ಮುಲ್ಕಿ: ನಮ್ಮ ಕೈತಲ್ದ ಜನಕ್ಲೆನ ಅನುಕೂಲಗಾದ್ ಒವ್ವೇ ರೀತಿದ ಪ್ರತಿಫಲ ಇಜ್ಜಂದೆ ಮಲ್ಪುನ ಬೇಲೆ ಸಮಾಜ ಸೇವೆ ಪಂದ್ ಆಪುಂಡು. ಪುನರೂರು ಪ್ರತಿಷ್ಠಾನ ಕರಿನ 6 ವರ್ಷರ್ದ್ ಇಂಚಿನ ಮಸ್ತ್ ಬೇಲೆನ್ ಮಲ್ತೊಂದು ಬೈದ್ಂಡ್. ನಿಸ್ವಾರ್ಥ ಸಮಾಜಸೇವೆ ಡ್ ಪುನರೂರು ಪ್ರತಿಷ್ಠಾನದ ಒಂಜಿ ಮಲ್ಲ ಪುದರ್ ಪಂದ್ ಕುಡ್ಲದ ಸ್ವಸ್ತಿಕ ನ್ಯಾಶನಲ್ ಸ್ಕೂಲ್ದ ಅಧ್ಯಕ್ಷೆರ್ ಡಾ. ರಾಘವೇಂದ್ರ ಹೊಳ್ಳ ಪಂಡೆರ್.
ಪುನರೂರು ಶ್ರೀ ವಿಶ್ವನಾಥ ದೇವಲ್ಯದ ಜಾಗೆಡ್ ಪುನರೂರು ಪ್ರತಿಷ್ಠಾನದ ಮುತಾಲಿಕೆಡ್ ಜನವರಿ 8 ತಾರೀಕ್ ಐತಾರ ಅಟ್ಟನೆ ಮಲ್ತಿನ “ಪುನರೂರು ಸಂಭ್ರಮ” ಲೇಸ್ನ್ ಉದಿಪನ ಮಲ್ತ್ದ್ ಪಾತೆರಿಯೆರ್.
ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯದ ಅನುವಂಶಿಕ ಅರ್ಚಕೆರ್ ವೇದಮೂರ್ತಿ ಲಕ್ಷ್ಮೀನಾರಾಯಾಣ ಅಸ್ರಣ್ಣೆರ್ ಪಾತೆರ್ದ್ ಎಡ್ಡೆಪ್ಪುನು ಬಯಕ್ಯೆರ್. ಪುನರೂರು ಪ್ರತಿಷ್ಠಾನದ ಗೌರವಾಧ್ಯಕ್ಷೆರ್ ಡಾ. ಹರಿಕೃಷ್ಣ ಪುನರೂರು ಲೇಸ್ಡ್ ಗುರ್ಕಾರ್ಮೆ ವಹಿಸ್ ದಿತ್ತೆರ್.
ಈ ಪೊರ್ತುಡು ದ.ಕ. ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟದ ಅಧ್ಯಕ್ಷೆರ್ ಕೆ.ಪಿ. ಸುಚರಿತ ಶೆಟ್ಟಿ, ದ.ಕ. ಜಿಲ್ಲಾ ಧಾರ್ಮಿಕ ಪರಿಷತ್ದ ಸದಸ್ಯೆರ್ ಕೊಡೆತ್ತೂರು ಭುವನಾಭಿರಾಮ ಉಡುಪ, ಪುನರೂರು ಶ್ರೀ ವಿಶ್ವನಾಥ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಪಟೇಲ್ ವಾಸುದೇವ ರಾವ್, ಪುನರೂರು ಪ್ರತಿಷ್ಠಾನದ ಅಧ್ಯಕ್ಷೆರ್ ದೇವಪ್ರಸಾದ್ ಪುನರೂರು, ಕಾರ್ಯದರ್ಶಿ ಶ್ರೇಯಾ ಪುನರೂರು, ಜನ ವಿಕಾಸ ಸಮಿತಿ ಮುಲ್ಕಿ ಘಟಕದ ಅಧ್ಯಕ್ಷೆರ್ ದಾಮೋದರ ಶೆಟ್ಟಿ ಕೊಡೆತ್ತೂರು ಸೇರ್ದ್ ಮಸ್ತ್ ಜನ ಲೇಸ್ಡ್ ಪಾಲ್ ಪಡೆದಿತ್ತೆರ್.
pallavi shetty