ಒಡಿಪು

ಮಲ್ಪೆ ಪಡುಕೆರೆ ಪ್ರದೇಶಗ್ ಒಡಿಪು ಜಿಲ್ಲಾಧಿಕಾರಿ ಜಿ.ಜಗದೀಶ್ ಭೇಟಿ

ಒಡಿಪು , ಮೇ 17: ಚಂಡಮಾರುತದ ಪ್ರಭಾವ ಜಿಲ್ಲೆಡ್ ಮಸ್ತ್ ಪರಿಣಾಮ ಬೂರ್ದುಂಡು . ನೇರ್ದಾವರ ಸಾರ್ವಜನಿಕ ಬೊಕ್ಕ ಖಾಸಗಿ ಆಸ್ತಿಪಾಸ್ತಿಲೆಗ್ ಬಾರಿ ನಷ್ಟ ಆತುಂಡು . ಜಿಲ್ಲೆಡ್ ಇತ್ತೇ ಮುಟ ಒಟ್ಟು 36 ಇಲ್ಲಗ್ ಹಾನಿಯಾತುಂಡು ಪಂದ್ ಒಡಿಪು ಜಿಲ್ಲಾಧಿಕಾರಿ ಜಿ.ಜಗದೀಶ್ ತೆರಿಪಾದೆರ್ .

ತೌಕ್ತೆ ಚಂಡಮಾರುತರ್ದ್ ಹಾನಿಯಾತಿನ ಮಲ್ಪೆ ಪಡುಕೆರೆ ಪ್ರದೇಶಗ್ ಐತಾರ ಭೇಟಿ ಕೊರ್ದು ಪರಿಶೀಲನೆ ನಡಪಾಯಿನ ಬೊಕ್ಕ ಆರ್ ಮಾಧ್ಯಮದಕ್ಲೇನೊಟ್ಟಿಗೆ ಪಾತೆರಿಯೆರ್ .

ಸುಮಾರ್ 60 ಜನನ್ ಸುರಕ್ಷಿತ ಜಾಗೆಗ್ ಕಡಪಾದೆರ್ ಐತ ಪ್ರಕಾರ, ಮಾತೆರ್ಲ ಅಕ್ಲೆನ ಇಲ್ಲಗ್ ಪೋಯೆರೆ ಸೂಚನೆ ಕೊರ್ತೆರ್ .

ಸರ್ಬಾನಂದ ಸೋನೊವಾಲ್ ರಾಜೀನಾಮೆ

ಗುವಾಹಟಿ, ಮೇ 10: ನಿರ್ಗಮನ ಮುಖ್ಯಮಂತ್ರಿ ಸರ್ಬಾನಂದ ಸೋನೊವಾಲ್ ಐತಾರ ರಾಜ್ಯಪಾಲ ಜಗದೀಶ್ ಮುಖಿ ಮೆರೆಗ್ ರಾಜೀನಾಮೆ ಕೊರ್ತೆರ್ .

ಸೋನೊವಾಲ್ ಮೇರ್ ಪಕ್ಷದ ಉನ್ನತ ನಾಯಕೇರ್ನೋಟ್ಟಿಗೆ ಚರ್ಚೆ ಮಲ್ಪರೆ ಶನಿವಾರ ದಿಲ್ಲಿಗ್ ಪೋದಿತ್ತೆರ್ . ದಿಲ್ಲಿಡ್ ಗೃಹ ಸಚಿವ ಅಮಿತ್ ಶಾ ಬೊಕ್ಕ ಪಕ್ಷದ ಗುರ್ಕಾರ್ಲಾಯಿನ ಜೆ.ಪಿ.ನಡ್ಡಾ ಮೆರೆನ್ ಭೇಟಿಯಾದ್ ರಾಜ್ಯ ನಾಯಕತ್ವದ ವಿಚಾರವಾದ್ ಚರ್ಚೆ ಮಲ್ತಿತ್ತೆರ್ .

ಅಸ್ಸಾಂ ದ ದುಂಬುದ ಮುಖ್ಯಮಂತ್ರಿ ಸ್ಥಾನಗಾದ್ ಸೋನೊವಾಲ್ ಬೊಕ್ಕ ಪ್ರಭಾವಿ ನಾಯಕ ಹಿಮಂತ ಬಿಸ್ವಾ ಶರ್ಮಾ ನಡುಟು ತೀವ್ರ ಪೈಪೋಟಿ ಆತುಂಡು .

ಒಡಿಪುಡು ಯಶೋಧ ಅಟೋ ಯೂನಿಯನ್ ರ್ದ್ ಉಚಿತ ರಿಕ್ಷಾ ಸೇವೆಗ್ ಚಾಲನೆ

ಒಡಿಪು , ಮೇ 5: ಕೋವಿಡ್ ಕರ್ಫ್ಯೂ ನೆಲೆಟ್ಟ್ ಕೋವಿಡ್ ಸೇರಿನಂಚ ಮಾತಾ ರೀತಿದ ವೈದ್ಯಕೀಯ ಚಿಕಿತ್ಸೆಗಾದ್ ಉಡುಪಿದ ಯಶೋಧ ಅಟೋ ಯೂನಿಯನ್ ಅಟ್ಟನೆ ಮಲ್ದಿನ ಉಚಿತ ಅಟೋ ಸೇವೆಗ್ ಒಡಿಪು ಜಿಲ್ಲಾಧಿಕಾರಿ ಜಿ.ಜಗದೀಶ್ ಕೋಡೆ ಜಿಲ್ಲಾಧಿಕಾರಿ ಕಚೇರಿ ಆವರಣಡ್ ಚಾಲನೆ ಕೊರಿಯೆರ್ .

ಯೂನಿಯನ್ ಗುರ್ಕಾರ್ಲಾಯಿನ ಕೆ.ಕೃಷ್ಣಮೂರ್ತಿ ಪಾತೆರ್ದ್ , ಕೋವಿಡ್ ಕರ್ಫೂ ಪೊರ್ತುಡು ಕೊರೋನ ಪರೀಕ್ಷೆ, ಚಿಕಿತ್ಸೆ ಅಂಚನೇ ಮೆಡಿಕಲ್ ಸೇರಿನಂಚ ಬೇತೆ ಬೇತೆ ವೈದ್ಯಕೀಯ ಸೌಲಭ್ಯಗ್ ಪೋಪಿನ ನಾಗರಿಕೆರೆಗ್ ದಿನದ 24 ಗಂಟೆ ಉಚಿತ ಆಟೋ ಸೇವೆನ್ ಕೊರ್ಪಿನ ಉದ್ದೇಶ ಉಂಡು . ನೆಕ್ಕದ್ ಒಡಿಪು ನಗರ ಸಭೆತ ಮಾತಾ ವಾರ್ಡ್‌ಡ್ ಬೊಕ್ಕ ಕೈತಲ್ ದ ಗ್ರಾಮಡ್ 36 ಆಟೋಲೆನ್ ತಯಾರ್ ಮಲ್ದೆರ್.

ಹುಷಾರ್ ದಾoತೆ ತೀರ್ ಪೋಯೆರ್ ಹಿರಿಯ ಪತ್ರಕರ್ತೆ ಸುರೇಂದ್ರ ಶೆಟ್ಟಿ

ಕುಡ್ಲ, ಮೇ 04 : ಹಿರಿಯ ಪತ್ರಕರ್ತೆರ್, ಕನ್ನಡಪ್ರಭ ಕುಡ್ಲ ಬ್ಯೂರೊದ ಮಾಜಿ ಮುಖ್ಯಸ್ಥೆರ್ ಸುರೇಂದ್ರ ಶೆಟ್ಟಿ (57) ಮೇರ್ ಒಂತೆ ದಿನತ್ತ ಅನಾರೋಗ್ಯಡ್ ಅಂಗಾರೆದಾನಿ ಖಾಸಗಿ ಆಸ್ಪತ್ರೆಡ್ ತೀರ್ ಪೋಯೆರ್.

ಬ್ರಹ್ಮಾವರದ ಆವರ್ಸೆ ಪಡುಮನೆ ಮೂಲದ ಸುರೇಂದ್ರ ಶೆಟ್ಟಿ ಮಂಗಳೂರು ವಿಶ್ವವಿದ್ಯಾನಿಲಯದ ಸಮೂಹ ಸಂವಹನ ಬೊಕ್ಕ ಪತ್ರಿಕೋದ್ಯಮ ವಿಭಾಗೊಡು ಸ್ನಾತಕೋತ್ತರ ಪದವಿ ಪಡೆತೆರ್, ಮ್ಯಾಮ್ ಸಂಘಟನೆದ ಸ್ಥಾಪಕ ಗೌರವಾಧ್ಯಕ್ಷೆರ್ ಆದಿತ್ತೆರ್.

ಮುಂಗಾರು, ಸಂಯುಕ್ತ ಕರ್ನಾಟಕ, ಕನ್ನಡಪ್ರಭ, ವಿಜಯ ಕರ್ನಾಟಕ, ವಾರ್ತಾ ಭಾರತಿ ಇಂಚಿನ ಮಲ್ಲ ಮಲ್ಲ ಪತ್ರಿಕೆಲೆಡ್ ಕೆಲಸ ಮಲ್ದೆರ್ , ಇಂಚೊಗು ಕನ್ನಡಪರ ಪತ್ರಿಕೆದ ಕುಡ್ಲದ ಮುಖ್ಯಸ್ಥರಾದ್ ಕೆಲಸ ಮಲ್ತಿತ್ತೆರ್. ಆರ್ ಬುಡೆದಿ, ಮಗಲ್ ಬೊಕ್ಕ ಕುಟುಂಬಿಕೆ‌ರ್ ಅಂಚೆನೆ ಮಲ್ಲ ಸಂಖ್ಯೆದ ಮಾಧ್ಯಮ ಮಿತ್ರೆರೆನ್ ಬುರ್ದು ದೇವೆರೆ ಪಾದ ಸೇರ್ದೆರ್.