ನಿಡ್ಲೆ ಗೋವಿಂದ ಭಟ್ರೆಗ್ ಮಂಡೆಚ್ಚ ಪ್ರಶಸ್ತಿ -2026

ಕಟೀಲ್ :ಖ್ಯಾತ ಭಾಗವತ ದಿ. ವಿದ್ವಾನ್ ದಾಮೋದರ ಮಂಡೆಚ್ಚ ಮೇರೆನ ಪುದರ್ ಡ್ಕೊರ್ಪುನ ಮಂಡೆಚ್ಚ ಪ್ರಶಸ್ತಿನ್ ಈ ವರ್ಸ ಖ್ಯಾತ ಯಕ್ಷಗಾನ ಕಲಾವಿದ ನಿಡ್ಲೆ ಗೋವಿಂದ ಕೊರೊಂದುಲ್ಲೆರ್.
ಧರ್ಮಸ್ಥಳ ಲಲಿತಕಲಾ ಕೇಂದ್ರದ ಸುರುತ ತಂಡದ ವಿದ್ಯಾರ್ಥಿಯಾದ್ ಸೇರಿಬೊಕ್ಕ ಗೋವಿಂದ ಭಟ್ರ್ ಕುರಿಯ ವಿಠ್ಠಲ ಶಾಸ್ತ್ರಿ ಬೊಕ್ಕ ಪಡ್ರೆ ಚಂದು ಮೇರೆನ ಶಿಷ್ಯರಾಯೆರ್ . ಧರ್ಮಸ್ಥಳ, ಕೊಲ್ಲೂರು, ವೇಣೂರು, ಮುಂಬೈ ಗೀತಾಂಬಿಂಕಾ ಯಕ್ಷಗಾನ ಮಂಡಳಿ, ಸುಬ್ರಹ್ಮಣ್ಯ, ಬಪ್ಪನಾಡು, ಪುತ್ತೂರು, ಕರ್ನಾಟಕ ಮೇಳಗಡ್ 43 ವರ್ಸದ ನಿರಂತರ ತಿರುಗಾಟ. ಧರ್ಮಸ್ಥಳ ಮೇಳ ಒಂಜೆಟೇ 3೦ ವರ್ಸ ಸೇವೆ. ಪೌರಾಣಿಕ ಪ್ರಸಂಗದ ಮಾತಾ ವೇಷ ಮಲ್ದಿನ ಅನುಭವಿ. ನಾಟಕೀಯ ರಾವಣ, ಹಿರಣ್ಯಾಕ್ಷ, ಇಂದ್ರಜಿತು, ಮೈರಾವಣ, ಕೌರವ, ಅರ್ಜುನ, ಕರ್ಣ, ಜಮದಗ್ನಿ, ದಕ್ಷ, ಕಂಸ, ಕೌಂಡ್ಲಿಕ, ಮಹಿಷಾಸುರ, ಧರ್ಮಸ್ಥಳ ಕ್ಷೇತ್ರ ಮಹಾತ್ಮೆದ ಬ್ಯಾರಿ ಪಾತ್ರಡ್ ಆರ್ ಪುಗಾರ್ತೆ ಪಡೆತೆರ್. ಕೃಷಿಕರಾದ್ ಇಪ್ಪುನ ನಿಡ್ಲೆ ಗೋವಿಂದ ಭಟ್ರ್ ಕರಿನ 40 ವರ್ಸಡ್ ಮರಿಯಾಲಡ್ ತನ್ನನೇ ನಿಡ್ಲೆ ಮೇಳದ ಒರುಟು ಆಟನ್ ಬೇತೆ ಬೇತೆ ರಾಜ್ಯಗ್ ಕೊನೊತೆರ್. , ಆತೆ ಅತ್ತಾಂದೆ ಅವೆತೋ ಕಲಾವಿದೆರೆಗ್ ಅನ್ನದಾತರಾದ್ ಉಲ್ಲೆರ್ . ಇತ್ತೆ ಅತಿಥಿ ಕಲಾವಿದೆರಾದ್ ಆಟಲೆಡ್ ಪಾಲ್ ಪಡೆಪೆರ್ .
ಅವೆತೋ ಪ್ರಶಸ್ತಿ, ಮಾನಾದಿಗೆ ಪಡೆತಿನ ಗೋವಿಂದ ಭಟ್ರ್ ಮಂಡೆಚ್ಚ ಪ್ರಶಸ್ತಿನ್ ಅಕ್ಟೋಬರ್ 31 ತಾನಿ ಇರಾ ಕುಂಡಾವು ಶ್ರೀ ಸೋಮನಾಥೇಶ್ವರ ದೇವಸ್ಥಾನಡ್ ನಡಪರೆ ಇಪ್ಪುನ ಕಲ್ಲಾಡಿ ವಿಠಲ ಶೆಟ್ಟಿ ಸಂಸ್ಮರಣ ಕಾರ್ಯಕ್ರಮಡ್ ಕೊರ್ಪುನು ಪಂದ್ ಪ್ರಕಟನೆ ತೆರಿಪಾದೆರ್ .