ಮಲ್ಪೆ: ಒಡಿಪುದ ಶಾಸಕೆ ಯಶ್ಪಾಲ್ ಸುವರ್ಣ ಮೆರೆನ ಪುಟ್ಟುಪರ್ಬಗು ಎಡ್ಡೆಪ್ಪು ಬಯಕ್ ದ್ ಒಡಿಪು ಜಿಲ್ಲೆದ ಹಿಂದೂ ಯುವಸೇನೆ ಸನ್ಮಾನ ಬಲ್ಮನ ಮಲ್ಪುನ ಮುಖೇನ ಪುಟ್ಟುಪರ್ಬದ ಗೌಜಿನ್ ಆಚರಣೆ ಮಲ್ತ್ಂಡ್.
ಈ ಪೊರ್ತುಡು ಯುವಸೇನೆದ ಮಾನಾದಿಗೆದ ಗುರ್ಕಾರ್ಲು ಆಯಿನ ಶೇಖರ್ ಶೆಟ್ರ್ ಪಾತೆರ್ದ್, ಯಶ್ಪಾಲ್ ಸಿದ್ದಾಂತದೊಟ್ಟಿಗೆ ಇಪ್ಪುನಾರ್, ಒವ್ವೇ ಬೋರ್ಚಂದಿನ ಕೆಲಸಗ್ ರಾಜಿ ಅವಂದೆ ಎಲ್ಯ ಪ್ರಾಯಡೇ ಸಹಕಾರಿ ನಾಯಕೆಯಾದ್, ಕುಡ್ಲ ಮೀನುಗಾರಿಕೆ ಫೆಡರೇಶನ್ ದ ಗುರ್ಕಾರ್ರೆಯಾದ್, ಶಿಕ್ಷಣ ಧಾರ್ಮಿಕ ಕ್ಷೇತ್ರಡ್ ಬೇತೆ ಬೇತೆ ಕಾರ್ಯ ವೈಖರಿರ್ದ್ ದಕ್ಷ ಆಡಳಿತಗಾರೆಯಾದ್ ಕೆಲಸ ಮಲ್ತಿನಾರ್. ಇತ್ತೆ ಶಾಸಕೆಯಾದ್ ಒಡಿಪುದ ಕ್ಷೇತ್ರದ ಜನಕ್ಲೆನ ಕಷ್ಟಗ್ ಸಕಾಯ ಅವೊಂದಿಪ್ಪುನವು ನಮಕ್ ಪೆರ್ಮೆ ಪಂದ್ ಪಂಡೆರ್.
ಯಶ್ ಪಾಲ್ ಸುವರ್ಣ ಮೇರ್ ಪಾತೆರ್ದ್, ಒಡಿಪು ಕ್ಷೇತ್ರದ ಸಮಗ್ರ ಅಭಿವೃದ್ಧಿದೊಟ್ಟಿಗೆ ಮುಲ್ಪದ ಜೀವಂತ ಸಮಸ್ಯೆಲೆನ್ ನಿವಾರಣೆ ಮಲ್ಪುನ ದಿಟ್ಟಿಡ್ ಮಾತ ಪ್ರಯತ್ನ ಮಲ್ಪುವ ಪಂದ್ ಪಂಡೆರ್.
ಈ ಪೊರ್ತುಡು ಹಿಂದೂ ಯುವ ಸೇನೆದ ಜಿಲ್ಲಾಧ್ಯಕ್ಷೆರ್ ಅಜಿತ್ ಕೊಡವೂರು, ಉಪಾಧ್ಯಕ್ಷೆರ್ ಪ್ರಶಾಂತ್ ಸುವರ್ಣ, ಸಲಹೆಗಾರೆ ಸನತ್ ಸಾಲ್ಯಾನ್ ಮಲ್ಪೆ, ನಗರಾಧ್ಯಕ್ಷೆರ್ ಸುನಿಲ್ ನೇಜಾ, ಉಮೇಶ್ ಸುವರ್ಣ, ಸುರೇಶ್ ಸಾಲ್ಯಾನ್, ಪ್ರಭಾತ್ ಕೊಡವೂರು, ಗಣೇಶ್ ಬಂಗೇರ, ಆಶಿತ್ ಕೋಟ್ಯಾನ್, ತ್ರಿಶೂಲ್ ಪುತ್ರನ್, ದಾಸ ಕುಂದರ್, ದಿನೇಶ್ ಶೆಟ್ಟಿಗಾರ್ ಪಾಲ್ ಪಡೆದಿತ್ತೆರ್.
pallavi shetty