September 13, 2021

“ಪೊಲೀಸ್‌ದಕ್ಲು ಕಾಸ್ ದೆತೊನ್ವೆರಾ ಪಂದ್‌ಲ ಒಂಜಿ ಅಣಕು ಪ್ರದರ್ಶನ ಮಲ್ಪುಲೆ ಸರ್’ ಪಂದ್ ಕಮಿಷ್ನರ್ ಸರ್‌ಡ ಬಿನ್ನಯ!

ಕುಡ್ಲ : ನಮ್ಮ ಕುಡ್ಲದ ಕಮಿಷ್ನರ್ ಸಾರ್ ಎನ್. ಶಶಿಕುಮಾರ್ ಕನ್ನಡದಾರ್ ಆಂಡಲ ತುಳುನಾಡ್ದ ಬಗೆಟ್ಟ್, ತುಳು ಬಾಸೆದ ಮಿತ್ತ್ ಬಾರಿ ಮೋಕೆ ಇತ್ತಿನಾರ್. ದಕ್ಷ ಅಧಿಕಾರಿ ಮಾತ್ರ ಅತ್ತಾಂದೆ ಜನೊಕ್ಲೆಡ ಎಡ್ಡೆ ರೀತಿಡ್ ಉಪ್ಪುನಾರ್. ಅಕ್ಲೆನ ಕಷ್ಟ ದಾದ ಪಂದ್ ಕೈತಲ್ಡ್ ತೆರಿವುನಾರ್. ಆರ್ ಒರಿ ಕಲಾವಿದೆಲ ಅಂದ್. ಪದ್ಯಲ ಪನ್ಪೆರ್. ಅಂಚೆನೇ ನಾಯಿ, ಪುಚ್ಚೆ, ಪಕ್ಕಿಲು ಪಂಡ ಅರೆಗ್ ಇಷ್ಟ.

ಐತಾರದಾನಿ ಅರೆನ ಮಾರ್ಗದರ್ಶನೊಡು ನಡತಿನ ಅಣಕು ಕಾರ್ಯಾಚರಣೆ ಬಾರಿ ಸುದ್ದಿ ಆದ್ ಆ ವೀಡಿಯೊ ನಿಜ ನಡದಿನಿ ಪನ್ಪಿಲೆಕ್ಕ ಬಾರಿ ವೈರಲ್ ಆದಿತ್ತ್ಂಡ್. ಕುಡ್ಲದ ಸೈಂಟ್ ಆಗ್ನೆಸ್ ಕಾಲೇಜಿದ ಎದುರು ನಡತೊಂದು ಪೋವೊಂದಿತ್ತಿನ ಪೊಂಜೊವೆನ ಬ್ಯಾಗ್‌ನ್ ಕಲ್ವೆ ಒರಿ ಒಯ್ತ್ದ್ ಕಾರ್‌ಡ್ ತಪ್ಪಾದ್ ಪೋಪಿನÀ ಅಂಚೆನೇ ಅಪಗ ಸಾರ್ವಜನಿಕೆರ್, ಪೊಲೀಸ್‌ದಕುಲು ಎಂಚ ಸ್ಪಂದನೆ ಕೊರ್ಪೆರ್ ಪನ್ಪಿನೆನ್ ತೆರಿಯರೆ ಬೋಡಾದ್ ಕಮಿಷ್ನರ್ ಸಾರ್ ಈ ಒಂಜಿ ಮಾಕ್ ಡ್ರಿಲ್ ಮಲ್ತಿತ್ತೆರ್. ಅರೆನ ಈ ಕೆಲಸೊನು ಸಾಮಾಜಿಕ ಜಾಲತಾನೊಡು ಮಾತರ‍್ಲ ಮೆಚ್ಚಿದೆರ್.

ಅಕ್ಲೆಗ್ ಕುಸಿಯಾದ್ ಅರೆನ್ ಪುಗರ್‌ದ್ ಕಮೆಂಟ್ ಮಲ್ದೆರ್. ಆಂಡ ಅಯಿಟ್ ಕೆಲವೊಂಜಿ ಅಭಿಪ್ರಾಯೊಲು ಪೊಲೀಸ್‌ದಕ್ಲೆನೇ ಪ್ರಶ್ನೆ ಮಲ್ಪುನ ಅಭಿಪ್ರಾಯೊಲು ಇತ್ತ್ಂಡ್. ಅಯಿಟ್ ಒಂಜಿ ಅಭಿಪ್ರಾಯ ಇಂಚ ಇತ್ತ್ಂಡ್. ಅವು ದಾದ ಪಂಡ “ಸರ್ ಉಂದೆತ್ತ ಲೆಕ್ಕೊನೇ ಇರೆನ ಸಿಬ್ಬಂದಿನಕುಲು ಲಂಚ ದೆತೊನುವೆರೇ ಪಂದ್ ತೆರಿಯರೆ ಬೋಡಾದ್ ಅಣಕು ಪ್ರದರ್ಶನ ಮಲ್ಪುಲೆ..’ ಪಂದ್ ಕಮಿಷ್ನರ್ ಸಾಹೇಬ್ರೆಗ್ ಬಿನ್ನಯ ಮಲ್ತೊಂದೆರ್.
ಸರ್ಕಾರಿ ಕೆಲಸೊಗು ಸಿಬ್ಬಂದಿನಕುಲು ಮಾತರ‍್ಲ ದುಡ್ಡು ದೆತೊನುವೆರ್ ಪನ್ಪಿನ ಆರೋಪ ಇನಿ ಕೊಡೆದ ಅತ್ತ್. ರಾಜ್ಯೊಡಾವಡ್ ಕೇಂದ್ರೊಡಾವಡ್ ವಾ ಸರಕಾರ ಬತ್ತ್ಂಡಲ ಭ್ರಷ್ಟಾಚಾರ ಪನ್ಪಿನ ರಕ್ಕಸ ವ್ಯವಸ್ಥೆನ್ ಉಂತಾವರೆ ಏರೆಗ್‌ಲ ಸಾಧ್ಯ ಆತಿಜಿ. ಪೊಲೀಸ್ ಇಲಾಖೆಡ್ಲ ಈ ಸಮಸ್ಯೆ ಜೋರುಡೇ ಉಂಡು.

ಆಂಡ ಎನ್. ಶಶಿಕುಮಾರ್, ಅಣ್ಣಾಮಲೈನಂಚಿನ ಅವ್ವೇತೋ ಕ್ಲೀನ್‌ಹ್ಯಾಂಡ್ ಅಧಿಕಾರಿಲು ಇಲಾಖೆದ ಲಂಚದ ದಂಧೆನ್ ಉಂತಾವರೆ ಪ್ರಾಮಾಣಿಕವಾದ್ ಪ್ರಯತ್ನ ಮಲ್ತೆರ್ಡಲ ಅವೆನ್ ಕೆಲವೆರೆರ್ದ್ ಮಾತ್ರ ಉಂತಾವರೆ ಸಾಧ್ಯ ಇಜ್ಜಿ ಪನ್ಪಿನವು ಸತ್ಯ.
ಲಂಚ ದೆತೊನುನೆಕ್ಕ್ ತಡೆ ಕನಲೆ ಪನ್ಪಿನವು ಸಾರ್ವಜನಿಕೆರ್ನ ಮಲ್ಲ ಬೇಡಿಕೆ. ಅಯಿಟ್ಟ್ಲ ಪೊಲೀಸ್ ಇಲಾಖೆದಕ್ಲೆನ ಮಿತ್ತ್ ಇತ್ತಿನ ಕಳಂಕೊನು ದೂರ ಮಲ್ಪರೆ ಎನ್. ಶಶಿಕುಮಾರ್ ಸರ್ ಎಂಚ ಪ್ರಯತ್ನ ಮಲ್ಪುವೆರ್ ? ಕುಡೊಂಜಿ ಅಣಕು ಕಾರ್ಯಾಚರಣೆ ಎಂಚ ಮಲ್ಪುವೆರ್ ಪನ್ಪಿನ ನಿರೀಕ್ಷೆಡ್ ಉಲ್ಲೆರ್ ತುಳುವೆರ್.