Tulu News

ಮಹಿಳಾ ಸಬಲೀಕರಣಗಾದ್ ವೋಟುಗು ಉಂತರೆ ನಾಮಪತ್ರ ಸಂದಾಯಿನ ಡಾ.ಅಮರಶ್ರೀ

ಬೆದ್ರ: ಜೆಡಿಎಸ್ ಪಕ್ಷದ ಮುಲ್ಕಿ ಬೆದ್ರ ಕ್ಷೇತ್ರದ ಅಭ್ಯರ್ಥಿಯಾದಿತ್ತಿನ ಮಾಜಿ ಸಚಿವೆರ್ ದಿವಂಗತ ಅಮರನಾಥ ಶೆಟ್ಟಿ ಮೆರೆನ ಮಗಲ್ ಡಾ.ಅಮರಶ್ರೀ ಅಮರನಾಥ ಶೆಟ್ಟಿ ಮೇರ್ ಪೆರಿಯ ಜೆಡಿಎಸ್ ಮುಖಂಡೆರ್ ಬೊಕ್ಕ ಮಸ್ತ್ ಸಂಖ್ಯೆದ ಬೆಂಬಲಿಗೆರೆನೊಟ್ಟಿಗೆ ಆಡಳಿತ ಸೌಧಡ್ ನಾಮಪತ್ರ ಸಂದಾಯೆರ್.

ಬೊಕ್ಕ ಮೇರ್ ಪಾತೆರ್ದ್, ಮುಲ್ಕಿ ಬೆದ್ರ ಕ್ಷೇತ್ರಡ್ ಕರಿನ 20 ವರ್ಷೊದಿಂಚ ಅಭಿವೃದ್ಧಿ ಅವಂದೆ ಇಪ್ಪುನ ಸುಮಾರ್ ಯೋಜನೆಲು ಉಂಡು. ಪರ್ಪಿನ ನೀರ್ ದ ಸಮಸ್ಯೆ, ಉದ್ಯೋಗ, ವಸತಿ, ಆರೋಗ್ಯ ಬೊಕ್ಕ ಪ್ರವಾಸೋದ್ಯಮಗ್ ಸಂಬಂಧಪಟ್ಟಿನ ಒವ್ವೇ ಸಮಸ್ಯೆಲೆಗ್ ಪರಿಹಾರ ತಿಕಂದೆ ಅಂಚೆನೆ ಒರಿತ್ಂಡ್. ನೆಕ್ಕ್ ಮಹಿಳಾ ಸಬಲೀಕರಣಕ್ಕಾದ್ ಎಚ್ಚದ ಒತ್ತುನ್ ಕೊರ್ಪುನ ಉದ್ದೇಶ ಉಂಡು ಪಂದ್ ಪಂಡೆರ್. ಅತ್ತಂದೆ ರಾಜಕೀಯ ಜೀವನಡ್ ಉಂದು ಸುರುತ್ತ ಚುನಾವಣೆ ಆತ್ಂಡ್. ಅಮ್ಮೆರ್ ಅಮರನಾಥ ಶೆಟ್ಟಿ ಮೆರೆನ ರಾಜಕಾರಣನ್ಎಲ್ಯೆರ್ದೆ ತೂಯಿನಾಲ್. ಅರೆನ ಮೃದು ಸ್ವಭಾವ, ಶುದ್ಧ ರಾಜಕಾರಣ, ರಾಜಕಾರಣಡ್ ನೆಲೆ ಉಂತಿನ ಗುಣ ಸ್ವಭಾವನೇ ಎಂಡಲ ಉಂಡು. ಅಂಚೆನೆ ವೈದ್ಯಕೀಯ ವೃತ್ತಿದೊಟ್ಟಿಗೆ ಕ್ಷೇತ್ರದ ಜನತ್ತ ಸೇವೆಗಾದ್ ಬೇಲೆ ಮಲ್ಪುವೇ ಪಂದ್ ಪಂಡೆರ್.

ಈ ಪೊರ್ತುಡು ಮೆರೆನೊಟ್ಟಿಗೆ ಮೆರೆನ ಅಮ್ಮ ಜಯಶ್ರೀ ಅಮರನಾಥ ಶೆಟ್ಟಿ, ತಾಲೂಕ್ ಪಂಚಾಯತ್ ಮಾಜಿ ಸದಸ್ಯೆರ್ ಹರಿಪ್ರಸಾದ್ ಶೆಟ್ಟಿ ಪಾಲಡ್ಕ, ಜೆಡಿಎಸ್ ಜಿಲ್ಲಾ ಯೂತ್ ಉಪಾಧ್ಯಕ್ಷೆರ್ ಅಸಿಫ್, ಜಿಲ್ಲಾ ಕಾರ್ಯ ಅಧ್ಯಕ್ಷೆರ್ ಇಕ್ಬಾಲ್ ಅಹಮದ್ ಮೂಲ್ಕಿ, ಜೆಡಿಎಸ್ ಮುಲ್ಕಿ ಘಟಕದ ಅಧ್ಯಕ್ಷೆರ್ ನವೀನ್ ಪುತ್ರನ್, ಜೆಡಿಎಸ್ ಚುನಾವಣೆ ಏಜೆಂಟ್ ಸುನಿಲ್ ಬೆದ್ರ ಇತ್ತೆರ್.

ನಾಮಪತ್ರ ಸಂದಾಯಿನ ಕುಡ್ಲ ದಕ್ಷಿಣ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಜೆ ಆರ್ ಲೋಬೋ

ಕುಡ್ಲ: ಮೇ 10ಕ್ಕ್ ನಡಪರೆ ಇಪ್ಪುನ ವಿಧಾನಸಭೆ ವೋಟುಗು ಕುಡ್ಲ ದಕ್ಷಿಣ ಕ್ಷೇತ್ರರ್ದ್ ಮಾಜಿ ಶಾಸಕೆರ್ ಜೆ.ಆರ್.ಲೋಬೊ ಮೇರ್ (ಗುರುವಾರ) ಇನಿ ನಾಮಪತ್ರ ಸಂದಾಯೆರ್.

ಮೇರ್ ಪಕ್ಷದ ನಾಯಕೆರ್, ಪದಾಧಿಕಾರಿಲು, ಕಾರ್ಯಕರ್ತೆರ್ ಬೊಕ್ಕ ಅಭಿಮಾನಿಲೆನೊಟ್ಟಿಗೆ ಲಾಲ್ ಬಾಗ್ ದ ಕುಡ್ಲ ಮಹಾನಗರ ಪಾಲಿಕೆದ ಕಚೇರಿಡ್ ಇಪ್ಪುನ ಚುನಾವಣಾಧಿಕಾರಿ ಕಚೇರಿಗ್ ಪೋದು ನಾಮಪತ್ರ ಸಂದಾಯೆರ್.

ಮೇರ್ ನಾಮಪತ್ರ ಸಂದಾವುನ ದುಂಬು ಕುದ್ರೋಳಿ ಗೋಕರ್ಣನಾಥೇಶ್ವರ ದೇವಲ್ಯಡ್ ಪಕ್ಷದ ಪ್ರತಿನಿಧಿಲು ಬೊಕ್ಕ ಕಾರ್ಯಕರ್ತೆರೆನ ಸಮ್ಮುಖಡ್ ಪೂಜೆ ಸಂದಾದ್, ದೇವೆರೆನ ಆಶೀರ್ವಾದ ಪಡೆಯೆರ್.

ಬೊಕ್ಕ ಕುದ್ರೋಳಿ ದೇವಲ್ಯರ್ದ್ ಕುಡ್ಲ ಮಹಾನಗರ ಪಾಲಿಕೆ ಕಚೇರಿ ಮುಟ್ಟ ನಡತಿನ ಮೆರವಣಿಗೆಡ್ ಮಸ್ತ್ ಸಂಖ್ಯೆಡ್ ಜನ ಸೇರ್ದಿತ್ತೆರ್.

ಈ ಪೊರ್ತುಡು ಕಾಂಗ್ರೆಸ್ ಮುಖಂಡೆರ್ ಐವನ್ ಡಿಸೋಜಾ, ಪಕ್ಷದ ಪೆರಿಯ ಮುಖಂಡೆರ್ ಕಳ್ಳಿಗೆ ತಾರನಾಥ ಶೆಟ್ಟಿ, ಶಶಿಧರ್ ಹೆಗಡೆ, ಭಾಸ್ಕರ್ ಮೊಯ್ಲಿ, ಪ್ರಕಾಶ್ ಸಾಲಿಯಾನ್, ಮಾಜಿ ಕಾರ್ಪೊರೇಟರ್ ನವಾಝ್, ಅಬ್ದುಲ್ ಸಲೀಂ, ಟಿ.ಕೆ.ಸುಧೀರ್, ಸಬಿತಾ ಮಿಸ್ಕಿತ್, ಮೋಹನ್ ಶೆಟ್ಟಿ, ಅಲಿಸ್ಟರ್ ಡಿಕುನ್ನಾ ಇತ್ತೆರ್.

MLA Vedavyas Kamath files nomination for Mangalore South constituency ನಾಮಿನೇಶನ್ ಸಂದಾಯಿನ ವೇದವ್ಯಾಸ ಕಾಮತ್!

ಕುಡ್ಲ ದಕ್ಷಿಣ ವಿಧಾನ ಸಭೆ ಕ್ಷೇತ್ರದ ಶಾಸಕೆರ್ ವೇದವ್ಯಾಸ ಕಾಮತ್‌ ಮೇರ್ ಬುಧಾರ ನಾಮಪತ್ರ ಸಂದಾಯೆರ್.

ಬೊಲ್ಪುಗು ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಗ್ ಪೋದು ಗೋಕರ್ಣನಾಥೇಶ್ವರ ಸನ್ನಿಧಿಡ್ ನಾಮಪತ್ರಗ್ ಪೂಜೆ ಸಂದಾಯೆರ್.

ಬೊಕ್ಕ ಮನುಕುಲಗ್ ಸಮಾನತೆದ ಏಕತೆನ್ ಬೋಧನೆ ಮಲ್ತಿ‌ನ ಬ್ರಹ್ಮಶ್ರೀ ನಾರಾಯಣ ಗುರು ಮೆರೆನ ಮೂರ್ತಿದಡೆ ಪೋದು ಪ್ರಾರ್ತನೆ ಮಲ್ತೆರ್.

ಅತ್ತಂದೆ ಕುಡ್ಲ ಪೇಂಟೆದ ಕದ್ರಿ, ಮಂಗಳಾದೇವಿ, ಕಾರ್‌ ಸ್ಟ್ರೀಟ್ ದೇವಲ್ಯಗ್ ಪೋದು ಪ್ರಾರ್ತನೆ ಮಲ್ತೆರ್.

ಬೊಕ್ಕ ಮೇರ್ ಕುದ್ರೋಳಿ ಕ್ಷೇತ್ರರ್ದ್ ಜೀಪ್ ದ ಮುಖೇನ ಮೆರವಣಿಗೆಡ್ ಬತ್ತ್ ದ್ ಚುನಾವಣಾಧಿಕಾರಿಲೆಗ್ ನಾಮಪತ್ರ ಸಂದಾಯೆರ್.

ಈ ಪೊರ್ತುಡು ಮೆರೆಗ್ ಮಸ್ತ್ ಸಂಖ್ಯೆಡ್ ಸೇರಿನ ಪಕ್ಷದ ಕಾರ್ಯಕರ್ತೆರ್, ಅಭಿಮಾನಿಲು ಅಭ್ಯರ್ಥಿ ವೇದವ್ಯಾಸ್‌ಗ್ ಸಾಥ್‌ ಕೊರಿಯೆರ್.

ಬೊಕ್ಕ ಮಾಧ್ಯಮಗ್ ಪ್ರತಿಕ್ರಿಯೆ ಕೊರ್ನ ಮೇರ್, ಅರೆನ್ ರಡ್ಡನೇ ಸರ್ತಿ ವೋಟುಗು ಉಂತೆರೆ ಅವಕಾಶ ಕೊರ್ನ ಪಕ್ಷದ ಪೆರಿಯ ನಾಯಕೆರೆಗ್ ಕೃತಜ್ಞತೆ ಸಂದಾದ್ ಬೊಕ್ಕ ಎನ್ನ ಅಭಿವೃದ್ಧಿ ಕಾರ್ಯಲೆನ್ ಮೆಚ್ಚಿದ್ ಕಾರ್ಯಕರ್ತೆರ್ ಮಲ್ಲ ಸಂಖ್ಯೆಡ್ ಸೇರಿನೆಕ್ಕ್ ಸರ್ವೆರೆಗ್ಲಾ ಸೊಲ್ಮೆ ಸಂದಾವೆ ಪಂದ್ ಪಂಡೆರ್.

ರಾಜ್ಯಾಧ್ಯಕ್ಷೆರ್, ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಮೇರ್ ಕುದ್ರೋಳಿ ದೇವಲ್ಯಗ್ ಬತ್ತ್ ದ್ ವಿಜಯ ಯಾತ್ರೆಗ್ ಎಡ್ಡೆಪ್ಪು ಬಯಕಿಯೆರ್. ಬೊಕ್ಕ ಪಾತೆರ್ದ್, ಕುಡ್ಲ ಪೇಂಟೆದ ದಕ್ಷಿಣಡ್ ವೇದವ್ಯಾಸ ಕಾಮತ್ ಮಲ್ತಿನ ಅಭಿವೃದ್ಧಿನ್ ಜನ ಮೆಚ್ಚ್ ದೆರ್. ಅರೆನ ಗೆಲ್ಮೆ ಮುಲ್ಪರ್ದೆ ದುಂಬಾರಿಯಡ್. ಕೇಂದ್ರ, ರಾಜ್ಯ ಸರಕಾರ ಅನುದಾನ ಕೊರ್ದು, ಕುಡ್ಲ ದಕ್ಷಿಣದ ಅಭಿವೃದ್ಧಿಗ್ ಮಸ್ತ್ ಸಹಕಾರ ಕೊರ್ತುಂಡು. ಅತ್ತಂದೆ ಎಪಲ ಜನತ್ತ ನಡುಟ್ ಇಪ್ಪುನ ನಾಯಕೆಯಾದ್ ವೇದವ್ಯಾಸ ಕಾಮತ್ ಗುರುತಿಸಾದೆರ್ ಪಂದ್ ಪಂಡೆರ್.

ಈ ಪಾದಯಾತ್ರೆಡ್ ಚೆಂಡೆ ವಾದನ, ಕಲ್ಲಡ್ಕ ಬೊಂಬೆಲು, ಪದ್ಯಲು ಇತ್ಂಡ್. ಅತ್ತಂದೆ ವೇದವ್ಯಾಸ ಕಾಮತ್ ಮೆರೆನ್ ಮೆಚ್ಚಿದ್ ಬರೆಯಿನ ಇಸೇಸ ಪದ್ಯಗ್ ಕಾರ್ಯಕರ್ತೆರ್ ನಲಿತೆರ್. ಅಂಚೆನೆ ಅಲ್ಪಲ್ಪ ಮಜ್ಜಿಗೆ, ನೀರ್ ದ ವ್ಯವಸ್ಥೆ ಇತ್ಂಡ್.

ಈ ಪೊರ್ತುಡು ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್, ಬಿಜೆಪಿ ಮುಖಂಡೆರ್ ರವಿಶಂಕರ್‌ ಮಿಜಾರ್, ಮೋನಪ್ಪ ಭಂಡಾರಿ, ಜಗದೀಶ್‌ ಶೇಣವ, ಜಯಾನಂದ ಅಂಚನ್‌, ಪರಿವಾರ ಸಂಘಟನೆ ನಾಯಕೆರ್ ಶರಣ್‌ ಪಂಪ್ವೆಲ್‌, ಕುದ್ರೋಳಿ ಕ್ಷೇತ್ರದ ಅಧ್ಯಕ್ಷೆರ್ ಎಚ್‌.ಎಸ್. ಸಾಯಿರಾಂ ಇತ್ತೆರ್.

MLA Vedavyas Kamath files nomination for Mangalore South constituency

MLA Vedavyas Kamath filed his nomination for the upcoming Vidhana Sabha elections from Mangalore South constituency on April 17 th.

He sought blessings at the Gokarnatheswara temple Kodroli and also from social reformer Narayan Guru.

He was accompanied by well wishers and party workers in large numbers.

ಮೇ 9-10: ಕುಂಪನ ಮಜಲ್ ದುರ್ಗಾಪರಮೇಶ್ವರಿ ವಾರಾಹಿ ಅಮ್ಮನ ಕ್ಷೇತ್ರಡ್ ಜಾತ್ರೆ

ಕುಡ್ಲ: ಫರಂಗಿ ಪೇಟೆದ ಕುಂಪನ ಮಜಲ್ ಶ್ರೀ ದುರ್ಗಾಪರಮೇಶ್ವರಿ ವಾರಾಹಿ ಅಮ್ಮನ ಕ್ಷೇತ್ರಡ್ 11ನೇ ವರ್ಷದ ಜಾತ್ರೆ ಮೇ 9 ಬೊಕ್ಕ 10 ಕ್ಕ್ ನಡಪರೆ ಉಂಡು.

ಮೇ 9 ಕ್ಕ್ ರಾತ್ರೆ ಬಂಗಾರ ಮಂತ್ರ ದೇವತೆ ಬೊಕ್ಕ ಕೊರಗಜ್ಜ ದೈವೊಲೆಗ್ ಗಗ್ಗರ ಸೇವೆ ನಡಪರೆ ಉಂಡು.

ಮೇ 10 ಕ್ಕ್ ರಾತ್ರೆ ಸತ್ಯೊದ ಸ್ವಾಮಿ ಕೊರಗಜ್ಜೆ ತುಳು ಆಟ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ವಾರಾಹಿ ಅಮ್ಮನ ಕೃಪೆಗ್ ಪಾತ್ರರಾವೊಡು ಪಂದ್ ಕುಂಪನ ಮಜಲ್ ಶ್ರೀ ದುರ್ಗಾಪರಮೇಶ್ವರಿ ವಾರಾಹಿ ಅಮ್ಮನ ಕ್ಷೇತ್ರದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಬಿನ್ನಾಪು ಮಲ್ದೆರ್.

9964677098 /8497040381

ಅಂಚೆನೆ ಈ ಜಾತ್ರೆದ ಉಚ್ಚಯಗ್ ಪನವುದ ಸಕಾಯ ಮಲ್ಪುನ ಭಕ್ತಾಭಿಮಾನಿಲು 9964677098 ನಂಬರ್ ಗ್ ಗೂಗಲ್ ಪೇ/ಫೋನ್ ಪೇ ಮಲ್ತ್ ದ್ ವಾರಾಹಿ ಅಮ್ಮನ ಕೃಪೆಗ್ ಪಾತ್ರರಾವೊಡು ಪಂದ್ ಕೇನೊಂದೆರ್.

Ambedkar Jayanti celebration by BJP Manglore South ಬಿಜೆಪಿ ಕುಡ್ಲ ಪೇಂಟೆದ ದಕ್ಷಿಣ ಮಂಡಲ‌ ವತಿರ್ದ್ ಅಂಬೇಡ್ಕರ್ ಜಯಂತಿ

ಭಾರತೀಯ ಜನತಾ ಪಾರ್ಟಿ ಕುಡ್ಲ ಪೇಂಟೆದ ದಕ್ಷಿಣ ಮಂಡಲ‌ ವತಿರ್ದ್ ಸಂವಿಧಾನ ಶಿಲ್ಪಿ, ಭಾರತ ರತ್ನ ಡಾ. ಬಾಬಾ ಸಾಹೇಬ್ ಅಂಬೇಡ್ಕರ್ ಮೆರೆನ ಜಯಂತಿ ನಡತ್ಂಡ್.

ಈ ಪೊರ್ತುಡು ಕುಡ್ಲ ಪೇಂಟೆದ ದಕ್ಷಿಣ ವಿಧಾನಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಡಿ. ವೇದವ್ಯಾಸ್ ಕಾಮತ್, ಮಂಡಲ‌ ಅಧ್ಯಕ್ಷೆರ್ ವಿಜಯ್ ಕುಮಾರ್ ಶೆಟ್ಟಿ, ಬಿಜೆಪಿ ಜಿಲ್ಲಾ ಮಾಧ್ಯಮ ವಕ್ತಾರೆರ್ ರವಿಶಂಕರ್ ಮಿಜಾರ್, ಪ್ರಮುಖ ನಾಯಕೆರ್ ನಿತಿನ್ ಕುಮಾರ್, ಮಂಡಲ ಪ್ರಧಾನ ಕಾರ್ಯದರ್ಶಿ ರೂಪಾ ಡಿ ಬಂಗೇರ, ಸುರೇಂದ್ರ ಜಪ್ಪಿನಮೊಗರು, ಮಂಡಲ‌ ಉಪಾಧ್ಯಕ್ಷೆರ್ ರಮೇಶ್ ಕಂಡೆಟ್ಟು, ಪಕ್ಷದ ಪ್ರಮುಖೆರ್, ಪಾಲಿಕೆ ಸದಸ್ಯೆರ್ ಇತ್ತೆರ್.

7 ಸಾರ ಜನನ್ ಬೇಲೆರ್ದ್ ದೆತ್ತಿನ ಡಿಸ್ನಿ

ಪುಗರ್ತೆದ ಮನರಂಜನಾ ಕಂಪೆನಿ ವಾಲ್ಟ್‌ ಡಿಸ್ನಿ ಈ ವರ್ಷದ ಫೆಬ್ರವರಿಡ್ 7 ಸಾರ ಜನನ್ ಬೇಲೆರ್ದ್ ದೆತ್ತ್ ದ್ಂಡ್.

ಇತ್ತೆ ಕುಡೊಂಜಿ ಸುತ್ತುದ ಬೇಲೆರ್ದ್ ದೆಪ್ಪುನ ಪ್ರಕ್ರಿಯೆನ್ ಸುರು ಮಲ್ಪರೆ ಉಂಡು ಪಂದ್ ತೆರಿಪಾದ್ಂಡ್. ‌ಟಿವಿ, ಚಲನಚಿತ್ರ, ಥೀಮ್ ಪಾರ್ಕ್ ಬೊಕ್ಕ ಕಾರ್ಪೊರೇಟ್ ವಿಭಾಗಡ್ 15% ಉದ್ಯೋಗಿಲೆನ್ ಬೇಲೆರ್ದ್ ದೆಪ್ಪೆರೆ ಉಂಡು. ಎಪ್ರಿಲ್ 24 ತ್ತ ಉಲಯಿ ಉದ್ಯೋಗಿಲೆಗ್ ಬೇಲೆರ್ದ್ ದೆಪ್ಪುನ ಬಗೆಟ್ ಕಂಪೆನಿ ಪೊಲಬು ಕೊರ್ಪುಂಡು.

ನಾಮಪತ್ರ ಸಂದಾಯೆರೆ ಇನಿಯೇ ಅಕೇರಿದ ದಿನ

ಪ್ರಮುಖ ಪಕ್ಷವಾಯಿನ ಬಿಜೆಪಿ ಬೊಕ್ಕ ಕಾಂಗ್ರೆಸ್ ರಾಜ್ಯದ ಮತ 224 ಕ್ಷೇತ್ರಲೆಗ್ ಅಭ್ಯರ್ಥಿಲೆನ್ ಘೋಷಣೆ ಮಲ್ದ್ಂಡ್.

ನನ ಜೆಡಿಎಸ್ ಬಾಕಿ ಒರಿನ 59 ಕ್ಷೇತ್ರಲೆಗ್ ಅಭ್ಯರ್ಥಿಲೆನ್ ಘೋಷಣೆ ಮಲ್ದ್ಂಡ್. ಅತ್ತಂದೆ ನಾಮಪತ್ರ ಸಂದಾಯೆರೆ ಇನಿಯೇ ಅಕೇರಿದ ದಿನ ಆತ್ಂಡ್. ಅಕೇರಿಗ್ ಯೇರ್ ಮಾತ ನಾಮಪತ್ರ ಸಂದಾವೆರ್ ಪನ್ಪುನವು ಬಯ್ಯದುಲಯಿ ನಿರ್ಧಾರ ಆಪುಂಡು. ಎಲ್ಲೆ ನಾಮಪತ್ರ ಪರಿಶೀಲನೆ ನಡಪರೆ ಉಂಡು. ನಾಮಪತ್ರ ಪಿರ ದೆತೊನಿಯೆರೆ ಎ.24 ಅಕೇರಿದ ದಿನ ಆತ್ಂಡ್.

D K Shivkumar ‘s assets increase by 573 crore in the last five years!! ಕರಿನ 5 ವರ್ಷಡ್ ಡಿಕೆಶಿ ಆಸ್ತಿ 573 ಕೋಟಿ ರೂ. ಎಚ್ಚ

ಬೆಂಗ್ಲೂರ್: ಕರ್ನಾಟಕ ಕಾಂಗ್ರೆಸ್ ಅಧ್ಯಕ್ಷೆರ್ ಡಿ ಕೆ ಶಿವಕುಮಾರ್ ಬೊಕ್ಕ ಅರೆಗ್ ಸೇರಿನ ಆಸ್ತಿ ಕರಿನ ಐನ್ ವರ್ಷಡ್ 573 ಕೋಟಿ ರೂ. ಎಚ್ಚಾತ್ಂಡ್.

2018 ತ್ತ ವಿಧಾನಸಭೆ ವೋಟುದ ಪೊರ್ತುಡು ಒಟ್ಟು 840.08 ಕೋಟಿ ರೂ. ಆಸ್ತಿ ಉಂಡು ಪಂದ್ ಡಿಕೆ ಶಿವಕುಮಾರ್ ಘೋಷಣೆ ಮಲ್ತ್ ದ್ ಇತ್ತೆರ್. ಅವು 2023ತ್ತ ವೋಟುಡು 1,413.78 ಕೋಟಿಗ್ ಎಚ್ಚಾತ್ಂಡ್. ಕರಿನ ಐನ್ ವರ್ಷಲೆಡ್ ಶೇ. 68.29 ದಾತ್ ಎಚ್ಚಾತ್ಂಡ್.

ಕನಕಪುರ ಕ್ಷೇತ್ರರ್ದ್ ಕುಡ ವೋಟುಗು ಉಂತಿನ ಡಿಕೆ ಶಿವಕುಮಾರ್ ಸೋಮಾರ ನಾಮಪತ್ರ ಸಂದಾವುನ ಪೊರ್ತುಡು ಸಂದಾಯಿನ ಅಫಿಡವಿಟ್ ಡ್ ಈ ಪೊಲಬು ಕೊರ್ತೆರ್.

ಅಫಿಡವಿಟ್ ಪ್ರಕಾರ, ಡಿಕೆ ಶಿವಕುಮಾರ್ ಮೆರೆಗೆ 251.69 ಕೋಟಿ ಬಿಲೆತ್ತ ಚರ ಆಸ್ತಿ ಉಂಡು. ನೆಟ್ಟ್ 6.75 ಕೋಟಿ ರೂ. ಬಿಲೆತ್ತ ಪಿತ್ರಾರ್ಜಿತ ಆಸ್ತಿ ಸೇರ್ದ್ಂಡ್.

ಒಟ್ಟಾರೆಯಾದ್ ಡಿಕೆಶಿ ಕುಟುಂಬಗ್ 273.42 ಕೋಟಿ ಬಿಲೆತ್ತ ಚರ ಆಸ್ತಿ ಉಂಡು. ಉಂದು ಅತ್ತಂದೆ, ಮೆರೆನ ಕುಟುಂಬಗ್ ಒಟ್ಟು 1,140.36 ಕೋಟಿ ರೂ. ಬಿಲೆತ್ತ ಸ್ಥಿರಾಸ್ತಿ ಉಂಡು.

India records 142 crore population – beats China 142 ಕೋಟಿ ಜನಸಂಖ್ಯೆರ್ದ್ ಚೀನಾನ್ ಪಿರವು ಪಾಡಿನ ಭಾರತ

ಹೊಸದಿಲ್ಲಿ: ಭಾರತ 142.86 ಕೋಟಿ ಜನಸಂಖ್ಯೆದೊಟ್ಟಿಗೆ ಚೀನಾನ್ ಪಿರವು ಪಾಡ್ದ್ ವಿಶ್ವದ ಮಸ್ತ್ ಎಚ್ಚ ಜನಸಂಖ್ಯೆ ಇಪ್ಪುನ ದೇಶ ಆತ್ಂಡ್ ಪಂದ್ ವಿಶ್ವಸಂಸ್ಥೆ ಇನಿ ಬುಡುಗಡೆ ಮಲ್ತಿನ ಅಂಕಿ-ಅಂಶಲೆರ್ದ್ ತೆರಿದ್ ಬೈದ್ಂಡ್.

ವಿಶ್ವಸಂಸ್ಥೆದ ಅಂದಾಜಿದ ಪ್ರಕಾರ ಚೀನಾ 142.57 ಕೋಟಿ ಜನಸಂಖ್ಯೆ ಇತ್ತ್ಂಡ ಭಾರತದ ಜನಸಂಖ್ಯೆ 142.86 ಕೋಟಿ ಆತ್ಂಡ್.

1950 ಟ್ಟ್ ಜನಸಂಖ್ಯೆದ ಅಂಕಿ-ಅಂಶಲೆನ್ ಸಂಗ್ರಹ ಮಲ್ಪರೆ ಸುರು ಮಲ್ತಿನ ಬೊಕ್ಕ ಮಸ್ತ್ ಎಚ್ಚ ಜನಸಂಖ್ಯೆ ಇಪ್ಪುನ ದೇಶಲೆನ ವಿಶ್ವಸಂಸ್ಥೆದ ಪಟ್ಟಿಡ್ ಮಲ್ಲ ತಾನ ಪಡೆತಿನ ಉಂದುವೇ ಸುರು.

1960ಟ್ಟ್ ಮಾಜಿ ನಾಯಕೆ ಮಾವೋ ಝೆಡಾಂಗ್ ಮೆರೆನ ವಿನಾಶಕಾರಿ ಕೃಷಿ ನೀತಿಲೆನ ಅಡಿಟ್ಟ್ ಲಕ್ಷರ್ದ್ ಎಚ್ಚ ಜನಕುಲು ಬಡವುರ್ದ್ ಸೈತಿನ ಬೊಕ್ಕ ಸುರುತ್ತ ಸರ್ತಿ ಚೀನಾಡ್ ಜನಕುಲೆನ ಸಂಖ್ಯೆ ಕರಿನ ವರ್ಷರ್ದ್ ಕಮ್ಮಿ ಆತ್ಂಡ್.

India records 142 crore population – beats China

New Delhi: India becomes the most populated country in the world and beats China with a population of 142.86 crore said the United Nations in a statistics released today .

United Nations statistics says China has a population of 142.57 crore and India records 142.86 crore. After the 1950 census this is the first time India has topped the United Nations list.

The destructive agricultural regulations of the 1960s of former leader Mao Zodang where lakhs of people died of starvation , this is the first time that the population has come down in China.

Radio Manipal to air ” Chinnara Dani” program ರೇಡಿಯೊ ಮಣಿಪಾಲಡ್ ‘ಚಿಣ್ಣರ ದನಿ’ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಒಟ್ಟುಸೇರಿಗೆಡ್ ‘ಚಿಣ್ಣರ ದನಿ’ ಲೇಸ್ ಎ.19 ಬುಧಾರ 5.30 ಕ್ಕ್ ಪ್ರಸಾರ ಆಪುಂಡು.

ಇನಿ ಪ್ರಸಾರ ಆಪುನ ಈ ಲೇಸ್ ದ 5ನೇ ಸಂಚಿಕೆಡ್ ಬಾಲ ಪ್ರತಿಭೆ ರೋಷನ್ ಗಿಳಿಯಾರು ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ರೇಡಿಯೊ ಮಣಿಪಾಲದ ಪ್ರಕಟಣೆ ತೆರಿಪಾದ್ಂಡ್. ಎ.20 ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು.