Tulu News

ಪಾಕಿಸ್ತಾನದ ಮಾಜಿ ಪ್ರಧಾನಿಗ್ 10 ವರ್ಷ ಜೈಲ್

ದೇಶದ ಗೌಪ್ಯತೆನ್ ಲೀಕ್ ಮಲ್ತಿನ ಕೇಸ್ ಡ್ ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಗ್ ನ್ಯಾಯಾಲಯವೊಂಜಿ 10 ವರ್ಷ ಜೈಲ್ ಶಿಕ್ಷೆನ್ ಕೊರ್ತುಂಡು.

ಈ ಬಗೆಟ್ಟ್ ಪಾಕಿಸ್ತಾನದ ಇಸ್ಲಾಮಾಬಾದ್ ಡ್ ಇಪ್ಪುನ ಇಸೇಸ ನ್ಯಾಯಾಲಯ ವಿಚಾರಣೆ ನಡಪಾಯಿನ ಬೊಕ್ಕ ಮಾಜಿ ಪ್ರಧಾನಿ ಬೊಕ್ಕ ಆರೆನ ನಿಕಟವರ್ತಿ ಆಯಿನ ಮಾಜಿ ಸಚಿವೆರ್ ಮೆಹಮೂದ್ ಖುರೇಸಿಗ್ 10 ವರ್ಷ ಜೈಲ್ ಶಿಕ್ಷೆ ಕೊರಿಯೆರೆ ಆದೇಶ ಕೊರ್ತುಂಡು.

ಅಸ್ಸಾಂಡ್ 200 ಕೋಟಿ ರೂ. ಬಿಲೆತ್ತ ಮೋದಿ ಪ್ರತಿಮೆ

ಅಸ್ಸಾಂ ಮೂಲದ ಉದ್ಯಮಿ ನವೀನ್ ಚಂದ್ರ ಬೋರಾ ಪ್ರಧಾನಿ ಮೋದಿನ ಅಭಿಮಾನಿ ಆತೆರ್.

ಮೇರ್ ತನ್ನ ಅಭಿಮಾನನ್ ತೂಪಾಯೆರೆ ಮೋದಿನ 190 ಅಡಿ ಎತ್ತರದ ಪ್ರತಿಮೆನ್ ಸ್ಥಾಪನೆ ಮಲ್ಪೆರೆ ನಿರ್ಧಾರ ಮಲ್ದೆರ್. ಅಯಿಕ್ಕಾದ್ ಸುಮಾರ್ 200 ಕೋಟಿ ರೂ. ಕರ್ಚಿ ಆಪುಂಡು.

ಗುವಾಹಟಿ ಕೈತಲ್ದ ಮೆರೆನ ಸ್ವಂತ ಜಾಗೆಡ್ ಮೋದಿ ವಿಗ್ರಹ ನಿರ್ಮಾಣನ್ ಮಲ್ಪೆರೆ ಉಲ್ಲೆರ್. ನೆಕ್ಕಾದ್ ಮೂಜಿ ದಿನ ಭೂಮಿ ಪೂಜೆ ಮಲ್ಪೆರೆ ಉಂಡು ಪಂದ್ ಮೇರ್ ಪೊಲಬು ಕೊರ್ತೆರ್.

ನೀರುಳ್ಳಿ ಕಿರಯ 1ಕೆಜಿಗ್ 3 ರೂಪಾಯಿ

ಕೆಲವು ತಿಂಗೊಲ್ದ ಪಿರವು ಇತ್ತಿನ ನೀರುಳ್ಳಿ ಕಿರಯ ಇತ್ತೆ ಒರಾನೆ ಕಮ್ಮಿ ಆತ್ಂಡ್.

ನೀರುಳ್ಳಿ ಕಿರಯ ಇತ್ತೆ ಮಾರ್ಕೆಟ್ ಡ್ 1ಕೆಜಿ ಕಿರಯ 3-4 ರೂಪಾಯಿ ಉಂಡು. ಇಂಚಾದ್ ಬಿಲೆ ಎಚ್ಚದ ನಿರೀಕ್ಷೆಡ್ ಇಪ್ಪುನ ರೈತೆರ್ ಕರಿನ 2 ದಿರ್ನೊದಿಂಚ ಕಾತ್ ಕುಲ್ಲುದೆರ್. ಎಡ್ಡೆ ನೀರುಳ್ಳಿ ಕಿರಯ ಕ್ವಿಂಟಾಲ್ ಗ್ 1500 ರೂ. ಉಂಡು.

ಫೆ.10: ವಸಾಯಿ ಸಾರ್ವಜನಿಕ ಶ್ರೀ ಶನೀಶ್ವರ ಸೇವಾ ಸಮಿತಿದ 25 ವರ್ಷದ ಶ್ರೀ ಸತ್ಯನಾರಾಯಣ ಪೂಜೆ, ಶ್ರೀ ಶನೀಶ್ವರ ಮಹಾಪೂಜೆ

ವಸಾಯಿ ಸಾರ್ವಜನಿಕ ಶ್ರೀ ಶನೀಶ್ವರ ಸೇವಾ ಸಮಿತಿದ 25 ವರ್ಷದ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ಶ್ರೀ ಶನೀಶ್ವರ ಮಹಾಪೂಜೆ ಫೆ.10 ಸನಿಯಾರ ವಸಾಯಿದ ದಿವಾನ್ ಮನ್ ತಲಾದ ಕೈತಲ್ದ ನವಯುಗ್ ನಗರಡ್ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಸ್ಥಾಪಕ ಗುರ್ಕಾರೆ ಜಯ.ಎಮ್ ಶೆಟ್ಟಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

RSS ಕಾರ್ಯಕರ್ತೆ ರಂಜಿತ್‌ ಕೇಸ್: SDPI, PFI ದ 15 ಕಾರ್ಯಕರ್ತೆರೆಗ್ ಗಲ್ಲುಶಿಕ್ಷೆ

ತಿರುವನಂತಪುರಂ: ರಾಷ್ಟ್ರೀಯ ಸ್ವಯಂ ಸೇವಕ (ಆರ್‌ ಎಸ್‌ ಎಸ್)‌ ಸಂಘದ ಕಾರ್ಯಕರ್ತೆ ರಂಜಿತ್‌ ಶ್ರೀನಿವಾಸನ್‌ ಕೆರಿನ ಕೇಸ್ ಡ್ ಆರೋಪಿ ಆಯಿನ ಎಸ್‌ ಡಿಪಿಐ ಬೊಕ್ಕ ಪಿಎಫ್‌ ಐದ 15 ಜನ ಕಾರ್ಯಕರ್ತೆರೆಗ್ ಕೇರಳದ ಆಲಪುಳ ಕೋರ್ಟ್‌ ಮರಣದಂಡನೆ ಶಿಕ್ಷೆ ವಿಧಿಸಾದ್ ಜ.30 ಅಂಗಾರೆ ತೀರ್ಪು ಪ್ರಕಟ ಮಲ್ದ್ಂಡ್.

2021 ತ್ತ ಡಿಸೆಂಬರ್‌ 19 ಕ್ಕ್ ಬಿಜೆಪಿದ ಒಬಿಸಿ ಮೋರ್ಚಾದ ರಾಜ್ಯ ಕಾರ್ಯದರ್ಶಿ, ಆರ್‌ ಎಸ್‌ ಎಸ್‌ ಕಾರ್ಯಕರ್ತೆ ಶ್ರೀನಿವಾಸನ್‌ ಮೆರೆನ್ ಇಲ್ಲಲೇ ಕುಟುಂಬ ಸದಸ್ಯೆರೆನ ಸಮ್ಮುಖಡ್ ಪಿಎಫ್‌ ಐ ಬೊಕ್ಕ ಎಸ್‌ ಡಿಪಿಐ ಕಾರ್ಯಕರ್ತೆರ್ ದಾಳಿ ನಡಪಾದ್ ಕೊಲೆ ಮಲ್ತ್ ಇತ್ತೆರ್.

ಎಸ್‌ ಡಿಪಿಐ ಮುಖಂಡೆ ಕೆಎಸ್‌ ಶಾನ್‌ ಡಿಸೆಂಬರ್‌ 18 ತ್ತ ರಾತ್ರೆ ಆಲಪುಳದ ಇಲ್ಲಗ್ ಪೋನಗ ಗುಂಪೊಂಜಿ ದಾಳಿ ನಡಪಾದ್ ಕೊಲೆ ಮಲ್ತಿನ ಕೆಲವೇ ಗಂಟೆದ ಬೊಕ್ಕ ಆರ್‌ ಎಸ್‌ ಎಸ್‌ ಕಾರ್ಯಕರ್ತೆ ಶ್ರೀನಿವಾಸನ್‌ ಮೆರೆನ ಕೊಲೆ ಘಟನೆ ನಡತ್ ಇತ್ತ್ಂಡ್.

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ದ ಮುತಾಲಿಕೆಡ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ದಕುಲು 37ನೇ ತಿಂಗೊಲ್ದ ಸೇವಾ ಯೋಜನೆ ಮುಕೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.

ಕುಡ್ಲ ತಾಲೂಕ್ ದ ಪಂಜಿಮೊಗರು ವಿದ್ಯಾನಗರ ನಿವಾಸಿ ಕಿರಣ್ ಶೆಟ್ಟಿ ಮೇರ್ 28/04/2022 ಕ್ಕ್ ಉರ್ವ ಮಾರಿಗುಡಿತ್ತ ಕೈತಲ್ದ ಕಟ್ವಾನದ ಕೆಲಸ ಮಲ್ಪುನಗ ರಡ್ಡನೇ ಮಾಳಿಗೆರ್ದ್ ಬೂರ್ದು ಇತ್ತೆಲ ಜೆತ್ತಿನಲ್ಪನೇ ಉಲ್ಲೆರ್.

ಅವೆತೋ ಲಕ್ಷ ಕಾಸ್ ಕರ್ಚಿ ಮಲ್ತ್ಂಡಲ ಸರಿಯಾದ್ ಗುಣ ಅವಂದೆ ಇತ್ತೆಲ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ಅಂಚಾದ್ ಆರೆನ ಆಸ್ಪತ್ರೆದ ಚಿಕಿತ್ಸೆಗ್ ಬೊಕ್ಕ ಜೀವನ ನಿರ್ವಹಣೆಗ್ ಮಸ್ತ್ ಕಾಸ್ ದ ಅವಶ್ಯಕತೆ ಉಂಡು ಪಂದ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಕೂಟಗ್ ಬಿನ್ನಾಪು ಸಂದಾದೆರ್. ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ 20,000/-ರೂ.ದ ಚೆಕ್ಕ್ ನ್ ರೇಣುಕಾ ಪ್ರಕಾಶ್ ಶೆಟ್ಟಿ ಮೆರೆನ ಸಮ್ಮುಖಡ್ ರಾಮ ಮಂದಿರ ಎಡಪದವುಡ್ ಕೊರಿಯೆರ್.

ಈ ಪೊರ್ತುಡು ಕೂಟದ ಗುರ್ಕಾರೆ ಸಂದೀಪ್ ಮಿಜಾರ್ ಪಾಲ್ ಪಡೆದಿತ್ತೆರ್.

ಮಾ.24: ಕುರ್ಲಾ ಪಶ್ಚಿಮ ಬಂಟರ ಭವನಡ್ ಕರ್ನಾಟಕ ಜಾನಪದ ನೃತ್ಯ ವೈಭವ ” ಸಾಂಸ್ಕೃತಿಕ ನೃತ್ಯ ಪಂತೊ

ಬೆಂಗ್ಲೂರು ಕರ್ನಾಟಕ ಜಾನಪದ ಪರಿಷತ್ತು (ರಿ.) ದ ‘ಮಹಾರಾಷ್ಟ್ರ ಘಟಕದ “ಕರ್ನಾಟಕ ಜಾನಪದ ನೃತ್ಯ ವೈಭವ ” ಸಾಂಸ್ಕೃತಿಕ ನೃತ್ಯ ಪಂತೊ ಮಾ.24 ಕ್ಕ್ ಕುರ್ಲಾ ಪಶ್ಚಿಮ ಬಂಟರ ಭವನಡ್ ನಡಪರೆ ಉಂಡು.

ಈ ಪಂತೊದ ನಿಯಮಲು:

1.ಪ್ರತೀ ಕೂಟಡ್ ಕಮ್ಮಿ ಪಂಡ 8 ನೃತ್ಯಗಾರೆರ್ ಇಪ್ಪೊಡು, ಗರಿಷ್ಟ ನಿರ್ಬಂಧ ಇಜ್ಜಿ.
2.ವರ್ಷದ ಮಿತಿಗ್ ನಿರ್ಬಂಧ ಇಜ್ಜಿ.
3.ಲಿಂಗ ತಾರತಮ್ಯ ಇಜ್ಜಿ
4. ನೃತ್ಯ ಕರ್ನಾಟಕ ಜಾನಪದ ಇಸಯಡ್ ಆದಿಪ್ಪೊಡು
5. ಕರ್ನಾಟಕದ ಮಾತ ಭಾಷೆಲೆಗ್ ಅವಕಾಶ ಉಂಡು.
6. 4-6 ನಿಮಿಷ ಮಾತ್ರ ಅವಕಾಶ
7. ಸುರುತ್ತ, ರಡ್ಡನೇ, ಮೂಜಿನೇ ಇನಾಮುಲು ಕ್ರಮವಾದ್, ತಲಾ 25 ಸಾರ,20 ಸಾರ ಬೊಕ್ಕ 15 ಸಾರ ನಗದು ಕೊರ್ದು ಮಾನಾದಿಗೆ ಮಲ್ಪೆರೆ ಉಂಡು
8. ಪಾಲ್ ಪಡೆಯಿನ ಮಾತ ಕೂಟಲೆಗ್ ಸರಿಯಾಯಿನ ಮಾನಾದಿಗೆ ಕೊರಿಯೆರೆ ಉಂಡು.
9. ನೆರ್ದ್ ದುಂಬುದ ನಿರ್ವಹಣೆದ ವಿಡಿಯೋ ಕ್ಲಿಪಿಂಗ್ ನ್ ಕಡಪಾವೊಡು.
10. ಒವ್ವೇ ಕಾರಣಗ್ಲಾ ನೃತ್ಯ ಕಲಾವಿದೆರೆನ ಪುನರಾವರ್ತನೆ ಆವೆರೆ ಬಲ್ಲಿ. ಒರಿಯಾಗ್ ಒರನೇ ಅವಕಾಶ, ಅತ್ತಂದೆ ಪದ್ಯ ಧ್ವನಿ ಮುದ್ರಿತನೇ ಆದಿಪ್ಪೊಡು, ಲೈವ್ ಗ್ ಅವಕಾಶ ಇಜ್ಜಿ
11‌.ನಿರ್ಣಾಯಕೆರೆನ ತೀರ್ಮಾನನೇ ಅಕೇರಿ
12.ಅಕೇರಿದ ಹಂತದ ಬದಲಾವಣೆದ ಮಾತ ಹಕ್ಕುಲೆನ್ ಸಂಘಟಕೆರೆಗ್ ಕೊರಿಯೆರೆ ಆಪುಂಡು.

ಅಂಚೆನೆ ಎಚ್ಚದ ಪೊಲಬುಗಾದ್ 9323822352,
9820370090, 9969812319, 9987959750 ಈ ನಂಬರ್ ಗ್ ಸಂಪರ್ಕ ಮಲ್ಪೊಲಿ ಪಂದ್
ಬೆಂಗ್ಲೂರು ಕರ್ನಾಟಕ ಜಾನಪದ ಪರಿಷತ್ತು (ರಿ.) ಬೆಂಗ್ಲೂರು, ಮಹಾರಾಷ್ಟ್ರ ಘಟಕ ತೆರಿಪಾದ್ಂಡ್.

ಕಲಾವಿದೆರೆನ್ ಶಿಕ್ಷಣ ಸಾಧಕೆರೆನ್ ಗುರುತಿಸಾವುನ ಬೇಲೆ ಮೆಚ್ಚುಡಾಯಿನವು: ಪಟ್ಲ ಸತೀಶ್ ಶೆಟ್ಟಿ

ಮುಲ್ಕಿ: ಸಂಘ ಸಂಸ್ಥೆಲು ಸಮಾಜ ಸೇವೆ, ಕಲೆ ಕಲಾವಿದೆರೆಗ್ ಮಾನಾದಿಗೆ ಬೊಕ್ಕ ಶಿಕ್ಷಣಡ್ ಸಾಧನೆ ಮಲ್ತಿನ ಪ್ರತಿಭೆಲೆಗ್ ಮಾನಾದಿಗೆ ಮಲ್ಪುನ ಬೇಲೆನ್ ಮೆಚ್ಚುಡಾಯಿನವು ಪಂದ್ ಯಕ್ಷ ಧ್ರುವ ಪಟ್ಲ ಫೌಂಡೇಶನ್ ದ ಗುರ್ಕಾರೆ ಪಟ್ಲ ಸತೀಶ್ ಶೆಟ್ಟಿ ಪಂಡೆರ್.

ಮೇರ್ ಕಿನ್ನಿಗೋಳಿ ಕೈತಲ್ದ ಕೊಡೆತ್ತೂರುಡ್ ನಡತಿನ ಕೊಡೆತ್ತೂರು ಆದರ್ಶ ಕೂಟದ ವಾರ್ಷಿಕೋಚ್ಚಯದ ಪೊರ್ತುಡು ನಡತಿನ ಯಕ್ಷಗಾನದ ಸಭಾ ಲೇಸ್ ಡ್ ಪಾತೆರಿಯೆರ್.

ಬೊಕ್ಕ ಪಾವಂಜೆ ಯಕ್ಷಗಾನ ಮೇಳದ ಕಲಾವಿದೆರ್ ಸಂದೇಶ ಮಂದಾರ, ವಗೆನಾಡು ಪ್ರಶಾಂತ್ ಶೆಟ್ಟಿ ಬೊಕ್ಕ ಸಮಾಜ ಸೇವಕಿ ವನಜ ಮೊಕ್ಲೆಗ್ ಸನ್ಮಾನ ನಡತ್ಂಡ್.

ಶೈಕ್ಷಣಿಕ ಸಾಧನೆ ಮಲ್ತಿನ ಕೈತಲ್ದ ಕಲ್ಪಾರ್ಥಿಲು ಅದೀತಿ ಅಮೀನ್, ದಿಕ್ಷೀತ್ ಕೋಟ್ಯಾನ್, ಗವಿದರ್ಶನ ಶೆಟ್ಟಿ, ಪ್ರೀತಿ ಎಸ್ ಕೋಟ್ಯಾನ್, ಶ್ರೇಯಾ ಆಚಾರ್ಯ, ಸುರಕ್ಷಾ ಶೆಟ್ಟಿಗ್ ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ದೇವಸ್ಯಮಠ ವೇದವ್ಯಾಸ ಉಡುಪ. ಕೆ.ವಿ ಶೆಟ್ಟಿ, ಕಿನ್ನಿಗೋಳಿ ಯುಗಪುರುಷದ ಭುವನಾಭಿರಾಮ ಉಡುಪ, ಪ್ರಕಾಶ್ ಶೆಟ್ಟಿ, ಜಯಂತ ಕರ್ಕೇರ, ನಿತಿನ್ ಶೆಟ್ಟಿ ಪಾಲ್ ಪಡೆದಿತ್ತೆರ್.

ದಾಮೋದರ ಶೆಟ್ಟಿ ಎದ್ಕೊನಿಯೆರ್. ರಿದಿ ಶೆಟ್ಟಿ ಸೊಲ್ಮೆ ಸಂದಾಯೆರ್. ಕೇಶವ ಕರ್ಕೇರ ಲೇಸ್ ದ ಸುಧಾರಿಕೆ ಮಲ್ತೆರ್. ಬೊಕ್ಕ ಪಾವಂಜೆ ಮೇಳದಕ್ಲೆರ್ದ್ ಆಟ ನಡತ್ಂಡ್.