ಪಂಜ ಕೊಯಿಕುಡೆ ಶ್ರೀ ವಿಠೋಬ ಭಜನಾ‌ ಮಂದಿರಡ್ ಶ್ರದ್ಧಾ ಭಕ್ತಿದ ಭಜನಾ ಮಂಗಳ ಉಚ್ಚಯ

ಪಂಜ ಕೊಯಿಕುಡೆ : ಶ್ರೀ ವಿಠೋಬ ಭಜನಾ‌ ಮಂದಿರಡ್ 64ನೇ ವಾರ್ಷಿಕ ಭಜನಾ ಮಂಗಳ ಉಚ್ಚಯ ಜ.15 ಐತಾರ ಪಂಜ ಶ್ರೀ ಮಹಾಗಣಪತಿ ಮಂದಿರದ ಪ್ರಧಾನ ಅರ್ಚಕೆರ್ ಸುರೇಶ್ ಭಟ್ ಮೆರೆನ ಮುತಾಲಿಕೆಡ್ ಭಾರಿ ಶ್ರದ್ಧಾ ಭಕ್ತಿಡ್ ನಡತ್‌ಂಡ್.

ಪೊರ್ತು ಮೂಡುನಗ ಭಜನೆ ಸುರುವಾದ್ ಪೊರ್ತು ಪೊರ್ತುಡು ಜಾಮಪೂಜೆ ಆದ್ ಮಹಾ ಮಂಗಳಾರತಿ ನಡತ್ಂಡ್. ಪ್ರಸಾದ ವಿತರಣೆ ಆಯಿ ಜೊಕ್ಕ ಅನ್ನಸಂತರ್ಪಣೆ ನಡತ್ಂಡ್.

ಬೇತೆ ಬೇತೆ ಭಜನಾ ಮಂಡಳಿದ ಭಜಕೆರ್ ಪೊರ್ತು ಮೂಡುನೆರ್ದ್ ಪೊರ್ತು ಕಂತುನ ಮುಟ್ಟ ನಡತಿನ ಈ ಭಜನಾ ಸೇವೆಡ್ ಪಾಲ್ ಪಡೆಯೆರ್. ಶಾಸಕೆರ್ ಉಮಾನಾಥ್ ಕೋಟ್ಯಾನ್, ಕಾಂಗ್ರೆಸ್ ಯುವ ನಾಯಕೆರ್ ಮಿಥುನ್ ರೈ ಬೊಕ್ಕ ಬೇತೆ ಬೇತೆ ಗಣ್ಯೆರ್ ಶ್ರೀ ಕ್ಷೇತ್ರೊಗು ಬತ್ತ್ ದ್ ಪ್ರಸಾದ ಸ್ವೀಕಾರ ಮಲ್ತೆರ್.

ವರ್ಧಂತಿ ಉಚ್ಚಯ:

ಜ.18 ಬುಧಾರ ಕಾಂಡೆ ಶ್ರೀ ವಿಠೋಬ ಭಜನಾ ಮಂದಿರದ ವರ್ಧಂತಿ ಉಚ್ಚಯ ನಡಪರೆ ಉಂಡು. ಬೊಲ್ಪುಗು ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ, ಭಜನೆ, ಮಂಗಳಾರತಿ, ಪ್ರತಿಭಾ ಪುರಸ್ಕಾರ ಅಂಚೆನೆ ಹಿರಿಯ ಯಕ್ಷಗಾನ ಕಲಾವಿದೆರ್ ಶಶಿಧರ ಶೆಟ್ಟಿ ಪಂಜ ಮೆರೆಗ್ ಸನ್ಮಾನ ನಡಪರೆ ಉಂಡು. ಬಯ್ಯಗ್ 5 ಗಂಟೆರ್ದ್ ದಿ. ಪಂಜ ಲಕ್ಕಪ್ಪ ಶೆಟ್ರೆನ ನೆಂಪುಗಾದ್ ಅರೆನ ಇಲ್ಲದಕ್ಲೆನ ಪ್ರತಿವರ್ಷದ ಸೇವೆ, ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಸೇವೆ ಯಕ್ಷಗಾನ ಮಂಡಳಿದಕ್ಲೆರ್ದ್ ಯಕ್ಷಗಾನ ಬಯಲಾಟ ನಡಪರೆ ಉಂಡು.