Tulu News

“ಸರ್ಕಸ್ ” ಪಿಕ್ಚರ್ ದ ಸಕ್ಸೆಸ್ ಗ್ ಟೀಮ್ ವರ್ಕ್ ಕಾರಣ: ರೂಪೇಶ್ ಶೆಟ್ಟಿ

ಕುಡ್ಲ: ಸರ್ಕಸ್ ಪಿಕ್ಚರ್ ಗೆಂದ್ ನಿ ಒರಿಯರ್ದ್ ಅತ್ತ್. ಎನ್ನ ಇಡೀ ಕೂಟ ನೆಕ್ಕಾದ್ ರಾತ್ರೆ ಪಗೆಲ್ ಬೆನ್ತ್ಂಡ್. ಎಚ್ಚಿನಕುಲು ಭಾಷೆದ ಮಿತ್ತ್ ಮೋಕೆ ದೀದ್ ತುಳು ಪಿಕ್ಚರ್ ಮಲ್ಪುವೆರ್, ಆಂಡ ಬುಡುಗಡೆ ಪೊರ್ತುಡು ಅಮಸರ ಮಲ್ಪುವೆರ್. ನೆರ್ದ್ ಎಡ್ಡೆ ಪಿಕ್ಚರ್ ಲ ಸೋಪುಂಡು.ಅಂಚಾದ್ ಪಿಕ್ಚರ್ ಬುಡುಗಡೆ ಪೊರ್ತುಡು ಜಿದ್ದ್ ಬೊರ್ಚಿ ಪಂದ್ ಸರ್ಕಸ್ ಪಿಕ್ಚರ್ ದ ನಿರ್ದೇಶಕೆರ್ ರೂಪೇಶ್ ಶೆಟ್ಟಿ ಪಂಡೆರ್.

ಮೇರ್ ತನ್ನ ನಿರ್ದೇಶನ ಬೊಕ್ಕ ಅಭಿನಯದ “ಸರ್ಕಸ್” ತುಳು ಪಿಕ್ಚರ್ ಜೂನ್ 23 ಕ್ಕ್ ಜಗತ್ತ್ ಇಡೀ ಬುಡುಗಡೆಯಾದ್, ಯಶಸ್ಸ್ ಆಯಿನ ಪೊರ್ತುಡು ಮಲ್ತಿನ ಸಕ್ಸಸ್ ಮೀಟ್ ಡ್ ಪಾತೆರಿಯೆರ್.

ಭೋಜರಾಜ್ ವಾಮಂಜೂರು ಮೇರ್ ಪಾತೆರ್ದ್, “ಸರ್ಕಸ್ ಪಿಕ್ಚರ್ ದ ಬಗ್ಗೆ ಪಾತೆರಿಯೆರೆ ಪೆರ್ಮೆ ಆಪುಂಡು. ದಾಯೇ ಪಂಡ ತುಳುನಾಡ್ ಡ್ ಮಾತ್ರ ಅತ್ತಂದೆ ದೇಶ ವಿದೇಶಡ್ಲಾ ಪಿಕ್ಚರ್ ಪುದರ್ ಮಲ್ತೊಂದು ಉಂಡು. ಪಿಕ್ಚರ್ ಗೆಂದಿಯೆರೆ ಮಾಧ್ಯಮ ಮಿತ್ರೆರೆನ ಸಹಕಾರ ಮಸ್ತ್ ಅಗತ್ಯ. ಅವ್ವೇ ರೀತಿ ಸರ್ವಧರ್ಮದ ಪ್ರೇಕ್ಷಕೆರೆನ ಪ್ರೀತಿರ್ದ್ ಪಿಕ್ಚರ್ ಗೆಂದ್ ದ್ಂಡ್. ಆಯಿಕ್ಕಾದ್ ಮಾತೆರೆಗ್ಲಾ ಸೊಲ್ಮೆಲು. ರೂಪೇಶ್ ಶೆಟ್ಟಿ ಟೀಮ್ ಮಲ್ತಿನ ನಿರಂತರ ಪ್ರಯತ್ನದ ಫಲವಾದ್ ಪಿಕ್ಚರ್ ಎಡ್ಡೆ ಪುದರ್ ಪಡೆತ್ಂಡ್. ಉಂದುವೇ ರೀತಿ ನನ ಬರ್ಪಿನ ಮಾತ ತುಳು ಪಿಕ್ಚರ್ ಗ್ಲಾ ನಿಕ್ಲೆನ ಮಾತ ಪ್ರೋತ್ಸಾಹ ಇಪ್ಪಡ್” ಪಂದ್ ಪಂಡೆರ್.

ಸಂಭಾಷಣೆ ಬರೆಯಿನ ಪ್ರಸನ್ನ ಶೆಟ್ಟಿ ಬೈಲೂರು ಪಾತೆರ್ದ್, “ಬಲೇ ತೆಲಿಪಾಲೆ ಮುಖೇನ ಬತ್ತಿನ ಎಲ್ಯ ಕಲಾವಿದೆ ಯಾನ್. ಎನನ್ ಗುರುತಿಸಾದ್ ಪಿಕ್ಚರ್ ಡ್ ಸಂಭಾಷಣೆ ಬರೆಯೆರೆ ಅವಕಾಶ ಮಲ್ತ್ ಕೊರಿನ ರೂಪೇಶ್ ಶೆಟ್ಟಿ ಮೆರೆಗ್ ಸೊಲ್ಮೆ ಸಂದಾವೆ. ಕುಡ್ಲ ಮಾತ್ರ ಅತ್ತಂದೆ ಬೆಂಗ್ಲೂರ್ ದ ಕನ್ನಡಿಗೆರ್ ಪಿಕ್ಚರ್ ದ ಕಾಮಿಡಿ ಸೀನ್ ಡ್ ತೆಲಿತೊಂದು ಉಲ್ಲೆರ್. ಭಾಷೆ ಅರ್ಥ ಆವಂದೆ ಇತ್ತ್ಂಡಲ ಕಲಾವಿದೆರೆನ ನಟನೆ ಜನಕ್ಲೆನ್ ತೆರಿದ್ಂಡ್ ಪಂಡ ಆಯಿಕ್ಕ್ ರೂಪೇಶ್ ಶೆಟ್ಟಿ ಮೆರೆನ ದಕ್ಷ ನಿರ್ದೇಶನ ಕಾರಣ” ಪಂದ್ ಪಂಡೆರ್.

ಪತ್ರಿಕಾಗೋಷ್ಠಿಡ್ ನಟಿ ರಚನಾ ರೈ, ಭೋಜರಾಜ್ ವಾಮಂಜೂರ್, ಪಂಚಮಿ ವಾಮಂಜೂರ್, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ, ನವೀನ್ ಶೆಟ್ಟಿ, ನಿರ್ಮಾಪಕೆರ್ ಮಂಜುನಾಥ್ ಅತ್ತಾವರ, ಸಂಗೀತ ನಿರ್ದೇಶಕೆರ್ ಲಾಯ್ ವೇಲೆಂಟೈನ್ ಡಿಸೋಜ, ಪಿಕ್ಚರ್ ದ ವಿತರಣೆಕಾರೆರ್ ಸಚಿನ್ ಎ.ಎಸ್. ಉಬಾರ್ ಇತ್ತೆರ್.

130ರ್ದ್ ಎಚ್ಚ ಟಾಕೀಸ್ ಡ್ ಬುಡುಗಡೆ ಆಯಿನ ಸುರುತ್ತ ತುಳು ಪಿಕ್ಚರ್

ಸರ್ಕಸ್ ಇಡೆ ಮುಟ್ಟ 14 ದೇಶ ಸೇರ್ದ್ ಒಟ್ಟು 130 ಚಿತ್ರ ಮಂದಿರಡ್ ಬುಡುಗಡೆ ಆತ್ಂಡ್. ಅತ್ತಂದೆ ದೇಶ ಇಡೀ ಬುಡುಗಡೆ ಆಯಿನ ಸುರುತ್ತ ತುಳು ‘ಪ್ಯಾನ್ ಇಂಡಿಯಾ’ ಪಿಕ್ಚರ್ ಪನ್ಪುನ ಪುದರ್ ಪಡೆತ್ಂಡ್.

ಭಾರತ್ ಸಿನಿಮಾಸ್ ರ್ದ್ ಕನ್ನಡದಾತೆ ಆದಾಯದ ಉಡುಗೊರೆ:

ಸರ್ಕಸ್ ಪಿಕ್ಚರ್ ದ ಕೂಟದ ಶ್ರಮನ್ ತೂದು ಭಾರತ್ ಸಿನಿಮಾಸ್ ಕನ್ನಡ ಪಿಕ್ಚರ್ ಗ್ ತಿಕ್ಕುನ ಆದಾಯದ ಅಂಸದಾತೇ ಸರ್ಕಸ್ ಗ್ ಕೊರಿಯೆರೆ ನಿರ್ಧಾರ ಮಲ್ದ್ಂಡ್. ಆಂಡ ಸುರುತ್ತ ವಾರಡ್ ತನ್ನ ಸಂಸ್ಥೆದ ಚಿತ್ರಮಂದಿರಡ್ 18000 ಜನ ಪಿಕ್ಚರ್ ತೂವೊಡು ಪಂದ್ ಶರ್ತ ಪಾಡ್ದ್ ಇತ್ತ್ಂಡ್.
ಭಾರತ್ ಸಿನಿಮಾಸ್ ದ ಮುಖ್ಯಸ್ಥೆರಾಯಿನ ಬಾಲಕೃಷ್ಣ ಶೆಟ್ಟಿ ಮೆರೆನ ಈ ನಿರ್ಧಾರರ್ದ್ ಸರ್ಕಸ್ ಕೂಟಗ್ ಮಲ್ಲ ಸಹಕಾರ ಆತ್ಂಡ್.

ಸರ್ಕಸ್ ಪಿಕ್ಚರ್ ದ ಪೊಲಬು

ರೂಪೇಶ್ ಶೆಟ್ಟಿ ನಿರ್ದೇಶನದ ಗಿರಿಗಿಟ್ ಬೊಕ್ಕ ಸರ್ಕಸ್ ರಡ್ಡ್ ಪಿಕ್ಚರ್ ಲ ಸೂಪರ್ ಹಿಟ್ ಆತ್ಂಡ್. ಗಿರಿಗಿಟ್ ಗ್ ಸಂಭಾಷಣೆ ಬರೆಯಿನ ಪ್ರಸನ್ನ ಶೆಟ್ಟಿ ಬೈಲೂರ್ ಈ ಪಿಕ್ಚರ್ ಗ್ಲಾ ಸಂಭಾಷಣೆ ಬರೆತೆರ್. “ಸಲಗ” ಖ್ಯಾತಿದ ಯಶ್ ಶೆಟ್ಟಿ ಸರ್ಕಸ್ ಮುಖೇನ ತುಳುಕ್ಕ್ ಪರಿಚಯ ಆತೆರ್. ಅವ್ವೇ ರೀತಿ ರಚನಾ ರೈ ಪನ್ಪುನ ನಟಿನ್ ತುಳು ಪಿಕ್ಚರ್ ಗ್ ಪರಿಚಯ ಮಲ್ದೆರ್.

ಈ ಪಿಕ್ಚರ್ ಡ್ ತುಳು ಪಿಕ್ಚರ್ ದ ಕಲಾವಿದೆರಾಯಿನ ನವೀನ್‌ ಡಿ. ಪಡೀಲ್‌, ಭೋಜರಾಜ ವಾಮಂಜೂರು, ಅರವಿಂದ ಬೋಳಾರ್, ಸಾಯಿಕೃಷ್ಣ ಕುಡ್ಲ, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ ಮಾಣಿಬೆಟ್ಟು, ಉಮೇಶ್ ಮಿಜಾರ್, ಚಂದ್ರಹಾಸ ಉಳ್ಳಾಲ್, ನಿತೇಶ್ ಶೆಟ್ಟಿ ಎಕ್ಕಾರ್, ಪ್ರದೀಪ್ ಆಳ್ವ, ರೂಪಾ ವರ್ಕಾಡಿ, ಪಂಚಮಿ ಭೋಜರಾಜ್ ಉಲ್ಲೆರ್.

ಶೂಲಿನ್ ಫಿಲಂಸ್, ಮುಗ್ರೋಡಿ ಫಿಲಂಸ್ ಲಾಂಛನಡ್ ಈ ಪಿಕ್ಚರ್ ತಯಾರಾತ್ಂಡ್. ಅನಿಲ್ ಶೆಟ್ಟಿ, ಸುಧಾಕರ ಶೆಟ್ಟಿ, ಮಂಜುನಾಥ ಅತ್ತಾವರ ಈ ಪಿಕ್ಚರ್ ನ್ ನಿರ್ಮಾಣ ಮಲ್ದೆರ್. ತುಳುನಾಡ್ ದ ಸುತ್ತಮುತ್ತದ ಪರಿಸರಡ್ ನೆತ್ತ ಶೂಟಿಂಗ್ ನಡತ್ಂಡ್. ಸಂಭಾಷಣೆ ಪ್ರಸನ್ನ ಶೆಟ್ಟಿ ಬೈಲೂರು, ನವೀನ್ ಶೆಟ್ಟಿ ನೃತ್ಯ ನಿರ್ದೇಶನ, ನಿರಂಜನ ದಾಸ್ ಕ್ಯಾಮರಾ, ರಾಹುಲ್ ವಶಿಷ್ಠ ಸಂಕಲನ, ಲೋಯ್ ಮೆರೆನ ಸಂಗೀತ ಈ ಪಿಕ್ಚರ್ ಗ್ ಉಂಡು.

ಬಿಜೆಪಿದ ವಿರುದ್ಧ ಕಾಂಗ್ರೆಸ್ ನಾಯಕೆರೆನ ಮೌನ ಪ್ರತಿಭಟನೆ

ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಮೆರೆನ ವಿರುದ್ಧ ಬಿಜೆಪಿ ನಡಪಾವೊಂದು ಇಪ್ಪುನ ಪಗೆತ್ತ ರಾಜಕಾರಣನ್ ಖಂಡಿಸಾದ್ ಜು.12 ಕ್ಕ್ ಮುಲ್ಕಿ ನಗರ ಪಂಚಾಯತ್ ದ ಕೈತಲ್ ಕಾಂಗ್ರೆಸ್ ಕಾರ್ಯಕರ್ತೆರ್ ‘ಮೌನ ಪ್ರತಿಭಟನೆ’ ಮಲ್ತೆರ್.

ಈ ಪ್ರತಿಭಟನೆಡ್ ಮಾಜಿ ಸಚಿವೆರ್ ಕೆ ಅಭಯ ಚಂದ್ರ ಜೈನ್ ಬೊಕ್ಕ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಶ್ರೀ ಮಿಥುನ್ ರೈ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಮುಲ್ಕಿ ಕೆಪಿಸಿಸಿ ಸದಸ್ಯೆರ್ ವಸಂತ ಬೆರ್ನಾಡ್, ಬೆದ್ರ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ವಲೇರಿಯನ್ ಸಿಕ್ವೇರಾ, ಬೆದ್ರ ಕೆಪಿಸಿಸಿ ಸದಸ್ಯೆರ್ ಚಂದ್ರಹಾಸ ಸನಿಲ್, ವಕ್ತಾರೆರ್ ರಾಜೇಶ್ ಕಡಲ ಕೆರೆ, ನಗರ ಪಂಚಾಯತ್ ಸದಸ್ಯೆರ್ ಯೋಗೀಶ್ ಕೋಟ್ಯಾನ್, ಪುತ್ತುಭಾವ, ಮಂಜುನಾಥ ಕಂಬಾರ, ಮಹೇಶ್ ಮುನ್ನ ಸೇವಾದಳದ ಧರ್ಮಾನಂದ ಶೆಟ್ಟಿಗಾರ್ ಭೀಮಶಂಕರ್ ಆರ್ ಕೆ, ಮಹಿಳಾ ಕಾಂಗ್ರೆಸ್ ದ ಪದ್ಮಾವತಿ ಶೆಟ್ಟಿ, ನಾಯಕೆರ್ ಪ್ರಮೋದ್ ಕುಮಾರ್ ಗೋಪಿನಾಥ್ ಪಡಂಗ, ಉಲ್ಲಾಸ್ ಶೆಟ್ಟಿ, ದೀಪಕ್ ಪೆರ್ಮುದೆ, ಅಬ್ದುಲ್ ಖಾದರ್, ಅನಿಲ್ ಪೂಜಾರಿ ಸಸಿಹಿತ್ಲು ಜನಾರ್ಧನ್ ಬಂಗೇರ ನೆಲ್ಸನ್ ಲೋಬೋ, ಎಕ್ಕಾರ್ ಮೋನಪ್ಪ ಶೆಟ್ಟಿ, ಬಶೀರ್ ಕುಳಾಯಿ ಮೊಕುಲು ಮಾತ ಇತ್ತೆರ್.

ಸೆ.19-21: ಬಂಟ್ಸ್ ಹಾಸ್ಟೆಲ್ ಡ್ ಸಾರ್ವಜನಿಕ ಶ್ರೀ ಗಣೇಶ ಉಚ್ಚಯ, ಪ್ರತಿಭಾನ್ವೇಷಣೆ ಸಮಿತಿದ ಅಟ್ಟಣೆದ ಸಭೆ

ಕುಡ್ಲ: ಬಂಟರ ಯಾನೆ ನಾಡವರ ಮಾತೃ ಸಂಘ ಬೊಕ್ಕ ಸಿದ್ದಿ ವಿನಾಯಕ ಪ್ರತಿಷ್ಠಾನದ ಆಶ್ರಯಡ್ 17ನೇ ವರ್ಷದ ಸಾರ್ವಜನಿಕ ಗಣೇಶ ಉಚ್ಚಯ ಸೆಪ್ಟಂಬರ್ 19-21ಮುಟ್ಟ ದಕ್ಷಿಣ ಕನ್ನಡ, ಒಡಿಪು, ಕಾಸ್ರೋಡು ಜಿಲ್ಲೆದ ಸರ್ವಬಂಟ ಸಮಾಜದ ಸಹಕಾರಡ್ ಬಂಟ್ಸ್ ಹಾಸ್ಟೆಲ್ ಡ್ ನಡಪರೆ ಉಂಡು.

ಸಾರ್ವಜನಿಕ ಗಣೇಶ ಉಚ್ಚಯದ ಲೆಕ್ಕೊಡು ಪ್ರತಿಭಾನ್ವೇಷಣೆಡ್ ಬೇತೆ ಬೇತೆ ಲೇಸ್ ನ್ ಆಯೋಜನೆ ಮಲ್ತ್ ದಿತ್ತೆರ್. ನೆತ್ತ ಅಟ್ಟಣೆದ ಸಭೆ ಬಂಟ್ಸ್ ಹಾಸ್ಟೆಲ್ ದ ಅಮೃತೋತ್ಸವ ಕಟ್ವಾನದ ಚಾವಡಿಡ್ ನಡತ್ಂಡ್.

ನೆತ್ತ ಗುರ್ಕಾರ್ಮೆನ್ ಬಂಟರ ಯಾನೆ ನಾಡವರ ಮಾತೃ ಸಂಘದ ಪ್ರಧಾನ ಕಾರ್ಯದರ್ಶಿ ಕೆ.ಎಂ. ಶೆಟ್ಟಿ ಒಯಿಸ್ ದಿತ್ತೆರ್.

ಕೊರೊನಾರ್ದ್ ಕರಿನ ಮೂಜಿ ವರ್ಷೊರ್ದಿಂಚ ಸಾರ್ವಜನಿಕ ಗಣೇಶೋತ್ಸವನ್ ಆಚರಣೆ ಮಲ್ಪರೆ ಆದಿಜ್ಜಂಡ್. ಈ ವರ್ಷ 17ನೇ ವರ್ಷದ ಸಾರ್ವಜನಿಕ ಗಣೇಶೋತ್ಸವನ್ ಮಾತೆರ್ಲಾ ಸೇರ್ದ್ ಆಚರಿಸಾವೊಂದು ಉಲ್ಲ. ನೆಕ್ಕ್ ಮಾತೆರ್ನಲ ಸಹಕಾರ ಅಗತ್ಯ ಪಂದ್ ಪಂಡೆರ್. ಸಮುದಾಯದ ಮಾತೆರೆನ್ಲಾ ಒಟ್ಟಿಗೆ ಸೇರ್ಸಾಯೆರೆ ಕೆಲವು ಲೇಸ್ ನ್ ಆಯೋಜನೆ ಮಲ್ದ. ನೆಕ್ಕ್ ಸಮಿತಿ, ಉಪ ಸಮಿತಿ ರಚನೆ ಮಲ್ದ. ಆಸಕ್ತೆರೆನ್ ಸಮಿತಿಗ್ ಸೇರ್ಸಾವುನ ಸಭೆ ನಡಪರೆ ಉಂಡು ಪಂದ್ ಸಿದ್ದಿ ವಿನಾಯಕ ಟ್ರಸ್ಟ್ ದ ಟ್ರಸ್ಟಿ ಆಶಾಜ್ಯೋತಿ ರೈ ಪಂಡೆರ್.

ಆಗಸ್ಟ್ 28ಕ್ಕ್ ಬೇತೆ ಬೇತೆ ದೇವಲ್ಯದ ಬಂಟ ಆಡಳಿತ ಮೊಕ್ತೇಸರೆರ್ನಬೊಕ್ಕ ದೈವೊಲ್ಯದ ಗಡಿಗಾರೆರೆನ ಸಮ್ಮೇಳನ, ಸೆಪ್ಟೆಂಬರ್ 3 ಕ್ಕ್ ಬಂಟ ಕಲೋತ್ಸವ, ಸೆಪ್ಟೆಂಬರ್ 10 ಕ್ಕ್ ಬಂಟ ಕ್ರೀಡೋತ್ಸವ, ಸೆಪ್ಟೆಂಬರ್ 16 ಕ್ಕ್ ಬಂಟ ಯುವ ಸಮ್ಮಿಲನ ನಡಪರೆ ಉಂಡು ಪಂದ್ ಪಂಡೆರ್.

ಪ್ರಮುಖೆರಾಯಿನ ಉಲ್ಲಾಸ್ ಆರ್ ಶೆಟ್ಟಿ ಪೆರ್ಮುದೆ, ದಿವಾಕರ ಸಾಮಾನಿ ಚೇಳಾಯಿರು , ಸತೀಶ್ ಶೆಟ್ಟಿ ಕೊಡಿಯಾಲ್ ಬೈಲ್, ಅಶ್ವತ್ಥಾಮ ಹೆಗ್ಡೆ ಬೊಕ್ಕ ಕಿರಣ್ ಪಕ್ಕಳ ಎಡ್ಡೆ ಪೊಲಬುನ್ ಸಭೆಕ್ಕ್ ತೆರಿಪಾಯೆರ್.

ಈ ಪೊರ್ತುಡು ಬಂಟರ ಮಾತೃ ಸಂಘದ ಕುಡ್ಲ ತಾಲೂಕ್ ದ ಸಮಿತಿದ ಸಂಚಾಲಕೆರ್ ವಸಂತ ಶೆಟ್ಟಿ, ಬಂಟರ ಮಾತೃ ಸಂಘದ ಕೋಶಾಧಿಕಾರಿ ಮನಮೋಹನ ರೈ, ಸಿದ್ದಿ ವಿನಾಯಕ ಪ್ರತಿಷ್ಠಾನದ ಟ್ರಸ್ಟಿಲು ನಿಟ್ಟೆಗುತ್ತು ರವಿರಾಜ ಶೆಟ್ಟಿ ಬೊಕ್ಕ ಬೇತೆ ಬೇತೆ ಬಂಟರ ಸಂಘಲೆನ ಪದಾಧಿಕಾರಿಲು ಇತ್ತೆರ್. ನಿವೇದಿತಾ ಶೆಟ್ಟಿ ಸಭೆ ಸುಧಾರಿಕೆ ಮಲ್ತೆರ್.

ಜು.16 : ಶ್ರೀ ವರಮಹಾಲಕ್ಷ್ಮಿ ವೃತಾಚರಣೆದ ಬೊಳ್ಳಿ ಪರ್ಬದ ನಿಲೆಟ್ಟ್ ಬೆಂಗಳೂರುಡು ಅಟ್ಟಣೆದ ಸಭೆ

ಶ್ರೀ ಧಾಮ ಮಾಣಿಲ ಕ್ಷೇತ್ರದ ಶ್ರೀ ಮೋಹನದಾಸ ಪರಮಹಂಸ ಸ್ವಾಮಿಲೆನ ಮಾರ್ಗದರ್ಶನಡ್ 24 ವರ್ಷೊರ್ದಿಂಚ ಮಾಣಿಲ ಶ್ರೀ ಮಹಾಲಕ್ಷ್ಮಿ ಕ್ಷೇತ್ರಡ್ ವರಮಹಾಲಕ್ಷ್ಮಿವೃತಾಚರಣೆ ನಡತೊಂದು ಬರೊಂದು ಉಂಡು.

ಈ ವರ್ಷ ಬೊಳ್ಳಿ ಪರ್ಬದ ವೃತಾಚಾರಣೆ ಜುಲೈ 16 ರ್ದ್ ಆಗಸ್ಟ್ 25 ಮುಟ್ಟ ಗೌಜಿಡ್ ನಡಪರೆ ಉಂಡು.

ಈ 2023-2024ನೇ ವರ್ಷದ ಬೊಳ್ಳಿ ಪರ್ಬದ ಲೆಕ್ಕೊಡು ಸುಮಾರ್ ಸಮಾಜ‌ಸೇವೆದ ಕಾರ್ಯಕ್ರಮ ಮಲ್ಪುನ ಸ್ವಾಮೀಜಿನ ಸಂಕಲ್ಪಗ್ ಮಾತೆರ್ಲಾ ಕೈಜೋಡಿಸಾದ್ ಯಶಸ್ವಿ ಮಲ್ಪುನ ಉದ್ದೇಶಡ್ ಜು.16 ಐತಾರ ಬೆಂಗ್ಲೂರ್ ಮೆಜೆಸ್ಟಿಕ್ ಡ್ ಇಪ್ಪುನ ಸ್ವಾಗತ್ ಹೋಟೆಲ್ ದ ಚಾವಡಿಡ್ ಮಧ್ಯಾಹ್ನ 2 ಗಂಟೆಗ್ ಬೆಂಗ್ಲೂರ್ ದ ಭಕ್ತೆರೆನ ಅಟ್ಟಣೆದ ಸಭೆ ನಡಪರೆ ಉಂಡು.

ಈ ಪೊರ್ತುಡು ಶ್ರೀ‌‌ ಮಹಾಲಕ್ಷ್ಮಿ ಕ್ಷೇತ್ರದ ಪ್ರತಿನಿಧಿಲಾಯಿನ ಟ್ರಸ್ಟಿಲು ಚಂದ್ರಶೇಖರ ಮೂಲ್ಯ, ಮಚ್ಛೇಂದ್ರ ಪಾಲ್ ಪಡೆಯೆರೆ ಉಲ್ಲೆರ್.

ಈ ಸಭೆಟ್ಟ್ ಬೊಳ್ಳಿ ಪರ್ಬಗ್ ಬೆಂಗ್ಲೂರ್ ವಲಯ ಸಮಿತಿ ರಚನೆ ಮಲ್ಪರೆ ಉಂಡು. ಭಕ್ತೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಲೇಸ್ ದ ಯಶಸ್ಸ್ ಗ್ ಸಲಹೆ ಸೂಚನೆನ್ ಕೊರ್ದು ಸಹಕಾರ ಮಲ್ಪೊಡು ಪಂದ್ ಮಾಣಿಲ ಶ್ರೀ ಮಹಾಲಕ್ಷ್ಮಿ ಸೇವಾ ಪ್ರತಿಷ್ಠಾನದ ಟ್ರಸ್ಟಿಲು ಪುರುಷೋತ್ತಮ ಚೇಂಡ್ಲಾ, ಅಧ್ಯಕ್ಷೆರ್ ಮಹೇಶ್ ಮೂಲ್ಯ, ಕಾರ್ಯದರ್ಶಿ ರಮಾನಾಥ್ ಏತಡ್ಕ, ಬೊಕ್ಕ ಬೆಂಗ್ಲೂರ್ ಶ್ರೀಧಾಮ ಸೇವಾ ಸಮಿತಿದ ಸದಸ್ಯೆರ್ ಕೇನೊಂದೆರ್.

ಇನಿ ನಾರಾಯಣ ಗುರು ಯುವ ವೇದಿಕೆದ 24ನೇ ವರ್ಷದ ಬ್ರಹ್ಮಶ್ರೀ ಬಂಗಾರ್ದ ಪದಕ ಕೊರ್ಪಿನ ಲೇಸ್

ಕುಡ್ಲ : ಶ್ರೀ ನಾರಾಯಣ ಗುರು ಯುವ ವೇದಿಕೆ (ರಿ.) ದ 24ನೇ ವರ್ಷದ ಬ್ರಹ್ಮಶ್ರೀ ಬಂಗಾರದ ಪದಕ ಪ್ರದಾನ, ಕಲ್ಪಾರ್ಥಿ ವೇತನ, ಸಾಧಕೆರೆಗ್ ಮಾನಾದಿಗೆದ ಲೇಸ್ (ಜು.7) ಇನಿ ಬೊಲ್ಪುಗು ಕುಡ್ಲ ಪುರಭವನಡ್ ‌ನಡಪರೆ ಉಂಡು.

ಕರ್ನಾಟಕ ವಿಧಾನಸಭೆತ್ತ ಸಭಾಧ್ಯಕ್ಷೆರ್ ಯು.ಟಿ ಖಾದರ್ ಫರೀದ್ ಈ ಲೇಸ್ ಉದಿಪನ ಮಲ್ಪುವೆರ್. ನೆತ್ತ ಗುರ್ಕಾರ್ಮೆನ್ ನಾರಾಯಣ ಗುರು ಯುವ ವೇದಿಕೆದ ಅಧ್ಯಕ್ಷೆರ್ ಬೃಜೇಶ್ ಅಂಚನ್ ಒಯಿಸೊನ್ವೆರ್. ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ ಹರಿಪ್ರಸಾದ್ ಬ್ರಹ್ಮಶ್ರೀ ಬಂಗಾರದ ಪದಕ ಪ್ರದಾನ ಮಲ್ಪರೆ ಉಲ್ಲೆರ್. ಕುಡ್ಲ ಶಿರ್ಡಿ ಬಾಬಾ ರಿಯಲ್ ಎಸ್ಟೇಟ್ ದ ಧಣಿ ರತೀಂದ್ರನಾಥ ಹೆಚ್ ಈ ಪದಕದ ಪ್ರಾಯೋಜಕೆರಾತೆರ್. ಶಾಸಕೆರ್ ವೇದವ್ಯಾಸ ಕಾಮತ್, ಮಾಜಿ ಸಚಿವೆರ್ ವಿನಯ ಕುಮಾರ್ ಸೊರಕೆ ಕಲ್ಪಾರ್ಥಿ ವೇತನನ್ ಪಟ್ಟುವೆರ್. ಆತ್ಮಶಕ್ತಿ ಪ್ರಧಾನ ಸಂಪಾದಕೆರ್, ಶಿಕ್ಷಣ ತಜ್ಞೆರ್ ವಾಮನ ಕೆ ಮೆರೆಗ್ ತಮ್ಮನ ಮಲ್ಪರೆ ಉಲ್ಲೆರ್.

ಮಲ್ಲ ಬಿನ್ನೆರಾದ್ ಮಾಜಿ ಸಚಿವೆರ್ ಕೃಷ್ಣ ಜೆ.ಪಾಲೆಮಾರ್, ಪನಾಮ ಕಾರ್ಪೊರೇಷನ್ ಸಿಇಒ ವಿವೇಕ್ ರಾಜ್ ಪೂಜಾರಿ, ಎಸಿಪಿ ಮಹೇಶ ಕುಮಾರ್, ಅಖಿಲ ಭಾರತ ಬಿಲ್ಲವರ ಮಹಿಳಾ ಸಂಘದ ಅಧ್ಯಕ್ಷೆರ್ ಸುಮಲತಾ ಯನ್ ಸುವರ್ಣ, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ, ಗುರುಬೆಳದಿಂಗಳು ಚೇರ್ ಮೆನ್ ಪದ್ಮರಾಜ್ ಆರ್, ದಿವ್ಯದೀಪ ಕನ್ಸ್ ಟ್ರಕ್ಸನ್ಸ್ ದ ಧಣಿ ಯಾದವ್ ಕೋಟ್ಯಾನ್, ರಾಣಿ ಅಬ್ಬಕ್ಕ ಅಕಾಡೆಮಿದ ತರಬೇತಿ ಅಧಿಕಾರಿ ಕ್ಯಾಪ್ಟನ್ ದಾಸಪ್ಪ ಪೂಜಾರಿ ನೆಕ್ಕಿಲಾರ್ ಪಾಲ್ ಪಡೆಯೆರೆ ಉಲ್ಲೆರ್. ಅಂಚೆನೆ 9 ಗಂಟೆರ್ದ ಮರಿಯಲದ ಮಿನದನ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು. ಮಧ್ಯಾಹ್ನ ವನಸ್ ದ ವ್ಯವಸ್ಥೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಶ್ರೀಕೇತ್ರ ಧರ್ಮಸ್ಥಳಗ್ ದ.ಕ. ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಭೇಟಿ

ಬೊಲ್ತೇರ್: ಶ್ರೀಕ್ಷೇತ್ರ ಧರ್ಮಸ್ಥಳಗ್ ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವೆರ್, ಆರೋಗ್ಯ ಸಚಿವೆರ್ ದಿನೇಶ್ ಗುಂಡೂರಾವ್ ಭೇಟಿ ಕೊರ್ತೆರ್.

ಕೋಡೆ ರಾತ್ರೆನೇ ಧರ್ಮಸ್ಥಳಗ್ ಬತ್ತ್ ದ್ ವಾಸ ಇತ್ತಿನ ಮೇರ್ ಇನಿ ಬೊಲ್ಪುಗು ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ವೀರೇಂದ್ರ ಹೆಗ್ಗಡೆರೆನ್ ಭೇಟಿ ಮಲ್ತ್ ದ್ ದೇವೆರೆನ ದರ್ಶನ ಪಡೆತೆರ್.

ಈ ಪೊರ್ತುಡು ಮೆರೆನೊಟ್ಟಿಗೆ ವಿಧಾನ ಪರಿಷತ್ ಸದಸ್ಯೆರ್ ಹರೀಶ್ ಕುಮಾರ್ ಬೊಕ್ಕ ಕಾಂಗ್ರೆಸ್ ಮುಖಂಡೆರ್ ರಕ್ಷಿತ್ ಶಿವರಾಂ ಇತ್ತೆರ್.

ದಕ್ಷಿಣ ಕನ್ನಡ ಜಿಲ್ಲಾ ಅಪರ ಜಿಲ್ಲಾಧಿಕಾರಿಯಾದ್ ಡಾ.ಜಿ.ಸಂತೋಷ್ ಕುಮಾರ್ ನೇಮಕ

ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲಾ ಅಪರ ಜಿಲ್ಲಾಧಿಕಾರಿಯಾದ್ ಡಾ.ಸಂತೋಷ ಕುಮಾರ್‌ ಮೇರ್ ನೇಮಕ ಆತೆರ್.

ದ.ಕ.ಜಿಲ್ಲಾ ಅಪರ ಜಿಲ್ಲಾಧಿಕಾರಿ ಆದಿತ್ತಿನ ಎಚ್.ಕೃಷ್ಣಮೂರ್ತಿ ವರ್ಗಾವಣೆ ಆಯಿನ ಕಾರಣ ಮೆರೆನ ಜಾಗೆಗ್ ಚಿಕ್ಕಬಳ್ಳಾಪುರದ ಉಪವಿಭಾಗಾಧಿಕಾರಿ ಆದಿತ್ತಿನ ಸಂತೋಷ್ ಮೆರೆನ್ ನೇಮಕ ಮಲ್ಪರೆ ಸರಕಾರ ಸುಕ್ರಾರ ಆದೇಶ ಕೊರ್ತುಂಡು.

ಜುಲೈ 16 ರ್ದ್ ಗೃಹ ಲಕ್ಷ್ಮೀ ಯೋಜನೆಗ್ ಅರ್ಜಿ ಸಂದಾವೊನ ಪ್ರಕ್ರಿಯೆ ಸುರು

ಬೆಂಗ್ಲೂರ್: ಗೃಹ ಲಕ್ಷ್ಮೀ ಯೋಜನೆಗ್ ಅರ್ಜಿ ಸಂದಾವುನ ಪ್ರಕ್ರಿಯೆ ಜುಲೈ 16 ರ್ದ್ ಸುರು ಆಪುಂಡು.

ಆಗಸ್ಟ್‌ 15 ಅತ್ತಂಡ 16 ಕ್ಕ್ ನಿಕ್ಲೆನ ಎಕೌಂಟ್ ಗ್ ಕಾಸ್ ಬರ್ಪುಂಡು ಪಂದ್ ಸಿಎಂ ಸಿದ್ದರಾಮಯ್ಯೆರ್ ತೆರಿಪಾದೆರ್‌.

ಮೇರ್ ಸುಕ್ರಾರ ಬಜೆಟ್‌ ಮಂಡನೆದ ಬೊಕ್ಕ ಪಾತೆರ್ದ್, ಈ ಬಜೆಟ್‌ ಐನ್ ಗ್ಯಾರಂಟಿಲು ಬೊಕ್ಕ ಎಂಕ್ಲೆನ ವೋಟುದ ಪ್ರಣಾಳಿಕೆಡ್ ತೆರಿಪಾಯಿನ ಭರವಸೆಲು ಉಂಡು. ಉಂದು ಗ್ಯಾರಂಟಿ ಬಜೆಟ್‌ ಆತ್ಂಡ್ ಪಂದ್ ಪಂಡೆರ್.

ವಿಟ್ಲಡ್ ಬಲ್ಲ್ ಪಾಡೊಂದು ತೀರ್ ಪೋಯಿನ ಜವನೆ

ವಿಟ್ಲ: ಜವನೆಯೊರಿ ಬಲ್ಲ್ ಪಾಡೊಂದು ತೀರ್ ಪೋಯಿನ ಘಟನೆ ವಿಟ್ಲಡ್ ನಡತ್ಂಡ್.

ಪ್ರಶಾಂತ್ ಮೇಗಿನಪೇಟೆ (30) ತೀರ್ ಪೋಯಿನಾರ್. ‌ಮೇರ್ ಸರಕಾರಿ ಆಸ್ಪತ್ರೆಡ್ ಡಿ ಗ್ರೂಪ್ ಡ್ ಬೇಲೆ ಮಲ್ತೊಂದು ಇತ್ತೆರ್. ಮೆರೆಗ್ ಬೊಡೆದಿ ಬೊಕ್ಕ ಬಾಲೆ ಉಲ್ಲೆರ್.

ದೈವಾರಾಧನೆದ ನಿಂದನೆ, ಪೊಂಜೋವ್ ನಕ್ಲೆನ ಬಗ್ಗೆ ಬೊರ್ಚಂದಿನ ಪೋಟೋ ಪೋಸ್ಟ್ ಮಲ್ತಿನ ಕೇಸ್ ದ ಆರೋಪಿ ಅರೆಸ್ಟ್

ಟ್ವಿಟರ್ ಡ್ ನಕಲಿ ಎಕೌಂಟ್ ಡ್ ತುಳುನಾಡ್ ದ ದೈವಾರಾಧನೆನ್ ನಿಂದನೆ ಬೊಕ್ಕ ಪೊಂಜೋವ್ ನಕ್ಲೆನ ಬಗ್ಗೆ ಬೊರ್ಚಂದಿನ ಪೋಟೋನ್ ಪೋಸ್ಟ್ ಮಲ್ತಿನ ಕೇಸ್ ದ ಆರೋಪಿನ್ ಸೆನ್ ಕ್ರೈಮ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.

ಬೆಂಗಳೂರು ಉತ್ತರ ತಾಲೂಕು ಅಮೃತಹಳ್ಳಿ ನಿವಾಸಿ ಶಿವರಾಜ್ ಎಚ್. ಕೆ (37) ಆರೋಪಿ.

ಈ ಬಗೆಟ್ಟ್ ತುಳುನಾಡ್ ದ ದೈವಾರಾಧನೆ ಸಂರಕ್ಷಣಾ ಯುವ ವೇದಿಕೆ (ರಿ.) ದಕುಲು ಸೆನ್ ಕ್ರೈಮ್ ಪೊಲೀಸೆರೆಗ್ ದೂರು ಕೊರ್ದಿತ್ತೆರ್. ಅಂಚನೆ ಪೊಲೀಸೆರ್ ಕ್ರೈಮ್ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಮಲ್ತ್ ಇತ್ತೆರ್.

ಆರೋಪಿನ್ ಕುಡ್ಲದ 7ನೇ ಜೆ.ಎಂ.ಎಫ್.ಸಿ ಕೋರ್ಟ್ ಹಾಜರ್ ಮಲ್ದೆರ್.

ಈ ಕೇಸ್ ದ ಆರೋಪಿನ್ ಪತ್ತುನ ಬೇಲೆಡ್ ಕುಡ್ಲ ಪೇಂಟೆದ ಪೊಲೀಸ್ ಆಯುಕ್ತೆರ್ ಕುಲದೀಪ್ ಕುಮಾರ್ ಆರ್ ಜೈನ್, ಸಿಸಿಬಿ ಘಟಕದ ಎಸಿಪಿ ಆಯಿನ ಪಿಎ ಹೆಗ್ಡೆ, ಕುಡ್ಲ ಪೇಂಟೆದ ಸೆನ್ ಕ್ರೈಮ್ ಪೊಲೀಸ್ ಠಾಣೆದ ಪೊಲೀಸ್ ಇನ್ಸ್ ಪೆಕ್ಟರ್ ಸತೀಶ್ ಎಂಪಿ ಬೊಕ್ಕ ಸಿಬ್ಬಂದಿಲು ಇತ್ತೆರ್.