ಮುಲ್ಕಿ ಬೆದ್ರ ವಿಧಾನ ಸಭೆ ಕ್ಷೇತ್ರದ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಮಿಥುನ್ ರೈ ಮೆರೆನ ವೋಟುದ ಏಜೆಂಟಾದ್ ಕೆಪಿಸಿಸಿ ಕೋಆರ್ಡಿನೇಟರ್ ಎಚ್ ವಸಂತ್ ಬೆರ್ನಾಡ್ ಮೇರೆನ್ ನೇಮಕ ಮಲ್ದೆರ್ ಪಂದ್ ಅಭ್ಯರ್ಥಿ ಮಿಥುನ್ ರೈ ಮೆರೆನ ಕಚೇರಿದ ಪ್ರಕಟಣೆಡ್ ತೆರಿಪಾದ್ಂಡ್.
ಬೊಂಬೈದ ವೀರಾ ರೆಸಿಡೆನ್ಸಿದ ಧಣಿ, ತುಳುನಾಡ್ ಮೂಲದ ಹೊಟೇಲ್ ಉದ್ಯಮಿನ್ ಪುಂಡೆರ್ ಕಿಡ್ನ್ಯಾಪ್ ಮಲ್ದೆರ್.
ಮೆರೆನ್ ಪೊಲೀಸೆರ್ ಕೂಡ್ಲೆ ಕಾರ್ಯಾಚರಣೆರ್ದ್ ರಕ್ಷಣೆ ಮಲ್ದೆರ್. ಕಿಡ್ನ್ಯಾಪ್ ಆಯಿನ ಉದ್ಯಮಿ ಅನುಪ್ ಶೆಟ್ಟಿ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಏಳ್ ಜನ ಆರೋಪಿಲೆನ್ ಅರೆಸ್ಟ್ ಮಲ್ತ್ ದ್ ಕೇಸ್ ದಾಖಲ್ ಮಲ್ದೆರ್ ಪಂದ್ ಪೊಲೀಸ್ ಅಧಿಕಾರಿಲು ತೆರಿಪಾದೆರ್.
Hotel enterpreneur with roots in Tulunadu kidnapped in Mumbai
The owner of Veera Residency in Mumbai hailing from Tulunadu was kidnapped by miscreants.
The police were able to rescue him in a rescue operation.The kidnapped person was identified as Anup Shetty
ಬೊಲ್ತೇರ್ : ತುಳುನಾಡ ಸಿರಿ ಪಾಡ್ದನ ದ ಪುಗರ್ತೆದ ಕಲಾವಿದೆ, ತುಳು ಸಿರಿ ಕಾವ್ಯ ದ ಹೋಮರ್ ಪನ್ಪಿನ ಬಿರ್ದ್ ಪಡೆತಿನ ಮಾಚಾರ್ ಗೋಪಾಲ ನಾಯ್ಕ್ (85) ಮೇರ್ ನನ ನಮಕ್ಕ್ ನೆಂಪು ಮಾತ್ರ.
ಬೆಳಾಲುದ ಅರೆನ ಇಲ್ಲಡ್ ಆರ್ ಅಂಗಾರೆದಾನಿ ದೇವೆರೆ ಪಾದೊ ಸೇರಿಯೆರ್. ಆರ್ ಪನ್ತಿನ 15,683 ಸಾಲ್ ದ ತುಳು ಸಿರಿ ಕಾವ್ಯೊನು ಪ್ರೊ.ಲಾರಿ ಹ್ಯಾಂಕೊ ಮುತಾಲಿಕೆಡ್ ಡಾ.ವಿವೇಕ್ ರೈ ಬೊಕ್ಕ ಚಿನ್ನಪ್ಪ ಗೌಡ ಮೊಕಲ್ನ ಫಿನ್ನಿಶ್ ಬೊಕ್ಕ ಇಂಡಿಯನ್ ಕೂಟ ದಾಖಲೀಕರಣ ಮಲ್ದ್ಂಡ್.
ನೇಜಿದ ಕಂಡೊಡು ಸಂಧಿ, ಕಬಿತೆ, ಉರಾಲ್, ಆಯನ ಉಚ್ಚಯೊಡು ಸಿರಿ ಕಾವ್ಯ ಬಾಯನ, ಪಾಡ್ದನದ ಮುಕೇನ ತುಳು ಮಾಣಿಕ್ಯ ಪನ್ಪಿನ ಪುಗರ್ತೆ ಪಡೆಯಿನ ಗೋಪಾಲ ನಾಯ್ಕ್ ಮೆರೆನ ಆತ್ಮೊಗು ಶಾಂತಿ ತಿಕ್ಕಡ್ ಪಂದ್ ತುಳುಕೂಟ(ರಿ) ಬೊಕ್ಕ ಪ್ರಾಚ್ಯ ಸಂಚಯ ಸಂಶೋಧನ ಕೇಂದ್ರದ ಅಧ್ಯಕ್ಷೆರ್, ಸದಸ್ಯೆರ್ ದೇವೆರೆನ್ ಸುಗಿತೆರ್.
ಕುಡ್ಲ: ಬೊಂಬೈ-ಕುಡ್ಲ ರೈಲ್ ಡ್ ಊರುಗು ಬರೊಂದು ಇತ್ತಿನ ಒಂಜಿ ಜನ ರೈಲ್ ಡೇ ತೀರ್ ಪೋತೆರ್. ಈ ಇಸಯ ರೈಲ್ ದ ಸಿಬಂದಿಗ್ ತೆರಿಯಂದೆ ಅರೆನ ಪುನ ಕುಡ ಅವ್ವೇ ರೈಲ್ ಡೇ ಬೊಂಬೈಗ್ ಪಿರ ಪೋಯಿನ ಘಟನೆ ನಡತ್ಂಡ್.
ಕಿನ್ನಿಗೋಳಿದ ಮೆನ್ನಬೆಟ್ಟುದ ಮೋಹನ್‌ ಬಂಗೇರ (56) ತೀರ್ ಪೋಯಿನಾರ್.
ಮೇರ್ ರೈಲ್ ದ ಟಾಯ್ಲೆಟ್ ದ ಉಲಯೇ ತಿಗಲೆ ಬೇನೆಡ್ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್. ಆಂಡ ಈ ಇಸಯ ಗೊತ್ತಿಜ್ಜಂದೆ ಮೆರೆನ ಕುಟುಂಬದಕುಲು ಬೊಂಬೈ ಮುಟ್ಟ ನಾಡ್ದೆರ್.
ಮೋಹನ್‌ ಬಂಗೇರ ಸುಮಾರ್ ವರ್ಷೊರ್ದಿಂಚ ಬೊಂಬೈಡ್ ಮಿಲ್ಕ್ ಪಾರ್ಲರ್‌ ನಡಪಾವೊಂದು ಇತ್ತೆರ್. ಅರೆನ ಬೊಡೆದಿ ಬೊಕ್ಕ ರಡ್ಡ್ ಆಣ್ ಜೋಕುಲು ಕಿನ್ನಿಗೋಳಿದ ಇಲ್ಲಲ್ ಉಲ್ಲೆರ್.
ಕುಡ್ಲ : ಇತ್ತೆ ಶಾಸಕೆರೆನ್ ಕಂಡುನಕ್ಲೆನ ಉಪದ್ರ ಜಾಸ್ತಿ ಆತ್ಂಡ್. ಅಂಚಾದ್ ರಾಜ್ಯೊಗು ಭದ್ರ ಸರಕಾರ ಮಲ್ಪರೆ ಕಾಂಗ್ರೆಸ್ ದ 150 ಶಾಸಕೆರೆನ್ ಗೆಂದಾದ್ ಕೊರ್ಲೆ ಪಂದ್ ಎಐಸಿಸಿ ಅಧ್ಯಕ್ಷೆರ್ ಮಲ್ಲಿಕಾರ್ಜುನ ಖರ್ಗೆ ಬಿನ್ನಾಪು ಮಲ್ತೆರ್.
ಕುಡ್ಲಡ್ ಸುದ್ದಿಗೋಷ್ಠಿಡ್ ಪಾತೆರಿನ ಆರ್, ಸದ್ಯದ ಪ್ರಜಾಪ್ರಭುತ್ವ ವ್ಯವಸ್ಥೆಡ್ ಶಾಸಕೆರೆನೇ ಕಂಡ್ ದ್ ಕೊನೊವಪಂದುಲ್ಲೆರ್. ಅಂಚಿನಕ್ಲೆನ ಉಪದ್ರ ಜಾಸ್ತಿ ಆತ್ಂಡ್. ಕರ್ನಾಟಕ, ಗುಜರಾತ್, ಗೋವಾ, ಉತ್ತರಾಖಂಡ,ಮಣಿಪುರ ಸೇರ್ದ್ ಇಂಚಿನ ಕಡೆಟ್ಟ್ ಪಕ್ಷದ ಶಾಸಕೆರೆನ್ ಕಂಡ್ ದ್ ಕೊನೊವೊಂದುಲ್ಲೆರ್. ಅಕ್ಲೆನ ಮಿತ್ತ್ ಐಟಿ, ಇಡಿ ರೈಡ್ ಮಲ್ಪಾವುನ ಮುಕೇನ ಕಂಡೊಂದು ಕೊನೊಪೆರ್. ಅಂಚಾದ್ ಬರ್ಪಿನ ವೋಟುಡು ಗೆಂದಿನ 150 ಸೀಟ್ ಡ್ ಒಂಜಿ ರಡ್ಡ್ ಶಾಸಕೆರೆನ್ ಕೊನೊಯೆರ್ಡಲ ರಾಜ್ಯಗ್ ಸ್ಥಿರವಾಯಿನ ಸರ್ಕಾರೊನು ಕಾಂಗ್ರೆಸ್ ಕೊರ್ಪುಂಡು. ಅಂಚಾದ್ 150 ಸೀಟ್ ಗೆಂದಾದ್ ಕೊರ್ಲೆ ಪಂದ್ ಖರ್ಗೆ ಪಂಡೆರ್.
ರಾಮ್ ಫ್ರೆಂಡ್ಸ್ (ರಿ.) ಕಟೀಲ್ ವತಿರ್ದ್ “ಆರೋಗ್ಯ ಸೇವಾ ನಿಧಿ ಅಭಿಯಾನ” ಶ್ರೀ ಕ್ಷೇತ್ರ ಪೊಳಲಿದ ಜಾತ್ರೆ ಉಚ್ಚಯದ ಇಸೇಸ ದಿನತಾನಿ ನಡತ್ಂಡ್.
ಈ ಅಭಿಯಾನಡ್ ಸಂಗ್ರಹ ಆಯಿನ ಪನವುನು ಕ್ಷೇತ್ರದ ಆಡಳಿತ ಮಂಡಳಿದ ಕೂಟದ ಸೇವಾ ಬಂಧುಲೆನ ಸಮ್ಮುಖಡ್ ಕ್ಷೇತ್ರದ ಪ್ರಧಾನ ಅರ್ಚಕೆರೆನ ಕೈರ್ದ್ “ಬಡಪತ್ತ್ ದ ಮೂಜಿ ಕುಟುಂಬಗ್ ಆರೋಗ್ಯ ಚಿಕಿತ್ಸೆಗಾದ್ 1,20,000 ರೂ. ಕೊರಿಯೆರ್.
ರಾಷ್ಟ್ರೀಯ ಕಾಂಗ್ರೆಸ್ ಪಕ್ಷದ ನಾಯಕೆರ್ ರಾಹುಲ್ ಗಾಂಧಿ ಮೇರ್ ಎ.27 ಕ್ಕ್ ಗುರುವಾರ ಕುಡ್ಲಗ್ ಬರಿಯೆರೆ ಉಲ್ಲೆರ್.
ಅನಿ ಪೇಂಟೆಡ್ ನಿಘಂಟ್ ಮಲ್ತಿನ ರೋಡ್ ಶೋ ನ್ ಬದಲ್ ಮಲ್ತ್ ದ್ ಬಯ್ಯಗ್ 3.30 ಕ್ಕ್ ಅಡ್ಯಾರ್ ದ ಸಹ್ಯಾದ್ರಿ ಕಾಲೇಜ್ ದ ಎದುರುದ ಆವರಣಡ್ ಬಹಿರಂಗ ಸಭೆನ್ ಆಯೋಜನೆ ಮಲ್ದೆರ್.
ಅಂಚಾದ್ ಈ ಸಭೆಕ್ಕ್ ಪುತ್ತೂರ್, ಸುಳ್ಯ, ಬೊಲ್ತೇರ್, ಬಂಟ್ವಾಳ ವಿಧಾನಸಭೆ ಕ್ಷೇತ್ರಲೆರ್ದ್ ಬರ್ಪುನ ಗಾಡಿಲೆಗ್ ಸಹ್ಯಾದ್ರಿ ಕಾಲೇಜ್ ದ ಆವರಣದ ಕೈತಲ್ ದ ಆವರಣಡ್ ಪಾರ್ಕಿಂಗ್ ವ್ಯವಸ್ಥೆ ಉಂಡು.
ಅಂಚೆನೆ ಬೆದ್ರ, ಕುಡ್ಲ ದಕ್ಷಿಣ, ಕುಡ್ಲ ಉತ್ತರ, ಕುಡ್ಲ (ಉಳ್ಳಾಲ) ವಿಧಾನಸಭೆ ಕ್ಷೇತ್ರಲೆರ್ದ್ ಬರ್ಪುನ ಗಾಡಿಲೆಗ್ ಅಡ್ಯಾರ್ ಗಾರ್ಡನ್ ಡ್ ವ್ಯವಸ್ಥೆ ಮಲ್ದೆರ್.
ಕೈಕಂಬ: ಕಂದಾವರ ಶ್ರೀ ವಾಸುಕಿ ಸುಬ್ರಹ್ಮಣ್ಯೇಶ್ವರ ದೇವಲ್ಯಡ್ ಎ.29 ರ್ದ್ ಮೇ 8 ಮುಟ್ಟ ಬ್ರಹ್ಮಕಲಶ ಉಚ್ಚಯ ನಡಪರೆ ಉಂಡು.
ಮೇ 4 ಗುರುವಾರ ಬೊಲ್ಪುಗು ಶ್ರೀ ವಾಸುಕಿ ಸುಬ್ರಹ್ಮಣ್ಯ ಸ್ವಾಮಿನ ಪುನರ್ ಪ್ರತಿಷ್ಠೆ ನಡಪರೆ ಉಂಡು.
ಮೇ 7 ಐತಾರ ಬ್ರಹ್ಮಮಂಡಲ ಯಚ್ಚಯ (ಢಕ್ಕೆ ಬಲಿ) ಬೊಕ್ಕ ಶ್ರೀ ವಾಸುಕಿ ಸುಬ್ರಹ್ಮಣ್ಯ, ಮಹಾಗಣಪತಿ, ನಾಗಬ್ರಹ್ಮ, ನಾಗದೇವ, ರಕ್ತೇಶ್ವರಿ, ಅಬ್ಬಗ ದಾರಗ, ನಂದಿಗೋಣ, ಭೈರವನ ಧಾರ್ಮಿಕ ಆಚರಣೆಲು ಕುಡುಪು ನರಸಿಂಹ ತಂತ್ರಿಲು, ಸಗ್ರಿ ಗೋಪಾಲಕೃಷ್ಣ ಸಾಮಗ, ಮದ್ದೂರು ಕೃಷ್ಣ ಪ್ರಸಾದ ವೈದ್ಯೆರ್ ಬೊಕ್ಕರಾಜ ಕುಡುಪು ವೈದ್ಯೆರೆನ ಮಾರ್ಗದರ್ಶನಡ್ ನಡಪರೆ ಉಂಡು.
ಅಂಚೆನೆ ಪ್ರತಿದಿನಲ ಬೇತೆ ಬೇತೆ ವೈದಿಕ, ಧಾರ್ಮಿಕ ವಿಧಿ ವಿಧಾನಲು ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಭಗವಾನ್ ವಾಸುಕಿ ಸುಬ್ರಹ್ಮಣ್ಯ ಬೊಕ್ಕ ಪರಿವಾರ ದೇವೆರೆನ ಆಶೀರ್ವಾದ ಪಡೆದ್ ಕೃಪೆಗ್ ಪಾತ್ರರಾವೊಡು ಪಂದ್ ವ್ಯವಸ್ಥಾಪಕ ಟ್ರಸ್ಟಿ, ನವೀಕರಣ ಸಮಿತಿದ ಅಧ್ಯಕ್ಷೆರ್ ಶ್ರೀಧರ ಆಳ್ವ ಕಂದಾವರ ಬಾಳಿಕೆ, ಬ್ರಹ್ಮಕಲಶ ಸಮಿತಿದ ಮುರಳೀಧರ ಶೆಟ್ಟಿ ನಂದಬೆಟ್ಟು, ಕಾರ್ಯಾಧ್ಯಕ್ಷೆರ್ ವೀರೇಂದ್ರ ಶೆಟ್ಟಿ ಕಂದಾವರ ಬಾಳಿಕೆ, ಕಂದಾವರ ಬಾಳಿಕೆ ಕುಟುಂಬಸ್ಥೆರ್, ಶ್ರೀ ವಾಸುಕಿ ಸೇವಾ ಸಮಿತಿ, ಕಂದಾವರ ಬೊಕ್ಕ ಬ್ರಹ್ಮಕಲಶ ಉಪ ಸಮಿತಿ ಲೆಪ್ಪೋಲೆಡ್ ತೆರಿಪಾದೆರ್.
ಮೊಬೈಲ್ ಚಾರ್ಜ್ ಗ್ ದೀದ್ ಗೇಮ್ ಗೊಬ್ಬುನಗ ಮೊಬೈಲ್ ಫೋನ್ ಪುಡಾದ್ 8 ವರ್ಷದ ಪೊಣ್ಣು ಬಾಲೆ ತೀರ್ ಪೋಯಿನ ಘಟನೆ ಕೇರಳದ ತ್ರಿಶೂರ್ ದ ತಿರುವಿಲ್ವಾಮಲಡ್ ಸೋಮಾರ ರಾತ್ರೆ ನಡತ್ಂಡ್.
ಪಟ್ಟಿಪರಂಬುದ ಆದಿತ್ಯಶ್ರೀ (8) ತೀರ್ ಪೋಯಿನ ಪೊಣ್ಣು ಬಾಲೆ. ಆದಿತ್ಯಶ್ರೀ ತಿರುವಿಲ್ವಾಮಲದ ಕ್ರೈಸ್ಟ್ ನ್ಯೂ ಲೈಫ್ ಶಾಲೆಡ್ 3ನೇ ಕ್ಲಾಸ್ ಕಲ್ತೊಂದು ಇತ್ತಲ್.
ಅರೆಗಲದ ದೊಂಬುದ ಬಿರ್ಸ್ ಗ್ ಪೋನ್ ಪುಡಾದ್ಂಡ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಪಜ್ಜನ್ನೂರು ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್ ತನಿಖೆ ನಡಪಾವೊಂದು ಉಲ್ಲೆರ್. ಅಂಗಾರೆ ವಿಧಿವಿಜ್ಞಾನ ಪರೀಕ್ಷೆ ನಡೆಪಾಯೆರೆ ಉಂಡು ಪಂದ್ ಪೊಲೀಸೆರ್ ತೆರಿಪಾದೆರ್.
ಕುಡ್ಲ ಮಹಾನಗರ ಪಾಲಿಕೆ ವ್ಯಾಪ್ತಿಡ್ ರಡ್ಡ್ ನನ ದಿನ ನೀರ್ ಇಜ್ಜಿ ಪಂದ್ ವರದಿ ಆತ್ಂಡ್.
ಪಾಲಿಕೆದ ನೀರ್ ಸರಬರಾಜ್ ವ್ಯವಸ್ಥೆ ತುಂಬೆ HLPS- 2 -80MLD ಬೊಕ್ಕ ತುಂಬೆ ರೇಚಕ ಸ್ಥಾವರಡ್ ಇಪ್ಪುನ 1200 ಎಂ.ಎಂ ವ್ಯಾಸದ ಕೊಳವೆ ದುರಸ್ಥಿ ಕಾಮಗಾರಿ ನಡಪರೆ ಉಂಡು.
LLPS-1 ತ್ತ ಪಂಪು ನಂಬ್ರ: 2 ಹೆಡರ್ ಬದಲಾವಣೆ ಕಾಮಗಾರಿ ಬೊಕ್ಕ ಬೇತೆ ಪೂರಕ ಕಾಮಗಾರಿಲೆನ ನಿರ್ವಹಣೆ ಮಲ್ಪರೆ ಇಪ್ಪುನೇರ್ದಾವೆರ ಎ.27 ಗುರುವಾರ ಬೊಲ್ಪುಗು 6 ಗಂಟೆರ್ದ್ ಎ.29 ಸನಿಯಾರ ಬೊಲ್ಪುಗು 6 ಗಂಟೆ ಮುಟ್ಟ 48 ಗಂಟೆದ ಪೊರ್ತು ಕುಡ್ಲ ಪೇಂಟೆಗ್ ನೀರ್ ಇಜ್ಜಿ.
ಈ ಪೊರ್ತುಡು ನೀರ್ ದ ಸರಬರಾಜ್ ಡ್ ವ್ಯತ್ಯಾಸ ಆಪುಂಡು ಪಂದ್ ಕುಡ್ಲ ಮಹಾನಗರ ಪಾಲಿಕೆದ ಪ್ರಕಟನೆ ತೆರಿಪಾದ್ಂಡ್.
