Tulu News

ಕಲಾವಿದೆರ್ ಬಂಗಡ್ ಉಲ್ಲೆರ್, ಬೆನ್ರ ಅವಕಾಶ ಮಲ್ತು ಕೊರ್ಲೆ; ಪೆರಿಯ ಕಲಾವಿದೆರ್, ನಿರ್ದೇಶಕೆರೆಡ್ದು ಜಿಲ್ಲಾಡಳಿತಗ್ ಮನವಿ

ಕುಡ್ಲ: ಕಲಾವಿದೆರ್ ಅಂಚನೆ ಕಲಾಲೋಕದ ಬಗ್ಗೆ ಭಾಷಣ ಮಲ್ಪುನ ಜನಪ್ರತಿನಿಧಿಲ್ ಇತ್ತೆ ಕೊರೊನಾ ಇಪ್ಪುನೆಡ್ದಾವರ ಅಕುಲೆಗ್ ಸರಿಯಾಯಿನ ಅವಕಾಶ ತಿಕ್ಕೊಂದಿಂಜಿ ಪಂದು ನಿರ್ದೇಶಕೆ, ನಿರ್ಮಾಪಕೆ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ಪಂಡೆರ್.

ಈ ಬಗೆಟ್ ನಗರಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರ್ದಿನ ಆರ್, ಸರ್ಕಾರದ ಕಿಟ್ ಅಂಚನೆ ಒವ್ವೆ ರೀತಿತ ಸಹಾಯಲ್ ಯಂಕುಲೆಗ್ ಬೊಡ್ಚಿ. ಯಂಕುಲ್ ಸ್ವಾಭಿಮಾನಿಲ್, ಯಂಕುಲೆಗ್ ಬದುಕರೇ ಬುಡ್ಲೆ. ಸಿಂಗಲ್ ಥಿಯೇಟರ್ ಪೂರ ಇತ್ತೆ
ಮುಚ್ಚುನ ಪರಿಸ್ಥಿತಿಡ್ ಉಂಡು. ತುಳು ಚಿತ್ರದ ಕಲಾವಿದೆರ್ ನನ ದುಂಬುಗು ದಾದ ಪನ್ಪಿನ ಯೋಚನೆಡ್ ಉಲ್ಲೆರ್.

ರಂಗಭೂಮಿ ನಟೆ, ಚಲನಚಿತ್ರ ನಿರ್ದೇಶಕೆ ದೇವದಾಸ್ ಕಾಪಿಕಾಡ್ ಪಾತೆರ್ದು, ಸದ್ಯ ರಾಜಕೀಯ ಸೇರಿನಂಚನೆ ಮಾತ ಚಟುವಟಿಕೆಲ್ ಸುರು ಆತುಂಡು. ಆಂಡ ನಾಟಕ, ಯಕ್ಷಗಾನ, ಸಂಗೀತ, ಸಿನಿಮಾ ನೆಕ್ಕು ಮಾತ್ರ ಅನುವು ತಿಕ್ಕುದುಜಿ. ಕರೀನ 2 ವರ್ಷಡ್ದಿಂಚಿ ತುಳುನಾಡುದ ಸಾರ ಕಲಾವಿದೆರ್ ಬಂಗದ ಜೀವನಡ್ ಉಲ್ಲೆರ್. ಸರ್ಕಾರ ಕಲಾವಿದೆರ್ನ ಪರವಾದ್ ಉಂತೊಡ್ ಪಂದು ಪಂಡೆರ್.

ಚಲನಚಿತ್ರ ನಿರ್ಮಾಪಕೆ ಪ್ರಕಾಶ್ ಪಾಂಡೇಶ್ವರ ಪಾತೆರ್ದು, 12 ತುಳು ಸಿನಿಮಾಲ್ ರಿಲೀಸ್ ಆಯಾರೆ ಉಂಡು. ಆಂಡ ಥಿಯೇಟರ್ ಡ್ ಶೇ.50 ದಾತು ಸೀಟ್ ಇಪ್ಪುನೆಡ್ದಾವರ ಜನಕುಲೇ ಥಿಯೇಟರ್ ಗ್ ಬರ್ರ ಪೊಡಿಯೊಂದು ಉಲ್ಲೆರ್. ಅಂಚನೆ ಸಿನಿಮಾ, ನಾಟಕನ್ ನಂಬುದುನ ಕಲಾವಿದೆರ್ ಸಾದಿಗ್ ಬೂರುನ ಪರಿಸ್ಥಿತಿಡ್ ಉಲ್ಲೆರ್. ಸರ್ಕಾರ ಇಂದೆನ್ ಅರ್ಥ ಮಂತೊನಡ್ ಪಂದು ಒತ್ತಾಯ ಮಲ್ತೆರ್.

ನಿರ್ಮಾಪಕೆ, ತುಳು ನಾಟಕ ಕಲಾವಿದೆರ್ನ ಒಕ್ಕೂಟದ ಅಧ್ಯಕ್ಷೆ ಕಿಶೋರ್ ಡಿ ಶೆಟ್ಟಿ ಪಾತೆರ್ದು, 40 ನಾಟಕ ತಂಡಲ್ ಆತಂಕಡ್ ಉಲ್ಲೆರ್. ಅಂಚನೆ ಅಕುಲೆನ್ ನಂಬೊಂದಿಪ್ಪುನ ಕುಟುಂಬಲ್ ಇತ್ತೆ ಬಂಗಡ್ ಉಲ್ಲೆರ್ ಪಂದು ಪಂಡೆರ್. ಸುದ್ದಿಗೋಷ್ಠಿಡ್ ಮೋಹನ್ ಕೊಪ್ಪಳ ಪಾಲ್ ಪಡೆದಿತ್ತೆರ್.