌ಸ್ಟಿಟ್ಯೂಟ್ ಆಫ್ ಕೋ – ಆಪರೇಟಿವ್ ಮ್ಯಾನೇಜ್‌ಮೆಂಟ್ ಅಧ್ಯಯನ ತಂಡ ಹಳೆಯಂಗಡಿದ ಪ್ರಿಯದರ್ಶಿನಿ ಕೋ ಆಪರೇಟಿವ್ ಸೊಸೈಟಿಗ್ ಭೇಟಿ ಕೊರ್ದು ಸಂಸ್ಥೆದ ಬೇಲೆದ ಬಗೆಟ್ಟ್ ಎಡ್ಡೆಪ್ಪುದ ಪಾತೆರ ಪಾತೆರಿಯೆರ್.

ಇನ್‌ಸ್ಟಿಟ್ಯೂಟ್‌ದ ಸುಮಾರು 35 ಕಲ್ಪಾರ್ಥಿಲು ಈ ಅಧ್ಯಯನ ಕೂಟಡ್ ಇತ್ತ್‌ದ್, ಪ್ರಿಯದರ್ಶಿನಿ ಕೋ-ಆಪರೇಟಿವ್ ಸೊಸೈಟಿ ಸುರು ಆಯಿನ ದಿನರ್ದ್ ಇಡೇ ಮುಟ್ಟ ಆಯಿನ ಪ್ರಗತಿದ ಬಗೆಟ್ಟ್ ಪೊಲಬು ಮಲ್ತೊಂಡೆರ್. ಸಂಘದ ಅಧ್ಯಕ್ಷೆರಾಯಿನ ಎಚ್ ವಸಂತ್ ಬೆರ್ನಾರ್ಡ್ ಪಾತೆರ್ದ್, ಇತ್ತೆದ ಸ್ಪರ್ಧಾತ್ಮಕ ಜಗತ್ತ್‌ಡ್ ಸಹಕಾರ ಸಂಸ್ಥೆಲು ಎಡ್ಡೆಂತಿನ ತಾನೊ ಪಡೆತ್ಂಡ್. ಗ್ರಾಹಕೆರೆಗ್ ಎಡ್ಡೆಂತಿನ ಸೇವೆ ಕೊರ್ದು ಸಂಘನ್ ಅಭಿವೃದ್ಧಿ ಮಲ್ಪುನವೇ ನಮ್ಮ ಧ್ಯೇಯ ಆದುಂಡು ಪಂದ್ ಪಂಡೆರ್.

ಕರ್ನಾಟಕ ಇನ್‌ಸ್ಟಿಟ್ಯೂಟ್ ಆಫ್ ಕೋ – ಆಪರೇಟಿವ್ ಮ್ಯಾನೇಜ್‌ಮೆಂಟ್ ಪ್ರಾಂಶುಪಾಲೆರ್ ಬಿಂದು ಬಿ. ನಾಯರ್ ಮೇರ್ ಸಂಸ್ಥೆದ ಬಗೆಟ್ ಕಲ್ಪಾರ್ಥಿಲೆನೊಟ್ಟುಗು ಸಂವಾದ ಕಾರ್ಯಕ್ರಮ ಮಲ್ತೆರ್.  ಪ್ರಿಯದರ್ಶಿನಿ ಸೊಸೈಟಿದ ಮುಖ್ಯಕಾರ್ಯನಿರ್ವಹಣಾಧಿಕಾರಿ ಸುದರ್ಶನ್ ಮೇರ್ ಸಂಘದ ವಿವರ ಕೊರಿಯೆರ್. ಕರ್ನಾಟಕ ಇನ್‌ಸ್ಟಿಟ್ಯೂಟ್ ಆಫ್ ಕೋ – ಆಪರೇಟಿವ್ ಮ್ಯಾನೇಜ್‌ಮೆಂಟ್‌ದ ಉಪನ್ಯಾಸಕಿ ವನಜಾಕ್ಷಿ ಬತ್ತಿನ ಬಿನ್ನೆರೆಗ್ ಸೊಲ್ಮೆ ಸಂದೈತ ಮಲ್ತೆರ್.

ನಾರಾವಿ: ಕಾಂಗ್ರೆಸ್ ಕಾರ್ಯಕರ್ತೆ ಅಜಯ್ ಜಾಕೋಬ್ ಬಿಜೆಪಿಗ್ ಸೇರ್ಪಡೆ

ನಾರಾವಿ: ಕಾಂಗ್ರೆಸ್‌ದ ಸಕ್ರಿಯ ಕಾರ್ಯಕರ್ತೆ ಅಜಯ್ ಜಾಕೋಬ್ ಬಿಜೆಪಿಗ್ ಸೇರ್ಪಡೆಯಾತೆರ್.

ಪ್ರಧಾನಿ ನರೇಂದ್ರ ಮೋದಿ ಆಡಳಿತ ಅಂಚನೆ ಶಾಸಕೆರ್ ಹರೀಶ್ ಪೂಂಜ ಮೆರೆನ ಬೇಲೆಗ್ ಮೆಚ್ಚ್‌ದ್ ನಾರಾವಿ ಕುತ್ತೂರು ವಿಕಾಸದ ಪರ್ಬಡ್ ಬಿಜೆಪಿ ಪಕ್ಷಗ್ ಸೇರ್ಪಡೆ ಆತೆರ್.
ಬಿಜೆಪಿ ಮಂಡಲ ಅಧ್ಯಕ್ಷೆರ್ ಜಯಂತ್ ಕೋಟ್ಯಾನ್ ಪಕ್ಷದ ಕೊಡಿ ಕೊರ್ದು ಅಜಯ್ ಜಾಕೋಬ್ ಮೆರೆನ್ ಪಕ್ಷೊಗು ಸೇರ್ಪಡೆ ಮಲ್ತೆರ್.

ತುಳುನಾಡ ಧ್ವನಿ ಮುತಾಲಿಕೆಡ್ ತುಳುನಾಡ್ ಮ್ಯಾಟ್ರಿಮೋನಿ

ತುಳುನಾಡ ಧ್ವನಿ ಪತ್ರಿಕೆದ ಕುಡೊಂಜಿ ಕೊಡುಗೆ ” ತುಳುನಾಡ್ ಮ್ಯಾಟ್ರಿಮೋನಿ” ಇನಿ ಒಡಿಪು ಪ್ರೆಸ್ ಕ್ಲಬ್ ಡ್ ಲೋಕಾರ್ಪಣೆ ಆಂಡ್.

ಒಡಿಪುದ ಉದ್ಯಮಿ ಪ್ರಸಾದ್ ರಾಜ್ ಕಾಂಚನ್,ಬಿಜೆಪಿ ರಾಜ್ಯ ಉಪಾಧ್ಯಕ್ಷೆ ನಯನಾ ಗಣೇಶ್,ಮೊಗವೀರ ಯುವ ಸಂಘಟನೆದ ಜಿಲ್ಲಾಧ್ಯಕ್ಷೆರಾಯಿನ ರಾಜೇಂದ್ರ ಸುವರ್ಣ ಹಿರಿಯಡಕ,ಸನ್ ಶೈನ್ ಟ್ರಾವೆಲ್ಸ್ ಮಣಿಪಾಲ್ ನೆತ್ತ ಮುಖ್ಯಸ್ಥೆರ್ ಸರಿತಾ ಸಂತೋಷ್,ಒಡಿಪು ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆರಾಯಿನ ರಾಜೇಶ್ ಶೆಟ್ಟಿ ಅಲೆವೂರು,ಪೋರ್ಥ್ ಪೋಕಸ್ ಕುಂದಾಪುರದ ನಿರ್ದೇಶಕೆ & ಸಂಸ್ಥಾಪಕೆರ್ ಗೌತಮ್ ನಾವಡ ಮೊಕುಲು ಮಲ್ಲ ಬಿನ್ನೆರಾದ್ ಬತ್ತ್ ದ್ ಎಡ್ಡೆಪ್ಪು ಬಯಕಿಯೆರ್.

ತುಳು ಬಾಸೆ,ಸಂಸ್ಕ್ರತಿನ್ ಒರಿಪಾದ್ ಬುಲೆಪಾವುನ ನಿಟ್ಟ್ ಡ್ ಕರಿನ ರಡ್ಡ್ ವರ್ಷರ್ದಿಂಚಿ ಕಾರ್ಯಾಚರಣೆಡುಪ್ಪುನ ತುಳುನಾಡ ಧ್ವನಿ ತುಳು ಅಂತರ್ಜಾಲ ಪತ್ರಿಕೆ, ವೆಬ್ ನ್ಯೂಸ್ ದ ಒಟ್ಟುಗ್ ಯೂಟ್ಯೂಬ್ ಚಾನೆಲ್ ನ್ ಸುರು ಮಲ್ತ್ ದ್, ಬೇತೆ ಬೇತೆ ಕಾರ್ಯಕ್ರಮೊಲೆನ್ ಯೂಟ್ಯೂಬ್ ಚಾನೆಲ್ ಮುಖೇನ ಪ್ರಚಾರೊಡ್ ಉಂಡು.ಇತ್ತೆ ತುಳುನಾಡ್ ದ ಮೊಗವೀರ ಸಮುದಾಯಗ್ ಪೊಸತೊಂಜಿ ಕೊಡುಗೆಯಾದ್ ತುಳುನಾಡ್ ಮ್ಯಾಟ್ರಿಮೋನಿ.ಕಾಮ್(tulunad matrimony.com) ನ್ ಸುರು ಮಲ್ತ್ ದ್ ಮೊಗವೀರ ಸಮುದಾಯದ ಮದಿಮೆ ಆವಂದಿನಕ್ಲೆಗ್ ಎಡ್ಡೆ ಮದಿಮೆದ ವೇದಿಕೆ ಕಲ್ಪಿಸಾದ್ ಕೊರ್ರೆಗ್ ದುಂಬಾತುಂಡ್.ಈ ವೇದಿಕೆಡ್ ಸೂಕ್ತವಾಯಿನ ಜೀವನಸಂಗಾತಿನ್ ನಾಡೊನರೆಗ್ ಯುವಕ ಯುವತಿಯರೆಗ್ ವಿಪುಲವಾಯಿನ ಅವಕಾಶ ಉಂಡು.

ಮೊಗವೀರ ಸಮುದಾಯಗ್ ಮೀಸಲಾಯಿನ. ವೈವಾಹಿಕ ಪೋರ್ಟಲ್ ತುಳುನಾಡ್ ಮ್ಯಾಟ್ರಿಮೋನಿ.ಉಚಿತವಾದ್ ನೋಂದಣಿ ಮಲ್ತೊನರೆಗ್ ಅವಕಾಶ ಇಪ್ಪುನ ನೆಟ್ಟ್ ನಿಜವಾಯಿನ ಬೊಕ್ಕ ಸರಿಯಾದ್ ಪರಿಶೀಲನೆ ಮಲ್ದಿನ ಪ್ರೊಫೈಲ್ ಲು,ಸಂಪರ್ಕ ವಿವರೊಲು,ಬೊಕ್ಕ ಕುಡಲಾ ಹೆಚ್ಚಿನ ವೈಶಿಷ್ಟ್ಯೊಲು ಉಂಡು.ಆಧುನಿಕ ತಂತ್ರಜ್ಞಾನೊನ್ ಬಳಸೊಂದ್ ಅವಿವಾಹಿತರೆಗ್ ತಮ್ಮ ಸರಿಯಾಯಿನ ಜೀವನ ಸಂಗಾತಿನ್ ಆಯ್ಕೆ ಮಲ್ತೊನರೆಗ್ “ತುಳುನಾಡ್” ಮ್ಯಾಟ್ರಿಮೋನಿ ಒಂಜಿ ಎಡ್ಡೆ ವೇದಿಕೆಯಾತ್ಂಡ್.
ಕುಂದಾಪುರದ ಪೋರ್ಥ್ ಪೋಕಸ್ ನ ಸಂಸ್ಥಾಪಕೆರು & ನಿರ್ದೇಶಕೆರಾಯಿನ ಶ್ರೀ ವಿ.ಗೌತಮ್ ನಾವಡ ಮೇರು ಈ ಪೋರ್ಟಲ್ ನ್ ತಯಾರ್ ಮಲ್ಪರೆಗ್ ಸಹಕಾರಿಯಾದುಲ್ಲೆರ್.
ಮೊಗವೀರ ಸಮುದಾಯದ ಮದಿಮೆ ಆವಂದಿನ ಜವನೆ, ಜವಾಂದಿಯೆರ್ “ತುಳುನಾಡ್” ಮ್ಯಾಟ್ರಿಮೋನಿದ ಸದುಪಯೋಗ ಮಲ್ತೊನೊಡ್ ಪಂಡುದ್ ಸಂಸ್ಥೆದ ಮುಖ್ಯಸ್ಥೆರ್ ವಿನ್ನಾಪು ಮಲ್ದೇರ್.

You Missed