ಕಾಂಗ್ರೆಸ್ ಸರ್ಕಾರ ಶಕ್ತಿ ಯೋಜನೆದ ಮುಖೇನ ಪೊಂಜೋವ್ ನಕ್ಲೆಗ್ ಫ್ರೀ ಬಸ್ ಪ್ರಯಾಣ ಜಾರಿ ಮಲ್ತ್ ದ್ ತಿಂಗೊಲ್ ಕರಿದ್ಂಡ್.
ರಜೆಟ್ಟ್ ಪೊಂಜೋವ್ ನಕುಲು ಗುಂಪಾದ್ ಧಾರ್ಮಿಕ ಕ್ಷೇತ್ರಗ್ ಪೋದು, ದೇವೆರೆನ ದರ್ಶನ ಪಡೆವೊಂದು ಉಲ್ಲೆರ್. ಆಂಡ, ವಾಯುವ್ಯ ಕರ್ನಾಟಕ ಸಾರಿಗೆ ಬಸ್ ಟ್ಟ್ ಪೊಂಜೋವ್ ನಕುಲು ಕುಂಟು ನುಂಗರೆ ಪಾಡ್ದಿನ ವಿಡಿಯೋ ಭಾರೀ ವೈರಲ್ ಆತ್ಂಡ್. ಕುಕ್ಕೆ ಸುಬ್ರಹ್ಮಣ್ಯ ಬೊಕ್ಕ ಕಾರವಾರದ ನಡುಟ್ಟು ಸಂಚಾರ ಮಲ್ತೊಂದು ಇತ್ತಿನ ಬಸ್ ತ್ತ ಕಂಡಿಡ್ ಪೊಂಜೋವ್ ವುಲು ಕುಂಟು ಪಾಡ್ದೆರ್ ಪಂದ್ ವರದಿ ಆತ್ಂಡ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಮುತಾಲಿಕೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 16ನೇ ಸಂಚಿಕೆ ಜು.18 ಅಂಗಾರೆ ಬಯ್ಯಗ್ 5.30ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ಜು.19 ಕ್ಕ್ ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು.
ಸುರತ್ಕಲ್ ದ ಗುಡ್ಡೆ ಕೊಪ್ಪಲ ಬೀಚ್ ದಲ್ಪ ಮರಂಚ (ಆರೋಳಿ) ಮೀನ್ ಪತ್ತೆ ಆತ್ಂಡ್.
ಅನುಪಮಾ ಶಿವರಾಂ ಮೇರ್ ತನ್ನ ಕ್ಯಾಮರಾಡ್ ಪೋಟೋ ದೈದೆರ್. ಕಂದೊಡಿದಲೆಕ ಪಟ್ಟೆ ಪಟ್ಟೆ ಇಪ್ಪುನ ಈ ಮೀನ್ ನ್ ಒರಾನೆ ತೂನಗ ಪೋಡಿಗೆ ಆಪುಂಡು. ಈ ಆರೋಳಿ ಮೀನ್ ಎಚ್ಚಾದ್ ಕೆಂಪು ಬಣ್ಣಡ್ ಇಪ್ಪುಂಡು.
ಮಲ್ಪೆದ ರೋಹಿತ್ ಮೆಂಡನ್ ಕೊಡವೂರು ಮೇರ್ ಕೊರ್ತಿನ ಪೊಲಬುದ ಪ್ರಕಾರ, ಈ ಮೀನ್ ನ್ ತುಳುಟ್ಟ್ ಮರಂಚ ಮೀನ್ (ವಿಷದ ಮೀನ್) ಪಂದ್ ಪನ್ಪೆರ್. ಮಲ್ಪೆದಲ್ಪಲ ಈ ಮೀನ್ ಒರ ಗಾಳಗ್ ಬೂರ್ದುಂಡು. ಕಲ್ಲ್ ಇಪ್ಪುನ ಜಾಗೆಡ್ ಮಾತ್ರ ಉಂದು ತಿಕ್ಕುಂಡು. ನೆತ್ತ ಕೂಲಿ ಪರ್ತೆ ಇಪ್ಪುಂಡು. ಬೊಕ್ಕ ನೆನ್ ಊರುಡು ಏರ್ಲಾ ತಿನ್ಪುಜೆರ್. ಚೈನಾದಕುಲು ಮಾತ್ರ ತಿನ್ಪೆರ್ ಪಂದ್ ಪಂತೆರ್.
ತುಳು ಲಿಪಿತ್ತ ಅಕ್ಷರಾಭ್ಯಾಸ ಮಲ್ಪುನೆತ್ತೊಟ್ಟಿಗೆ ತುಳು ಲಿಪಿ ಕಲ್ತ್ ದ್ ತುಳು ಭಾಷೆನ್ ಒರಿಪಾವೊಡು. ತುಳು ಭಾಷೆನ್ ನಮ ಪಾತೆರ್ಂಡಲ ತುಳು ಲಿಪಿ ಅಚ್ಚರದ ಗೇನ ನಮಕ್ಕಿಜ್ಜಿ. ಈ ಬಗೆಟ್ಟ್ ನಮ ಕಲ್ಪುನಂಚಿನ ಅಗತ್ಯ ಉಂಡು ಪಂದ್ ಅದ್ಯಪಾಡಿ ಆದಿನಾಥೇಶ್ವರ ದೇವಲ್ಯದ ಆಡಳಿತ ಮಂಡಳಿದ ಸದಸ್ಯೆರ್ ಸುಕೇಶ್ ಮಾಣಾಯಿ ಪಂಡೆರ್.
ಮೇರ್ ಸುಂಕದಕಟ್ಟೆ ಶ್ರೀನಿರಂಜನ ಸ್ವಾಮಿ ಅನುದಾನಿತ ಪದವಿ ಪೂರ್ವ ಕಾಲೇಜ್ ದ ತುಳು ಅಧ್ಯಯನ ಕೇಂದ್ರ, ಕರ್ನಾಟಕ ತುಳು ಸಾಹಿತ್ಯ ಆಕಾಡೆಮಿ ಬೊಕ್ಕ ಜೈ ತುಳುನಾಡ್ ಸಂಘಟನೆದ ಒಟ್ಟುಸೇರಿಗೆಡ್ ನಡತಿನ ‘ಬಲೆ ತುಳು ಕಲ್ಪುಗ’ ಲೇಸ್ ದ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಬೊಕ್ಕ ಜೈ ತುಳುನಾಡ್ ಸಂಘಟನೆ ಅಂಚೆನೆ ತುಳು ಲಿಪಿತ್ತ ಶಿಕ್ಷಕೆರ್ ಕಿರಣ್ ತುಳುವೆ ಪಾತೆರಿಯೆರ್.
ಈ ಪೊರ್ತುಡು ಸುಂಕದಕಟ್ಟೆದ ಶ್ರೀ ನಿರಂಜನ ಸ್ವಾಮಿ ಎಜುಕೇಶನ್ ಟ್ರಸ್ಟ್ ದ ಟ್ರಸ್ಟಿ ದೀಪಕ್ ಕೋಟ್ಯಾನ್, ಕಾಲೇಜ್ ದ ಪ್ರಾಂಶುಪಾಲೆರ್ ಸುಧಾಕರ ಶೆಟ್ಟಿ, ತುಳು ಲಿಪಿ ಶಿಕ್ಷಕೆರ್ ಪ್ರಶಾಂತ್ ಪೂಜಾರಿ ನಂದಳಿಕೆ, ಜೈ ತುಳುನಾಡ್ ಸಂಘಟನೆದ ಉಪಾಧ್ಯಕ್ಷೆರ್ ಉದಯ್ ಪೂಂಜಾ ತಾಳಿಪಾಡಿಗುತ್ತು, ಸದಸ್ಯೆರ್ ನಿರಂಜನ್ ಕರ್ಕೇರ, ವಿನಯ್ ರೈ ಬೊಕ್ಕ ಕಲ್ಪಾರ್ಥಿಲು ಇತ್ತೆರ್.
ಕುಡ್ಲ: ಡೆಲ್ಲಿಡ್ ಗ್ಲೋಬಲ್ ಇಂಡಿಯಾ ಎಂಟರ್‌ಟೈನ್‌ಮೆಂಟ್‌ ಪ್ರೊಡಕ್ಷನ್ಸ್ ಆಯೋಜನೆ ಮಲ್ತಿನ ಗ್ಲೋಬಲ್ ಮಿಸೆಸ್ ಇಂಡಿಯಾ ಇಂಟರ್‌ನ್ಯಾಷನಲ್‌ ಯೂನಿವರ್ಸ್ – 2023 ಪಂತೊಡು ಕುಡ್ಲದ ಶಮಾ ವಾಜಿದ್ ಗೆಂದ್ ದ್ ಕಿರೀಟ ಪಡೆತೆರ್.
ದೇಶದ 22 ರ್ದ್ ಎಚ್ಚ ರಾಜ್ಯಡ್ ನಡತಿನ ಆಡಿಷನ್ಡ್ ಆಯ್ಕೆ ಆಯಿನ ಮಾತ ಸ್ಪರ್ಧಿಲೆನ್ ಪಿರ ಪಾಡಿನ ಶಮಾ ಈ ಸಾಧನೆ ಮಲ್ದೆರ್.
ಈ ಪಂತೊಡು ಕಿರೀಟ ಪಡೆಯಿನ ಶಮಾ, 2024 ಟ್ಟ್ ನಡಪುನ ಗ್ಲೋಬಲ್ ಮಿಸೆಸ್ ಯುನಿವರ್ಸ್ ಪಂತೊಗು ಭಾರತದ ಪ್ರತಿನಿಧಿ ಆತೆರ್. ಪ್ರಶಸ್ತಿ ಗೆಂದಿನ ಶಮಾ ವಾಜಿದ್ ಟಾಪ್ 40 ತ್ತ ಪಟ್ಟಿಡ್ ತಾನನ್ ಪಡೆತೆರ್.
ಕರ್ನಾಟಕನ್ ಪ್ರತಿನಿಧಿಸಾಯಿನ ಶಮಾ ವಾಜಿತ್ ಎಥ್ನಿಕ್ ರೌಂಡ್, ಟ್ಯಾಲೆಂಟ್ ರೌಂಡ್, ಪೂಲ್ ರೌಂಡ್ ಇಂಚ ಮಾತ ರೌಂಡ್ಡ್ ಎದುರು ಇತ್ತಿನ ಮೇರ್ ಬೊಕ್ಕ ಟಾಪ್ 10 ಪೊಂಜೋವ್ ಲೆನ ಪಟ್ಟಿಡ್ ತಾನ ಪಡೆಯೆರ್.
ಅವೆರ್ದ್ ಬೊಕ್ಕ ಮಾತ ಸುತ್ತುನ್ ಗೆಂದಿನ ಶಮಾ ಬಾಲಿವುಡ್ ನಟಿ ಮಲೈಕಾ ಅರೋರಾ ಮೆರೆನ ಕೈರ್ದ್ ಕಿರೀಟನ್ ತರೆಕ್ಕ್ ಏರಾವೊಂಡೆರ್. ಮೆರೆಗ್ 13 ತಿಂಗೊಲ್ದ ಎಲ್ಯ ಬಾಲೆ ಉಂಡು. ಮೇರ್ ಶ್ರೀನಿವಾಸ ಆರ್ಕಿಕ್ಟೆಟ್ ಕಾಲೇಜ್ ಡ್ ಪ್ರೊಫೆಸರ್ ಆದುಲ್ಲೆರ್.
ಮುಸ್ಲಿಂ ಸಮುದಾಯಡ್ ಫ್ಯಾಶನ್ ಲೋಕೊಗು ಕಾರ್ ದೀಪಿನವು ಪಂಡ ಸುಲಭದ ಬೇಲೆ ಆತ್ತ್. ಆಂಡ ಮೆರೆಗ್ ಕುಟುಂಬದಕುಲು ಈ ಸಾಧನೆ ಮಲ್ಪರೆ ಬೆರಿಬಲ ಕೊರ್ತೆರ್.
ರಾಜ್ಯಡ್ 14ನೇ ಬಜೆಟ್ ನ್ ಮಂಡನೆ ಮಲ್ತಿನ ಸಿಎಂ ಸಿದ್ದರಾಮಯ್ಯ ಮೆರೆಗ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ವೀರೇಂದ್ರ ಹೆಗ್ಗಡೆ ಮೇರ್ ಅಭಿನಂದನೆ ಪತ್ರ ಬರೆತೆರ್.
‘ಸುಮಾರ್ ಯೋಜನೆದ ಮುಖೇನ ಜನಕ್ಲೆಗ್ ಉಪಯೋಗ ಆಪಿನ ಲೇಸ್ ನ್ ಕೊರ್ತರ್. ಧರ್ಮಸ್ಥಳ ಕ್ಷೇತ್ರಗ್ ಬರೊಂದು ಇಪ್ಪುನ ಭಕ್ತೆರ್, ಇಸೇಸವಾದ್ ಪೊಂಜೋವ್ ನಕುಲು ಇರೆನ ಪುದರ್ ಡ್ ಶ್ರೀ ಮಂಜುನಾಥ ಸ್ವಾಮಿಗ್ ಸೇವೆ ಬೊಕ್ಕ ಕಾಣಿಕೆ ಸಂದಾವೊಂದು ಉಲ್ಲೆರ್. ಜೈನ ಸಮುದಾಯಗ್ ಇಸೇಸ ಅನುದಾನ ಕೊರ್ದು ಪ್ರೋತ್ಸಾಹ ಮಲ್ತಿನ ಇಚಾರ ತೆರಿದ್ ಇಡೀ ಸಮಾಜಗ್ ಕುಸಿ ಆತ್ಂಡ್. ಇಂಚಾದ್ ಮಾತೆರ್ನಾ ಪರವಾದ್ ಅಭಿನಂದನೆಲು. ಅವಕಾಶ ಇಪ್ಪುನಗ ಕ್ಷೇತ್ರಗ್ ಬತ್ತ್ ದ್ ಶ್ರೀ ಮಂಜುನಾಥ ಸ್ವಾಮಿನ ದರ್ಶನ ಪಡೆದ್ ಪೋಲೆ” ಪಂದ್ ಹೆಗ್ಡೆರ್ ಪತ್ರಡ್ ಬರೆತೆರ್.
ಕಟೀಲ್ ರಾಮ್ ಫ್ರೆಂಡ್ಸ್ (ರಿ.) ಕೂಟದ 4ನೇ ವರ್ಷದ ವಾರ್ಷಿಕ ಉಚ್ಚಯ ಆಗಸ್ಟ್ 6 ಐತಾರ ಬಯ್ಯಗ್ 3 ಗಂಟೆಗ್ ಕಟೀಲ್ ಕಾಮತ್ ಕಾಂಪ್ಲೆಕ್ಸ್ ಶ್ರೀ ಲಕ್ಷ್ಮಿ ಸಭಾಂಗಣಡ್ ನಡಪರೆ ಉಂಡು.
ಈ ಲೇಸ್ ಡ್ “2022-23 ನೇ ಸಾಲ್ ಡ್ ಎಸ್ ಎಸ್ ಎಲ್ ಸಿ ಬೊಕ್ಕ ಪಿಯುಸಿಡ್ ಎಡ್ಡೆ ಮಾರ್ಕ್ ಪಡೆಯಿನ ಕಲ್ಪಾರ್ಥಿಲೆಗ್ ಗೌರವಾರ್ಪಣೆ ಬೊಕ್ಕ ವಿದ್ಯಾರ್ಥಿ ವೇತನ ಕೊರಿಯೆರೆ ಉಂಡು. ಸಮಾಜಡ್ ಸೇವೆ ಮಲ್ತಿನ ಸಾಧಕೆರೆಗ್ ಬೊಕ್ಕ ಸಮಾಜ ಸೇವಕೆರೆಗ್ ತಮ್ಮನ ಲೇಸ್ ಬೊಕ್ಕ ಆಸಕ್ತ ಕುಟುಂಬಲೆಗ್ ಅಶಕ್ತ ಸಹಾಯಧನನ್ ಗಣ್ಯೆರೆನ ಬೊಕ್ಕ ಕೂಟದ ಸೇವಾ ಬಂಧುಲೆನ ಸಮ್ಮುಖಡ್ ಪಟ್ಟಿಯೆರೆ ಉಂಡು.
ಈ ಲೇಸ್ ಡ್ ಶ್ರೀ ಹರಿನಾರಾಯಣದಾಸ ಆಶ್ರಣ್ಣ ಕಟೀಲ್ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ನೆತ್ತ ಉದಿಪನನ್ ಮುಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ ಕೋಟ್ಯಾನ್ ಮಲ್ಪರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಉದ್ಯಮಿ ಶಿವರಾಮ್ ಕೋಟ್ಯಾನ್ ಪೆರ್ಮುದೆ, ರಂಜಿತ್ ಪೂಜಾರಿ ತೋಡರ್, ರಾಜೇಶ್ ಅಮೀನ್ ಪೊರ್ಕೋಡಿ, ಪ್ರಕಾಶ್ ಸರ್ಕಲ್ ಇನ್ಸ್ ಪೆಕ್ಟರ್ ಬಜಪೆ ಠಾಣೆ, ಅರುಣ್ ರೈ ತೋಡರ್, ಲೋಕಯ್ಯ ಸಾಲಿಯಾನ್ ಕೊಂಡೇಲ-ಕಟೀಲ್, ಅಭಿಲಾಷ್ ಶೆಟ್ಟಿ ಕಟೀಲ್, ಪ್ರಕಾಶ್ ಕುಕ್ಯಾನ್ ಎಕ್ಕಾರ್, ರಾಜಶೇಖರ್ ಎನ್, ಕಟೀಲ್ ರಾಮ್ ಫ್ರೆಂಡ್ಸ್ (ರಿ.) ಕೂಟದ ಸಂಸ್ಥಾಪಕೆರ್ ರಮಾನಂದ ಪೂಜಾರಿ ಕಟೀಲ್, ಅಧ್ಯಕ್ಷೆರ್ ರೋಹಿತ್ ಪೊಳಲಿ ಬೊಕ್ಕ ಕೂಟದ ಮತ ಪದಾಧಿಕಾರಿಲು, ಸರ್ವಸದಸ್ಯೆರ್ ಪಾಲ್ ಪಡೆಯೆರೆ ಉಲ್ಲೆರ್.
ಮುಲ್ಕಿ ಸುರಭಿ ಎಲೆಕ್ಟ್ರಾನಿಕ್ಸ್ ಬೊಕ್ಕ ಯುವ ಪಡೆ ಒಟ್ಟುಸೇರಿಗೆಡ್ ಕನ್ನಡ ಮಾಧ್ಯಮ ಶಾಲೆದ ಆರ್ಥಿಕವಾದ್ ಪಿರ ಇಪ್ಪುನ ಜೋಕುಲೆಗ್ ಶಾಲೆದ ಫೀಸ್ ಬೊಕ್ಕ ಯುನಿಫಾರ್ಮ್ ಪಟ್ಟುನ ಲೇಸ್ ಜು.14 ಸುಕ್ರಾರ ಬೊಲ್ಪುಗು 10:30 ಕ್ಕ್ ಮುಲ್ಕಿ ಸುರಭಿ ಇಲೆಕ್ಟ್ರಾನಿಕ್ಸ್ ಬೊಕ್ಕ ಫರ್ನಿಚರ್ ಸ್ಟೋರ್ ಡ್ ನಡಪರೆ ಉಂಡು.
ಈ ಲೇಸ್ ಡ್ ಮುಲ್ಕಿ ಪೊಲೀಸ್ ಇನ್ಸ್ ಪೆಕ್ಟರ್ ವಿದ್ಯಾದರ್ ಬೈಕೇರಿಕರ್ ಜೋಕುಲೆಗ್ ಶಾಲೆದ ಫೀಸ್ ಬೊಕ್ಕ ಯುನಿಫಾರ್ಮ್ ಪಟ್ಟಿಯೆರೆ ಉಲ್ಲೆರ್.
ನವದುರ್ಗಾ ಫ್ರೆಂಡ್ಸ್ ಸರ್ಕಲ್ (ರಿ.) ರಥಬೀದಿ ಸುರತ್ಕಲ್ (ತೊರ್ತಾಲ್) ಬೊಕ್ಕ ತ್ರೈರೂಪಿಣಿ ಮಹಿಳಾ ಮಂಡಳಿದ ಒಟ್ಟುಸೇರಿಗೆಡ್ ಊರುದ ಪತ್ತ್ ಸಮಸ್ತೆರ್ ಸೇರೊಂದು ಇತಿಹಾಸ ಪುಗರ್ತೆದ ಪಿರಾಕ್ ದ ತೊರ್ತಾಲ್ ಮಾರಿಗುಡಿ ಶ್ರೀ ಮಾರಿಯಮ್ಮ ದೇವಲ್ಯ ಬೊಕ್ಕ ಶ್ರೀ ವೀರಭದ್ರ ದುರ್ಗಾಪರಮೇಶ್ವರೀ ದೇವಲ್ಯದ ಬಾಕಿಮಾರ್ ಕಂಡೊಡು ನೇಜಿ ನಡ್ಪುನ ಲೇಸ್ ಇಂಚೊಗು ನಡತ್ಂಡ್.
ಮಾರಿಯಮ್ಮನ ಸನ್ನಿಧಿಡ್ ನೇಜಿ ದೀದ್ ಕ್ಷೇತ್ರದ ಅರ್ಚಕೆರ್ ಪ್ರಾರ್ತನೆ ಮಲ್ತೆರ್. ನವದುರ್ಗಾ ಫ್ರೆಂಡ್ಸ್ ಸರ್ಕಲ್ ದ ಗೌರವಾಧ್ಯಕ್ಷೆರ್ ಮಹಾಬಲ ಪೂಜಾರಿ ಕಡಂಬೋಡಿ, ಕ್ಷೇತ್ರದ ಆಡಳಿತ ಸಮಿತಿದ ಅಧ್ಯಕ್ಷೆರ್ ಉಸ್ತಾದ್ ಕೇಶವ ಪಿ.ಶೆಟ್ಟಿಗಾರ್, ಕೋಶಾಧಿಕಾರಿ ಓಂಪ್ರಕಾಶ್ ಡಿ. ಶೆಟ್ಟಿಗಾರ್ ಕಡಂಬೋಡಿ, ಕೃಷಿ ಕಾರ್ಯದ ಉಸ್ತುವಾರಿ ಸುರೇಶ್ ಪಿ.ಶೆಟ್ಟಿಗಾರ್ ದೇವೆರೆನ ಪುರ್ಸಾದ ಪಾಡ್ದ್ ಬಾಕಿಮಾರ್ ಕಂಡಗ್ ಜತ್ತ್ ದ್ ನೇಜಿ ನಡಿಯೆರ್.
ನವರಾತ್ರಿದ ಸುರುತ್ತ ದಿನ ಊರುದ ಪತ್ತ್ ಸಮಸ್ತೆರ್ ಕುರಲ್ ಪರ್ಬಗ್ ಬಾಕಿಮಾರ್ ಕಂಡರ್ದೆ ಕುರಲ್ ದೆತೊಂದು ಪೋದು ಇಲ್ಲಲ್ ಕಟ್ಟುನ ಸಂಪ್ರದಾಯನ್ ದುಂಬು ಕೊನೊಪುನ ದಿಟ್ಟಿಡ್ ಈ ಸಂಸ್ಥೆದ ಸೇವಾ ಕಾರ್ಯನ್ ನೆಂಪು ದೀವೊಡಾಯಿನವು ಪಂದ್ ಗೌರವಾಧ್ಯಕ್ಷೆರ್ ಮಹಾಬಲ ಪೂಜಾರಿ ಕಡಂಬೋಡಿ ಪಂಡೆರ್.
ಈ ಲೇಸ್ ಡ್ ಕೃಷಿ ಕಾರ್ಯದ ಪೆರಿಯೆರ್ ಭವಾನಿ, ದಮಯಂತಿ, ಪ್ರೇಮ ಮೆರೆನ ಮಾರ್ಗದರ್ಶನಡ್ ಊರುದ ಜವನೆರ್, ಪೊಂಜೋವ್ ನಕುಲು, ಜಂಟಿ ಸಂಸ್ಥೆದ ಪದಾಧಿಕಾರಿಲು, ಸದಸ್ಯೆರ್ ಇತ್ತೆರ್.
ಸುಮಾರ್ ವರ್ಷೊರ್ದಿಂಚ ಬ್ರಹ್ಮ ಬೈದರ್ಲೆನ ಸೇವೆ ಮಲ್ತೊಂದು ಬದ್ ಕ್ ನ ಸಾರ್ತಕ ಮಲ್ತಿನ ಬೈದೆರ್ಲೆ ದರ್ಶನ ಪಾತ್ರಿ ಮೂಜೂರು ಲೋಕು ಪೂಜಾರಿ ಮೇರ್ ಇನಿ ದೇವೆರೆ ಪಾದೊ ಸೇರಿಯೆರ್.
ಮೆರೆನ ಆತ್ಮೊಗು ಬ್ರಹ್ಮ ಬೈದರ್ಕಳ ದೇವೆರ್ ಸದ್ಗತಿನ್ ಕೊರಡ್ ಪಂದ್ ಪ್ರಜ್ಞಾನಂ ಬ್ರಹ್ಮ ಬಳಗದಕುಲು ಸುಗಿತೊಂದೆರ್.
