ಸೆ.19 : ಬಸ್ರೂರು ಶ್ರೀ ತುಳುವೇಶ್ವರ ಲಿಂಗೊಗು 12 ಜ್ಯೋತಿರ್ಲಿಂಗ ಕ್ಷೇತ್ರದ ತೀರ್ಥಾಭಿಷೇಕ, ಪ್ರಶ್ನಾಚಿಂತನೆ

ಬಸ್ರೂರು: ಬಸ್ರೂರು ಶ್ರೀ ತುಳುವೇಶ್ವರ ದೇವಸ್ಥಾನದ ತುಳುವೇಶ್ವರಿ ಮೂಲದೇವಿನ ಅಷ್ಟಮಂಗಲ ಪ್ರಶ್ನೆ ಚಿಂತನೆದ ಅಂಗವಾದ್ ಸೆ. 19 ಬೊಕ್ಕ 20 ತಾರೀಕ್‌ಗ್ ವಿವಿಧ ಧಾರ್ಮಿಕ ಕಾರ್ಯಕ್ರಮ ನಡಪರೆ ಉಂಡು.
ಸೆ.19 ಶನಿವಾರ ಕಾಂಡೆ 9-10 ಗಂಟೆ ಮುಟ್ಟ ಶ್ರೀ ತುಳುವೇಶ್ವರ ದೇವೆರ್‌ನ ಲಿಂಗೊಗು 12 (ದ್ವಾದಶ) ಜ್ಯೋತಿರ್ಲಿಂಗದ ಪವಿತ್ರ ತೀರ್ಥ ಮೈತ್‌ದ್ ವಿಶೇಷ ತೀರ್ಥಾಭಿಷೇಕ ನಡಪರೆ ಉಂಡು.
ತುಳುವರ್ಲ್ಡ್ ಫೌಂಡೇಶನ್ ಸದಸ್ಯೆರಾಯಿನ ನಿತಿನ್ ಪೂಜಾರಿ, ಅಜಯ್ ದೇವಾಡಿಗ, ರಿತೇಶ್ ಬೊಕ್ಕ ಬಸಂತ್ ಮೊಕುಲು ಸುಮಾರ್ 48 ದಿನ ಅಕ್ಲೆನನೇ ಗಾಡಿಡ್ ದ್ವಾದಶ ಜ್ಯೋತಿರ್ಲಿಂಗ ಕ್ಷೇತ್ರದ ಯಾತ್ರೆ ಮಲ್ತ್‌ದ್, ಮಾತಾ ಜ್ಯೋತಿರ್ಲಿಂಗದ ದರ್ಶನ ಪಡೆದ್ ಪವಿತ್ರ ತೀರ್ಥ ಸಂಗ್ರಹ ಮಲ್ತ್‌ದ್ ಬಸ್ರೂರುಗು ಕನದೆರ್. ಈ ತೀರ್ಥನ್ ಶ್ರೀ ತುಳುವೇಶ್ವರ ದೇವೆರೆಗ್ ಅಭಿಷೇಕದ ಒರುಟ್ಟು ಸಮರ್ಪಣೆ ಮಲ್ಪರೆ ಉಂಡು.ಈ ವಿಶೇಷ ತೀರ್ಥಾಭಿಷೇಕನ್ ನೀಲೇಶ್ವರದ ತಂತ್ರಿಲಾಯಿನ ಅರವತ್ತ್ ಬ್ರಹ್ಮಶ್ರೀ ಪದ್ಮನಾಭ ತಂತ್ರಿಲು ಮಲ್ಪರೆ ಉಲ್ಲೆರ್. ತೀರ್ಥಾಭಿಷೇಕ ಆಯಿ ಬೊಕ್ಕ ತುಳುವೇಶ್ವರಿ ಮೂಲದೇವಿನ ಅಷ್ಟಮಂಗಲ ಪ್ರಶ್ನೆ ಚಿಂತನೆ ನಡಪರೆ ಉಂಡು.
ಉಂದುವೇ ಸಂದರ್ಭಡ್ ತುಳುನಾಡ್‌ದ ಭಾಷೆ, ಸಂಸ್ಕೃತಿ ಬೊಕ್ಕ ಧಾರ್ಮಿಕ ಪರಂಪರೆದ ಬೆಳವಣಿಗೆಲ ಮಹತ್ವ ಪಡೆತ್ಂಡ್. ಸೆ. 18ಗು ಕುಡ್ಲಡ್ ನಡಪುನ ಸಚಿವ ಸಂಪುಟ ಸಭೆ, ಅಂಜಾರು ರಾಮಣ್ಣ ಹೆಗ್ಡೆ ಬೊಕ್ಕ ಎಸ್.ಯು. ಪಣಿಯಾಡಿ ಮೊಕ್ಲೆನ ತುಳುವ ಚಳುವಳಿದ ಶತಮಾನೋತ್ಸವ, ಸೆ.23ರ್ದ್ ನಡಪುನ ತುಳುವ ಮಹಾಸಭೆತ್ತ 99ನೇ ವರ್ಷಾಚರಣೆ ಅಂಚೆನೆ 19 ದೇಶಗ್ ತುಳುವ ಮಹಾಸಭೆತ್ತ ಕಾರ್ಯವ್ಯಾಪ್ತಿ ವಿಸ್ತರಣೆ ಆಯಿನಿ ತುಳು ನುಡಿ ಬೊಕ್ಕ ಸಂಸ್ಕೃತಿದ ಪುನರ್‌ವೈಭವದ ವ್ಯಾಪ್ತಿನ್ ತೊಜಪಾವುಂಡು.
ಈ ಹಿನ್ನೆಲೆಡ್ ಸಮಸ್ತ ತುಳುನಾಡ್‌ದ ಜನಕುಲು ಶ್ರೀ ತುಳುವೇಶ್ವರ–ತುಳುವೇಶ್ವರಿ ಭಕ್ತೆರ್ ಸೆ. 19ಗು ಬಸ್ರೂರುಗು ಬತ್ತ್‌ದ್ ಈ ಧಾರ್ಮಿಕ ಲೇಸ್‌ಡ್ ಪಾಲ್ ಪಡೆವೊಡು ಪಂದ್ ತುಳುವರ್ಲ್ಡ್ ಫೌಂಡೇಶನ್ ನಿರ್ದೇಶಕೆರ್ ಡಾ. ರಾಜೇಶ್ ಕೃಷ್ಣ ಆಳ್ವ ಬಿನ್ನಾಪು ಮಲ್ದೆರ್.