ಮುಲ್ಕಿ ಬಸ್ ಸ್ಟ್ಯಾಂಡ್ ದ ಪಿರವುದ ಪೊಸ ಪೇಂಟೆರ್ದ್ ಕಟ್ಟದಂಗಡಿ ಶಾಂಭವಿ ತುದೆ ಬರಿ ಮುಟ್ಟದ ಮಾರ್ಗೊಗು ಅಂತಾರಾಷ್ಟ್ರೀಯ ಕ್ರಿಕೆಟ್ ಪಟು, ಮೂಲತಃ ಕೊಳಚಿಕಂಬುಲದಾರ್ ಆಯಿನ ಬುಧಿಸಾಗರ್ ಕುಂದರನ್ ಮೆರೆನ ಪುದರ್ ದ ಪಲವೆನ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಸುಕ್ರಾರ ಉದಿಪನ ಮಲ್ತೆರ್.
ಅವೆರ್ದ್ ಬೊಕ್ಕ ಒಡೆಯರಬೆಟ್ಟು ಶ್ರೀ ಬೊಬ್ಬರ್ಯ ದೈವಸ್ಥಾನದ ಕೈತಲ್ ನಡತಿನ ಲೇಸ್ ಡ್ ಪಾತೆರಿನ ಶಾಸಕೆರ್ ಕೋಟ್ಯಾನ್, ಕೊತ್ತಲಿಗೆದ ಬ್ಯಾಟ್, ತೆಂಬೆದ ಚೆಂಡ್ ಡ್ ಗೊಬ್ಬೊಂದಿತ್ತಿನ ಬಂಗದ ಆ ಕಾಲೊಡು ಕೊಳಚಿಕಂಬುಲದಂಚಿನ ಗ್ರಾಮೀಣ ಭಾಗದ ಜವನೆ ಒರಿ ಬೊಂಬೈಗ್ ಪೋದು ಕ್ರಿಕೆಟ್ ದ ಕಲೊಟ್ಟು ಬೆಗರ್ ಜಪುಡಾದ್ ಭಾರಿ ಕಷ್ಟೊಡು ಗೊಬ್ಬುದು ಅಂತಾರಾಷ್ಟ್ರೀಯ ಮಟ್ಟೊಡು ಸಾಧನೆ ಮಲ್ತಿನ ಬುಧಿಸಾಗರ್ ಕುಂದರನ್ ಮೆರೆನ್ ಮಸ್ತ್ ವರ್ಷೊರ್ದು ಬೊಕ್ಕ ಆಂಡಲ ನೆಂಪು ಮಲ್ತ್ ದ್ ಅರೆನ ಪುದರ್ ನ್ ಈ ಮಾರ್ಗೊಗು ದೀದ್ ಸೂರ್ಯಚಂದ್ರೆರ್ ಇತ್ತಿನಾತ್ ಕಾಲ ಶಾಶ್ವತ ಆಪಿಲೆಕ ಮಲ್ತಿನವು ಮಸ್ತ್ ಎಡ್ಡೆ ಬೇಲೆ. ಇಂಚೆನೆ ನನಾತ್ ಸಾಧಕೆರೆನ ಪುದರ್ ಶಾಶ್ವತ ಆಪಿನ ಬೇಲೆನ್ ನಮ ಮಲ್ಪೊಡು ಪಂದ್ ಪಂಡೆರ್.
ಮುಲ್ಕಿ ನಾಲ್ಕುಪಟ್ಣ ಮೊಗವೀರ ಸಭಾತ್ತ ಅಧ್ಯಕ್ಷೆರ್ ಸುಜಿತ್ ಎಸ್. ಸಾಲ್ಯಾನ್ ಲೇಸ್ ದ ಅಧ್ಯಕ್ಷತೆ ಒಯಿಸೊಂದು ಬಿನ್ನೆರೆನ್ ಎದ್ಕೊಂಡೆರ್.
ಮುಲ್ಕಿ ನಗರಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್.
ಬಿನ್ನೆರಾದ್ ಮುಲ್ಕಿ ನಗರ ಪಂಚಾಯತ್ ದ ಮಾಜಿ ಅಧ್ಯಕ್ಷೆರ್ ಸುನಿಲ್ ಆಳ್ವ, ಉಪಾಧ್ಯಕ್ಷೆರ್ ಸತೀಶ್ ಅಂಚನ್,ಮುಖ್ಯಾಧಿಕಾರಿ ಚಂದ್ರ ಪೂಜಾರಿ, ಸದಸ್ಯೆರ್ ದಯಾವತಿ ಅಂಚನ್, ಮಯೂರಿ ಫೌಂಡೇಶನ್ ದ ಅಧ್ಯಕ್ಷೆರ್ ಜಯ ಕೆ.ಶೆಟ್ಟಿ, ಬೊಂಬೈ ಮೊಗವೀರ ಯುವಕ ಸಂಘದ ಕಾರ್ಯದರ್ಶಿ ದಿಲೀಪ್ ಮುಲ್ಕಿ , ಅಂತಾರಾಷ್ಟ್ರೀಯ ಅಥ್ಲೇಟ್ ಬೊಕ್ಕ ಪವರ್ ಲಿಫ್ಟರ್ ಲೋಕೇಶ್ ಮೆಂಡನ್ ಮೊಕುಲು ಮಾತ ಇತ್ತೆರ್.
ಈ ಪೊರ್ತುಡು ಬುಧಿಸಾಗರ್ ಕುಂದರನ್
ಕುಟುಂಬದ ಶಾಂತಾರಾಮ್ ಕುಂದರ್ ಅಂಚೆನೆ ಮೊಗವೀರ ಪತ್ರಿಕೆದ ಅಶೋಕ್ ಸುವರ್ಣ ಮುಂಬೈ ಮೊಕ್ಲೆನ ಮಾನಾದಿಗೆ ನಡತ್ಂಡ್.
ಗೋವರ್ಧನ್ ಕೋಟ್ಯಾನ್ ಸಭೆ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.
pallavi shetty