ನವ ಮಂಗಳೂರು ಬಂದರ್ಡ್ ಈ ವಾರ ಎಲ್ಪಿಜಿ ಗ್ಯಾಸ್ ದ ಸಂಗ್ರಹ 72,700 ಟನ್ ಮುಟ್ಟ ಆತ್ಂಡ್.
ಇಂಡಿಯನ್ ಆಯಿಲ್ ಕಂಪನೆ ಬೊಕ್ಕ ಭಾರತ್ ಪೆಟ್ರೋಲಿಯಂ ದಂಚಿನ ಕಂಪೆನಿಲು ಎಲ್ ಪಿಜಿ ಆಮದು ಮಲ್ದಿನೆರ್ದಾವರ ಸಂಗ್ರಹ ಎಚ್ಚ ಆತ್ಂಡ್. ಅಂಚಾದ್ ಎಲ್ಪಿಜಿ ಸಂಗ್ರಹ ಮಲ್ಪುನೆಟ್ಟ್ ಬಂದರ್ ಮಲ್ಲ ಪಾತ್ರ ವಹಿಸಾದ್ಂಡ್.
ನಂದಿಕೂರು : ತುಳುನಾಡ್ದ ಅಪರೂಪದ ಪವಿತ್ರ ಸಾನ್ನಿಧ್ಯ ಆದಿಪ್ಪುನ ಪಡ್ಡೆದ್ರ- ನಂದಿಕೂರು ಮಾರ್ಗದ ನಿನ್ನಿಕಲ್ಲ್ ಪಾದೆದ ಐತಿಹಾಸಿಕ ಹಿನ್ನೆಲೆದ ಬಗೆಟ್ಟ್ ಇಂಚೊಗು ನಡತಿನ ತಾಂಬೂಲ ಪ್ರಶ್ನೆಡ್ ಮಹತ್ವದ ವಿಚಾರ ಬೊಲ್ಪುಗು ಬತ್ತ್ದ್, ಈ ಜಾಗೆನ್ ಜಾಗತಿಕ ಮಟ್ಟದ ಪ್ರಾಕೃತಿಕ ಪಾರಂಪರಿಕ ಅಧ್ಯಯನ, ಧ್ಯಾನ ಅಂಚೆನೆ ಆರಾಧನಾ ಕೇಂದ್ರವಾದ್ ಅಭಿವೃದ್ಧಿ ಮಲ್ಪರೆ ಪ್ರಶ್ನೆ ಚಿಂತನೆಡ್ ಸಂಪೂರ್ಣ ಒಪ್ಪಿಗೆ ತಿಕ್ದ್ಂಡ್.
ಪ್ರಶ್ನೆ ಚಿಂತನಾ ಫಲಿತಾಂಶದ ಪ್ರಕಾರ, ನಿನ್ನಿಕಲ್ಲ್ ಪಾದೆ ಪ್ರಾಕೃತಿಕವಾದ್ ಶ್ರೀಚಕ್ರ ನೆಲೆ ಆತಿನ ಪವಿತ್ರ ಕ್ಷೇತ್ರವಾದಿತ್ತ್ದ್, ಭೂಮಿ ಉಂಡಾನಗನೇ ಸಹಜವಾದ್ ನಿರ್ಮಾಣ ಆತಿನ ದೇವಲ್ಯ ಪನ್ಪಿನ ಅಭಿಪ್ರಾಯ ವ್ಯಕ್ತವಾಂಡ್. ಈ ಜಾಗೆ ತುಳುನಾಡ್ದ ಪಂಚಭೂತ, ಪಂಚತತ್ವ ಬೊಕ್ಕ ಪಂಚಶಕ್ತಿಲೆನ ನೆಲೆ ಆದಿತ್ತ್ದ್, ಅಯಿತ್ತ ಕಾಲ ನಿರ್ಣಯ ಸಾಧ್ಯ ಆವಂದಿನಾತ್ ಪಿರಾಕ್ದ ಆದುಂಡು ಪಂದ್ ತೆರಿದ್ ಬತ್ತ್ಂಡ್.
ಈ ಜಾಗೆಡ್ ದುಂಬುದ ಕಾಲೊಡ್ ಪಾಪನಾಶಿನಿ ತುದೆ ಪರತೊಂದಿತ್ತ್ದ್, ಇನಿಕ್ಕ್ಲ ಅವು ಭೂಮಿದ ಉಲಯಿ ಅಗೋಚರವಾದುಂಡು ಪನ್ಪಿನ ನಂಬಿಕೆ ಉಂಡು. ಪ್ರಧಾನ ದೇವತೆಯಾದ್ ತುಳುವೇಶ್ವರಿ ಪೂಜೆ ಪಡೆಯೊಂದಿತ್ತ್ದ್, ಇನಿಕ್ಕ್ಲ ಕೆಲವೆರ್ ಗುಪ್ತವಾದ್ ಪೂಜೆ ಮಲ್ತೊಂದುಲ್ಲೆರ್. ಇಂಚೊಗು ಈ ದೇವಿನ್ ಖಡ್ಗೇಶ್ವರಿ ಪನ್ಪಿನ ಪುದರ್ಡ್ಲ ಲೆಪ್ಪುವೆರ್.
ಮುಲ್ತ ವೈಶಿಷ್ಟ್ಯಲೆಡ್ ಸೌರಮಾನ ಬೊಕ್ಕ ಚಂದ್ರಮಾನ ಕಾಲಗಣನೆದ ಬಳಕೆ ಮಾತ್ರ ಅತ್ತಾಂದೆ, ಪೊರ್ತುದ ಆವಿಷ್ಕಾರ, ಗಡಿಯಾರ, ಪಂಚಾಂಗ ಬೊಕ್ಕ ಕ್ಯಾಲೆಂಡರ್ ಪದ್ಧತಿದ ಮೂಲಾಭಿವೃದ್ಧಿಲ ಈ ಪ್ರದೇಶದ ಒಟ್ಟುಗು ಸಂಬಂಧ ಪಡೆತ್ಂಡ್ ಪನ್ಪಿನ ಮಹತ್ವದ ಅಂಶ ಬೊಲ್ಪುಗು ಬೈದ್ಂಡ್.
ತುಳುನಾಡ್ದ ಪ್ರಾಚೀನ ವಿದ್ಯೆಲು ಬೊಕ್ಕ ಜ್ಯೋತಿಷ್ಯ ಶಾಸ್ತ್ರದ ಮೂಲ ಈ ಮಣ್ಣ್ ಡ್ ಆವಿಷ್ಕಾರ ಆತ್ಂಡ್. ಉಂದು ಅತ್ತಾಂದೆ, ಶಾಸ್ತ್ರ ಬೊಕ್ಕ ಶಸ್ತ್ರ ವಿದ್ಯೆ, ಕಳರಿ ಪರಂಪರೆ ಈ ಮಣ್ಣ್ಡ್ ವ್ಯಾಪಕವಾದ್ ಸಂಶೋಧನೆ ಆತ್ಂಡ್. ನಾಥ ಪಂಥದ ನವ ನಾಥೆರ್ನ ಶಕ್ತಿಕೇಂದ್ರಲ ಉಂದುವೇ ಆದಿತ್ತ್ಂಡ್.
ಉಂದು ಬಜಿ ಕಲ್ಲ್ ಬಂಡೆ ಅತ್ತ್; ತುಳು ನಾಡ್ದ ಆತ್ಮ ನಿರ್ಭರತೆಗ್ ಸಾಕ್ಷಿ ಪನ್ಪಿನ ವಿಚಾರ ಪ್ರಶ್ನೆ ಚಿಂತನೆಡ್ ಸ್ಪಷ್ಟ ಆಂಡ್.
ಈ ಪ್ರದೇಶಡ್ ಪವಿತ್ರ ತೀರ್ಥಭಾವಿ, ಹನುಮಂತನ ಪಾದಸ್ಪರ್ಶ, ಬೆರ್ಮೆರೆ ಆಲಡೆ ಬೊಕ್ಕ ಬೇತೆ ದೈವ ದೇವೆರ್ನ ಸಾನಿಧ್ಯ ಬೊಕ್ಕ ಪೌರಾಣಿಕ – ಜನಪದ ಇತಿಹಾಸದ ಸಾಕ್ಷ್ಯಲ ಉಂಡು ಪಂದ್ ತೆರಿದ್ ಬೈದ್ಂಡ್.
ಈ ಜಾಗೆಡ್ ಮಸ್ತ್ ಋಷಿ–ಮುನಿಕುಲು, ಸಾಧಕೆರ್ ಧ್ಯಾನ – ಸಾಧನೆ ಮಲ್ತ್ದ್, ಇನಿಕ್ಕ್ಲ ಗುಪ್ತವಾದ್ ಸಾಧಕೆರ್ ಬತ್ತ್ದ್ ಧ್ಯಾನ ಮಲ್ತೊಂದುಲ್ಲೆರ್ ಪನ್ಪಿನವು ಕೈತಲ್ದಕ್ಲೆನ ನಂಬಿಕೆ. ಪ್ರಾಕೃತಿಕವಾದ್ ಕಲ್ಲ್ಲೆಡ್ ದೈವಸಾನ್ನಿಧ್ಯ ಉಪ್ಪುನೆರ್ದಾವರ ಮೂಲು ಪ್ರತ್ಯೇಕ ದೇವಾಲಯದ ಅವಶ್ಯಕತೆ ಇಜ್ಜಿ ಪಂದ್ ಪ್ರತಿ ಕಲ್ಲ್ ದೈವಿ ಸಾದೃಶವಾದುಂಡು ಪಂದ್ ವ್ಯಕ್ತವಾದುಂಡು. ಮೂಲು ಪ್ರಾರ್ಥನೆ ಮಲ್ತಿನಕ್ಲೆಗ್ ಭಯ ನಿವಾರಣೆ, ಶತ್ರು ನಿವಾರಣೆ ಬೊಕ್ಕ ಇಷ್ಟಾರ್ಥ ಸಿದ್ಧಿ ಆಪುಂಡು ಪನ್ಪಿನ ನಂಬಿಕೆ ಇತ್ತ್ದ್ ಬಪ್ಪನಾಡ್ ಕ್ಷೇತ್ರಡ್ ಉಂದುವೇ ಪಂಚ ದುರ್ಗೆಯೆರ್ನ ಸಾನಿಧ್ಯ ಉಂಡು ಪಂದ್ ತೆರಿದ್ ಬತ್ತ್ಂಡ್.
ಪಿರಾಕ್ದ ಕಾಲಡ್
ಈ ಜಾಗೆದ ಅಪೂರ್ವ ನಿಧಿ ಸಂಗ್ರಹ ಆದಿತ್ತ್ದ್, ಅವೆನ್ ಅಪಹರಣ ಮಲ್ಪರೆ ಮುಲ್ತ ನಾಗ ಯಕ್ಷಿನ್ ಬಂಧನ ಮಲ್ತ್ದೆರ್ ಪನ್ಪಿನ ವಿಚಾರಲ ಪ್ರಶ್ನೆ ಚಿಂತನೆಡ್ ತೋಜಿದ್ ಬತ್ತ್ಂಡ್. ಈ ಹಿನ್ನೆಲೆಡ್ ನಾಗಶಕ್ತಿದ ವಿಮೋಚನೆ ಬೊಕ್ಕ ಜಾಗೆಡ್ ಉಪ್ಪುನ ಶಿಲಾ ಸಾನ್ನಿಧ್ಯದ ದೈವಿಕ ಗುರುತ್ವ ಬೊಕ್ಕ ಸಂಕಲ್ಪದ ಬೇಲೆ ಮಲ್ಪೊಡಾಪುಂಡು.
ತಾಂಬೂಲ ಪ್ರಶ್ನಾ ಚಿಂತನೆನ್ ಖ್ಯಾತ ಜ್ಯೋತಿಷಿಲಾಯಿನ ಶಶಿಧರ ಮಾಂಞಾಡ್ ಬೊಕ್ಕ ಸೂರಜ್ ಕೆ. ಪಿ. ನಡಪಾದ್ ಕೊರಿಯೆರ್. ಕಾಸ್ರೋಡು ತುಳುವೆರೆ ಆಯನಕೂಟದ ಅಧ್ಯಕ್ಷೆರ್ ಗೋಪಾಲಕೃಷ್ಣ ವಾಂತಿಚಾಲ್ ಭಾಷಾಂತರ ಮಲ್ತೆರ್.
ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ, ಎನ್ ಮಧ್ವರಾಯ ಭಟ್, ಡಾ. ವೈ. ಎನ್ ಶೆಟ್ಟಿ, ಲಕ್ಷ್ಮಣ ಶೆಟ್ಟಿ, ನಾಗರಾಜ್ ಭಟ್, ಸುರೇಶ್ ಆಚಾರ್ಯ, ಉದಯ ರೈ, ಕಿರಣ್ ಚೌಟ, ಪ್ರಮೋದ್ ಸಪ್ರೆ, ಮಾಧವ ಉಳ್ಳಾಲ್, ಕೃಷ್ಣಮೂರ್ತಿ ರಾವ್ ಪಾದೆಬೆಟ್ಟು, ಡಾ. ರಾಜೇಶ್ ಆಳ್ವ, ಅರವಿಂದ ಬೆಳ್ಚಡ ಹರಿಪ್ರಸಾದ್ ರೈ ಜಿ.ಕೆ, ರವಿಕುಮಾರ್, ಗಣೇಶ್, ನಾಗೇಶ್ ಭಂಡಾರಿ ಮೊಕುಲು ಮಾತ ಅಭಿಪ್ರಾಯ ಪಟ್ಟೊಂಡೆರ್.
ತುಳುವ ಮಹಾಸಭೆದ ಸಂಚಾಲಕೆರಾಯಿನ ವಸಂತ ರೈ ಸೂರಿಂಜೆ, ಭಾನುಮತಿ ಶೆಟ್ಟಿ ಕಕ್ವಗುತ್ತು, ಪ್ರಶಾಂತ್ ಶೆಟ್ಟಿ, ಪ್ರವೀಣ್ ಕಂದಾವರ, ಡಾ. ಅವಿನ್ ಆಳ್ವ, ಉತ್ತಮ್ ಸಿಂಗ್, ಜ್ಯೋತಿ ಶೆಟ್ಟಿ ಬೊಕ್ಕ ಸ್ಥಳೀಯೆರ್ ಬೊಕ್ಕ ಗಣ್ಯೆರ್ ಪಾಲ್ ಪಡೆದಿತ್ತೆರ್. ಪತ್ತೆರ್ ಕೂಡ್ದು ಪ್ರಾರ್ಥನೆ ಮಲ್ತ್ದ್ ತಾಂಬೂಲ ಪ್ರಶ್ನೆ ಕಾರ್ಯಕ್ರಮನ್ ಸಮಾಪನ ಮಲ್ತೆರ್.
ನವೆಂಬರ್ 2,3 ಬೊಕ್ಕ 4 ತಾರೀಕ್ಗ್ ಪ್ರಶ್ನಾ ಚಿಂತನೆ
ನಿನ್ನಿಕಲ್ ಪಾದೆ ಪವಿತ್ರ ಭೂಮಿದ ಬಗೆಟ್ಟ್ ರಡ್ಡನೇ ಹಂತದ ವಿಮರ್ಶೆ ಬೊಕ್ಕ ಚಿಂತನೆ ಮಲ್ಪರೆ ನವೆಂಬರ್ 2, 3 ಬೊಕ್ಕ 4 ತಾರೀಕ್ದಾನಿ ಮೂಜಿ ದಿನತ್ತ ಅಷ್ಟಮಂಗಲ ಪ್ರಶ್ನೆ ಚಿಂತನೆ ಮಲ್ಪರೆ ತೀರ್ಮಾನ ಮಲ್ತೆರ್.
ಮುಲ್ಕಿ: ಸೀಮೆದ ಒರುಂಭ ಮಾಗಣೆದ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಜಾತ್ರಾ ಮಹೋತ್ಸವ ಏ. 1 ರ್ದ್ 8 ಮುಟ್ಟ ನಡಪರೆ ಇತ್ತ್ ದ್ ಪೂರ್ವಭಾವಿಯಾದ್ ಕ್ಷೇತ್ರದ ಆಡಳಿತ ಆಡಳಿತ ಮಂಡಳಿ ಬೊಕ್ಕ , ಅಭಿವೃದ್ಧಿ ಸಮಿತಿ, ಗ್ರಾಮಸ್ಥೆರೆನ ಸಭೆ ಕ್ಷೇತ್ರದ ಜ್ಞಾನ ಮಂದಿರದ ಸಭಾಂಗಣಡ್ ನಡತ್ಂಡ್.
ಕಾರ್ಯಕ್ರಮದ ಗುರ್ಕಾರ್ಮೆನ್ ಕ್ಷೇತ್ರದ ಅನುವಂಶಿಕ ಮುಕ್ತೇಸೆರೆರ್ ದುಗ್ಗಣ್ಣ ಸಾವಂತ ಅರಸುಲು ವಹಿಸೊಂದು ಪಾತೆರ್ದ್ ಬಪ್ಪನಾಡ್ ಕ್ಷೇತ್ರದ ಜಾತ್ರಾ ಮಹೋತ್ಸವ ಯಶಸ್ವಿಯಾವರೆ ಸೀಮೆದ ಭಕ್ತೆರೆನ ಸಾಕಾರ ಮುಖ್ಯ, ಜಾತ್ರಾ ಮಹೋತ್ಸವದ ದಿನಟ್ ಕ್ಷೇತ್ರಡ್ ನುಪ್ಪು ಪ್ರಸಾದ ಬೊಕ್ಕ ಪುತ್ತೂರು ಸುಳ್ಯ ಕಾಸರಗೋಡು ಬೊಕ್ಕ ಕೆಲವು ಕಡೆರ್ದ್ ಬರ್ಪುನ ಭಕ್ತೆರೆಗ್ ಟ್ರಾಫಿಕ್ ಸಮಸ್ಯೆ ಆವಂದಿಲೆಕ್ಕ ತೂವೊಡು ಪಂಡೆರ್.
ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ಶ್ವೇತಾ ಪಳ್ಳಿ ಪಾತೆರ್ದ್ ದೇವಸ್ಥಾನದ ಸರ್ವತೋಮುಖ ಅಭಿವೃದ್ಧಿಗ್ ಅಂಚೆನೆ ಜಾತ್ರಾ ಮಹೋತ್ಸವದ ಯಶಸ್ಸಿಗ್ ಬೇತೆ ಬೇತೆ ಸಂಘ-ಸಂಸ್ಥೆಲು ಕೈ ಜೋಡಾವರೆ ಸಾಕಾರ ಕೊರೊಡು ಪಂಡೆರ್.
ಸಭೆಟ್ ಮುಲ್ಕಿ ಬಿಲ್ಲವರ ಸಂಘದ ಅಧ್ಯಕ್ಷೆರ್ ವಾಮನ್ ಕೋಟ್ಯಾನ್ ನಡಿಕುದ್ರು, ಮುಲ್ಕಿ ಬಂಟರ ಸಂಘದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಶೆಟ್ಟಿ,ಅಭಿವೃದ್ಧಿ ಸಮಿತಿದ ಸುನಿಲ್ ಆಳ್ವ, ಕಿರಣ್ ಕುಮಾರ್ ಶೆಟ್ಟಿ ಕೋಲ್ನಾಡು ಗುತ್ತು, ಡಾ. ಹರಿಶ್ಚಂದ್ರ ಪಿ ಸಾಲ್ಯಾನ್, ವಿನೋದ್ ಸಾಲ್ಯಾನ್ ಬೆಳ್ಳಾಯರು, ಕೃಷ್ಣ ಶೆಟ್ಟಿ, ಉದಯಕುಮಾರ್ ಶೆಟ್ಟಿ ಅಧಿಧನ್, ಮೋಹನ್ ದಾಸ್ ಹೆಜಮಾಡಿ, ಕಾರು ಚಾಲಕ ಮಾಲಕರ ಸಂಘದ ಅಧ್ಯಕ್ಷೆರ್ ರಾಜೇಶ್ ಕೆರೆಕಾಡು, ಪದಾಧಿಕಾರಿಲಾಯಿನ ದೇವಣ್ಣ ನಾಯಕ್, ಚಂದ್ರಶೇಖರ್, ದೇವಸ್ಥಾನದ ಅಕೌಂಟೆಂಟ್ ಶಿವಶಂಕರ್, ಕಾರ್ತಿಕ್ ಕೋಟ್ಯಾನ್ ಬೊಕ್ಕ ಕೆಲವೆರ್ ಉಪಸ್ಥಿತರಿತ್ತೆರ್.
ಸಭೆಟ್ ಜಾತ್ರಾ ಮಹೋತ್ಸವದ ದಿನಟ್ ಕೊಡಿ ಏರ್ದ್ , ಪಗೆಲ್ ತೇರ್, ಮಲ್ಲ ತೇರ್, ದಿನಟ್ ನುಪ್ಪು ಪ್ರಸಾದ ವ್ಯವಸ್ಥೆ, ಕ್ಷೇತ್ರಗ್ ಬರ್ಪುನ ಭಕ್ತೆರೆಗ್ ಪಾರ್ಕಿಂಗ್ ಸುವ್ಯವಸ್ಥೆ, ಬಗೆಟ್ ಚರ್ಚೆ ನಡತ್ಂಡ್ .
ಟ್ರಾಫಿಕ್ ವ್ಯವಸ್ಥೆ ಬಗೆಟ್ ಮುಲ್ಕಿ ಪೊಲೀಸ್ ಬೊಕ್ಕ ಕುಡ್ಲ ಉತ್ತರ ಟ್ರಾಫಿಕ್ ಪೊಲೀಸೆರೆನ ಸಭೆ ಮಾ. 28 ಕ್ಕ್ ಕಾಂಡೆ 10:30 ಗಂಟೆಗ್ ನಡಪಾವುನ ತೀರ್ಮಾನ ಆಂಡ್
ಮಾರ್ಚ್ 31ಕ್ಕ್ ಪುದೆ ಮೆರವಣಿಗೆ
ಬಪ್ಪನಾಡ್ ಕ್ಷೇತ್ರದ ಜಾತ್ರಾ ಮಹೋತ್ಸವದ ಅಂಗವಾದ್ ಸೀಮೆದ ಒರುಂಭ ಮಾಗಣೆದ ಭಕ್ತೆರೆರ್ದ್ ಪುದೆ ಮೆರವಣಿಗೆ ಸಮರ್ಪಣಾ ಕಾರ್ಯಕ್ರಮ ಮಾರ್ಚ್ 31 ತಾನಿ ಬಯ್ಯ ಮುಲ್ಕಿ ಬಸ್ ನಿಲ್ದಾಣದ ಬರಿತ ಶಿವಾಜಿ ಮಂಟಪರ್ದ್ ಭವ್ಯ ಮೆರವಣಿಡ್ ಬಪ್ಪನಾಡ್ ಕ್ಷೇತ್ರ ಮುಟ್ಟ ನಡಪರೆ ಉಂಡು.
ಈ ಲೇಸ್ ದ ಲೆಕ್ಕೊಡು ಲೆಪ್ಪೋಲೆ ಬುಡುಗಡೆನ್ ಮಾ.22 ಕ್ಕ್ ಶ್ರೀ ಅಯ್ಯಪ್ಪ ಸ್ವಾಮಿ ಕ್ಷೇತ್ರಡ್ ಕುಡ್ಲ ದಕ್ಷಿಣ ಶಾಸಕೆರ್ ವೇದವ್ಯಾಸ ಕಾಮತ್ ಮಲ್ತೆರ್. ಬೊಕ್ಕ ಪಾತೆರ್ದ್, ದಕ್ಷಿಣ ಕನ್ನಡ ಜಿಲ್ಲೆದ ಸುರುತ್ತ ಅಯ್ಯಪ್ಪ ದೇವಸ್ಥಾನದ ಬ್ರಹ್ಮಕಲಶಡ್ ಪಾಲ್ ಪಡೆಪುನ ಸೌಭಾಗ್ಯ ತಿಕಿನವು ಪುಣ್ಯದ ಫಲ, ಒಂಜಿ ಊರಿಡ್ ಬ್ರಹ್ಮಕಲಶ ನಡತ್ಂಡ ಆ ಊರುದ ಉದ್ದಾರಗ್ ಕಾರಣ ಆಪುಂಡು. ಊರುಗು ಸಂಕಷ್ಟ ಬರ್ಪುಜಿ. ಈ ದೇವೆರೆನ ಕಾರ್ಯಡ್ ಊರುದ ಪರವೂರುದ ಮಾತೆರ್ಲಾ ಪಾಲ್ ಪಡೆದ್, ಪೊರ್ಲುಡು ಬ್ರಹ್ಮಕಲಶ ನಡಪುಲೆಕ್ಕ ಪ್ರತಿಯೊರಿಲ ಅಳಿಲು ಸೇವೆ ಮಲ್ಪುನ ಮುಕೇನ ಪಾಲ್ ಪಡೆವೊಡು ಪಂದ್ ಪಂಡೆರ್.
ಮಲ್ಲ ಬಿನ್ನೆರಾದ್ ಸ್ವಾಗತ ಸಮಿತಿದ ಗೌರವಾಧ್ಯಕ್ಷೆರ್ ರತೀಂದ್ರ ನಾಥ, ಬ್ರಹ್ಮಕಲಶ ಸಮಿತಿದ ಅಧ್ಯಕ್ಷೆರ್ ಸೂರಜ್ ರಾಘವನ್, ಕಾರ್ಯಾಧ್ಯಕ್ಷೆರ್ ಗೋಕುಲದಾಸ್ ಬೊಕ್ಕ ಮುರುಳಿಧರ್, ಗೌರವ ಕೋಶಾಧಿಕಾರಿ ಸಂತೋಷ ಶೆಟ್ಟಿ, ಸ್ವಾಗತ ಸಮಿತಿದ ಅಧ್ಯಕ್ಷೆರ್ ರಾಜರತ್ನ ಸನಿಲ್, ಗೌರವ ಕಾರ್ಯದರ್ಶಿ ಜನಾರ್ಧನ್ ಅತ್ತಾವರ, ಅಯ್ಯಪ್ಪ ದೇವಸ್ಥಾನ ಪಡೀಲ್ ದ ಅಧ್ಯಕ್ಷೆರ್ ಮೋಹನ್ ಪಡೀಲ್, ಆತ್ಮಶಕ್ತಿ ಕೋ ಆಪರೇಟಿವ್ ಸೊಸೈಟಿ ಚೇರ್ ಮ್ಯಾನ್ ಚಿತ್ತ ರಂಜನ್, ಕರುಣ್ ಇನ್ಫ್ರಾಸ್ಟ್ರಕ್ಚರ್ ಎಸ್ ಮಾಲಕೆರ್ ಕರುಣಾಕರ್, ಹಿಮಾಲಯ ರೋಡ್ ಲೈನ್ ಕುಡ್ಲ ಮಾಲೀಕೆರ್ ಅಶೋಕ್ ಯೆಯ್ಯಾಡಿ, ಉದ್ಯಮಿ ಸುರೇಶ್ ಪೂಜಾರಿ ಕಣ್ಣೂರು, ಶಶಿಧರ್, ರಾಮಪ್ರಸಾದ್ ಅರ್ಥ್ ಮೂವರ್ಸನ ಅಜಿತ್, ಗುತ್ತಿಗೆದಾರೆರ್ ಕೇಶವ ಬಲರಾಜ್, ಉಪಾಧ್ಯಕ್ಷೆರ್ ಪದ್ಮನಾಭನ್, ಪ್ರಧಾನ ಕಾರ್ಯದರ್ಶಿ ಕ್ಷಿತಿ ಮಮ್ಲೂರು, ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಸೂರ್ಯಕಾಂತ್ ಬೊಕ್ಕ ಪದುಕೆರ್ ಪಾಲ್ ಪಡೆದಿತ್ತೆರ್.
ಸಾಹಿತಿ, ಅಮೃತ ಪ್ರಕಾಶ ಪತ್ರಿಕೆ ಸಂಪಾದಕಿ, ಬ್ರಹ್ಮ ಕಲಶ ಸಮಿತಿದ ಉಪಾಧ್ಯಕ್ಷೆರ್ ಡಾ.ಮಾಲತಿ ಶೆಟ್ಟಿ ಮಾಣೂರು ಎದ್ಕೊನಿಯೆರ್. ರಘುವೀರ್ ಬಾಬುಗುಡ್ಡೆ ಲೇಸ್ ನ್ ಸುಧಾರಿಕೆ ಮಲ್ತ್ ದ್, ಸೊಲ್ಮೆ ಸಂದಾಯೆರ್.
