ಪೊಲೀಸ್

ನಿವೃತ್ತ ಪೊಲೀಸೆರೆಗ್ ಆರೋಗ್ಯ ಭಾಗ್ಯ ಯೋಜನೆ

ಒಡಿಪು , ಎ.3: ನಿವೃತ್ತ ಪೊಲೀಸೆರೆಗ್ ಪೇಂಟೆದ ಪ್ರಮುಖ ಆಸ್ಪತ್ರೆಡ್ ಆರೋಗ್ಯ ಭಾಗ್ಯ ಯೋಜನೆದ ಪ್ರಯೋಜನ ತಿಕ್ಕೊಡು ಪಂದ್ ಸಶಸ್ತ್ರ ಮೀಸಲು ಪಡೆತ ನಿವೃತ್ತ ಸಹಾಯಕ ಪೊಲೀಸ್ ಉಪನಿರೀಕ್ಷಕೆರಾಯಿನ ಎ. ಚಂದ್ರಶೇಖರ್ ಪಂಡೆರ್ .

ಶುಕ್ರವಾರ ಪೇಂಟೆದ ಪೊಲೀಸ್ ಕವಾಯತು ಮೈದಾನ (ಚಂದು ಮೈದಾನ)ಡ್ ಉಡುಪಿ ಜಿಲ್ಲಾ ಪೊಲೀಸ್ ಇಲಾಖೆರ್ದ್ ನಡತಿನ ಕರ್ನಾಟಕ ರಾಜ್ಯ ಪೊಲೀಸ್ ಧ್ವಜ ದಿನಾಚರಣೆಡ್ ಮಲ್ಲ ಬಿನ್ನೆರ್ ಆದ್ ಪಾಲ್ ಪಡೆದ್ ಮಾನದಿಗೆ ದೆತೊಂದು ಪಾತೆರಿಯೆರ್.

ನಿವೃತ್ತ ಪೊಲೀಸೆರೆಗ್ ಆರೋಗ್ಯ ಭಾಗ್ಯ ಯೋಜನೆ ಕೆಲವು ನಿಗದಿತ ಆಸ್ಪತ್ರೆಡ್ ಮಾತ್ರ ಚಿಕಿತ್ಸೆ ತಿಕ್ಕೊಂದು ಉಂಡು , ಆಂಡ ಮಾತಾ ಆಸ್ಪತ್ರೆಡ್ ಲಾ ಚಿಕಿತ್ಸೆ ಬೋಡು ಪಂಡ ಅವು ಸಾಧ್ಯ ಇಜ್ಜಿ ಈ ನೆಲೆಟ್ಟ್ ಪೊಲೀಸ್ ವರಿಷ್ಠಾಧಿಕಾರಿಲು ಗಮನ ಕೊರೊಡು ಪಂದ್ ಚಂದ್ರಶೇಖರ್ ಬಿನ್ನಾಪು ಮಲ್ತೆರ್.

ಪೊಲೀಸ್ ದಕುಲುಲ ಗೊಬ್ಬಾಯೆರ್ ಬಪ್ಪನಾಡ್ ಮೇಳದ ಯಕ್ಷಗಾನ ಸೇವೆ

ಮುಲ್ಕಿ : ಏಪಲಾ ಡ್ಯೂಟಿಡೇ ಬ್ಯುಸಿ ಆದುಪ್ಪುನ ಮುಲ್ಕಿ ಪೊಲೀಸ್ ಸ್ಟೇ ಶನ್ ದ ಅಧಿಕಾರಿಲು, ಸಿಬ್ಬಂದಿಲು ಅಂಗಾರೆ ಬಯ್ಯಡ್ ಯೂನಿಫಾರ್ಮ್ ದೆತ್ತ್ ದ್ ಬೊಲ್ದು ಲುಂಗಿ, ಬೊಲ್ದು ಅಂಗಿ ಬೊಕ್ಕ ಶಾಲ್ ಪಾಡ್ದ್ ಕುಸಿಟ್ಟ್ ಇತ್ತೆರ್.
ದಾಯೆ ಪಂಡ ಏಪದಲೆಕ್ಕಾಂಡ ಅಕುಲು ಆಟ, ನೇಮ ಆಪಿನವುಲು ರಕ್ಷಣೆದ ಬೇಲೆ ಮಲ್ತೊಂದುಪ್ಪುವೆರ್. ಆಂಡ ಇನಿ ಅಕುಲೇ ಒಟ್ಟು ಸೇರ್ದ್ ಬಪ್ಪನಾಡ್ದ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ವಠಾರೊಡು ಬಪ್ಪನಾಡ್ ಮೇಳದ ಆಟ ಗೊಬ್ಬಾದಯೆರ್.

ಶ್ವೇತ ಕುಮಾರನ ಶಿವ ಭಕ್ತಿನ್ ತೆರಿಪಾವುನ
ಓಂ ನಮಃ ಶಿವಾಯ  ಪನ್ಪಿನ ಯಕ್ಷಗಾನದ ಪ್ರದರ್ಶನೊನು ಮುಲ್ಕಿ ಸ್ಟೇಶನ್ ದಕಲೆನ ಸೇವೆ ಆಟ ಆದ್ ಮೇಳದಕುಲು ಗೊಬ್ಬುದು ತೋಜಪಾಯೆರ್.ಬೆದ್ರ ಕೋರ್ಟ್ ದ ನ್ಯಾಯಮೂರ್ತಿ ಯಶವಂತ್ ದಂಪತಿ ಸಮೇತ ಬತ್ತಿತ್ತೆರ್. ಎಸಿಪಿ ಬೆಳ್ಳಿಯಪ್ಪೆರ್, ಇನ್ ಸ್ಪೆಕ್ಟರ್ ಕುಸುಮೋದರ್, ಎಸ್ ಐ ವಿನಾಯಕ ತೋರಗಲ್, ಎಎಸ್ ಐ ಚಂದ್ರಶೇಖರ್, ನಿವೃತ್ತ ಹೆಡ್ ಕಾನ್ ಸ್ಟೇಬಲ್ ಚಂದಪ್ಪ ಬೊಕ್ಕ ಮುಲ್ಕಿ ಠಾಣೆದ ೪೫ ಸಿಬ್ಬಂದಿ ನಕುಲು ಪಾಲ್ ಪಡೆದಿತ್ತೆರ್.ಮುಲ್ಕಿ ನಗರಸಭೆತ್ತ ಗುರ್ಕಾರ್ಲು ಸುಭಾಷ್ ಶೆಟ್ಟಿ, ಒತ್ತು ಗುರ್ಕಾರ್ಲು ಸತೀಶ್ ಅಂಚನ್, ಉದ್ಯಮಿಲು ಉದಯಕುಮಾರ್ ಶೆಟ್ಟಿ, ರಮಾನಾಥ ಪೈ ಮೊಕುಲು ಮಾತ ಬತ್ತಿತ್ತೆರ್.