ಕರ್ನಾಟಕ ಹೈಕೋರ್ಟ್ ದ ಪೊಸ ಮುಖ್ಯ ನ್ಯಾಯಮೂರ್ತಿಯಾದ್ ಗುಜರಾತ್ ಹೈಕೋರ್ಟುದ ನ್ಯಾಯಮೂರ್ತಿ ಎನ್.ವಿ.ವಿ ಅಂಜಾರಿಯಾ ಮೆರೆನ್ ನೇಮಕ ಮಲ್ತೆರ್.
ಇತ್ತೆ ಇತ್ತಿನ ನ್ಯಾಯಮೂರ್ತಿ ಪಿ.ಎಸ್ ದಿನೇಶ್ ಕುಮಾರ್ ಮೇರ್ ಫೆ.24 ಕ್ಕ್ ನಿವೃತ್ತರಾಯೆರೆ ಉಲ್ಲೆರ್. ಮೆರೆನ ತಾನಗ್ ಅಂಜಾರಿಯಾ ಮೆರೆನ್ ಸುಪ್ರೀಂಕೋರ್ಟ್ ಕೊಲಿಜಿಯಂ ಶಿಫಾರಸು ಮಲ್ದ್ಂಡ್. ಈ ಶಿಫಾರಸುಗ್ ಸರ್ಕಾರ ಗ್ರೀನ್ ಸಿಗ್ನಲ್ ಕೊರ್ತುಂಡು.
ಮುಲ್ಕಿ ಕೈತಲ್ದ ಆದಿ ಕಿಲ್ಲಾಡಿ ಶ್ರೀ ಧೂಮಾವತಿ ಬೊಕ್ಕ ಪರಿವಾರ ದೈವೊಲೆನ ದೈವೊಲ್ಯಡ್ ನೇಮೋಚ್ವಯ ಗೌಜಿಡ್ ನಡತ್ಂಡ್.
ಬೊಲ್ಪುಗು ಹೋಮ, ಚಪ್ಪರ ಮೂರ್ತ, ಬೊಕ್ಕ ಭಂಡಾರ ಜಪ್ಪುನ ಲೇಸ್, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಭಜನೆ, ಶ್ರೀ ಉಳ್ಳಾಯ ದೈವೊದ ನೇಮೋಚ್ಚಯ, ಮೈಸಂದಾಯ ದೈವೊದ ನೇಮೋಚ್ಚಯ, ಶ್ರೀ ಧೂಮಾವತಿ ಬೊಕ್ಕ ಬಂಟ ದೈವೊಲೆನ ನೇಮೋಚ್ಚಯ, ಶ್ರೀ ಪಂಜುರ್ಲಿ ದೈವೊದ ನೇಮೋಚ್ಚಯ ಆದ್ ಭಂಡಾರ ಪೊಂಡು.
ಈ ಪೊರ್ತುಡು ದೈವೊಲ್ಯಡ್ ಆಡಳಿತ ಮಂಡಳಿದ ಗುರ್ಕಾರೆ ರಂಗನಾಥ ಶೆಟ್ಟಿ, ಸತೀಶ್ ಕಿಲ್ಪಾಡಿ, ಯುವಕ ಮಂಡಲ, ಮಹಿಳಾ ಮಂಡಳಿದ ಸದಸ್ಯೆರ್, ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.
ಮುಲ್ಕಿ: ಕಿನ್ನಿಗೋಳಿ ಕೈತಲ್ದ ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯಡ್ ಮಾರ್ಚ್ ತಿಂಗೊಲ್ಡ್ ನಡಪರೆ ಇಪ್ಪುನ ದೈವೊದ ಪುನರ್ ಪ್ರತಿಷ್ಠೆ ಬೊಕ್ಕ ಬ್ರಹ್ಮಕಲಶ ಉಚ್ಚಯದ ಲೆಕ್ಕೊಡು ಕೊಡೆತ್ತೂರು ಭಂಡಾರ ಇಲ್ಲಲ್ ಅಟ್ಟಣೆದ ಸಭೆ ನಡತ್ಂಡ್.
ಬ್ರಹ್ಮಕಲಶ ಉಚ್ಚಯ ಯಶಸ್ವಿ ಮಲ್ಪುನ ದಿಟ್ಟಿಡ್ ಬೇತೆ ಬೇತೆ ಸಮಿತಿಲೆನ್ ರಚನೆ ಮಲ್ತ್ ದ್ ಅವೆತ್ತ ಮುಖ್ಯಸ್ಥೆರೆನ ಮುಕೇನ ಸಭೆ ನಡಪಾಯೆರೆ ಬೊಕ್ಕ ಅಕ್ಲೆಗ್ ಹೊಣೆಗಾರಿಕೆ ಕೊರಿಯೆರೆ ತೆರಿಪಾಯೆರ್. ಬೊಕ್ಕ ಲೆಪ್ಪೋಲೆನ್ ಕೊರ್ಪುನ ದಿಟ್ಟಿಡ್ ನಾಲ್ ಕೂಟ ಮಲ್ತೆರ್.
ಮೈಸೂರು ಛತ್ರಪತಿ ಶಿವಾಜಿ ಮಹಾರಾಜನ 397ನೇ ಜಯಂತಿ ಉಚ್ಚಯ ಸಮಿತಿ ಬೊಕ್ಕ ಜಿಲ್ಲಾಡಳಿತ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಒಟ್ಟುಸೇರಿಗೆಡ್ ಛತ್ರಪತಿ ಶ್ರೀ ಶಿವಾಜಿ ಮಹಾರಾಜೆರೆನ ಜಯಂತಿ ಉಚ್ಚಯ ಫೆ.19 ಸೋಮಾರ ನಡಪರೆ ಉಂಡು.
ನೆತ್ತ ಮೆರವಣಿಗೆ ಲೇಸ್ ದ ಉದಿಪನನ್ ಮೈಸೂರು ಮಹಾನಗರ ಪಾಲಿಕೆದ ಮಹಾಪೌರೆರ್ ಶಿವಕುಮಾರ್ ಮಲ್ಪೆರೆ ಉಲ್ಲೆರ್. ಈ ಮೆರವಣಿಗೆ ಬೊಲ್ಪುಗು ಕೋಟೆ ಆಂಜನೇಯಸ್ವಾಮಿ ದೇವಲ್ಯರ್ದ್ ಪಿದಾಡ್ದ್ ದೇವರಾಜ ಅರಸು ಮಾರ್ಗದ ಮುಕೇನ ಕಲಾಮಂದಿರಗ್ ಬರಿಯೆರೆ ಉಂಡು. ಬೊಕ್ಕ ಕಲಾಮಂದಿರಡ್ ಸಭಾ ಲೇಸ್, ಸುಗಮ ಸಂಗೀತ ನಡಪರೆ ಉಂಡು.
ಈ ಲೇಸ್ ದ ಉದಿಪನನ್ ಮೈಸೂರು ಜಿಲ್ಲಾ ಉಸ್ತುವಾರಿ ಸಚಿವೆರ್ ಹೆಚ್ ಸಿ ಮಹದೇವಪ್ಪ ಮಲ್ಪುವೆರ್. ಈ ಲೇಸ್ ದ ಗುರ್ಕಾರ್ಮೆನ್ ಚಾಮರಾಜ ಕ್ಷೇತ್ರದ ಶಾಸಕೆರ್ ಕೆ. ಹರೀಶ್ ಗೌಡ ಒಯಿಸೊನ್ವೆರ್.
ಮಲ್ಲ ಬಿನ್ನೆರಾದ್ ಮಾಜಿ ಶಾಸಕೆರ್ ಇ. ಮಾರುತಿರಾವ್ ಪವಾರ್ ಪಾಲ್ ಪಡೆಯೆರೆ ಉಲ್ಲೆರ್. ಮಂಡ್ಯ ಹಿರಿಯ ಸಾಹಿತಿ ಡಾ| ಪ್ರದೀಪ್ ಕುಮಾರ್ ಹೆಬ್ರಿ ಮುಖ್ಯ ಭಾಷಣ ಮಲ್ಪೆರೆ ಉಲ್ಲೆರ್.
ಅಂಚೆನೆ ಸಾಧಕೆರೆಗ್ ಸನ್ಮಾನ, ವನಸ್ ದ ವ್ಯವಸ್ಥೆ ಆದ್ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು ಪಂದ್ ಮೈಸೂರು ಜಯಂತಿ ಉಚ್ಚಯ ಸಮಿತಿ-2024 ದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಕುಂಪಲದ ಮಾರುತಿಮಠ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಲ್ಯಡ್ ಪ್ರತಿಷ್ಠಾ ವಾರ್ಷಿಕೋಚ್ಚಯ ಬೊಕ್ಕ ಹನುಮಾನ್ ಜಯಂತಿ ಎ.3-23 ಮುಟ್ಟ ನಡಪರೆ ಉಂಡು.
ಈ ಲೇಸ್ ದ ವೈದಿಕ, ಧಾರ್ಮಿಕ ವಿಧಿ ವಿಧಾನಲು ಉಚ್ಚಿಲತ್ತಾಯ ನೀಲೇಶ್ವರ ಬ್ರಹ್ಮಶ್ರೀ ಪದ್ಮನಾಭ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.
ಎ.2 ಅಂಗಾರೆ ಬೊಲ್ಪುಗು ಪ್ರಾರ್ತನೆ, ಅಶ್ವಥ ಕಟ್ಟೆಪೂಜೆ, ವಾಸ್ತು ಬಲಿ ನಡಪರೆ ಉಂಡು.
ಎ.3 ಬುದಾರ ಬೊಲ್ಪುಗು ಗಣಪತಿ ಹೋಮ, ಸಾನಿಧ್ಯ ಕಲಶ, ಅಶ್ವಥ ಉಪನಯನ, ಅಶ್ವಥ ಮರಕ್ಕ್ ಮದಿಮೆ, ಪ್ರತಿಷ್ಠಾ ವಾರ್ಷಿಕೋಚ್ಚಯ ಬೊಕ್ಕ ಸಾನಿಧ್ಯ ಕಲಶಾಭಿಷೇಕ, ಮಧ್ಯಾಹ್ನ ಮಹಾಪೂಜೆ, ಪ್ರಸಾದ ಪಟ್ಟುನ ಲೇಸ್, ಅನ್ನ ಪ್ರಸಾದ ಸೇವೆ, ರಾತ್ರೆ ರಂಗಪೂಜೆ ನಡಪರೆ ಉಂಡು.
ಎ.23 ಅಂಗಾರೆ ಬೊಲ್ಪುಗು ಜಯಂತಿ ಉಚ್ಚಯ, ಮಧ್ಯಾಹ್ನ ಹನುಮಾನ್ ದೇವೆರೆಗ್ ಮಹಾಪೂಜೆ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಹನುಮಾನ್ ದೇವೆರೆಗ್ ರಂಗಪೂಜೆ, ರಾತ್ರೆ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಅಂಚೆನೆ ಮಾ.24-30 ಮುಟ್ಟ ಬಯ್ಯಗ್ ಶನಿಪೂಜೆ ಸಪ್ತಾಹ ನಡಪರೆ ಉಂಡು.
ಈ ಮಾತ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆದ್ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಬಾಲಯೋಗಿ ಅಮೃತಾನಂದ ಸ್ವಾಮೀಜಿ ಲೆಪ್ಪೋಲೆಡ್ ತೆರಿಪಾದೆರ್.
ಒಡಿಪು: ಶಂಕರಮಠ ಕಾಲಬೈರವ ಸ್ವಾಮಿ ಸನ್ನಿಧಿಡ್ ಅಮಾವಾಸ್ಯೆ ಪೂಜೆ ಫೆ.9 ಸುಕ್ರಾರ ಬಯ್ಯಗ್ ನಡಪರೆ ಉಂಡು.
ಈ ಅಮಾವಾಸ್ಯೆದಾನಿ ಕಾಲಬೈರವನ್ ಪೂಜೆ ಮಲ್ಪುನೆರ್ದ್ ಸಾಲಬಾಧೆ, ಶತ್ರು ಪೋಡಿಗೆ, ಬೊರ್ಚಂದಿನ ಕರ್ಮ, ಸಾವುದ ಪೋಡಿಗೆ ಬೊಕ್ಕ ದೃಷ್ಟಿ ಬಾಧೆ, ಆರ್ಥಿಕ ಸ್ಥಿತಿ, ಆರೋಗ್ಯನ್ ಸುಧಾರಿಸಾವೊಲಿ ಪಂದ್ ದೇವಲ್ಯದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಜನಸಿರಿ ಫೌಂಡೇಷನ್ (ರಿ.) ದ ಮುತಾಲಿಕೆಡ್ ರಾಜ್ಯ ಮಟ್ಟದ ಕರುನಾಡ ಕಬಿಲೆನ ಸಂಭ್ರಮ-2024 ಲೇಸ್ ಫೆ.25 ಐತಾರ ಮಧ್ಯಾಹ್ನ ಬೆಂಗ್ಲೂರುದ ಬನ್ನೇರುಘಟ್ಟ ಶ್ರೀ ಸಾಯಿ ಸದ್ಭಾವನ ಶಾಲೆದ ಜಾಲ್ ಡ್ ನಡಪರೆ ಉಂಡು.
ಉಂದು ಕನ್ನಡ ನಾಡ್ ದ ಹಿರಿಮೆ, ಗರಿಮೆದ ಬಗೆಟ್ಟ್ 501 ಕಬಿಲೆರ್ದ್ 21 ನಿಮಿಷಡ್ ಕವನ ರಚನೆ ಮಲ್ಪುನ ಗೌಜಿದ ಲೇಸ್ ಆತ್ಂಡ್ ಪಂದ್ ಜನಸಿರಿ ಫೌಂಡೇಷನ್ (ರಿ.) ದ ಮುಖ್ಯಸ್ಥೆರ್ ನಾಗಲೇಖ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ತಣ್ಣೀರುಬಾವಿ ಬೀಚ್ ಡ್ ಅಪರೂಪದ ಆಲೀವ್ ರೆಡ್ ಲೇ ಏಮೆ 1985 ತ್ತ ಬೊಕ್ಕ ಉಂದುವೇ ಸುರುತ್ತ ಸರ್ತಿ ಸಾರರ್ದ್ ಎಚ್ಚ ತೆತ್ತಿ ದೀತ್ಂಡ್.
ಉಂದೆನ್ ಅರಣ್ಯ ಇಲಾಖೆ ಸಂರಕ್ಷಣೆ ಮಲ್ದೆರ್. ತೆತ್ತಿ ಕಿನ್ನಿ ಆಯಿನ ಬೊಕ್ಕ ಆವೆನ್ ಸುರಕ್ಷಿತವಾದ್ ಕಡಲ್ ಗ್ ಬುಡಿಯೆರೆ ಉಂಡು.
ಅರಣ್ಯ ಸಚಿವೆರ್ ಈಶ್ವರ ಖಂಡ್ರೆ ಮೇರ್ ತಣ್ಣೀರುಬಾವಿ ಕಡಲ್ ದ ಬರಿಕ್ಕ್ ಭೇಟಿ ಕೊರ್ದು ಸಂರಕ್ಷಣೆ ಮಲ್ತಿನ ಆಲೀವ್ ರೆಡ್ ಲೇ ಏಮೆ ತೆತ್ತಿದ ಜಾಗೆನ್ ತೂತೆರ್. ಈ ಅಪರೂಪದ ಏಮೆ ತೆತ್ತಿ ಸಂರಕ್ಷಣೆಗ್ ಅರಣ್ಯ ಸಿಬ್ಬಂದಿ ಒಯಿಸೊನ್ನ ಕಾಳಜಿನ್ ಸಚಿವೆರ್ ಮೆಚ್ಚಿದೆರ್.
ಮೀರಾರೋಡ್ ರಾಯರ ಬಳಗ ಭಜನಾ ಮಂಡಳಿದ ಮುತಾಲಿಕೆಡ್, ಕಲಿಯುಗದ ಕಾಮಧೇನು ಕಲ್ಪವೖಕ್ಪೆರಾಯಿನ ಮಂತ್ರಾಲಯದ ಗುರುಸಾರ್ವಭೌಮೆರೆನ ಪಟ್ಟಾಭಿಷೇಕ, ವರ್ಧಂತಿ ಉಚ್ಚಯದ ತಯಾರಿದ ಲೆಕ್ಕೊಡು ಬೊಂಬೈ ಮಹಾನಗರದ ತುಳು-ಕನ್ನಡ ಸಂಘ ಸಂಸ್ಥೆಲೆನ ಪೊಂಜೋವುಲೆಗಾದ್ ನಲಿಕೆ ಭಜನಾ ಪಂತೊ ಫೆ.25 ಐತಾರ ಮಧ್ಯಾಹ್ನ ಮೀರಾರೋಡ್ ಪೂರ್ವದ ಪೂನಂ ಸಾಗರಡ್ ಇಪ್ಪುನ ರಾಧಾಕೃಷ್ಣ ಸಭಾಂಗಣಡ್ ನಡಪರೆ ಉಂಡು.
ಈ ಲೇಸ್ ಸುಮಾರ್ ವಿಧಿ ವಿಧಾನದೊಟ್ಟಿಗೆ ಕಟಪಾಡಿ ಮಟ್ಟು ಸುಬ್ರಮಣ್ಯ ರಾವ್ ಮೆರೆನ ಪೌರೋಹಿತ್ಯಡ್ ನಡಪುಂಡು.
ಗುರುರಾಜೆರೆನ ಈ ಎಡ್ಡೆ ಲೇಸ್ ಡ್ ಗುರುರಾಜೆರೆನ ಭಕ್ತೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಮಂತ್ರಾಕ್ಷತೆನ್ ದೆತೊನೊಡು.
ಅಂಚೆನೆ ಲೇಸ್ ದ ಅಕೇರಿಡ್ ರಾತ್ರೆ ರಾಯರೆನ ಪ್ರಸಾದ ರೂಪವಾದ್ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಮೀರಾರೋಡ್ ರಾಯರ ಬಳಗ ಭಜನಾ ಮಂಡಳಿ ಲೆಪ್ಪೋಲೆಡ್ ಬಿನ್ನಾಪು ಮಲ್ದೆರ್.
ಮಂಜೇಶ್ವರ ರಾಷ್ಟ್ರಕವಿ ಗೋವಿಂದ ಪೈ ಸ್ಮಾರಕ ಸಮಿತಿ ಬೊಕ್ಕ ಜೈ ತುಲುನಾಡ್ (ರಿ.) ಕಾಸ್ರೋಡು ಎಗ್ಗೆದ ಒಟ್ಟುಸೇರಿಗೆಡ್ ಕೆಡ್ಡಸದ ಪೊರ್ಲು ತಿರ್ಲ್ ಲೇಸ್ ಫೆ.10 ಗಿಳಿವಿಂಡು ಮಂಜೇಶ್ವರಡ್ ನಡಪರೆ ಉಂಡು.
ಈ ಲೇಸ್ ನ್ ಮಂಜೇಶ್ವರ ಶಾಸಕೆರ್ ಎ.ಕೆ.ಎಂ ಅಶ್ರಫ್ ಉದಿಪನ ಮಲ್ಪೆರೆ ಉಲ್ಲೆರ್. ಈ ಲೇಸ್ ದ ಗುರ್ಕಾರ್ಮೆನ್ ಮಂಜೇಶ್ವರ ಗೋವಿಂದ ಪೈ ಸ್ಮಾರಕ ಸಮಿತಿದ ಕಾರ್ಯಂತೆರ್ ಉಮೇಶ್ ಸಾಲಿಯಾನ್ ಒಯಿಸೊನ್ವೆರ್. ಜೈ ತುಲುನಾಡ್ (ರಿ.) ದ ಪದುಕೆರ್ ವಿನೋದ ಪ್ರಸಾದ್ ರೈ ಬದಿಯಡ್ಕ ಕೆಡ್ಡಸದ ಪೊರ್ಲು ತಿರ್ಲ್ ದ ಬಗೆಟ್ಟ್ ಪೊಲಬು ಕೊರಿಯೆರೆ ಉಲ್ಲೆರ್.
ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಕೇರಳ ತುಲು ಅಕಾಡೆಮಿ ಗುರ್ಕಾರ್ಲು ಜಯಾನಂದ, ಮಂಜೇಶ್ವರ ಗ್ರಾಮ ಪಂಚಾಯತ್ ಗುರ್ಕಾರ್ಲು ಜೀನ್ ಲೆವಿನೋ ಮೊಂತೆರೊ, ಜೈ ತುಲುನಾಡ್ (ರಿ.) ಕೇಂದ್ರ ಸಮಿತಿದ ವಿಶು ಶ್ರೀಕೇರ ಪಾಲ್ ಪಡೆಯೆರೆ ಉಲ್ಲೆರ್.
ಜೈ ತುಲುನಾಡ್ (ರಿ.) ಕಾಸ್ರೋಡು ಎಗ್ಗೆದ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ, ಒತ್ತು ಗುರ್ಕಾರ್ಲು ಉಮೇಶ್ ಶಿರಿಯಾ ಒತ್ತು ಪಾಲ್ ಪಡೆಯೆರೆ ಉಲ್ಲೆರ್.
ಬೊಕ್ಕ ಉಮೇಶ್ ಶಿರಿಯಾ ಬರೆಯಿನ ದಾರಗೆದ ಕೂಟ ಬುಕು ಬುಡುಗಡೆನ್ ಬಹುಭಾಷಾ ಕಲಿಕಾ ಕೇಂದ್ರ ಕಣ್ಣೂರು ವಿಶ್ವವಿದ್ಯಾಲಯದ ಡೈರೆಕ್ಟರ್ ಡಾ.ಎ.ಎಂ ಶ್ರೀಧರ ಮಲ್ಪೆರೆ ಉಲ್ಲೆರ್.
