ಒಡಿಪು: ಒಡಿಪುದ 80 ಬಡಗಬೆಟ್ಟು ಶ್ರೀ ಬ್ರಹ್ಮ ಬೈರ್ದೆಲೆನ ಗರೋಡಿಡ್ ಪುನರ್ ಪ್ರತಿಷ್ಠೆ, ಬ್ರಹ್ಮ ಕುಂಭಾಭಿಷೇಕ ಎ.19-30 ಮುಟ್ಟ ನಡಪರೆ ಉಂಡು.
3 ಕೋಟಿ ರೂ. ಕರ್ಚಿಡ್ ಗರೋಡಿದ ಪೊಸ ಕಟ್ವಾನ, ಬಾಗಿಲ್ ನಿರ್ಮಾಣದ ಬೇಲೆ ಮುಗಿವೊಂದು ಬೈದ್ಂದ್. ಎಡ್ಡೆ ಜಾತಿದ ಮರಕ್ಲೆನ್ ಗಲಸ್ ದ್ ಚಾವಣಿ ಮಲ್ತ್ ದ್ ಹೆಂಚಿ ನಿರ್ಮಾಣ ಮಲ್ದೆರ್.
ಬೇತೆ ಗರೋಡಿಲೆರ್ದ್ ನೆತ್ತ ಮಾಡ್ ಒಂತೆ ಎತ್ತರಡ್ ಉಂಡು. ಬ್ರಹ್ಮೆರೆನ ಗುಂಡ ಸಾಗುವಾನಿ ಮರರ್ದ್ ನಿರ್ಮಾಣ ಮಲ್ದೆರ್. ಇಡೀ ತುಳುನಾಡ್ ಡ್ 260 ರ್ದ್ ಎಚ್ಚದ ಗರೋಡಿಲು ಉಂಡು. ಅವೆಟ್ಟ್ 80 ಬಡಗಬೆಟ್ಟು ಗ್ರಾಮದ ಗರೋಡಿ ಪಿರಾಕ್ ದ ಪುಗರ್ತೆನ್ ಪಡೆತ್ಂಡ್. ಅತ್ತಂದೆ ಕೋಟಿ- ಚೆನ್ನಯೆರೆರ್ದ್ ಸ್ಥಾಪನೆ ಆದ್ ಆತ್ಂಡ್ ಪನ್ಪಿನ ಪುಗರ್ತೆ ಉಂಡು.
ಮುಲ್ಪ ಪೂತ್ತ ಪೂಜೆ ವರ್ಷ ಇಡೀ ಮಾಸ್ತ್ ಆಪುಂಡು. ಮಕರ ತಿಂಗೊಲ್ದ ಶುಕ್ಲಪಕ್ಷದ ದ್ವಾದಶಿದಾನಿ ನುಪ್ಪು ನೈವೇದ್ಯದ ಅಗೇಲ್ ಸೇವೆನ್ ಮಲ್ತ್ ದ್ ಮಾನದಾನಿ ಬೈರ್ದೆಲೆನ ನೇಮ ಆದ್, ಮೂಜಿನೇ ದಿನ ಮಾಯಂದಲೆ ನೇಮ ನಡಪುಂಡು. ಮುಲ್ಪ ಏಳ್ ಪರಿವಾರ ದೈವೊಲೆನ ಸಾನಿಧ್ಯ ಉಂಡು. ಅಂಗಾರೆ ಪೂಜೆ, ಸಂಕ್ರಾಂತಿ ಪೂಜೆ ನಡಪುಂಡು ಪಂದ್ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಬಿ. ಜಯರಾಜ ಹೆಗ್ಡೆ, ಆಡಳಿತ ಮೊಕ್ತೇಸರೆರ್ ಅರುಣಾಚಲ ಹೆಗ್ಡೆ ತೆರಿಪಾದೆರ್.