Tulu News

ಕೊರಗ ಭಾಷೆಡ್ ಸಾಮೂಹಿಕ ಮದಿಮೆದ ಲೆಪ್ಪೋಲೆ

ದಕ್ಷಿಣ ಕನ್ನಡ ಕೊರಗರ ಜಿಲ್ಲಾ ಸಂಘದ ಮುತಾಲಿಕೆಡ್ ತುಳುನಾಡ್ ದ ಮೂಲ ನಿವಾಸಿಲಾಯಿನ ಆದಿವಾಸಿ ಕೊರಗ ಸಮುದಾಯದ ಸಾಮೂಹಿಕ ಮದಿಮೆದ ಲೇಸ್ ಫೆ.11 ನಡತ್ಂಡ್. ಈ ಮದಿಮೆದ್ ಲೆಪ್ಪೋಲೆನ್ ಕೊರಗ ಭಾಷೆಡ್ ಅಚ್ಚಿ ಮಲ್ಪಾದ್ ತುಳುನಾಡ್ ದ ಪಿರಾಕ್ ದ ಬಾಷೆನ್ ಒರಿಪಾವುನ ಪ್ರಯತ್ನನ್ ಸಂಘಟಕೆರ್ ಮಲ್ದಿನವು ವಿಶೇಷ.

ಸುರತ್ಕಲ್ ಕುತ್ತೆತ್ತೂರುದ ಆದಿವಾಸಿ ಸಮುದಾಯ ಭವನಡ್ ಐತಾರ (ಫೆ.11) ಬೊಲ್ಪುಗು 11.15ಕ್ಕ್ ಒಟ್ಟು ಆಜಿ ಜೋಡಿ ಮದಿಮೆ ನಡತ್ಂಡ್.

ಕೊರಗ ಸಮುದಾಯ ತುಳುನಾಡ್ ದ ಮೂಲ ನಿವಾಸಿ ಸಮುದಾಯ ಆದ್ ತನ್ನನೇ ಆಯಿನ ಭಾಷೆನ್ ಒರಿತೊಂದು ಬೈದ್ಂಡ್. ಈ ಸಾಮೂಹಿಕ ಮದಿಮೆದ ಲೇಸ್ ದ ಲೆಪ್ಪೋಲೆನ್ ಕನ್ನಡ ಬೊಕ್ಕ ಕೊರಗ ಭಾಷೆಡ್ ಅಚ್ಚಿ ಮಲ್ದೆರ್.

ಕೊರಗ ಸಮುದಾಯದ ಸಂಪ್ರದಾಯದಂಚೆನೆ ಸಮುದಾಯದ ಗುರಿಕಾರೆರೆನ ಮುತಾಲಿಕೆಡ್ ಪೋಷಕೆರ್ ಮದಿಮೆಯೆ ಮಾದಿಮಾಲೆಗ್ ಧಾರೆ ಮೈತೆರ್.

ಮದುಮೆದ ಮಾತ ಸಂಪ್ರದಾಯ, ಆಚರಣೆನ್ ಸಮುದಾಯದ ಜನಕ್ಲೆ ಮಲ್ಪುನವು ಸಮುದಾಯದ ವಿಶೇಷತೆ ಆತ್ಂಡ್. ಮದಿಮೆ ಲೇಸ್ ಮಾಂಸಹಾರಿ ಬೊಕ್ಕ ಸಸ್ಯಹಾರಿ ವನಸ್ ದ ವ್ಯವಸ್ಥೆ ಇತ್ತ್ಂಡ್.

ಜಿಲ್ಲಾ ಕೊರಗ ಸಂಘದ ಮುತಾಲಿಕೆಡ್ ಆಯೋಜನೆ ಮಲ್ತಿನ 5ನೇ ವರ್ಷದ ಸಾಮೂಹಿಕ ವಿವಾಹ ಲೇಸ್ ಉಂದಾತ್ಂಡ್‌. ಮದಿಮೆ ಲೇಸ್ ಡ್ ಸುಮಾರ್ ರಡ್ಡ್ ಸಾರ ಜನ ಪಾಲ್ ಪಡೆಪ್ಪೆರ್ ಪಂದ್ ದಕ್ಷಿಣ ಕನ್ನಡ ಕೊರಗರ ಜಿಲ್ಲಾ ಸಂಘದ ಗುರ್ಕಾರೆ ಸುಂದರ ಬೆಳುವಾಯಿ ಮೇರ್ ತೆರಿಪಾದಿತ್ತೆರ್.

ಹರಿಪಾದೆ ಶ್ರೀ ಧರ್ಮದೈವ ಜಾರಂತಾಯ ದೈವೊಲ್ಯಡ್ ಗೌಜಿದ ನೇಮೋಚ್ಚಯ

ಮುಲ್ಕಿ: ಪಕ್ಷಿಕೆರೆ ಕೈತಲ್ದ ಪಂಜ ಕೊಯಿಕುಡೆ ಶ್ರೀ ಹರಿಪಾದೆ ಧರ್ಮದೈವ ಜಾರಂತಾಯ ದೈವೊಲ್ಯಡ್ ನೇಮೋಚ್ಚಯ ಗೌಜಿಡ್ ನಡತ್ಂಡ್.

ಕ್ಷೇತ್ರಡ್ ಧಾರ್ಮಿಕ ಲೇಸ್ ದ ಲೆಕ್ಕೊಡು ಜಾರಂತಾಯ ದೈವೊದ ಭಂಡಾರ ಪಿದಾಡುನ ಲೇಸ್, ಚೌತಿ ಪರ್ಬ, ತುಡರ ಬಲಿ, ಕೊಡಿ ಏರುನ ಲೇಸ್ ನಡತ್ಂಡ್. ಐತಾರ ತುಲಾಭಾರ ಸೇವೆ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ರಾತ್ರೆ ನೇಮೋಚ್ಚಯ ಗೌಜಿಡ್ ನಡತ್ಂಡ್.

ಈ ಪೊರ್ತುಡು ಧಾರ್ಮಿಕ ಪರಿಷತ್ ಮಾಜಿ ಸದಸ್ಯೆರ್ ಪಂಜ ಭಾಸ್ಕರ್ ಭಟ್, ದೈವೊಲ್ಯದ ಆಡಳಿತ ಮಂಡಳಿದ ಮೊಕ್ತೇಸರೆರ್ ನಲ್ಯಗುತ್ತು ಪ್ರಕಾಶ್ ಟಿ ಶೆಟ್ಟಿ, ಸದಸ್ಯೆರ್, ಭಕ್ತೆರ್ ಪಾಲ್ ಪಡೆದಿತ್ತೆರ್.

ಫೆ.14: ಬಿಲ್ಲವರ ಅಶೋಸಿಯೇಶನ್ ಬೊಂಬೈದ ಬಿವಂಡಿ ಲೋಕಲ್ ಆಫೀಸ್ ಡ್ 23 ನೇ ವರ್ಷದ ಗುರುಮೂರ್ತಿ ಪ್ರತಿಷ್ಠಾಪನೆದ ನೆಂಪು, ಸಾರ್ವಜನಿಕ ಸತ್ಯನಾರಾಯಣ ಮಹಾಪೂಜೆ

ಬಿಲ್ಲವರ ಅಶೋಸಿಯೇಶನ್ ಮುಂಬಯಿ ಬಿವಂಡಿ ಲೋಕಲ್ ಆಫೀಸ್ ಮುಲ್ಪ 23 ನೇ ವರ್ಷದ ಗುರುಮೂರ್ತಿ ಪ್ರತಿಷ್ಠಾಪನೆ ದ ನೆಂಪು ಬೊಕ್ಕ ಸಾರ್ವಜನಿಕ ಸತ್ಯನಾರಾಯಣ ಮಹಾ ಪೂಜೆದ ಲೇಸ್ ಉಂದುವೇ ಬರ್ಪಿನ ತಾರಿಕ್ 14 ಫೆಬ್ರವರಿ ಬುಧವಾರ ಕಾಂಡೆ ಗುರು ಮಂದಿರ ಡು ನಡಪೆರೆ ಉಂಡು.

ಅಂಚೆನೇ ವರ್ಷಾದ ಲೇಸ್ ತಾರಿಕ್ 17 ಪೆಬ್ರವರಿ 2024 ಶನಿವಾರ ಬಯ್ಯಗ್ 3 ಗಂಟೆಗ್, ಪ್ರೇಮ ತಾಯಿ ಸುರೇಶ್ ಪಾಟೀಲ್ ಮೈದಾನ ವಾರಳ ದೇವಿ ಮಾರ್ಗ ಪದ್ಮನಗರ ಬಿವಂಡಿ ಮುಲ್ಪ ನಡಪೆರೆ ಉಂಡು ಸಾಂಸ್ಕೃತಿಕ ಕಾರ್ಯಕ್ರಮ ದ ಒಟ್ಟಗೂ ಬಿನ್ನೆರೆ ಚಾವಡಿಡ್ ಸಾಧನೆ ಮಲ್ದಿನ ಸದಾಕೆರೆಗ್ ಮಾನದಿಗೆ ಅಂಚೆನೇ, ರಾತ್ರೆಡ್ ವನಸ್ ಆಯಿಬೊಕ್ಕ ರಂಗ ಭೂಮಿ ದ ಪುದರ್ ಪೋಯಿ ನಿರ್ದೇಸಕೆ ಜಗದೀಶ್ ಶೆಟ್ಟಿ ಕೆಂಚನ ಕೆರೆ ಮೆರೆನ ನಿರ್ದೇಶನೊಡು ಬಿವಂಡಿ ಲೋಕಲ್ ಆಫೀಸ್ ದ ಸದಸ್ಯೆರೆದ್ ” ಪಿರ ಬನ್ನಗ ” ಪನ್ಪಿನ ತುಳು ಹಾಸ್ಯಮಯಾ ನಾಟಕ ನಡಪೆರೆ ಉಂಡು.

ಅನಿದ ಲೇಸ್ ದ ಗುರ್ಕಾರ್ಮೆ ವಹಿಸೋನಿಯರೇ ಉಲ್ಲೆರ್ ಬಿಲ್ಲವರ ಅಸೋಸಿಯೇಶನ್ ಮುಂಬಯಿ ದ ಗುರ್ಕಾರೆ ಶ್ರೀ ಹರೀಶ್ ಜಿ ಅಮೀನ್. ಮಲ್ಲ ಬಿನ್ನೆರ್ ಅದ್ ಬಿಲ್ಲವ ಮಹಾ ಮಂಡಲದ ಗುರ್ಕಾರೆ ಶ್ರೀ ರಾಜ ಶೇಖರ್ ಕೋಟಿಯನ್. ಬೊಕ್ಕ ಭಾರತ್ ಕೋ ಅಪ್ ಬ್ಯಾಂಕ್ ಮುಂಬೈದ ಛೇರ್ಮನ್ ಶ್ರೀ ಸೂರ್ಯಕಾಂತ್ ಜಯ ಸುವರ್ಣ ಬರ್ರೆ ಉಲ್ಲೆರ್ ಅಂಚೆನೇ ಮಸ್ತ್ ಜನ ಮಾನದಿಗೆದ ಬಿನ್ನೆರ್ ಬರ್ರೆ ಉಲ್ಲೆರ್. ಈ ಮಾತ ಕಾರ್ಯಕ್ರಮ ಡು ತನೂಕುಲು ಮತಾ ಕುಟುಂಬ ಸಮೇತ ಬಾಗಿ ಆವೊಡು ಪಂದ್ ಬಿಲ್ಲವರ ಅಸೋಸಿಯೇಶನ್ ಮುಂಬಯಿ ಬಿವಂಡಿ ಲೋಕಲ್ ಆಫೀಸ್ ದ ಮಾನದಿಗೆದ ಗುರ್ಕಾರೆ ದೇವು ಪೂಜಾರಿ, ಗುರ್ಕಾರೆ. ರತ್ನಕರ್ ಜಿ ಪೂಜಾರಿ , ಒತ್ತು ಗುರ್ಕರೆ ಜಯಂತ್ ಸಾಲಿಯಾನ್, ಕಾರ್ಯದರ್ಶಿ. ಉದಯ ಡಿ ಸಾಲ್ಯಾನ್, ಪಣವುದ ಗುರ್ಕಾರೆ ಪ್ರಶಾಂತ್ ಆರ್ ಪೂಜಾರಿ, ಅಂಚೆನೇ ಕೂಟದ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್

ತುಳುನಾಡ ರಕ್ಷಣಾ ವೇದಿಕೆದ ಕೇಂದ್ರೀಯ ಮಂಡಳಿ ಗುರ್ಕಾರೆ ಯೋಗಿಶ್ ಶೆಟ್ಟಿ ಜಪ್ಪು, ಆರೋಗ್ಯ ಸಚಿವೆ ದಿನೇಶ್ ಗುಂಡೂರಾವ್ ನ್ ಭೇಟಿ ಆಯೆರ್

ಆಯುರ್ವೇದ ವೈದ್ಯೆರ್ ಕೊರೋನಾದ ಪೊರ್ತುಡು ನಮ್ಮ ಜೀವನ್ ಪಣಕ್ ದೀದ್ ರೋಗಿಲೆಗ್ ಎಡ್ಡೆ ಚಿಕಿತ್ಸೆ ಕೊರ್ದು ಅಕ್ಲೆಗ್ ಪೊಸ ಜೀವನ ಕಲ್ಪಿಸಾಯಿಸವುನಲ್ಪ ಗ್ರಾಮೀಣ ಭಾಗದ ಜನಕುಲು ಜೀವನಾಡಿಯಾದ್ ಸೇವೆ ಸಂದಾದೆರ್.

ಆಯುರ್ವೇದ ವೈದ್ಯೆರೆಗ್ ಸುರುತ್ತ ಹಂತದ ಚಿಕಿತ್ಸೆಡ್ ನಮ್ಮ ಮೂಲ ಪದ್ಧತಿದೊಟ್ಟಿಗೆ ಅವಶ್ಯಕ ಅಲೋಪತಿ ಔಷಧನ್ ಗಲಸಿಯೆರೆ ಬಲ್ಲಿ ಪನ್ಪುನ ರಾಜ್ಯ ಸರ್ಕಾರದ ಕಾನೂನು ಆಯುರ್ವೇದ ವೈದ್ಯೆರೆನ ವೃತ್ತಿ ಜೀವನನ್ ಸಂಕಷ್ಟಗ್ ತಿಕ್ಕಾದ್ಂಡ್ ಪಂದ್ ಆಯುರ್ವೇದ ವೈದ್ಯೆರ್ ನಕುಲು ತುಳುನಾಡ ರಕ್ಷಣಾ ವೇದಿಕೆ‌ದ ಮುಕೇನ ಸಹಕಾರ ಕೇಂದೆರ್.

ಈ ನಿಲೆಟ್ಟ್ ತುಳುನಾಡ ರಕ್ಷಣಾ ವೇದಿಕೆ ವೈದ್ಯೆರೆನ ಘಟಕದ ಮುತಾಲಿಕೆಡ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಪ್ರತಿಭಟನೆ ಸಭೆ ಬೊಕ್ಕ ಹಕ್ಕೊತ್ತಾಯ ಸಭೆನ್ ನಡಪಾದ್ ಜಿಲ್ಲಾಧಿಕಾರಿಲೆನ ಮುಕೇನ ಮುಖ್ಯಮಂತ್ರಿಲು ಆರೋಗ್ಯ ಸಚಿವೆರೆಗ್ ಸೇರ್ದ್ ಬಿನ್ನಾಪು ಸಂದಾದೆರ್. ಇತ್ತೆನೇ ನಮ್ಮ ದೇಶದ ಸುಮಾರ್ ರಾಜ್ಯಲೆಡ್ ಅಲ್ಪದ ರಾಜ್ಯ ಸರ್ಕಾರಲು ಆಯುರ್ವೇದ ವೈದ್ಯೆರೆಗ್ (B.A.M.S) ಅವಶ್ಯಕ ಅಲೋಪತಿ ಔಷಧನ್ ಕೊರಿಯೆರೆ ಅನುಮತಿ ಕೊರ್ತೆರ್.

ಆಯುರ್ವೇದ ವೈದ್ಯೆರ್ (B.A.M.S) ಪದವಿನ್ ಐನರೇ ವರ್ಷ ಕಲ್ತ್ ದ್, ಸರ್ಕಾರ ಮಾನ್ಯತೆ ಇಪ್ಪುನ ರಾಜೀವ್‌ಗಾಂಧಿ ಯುನಿರ್ವಸಿಟಿ ಬೊಕ್ಕ KAUP Board ಡ್ ಪದವಿನ್ ಪಡೆತೆರ್. (B.A.M.S) ಕೋರ್ಸ್‌ಡ್ ಆಯುರ್ವೇದದೊಟ್ಟಿಗೆ ಮಾಡರ್ನ್ ಮೆಡಿಕಲ್ ಸೈನ್ಸ್‌ನ್ ಕಲ್ಪಾದೆರ್. (6ತಿಂಗೊಲ್ ಕಡ್ಡಾಯ ತಾಲೂಕ್ ಸರ್ಕಾರಿ ಆಸ್ಪತ್ರೆಡ್ ಇಂಟರ್ನ್ ಶಿಪ್ ಬೊಕ್ಕ 6 ತಿಂಗೊಲ್ ಆಯುರ್ವೇದ ಚಿಕಿತ್ಸೆ ಪದ್ಧತಿಡ್ ಇಂಟರ್ನ್ ಶಿಪ್ ಮಲ್ದೆರ್.

ಕಾನೂನುಡ್ ಇಪ್ಪುನ ಅವಕಾಶನ್ ಗಲಸೊಂದು ರಾಜ್ಯದ ಆಯುಷ್ ವೈದ್ಯೆರೆಗ್ ಸುರುತ್ತ ಹಂತದ ಚಿಕಿತ್ಸೆಡ್ ನಮ್ಮ ಮೂಲ ಪದ್ಧತಿದೊಟ್ಟಿಗೆ ಅವಶ್ಯಕ ಅಲೋಪತಿ ಮಾರ್ದ್ ನ್ ಗಲಸೆರೆ ಇತ್ತೆನೇ ಮಹಾರಾಷ್ಟ್ರ ಸೇರಿನಂಚೆನೆ ಬೇತೆ ಸುಮಾರ್ ರಾಜ್ಯಲೆಡ್ ಇಪ್ಪುನ ಕಾನೂನುದಲೆಕ್ಕನೇ ತಿದ್ದುಪಡಿನ್ ಡ್ರಗ್ಸ್ ಆಂಡ್ ಕಾಸ್ಕೆಟಿಕ್ ಆಕ್ಟ್ (Drugs & cosmatics act 1940 Rule 2EE (iii) ದಲೆಕ್ಕ ನಮ್ಮ ರಾಜ್ಯಡ್ಲಾ ತಿದ್ದುಪಡಿ ಮಲ್ತ್ ದ್ ಜಾರಿಗ್ ಕನವೊಡು. ಬೊಕ್ಕ ಕರ್ನಾಟಕ ರಾಜ್ಯ ಆಯುರ್ವೇದ ಯುನಾನಿ ಬೋರ್ಡ್ ಬೊಕ್ಕ ಹೋಮಿಯೋಪತಿ ಬೋರ್ಡ್‌ದ ಕಾಯ್ದೆಡ್ ತಿದ್ದುಪಡಿ ಕನತ್ ಜಾರಿಗ್ ಕನವೊಡು ಪಂದ್ ಫೆ.9 ಕ್ಕ್ ಪೇಂಟೆದ ಸರ್ಕ್ಯೂಟ್ ಹೌಸ್‌ಡ್ ತುಳುನಾಡ ರಕ್ಷಣಾ ವೇದಿಕೆ ಕೇಂದ್ರೀಯ ಮಂಡಳಿ ಗುರ್ಕಾರೆ ಯೋಗಿಶ್ ಶೆಟ್ಟಿ ಜಪ್ಪು ಮೇರ್ ಆರೋಗ್ಯ ಸಚಿವೆರ್ ದಿನೇಶ್ ಗುಂಡುರಾವ್ ಮೆರೆಗ್ ಬಿನ್ನಾಪು ಸಂದಾದ್, ಸರಿಯಾಯಿನ ಕ್ರಮಗ್ ಒತ್ತಾಯ ಮಲ್ದೆರ್. ಬಿನ್ನಾಪುಗ್ ಎಡ್ಡೆ ರೀತಿಡ್ ಸ್ಪಂದಿಸಾಯಿನ ಸಚಿವೆರ್ ಪರಿಶೀಲನೆ ಮಲ್ಪುವೆ ಪಂದ್ ಭರವಸೆ ಕೊರಿಯೆರ್.

ನರಮಾನಿನ ಮೋನೆನ್ ಹೊಲುನ ಇಸೇಸ ಕೀಟ ಮಲ್ಪೆಡ್ ಪತ್ತೆ

ನರಮಾನಿನ ಮೋನೆನ್ ಹೊಲುವ ಇಸೇಸ ಕೀಟ ಮಲ್ಪೆಡ್ ಪತ್ತೆ ಆತ್ಂಡ್.

ಮಲ್ಪೆದ ಕೊಳ ಕೈತಲ್ದ ಯಶಸ್ವಿ ಮಂಜುಗಡ್ಡೆ ಸ್ಥಾವರಡ್ ಈ ಕೀಟ ತೋಜಿದ್ ಬೈದ್ಂಡ್. ನರಮಾನಿನ ಮೋನೆನ್ ಹೋಲುವ ಈ ಕೀಟ ತೂಪುನಕ್ಲೆನ ಗಮನ ಸೆಳೆತ್ಂಡ್.‌ ಕೈತಲ್ದಕುಲು ಮೊಬೈಲ್ ಡ್ ಈ ಚಿತ್ರನ್ ಪೋಟೋ ದೈದೆರ್.

ತರೆಟ್ಟ್ ಟೋಪಿ ಪಾಡಿಲೆಕ್ಕ ತೋಜುನ ಈ ಕೀಟ ರಡ್ಡ್ ಕಣ್ಣ್, ಮಲ್ಲ ಮೂಂಕುದ ತಿರ್ತ್ ಚಾರ್ಲಿ ಚಾಪ್ಲಿನ್ ಥರತ್ತ ಮೀಸೆ ಇಂಚ ದೂರರ್ದ್ ತೂಂಡ ನರಮಾನಿ ಮೋನೆದ ಕಲಾಕೃತಿದಂಚ ತೋಜುಂಡು. ಕೆಂಪು, ಮಂಜಲ್, ಕಿತ್ತಳೆ, ಕಂದು ಬಣ್ಣಡ್ ಇಪ್ಪುನ ಈ ಕೀಟ ಕಾಂಡೆದ ಪೊರ್ತುಡು ಸೂರ್ಯನ ಬೆಚ್ಚಗ್ ಶಾಖ ಹಿರೊಂದು ದೈನ್ ಎಚ್ಚಾದ್ ವಿಹರಿಸುಂಡು. ಉಂದೆನ್ ಹಿಟ್ಲರ್ ಕೀಟ ಪಂದ್ ಲೆಪ್ಪುವೆರ್. ಫೆಬ್ರವರಿರ್ದ್ ಮೇ ತಿಂಗೊಲ್ದ ಪೊರ್ತುಡು ಉಂದು ತೂಜಿದ್ ಬರ್ಪುಂಡು ಪಂದ್ ತಜ್ಞೆರ್ ತೆರಿಪಾದೆರ್.

ಪಾಕಿಸ್ತಾನಡ್ ಉಗ್ರೆರೆನ ದಾಳಿರ್ದ್ 12 ಜನ ತೀರ್ ಪೋಯೆರ್

ಸಾರ್ವತ್ರಿಕ ವೋಟುದ ನಡುಟ್ಟ್ ಪಾಕಿಸ್ತಾನಡ್ 51 ಭಯೋತ್ಪಾದಕ ದಾಳಿಲೆಡ್ 10 ಭದ್ರತಾ ಸಿಬ್ಬಂದಿ ಸೇರ್ದ್ 12 ಜನ ತೀರ್ ಪೋತೆರ್ ಬೊಕ್ಕ 39 ಜನಕ್ಕ್ ಪೆಟ್ಟಾತ್ಂಡ್ ಪಂದ್ ವರದಿಯೊಂಜಿ ತೆರಿಪಾದ್ಂಡ್.

ವೋಟುದ ಕ್ರಮನ್ ಅಡ್ಡಿ ಮಲ್ಪುನ ಉದ್ದೇಶರ್ದ್ ಕೆಪಿ ಬೊಕ್ಕ ಬಲೂಚಿಸ್ತಾನದ 51 ಭಯೋತ್ಪಾದಕೆರೆನ ದಾಳಿ ನಡತ್ ದ್ಂಡ್.

ಸೈನಿಕೆರ್ ದೃಢ ನಿಶ್ಚಯರ್ದ್ ಬೊಕ್ಕ ಪಾಕಿಸ್ತಾನ ಇಡೀ ಶಾಂತಿ ಬೊಕ್ಕ ಭದ್ರತೆನ್ ಕಾಪಾಡೊಂದೆರ್ ಪಂದ್ ವರದಿಯೊಂಜಿ ತೆರಿಪಾದ್ಂಡ್.

ಇನಿ ಮಂಡ್ಯ ಬಂದ್

ಕೆರಗೋಡುಡ್ ಹನುಮಧ್ವಜ ದೆತ್ತಿನೆನ್ ಖಂಡಿಸಾದ್ ಇನಿ ಹಿಂದೂಪರ ಸಂಘಟನೆಲು ಮಂಡ್ಯ ಬಂದ್ ಗ್ ಕರೆ ಕೊರ್ತುಂಡು.

ಕೆರಗೋಡು ಗ್ರಾಮರ್ದ್ ಮಂಡ್ಯದ ಜಿಲ್ಲಾಧಿಕಾರಿಲೆನ ಕಚೇರಿ ಮುಟ್ಟ ಮಲ್ಲ ಬೈಕ್ ರ್ಯಾಲಿ ನಡಪರೆ ಉಂಡು. ಬೈಕ್ ರ್ಯಾಲಿದ ಬೊಕ್ಕ ಜಿಲ್ಲಾಧಿಕಾರಿಲೆನ ಕಚೇರಿದಲ್ಪ ಬಿನ್ನಾಪು ಪತ್ರ ಸಂದಾಯೆರೆ ಉಂಡು.

ಸಾರ್ವಜನಿಕೆರೆಗ್ ತೊಂದರೆ ಆಯೆರೆ ಬಲ್ಲಿ ಪನ್ಪುನ ದೃಷ್ಟಿರ್ದ್ ಇನಿತ್ತ ಬಂದ್ ಗ್ ಬಿಜೆಪಿ ಬೊಕ್ಕ ಜೆಡಿಎಸ್ ಪಕ್ಷಲು ನೇರ ಬೆಂಬಲ ಕೊರ್ತಿಜಿ ಪಂದ್ ಬಿಜೆಪಿ ಮುಖಂಡೆರ್ ಅಶೋಕ್ ಜಯರಾಂ ಪೊಲಬು ಕೊರ್ತೆರ್.

ಸರಕಾರಿ ಲೇಸ್ ದ ಅಟ್ಟಣೆ ಸಭೆ

ತ್ರಿಪತ ಕವಿ ಸರ್ವಜ್ಞ ಜಯಂತಿ ಕಾರ್ಲ ನಡ್ಸಪ್ಪ ತಾಶಿಲ್ದಾರ್ ಮೆರೆನ ಗುರ್ಕಾರ್ಮೆಡ್ ಫೆ.20 ಕ್ಕ್ ನಡಪರೆ ಇಪ್ಪುನ ಸರಕಾರಿ ಲೇಸ್ ದ ಅಟ್ಟಣೆ ಸಭೆ ಇನಿ ಕಾರ್ಲ ತಾಲೂಕ್ ದ ಕಚೇರಿಡ್ ನಡತ್ಂಡ್.

ಹೊಸ್ಮರ್ ಬೊಕ್ಕ ಬೋಳ ಸಂಘಗ್ ನಿವೇಶನ ಸರ್ಕಾರರ್ದ್ ಕೊರಿಯೆರೆ ಚರ್ಚೆ ಮಲ್ತೆರ್.

ಈ ಪೊರ್ತುಡು ಕರಾವಳಿ ಕುಂಬಾರೆರೆನ ಯುವ ವೇದಿಕೆ ಗುರ್ಕಾರೆ ದಿವಾಕರ್ ಬಂಗೇರ, ಹೊಸ್ಮರ್ ಸಂಘದ ಗುರ್ಕಾರೆ ಪ್ರಮೋದ್ ಕುಲಾಲ್, ಸಂತೋಷ್ ಕುಲಾಲ್ ಹೊಸ್ಮರ್, ಬೋಳ ಸಂಘದ ಗುರ್ಕಾರೆ ಗಣೇಶ್ ಕುಲಾಲ್, ಮಾಧ್ಯಮ ಬಿಂಬ ವಸಂತ್ ಕುಮಾರ್, ಜಯರಾಮ್ ಕುಲಾಲ್ ಕೆರ್ವಶೆ, ಇನ್ನಾ ಗ್ರಾಮ ಪಂಚಾಯತ್ ಮಾಜಿ ಗುರ್ಕಾರೆ ಕುಶ ಆರ್ ಮೂಲ್ಯ ಇನ್ನಾ, ಮಾಜಿ ತಾಲೂಕ್ ಪಂಚಾಯತ್ ಒತ್ತು ಗುರ್ಕಾರೆ ಗೋಪಾಲ್ ಮೂಲ್ಯ ಮುಲ್ಲಡ್ಕ, ನಾನಿಲ್ತಾರ್ ಕುಲಾಲ ಸಂಘದ ಒತ್ತು ಗುರ್ಕಾರೆ ಜಗನ್ನಾಥ ಮೂಲ್ಯ ಬೆಳ್ಮಣ್, ದೀಪಕ್ ಬೆಳ್ಮಣ್ ಪಾಲ್ ಪಡೆದಿತ್ತೆರ್.

ಫೆ.9: ಉರ್ವ ಶ್ರೀ ಮಾರಿಯಮ್ಮ ದೇವಲ್ಯಗ್ ಪುದೆಕಾಣಿಕೆ ಮೆರವಣಿಗೆ

ಕುಡ್ಲ: ಉರ್ವ ಶ್ರೀ ಮಾರಿಯಮ್ಮ ದೇವಲ್ಯಡ್ ಫೆ.15 ಕ್ಕ್ ನಡಪರೆ ಇಪ್ಪುನ ಬ್ರಹ್ಮಕಲಶ ಉಚ್ಚಯಗ್ ಫೆ. 9 ಮಧ್ಯಾಹ್ನ 2:30 ಕ್ಕ್ ಸರಿಯಾದ್ ಶ್ರೀ ನಂದನೇಶ್ವರ ದೇವಸ್ಥಾನ ಪಣಂಬೂರುರ್ದ್ ಪುದೆಕಾಣಿಕೆ ಸಮರ್ಪಣೆ ಮಲ್ಪೆರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಮಧ್ಯಾಹ್ನದೊಳಯಿ ಪುದೆಕಾಣಿಕೆನ್ ಶ್ರೀ ದೇವಲ್ಯಗ್ ಕನತ್ ದ್ ಮೆರವಣಿಗೆಡ್ ಪಾಲ್ ಪಡೆದ್ ಈ ಲೇಸ್ ನ್ ಪೊರ್ಲು ಮಲ್ತ್ ಕೊರ್ದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಫೆ.19: ಕುಡ್ಲ ಪುರಭವನಡ್ “ಒರಿಯೆ” ತುಳು ನಾಟಕ

ಲೀಲಾಧರ ಶೆಟ್ಟಿ ಕರಂದಾಡಿ ಸಾರಥ್ಯದ ರಂಗತರಂಗ ಕಲಾವಿದೆರ್ ಕಾಪು ಮೊಕ್ಲೆರ್ದ್ “ಒರಿಯೆ” ತುಳು ನಾಟಕ ಫೆ.19 ಕ್ಕ್ ಬಯ್ಯಗ್ ಕುಡ್ಲ ಪುರಭವನಡ್ ನಡಪರೆ ಉಂಡು.

ರಾಜೇಶ್ ಆಳಪೆ ಮೆರೆನ ತ್ರಿದಶ ರಂಗಪಯಣದ ಅಭಿನಂದನಾ ಲೇಸ್ ದ ಲೆಕ್ಕೊಡು ಈ ನಾಟಕ ನಡಪರೆ ಉಂಡು.