ಒಡಿಪು ಬ್ಲಾಕ್ ಕಾಂಗ್ರೆಸ್ ಸಮಿತಿದ ಅಧ್ಯಕ್ಷೆರಾದ್ ರಮೇಶ್ ಕಾಂಚನ್ ಆಯ್ಕೆಯಾತೆರ್

ಒಡಿಪು: ನಗರಸಭಾ ಸದಸ್ಯೆರ್ ರಮೇಶ್ ಕಾಂಚನ್ ಇಂಬೆರ್ ಒಡಿಪು ಬ್ಲಾಕ್ ಕಾಂಗ್ರೆಸ್ ಸಮಿತಿದ ಅಧ್ಯಕ್ಷೆರಾದ್ ಆಯ್ಕೆ ಆತೆರ್. ಮಾಜಿ ಸಚಿವೆರ್ ಪ್ರಮೋದ್ ಮಧ್ವರಾಜ್ ಇಂಬೆರ್ನ ಶಿಫಾರಸುಡ್ ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಅಧ್ಯಕ್ಷೆ ಡಿ.ಕೆ. ಶಿವಕುಮಾರ್ ಇಂಬೆರ್ ಈ ನೇಮಕಾತಿ ಆದೇಶನ್ ಮಲ್ತೆರ್.

ಉಡುಪಿ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆ ಅಶೋಕ್ ಕುಮಾರ್ ಕೊಡವೂರು ಇಂಬೆರ್ ಆದೇಶ ಮಲ್ತಿನ ಕಾಕಜಿನ್ ಶನಿವಾರ ರಮೇಶ್ ಕಾಂಚನ್ ಇಂಬೆರ್ನ ಕೈಕು ಕೊರಿಯೆರ್.

ರಮೇಶ್ ಕಾಂಚನ್ ಇಂಬೆರ್ ಒಂಜಿ ಸಲಿ ಒಡಿಪುದ ತಾ.ಪಂ. ಸದಸ್ಯರಾದ್, ರಡ್ಡು ಸಲಿ ಒಡಿಪು ನಗರಸಭಾ ಸದಸ್ಯರಾದ್, ಇತ್ತೆ ನಗರಸಭೆತ್ತ ವಿರೋಧ ಪಕ್ಷದ ನಾಯಕೆರಾದ್, ಉಡುಪಿ ಬ್ಲಾಕ್ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿಯಾದ್ ಸೇವೆನ್ ಮಲ್ತುದೆರ್.
ಉತ್ತಮ ಸಂಘಟಕೆರಾದ್ ಪುದರ್ ಮಲ್ತಿನ ಕಾಂಚನ್ ಇಂಬೆರ್ ಮೊಗವೀರ ಸಂಘಟನೆದ ಜಿಲ್ಲಾ ಘಟಕದ ಸ್ಥಾಪಕ ಉಪಾಧ್ಯಕ್ಷೆರಾದ್, ಮಣಿಪಾಲ ರಿಕ್ಷಾ ಚಾಲಕ-ಮಾಲಕೆರ್ನ ಸಂಘದ ಗೌರವಾಧ್ಯಕ್ಷೆರಾದ್ ಸೇವೆನ್ ಮಲ್ತುದೆರ್.

ಶೀರೂರು ಮಠ ಅಂಚನೆ ಪುತ್ತಿಗೆ ಮಠತ್ತ ಪರ್ಯಾಯಡ್ ಹಿರಿಯಡ್ಕ ಭಾಗದ ಹೊರೆ ಕಾಣಿಕೆ ಸಮಿತಿದ ಅಧ್ಯಕ್ಷರಾದ್, ಒಡಿಪುಡ್ ನಡತಿನ ರಾಜ್ಯ ಮಟ್ಟದ ಅಥ್ಲೆಟಿಕ್ ಕೂಟದ ಆರ್ಥಿಕ ಸಮಿತಿದ ಅಧ್ಯಕ್ಷೆರಾದ್, ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಸಮಿತಿದ ಮಾದಕ ವ್ಯಸನ ವಿಮೋಚನಾ ಸಮಿತಿದ ಅಧ್ಯಕ್ಷರಾದ್ ಸೇವೆನ್ ಸಂದಾದೆರ್.