ಹಳೆಯಂಗಡಿ: ತುಳುನಾಡ್ ದ ತಿಂಗೊಲ್ಡ್ ಆಟಿ ಮಸ್ತ್ ಕಷ್ಟದ ಕಾಲ. ಆ ಕಾಲದ ಆಚರಣೆಲು ಇತ್ತೆಲ ಉಂಡು. ಅಂಚಿನ ಆಚರಣೆಲು ಚಾವಡಿಡ್ ಮಾತ್ರ ಸೀಮಿತ ಆವಂದೆ, ನಿಜ ಜೀವನಡ್ಲಾ ಇಪ್ಪೊಡು ಪಂದ್ ಯಕ್ಷಲಹರಿ ಕಿನ್ನಿಗೋಳಿದ ಸದಸ್ಯೆರ್, ಕಲ್ಲಮುಂಡ್ಕೂರುದ ನಿವೃತ್ತ ಪ್ರಾಧ್ಯಾಪಕೆರ್ ವಸಂತ ದೇವಾಡಿಗ ಪಂಜ ಮೇರ್ ಪಂಡೆರ್.
ಮೇರ್ ದೇವಾಡಿಗ ಸಮಾಜ ಸೇವಾ ಸಂಘ (ರಿ.) ಪಾವಂಜೆದ ಮುತಾಲಿಕೆಡ್, ದೇವಾಡಿಗ ಯುವ ವೇದಿಕೆ ಪಾವಂಜೆ ಬೊಕ್ಕ ದೇವಾಡಿಗ ಸೇವಾ ಟ್ರಸ್ಟ್ (ರಿ.) ಪಾವಂಜೆದ ಒಟ್ಟುಸೇರಿಗೆಡ್, ದೇವಾಡಿಗ ಮಹಿಳಾ ವೇದಿಕೆ ಪಾವಂಜೆ ನೆತ್ತ ದುಂಬಾತ್ತಿಗೆಡ್ ನಡತಿನ ಆಟಿಡೊಂಜಿ ಐತಾರ ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ಬೆನೆಟ್ ಜಿ.ಅಮ್ಮಣ್ಣ ಮೇರ್ ಪಾತೆರ್ದ್, ಆಟಿ ಆಚರಣೆಲು ಬೊಕ್ಕ ಗಿಡಮೂಲಿಕೆದ ಬಗೆಟ್ಟ್ ಇಸೇಸ ಪೊಲಬು ಕೊರಿಯೆರ್.
ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲದ ಮಾಜಿ ಅಧ್ಯಕ್ಷೆರ್ ಸುಧಾಕರ ಆರ್.ಅಮೀನ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ದೇವಾಡಿಗ ಮಹಿಳಾ ವೇದಿಕೆದ ಪ್ರಧಾನ ಕಾರ್ಯದರ್ಶಿ ಮಂಜುಳಾ ಶುಭ್ರತ್ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರ್ದ್, ಆಟಿದ ಅಟಿಲ್ ನ್ ತಯಾರ್ ಮಲ್ತಿನ ಪೊಂಜೋವ್ ನಕ್ಲೆಗ್ ಅಭಿನಂದನೆ ಸಂದಾಯೆರ್.
pallavi shetty