Tulu News

Hampi University gets an electricity bill of 85 lakh rupees!! ಹಂಪಿ ವಿವಿದ ಕರೆಂಟ್ ಬಿಲ್ ಬಾಕಿ 85 ಲಕ್ಷ ರೂ.!

ವಿಜಯನಗರ: ನಾಡ್ ದ ಪುಗರ್ತೆದ ವಿಶ್ವವಿದ್ಯಾಲಯ ಆಯಿನ ಹಂಪಿ ವಿಶ್ವವಿದ್ಯಾಲಯಗ್ ಸುಮಾರ್ 85 ಲಕ್ಷ ರೂ. ಕರೆಂಟ್ ಬಿಲ್ ಬೈದ್ಂಡ್. ಬಿಲ್ ಕಟ್ಟೆರೆ ಕಾಸ್ ಇಜ್ಜಂದೆ ಪರದಾಡೊಂದು ಉಂಡು.

ವಿಜಯನಗರ ಜಿಲ್ಲೆದ ಹೊಸಪೇಟೆ ತಾಲೂಕ್ ಡ್ ಇಪ್ಪುನ ಹಂಪಿ ಕನ್ನಡ ವಿಶ್ವವಿದ್ಯಾಲಯ ಕನ್ನಡದ ಸಂಶೋಧನೆಗಾದ್ ಪುಟ್ಟಿನ ಒಂಜೇ ಒಂಜಿ ವಿಶ್ವವಿದ್ಯಾಲಯ ಆತ್ಂಡ್.

ಈ ವಿವಿಗ್ ಅನುದಾನ ಸರಿಯಾದ್ ಬರಂದಿನ ಕಾರಣ ದುಂಬುದ ಕರೆಂಟ್ ಬಿಲ್ ಕಟ್ಟ್ ದ್ ಇಜ್ಜಂಡ್. ಇತ್ತೆ ದುಂಬುದ ಬಾಕಿ ಬಿಲ್ ಸೇರ್ಸಾದ್ ಇಡೆ ಮುಟ್ಟ 85 ಲಕ್ಷ ರೂ. ಬಿಲ್ಲ್ ಬೈದ್ಂಡ್.

Two brothers die in a clash between two groups over mango plucking issue at Jharkhand ಕುಕ್ಕುಗ್ ನಡತಿನ ಲಡಾಯಿಡ್ ಮೆಗ್ಯೆ ಪಲಯೆ ಖಲಾಸ್!

ರಾಂಚಿ: ಕುಕ್ಕು ಕೊಯಿಪಿನ ಇಚಾರಡ್ ರಡ್ಡ್ ಕಡೆತ್ತಕಲ್ನ ನಡುಟ್ಟು ನಡತಿನ ಲಡಾಯಿಡ್ ಮೆಗ್ಯೆ ಪಲಯೆ ಸೈತಿನ ಘಟನೆ ಜಾರ್ಖಂಡ್‌ದ ಪಾಕುರ್‌ಡ್ ನಡತ್ಂಡ್.

ನೆಟ್ಟ್ ತೀರ್ ಪೋಯಿನಕುಲು ಡೇವಿಧನ್ ಮುರ್ಮು ಬೊಕ್ಕ ವಕೀಲ್ ಮುರ್ಮು ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ರಡ್ಡ್ ಜನನ್ ಅರೆಸ್ಟ್ ಮಲ್ದೆರ್. ಗಲಾಟೆಡ್ ಭಾಗಿ ಆಯಿನ ಎಚ್ಚದ ಆರೋಪಿಲು ತಪ್ಪಾದ್ ಪೋತೆರ್‌. ಬಾಕಿ ಆರೋಪಿಲೆನ್ ಪೊಲೀಸೆರ್ ನಾಡೊಂದುಲ್ಲೆರ್. ಅತ್ತಂದೆ ಗ್ರಾಮಡ್ ಕಾನೂನು ವ್ಯವಸ್ಥೆ ಮಲ್ಪರೆ ಪೊಲೀಸೆರೆನ್ ಕಡಪುಡ್ದೆರ್ ಪಂದ್ ಅಧಿಕಾರಿಲು ತೆರಿಪಾದೆರ್.

Well known actress Ramya hospitalised at a Naturopathy hospital in London ನಟಿ ರಮ್ಯಾ ಆಸ್ಪತ್ರೆಗ್ ದಾಖಲ್

ಆಪಗಪಗ ಹುಷಾರ್ ತತ್ತೊಂದು ಇತ್ತಿನ ಮಾಜಿ ಸಿನಿಮಾ ನಟಿ ರಮ್ಯಾ ಇತ್ತೆ ಲಂಡನ್ ಡ್ ಆಸ್ಪತ್ರೆಗ್ ದಾಖಲ್ ಆತೆರ್.

ಲಂಡನ್ ದ lanserhof ನ್ಯಾಚುರೋಪಥಿ ಆಸ್ಪತ್ರೆಗ್ ದಾಖಲಾದ್ ಕರಿನ ನಾಲ್ ಐನ್ ದಿನೊರ್ದಿಂಚಿ ಪ್ರಕೃತಿ ಚಿಕಿತ್ಸೆ ಪಡೆವೊಂದು ಉಲ್ಲೆರ್.

ವೆಲ್ ನೆಸ್ ಕ್ಲಿನಿಕ್ ದ ಪೋಟೋನ್ ರಮ್ಯಾ ತನ್ನ ಇನ್ ಸ್ಟಾಡ್ ಪಾಡ್ದೆರ್. ಮೆರೆಗ್ ನೆರ್ದ್ ದುಂಬು ಕಾರ್ ಡ್ ಟ್ಯೂಮರ್ ಆದಿತ್ತ್ಂಡ್.

ಬಿರುವೆರ್ ಕುಡ್ಲ(ರಿ) ಮುಲ್ಕಿ ಘಟಕದ ವತಿರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಬಿರುವೆರ್ ಕುಡ್ಲ (ರಿ)ಮುಲ್ಕಿ ಘಟಕದ ವತಿರ್ದ್ 72ನೇ ಸ್ಪಂದನಾ ಸೇವಾ ಯೋಜನೆದ ಮುಖೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.

ಬಿರುವೆರ್ ಕುಡ್ಲ (ರಿ) ಸ್ಥಾಪಕಾಧ್ಯಕ್ಷೆರ್ ಉದಯ ಪೂಜಾರಿ ಮೆರೆನ ಮುತಾಲಿಕೆಡ್, “ಸ್ವಂತಗ್ ಒಂತೆ, ಸಮಾಜಗ್ ಸರ್ವಸ್ವ” ಪನ್ಪುನ ಉದ್ದೇಶದೊಟ್ಟಿಗೆ ಏಪಲ ಸಮಾಜ ಸೇವೆ ಮಲ್ತೊಂದು ಇಪ್ಪುನ ಪೆರ್ಮೆದ ಬಿರುವೆರ್ ಕುಡ್ಲ ಸಂಘಟನೆದ ಅಂಗ ಸಂಸ್ಥೆಯಾಯಿನ ಮುಲ್ಕಿ ಘಟಕದ ಕ್ರಿಯಾಶೀಲ ಅಧ್ಯಕ್ಷೆರ್ ಕಿಶೋರ್ ಜೆ. ಸಾಲ್ಯಾನ್ ಮೆರೆನ ಮಾರ್ಗದರ್ಶನಡ್ ಬೊಕ್ಕ ಘಟಕದ ಮಾತ ಸದಸ್ಯೆರೆನ ಸಕಾಯರ್ದ್ 7 ನೇ ಸ್ಪಂದನಾ ಸೇವಾ ಯೋಜನೆನ್ ಇಂಚೊಗು ಹುಷಾರ್ ಇಜ್ಜಂದೆ ಇತ್ತಿನ ಮುಲ್ಕಿ ಒಡೆಯರಬೆಟ್ಟು ನಿವಾಸಿ ಜಯ ಪೂಜಾರಿ ಮೆರೆನ ಶಸ್ತ್ರ ಚಿಕಿತ್ಸೆಗ್ ಚೆಕ್ ಮುಖೇನ ಕೊರಿಯೆರ್.

ಈ ಪೊರ್ತುಡು ಘಟಕದ ಅಧ್ಯಕ್ಷೆರ್ ಕಿಶೋರ್ ಜೆ ಸಾಲ್ಯಾನ್, ಉಪಾಧ್ಯಕ್ಷೆರ್ ಉಮೇಶ್ ಮಾನಂಪಾಡಿ, ಕಾರ್ಯದರ್ಶಿ ಗಿರಿಧರ್ ಅಮೀನ್, ಕೋಶಾಧಿಕಾರಿ ಅಶೋಕ್ ಸುವರ್ಣ, ಸಂಘಟನಾ ಕಾರ್ಯದರ್ಶಿ ರಾಮನಾಥ್ ಸುವರ್ಣ, ಮೋಹನ ಸುವರ್ಣ ಬೊಕ್ಕ ಸದಸ್ಯೆರ್ ಇತ್ತೆರ್.

ದೇವೆರೆ ಪಾದೊ ಸೇರಿಯೆರ್ ಹೋಟೆಲ್ ಉದ್ಯಮಿ ಲೋಕೇಶ್ ಶೆಟ್ಟಿ

ಬೆದ್ರ: ಬೊಂಬೈ ಬಾಂದ್ರಾ ವೆಸ್ಟ್ ದ ಪಾಲಿ ಹಿಲ್‌ದ ಜನತಾ ಬಾರ್ ಆ್ಯಂಡ್ ರೆಸ್ಟೋರೆಂಟ್ ಮಾಲಿಕೆರ್, ಬೆದ್ರ ಕಡಂದಲೆ ಪರಾರಿ ಮನೆತನದ ಲೋಕೇಶ್ ಶೆಟ್ಟಿ (67) ಸನಿಯಾರ (ಜೂ.17) ದೇವೆರೆ ಪಾದೊ ಸೇರಿಯೆರ್.

ಬೆದ್ರ ಶ್ರೀ ಮಹಾವೀರ ಕಾಲೇಜ್ ಡ್ ಬಿಎಸ್‌ಸಿ ಓದಿನ ಮೇರ್ ಬೊಂಬೈಡ್ ಪೊಪ್ಪ ಶಿಮಂತೂರು ಮಜಲಗುತ್ತು ಗೋಪಾಲ ಶೆಟ್ಟಿ ಮೇರ್ ನಡಪಾವೊಂದು ಇತ್ತಿನ ಹೋಟೆಲ್ ಉದ್ಯಮಡ್ ಮೇರ್ ಬೇಲೆ ಮಲ್ತ್ ದ್ ಬೊಕ್ಕ ಸ್ವಂತ ಹೋಟೆಲ್ ನಡಪಾವೊಂದು ಇತ್ತೆರ್. ಬೊಂಬೈದ ಖಾರ್ ವೆಸ್ಟ್ ಡ್ ವಾಸ ಇತ್ತಿನ ಮೇರ್ , ಮಹಾವೀರ ಕಾಲೇಜ್ ದ ಕೈತಲ್ ಕೃಷಿ ಮಲ್ತೊಂದು ಇತ್ತೆರ್. ಅತ್ತಂದೆ ಗುರು ಶ್ರೀ ಸತ್ಯಸಾಯಿಬಾಬಾ ಮೆರೆನ ಭಕ್ತೆಯಾದ್, ಸುಮಾರ್ ಆಧ್ಯಾತ್ಮಿಕ ಜೀವಿಯಾದ್ ಬದ್ಕಿನಾರ್. ಅಂಚೆನೆ ದಾನಿಯಾದ್, ಸುಮಾರ್ ಜನಕ್ಕ್ ಉಪಕಾರಿ ಆತೆರ್. ಮೆರೆಗ್ ಬೊಡೆದಿ ಬೊಕ್ಕ ಮಗಲ್ ಉಲ್ಲೆರ್. ಮೆರೆನ ನಿಧನೊಗು ಮಹಾವೀರ ಕಾಲೇಜ್ ಹಳೆವಿದ್ಯಾರ್ಥಿ ಸಂಘದ ಲೋಕೇಶ್ ಬೊಕ್ಕ ಕೂಟದಕುಲು ಸಂತಾಪ ತೆರಿಪಾದೆರ್.

ವರದಿ: ಧನಂಜಯ ಬೆದ್ರ
(ಸಹಕಾರ: ಶ್ರೀ ಮಹಾವೀರ ಕಾಲೇಜ್ ಹಳೆವಿದ್ಯಾರ್ಥಿ ಸಂಘದ ದೋಸ್ತಿಲು)

Mangalore : A girl leaves home for a shopping spree and goes missing ಕುಡ್ಲ: ಶಾಪಿಂಗ್‌ ಗ್ ಪಂದ್ ಪೋಯಿನ ಪೊಣ್ಣು ನಾಪತ್ತೆ

ಕುಡ್ಲ: ಶಾಪಿಂಗ್‌ಗ್ ಪೋದು ಬರ್ಪೆ ಪಂದ್ ಇಲ್ಲ್ ರ್ದ್ ಪೋಯಿನ ಪೊಣ್ಣು ನಾಪತ್ತೆ ಆಯಿನ ಘಟನೆ ಸುರತ್ಕಲ್ ಮುಕ್ಕ ಕೈತಲ್ ದ ಮಿತ್ರಪಟ್ನಡ್ ನಡತ್ಂಡ್.

ನಾಪತ್ತೆ ಆಯಿನ ಪೊಣ್ಣು ಮಾತೃಛಾಯಾ ನಿವಾಸಿ ಸಂತೋಷ್ ಬೊಕ್ಕ ರೇಖಾ ದಂಪತಿಲೆನ ಮಗಲ್ ಸ್ಫೂರ್ತಿ (17) ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ರೇಖಾ ಮೇರ್ ಸುರತ್ಕಲ್‌ ಪೊಲೀಸ್‌ ಠಾಣೆಡ್ ದೂರು ಕೊರ್ತೆರ್.

ನಾಪತ್ತೆ ಆಯಿನ ಸ್ಫೂರ್ತಿ 5 ಅಡಿ ಎತ್ತರ, ಎಣ್ಣೆ ಕಪ್ಪು ಮೈ ಬಣ್ಣ, ಸಾಧಾರಣ ಶರೀರದಾರ್. ಕನ್ನಡ, ತುಳು ಭಾಷೆ ಪಾತೆರುವೆರ್. ಮೇರ್ ನಾಪತ್ತೆ ಆಯಿನ ದಿನ ಬೊಲ್ದು ಬಣ್ಣದ ಟಿ ಶರ್ಟ್, ಕಪ್ಪು ಬಣ್ಣದ ಜೀನ್ಸ್ ಪ್ಯಾಂಟ್ ಪಾಡ್ದಿತ್ತೆರ್. ನಾಲಿಡ್ ಬಂಗಾರ್ ಮಾಲೆ ಬೊಕ್ಕ ಎಲ್ಯ ತಾಯತ ಇತ್ಂಡ್.

ಮೇರ್ ಪತ್ತೆ ಆಂಡ ಸುರತ್ಕಲ್ ಪೊಲೀಸ್‌ ಠಾಣೆದ ದೂರವಾಣಿ ಸಂಖ್ಯೆ 0824-2220540, 9480805360, 9480802345 ಅತ್ತಂಡ ಕುಡ್ಲ ಪೇಂಟೆದ ಕಂಟ್ರೋಲ್‌ ರೂಮ್‌ 0824 2220800 ಗ್ ಸಂಪರ್ಕ ಮಲ್ಪೊಡು ಪಂದ್ ಸುರತ್ಕಲ್‌ ಪೊಲೀಸ್‌ ಠಾಣೆದ ಪ್ರಕಟಣೆ ತೆರಿಪಾದ್ಂಡ್.

Sullia : Two persons injured when a diesel tanker overturns on their house ಸುಳ್ಯ: ಇಲ್ಲ್ ದ ಮಿತ್ತ್ ಡೀಸೆಲ್ ಟ್ಯಾಂಕರ್ ಬೂರ್ದು ರಡ್ಡ್ ಜನಕ್ಕ್ ಪೆಟ್ಟ್

ಸುಳ್ಯ: ಡಿಸೇಲ್ ದಿಂಜಿನ ಟ್ಯಾಂಕರ್ ಒಂಜಿ ಇಲ್ಲ್ ದ ಮಿತ್ತ್ ಬೂರ್ದು ರಡ್ಡ್ ಜನಕ್ಕ್ ಪೆಟ್ಟಾಯಿನ ಘಟನೆ ಪಾಣತ್ತೂರು ಕೈತಲ್ ದ ಪರಿಯಾರಂ ನಡತ್ಂಡ್.

ನೇರ್ದ್ ಪೆಟ್ಟಾಯಿನ ಟ್ಯಾಂಕರ್ ಡ್ರೈವರ್ ಬೊಕ್ಕ ಕುಡೊರಿಯನ್ ಸುಳ್ಯ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಟ್ಯಾಂಕರ್ ಸುಮಾರ್ ಪಲ್ಟಿ ಆಯಿರ್ನೆದಾವೆರ ಟ್ಯಾಂಕರ್ ನಕ್ಕಿ ಆತ್ಂಡ್.

34 persons die of sun stroke at the Balliya district hospital in UP ದೊಂಬುದ ಬಿರ್ಸ್ ಗ್ ಉ.ಪ್ರ ಬಲ್ಲಿಯಾ ಜಿಲ್ಲಾಸ್ಪತ್ರೆಡ್ 34 ಜನ ತೀರ್ ಪೋಯೆರ್

ಉತ್ತರ ಪ್ರದೇಶಡ್ ಕರಿನ 24 ಗಂಟೆಡ್ ದೊಂಬುದ ಬಿರ್ಸ್ ಗ್ ಹುಷಾರ್ ಇಜ್ಜಂದೆ ಜಿಲ್ಲಾಸ್ಪತ್ರೆಗ್ ದಾಖಲ್ ಆಯಿನ 34 ಜನ ತೀರ್ ಪೋಯೆರ್.

ತೀರ್ ಪೋಯಿನಕ್ಲೆನೆಟ್ಟ್ ಎಚ್ಚಿನಕುಲು 60 ವರ್ಷರ್ದ್ ಮಿತ್ತ್ ದಕುಲು ಪಂದ್ ಮುಖ್ಯ ವೈದ್ಯಾಧಿಕಾರಿ (ಸಿಎಂಒ) ಡಾ.ಜಯಂತ್ ಕುಮಾರ್ ಪಂತೆರ್.

ಜೂ.15 ಕ್ಕ್ 23 ಜನ ಬೊಕ್ಕ ಜೂ.16 ಕ್ಕ್ 11 ಜನ ಒಟ್ಟು ರಡ್ಡ್ ದಿನಟ್ಟ್ 34 ಜನ ತೀರ್ ಪೋತೆರ್. ಆಸ್ಪತ್ರೆಗ್ ದಾಖಲ್ ಆಯಿನ ರೋಗಿಲೆಗ್ ಬೊಕ್ಕ ಆಸ್ಪತ್ರೆದ ಸಿಬ್ಬಂದಿಗ್ ವಿಶ್ರಾಂತಿಗಾದ್ ದೊಂಬುದ ಬೆಚ್ಚದ ತೊಂದರೆನ್ ಕಮ್ಮಿ ಮಲ್ಪೆರೆ ಆಸ್ಪತ್ರೆಡ್ ಫ್ಯಾನ್, ಕೂಲರ್, ಹವಾನಿಯಂತ್ರಣದ ವ್ಯವಸ್ಥೆ ಮಲ್ದೆರ್. ಅಂಚೆನೆ ಆಸ್ಪತ್ರೆಡ್ ವೈದ್ಯೆರ್ ಬೊಕ್ಕ ಅರೆವೈದ್ಯಕೀಯ ಸಿಬ್ಬಂದಿಲೆನ ಸಂಖ್ಯೆನ್ ಎಚ್ಚ ಮಲ್ದ ಪಂದ್ ಪಂಡೆರ್.

ಹೀಟ್ ಸ್ಟ್ರೋಕ್ ನ್ ಕಮ್ಮಿ ಮಲ್ಪೆರೆ ಮುನ್ನೆಚ್ಚರಿಕೆನ್ ಜನ ಅನುಸರಿಸಾವೊಡು. ದೊಂಬುದ ಬೆಚ್ಚರ್ದ್ ತರೆತಿರ್ಗುನ, ತರೆಬೇನೆ ಇಂಚ ಸುಮಾರ್ ಆರೋಗ್ಯದ ತೊಂದರೆಗ್ ಕಾರಣ ಆಪುಂಡು ಪಂದ್ ಜಿಲ್ಲಾ ಆಸ್ಪತ್ರೆದ ಮುಖ್ಯ ವೈದ್ಯಕೀಯ ಅಧೀಕ್ಷಕೆರ್ (ಸಿಎಂಎಸ್) ದಿವಾಕರ್ ಸಿಂಗ್ ತೆರಿಪಾದೆರ್.

June 20 th: Congress to organize agitation against the centre to oppose it’s refusal to provide rice for the Anna Bhagya scheme in the state ಜೂನ್ 20: ಕಾಂಗ್ರೆಸ್ ದ ಪೊರ್ಂಬಾಟ

ಬಡವೆರೆನ ಅನ್ನಭಾಗ್ಯ ಯೋಜನೆಗ್ ಕೇಂದ್ರ ಸರ್ಕಾರ ಅರಿ ಕೊರಿಯೆರೆ ನಿರಾಕರ ಮಲ್ತಿನೆನ್ ವಿರೋಧಿಸಾದ್ ಮೋದಿ ಸರ್ಕಾರ ಬೊಕ್ಕ ಬಿಜೆಪಿದ ವಿರುದ್ಧ ಜೂನ್ 20 ಕ್ಕ್ ರಾಜ್ಯ ಇಡೀ ಪೊರ್ಂಬಾಟ ಮಲ್ಪುವ ಪಂದ್ ಡಿಸಿಎಂ ಡಿಕೆಶಿ ಪಂತೆರ್.

ಮೇರ್ ಬೆಂಗ್ಲೂರ್ ಡ್ ಪಾತೆರ್ದ್, ಕಾಂಗ್ರೆಸ್ ಪಕ್ಷರ್ದ್ ಮಾತ ಜಿಲ್ಲಾ ಕೇಂದ್ರಲೆಡ್ ಜೂನ್ 20 ಬೊಲ್ಪುಗು 11 ಗಂಟೆಗ್ ಪೊರ್ಂಬಾಟ ನಡಪರೆ ಉಂಡು. ನೆಟ್ಟ್ ಪಕ್ಷದ ನಾಯಕೆರ್, ಶಾಸಕೆರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪಂಡೆರ್.

Dharmasthala Sowjanya murder case- Santosh Rao acquitted by CBI court ಧರ್ಮಸ್ಥಳದ ಸೌಜನ್ಯ ರೇಪ್ & ಮರ್ಡರ್ ಕೇಸ್ ದ ಸಂತೋಷ್ ರಾವ್ ನಿರ್ದೋಷಿ ಪಂದ್ ಸಿಬಿಐ ಕೋರ್ಟುದ ತೀರ್ಪು

ದಕ್ಷಿಣ ಕನ್ನಡ ಜಿಲ್ಲೆ ಉಜಿರೆ SDM ಕಾಲೇಜ್ ಕಲ್ಪಾರ್ಥಿ ಸೌಜನ್ಯನ್ ರೇಪ್ ಬೊಕ್ಕ ಮರ್ಡರ್ ಮಲ್ತಿನ ಕೇಸ್ ದ ಬಗೆಟ್ CBI ಕೋರ್ಟ್ ಆರೋಪಿ ಸಂತೋಷ್ ರಾವ್ ನ್ ನಿರ್ದೋಷಿ ಪಂದ್ ಬುಡುಗಡೆ ಮಲ್ದ್ಂಡ್.

ಸಂತೋಷ್ ರಾವ್ ನ ಬಗ್ಗೆ ಸಾಕ್ಷಿದ ಕೊರತೆ ಇತ್ತಿನೆರ್ದಾವರ ಬುಡುಗಡೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್. ಅತ್ತಂದೆ ಈ ಕೇಸ್ ಗ್ 11 ವರ್ಷದ ಬೊಕ್ಕ ತೀರ್ಪು ಆಂಡ್. 2012 ನೇ ಇಸಡಿಡ್ ಅ.10 ಕ್ಕ್ ಧರ್ಮಸ್ಥಳದ ಕೈತಲ್ ಸೌಜನ್ಯನ ಪುನ ಪತ್ತೆ ಆದಿತ್ತ್ಂಡ್. ಬೊಕ್ಕ ಸಂತೋಷ್ ರಾವ್ ನ್ ಬೊಲ್ತೇರ್ ಪೊಲೀಸೆರ್‌ ಅರೆಸ್ಟ್ ಮಲ್ತ್ ದ್ ಇತ್ತೆರ್.