Tulu News

ಮೇ26-28: ಬೋಳಿಯಾರ್ ಶ್ರೀ ಸತ್ಯ ಮಂತ್ರದೇವತೆ, ಕೊರಗಜ್ಜ, ಮಂತ್ರಗುಳಿಗ ಸಾನಿಧ್ಯಡ್ ವರ್ಷಾಧಿದ ಕೋಲ

ಪಲ್ಲ: ಬೋಳಿಯಾರ್ ಶ್ರೀ ಸತ್ಯ ಮಂತ್ರದೇವತೆ, ಕೊರಗಜ್ಜ, ಮಂತ್ರಗುಳಿಗ ಸಾನಿಧ್ಯಡ್ ವರ್ಷಾಧಿದ ಕೋಲ ಮೇ26-28 ಮುಟ್ಟ ನಡಪರೆ ಉಂಡು.

ಮೇ26 ಕ್ಕ್ ಬೊಲ್ಪುಗು ಗಣಪತಿ ಹೋಮ, ಶ್ರೀ ಸತ್ಯಮಂತ್ರದೇವತೆ, ಕೊರಗಜ್ಜ, ಮಂತ್ರಗುಳಿಗ ದೈವೊಲೆಗ್ ನವಕ ಕಲಶಾಭಿಷೇಕ, ಮಧ್ಯಾಹ್ನ ಅನ್ನಸಂತರ್ಪಣೆ ಬಯ್ಯಗ್ ನಾಗದೇವೆರೆಗ್ ತನುತರ್ಪಣ ಸೇವೆ, ರಾತ್ರೆ ಅನ್ನಸಂತರ್ಪಣೆ ನಡತ್ಂಡ್.

ಮೇ27 ಕ್ಕ್ ಬಯ್ಯಗ್ ಶ್ರೀ ಸತ್ಯಮಂತ್ರದೇವತೆನ ದರ್ಶನ ಸೇವೆ, ರಾತ್ರೆ ಅನ್ನಸಂತರ್ಪಣೆ, ಶ್ರೀ ಸತ್ಯ ಮಂತ್ರದೇವತೆನ ಕೋಲ ನಡಪರೆ ಉಂಡು.

ಮೇ28 ಕ್ಕ್ ಮಧ್ಯಾಹ್ನ ಮಂತ್ರ ಗುಳಿಗನ ಕೋಲ, ಅನ್ನಸಂತರ್ಪಣೆ, ಬಯ್ಯಗ್ ಕೊರಗಜ್ಜನ ಕೋಲ ನಡಪರೆ ಉಂಡು ಪಂದ್ ಆದಿತ್ಯ ಪೂಜಾರಿ ಬೋಳಿಯಾರ್ ಲೆಪ್ಪೋಲೆಡ್ ತೆರಿಪಾದೆರ್.

ಎ.29 ಕ್ಕ್ ಅಮಿತ್ ಷಾ ಕುಡ್ಲಗ್ ಭೇಟಿ

ರಾಜಕೀಯ ನಿಪುಣೆ ಅಮಿತ್ ಷಾ ಎ.29 ಸನಿಯಾರ ಕುಡ್ಲಗ್ ಬರಿಯೆರೆ ಉಲ್ಲೆರ್.

ಬೊಕ್ಕ ಕುಡ್ಲ ಪೇಂಟೆದ ದಕ್ಷಿಣದ ಬಿಜೆಪಿ ಅಭ್ಯರ್ಥಿ ಡಿ. ವೇದವ್ಯಾಸ ಕಾಮತ್ ಮೆರೆನ ಪರವಾದ್ ಮಲ್ಲ ರೋಡ್ ಶೋ ಮಲ್ಪೆರೆ ಉಲ್ಲೆರ್.

ಎ.26-28: ತಿಂಗಳಾಡಿ ಶ್ರೀ ಮಾರಿಯಮ್ಮ ದೇವಿ ದೇವಲ್ಯಡ್ ಶ್ರೀ ಮಾರಿಪೂಜೆ ಮಹಾ ಉಚ್ಚಯ

ಪುತ್ತೂರ್: ಗಾಂಧಿನಗರ ಕೈತಲ್ ದ ತಿಂಗಳಾಡಿ ಶ್ರೀ ಮಾರಿಯಮ್ಮ ದೇವಿ ದೇವಲ್ಯಡ್ ಶ್ರೀ ಮಾರಿಪೂಜೆ ಮಹಾ ಉಚ್ಚಯ ಎ.26-28 ಮುಟ್ಟ ನಡಪರೆ ಉಂಡು.

ಎ.27 ಗುರುವಾರ ಕಾಂಡೆ ಮಾರಿ ಕಲೆಪರೆ, ಬೊಕ್ಕ ಅಮ್ಮನ ದರ್ಶನ, ದೈವೊಲೆನ ದರ್ಶನ, ಮಧ್ಯಾಹ್ನ ಮಹಾಪೂಜೆ, ಪರಕೆ ಕಾಣಿಕೆ ಸ್ವೀಕಾರ, ಅನ್ನಸಂತರ್ಪಣೆ ಬಯ್ಯಗ್ ಭಂಡಾರ ದೇವಲ್ಯಗ್ ಕೊನೊಯೆರೆ ಉಂಡು.

ಎ.28 ಸುಕ್ರಾರ ಕಾಂಡೆ ಶ್ರೀ ದೇವಿನ ಭಂಡಾರ ಪ್ರತಿಷ್ಠಾಪನೆ ಆವರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶಿಕ ಆಡಳಿತ ಮೊಕ್ತೇಸರೆರ್, ದೇವಲ್ಯದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮೇ3: ಮುಲ್ಕಿಗ್ ಬರಿಯೆರೆ ಉಲ್ಲೆರ್ ಪ್ರಧಾನಿ ಮೋದಿ

ಪ್ರಧಾನಿ ನರೇಂದ್ರ ಮೋದಿ ಮೇರ್ ಮೇ3 ಕ್ಕ್ ಬೊಲ್ಪುಗು 10 ಗಂಟೆಗ್ ಮುಲ್ಕಿಗ್ ಭೇಟಿ ಕೊರಿಯೆರೆ ಉಲ್ಲೆರ್.

ಅಂಚಾದ್ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆರ್ದ್ ಬರ್ಪಿನ ಕಾರ್ಯಕರ್ತೆರೆಗ್ ಪಾರ್ಕಿಂಗ್ ವ್ಯವಸ್ಥೆಗ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪ್ರತ್ಯೇಕ ಕೂಟ ರಚನೆ ಮಲ್ತ್ ದ್, ಖಾಸಗಿ, ಸರಕಾರಿ ಜಾಗೆಲೆನ್ ಗುರುತಿಸಾದೆರ್. ಕೆಲವು ಕಡೆಟ್ಟ್ ಕಂಡನ್ ಪಾರ್ಕಿಂಗ್ ಗ್ ಗಲಸಿಯೆರೆ ನಿರ್ಧಾರ ಮಲ್ದೆರ್. ನೆಕ್ಕ್ ಕೈತಲ್ ದಕುಲ್ಲ ಸಹಕಾರ ಕೊರ್ತೆರ್.ಸುಮಾರ್ 50-60 ಎಕರೆ ಜಾಗೆನ್ ಗುರುತಿಸಾದ್ ಗಾಡಿ ಪಾರ್ಕಿಂಗ್ ಗ್ ವ್ಯವಸ್ಥೆ ಮಲ್ದೆರ್.

ಬೊಕ್ಕ ರಾಷ್ಟ್ರೀಯ ಹೆದ್ದಾರಿ ಪಾವಂಜೆರ್ದ್ ಮುಲ್ಕಿ ಶಾಂಭವಿ ಸಂಕ ಮುಟ್ಟ ಮುಲ್ಕಿ ಪೇಂಟೆನ್ ಶೃಂಗಾರ ಮಲ್ಪೆರೆ ಸಿದ್ದತೆ ನಡತೊಂದು ಉಂಡು.

ಅಂಚೆನೆ ಮೋದಿ ಬರ್ಪುನ ಜಾಗೆದ ಸಮತಟ್ಟ್ ಆವೊಂದು ಉಂಡು. ಈ ಜಾಗೆಗ್ ಶಾಸಕೆರ್ ಎ. ಉಮಾನಾಥ ಕೋಟ್ಯಾನ್ ಭೇಟಿ ಕೊರ್ನ ಪೊರ್ತುಡು ಮೆರೆನೊಟ್ಟಿಗೆ ಮುಖಂಡೆರ್ ಸುನಿಲ್ ಆಳ್ವ, ಸುಭಾಷ್ ಶೆಟ್ಟಿ, ಸತೀಶ್ ಅಂಚನ್, ರಂಗನಾಥ ಶೆಟ್ಟಿ, ಶೈಲೇಶ್ ಕುಮಾರ್, ವಿನೋದ್ ಸಾಲ್ಯಾನ್ ಬೆಳ್ಳಾಯರ್, ವಿಠಲ ಎನ್ ಎಂ, ಪ್ರತೀಕ್ ಶೆಟ್ಟಿ, ಕಮಲಾಕ್ಷ ಬಡಗುಹಿತ್ಲು, ಜಯಾನಂದ ಮುಲ್ಕಿ, ಉಮೇಶ್ ಮಾನಂಪಾಡಿ, ಶಶಿಕುಮಾರ್, ಸುನಿಲ್ ಇಟಗ, ರಮೇಶ್ ಹಂಗರಗಿ ಇತ್ತೆರ್.

ಅಂಚೆ ಇಲಾಖೆ ಕುಡ್ಲ ವಿಭಾಗ ಬೊಕ್ಕ ಇಂಡಿಯಾ ಪೋಸ್ಟ್ ಪೇಮೆಂಟ್ಸ್ ಬ್ಯಾಂಕ್ ದ ಒಟ್ಟುಸೇರಿಗೆಡ್ ಆಕ್ಸಿಡೆಂಟ್ ವಿಮೆ ಸೇವೆ

ಭಾರತೀಯ ಅಂಚೆ ಇಲಾಖೆ ಕುಡ್ಲ ವಿಭಾಗ ಬೊಕ್ಕ ಇಂಡಿಯಾ ಪೋಸ್ಟ್ ಪೇಮೆಂಟ್ಸ್ ಬ್ಯಾಂಕ್ ದ ಒಟ್ಟುಸೇರಿಗೆಡ್ ಆಕ್ಸಿಡೆಂಟ್ ವಿಮೆ ಸೇವೆ ಮಲ್ಪೊಲಿ.

ಅಂಚೆ ಇಲಾಖೆದ ಉಳಿತಾಯ ಯೋಜನೆ, ಅಂಚೆ ಜೀವ ವಿಮಾ ಯೋಜನೆ, ಸುಕನ್ಯಾ ಸಮೃದ್ಧಿ ಯೋಜನೆ, ಪಬ್ಲಿಕ್ ಪ್ರಾವಿಡೆಂಟ್ ಫಂಡ್ ಯೋಜನೆ, ಪ್ರಧಾನ ಮಂತ್ರಿ ಸುರಕ್ಷಾ ವಿಮಾ ಯೋಜನೆ, ಪ್ರಧಾನ ಮಂತ್ರಿ ಜೀವನ ಜ್ಯೋತಿ ವಿಮಾ ಯೋಜನೆ, ಆಧಾರ್ ಕಾರ್ಡ್ ಗ್ ಮೊಬೈಲ್ ನಂಬರ್ ಜೋಡಣೆ ಅತ್ತಂಡ ಬದಲಾವಣೆ, ಆಧಾರ್ ಜೋಡಣೆ ಆಯಿನ ನಿಕುಲೆನ ಒವ್ವೇ ಬ್ಯಾಂಕ್ ಅಕೌಂಟ್ ರ್ದ್ ಕಾಸ್ ಪಡೆಯೆರೆ ವರ್ಷೊಗು 399 ರೂ. ಅತ್ತಂಡ 396 ಕ್ಕ್ 10 ಲಕ್ಷ ರೂ. ಅಪಘಾತ ವಿಮೆ ಸೇವೆಲು ಮುಲ್ಪ ತಿಕ್ಕುಂಡು ಪಂದ್ ಕುಡ್ಲ ವಿಭಾಗದ ಪೆರಿಯ ಅಂಚೆ ಅಧೀಕ್ಷಕೆರ್ ಪ್ರಕಟಣೆಡ್ ತೆರಿಪಾದೆರ್.

ಅಂಚೆನೆ ಎಚ್ಚದ ಪೊಲಬುಗಾದ್ ಪೋಸ್ಟ್ ಮ್ಯಾನ್ ಅತ್ತಂಡ ಕೈತಲ್ ದ ಅಂಚೆ ಕಚೇರಿನ್ ಸಂಪರ್ಕ ಮಲ್ಪುಲೆ.

ಎ.29: ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲದ ಚಾವಡಿಡ್ ಅಂಚೆ ಇಲಾಖೆದ ಯೋಜನೆಲೆನ ಬಗೆಟ್ ಪೊಲಬು, ಕಾರ್ಯಾಗಾರ

ಹಳೆಯಂಗಡಿ: ಯುವ ಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯ, ನೆಹರು ಯುವ ಕೇಂದ್ರ ಕುಡ್ಲ, ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆ ಕುಡ್ಲ, ಭಾರತೀಯ ಅಂಚೆ ಇಲಾಖೆ ಕುಡ್ಲ ವಿಭಾಗ, ಶ್ರೀ ಗಣೇಶೋತ್ಸವ ಸೇವಾ ಟ್ರಸ್ಟ್ (ರಿ.) ಹಳೆಯಂಗಡಿ ಬೊಕ್ಕ ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ (ರಿ.) ಹಳೆಯಂಗಡಿ ನೆತ್ತ ಒಟ್ಟುಸೇರಿಗೆಡ್ ಅಂಚೆ ಇಲಾಖೆದ ಬೇತೆ ಬೇತೆ ಯೋಜನೆಲೆನ ಬಗೆಟ್ ಪೊಲಬು ಬೊಕ್ಕ ಕಾರ್ಯಾಗಾರ ಲೇಸ್ ಎ.29 ಸನಿಯಾರ ಬೊಲ್ಪುಗು 9.30 ರ್ದ್ 2 ಗಂಟೆ ಮುಟ್ಟ ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲದ ಚಾವಡಿಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ಬಲ್ಮಠದ ಪೆರಿಯ ಅಂಚೆ ಅಧೀಕ್ಷಕೆರ್ ಶ್ರೀಹರ್ಷ ಎನ್ ಒಯಿಸೊನ್ವೆರ್. ಬೊಕ್ಕ MBBS, DNB (General Medicine), PGDCR ಡಾ. ನಿಶಾಂಕ್ ಎಸ್ ಶೆಟ್ಟಿಗಾರ್ ಮೇರ್ ಲೇಸ್ ದ ಉದಿಪನ ಮಲ್ಪುವೆರ್.

ಅಂಚೆನೆ ಈ ಲೇಸ್ ಗ್ ಶ್ರೀ ವಿದ್ಯಾವಿನಾಯಕ ರಜತ ಸೇವಾ ಟ್ರಸ್ಟ್ (ರಿ.) ಹಳೆಯಂಗಡಿ, ಸುವರ್ಣ ಮಹಾ ಉಚ್ಚಯ ಸಮಿತಿ ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ (ರಿ.) ಹಳೆಯಂಗಡಿ, ಜಿಲ್ಲಾ ಪ್ರಶಸ್ತಿ ವಿಜೇತ, ಯುವತಿ ಬೊಕ್ಕ ಮಹಿಳಾ ಮಂಡಲ (ರಿ.) ಹಳೆಯಂಗಡಿ ಮೊಕುಲು ಸಹಕಾರ ಕೊರ್ತೆರ್.

ಈ ಸರ್ತಿ 50,000 ವೋಟು ಲೀಡ್ ಡ್ ಗೆಂದುನ ವಿಶ್ವಾಸ : ಉಮಾನಾಥ ಕೋಟ್ಯಾನ್

ಮುಲ್ಕಿ : ಐನ್ ವರ್ಷದ ಪಿರವುಡು ಮುಲ್ಕಿ-ಬೆದ್ರ ಕ್ಷೇತ್ರಡ್ ಯಾನ್ ಶಾಸಕೆ ಆದಿತ್ತಿಜಿಡಲ ಜನಕ್ಲೆಡ ವೋಟು ಕೇಂದಿನೆಕ್ಕ್ ಎನ್ನ ಮಿತ್ತ್ ವಿಶ್ವಾಸ ದೀದ್ 30,000 ಸಾರ ವೋಟುದ ಲೀಡ್ ಡ್ ಗೆಂದಾದೆರ್. ಈ ಸರ್ತಿ ಯಾನ್ 5 ವರ್ಷ ಅಭಿವೃದ್ಧಿದ ಬೇಲೆ ಮಲ್ತ್ ತೋಜಾದ್ ವೋಟು ಕೇನೊಂದುಲ್ಲೆ. ಅಂಚಾದ್ ಜನಕುಲು ಎನನ್ 50,000 ವೋಟುದ ಲೀಡ್ ಡ್ ಎನನ್ ಗೆಂದಾವೆರ್ ಪನ್ಪುನ ವಿಶ್ವಾಸ ಉಂಡು ಪಂದ್ ಮುಲ್ಕಿ ಬೆದ್ರ ವಿಧಾನಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ, ಮಾಜಿ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಪಂಡೆರ್.

ಮುಲ್ಕಿದ ಪುನರೂರು ಕಟ್ವಾಣದ ಸ್ವಾಗತ್ ಹೋಟೆಲ್ ದ ಚಾವಡಿಡ್ ಬುಧಾರ ನಡತಿನ ಸುದ್ದಿಗೋಷ್ಠಿಡ್ ಆರ್ ಪಾತೆರಿಯೆರ್.

ಕ್ಷೇತ್ರಡ್ ಅಭಿವೃದ್ಧಿ ಯೇ ಮೂಲ ಮಂತ್ರ. ಆ ಬೇಲೆನ್ ತೊಜಪಾದ್ ಇಲ್ಲ್ ಇಲ್ಲ್ ಗ್ ವೋಟು ಕೇನರೆ ಪೋನಗ ಎಡ್ಡೆ ಅಭಿಪ್ರಾಯ ಬರ್ಪಿನವು ಕೇನ್ನಗ ಕುಷಿ ಆಪುಂಡು. ಮೇ 3 ತಾರೀಕ್ ಗ್ ಕಾಂಡೆ 10 ಗಂಟೆಗ್ ಮುಲ್ಕಿ- ಕೊಲ್ನಾಡ್ ಗ್ ಪ್ರಧಾನಿ ನರೇಂದ್ರ ಮೋದಿ ಉಂದುವೇ ಸುರೂತ್ತ ಸರ್ತಿ ತಾಲೂಕು ಕೇಂದ್ರೊಗು ವೋಟುದ ಪ್ರಚಾರೊಗು ಬರೊಂದುಲ್ಲೆರ್ ಪಂದ್ ಆರ್ ಪಂಡೆರ್.

ಮುಲ್ಕಿ- ಬೆದ್ರ ಕ್ಷೇತ್ರೊಗು ಪ್ರಚಾರದ ಅಂಗವಾದ್ ಬತ್ತಿತ್ತಿನ ಮಹಾರಾಷ್ಟ್ರದ ಬಿಜೆಪಿ ಸಂಸದೆರ್ ಗೋಪಾಲ ಶೆಟ್ರ್ ಪಾತೆರ್ದ್, ಕರ್ನಾಟಕೊಡು 140 ಸೀಟ್ ಗೆಂದುನ ವಿಶ್ವಾಸ ಉಂಡು. ದೇಶದ ಅಭಿವೃದ್ಧಿ ಆವೊಡ್ಡ ಕೇಂದ್ರಡ್ ಲ ರಾಜ್ಯಡ್ ಲ ಬಿಜೆಪಿ ಸರ್ಕಾರ ಬರೊಡು.ಒರ್ಂಬ ವರ್ಷೊಡು ಪ್ರಧಾನಿ ನರೇಂದ್ರ ಮೋದಿ ಮಾತಾ ಕ್ಷೇತ್ರೊಡು ಅಭಿವೃದ್ಧಿ ಮಲ್ದೆರ್. ನಿತಿನ್ ಗಡ್ಕರಿ ಮೆರೆನ ಮುಕೇನ ಮೂಲಸೌಕರ್ಯ ಅಭಿವೃದ್ಧಿ ಮಲ್ದೆರ್ ಪಂಡೆರ್.

ನರೇಂದ್ರ ಮೋದಿ ಆಡಳಿತ ಅವಧಿಡ್ ಆರ್ಥಿಕವಾದ್ ಭಾರಿ ಪ್ರಗತಿ ಆತ್ಂಡ್.1 ಲಕ್ಷ ಕೋಟಿ ಜಿಎಸ್ ಟಿ ಸಂಗ್ರಹ ಆತ್ಂಡ್. ದುಂಬುದ ಅವಧಿಡ್ 1.6 ಲಕ್ಷ ಕೋಟಿ ದ ಟಾರ್ಗೆಟ್ ಉಂಡು ಪಂದ್ ಪಂಡೆರ್.

ಸುದ್ದಿಗೋಷ್ಠಿಡ್ ಮಾಜಿ ಶಾಸಕೆರ್ ಪದ್ಮನಾಭ ಕೊಟ್ಟಾರಿ, ಮಹಾರಾಷ್ಟ್ರ ಬಿಜೆಪಿ ಉಪಾಧ್ಯಕ್ಷೆರ್ ಹರೀಶ್ ಶೆಟ್ಟಿ ಎರ್ಮಾಳ್, ಜಿಲ್ಲಾ ಬಿಜೆಪಿ ಪ್ರಕೋಷ್ಠದ ದಿವಾಕರ ಸಾಮಾನಿ ಚೇಳಾಯಿರುಗುತ್ತು, ಭುವನಾಭಿರಾಮ ಉಡುಪ, ಮುಲ್ಕಿ ನಗರ ಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ, ಉಪಾಧ್ಯಕ್ಷೆರ್ ಸತೀಶ್ ಅಂಚನ್, ಮುಲ್ಕಿ ಬೆದ್ರ ಮಂಡಲ ಅಧ್ಯಕ್ಷೆರ್ ಸುನಿಲ್ ಆಳ್ವ, ಕೇಶವ ಕರ್ಕೇರ, ವಿನೋದ್ ಬೊಳ್ಳೂರು, ವಿನೋದ್ ಬೆಳ್ಳಾಯಿರು ಮೊಕುಲು ಮಾತ ಇತ್ತೆರ್.

ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಪೊಸ ಅಧ್ಯಕ್ಷೆರಾದ್ ಶ್ರೀಕಾಂತ ಎಮ್ ಭಂಡಿವಾಡ ನೇಮಕ

ಕುಡ್ಲ: ರಾಷ್ಟ್ರದ ಪ್ರಮುಖ ಗ್ರಾಮೀಣ ಬ್ಯಾಂಕ್ ಲೆನ ಸಾಲ್ ಡ್ ಇಪ್ಪುನ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಪೊಸ ಅಧ್ಯಕ್ಷೆರಾದ್ ಶ್ರೀಕಾಂತ ಎಮ್ ಭಂಡಿವಾಡ (54) ನೇಮಕ ಆತೆರ್.

ಮೂಲತಃ ಧಾರವಾಡದಾರಾಯಿನ ಮೇರ್ ಕೃಷಿಟ್ಟ್ ಸ್ನಾತಕೋತ್ತರ ಪದವಿ ಪಡೆತೆರ್. 1994 ಟ್ಟ್ ಕೃಷಿ ವಿಸ್ತರಣಾ ಅಧಿಕಾರಿಯಾದ್ ಕೆನರಾ ಬ್ಯಾಂಕ್ ಸೇರಿನ ಮೆರೆಗ್, ಬ್ಯಾಂಕಿಂಗ್ ರಂಗಡ್ 29 ವರ್ಷದ ಅನುಭವ ಉಂಡು. ಅಂಚೆನೆ ಹರ್ಯಾಣ, ರಾಜಸ್ಥಾನ್, ಬಿಹಾರ್ ಸೇರಿನಂಚೆನೆ ರಾಜ್ಯದ ದಾವಣಗೆರೆ, ಬೆಂಗ್ಲೂರ್ ಬೇತೆ ಬೇತೆ ಕಡೆಟ್ ಶಾಖೆದ ಮುಖ್ಯಸ್ಥೆರಾದ್, ಪ್ರಾದೇಶಿಕ ಮುಖ್ಯಸ್ಥೆರಾದ್, ಸರ್ಕಲ್ ಮುಖ್ಯಸ್ಥೆರಾದ್, ಕೆನರಾ ಬ್ಯಾಂಕ್ ದ ಕೆನ್ ಫಿನ್ ಹೋಮ್ಸ್ ದ ಉಪ ಕಾರ್ಯನಿರ್ವಾಹಕ ನಿರ್ದೇಶಕೆರಾದ್ 3 ವರ್ಷ ಸೇವೆ ಸಂದಾದೆರ್.

ಅತ್ತಂದೆ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಅಧ್ಯಕ್ಷೆರಾದ್ ಅಧಿಕಾರ ಸ್ವೀಕಾರ ಮಲ್ಪುನ ದುಂಬು, ಮೇರ್ 40 ಸಾರ ಕೋಟಿ ರೂ.ರ್ದ್ ಎಚ್ಚ ವ್ಯವಹಾರ ಇಪ್ಪುನ ಬಿಹಾರ್ ರಾಜ್ಯಡ್ ಇಪ್ಪುನ ಕೆನರಾ ಬ್ಯಾಂಕ್ ದ ಪಾಟ್ನಾ ಸರ್ಕಲ್‌ದ ಮುಖ್ಯಸ್ಥೆರಾದಿತ್ತೆರ್.

ಕೃಷಿಟ್ಟ್ ಸ್ನಾತಕೋತ್ತರ ಪದವೀಧರೆರಾದಿಪ್ಪುನ ಮೇರ್ ಕೆನರಾ ಬ್ಯಾಂಕ್ ದ ಗ್ರಾಮೀಣ ಶಾಖೆಡ್ ಕೃಷಿ ವಿಸ್ತರಣಾ ಅಧಿಕಾರಿಯಾದ್, ಕೆನರಾ ಬ್ಯಾಂಕ್, ಪ್ರಧಾನ ಕಚೇರಿದ ಕೃಷಿ ಸಲಹಾ ಸೇವಾ ವಿಭಾಗಡ್ ಸಲಹೆಗಾರೆರಾದ್, ಕೆನರಾ ಬ್ಯಾಂಕ್ ದ ಪ್ರಧಾನ ಕಚೇರಿಡ್ ಸಿಎಂಡಿ ಸೆಕ್ರೆಟರಿಯೇಟ್‌ಡ್ ಬೇಲೆ ಮಲ್ತಿನ ಅನುಭವ ಮೆರೆಗ್ ಉಂಡು.

ಕೃಷಿ, ಎಂಎಸ್‌ಎಂಇ ಬೊಕ್ಕ ಗ್ರಾಮೀಣ ಹಣಕಾಸು ಕ್ಷೇತ್ರದ ಮೆರೆನ ಅನುಭದ ಪ್ರಯೋಜನ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಮತ್ತದರ ಗ್ರಾಹಕೆರೆಗ್ ತಿಕಿಯೆರೆ ಉಂಡು. ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ದ ಇತ್ತೆದ 9 ಜಿಲ್ಲೆದ ವ್ಯಾಪ್ತಿಡ್ 629 ಶಾಖೆ ಉಂಡು. 33150 ಕೋಟಿ ರೂ. ರ್ದ್ ಎಚ್ಚಾದ ವೈವಾಟ್ ನಡಪಾವೊಂದು ಉಂಡು.

ಬ್ಯಾಂಕ್ ದ ದುಂಬುದ ಅಧ್ಯಕ್ಷೆರ್ ಪಿ ಗೋಪಿಕೃಷ್ಣ ತನ್ನ ಮಾತೃ ಸಂಸ್ಥೆ ಕೆನರಾ ಬ್ಯಾಂಕ್ ದ ಬೆಂಗ್ಲೂರ್ ಸರ್ಕಲ್ ಆಫೀಸ್ ದ ಮುಖ್ಯಸ್ಥೆರಾದ್ ಪೊವೊಂದು ಉಲ್ಲೆರ್. ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಗೋಪಿ ಕೃಷ್ಣ ಮೆರೆನ ಮುತಾಲಿಕೆಡ್ ಸುಮಾರ್ ರಚಾನಾತ್ಮಕ ಯೋಜನೆಲೆನ್ ಅನುಷ್ಠಾನ ಮಲ್ತ್ ನೆನ್ ಮುಲ್ಪ ನೆನೆಪೊಲಿ. ಸೋಮಾರ ಧಾರವಡದ ಬ್ಯಾಂಕ್ ದ ಪ್ರಧಾನ ಕಚೇರಿಡ್ ನಡತಿನ ಲೇಸ್ ಡ್ ಪಿ ಗೋಪಿಕೃಷ್ಣ ಮೆರೆನ್ ಬುರ್ದು ಕೊರಿಯೆರ್.

ದುಬೈಡ್ “ವಿಶ್ವ ಪಟ್ಲ ಸಂಭ್ರಮ-2023” ಲೇಸ್ ಗ್ ಯು.ಎ.ಇ ದ ತುಳು ಕನ್ನಡಿಗೆರ್ ಸಂಪೂರ್ಣ ಸಹಕಾರ ಕೊರೊಡು: ಸರ್ವೋತ್ತಮ ಶೆಟ್ಟಿ

ದುಬೈಡ್ ನಡಪರೆ ಇಪ್ಪುನ “ವಿಶ್ವ ಪಟ್ಲ ಸಂಭ್ರಮ-2023” ವಿಶ್ವ ಮಟ್ಟಡ್ ಪುಗರ್ತೆ ಪಡೆಯೆರೆ ಉಂಡು. ಅತ್ತಂದೆ ವಿಶ್ವ ಮಟ್ಟಡ್ ನಡಪುನ ಈ ಲೇಸ್ ಗ್ ಯು.ಎ.ಇ ದ ತುಳು ಕನ್ನಡಿಗೆರ್ ಸಂಪೂರ್ಣ ಸಹಕಾರ ಕೊರೊಡು ಪಂದ್ ಪಟ್ಲ ಫೌಂಡೇಶನ್ ದುಬೈ ಘಟಕದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ ಪಂಡೆರ್.

ಜೂ.11 ಕ್ಕ್ ದುಬೈ ಕರಮಾದ ಶೇಖ್ ರಶೀದ್ ಅಡಿಟೋರಿಯಂಡ್ (ಇಂಡಿಯನ್ ಸ್ಕೂಲ್ ಕರಮ- ವೂದ್ ಮೆಹತಾ) ನಡಪರೆ ಇಪ್ಪುನ ವಿಶ್ವ ಪಟ್ಲ ಸಂಭ್ರಮ ಬೊಕ್ಕ ದುಬೈ ಯಕ್ಷ ಉಚ್ಚಯದ ಅಂಗವಾದ್ ನಡಪರೆ ಇಪ್ಪುನ ಗೌಜಿದ ಆಟ ದಶಾವತಾರ ನೆತ್ತ ಲೆಪ್ಪೋಲೆ ಬೊಕ್ಕ ಟಿಕೆಟ್ ಬುಡುಗಡೆ ಲೇಸ್ ಇಂಚಿಪ್ಪ ಹೋಟೇಲ್ ಫಾರ್ಚೂನ್ ಪ್ಲಾಝದ ಬ್ಯಾಂಕ್ವೆಟ್ ಹಾಲ್ ಡ್ ನಡತ್ಂಡ್.

ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದು ಮೇರ್ ಸಭೆನ್ ಉದ್ದೇಶಿಸಾದ್ ಪಾತೆರ್ದ್, ಈ ಲೇಸ್ ಡ್ ಪಟ್ಲ ಟ್ರಸ್ಟ್ ದ ಗೌರವಾಧ್ಯಕ್ಷೆರ್ ಸದಾಶಿವ ಶೆಟ್ಟಿ ಕುಳೂರು ಕನ್ಯಾನ, ಪ್ರಧಾನ ಸಂಚಾಲಕೆರ್ ಹರೀಶ ಶೆಟ್ಟಿ ಐಕಳ, ಬೊಕ್ಕ ಮತ ಪಟ್ಲ ಫೌಂಡೇಶನ್ ದ 40 ಘಟಕದ ಪದಾಧಿಕಾರಿಲು ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪಂಡೆರ್.

ಕುಮಾರಿ ವೈಷ್ಣವಿ ಮನೋಹರ್ ಶೆಟ್ಟಿಗಾರ್ ಬೊಕ್ಕ ಕುಮಾರಿ ಪ್ರಾಪ್ತಿ ಜಯಾನಂದ ಪಕ್ಕಳ ಮೊಕ್ಲೆನ ಪ್ರಾರ್ಥನೆದೊಟ್ಟಿಗೆ ಲೇಸ್ ಸುರು ಆಂಡ್.

ಬೊಕ್ಕ ಲೇಸ್ ಗ್ ಬತ್ತಿನ ಬಿನ್ನೆರೆನ್ ಯಕ್ಷಗಾನ ಅಭ್ಯಾಸ ಕೇಂದ್ರದ ಸಂಚಾಲಕೆರ್ ದಿನೇಶ ಶೆಟ್ಟಿ ಎದ್ಕೊಂದು ಪ್ರಾಸ್ತಾವಿಕ ಪಾತೆರ್ದ್, ವಿಶ್ವ ಪಟ್ಲ ಸಂಭ್ರಮ ಬೊಕ್ಕ ದಶಾವತಾರ ಆಟದ ಪ್ರಸಂಗದ ರೂಪುರೇ‍ಷೆನ್ ಸಭೆಕ್ಕ್ ತೆರಿಪಾಯೆರ್. ಬೊಕ್ಕ ಯಕ್ಷಧ್ರುವ ಪಟ್ಲ ಘಟಕದ ಸ್ಥಾಪಕೆರ್ ಸತೀಶ ಶೆಟ್ಟಿ ಮೆರೆನ ಗಾನ ಸಾರಥ್ಯಡ್ ನಡಪರೆ ಇಪ್ಪುನ ದಶಾವತಾರ ಯಕ್ಷಗಾನ ಲೇಸ್ ಡ್ ಪಾಲ್ ಪಡೆಯೆರೆ ಇಪ್ಪುನ ಬಿನ್ನೆರಾದ್ ಕಲಾವಿದೆರ್, ಗಾನ ವಿಶಾರದ ರವಿಚಂದ್ರ ಕನ್ನಡಿಕಟ್ಟೆ, ಪುಗರ್ತೆದ ಚೆಂಡೆ-ಮದ್ದಳೆ ವಾದಕೆರ್ ಪದ್ಮನಾಭ ಉಪಾಧ್ಯಾಯ, ಚೈತನ್ಯಕೃಷ್ಣ ಪದ್ಯಾಣ, ವರ್ಣ ವಸ್ತ್ರಾಲಂಕಾರ ತಜ್ಞೆರ್ ಗಂಗಾಧರ ಶೆಟ್ಟಿಗಾರ್ ಕಿನ್ನಿಗೋಳಿ, ನಿತಿನ್ ಕುಂಪಲ ಬೊಕ್ಕ ಮನೋಜ್ ಶೆಟ್ಟಿಗಾರ್ ಹಳೆಯಂಗಡಿ ಮೊಕ್ಲೆನ ಪೊಲಬುನ್ ಸಭೆಕ್ಕ್ ಕೊರಿಯೆರ್.

ಯುಎಇ ಯಕ್ಷಗಾನ ಅಭ್ಯಾಸ ಕೇಂದ್ರದ ಗುರುಕುಲು ಪ್ರಸಂಗ ನಿರ್ದೇಶಕೆರ್ ಶೇಖರ್ ಡಿ. ಶೆಟ್ಟಿಗಾರ್ ಕಿನ್ನಿಗೋಳಿ ಮೇರ್, ದಶಾವತಾರದ ಕಥಾಹಂದರ- ಪ್ರದರ್ಶನದ ಇಸೇಸತೆದೊಟ್ಟಿಗೆ ದಶಾವತಾರ ಪ್ರಸಂಗಲೆರ್ದ್ ಆಯ್ಕೆ ಮಲ್ತಿನ ಮೂಲ ಪ್ರಸಂಗ ಕಬಿಲೆನ ಪೊಲಬುನ್ ಸಭೆಕ್ಕ್ ತೆರಿಪಾಯೆರ್.

ಅಂಚೆನೆ ಚಾವಡಿಡ್ ಪಾಲ್ ಪಡೆದಿತ್ತಿನ ಹರೀಶ್ ಶೇರಿಗಾರ್ (ಉದ್ಯಮಿ, ಕನ್ನಡ ಬೊಕ್ಕ ತುಳು ಚಿತ್ರ ನಿರ್ಮಾಪಕೆರ್), ಹರೀಶ್ ಬಂಗೇರ (ಉದ್ಯಮಿ, ಪೋಷಕೆರ್-ಕರ್ನಾಟಕ ಸಂಘ ದುಬೈ, ಕನ್ನಡ ಚಿತ್ರ ನಿರ್ಮಾಪಕೆರ್), ಪುತ್ತಿಗೆ ವಾಸುದೇವ ಭಟ್ (ಗೌರವಾಧ್ಯಕ್ಷೆರ್, ಯಕ್ಷ ಧ್ರುವ ಪಟ್ಲ ಫೌಂಡೇಶನ್ UAE), ನಾಗರಾಜ ರಾವ್ (ಆಡಳಿತ ನಿರ್ದೇಶಕೆರ್- ಭೀಮ ಜುವೆಲ್ಲರಿ ದುಬೈ), ಬಿ.ಕೆ ಗಣೇಶ್ ರೈ (ಕಲಾತ್ಮಕ ನಿರ್ದೇಶಕೆರ್), ಸುಧಾಕರ ರಾವ್ ಪೇಜಾವರ (ಉದ್ಯಮಿ, ಬ್ರಾಹ್ಮಣ ಸಮಾಜ ಯುಎಇ), ವರದರಾಜ್ ಶೆಟ್ಟಿಗಾರ್ (ಪದ್ಮಶಾಲಿ ಸಮುದಾಯ, ದುಬೈ), ಬಾಲಕೃಷ್ಣ ಸಾಲಿಯಾನ್ (ಸಂಘಟಕೆರ್, ಮೊಗವೀರ ಸಮುದಾಯ ದುಬೈ), ಮನೋಹರ್ ತೋನ್ಸೆ (ಲೇಖಕೆರ್, ಬಿಲ್ಲವಾಸ್ ಅಬುಧಾಬಿ), ಸುಂದರ್ ಶೆಟ್ಟಿ (ಉದ್ಯಮಿ, ನಿಹಾಲ್ ರೆಸ್ಟೋರೆಂಟ್ ಅಬುಧಾಬಿ), ರಮಾನಂದ ಶೆಟ್ಟಿ (ಉದ್ಯಮಿ‌ ಕಲಾ ಪೋಷಕೆರ್), ಶಶಿಧರ್ ನಾಗರಾಜಪ್ಪ (ಕನ್ನಡ ಪಾಠ ಶಾಲೆ ದುಬೈ), ಆತ್ಮನಂದ ರೈ (ತುಳು ಚಿತ್ರ ನಿರ್ಮಾಪಕೆರ್), ಪ್ರಭಾಕರ ಸುವರ್ಣ ಕರ್ನಿರೆ (ಅಧ್ಯಕ್ಷೆರ್, ಬಿಲ್ಲವ ಫ್ಯಾಮಿಲಿ ದುಬೈ) ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್.

ಬೊಕ್ಕ ಮತ ಗಣ್ಯೆರ್ ಒಂಜಾದ್, ಲೇಸ್ ದ ಲೆಪ್ಪೋಲೆ ಬೊಕ್ಕ ಟಿಕೆಟ್‌ ಬುಡುಗಡೆ ಮಲ್ತ್ ದ್, ಸಮಸ್ತ ಯುಎಇಡ್ ಆಟದ ಕಂಪುನ್ ಇಲ್ಲ ಇಲ್ಲಗ್ ಪಸರಿಸಾದ್, ಎಲ್ಯೆರ್ದ್ ಮಲ್ಲ ಮುಟ್ಟ ಆಟದ ಕಲೆನ್ ಬುಲೆಪಾವೊಂದು ತನ್ನ ಅರ್ವಾಚೀನ ಪ್ರಬುದ್ಧ ಆಟದ ಕಲೆನ್ ಪಸರಿಸುನ ಯಕ್ಷಗಾನ ಅಭ್ಯಾಸ ಕೇಂದ್ರದ ಈ ಲೇಸ್ ನ್ ಕಾರ್ಯಕ್ರಮವನ್ನು ಬೆಂಬಲಿಸಾಯೆರೆ ಬೊಡಾಯಿನ ಅಗತ್ಯನ್ ತೆರಿಪಾಯೆರ್. ನಮ್ಮೊಟ್ಟಿಗೆ ಮತ ಯುಎಇದ ಸರ್ವ ಕಲಾಭಿಮಾನಿಲು, ಕೌಟುಂಬಿಕ-ಸಾಂಸ್ಕೃತಿಕ ಸಂಘಟನೆಲು ಪೂರ್ಣ ಪ್ರಮಾಣರ್ದ್ ಬೆಂಬಲಿಸಾವೊಡು ಪಂದ್ ಪಂಡೆರ್.

ಯಕ್ಷಗಾನ ಅಭ್ಯಾಸ ಕೇಂದ್ರದ ಸದಸ್ಯೆರ್ ರಾಜೇಶ್ ಕುತ್ತಾರು ಲೇಸ್ ದ ಸುಧಾರಿಕೆ ಮಲ್ತೆರ್. ಗಿರೀಶ್ ನಾರಾಯಣ ಸೊಲ್ಮೆ ಸಂದಾಯೆರ್.

May 1 st: Hosanadu Shri Annapoorneshwari Kshetra-Devi Mahatmay Yakshagana to be played ಮೇ1: ಹೊಸನಾಡು ಶ್ರೀ ದೇವಿ ಅನ್ನಪೂರ್ಣೇಶ್ವರಿ ಕ್ಷೇತ್ರಡ್ ಶ್ರೀ ದೇವಿ ಮಹಾತ್ಮೆ ಆಟ

ಕೊಡ್ಯಡ್ಕ: ಹೊಸನಾಡು ಶ್ರೀ ದೇವಿ ಅನ್ನಪೂರ್ಣೇಶ್ವರಿ ಕ್ಷೇತ್ರಡ್ ಮೇ1 ಕ್ಕ್ ಸೋಮಾರ ಬಯ್ಯಗ್ 5.30 ಕ್ಕ್ ಕಟೀಲ್ ಮೇಳದಕ್ಲೆರ್ದ್ ಸಂಪೂರ್ಣ ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು.

ಈ ಆಟ ಕ್ಷೇತ್ರದ ಸ್ಥಾಪಕ ಮೊಕ್ತೇಸರೆರ್ ದಿ.ಡಾ. ಕೊಡ್ಯಡ್ಕ ಜಯರಾಮ ಹೆಗ್ಡೆ ಬೊಕ್ಕ ಕುಟುಂಬದಕ್ಲೆನ ಸೇವೆದ ಆಟ ಆದ್ ಗೊಬ್ಬುವೆರ್.

ಈ ಲೇಸ್ ಗ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್ ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

May 1 st: Hosanadu Shri Annapoorneshwari Kshetra-Devi Mahatmay Yakshagana to be played

Kodyadka : The Yakshagana Devi Mahatmay will be played at the temple premises on May 1st from 5.30p.m onwards which has been organised by the family of the founder managing trustee of the temple late Jayaram Hegde.