ಮುಲ್ಕಿ: ಪಂಚ ಗ್ಯಾರಂಟಿ ಯೋಜನೆಲೆನ ಅನುಷ್ಠಾನ ಸಮಿತಿ, ತಾಲೂಕು ಪಂಚಾಯತ್, ಮಹಿಳಾ ಬೊಕ್ಕ ಮಕ್ಕಳ ಅಭಿವೃದ್ಧಿ ಇಲಾಖೆ, ಶಿಶು ಅಭಿವೃದ್ಧಿ ಯೋಜನೆ ಕುಡ್ಲ ಗ್ರಾಮಾಂತರದ ಒಟ್ಟುಸೇರಿಗೆಡ್ ಐನ್ ಗ್ಯಾರಂಟಿ ಯೋಜನೆಲೆನ ಬಗೆಟ್ಟ್ ತೆರಿಪಾಯೆರೆ ಪಂದ್ ‘ಮಹಿಳಾ ದಿನಾಚರಣೆ ‘ ಲೇಸ್ ಪಡುಪಣಂಬೂರು ಗ್ರಾಮ ಪಂಚಾಯತ್ ಸಭಾಂಗಣಡ್ ನಡತ್ಂಡ್.
ಈ ಲೇಸ್ ದ ಅಧ್ಯಕ್ಷತೆನ್ ಪಂಚ ಗ್ಯಾರಂಟಿ ಅನುಷ್ಠಾನ ಸಮಿತಿದ ಅಧ್ಯಕ್ಷೆರ್ ಅಲ್ವಿನ್ ಕ್ಲೇಮೆಂಟ್ ಕುಟಿನ್ಹ ತುಡರ್ ಅರ್ಲಾದ್ ಪಾತೆರ್ದ್, ಪೊಂಜೋವುಲು ಸ್ವಾವಲಂಬಿಯಾದ್ ಬದ್ಕೆರೆ ಪಂಚ ಗ್ಯಾರಂಟಿ ಯೋಜನೆಲು ಉಪಯೋಗ ಆತ್ಂಡ್. ಮಾತ ಕ್ಷೇತ್ರಡ್ಲಾ ಪೊಂಜೋವುಲು ಧೈರ್ಯಡ್ ದುಂಬು ಬತ್ತ್ ದ್, ಆತ್ಮವಿಶ್ವಾಸರ್ದ್ ಜೀವನ ನಡಪಾವೊಡು ಪಂದ್ ಪಂಡೆರ್.
ಮಲ್ಲ ಬಿನ್ನೆರಾಯಿನ ತಾಲೂಕ್ ಪಂಚಾಯತಿ ಕಾರ್ಯನಿರ್ವಾಹಕ ಅಧಿಕಾರಿ ಕುಸುಮಾಧರ್ ಪಾತೆರ್ದ್, ಪಂಚ ಗ್ಯಾರಂಟಿ ಯೋಜನೆಲೆನ ಪ್ರಯೋಜನನ್ ದೆತೊನೊಂದು ಇಪ್ಪುನ ಪೊಂಜೋವುಲು ಉಳಿತಾಯ ಆಪುನ ಕಾಸ್ ನ್ ಉಪಯೋಗ ಮಲ್ತೊಂದು ಆರ್ಥಿಕವಾದ್ ಗಟ್ಟಿ ಆವೊಡು. ಲಿಂಗ ಸಮಾನತೆ ಮುಖ್ಯವಾಯಿನವು. ಇಲ್ಲಲ್ ಆನ್ ಪೊಣ್ಣು ಪನ್ಪಿನ ಭೇಧ ಮಲ್ಪಂದೆ ಬೇಲೆನ್ ಪಟ್ಟೊಂದು ಮಲ್ತ್ ದ್ ಸಮಸ್ಯೆಲೆನ್ ಎದುರಿಸಾವೊಡು ಪಂದ್ ಪಂಡೆರ್.
ಕುಡ್ಲ ಗ್ರಾಮಾಂತರ ಶಿಶು ಅಭಿವೃದ್ಧಿ ಯೋಜನೆದ ಪ್ರಭಾರ ಸಹಾಯಕ ಶಿಶು ಅಭಿವೃದ್ಧಿ ಯೋಜನಾಧಿಕಾರಿ ಕು. ಭಾರತಿ ಗೃಹಲಕ್ಷ್ಮಿ ಯೋಜನೆದ ಬಗೆಟ್ಟ್ ಪೊಲಬು ಕೊರ್ದು, ಪೊಂಜೋವುಲು ಸ್ವಂತ ಉದ್ಯೋಗದೊಟ್ಟಿಗೆ ಅಕುಲು ಎದುರಿಸಾವೊಂದು ಇಪ್ಪುನ ಸಮಸ್ಯೆಲೆನ್ ಪನೊಂದು ಅವೆಕ್ಕ್ ಪರಿಹಾರನ್ ದೆತೊನೊಡು ಪಂದ್ ಪಂಡೆರ್.
ಪೊಂಜೋವುಲೆನ ಆರೋಗ್ಯದ ಬಗೆಟ್ಟ್ ರಾಷ್ಟೀಯ ಬಾಲ ಸ್ವಾಸ್ತ್ಯ ಯೋಜನೆದ ವೈದ್ಯಾಧಿಕಾರಿ ಡಾ.ಹೇಮಪ್ರಭಾ ಮೇರ್ ಪೊಲಬು ಕೊರ್ದು, ಇಂಚಿಪ್ಪ ದಿನಟ್ಟ್ ಪೊಂಜೋವುಲು ತನ್ನ ಆರೋಗ್ಯದ ಬಗೆಟ್ಟ್ ಗಮನ ದೆತೊನಂದೆ ಸುಮಾರ್ ಸಮಸ್ಯೆಲೆನ್ ಎದುರಿಸಾವೊಂದು ಉಲ್ಲೆರ್. ಅಂಚಾದ್ ಮೊಕುಲು ತನ್ನ ಗ್ರಾಮ ವ್ಯಾಪ್ತಿಡ್ ಇಪ್ಪುನ ಪ್ರಾಥಮಿಕ ಅರೋಗ್ಯ ಕೇಂದ್ರ ಅತ್ತಂಡ ಉಪ ಅರೋಗ್ಯ ಕೇಂದ್ರಲೆಡ್ ಪ್ರತೀ ತಿಂಗೊಲ್ ಗೊರ ಬಿ.ಪಿ, ಶುಗರ್ , ಹಿಮೋಗ್ಲೋಬಿನ್ ತಪಾಸಣೆ ಮಲ್ಪುನೆತ್ತೊಟ್ಟಿಗೆ ಪೌಷ್ಟಿಕ ಆಹಾರನ್ ದೆತೊನೊಡು ಪಂದ್ ಪಂಡೆರ್.
ಈ ಪೊರ್ತುಡು ಚಾವಡಿಡ್ ಕರ್ನಾಟಕ ರಾಜ್ಯ ಸಾರಿಗೆ ಇಲಾಖೆದ ಅಧಿಕಾರಿ ನಿರ್ಮಲ, ಮೆಸ್ಕಾಂ ಇಲಾಖೆದ ಅಧಿಕಾರಿಲು ಇತ್ತೆರ್. ಸಮಾರಂಭ ಲೇಸ್ ಡ್ ಪಂಚ ಗ್ಯಾರಂಟಿ ಅನುಷ್ಠಾನ ಸಮಿತಿದ ಸದಸ್ಯೆರ್, ತಾಲೂಕ್ ಪಂಚಾಯತಿದ ಲೆಕ್ಕ ಸಹಾಯಕೆರ್ ಯೋಗೀಶ್, ಶಿಶು ಅಭಿವೃದ್ಧಿ ಇಲಾಖೆದ ಜ್ಯೋತಿ, ಸುಲೋಚನಾ, ಅಂಗನವಾಡಿ ಕಾರ್ಯಕರ್ತೆಯೆರ್ ಬೊಕ್ಕ ಪಂಚ ಗ್ಯಾರಂಟಿ ಯೋಜನೆಲೆನ ಫಲಾನುಭವಿಲು ಇತ್ತೆರ್.
ಪಂಚಾಯತಿ ಅಭಿವೃದ್ಧಿ ಅಧಿಕಾರಿ ಸುಧೀರ್ ಈ ಲೇಸ್ ನ್ ಸುಧಾರಿಕೆ ಮಲ್ತೆರ್. ಲೇಸ್ ಡ್ ಪೊಂಜೋವುಲೆಗ್ ಗೊಬ್ಬುದ ಪಂತೊನ್ ನಡಪಾದ್ ಗೆಂದಿನಕ್ಲೆಗ್ ಇನಾಮುನ್ ಕೊರಿಯೆರ್.
