ಕಲ್ಲಡ್ಕ ಪ್ರಾಥಮಿಕ ಶಾಲೆದ ಮುಖ್ಯ ಶಿಕ್ಷಕೆರೆನ ಸಂಘದ ಜಿಲ್ಲಾ ಘಟಕ ರಚನೆ

ಬಂಟ್ವಾಳ: ಕಲ್ಲಡ್ಕ ಮಾದರಿ ಹಿರಿಯ ಪ್ರಾಥಮಿಕ ಶಾಲೆಡ್ ಪ್ರಾಥಮಿಕ ಶಾಲೆದ ಮುಖ್ಯ ಶಿಕ್ಷಕೆರೆನ ಸಂಘದ ಜಿಲ್ಲಾ ಘಟಕ ರಚನೆ ಮಲ್ದೆರ್.

ಬಂಟ್ವಾಳ ತಾಲೂಕ್ ಮುಖ್ಯ ಶಿಕ್ಷಕ ಸಂಘದ ಅಧ್ಯಕ್ಷೆರಾದ್ ವೀರಕಂಬ ಮಜಿ ಶಾಲೆದ ಮುಖ್ಯ ಶಿಕ್ಷಕೆರ್ ನಾರಾಯಣ ಪೂಜಾರಿ ಎಸ್.ಕೆ ಗುರ್ಕಾರ್ಮೆ ಒಯಿಸೊಂದು, ಲೇಸ್ ನ್ ಉದಿಪನ ಮಲ್ತ್ ದ್, ಪ್ರಾಸ್ತಾವಿಕ ಪಾತೆರಿಯೆರ್. ಅವೆರ್ದ್ ಬೊಕ್ಕ ಜಿಲ್ಲಾ ಘಟಕಗ್ ಪದಾಧಿಕಾರಿಲೆನ ಆಯ್ಕೆ ನಡತ್ಂಡ್. ನೆಟ್ಟ್ ಗೌರವಾಧ್ಯಕ್ಷೆರಾದ್ ಮಜಿ ಶಾಲೆದ ನಾರಾಯಣ ಪೂಜಾರಿ ಎಸ್.ಕೆ, ಅಧ್ಯಕ್ಷೆರಾದ್ ನಿಂಗರಾಜು ಕೆ.ಪಿ ಅಲಂಕಾರು ಕಡಬ, ಉಪಾಧ್ಯಕ್ಷೆರಾದ್ ಬಾಬು ಟಿ ಹಿರೆಬಂಡಾಡಿ ಬೊಕ್ಕ ಮಹಾಲಿಂಗ ಬೊಲ್ತೇರ್, ಪ್ರಧಾನಕಾರ್ಯದರ್ಶಿ ಆದ್ ಗೋಪಾಲಕೃಷ್ಣ ಬನ ಸುಳ್ಯ, ಜತೆ ಕಾರ್ಯದರ್ಶಿಯಾದ್ ಪ್ರೇಮ ಕೆ.ಕೆ. ಕಾವಳಮುಡೂರು, ಬೊಕ್ಕ ಶಾರದಾ ಕಡಬ, ಕೋಶಾಧಿಕಾರಿಯಾದ್ ಪುಟ್ಟರಂಗನಾಥ ಟಿ ಬಂಟ್ವಾಳ, ಸಂಘಟನಾ ಕಾರ್ಯದರ್ಶಿಯಾದ್ ಸುನಂದಾ ಸುಳ್ಯ ಬೊಕ್ಕ ಸುರೇಶ್ ಬೊಲ್ತೇರ್, ನಿರ್ದೇಶೆಕೆರಾದ್ ಶಂಕರ್ ನಾರ್ಶಮೈದಾನ ಬೊಕ್ಕ ಮಹೇಶ್ ಕಡಬ ಆಯ್ಕೆ ಆಯೆರ್. ಬೊಕ್ಕ ಅಧ್ಯಕ್ಷೆರಾದ್ ಆಯ್ಕೆ ಆಯಿನ ನಿಂಗರಾಜ್ ಕೆ.ಪಿ. ಮೇರ್ ಪಾತೆರ್ದ್, ಮಾತ ಶಿಕ್ಷಕೆರ್ ಸಹಕಾರ ಕೊರೊಡು ಪಂದ್ ಪಂಡೆರ್. ಬೊಕ್ಕ ಮುಖ್ಯ ಶಿಕ್ಷಕೆರೆನ ಬೇಡಿಕೆಲೆನ್ ಈಡೇರಿಸಾಯೆರೆ ರಾಜ್ಯ ಸಂಘದೊಟ್ಟಿಗೆ ಇತ್ತ್ ದ್ ಕೆಲಸ ಮಲ್ಪುವ ಪಂದ್ ಭರವಸೆನ್ ಕೊರಿಯೆರ್. ಈ ಪೊರ್ತುಡು ಕಲ್ಲಡ್ಕ ಶಾಲೆದ ಮುಖ್ಯ ಶಿಕ್ಷಕೆರ್ ಅಬುಬಕ್ಕರ್ ಅಶ್ರಫ್, ಸುಳ್ಯ ತಾಲೂಕ್ ಅಧ್ಯಕ್ಷೆರ್ ದೇವರಾಜ್, ಬೊಲ್ತೇರ್ ತಾಲೂಕ್ ಅಧ್ಯಕ್ಷೆರ್ ಬಾಲಕೃಷ್ಣ, ಪುತ್ತೂರ್ ತಾಲೂಕ್ ಕಾರ್ಯದರ್ಶಿ ತಾರನಾಥ್ ವೀರಮಂಗಲ, ಪಾಂಡವರಕಲ್ಲು ನವೀನಾ ಕುಮಾರಿ, ಮದ್ವದ ಭವಾನಿ, ಆನಂದ ಕೆಮ್ಮಾನುಪಲ್ಕೆ, ಗೋಪಾಲ ಸುರಿಬೈಲು, ಶಿವರಾಮ್ ಭಟ್ ಮಿತ್ತನಡ್ಕ, ಚಂದ್ರಾವತಿ ಮಾಣಿ ಬೊಕ್ಕ ಮಾತ ತಾಲೂಕ್ ದ ಪದಾಧಿಕಾರಿಲು ಇತ್ತೆರ್. ನಾರಾಯಣ ಪೂಜಾರಿ ಎಸ್ ಕೆ ಎದ್ಕೊನಿಯೆರ್, ಪುಟ್ಟರಂಗನಾಥ ಟಿ ಸೊಲ್ಮೆ ಸಂದಾಯೆರ್. ದೇವಕಿ ಮೋಂತಿಮಾರು ಬೊಕ್ಕ ದಾಮೋದರ ಸರ್ಕಳ ಲೇಸ್ ದ ಸುಧಾರಿಕೆ ಮಲ್ತೆರ್.