ಕಿನ್ನಿಗೋಳಿ : ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಮೇರ್ ಜುಲೈ 1 ತಾರೀಕ್ ದಾನಿ ಜಾಗತಿಕ ಬಂಟರ ಸಂಘದ ಒಕ್ಕೂಟದ ಗುರಿಕಾರೆರ್ ಐಕಳ ಹರೀಶ್ ಶೆಟ್ರೆನ ಕಿನ್ನಿಗೋಳಿದ ಇಲ್ಲಗ್ ಭೇಟಿ ಕೊರ್ದು ಪಾತೆರಕತೆ ಮಲ್ತೆರ್.
ರಾಜ್ಯದ ಪಾಠ ಪುಸ್ತಕ ಸಮಿತಿದಕುಲು ನಾಡೋಜ ಕಯ್ಯಾರ ಕಿಂಞಣ್ಣ ರೈ ಅರೆನ ವಿಚಾರೊನು ಪಾಠ ಪುಸ್ತಕೊರ್ದು ದೆತ್ತ್ ದ್ ಪಾಡ್ದಿನ ವಿಚಾರ ಅಂಚೆನೆ ಕುಡ್ಲದ ಎಬಿ ಶೆಟ್ಟಿ ಸರ್ಕಲ್ ಅನುಷ್ಠಾನದ ಬಗೆಟ್ಟ್ ಚರ್ಚೆ ಮಲ್ತೆರ್.
ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ರೆನ ಗುರ್ಕಾರ್ಮೆ ಡ್ ಇಂಚೊಗು ಕುಡ್ಲ ಡ್ ನಡತಿನ ಸಭೆಟ್ಟ್ ಬಂಟ ಸಮುದಾಯದ ಶತಾಯುಷಿ ಗಡಿನಾಡ ಹೋರಾಟಗಾರೆರ್ ಕವಿ ಬೊಕ್ಕ ಸ್ವಾತಂತ್ರ್ಯ ಹೋರಾಟಗಾರೆರ್ ನಾಡೋಜ ಕಯ್ಯಾರ ಕಿಂಞ್ಞಣ್ಣ ರೈ ಮೇರ್ನ ವಿಚಾರೊನು ಪಠ್ಯಪುಸ್ತಕಡ್ ಸೇರ್ಸಾವಂದಿನ ಬಗೆಟ್ಟ್ ಸರಕಾರಗ್ ಒತ್ತಾಯ ಮಲ್ಪರೆ ನಿರ್ಣಯ ದೆತೊಂದಿತ್ತೆರ್.
ಈ ನಿಲೆಟ್ಟ್ ನಳಿನ್ ಕುಮಾರ್ ಮೇರ್ ಸರಕಾರದ ಶಿಕ್ಷಣ ಸಚಿವೆರ್ ನಾಗೇಶ್ ಗ್ ಫೋನ್ ಮುಕೇನ ಐಕಳ ಹರೀಶ್ ಶೆಟ್ರೆಡ ಪಾತೆರಪ್ಪಾದ್ ಪಠ್ಯಪುಸ್ತಕಡ್ ಕಯ್ಯಾರ ಕಿಂಞಣ್ಣ ರೈಕ್ಲೆನ ಪುದರ್ ಸೇರ್ಸಾವುನ ಭರವಸೆ ಕೊರಿಯೆರ್.
ಅವ್ವತ್ತಾಂದೆ ಮುಖ್ಯ ಮಂತ್ರಿ ಬಸವರಾಜ್ ಬೊಮ್ಮಾಯಿ ಜತೆಟ್ಟ್ ಪಾತೆರ್ದ್ ಬೇಗ ಕ್ರಮ ದೆತೊನುವ ಪಂದ್ ತೆರಿಪಾಯೆರ್. ಇಂದೆತ್ತ ಒಟ್ಟುಗೇ ಆರ್ ಟಿ ಒ ಕೈತಲ್ದ ಎ ಬಿ ಶೆಟ್ಟಿ ಸರ್ಕಲ್ ನ್ ಲ ಬೇಗೊಡು ಅನುಷ್ಠಾನ ಮಲ್ಪಾವೆ ಪಂದ್ ಪಂಡೆರ್.
pallavi shetty