Tulu News

Haleyangadi- World Yoga day -2023 ಹಳೆಯಂಗಡಿಡ್ ವಿಶ್ವ ಯೋಗ ದಿನಾಚರಣೆ-2023

ಹಳೆಯಂಗಡಿ : ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ (ರಿ.) ಹಳೆಯಂಗಡಿ ಮುತಾಲಿಕೆಡ್ ನೆಹರು ಯುವ ಕೇಂದ್ರದ ಯುವ ಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯ, ರಾಜ್ಯ ಯುವ ಸಂಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆದ ಒಟ್ಟುಸೇರಿಗೆಡ್ ವಿಶ್ವ ಯೋಗ ದಿನಾಚರಣೆ-2023 ಜೂನ್ 21 ಬುಧಾರ ಬಯ್ಯಗ್ 6.30 ರ್ದ್ ಯುವಕ ಮಂಡಲದ ಸಭಾಂಗಣಡ್ ನಡಪರೆ ಉಂಡು.

ಈ ಲೇಸ್ ಗ್ ಹಳೆಯಂಗಡಿ ಶ್ರೀ ವಿದ್ಯಾವಿನಾಯಕ ರಜತ ಸೇವಾ ಟ್ರಸ್ಟ್ (ರಿ.), ಸುವರ್ಣ ಮಹೋತ್ಸವ ಸಮಿತಿ, ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ (ರಿ.), ಕಿಶೋರ-ಕಿಶೋರಿ ಸಂಘ, ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ (ರಿ.), ಜಿಲ್ಲಾ ಪ್ರಶಸ್ತಿ ವಿಜೇತ, ಯುವತಿ ಬೊಕ್ಕ ಮಹಿಳಾ ಮಂಡಲ (ರಿ.) ಮೊಕುಲು ಸಹಕಾರ ಕೊರೊಂದುಲ್ಲೆರ್.

Haleangadi- World Yoga day -2023

Haleangadi: Sri Vidya Vinayaka Yivaka Mandala (R) will lead with Neheru Yuva Kendra and State Youth development and sports department will organize yoga program on 21st June to commorate World Yoga day

Puthila Parivara 34 Nekkilady grama Samithi- honours activists ಪುತ್ತಿಲ ಪರಿವಾರ 34 ನೆಕ್ಕಿಲಾಡಿ ಗ್ರಾಮ ಸಮಿತಿ ವತಿರ್ದ್ ಕಾರ್ಯಕರ್ತೆರೆಗ್ ಅಭಿನಂದನೆ ಲೇಸ್

ಪುತ್ತಿಲ ಪರಿವಾರ 34 ನೆಕ್ಕಿಲಾಡಿ ಗ್ರಾಮ ಸಮಿತಿ ವತಿರ್ದ್ ಜೂನ್ 18 ಐತಾರದಾನಿ ಉಬಾರ್ 34 ನೆಕ್ಕಿಲಾಡಿದ ಶಾಂತಾ ಸಭಾ ಭವನಡ್ ಕಲ್ಪಾರ್ಥಿಲೆಗ್ ಬೂಕು ಕೊರ್ಪಿನ, ಕಾರ್ಯಕರ್ತೆರೆಗ್ ಅಭಿನಂದನೆ ಲೇಸ್ ನಡತ್ಂಡ್.

ಈ ಲೇಸ್ ಡ್ ಸಾಹಿತ್ಯ, ಸಾಮಾಜಿಕ ಸೇವೆನ್ ಗುರುತಿಸಾದ್ ಶಾಂತಾ ಸಭಾ ಭವನದ ಮಾಲಿಕೆರ್ ಶಾಂತಾ ಕುಂಟಿನಿ ಮೆರೆಗ್ ಶಾಲ್ ಪೊದೆಪಾದ್ ಸ್ಮರಣಿಕೆ ಕೊರ್ದು ತಮ್ಮನ ಮಲ್ತೆರ್.

ಈ ಪೊರ್ತುಡು ಚಾವಡಿಡ್ ಅರುಣ್ ಕುಮಾರ್ ಪುತ್ತಿಲ, ಪುತ್ತಿಲ ಪರಿವಾರ 34 ನೆಕ್ಕಿಲಾಡಿ ಗ್ರಾಮ ಸಮಿತಿದ ಅಧ್ಯಕ್ಷೆರ್ ರಾಜೇಶ್ ಶಾಂತಿನಗರ, 34 ನೆಕ್ಕಿಲಾಡಿ ಗ್ರಾಮ ಪಂಚಾಯತ್ ದ ಅಧ್ಯಕ್ಷೆರ್ ಪ್ರಶಾಂತ ಶಿವಾಜಿನಗರ, ಶ್ರೀ ರಾಮ ಭಜನಾ ಮಂದಿರ ಆದರ್ಶ ನಗರದ ಗೌರವಾಧ್ಯಕ್ಷೆರ್ ಪದ್ಮಯ್ಯ ಗೌಡ, ಬೆಂಗ್ಲೂರ್ ದ ಉದ್ಯಮಿ ಕಿರಣ್ ಧರ್ಮಸ್ಥಳ, ಪುತ್ತೂರ್ ಪುತ್ತಿಲ ಪರಿವಾರದ ಗೌರವ ಸಲಹೆಗಾರೆರ್ ರಾಜ್ ಗೋಪಾಲ್ ಭಟ್ ಇತ್ತೆರ್.

ಈ ಲೇಸ್ ಡ್ ಶಾಂತಾ ಕುಂಟಿನಿ ಮೇರ್ ಪ್ರಾರ್ತನೆ ಮಲ್ತೆರ್. ಪ್ರಶಾಂತ್ ಮೇರ್ ಎದ್ಕೊನಿಯೆರ್. ರಾಜೇಶ್ ಶಾಂತಿನಗರ ಪ್ರಾಸ್ತವಿಕ ಪಾತೆರಿಯೆರ್. ಕಿರಣ್ ಧರ್ಮಸ್ಥಳ ಮೇರ್ ಅತಿಥಿ ಭಾಷಣ ಮಲ್ತೆರ್. ಅರುಣ್ ಕುಮಾರ್ ಪುತ್ತಿಲ ಮೇರ್ ಕಾರ್ಯಕರ್ತೆರೆಗ್ ಅಭಿನಂದನೆ ಸಂದಾದ್ ಮಾತ ಜೋಕುಲೆಗ್ ಬೂಕು ಕೊರಿಯೆರ್. ಬೊಕ್ಕ ಸಾಧಕೆರೆಗ್ ತಮ್ಮನ ನಡತ್ಂಡ್. ಶಿವಕುಮಾರ್ ಬೊಕ್ಕ ಸಚಿನ್ ಜೈನ್ ಈ ಲೇಸ್ ನ್ ಸುಧಾರಿಕೆ ಮಲ್ತೆರ್. ವಿನೀತ್ ಶಗ್ರಿತ್ತಾಯ ಸೊಲ್ಮೆ ಸಂದಾಯೆರ್.

Puthila Parivara 34 Nekkilady grama Samithi- honours activists

A program to honour activists, distribution of books to students was held on 18th of June. Social worker and noted littereature Santha Kuntini was honoured on the occasion.

ಸುಳ್ಯ: ಪೊಸ ಎಸ್.ಐ ಈರಯ್ಯ ದೂಂತೂರು ಅಧಿಕಾರ ಸ್ವೀಕಾರ

ಸುಳ್ಯ: ಸುಳ್ಯ ಆರಕ್ಷಕ ಠಾಣೆಗ್ ಪೊಸ ಸಬ್ ಇನ್ಸ್ ಪೆಕ್ಟರಾದ್ ಕುಂದಾಪುರ ರ್ದ್ ವರ್ಗಾವಣೆಯಾದ್ ಈರಯ್ಯ ದೂಂತೂರು ಮೇರ್ ಬೈದೆರ್.

ಮೇರ್ ಕೋಡೆ ಮಧ್ಯಾಹ್ನ ಎಸ್.ಐ ದಿಲೀಪ್ ಜಿ.ಆರ್ ಮೆರೆರ್ದ್ ಅಧಿಕಾರ ಸ್ವೀಕಾರ ಮಲ್ತೆರ್.

ಉಗ್ರೆರ್ನ ಪುನೆಪು ಪೊಲ್ತಿನ ಬೀರೆ ತುಕಾರಾಮ್ ಓಂಬ್ಳೆ

ಬೆರ್ಮ ಸಿಷ್ಟಿನ್ ತನ್ನ ಅಂಕೆಡ್ ದೀವೊಡು ಪನ್ಪುನ ಅಂಗಲಪ್ಪುಡು ನಮ್ಮ ದೇಸೊದ ಮಿತ್ತ್ ದಿಟ್ಟಿ ದೀದ್ ಪಜ್ಜೆ ಪಾಡೊಂದು ಬತ್ತಿನ ಉಗ್ರೆರ್ನ ಪುನೆಪುನ್ ಪೊಲ್ತಿನ ಪೊಲೀಸ್ದಾರ್ನ ಪೊಲಬು. ಬೊಂಬಯಿಡ್ ಅಸಿಸ್ಟೆಂಟ್ ಸಬ್‌ಇನ್ಸ್‌ಪೆಕ್ಟರ್ ಆದ್ ಬೇಲೆ ಮಲ್ತೊಂತಿನ ತುಕಾರಾಮ್ ಓಂಬ್ಲೆ ಮುಪ್ಪತೊಂಜಿ ಓಡು ಎಡ್ಡೆಡ್ ಬೆಂದಿತ್ತೆರ್, ನಾಲ್ ಓಡು ಕರಿದ್ ಪೋತುಂಡ ಮೆರೆನ ಸರಕಾರಿ ಕಜ್ಜೊಗ್ಗು ಮುಗಿತಲದ ಚುಕ್ಕಿ ಬೂರ್ದು, ಓಂಬ್ಳೆ ಏಪೊಲ ಒರಿಯಾಗ್ ತೆಟ್ಟ್ ಬಯಕ್‌ದಿನಾರತ್ತ್, ಮಸೆತ್ತ್ ತೂತಿನಾರತ್ತ್, ನೆರ್ದ್ ಕೈದೆರ್ತಿನಾರತ್ತ್, ಒರಿಯನ ನುಪ್ಪುಗು ಕಲ್ಲ್ ಪಾರ್ದಿನಾರತ್ತ್, ಬಡವುದ ಗಂಜಿಗ್ ಪುಲಿ ಪೂಂಟುದಿನಾರತ್ತ್, ಮೆರೆಡ ಮಲ್ಲದಾಲ ಕೊಪ್ಪರೆಗೆ ಇತಿಜಿ, ಮೆರೆಡ ಇತ್ತಿನಿ ಮೆರೆನ್ ಮೋಕೆ ಮಲ್ಪುನ ಬುಡೆದಿ ಮೂಜಿ ಪೊಣ್ಣು ಜೋಕುಲು ಬೊಕ್ಕ ಸರಕಾರ ಕೊರ್ತಿನ ಒಂಜಿ ಇಲ್ಲ್. ಇಂಚ ಮಾತಲ ಎಡ್ಡೆಡೇ ದುಂಪೋನಗ, 2011 ಇಸವಿಡ್ ನವೆಂಬರ್ 26ಕ್ಕ್, ಪಗೆಮಾನಿ ಪಾಕಿಸ್ತಾನದ ಕಡಲ್‌ರ್ದ್ ನೂರೊಂದು ಬತ್ತಿನ ಉಗ್ರೆರ್ನ ಇಲ್ಯ ದಂಡ್ ಮುಕ್ಕಾಲ್ ಮೂಜಿ ಗಳಿಗೆಡ್ ಇಡೀ ಬೊಂಬಾಯಿನ್ ನಡ್ಗಾಯೆರ್-ಸಿರ್ಕಾಯೆರ್ ಅಲ್ಪ ಅಲ್ಪ ಬಾಂಬ್ ಪಾಡಿಯೆರ್, ಬೆಡಿ ಪತೊಂತು ಎಲ್ಯ-ಮಲ್ಲೆ ಆಣ್ -ಪೊಣ್ಣು ಪನ್ಪುನ ತರದಾಂತೆ ಮಾತೆರೆನ್ಲಾ ಕೆರ್ರೆ ಸುರು ಮಲ್ತೆರ್. ನೆಟ್ಟ್ ಒಂಜಿ ರಡ್ಡ್‌ ಜನೊತ್ತ ಕೂಪೆ ನಾರಿಮನ್ ಆಸ್ಪತ್ರೆರ್ದ್ ಬೊಳ್ಳಿ ರಂಗ್‌ದ ಸ್ಕೋಡ ಕಾರ್ ಪತೊಂದು ಕುಡೊಂಜಿ ಕಡೆಟ್ಟ್ ನೆತ್ತೆರ್ದ ಓಕುಳಿ ಗೊಬ್ಬರೆ ಪಿದಡಿಯೆರ್.

ಬೊಲ್ಪುದಾಯೆ ಕಡಲ್ ದೊಲಯಿ ದೆಂಗ್‌ದ್ ಕುಲ್ದು ತಿಂಗೊಲ್ದಾಯೆ ಬಾನೊಡು ಮೀಂದೊಂತಿನ ಪೊರ್ತು, ಬೆಡಿತ್ತ ಸಬ್ದ ಕೇನಿನೆಕ್ಕ್ ಗಿರ್‌ಗಾವ್ ಚೌಪಾಟಿದ ಕಡಲಬರಿಟ್ಟ್ ಇತ್ತಿನ ಜನಕ್ಲೆನ್ ಅಲ್ಪರ್ದ್ ಲಕ್ಕಾವೊಂತಿನ ಪೊಲೀಸ್ ತುಕಾರಾಮ್ ಓಂಬ್ಳೆ ಆನಿ ಬೇಲೆಗ್ ಬರಂದಿನ ಕುಡೊಂಜಿ ಪೊಲೀಸ್ದಾರ್ನ ಬೇಲೆನ್ ಮಲ್ತೊಂತೆರ್. ಆತನಗ ಅಲ್ಪದ ಪೆರಿಯ ಮಾರ್ಗೊಡು ಅಡ್ಡ ಕಟ್ಟೊಡು, ಬೊಳ್ಳಿರಂಗ್‌ದ ಸ್ಕೋಡ ಕಾರ್ ಬತ್ತ್ಂಡ ಅವೆನ್ ಉಂತಾವೊಡು ಪಂದ್ ಪೆರಿಯ ಪೊಲೀಸ್‌ದಕುಲು ತೆರಿಪಾಯೆರ್. ಒಂತೆ ಪೊರ್ತುಡೇ ಮಾರ್ಗಗ್ ಬ್ಯಾರಿಕೇಡ್‌ಲೆನ್ ಅಡ್ಡ ಕಟ್‌ದಿತ್ತೆರ್ ಪೊಲೀಸ್ ದಕುಲು ಬೆಡಿ ಪತೊಂದು ಉಗ್ರೆರೆನ್ ಪತ್ತರೆ ಉಂತುದಿತ್ತೆರ್, ಆಂಡ ಗಾಡಿ ಮಾತ್ರ ಉಂತಂದೆ ಎದುರು ತಾಂಟರೆ ಬನ್ನಗ ಗುಂಡು ರಾಪಾವೊಡೇ ಆಂಡ್ ಪತ್ತ್-ಪದ್‌ನೈನ್ ನಿಮಿಸರ್ದ್ ಬೊಕ್ಕ ಗುಂಡುಲು ರಾಪುನ ಉಂತ್ಂಡ್, ಕಾಲಿ ಕಡಲ್‌ದ ಸಿರೆಕುಲ್ನ ಸಬ್ದ ಮಾತ್ರ ಕೆಬಿಕ್ಕ್ ಬೂರೊಂತುಂಡು ಆತ್ ಮನಿಪಂದೆ ಇತ್ತ್ಂಡ್ ಅಲ್ಪದ ಜಾಗೆ. ಪೆರಿಯ ಪೊಲೀಸ್ ಅಧಿಕಾರಿಲೇ ನರ್ಗ್‌ದ್ ಪಿರವುಂತುದಿತ್ತೆರ್, ಅಪಗ ಕೈಟ್ಟೊಂಜಿ ಪೊಲೀಸ್ ಲಾಠಿ ಪತೊಂದು ಐವತ್ತೊಂಜೋಡು ಪ್ರಾಯದ ತುಕಾರಾಮ್ ಓಂಬ್ಳೆ ಮೆಲ್ಲನೇ ಗಾಡಿ ದಂಜಿ ಪಜ್ಜೆ ಪಾಡಿಯೆರ್. ಗುಂಡುಲು ಗಾಡಿದ ಕುಪ್ಪಿನ್ ಪುಡತ್ತ್ ಉಗ್ರೆರ್ನ ತಿಗಲೆ ಸೇರ್ದಿತ್ತ್ಂಡ್, ಆಂಡ ಒರಿಮಾತ್ರ ಜೀವ ಪೋತಿನಂಚ ಜೆತ್ತಿತ್ತೆ, ಓಂಬ್ಳೆ ಕೈತಲ್ ಬತ್ತಿನೇ AK-47ಡ್ ಗುಂಡು ರಾಪಾರೆ ಸುರು ಮಲ್ತೆ, ಕರ್ಬದುಡಲ್ದ ಓಂಬ್ಳೆ ಆಯನ್ ಗಟ್ಟಿ ಪತಿಯೆರ್ ಬಲ್ಪರೆ ಬುಡ್ಜೆರ್, ಆತಾನಗ ಪತ್ತ್ ಗುಂಡುಲು ಜೀವ ಸೇರ್ದಿತ್ತ್ಂಡ್, ಓಂಬ್ಳೆ ಕಾಯ ಬುರ್ದಿತ್ತೆರ್. ಅಲ್ಪ ಸೇರ್ದಿತ್ತಿನ ಪೊಲೀಸ್ ದಕುಲು ಆ ಉಗ್ರನ್ ಪತ್‌ದ್ ಪೆಟ್ಟ್ ಪಾಡರೆ ಸುರುಮಲ್ತೆರ್. ಅಂದ್ ಅಜ್ಮಲ್ ಕಸಬ್‌ನ್ ಜೀವಪ್ಪ ಪತಿನ ಬೀರೆ ತುಕಾರಾಮ್ ಓಂಬ್ಳೆ, ಕೇಂದ್ರ ಸರಕಾರ ಮೆರೆಗ್ ಅಶೋಕ ಚಕ್ರ ಕೊರಿಯೆರ್. ಇಂಚ ದೇಸೊದ ಮಟ್ಟೆಲ್ಡ್ ಕಾಯ ಬುರ್ದು, ಪರತಿರಿಟ್ಟ್ ಚುಕ್ಕಿ ಆದ್ ಮೆನ್ಕೊಂದಿಪ್ಪುನ ಈ ಬಿರ್ದ್‌ದ ಪೊಲೀಸ್ ಅಧಿಕಾರಿ ತುಕಾರಾಮ್ ಓಂಬ್ಳೆನ ಬೀರನ್ ನೆನೆತೊಂದು ಅರೆಗ್ ನೆಂಪುದ ಪುರ್ಪ ಸಂದಾಗ.

ಬರವು: ಸುಶಾನ್ ಕೋಟ್ಯಾನ್

ನೆತ್ತೆರ್ ದಾನ ಮಾಮಲ್ಲ ದಾನ : ಉಮಾನಾಥ ಕೋಟ್ಯಾನ್

ಪಕ್ಷಿಕೆರೆ : ನೆತ್ತೆರ್ ಗ್ ಬದಲಿ ಸೊತ್ತು ಬೇತೆ ದಾಲ ಇಜ್ಜಿ. ನೆತ್ತೆರ್ ಗ್ ನೆತ್ತೆರೇ ಪರ್ಯಾಯ. ಅಂಚಾದ್ ನೆತ್ತೆರ್ ಉಂಬೊಲಿ (ದಾನ) ಕೊರ್ಪಿನವು ಮಾಮಲ್ಲ ದಾನ ಆದುಂಡು. ಆರೋಗ್ಯವಂತೆರ್ ಅಗತ್ಯ ಇತ್ತಿನಕ್ಲೆಗ್ ನೆತ್ತೆರ್ ದಾನ ಮಲ್ತ್ ದ್ ಜೀವನೊಡು ಸಾರ್ಥಕತೆನ್ ಪಡೆವೊಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.

ಆರ್ ದಕ ಜಿಲ್ಲಾ ಪ್ರಶಸ್ತಿ ಗೆಂದಿನ, ಸಾಧನಾ ರಾಜ್ಯ ಪ್ರಶಸ್ತಿ ಬೊಕ್ಕ ಕರ್ನಾಟಕ ಸಂಘ ರತ್ನ ಪ್ರಶಸ್ತಿ ಪಡೆದಿನ ಶ್ರೀ ವಿನಾಯಕ ಮಿತ್ರ ಮಂಡಳಿ (ರಿ.) ಪಕ್ಷಿಕೆರೆ ನೆತ್ತ ಮುತಾಲಿಕೆಡ್ ಯುವಕಾರ್ಯ ಬೊಕ್ಕ ಕ್ರೀಡಾ ಸಚಿವಾಲಯ, ನೆಹರು ಯುವ ಕೇಂದ್ರ ಕುಡ್ಲ, ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆ ಕುಡ್ಲ ದ.ಕ, ಕೆಮ್ರಾಲ್ ಗ್ರಾಮ ಪಂಚಾಯತ್ ಪಕ್ಷಿಕೆರೆ, ವೆನ್ಲಾಕ್ ಹಾಸ್ಪಿಟಲ್ ಕುಡ್ಲ, ಅತ್ತೂರು ಗೈಸ್ ಪಕ್ಷಿಕೆರೆ, ನಾಗಬ್ರಹ್ಮ ಭಜನಾ ಮಂಡಳಿ ಹೊಸಕಾಡು, ಸೈಂಟ್ ಜೂಡ್ ಅಸೋಸಿಯೇಷನ್ ಪಕ್ಷಿಕೆರೆ, ಕಂಬಳಬೆಟ್ಟು ಫ್ರೆಂಡ್ಸ್ ತೋಕೂರು, ಫ್ರೆಂಡ್ಸ್ ಕ್ಲಬ್ ಅತ್ತೂರು ಕಾಪಿಕಾಡು, ಗುರುಬ್ರಹ್ಮ ಫ್ರೆಂಡ್ಸ್ ಪುನರೂರು, ರಿಕ್ಷಾ ಚಾಲಕ ಮಾಲಕೆರೆನ ಸಂಘ ಪಕ್ಷಿಕೆರೆ ಬೊಕ್ಕ ಚರ್ಚ್ ನಿಲ್ದಾಣ ಬೊಕ್ಕ ದುರ್ಗಶಕ್ತಿ ಕೆಮ್ರಾಲ್ ನೆತ್ತ ಒಟ್ಟುಸೇರಿಗೆಡ್ ಕೆಮ್ರಾಲ್ ಗ್ರಾಮ ಪಂಚಾಯತ್ ಸಮುದಾಯ ಭವನಡ್ ಜೂ.18 ಗು ನಡತಿನ ನೆತ್ತೆರ್ ಉಂಬೊಲಿ ಶಿಬಿರ ಉದಿಪನ ಮಲ್ತ್ ಪಾತೆರಿಯೆರ್.

ಜಿಲ್ಲಾ ಪಂಚಾಯತ್ ದ ಮಾಜಿ ಉಪಾಧ್ಯಕ್ಷೆರ್ ಕಸ್ತೂರಿ ಪಂಜ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಈ ಪೊರ್ತುಡು ತಾಪಂ ಮಾಜಿ ಸದಸ್ಯೆರ್ ವಿನೋದ್ ಬೊಳ್ಳೂರು, ದರೆಗುಡ್ಡೆ ಪಿಡಿಓ ರಮೇಶ್ ರಾಥೋಡ್, ಪಕ್ಷಿಕೆರೆ ಶ್ರೀ ಸಾರ್ವಜನಿಕ ಗಣೇಶೋತ್ಸವ ಸಮಿತಿದ ಅಧ್ಯಕ್ಷೆರ್ ಗಣಪತಿ ಆಚಾರ್ಯ ಬೊಕ್ಕ ಜಂಟಿ ಸಂಸ್ಥೆಲೆನ ಅಧ್ಯಕ್ಷೆರ್ ಬೊಕ್ಕ ಪದಾಧಿಕಾರಿಲು ಇತ್ತೆರ್. ಈ ಲೇಸ್ ಡ್ 67 ಜನ ನೆತ್ತೆರ್ ದಾನ ಮಲ್ತೆರ್.

ಮಚ್ಚಿನ ಹಿರಿಯ ಪ್ರಾಥಮಿಕ ಶಾಲೆಡ್ ತರಕಾರಿ ಕೃಷಿ

ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ BC ಟ್ರಸ್ಟ್ ಗುರುವಾಯನಕೆರೆ ಮಡಂತ್ಯಾರು ವಲಯದ ಮಚ್ಚಿನ ಕಾರ್ಯಕ್ಷೇತ್ರದ ಹಿರಿಯ ಪ್ರಾಥಮಿಕ ಶಾಲೆ ಮಚ್ಚಿನ ಶಾಲೆಡ್ ವಿಪತ್ತು ಕೂಟದ ಸ್ವಯಂ ಸೇವಕೆರ್ ಮಾತ ಸೇರ್ದ್ ಶ್ರಮದಾನದ ಮುಖೇನ ಶಾಲಾ ಕೈತೋಟ ನಿರ್ಮಾಣ ಮಲ್ತ್ ದ್, ಬೆಂಡೆ, ಪೀರೆ, ಚೀಪೆ ಕುಂಬುಡ ಸೇರಿನಂಚನೆ ಬೇತೆ ಬೇತೆ ತರಕಾರಿ ಬೀಜದ ನಾಟಿ ಮಲ್ತೆರ್.

ಅಂಚೆನೆ, ಪರಿಸರ ದೈ ನಾಟಿ ಲೇಸ್ ಆಯೋಜನೆ ಮಲ್ತ್ ದ್, ಬೇತೆ ಬೇತೆ ಜಾತಿದ ಫಲ ವಸ್ತುಲೆನ ದೈ ನಾಟಿ ಮಲ್ತೆರ್.

ಈ ಲೇಸ್ ಡ್ ಶಾಲೆದ ಮುಖ್ಯ ಅಧ್ಯಾಪಕೆರ್ ವಿಠ್ಠಲ್ B ಮೇರ್ ದೈ ಕೊರ್ಪಿನ ಮುಖೇನ ಉದಿಪನ ಮಲ್ತೆರ್. ವಿಪತ್ತು ನಿರ್ವಹಣ ಘಟಕದ ತಾಲೂಕ್ ಸಮಿತಿದ ಮಾಸ್ಟರ್ ಶ್ರೀಕಾಂತ್ ಪಟವರ್ದನ್ ಬೊಕ್ಕ ಕ್ಯಾಪ್ಟನ್ ಸತೀಶ್ ವಲಯ ಮೇಲ್ವಿಚಾರಕೆರ್ ವಸಂತ ಕುಮಾರ್, ಕೃಷಿ ಮೇಲ್ವಿಚಾರಕೆರ್ ಕೃಷ್ಣ ಗೌಡ, ಸೇವಾಪ್ರತಿನಿಧಿ ಪರಮೇಶ್ವರ್, ಹೇಮಲತಾ ಬೊಕ್ಕ ಮಾತ ಸ್ವಯಂ ಸೇವಕೆರ್, ಒಕ್ಕೂಟದ ಸದಸ್ಯೆರ್ ಇತ್ತೆರ್.

ಶೃಂಗೇರಿ: ಚಿಪ್ಸ್ ಕಯಿಪುನಗ ಕಾಯಿನ ಎಣ್ಣೆದ ಬಾಣಲೆಗ್ ಬೂರಿನ ಜವನೆ: 13 ದಿನರ್ದ್ ಬೊಕ್ಕ ತೀರ್ ಪೋಯೆರ್

ಶೃಂಗೇರಿ: ಚಿಪ್ಸ್ ಕಯಿಪುನ ಬಾಣಲೆಗ್ ಬೂರಿನ 25 ವರ್ಷದ ಜವನೆ ಆಸ್ಪತ್ರೆಡ್ 13 ದಿನತ್ತ ಬೊಕ್ಕ ತೀರ್ ಪೋಯಿನ ಘಟನೆ ಚಿಕ್ಕಮಗಳೂರು ಜಿಲ್ಲೆದ ಶೃಂಗೇರಿ ತಾಲೂಕ್ ದ ಕಿಕ್ರೆ ಗ್ರಾಮಡ್ ನಡತ್ಂಡ್.

ಈ ಘಟನೆಡ್ ಸಂದೇಶ್ ತೀರ್ ಪೋಯಿನಾರ್. ಮೇರ್ ಕಿಕ್ರೆ ಗ್ರಾಮಡ್ ಚಿಪ್ಸ್ ಫ್ಯಾಕ್ಟರಿಡ್ ಬೇಲೆ ಮಲ್ತೊಂದು ಇತ್ತೆರ್. ಚಿಪ್ಸ್ ಫ್ಯಾಕ್ಟರಿಡ್ ಸುಮಾರ್ 20 ರ್ದ್ ಎಚ್ಚ ಜವನೆರ್ ಬೇಲೆ ಮಲ್ತೊಂದು ಉಲ್ಲೆರ್.

ಕರಿನ 13 ದಿನತ್ತ ಪಿರವು ಫ್ಯಾಕ್ಟರಿಡ್ ಬೇಲೆ ಮಲ್ಪುನ ಪೊರ್ತುಡು ಚಿಪ್ಸ್ ಕಯಿಪುನ ದಿಕ್ಕೆಲ್ ಗ್ ತಾಪಮಾನ ಎಚ್ಚಾಯೆರೆ, ಎಣ್ಣೆ ಬೇಗ ಬೆಚ್ಚ ಆವಡ್ ಪನ್ಪುನ ಕಾರಣಗ್ ಎಣ್ಣೆ ಅಂಶ ಇಪ್ಪುನ ಬೊಕ್ಕ ತಾಪಮಾನ ಎಚ್ಚ ಇಪ್ಪುನ ಬೀಜನ್ ಪಾಡ್ದೆರ್. ಪುಗೆ ಎಚ್ಚಾದ್ ಇಪ್ಪುನಗ ಪೈಪ್ ನ್ ಕ್ಲೀನ್ ಮಲ್ಪರೆ ಫ್ಯಾಕ್ಟರಿದ ಮಿತ್ತ ಚಾವಡಿಗ್ ಬರ್ತಿನ ಸಂದೇಶ್ ಆಯ ತತ್ತ್ ದ್ ಸೀದಾ ಚಿಪ್ಸ್ ಕಯಿಪುನ ಮಲ್ಲ ಬಾಣಲೆಗ್ ಬೂರ್ದೆರ್.

ಮೆರೆನ ದೇಹದ 80% ದಾತ್ ಭಾಗ ಕರೆಂಚ್ ದ್ಂಡ್. ಕೂಡ್ಲೆ ಶೃಂಗೇರಿದ ಸರ್ಕಾರಿ ಆಸ್ಪತ್ರೆಡ್ ಪ್ರಾಥಮಿಕ ಚಿಕಿತ್ಸೆ ಕೊರ್ದು ಎಚ್ಚದ ಚಿಕಿತ್ಸೆಗ್ ಕುಡ್ಲಗ್ ಲೆತೊಂದು ಪೋಯೆರ್. ಮುಲ್ಪ ಕರಿನ 13 ದಿನೊರ್ದಿಂಚ ಸಾವು-ಬದುಕ್ ದ ನಡುಟ್ ಇತ್ತಿನ ಮೇರ್ ಚಿಕಿತ್ಸೆ ಫಲಕಾರಿ ಅವಂದೆ ತೀರ್ ಪೋಯೆರ್.

ಶಾಲೆಡ್ ಖೋ ಖೋ ಗೊಬ್ಬೊಂದು ಇತ್ತಿನ ಕಲ್ಪಾರ್ಥಿ ತರೆ ತಿರ್ಗ್ ದ್ ತೀರ್ ಪೋಯೆರ್

ಶಾಲೆಡ್ ಕಲ್ಪಾರ್ಥಿಲು ಖೋ ಖೋ ಗೊಬ್ಬೊಂದು ಇಪ್ಪುನ ಪೊರ್ತುಡು ಒರಿ ಕಲ್ಪಾರ್ಥಿ ತರೆ ತಿರ್ಗ್ ದ್ ಬೂರ್ದು ತೀರ್ ಪೋಯಿನ ಘಟನೆ ಮೈಸೂರ್ ದ ನಂಜನಗೂಡು ತಾಲೂಕ್ ಡ್ ನಡತ್ಂಡ್.

ಹರದನಹಳ್ಳಿ ಸರ್ಕಾರಿ ಪ್ರೌಢಶಾಲೆಡ್ 9ನೇ ಕ್ಲಾಸ್ ಕಲ್ತೊಂದು ಇತ್ತಿನ ಶಶಾಂಕ್ ತೀರ್ ಪೋಯಿನ ಆನ್. ಮೇರ್ ತರೆ ತಿರ್ಗ್ ದ್ ಬೂರುನ ದೃಶ್ಯ ಸಿಸಿಟಿವಿಡ್ ರೆಕಾರ್ಡ್ ಆತ್ಂಡ್. ಈ ಬಗೆಟ್ ನಂಜನಗೂಡು ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ಬಿರುವೆರ್ ಕುಡ್ಲ(ರಿ) ಮುಲ್ಕಿ ಘಟಕದ ವತಿರ್ದ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಬಿರುವೆರ್ ಕುಡ್ಲ (ರಿ)ಮುಲ್ಕಿ ಘಟಕದ ವತಿರ್ದ್ 72ನೇ ಸ್ಪಂದನಾ ಸೇವಾ ಯೋಜನೆದ ಮುಖೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.

ಬಿರುವೆರ್ ಕುಡ್ಲ (ರಿ) ಸ್ಥಾಪಕಾಧ್ಯಕ್ಷೆರ್ ಉದಯ ಪೂಜಾರಿ ಮೆರೆನ ಮುತಾಲಿಕೆಡ್, “ಸ್ವಂತಗ್ ಒಂತೆ, ಸಮಾಜಗ್ ಸರ್ವಸ್ವ” ಪನ್ಪುನ ಉದ್ದೇಶದೊಟ್ಟಿಗೆ ಏಪಲ ಸಮಾಜ ಸೇವೆ ಮಲ್ತೊಂದು ಇಪ್ಪುನ ಪೆರ್ಮೆದ ಬಿರುವೆರ್ ಕುಡ್ಲ ಸಂಘಟನೆದ ಅಂಗ ಸಂಸ್ಥೆಯಾಯಿನ ಮುಲ್ಕಿ ಘಟಕದ ಕ್ರಿಯಾಶೀಲ ಅಧ್ಯಕ್ಷೆರ್ ಕಿಶೋರ್ ಜೆ. ಸಾಲ್ಯಾನ್ ಮೆರೆನ ಮಾರ್ಗದರ್ಶನಡ್ ಬೊಕ್ಕ ಘಟಕದ ಮಾತ ಸದಸ್ಯೆರೆನ ಸಕಾಯರ್ದ್ 72 ನೇ ಸ್ಪಂದನಾ ಸೇವಾ ಯೋಜನೆನ್ ಇಂಚೊಗು ಹುಷಾರ್ ಇಜ್ಜಂದೆ ಇತ್ತಿನ ಮುಲ್ಕಿ ಒಡೆಯರಬೆಟ್ಟು ನಿವಾಸಿ ಜಯ ಪೂಜಾರಿ ಮೆರೆನ ಶಸ್ತ್ರ ಚಿಕಿತ್ಸೆಗ್ ಚೆಕ್ ಮುಖೇನ ಕೊರಿಯೆರ್.

ಈ ಪೊರ್ತುಡು ಘಟಕದ ಅಧ್ಯಕ್ಷೆರ್ ಕಿಶೋರ್ ಜೆ ಸಾಲ್ಯಾನ್, ಉಪಾಧ್ಯಕ್ಷೆರ್ ಉಮೇಶ್ ಮಾನಂಪಾಡಿ, ಕಾರ್ಯದರ್ಶಿ ಗಿರಿಧರ್ ಅಮೀನ್, ಕೋಶಾಧಿಕಾರಿ ಅಶೋಕ್ ಸುವರ್ಣ, ಸಂಘಟನಾ ಕಾರ್ಯದರ್ಶಿ ರಾಮನಾಥ್ ಸುವರ್ಣ, ಮೋಹನ ಸುವರ್ಣ ಬೊಕ್ಕ ಸದಸ್ಯೆರ್ ಇತ್ತೆರ್.