ಬೇತೆ ಬೇತೆ ಕೇಸ್ ಡ್ ಶಿಕ್ಷೆಗ್ ಗುರಿಯಾದ್ ಜೈಲ್ ಸೇರಿನ ಪಾಕಿಸ್ತಾನದ ಮಾಜಿ ಪಿಎಂ ಇಮ್ರಾನ್ ಖಾನ್ ಬೊಕ್ಕ ಮಾಜಿ ವಿದೇಶಾಂಗ ಸಚಿವೆರ್ ಶಾ ಮೊಹಮ್ಮದ್ ಖುರೇಷಿಗ್ ಜೈಲ್ ಡ್ ಕೂಲಿ ಬೇಲೆ ಕೊರ್ತೆರ್.
ಆಂಡ ರಡ್ಡ್ ಜನಲ ಗಣ್ಯೆರ್ ಆಯಿನ ಕಾರಣ ಒರಿನ ಕೈದಿಲೆನೊಟ್ಟಿಗೆ ಬೇಲೆ ಮಲ್ಪೆರೆ ಇಜ್ಜಿ. ಅಡಿಗೆ ಇಲ್ಲ್, ಕೈತೋಟದ ಬೇಲೆನ್ ಮಲ್ಪೊಡು ಪಂದಿಜ್ಜಿ. ಈ ರಡ್ಡ್ ಜನನ್ ಒರಿನ ಕೈದಿಲೆರ್ದ್ ಬೇತೆನೇ ದೀದ್ ಉನ್ನತ ಸೌಕರ್ಯ ಕೊರ್ತೆರ್.
ಜಿಮ್ ಸಾಧನ, ಸ್ವತಃ ಅಡಿಗೆ ಮಲ್ತ್ ದ್ ವನಸ್ ತಿನ್ಪುನ ಸೌಕರ್ಯನ್ ಕೊರ್ತೆರ್.
ಜಮ್ಮು ಬೊಕ್ಕ ಕಾಶ್ಮೀರಡ್ ಹಿಮಪಾತ ಎಚ್ಚಾದ್ ಉಂಡು. ನೆರ್ದ್ ಮಲ್ಲ ಹಿಮದ ದಿಬ್ಬಲು ಬೆಟ್ಟರ್ದ್ ತೀರ್ತ್ ಬರ್ಪುನ ಅಪಾಯ ಉಂಡು ಪಂದ್ ರಾಜ್ಯ ವಿಪತ್ತು ನಿರ್ವಹಣಾ ಸಂಸ್ಥೆ ಎಚ್ಚರಿಕೆ ಕೊರ್ತುಂಡು.
ಬಂಡಿಪೋರ್, ಬಾರಾಮುಲ್ಲಾ, ಕುಪ್ವಾರ, ದೋಡಾ, ಕಿಶ್ತ್ವಾರ್, ಪೂಂಚ್, ರಾಂಬನ್ ಬೊಕ್ಕ ಗಂದರ್ ಬಾಲ್ ಜಿಲ್ಲೆದ ಜನಕ್ಲೆಗ್ ಎಚ್ಚರಿಕೆಡ್ ಇಪ್ಪೆರೆ ಸೂಚನೆ ಕೊರ್ತುಂಡು. ಅತ್ತಂದೆ ಭಾರೀ ಹಿಮಪಾತರ್ದ್ ಶ್ರೀನಗರ ಇಮಾನ ನಿಲ್ದಾಣಡ್ ಇಮಾನದ ಹಾರಾಟನ್ ಬಂದ್ ಮಲ್ದೆರ್.
ಅರಿತ್ತ ಕಿರಯ ನಿಯಂತ್ರಣ ಮಲ್ಪೆರೆ ಕೇಂದ್ರ ಸರ್ಕಾರ ಘೋಷಣೆ ಮಲ್ತಿನ ಭಾರತ್ ಅರಿ ಯೋಜನೆಗ್ ಇನಿ ಚಾಲನೆ ತಿಕ್ಕುಂಡು.
ಅಮೆಜಾನ್, ಫ್ಲಿಪ್ ಕಾರ್ಟ್ ಇಂಚಿನ ಇ-ಕಾಮರ್ಸ್ ತಾಣಡ್ ಅರಿನ್ ದೆತೊನೊಲಿ. ನೆತ್ತೊಟ್ಟಿಗೆ ನಾಫೆಡ, ಎನ್ ಸಿಸಿಎಫ್, ಕೇಂದ್ರೀಯ ಭಂಡಾರಲೆಡ್ಲಾ ಅರಿ ತಿಕ್ಕುಂಡು.
ಭಾರತ್ ಅರಿ 5 ಕೆಜಿ, 10 ಕೆಜಿ ಪ್ಯಾಕೆಟ್ ಡ್ ಮಾರಾಟ ಆಪುಂಡು. ಪ್ರತಿ ಕೆಜಿಗ್ 29 ರೂಪಾಯಿ ನಿಗದಿ ಮಲ್ದೆರ್. ಸುರುತ್ತ ಹಂತಡ್ 5 ಲಕ್ಷ ಟನ್ ಅರಿ ಬುಡುಗಡೆ ಮಲ್ಪೆರೆ ಕೇಂದ್ರ ಸರ್ಕಾರ ನಿರ್ಧಾರ ಮಲ್ದ್ಂಡ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 44ನೇ ಸಂಚಿಕೆ ಫೆ.6 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ಫೆ.7 ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ರೈಲ್ವೆ ಇಲಾಖೆದ ಬೇತೆ ಬೇತೆ ವಿಭಾಗಡ್ ಖಾಲಿ ಇಪ್ಪುನ 2860 ಅಪ್ರೆಂಟಿಸ್ ಬೇಲೆಗ್ ಅರ್ಜಿ ಸಂದಾವೊನ ಪ್ರಕ್ರಿಯೆ ಸುರು ಆತ್ಂಡ್.
50% ಮಾರ್ಕ್ ಡ್ 10ನೇ ಕ್ಲಾಸ್ ಡ್ ಪಾಸಾಯಿನಕುಲು ಬೊಕ್ಕ ಸಂಬಂಧಪಟ್ಟಿನ ಟ್ರೇಡ್ ಡ್ ITI ದೊಟ್ಟಿಗೆ ಇಂಟರ್ ಡ್ ಪಾಸಾಯಿನಕುಲು ಅರ್ಜಿ ಸಂದಾವೊಲಿ.
ತರಬೇತಿದ ಅವಧಿ ರಡ್ಡ್ ವರ್ಷ ಮುಟ್ಟ ಇಪ್ಪುಂಡು. ಆಸಕ್ತ ಅಭ್ಯರ್ಥಿಲು ಫೆ.28 ತ್ತೊಲಯಿ ಆನ್ ಲೈನ್ ಡ್ ಅರ್ಜಿ ಸಂದಾವೊಲಿ. ಎಚ್ಚದ ಪೊಲಬುಗಾದ್ ವೆಬ್ ಸೈಟ್: https://sr.indianrailways.gov.in/ ಗ್ ಸಂಪರ್ಕ ಮಲ್ಪೊಲಿ.
ಸುಳ್ಯ: ಸುಳ್ಯದ ನಾವೂರು ಮಾರ್ಗದ ಗಾಂಧಿನಗರದ ಕಾರಣಿಕ ಕ್ಷೇತ್ರ ಶ್ರೀ ಕಲ್ಕುಡ ದೈವೊಲ್ಯಡ್ ಪ್ರತಿ ವರ್ಷದಂಚೆನೆ ಫೆ.4 ಕ್ಕ್ ಬೊಲ್ಪುಗು ಶ್ರೀ ಕಲ್ಕುಡ, ಕಲ್ಲುರ್ಟಿ, ಗುಳಿಗ ದೈವೊಲೆನ ನೇಮೋಚ್ಚಯ ನಡಪರೆ ಉಂಡು.
ಈ ನೇಮೋಚ್ಚಯ ಬೊಲ್ಪುಗು ಸುರು ಆದ್ ಮಧ್ಯಾಹ್ನ ಮುಟ್ಟ ಇಪ್ಪುಂಡು.
ಈ ಲೇಸ್ ದ ಅಟ್ಟಣೆಗಾದ್ ಜ.27 ಕ್ಕ್ ಬೊಲ್ಪುಗು ಕೈಲ್ ಕಡ್ಪುನ ಲೇಸ್ ನಡತ್ಂಡ್. ಈ ಪೊರ್ತುಡು ದೈವೊಲ್ಯದ ಆಡಳಿತ ಧರ್ಮದರ್ಶಿಲು ಪಿ.ಕೆ.ಉಮೇಶ್ ಬೊಕ್ಕ ಮಂಡಳಿದ ಸದಸ್ಯೆರ್ ಹರೀಶ್ ಬೂಡುಪನ್ನೆ, ದೈವೊಲ್ಯದ ಪೂಜಾರಿ ತಿಮ್ಮಪ್ಪ ಗೌಡ ನಾವೂರು, ಮೋನಪ್ಪ ಪೂಜಾರಿ ಇತ್ತೆರ್.
ಭಾರತದ ಯೂನಿಫೈಡ್ ಪೇಮೆಂಟ್ಸ್ ಇಂಟರ್ ಫೇಸ್ (UPI) ಸೇವೆ ಇತ್ತೆ ಫ್ರಾನ್ಸ್ ಡ್ ಲ ತಿಕ್ಕುಂಡು.
ಪ್ಯಾರಿಸ್ ಪೇಂಟೆಡ್ UPI ಸೇವೆಗ್ ಚಾಲನೆ ಕೊರ್ತುಂಡು. ಭಾರತೀಯ ಪ್ರವಾಸಿಗೆರ್ UPI ಮುಕೇನ ಐಫೆಲ್ ಟವರ್ ಗ್ ಟಿಕೆಟ್ ದೆತೊನೊಲಿ.
ಭಾರತದ UPI ನ್ ಫ್ರಾನ್ಸ್ ಡ್ ಸುರು ಮಲ್ಪೆರೆ ಉಂಡು ಪಂದ್ ಪ್ರಧಾನಿ ಮೋದಿ ನೆರ್ದ್ ದುಂಬು ಘೋಷಣೆ ಮಲ್ತ್ ದಿತ್ತೆರ್. ಇತ್ತೆದ ಬುಲೆವಣಿಗೆಡ್ ಭಾರತದ UPI ಕಾರ್ಯನಿರ್ವಹಿಸಾವುನ ಸುರುತ್ತ ಯುರೋಪಿಯನ್ ರಾಷ್ಟ್ರ ಫ್ರಾನ್ಸ್ ಆತ್ಂಡ್.
ಬಂಟ್ವಾಳ: ನಾಗನ ವಳಚ್ಚಿಲ್ ಶ್ರೀ ದುರ್ಗಾಪರಮೇಶ್ವರೀ ಸೇವಾ ಸಮಿತಿದ 51ನೇ ವರ್ಷೊದ ಯಕ್ಷಗಾನೋಚ್ಚಯ “ಶ್ರೀ ದೇವಿ ಲಲಿತಾಂಬಿಕೆ” ಫೆ.17 ಸನಿಯಾರ ನಡಪರೆ ಉಂಡು.
ಈ ಯಕ್ಷಗಾನ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಪ್ರಸಾದಿತ ದಶಾವತಾರ ಯಕ್ಷಗಾನ ಮೇಳದಕ್ಲೆರ್ದ್ ನಡಪರೆ ಉಂಡು. ಆನಿ ಬಯ್ಯಗ್ ಮೇಳದ ದೇವೆರೆನ ಮಹಾಪೂಜೆ ಆದ್ ರಾತ್ರೆ ಸಾರ್ವಜನಿಕ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 45ನೇ ಸಂಚಿಕೆ ಫೆ.2 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ ಡ್ ಕಲ್ಪಾರ್ಥಿಯಾದ್ ಮಾಸ್ಟರ್ ಪನ್ನಗಶಯನ ಪಾಲ್ ಪಡೆತೆರ್. ಈ ಲೇಸ್ ಫೆ.3 ಸನಿಯಾರ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಡೆಂಗ್ಯೂ ಬೊಕ್ಕ ಮಲೇರಿಯಾ ಜ್ವರರ್ದ್ ಜವನೆಯೊರಿ ತೀರ್ ಪೋಯಿನ ಘಟನೆ ಕಡಬ ತಾಲೂಕ್ ದ ಕುಟ್ರುಪಾಡಿ ಗ್ರಾಮದ ವಿಮಲಗಿರಿಟ್ಟ್ ನಡತ್ಂಡ್.
ವಿಮಲಗಿರಿ ಕಲ್ಲೋಲಿಕ್ಕಲ್ ನಿವಾಸಿ ಶಿಜು ಕಲ್ಲೋಳಿಕಲ್ (31) ತೀರ್ ಪೋಯಿನಾರ್.
ಮೆರೆಗ್ ಐತಾರ ಜ್ವರ ಜೋರಾಯಿರ್ನೆದಾವೆರ ಕಡಬದ ಕ್ಲಿನಿಕ್ ಗ್ ಪೋನಗ ಡೆಂಗ್ಯೂ ಪತ್ತೆ ಆತ್ಂಡ್. ಮನದಾನಿ ಜ್ವರ ಕುಡಲ ಜಾಸ್ತಿಯಾದ್ ಎಚ್ಚದ ಚಿಕಿತ್ಸೆಗ್ ಕುಡ್ಲಗ್ ಲೆತೊಂದು ಪೋತೆರ್. ಆಂಡ ಆತ್ ಪೊರ್ತುಗು ಮೇರ್ ತೀರ್ ಪೋತೆರ್.
ಶಿಜು ಮಲಂಕರ ಕ್ಯಾಥೋಲಿಕ್ ಚರ್ಚ್ ಪುತ್ತೂರು ಧರ್ಮಪ್ರಾಂತ್ಯದ ರೆ.ಫಾ. ಥಾಮಸ್ ಕಲ್ಲೋಳಿಕಲ್ ಮೆರೆನ ಸಹೋದರೆ.
