Tulu News

ತುಳು ಭಾಷೆದ ಬುಲೆಚ್ಚಿಲ್ ಗ್ ಮಾತೆರ್ಲ ಒಗ್ಗಟ್ಟಾದ್ ಬೇಲೆ ಮಲ್ಪೊಡು: ಎ.ಸಿ.ಭಂಡಾರಿ

ತುಳು ಭಾಷೆ, ಸಂಸ್ಕೃತಿ, ಅಭಿವೃದ್ಧಿ ಬೊಕ್ಕ ಮಾನ್ಯತೆಗ್ ನಮ ಮಾತ ಸಮಾನೆರೆನ ಮನಸ್ಕೆರೆನ ಕೂಟವಾದ್ ಒಕ್ಕೂಟಡ್ ಬೇಲೆ ಮಲ್ಪೊಡು. ಅಖಿಲ ಭಾರತ ತುಳು ಒಕ್ಕೂಟಡ್ ದೇಶದ ಇಡೀ ಸುಮಾರ್ 46 ತುಳು ಭಾಷೆದ ಸಂಘಟನೆ ಸದಸ್ಯೆರ್ ಉಲ್ಲೆರ್. ಉಂದು 100 ರ್ದ್ ಎಚ್ಚಾಪುನ ಪ್ರಯತ್ನನ್ ನಮ ಮಲ್ಪೊಡು ಪಂದ್ ಅಖಿಲ ಭಾರತ ತುಳು ಒಕ್ಕೂಟದ ಅಧ್ಯಕ್ಷೆರ್ ಎ.ಸಿ. ಭಂಡಾರಿ ಪಂಡೆರ್.

ಮೇರ್ ಕಾವೂರು ಗಾಂಧಿನಗರ ಮುಗ್ರೋಡಿ ಎನ್‌ಕ್ಲೇವ್‌ಡು ಉಪ್ಪುನ ಒಕ್ಕೂಟದ ಕಚೇರಿದ ಚಾವಡಿಡ್ ನಡತಿನ ಕಾರ್ಯಕಾರಿ ಸಮಿತಿದ ಗುರ್ಕಾರ್ಮೆನ್ ಒಯಿಸೊಂದು ಪಾತೆರಿಯೆರ್.

ನನದ ದಿನಟ್ಟ್ ದೇಶದ ಮಲ್ಲ ಮಲ್ಲ ಪೇಂಟೆಡ್ ತುಳು ಸಮ್ಮೇಳನ ಮಲ್ಪುನ ಮುಖೇನ ಸಂಘಟನೆನ್ ಬುಲೆಪಾವುನ ಕಾರ್ಯಕಾರಿ ನಿರ್ಧಾರನ್ ಸಮಿತಿಡ್ ದೆತೊನೊಡು ಪಂದ್ ಪಂಡೆರ್.

ಉಪಾಧ್ಯಕ್ಷೆರ್ ಇಂದ್ರಾಳಿ ಜಯಕರ ಶೆಟ್ಟಿ ಪಾತೆರ್ದ್, ಅಖಿಲ ಭಾರತ ತುಳು ಒಕ್ಕೂಟದ ನನದ ಕಾರ್ಯಕಾರಿ ಸಮಿತಿ ಸಭೆನ್ ಮಲ್ತ್ ದ್ ಬೇತೆ ಬೇತೆ ಜಿಲ್ಲೆ ಬೊಕ್ಕ ಒಕ್ಕೂಟಡ್ ಸದಸ್ಯೆರ್ ಪೇಂಟೆ, ಗ್ರಾಮೀಣ ಪ್ರದೇಶಡ್ ಸಂಘಟನೆನ್ ಬುಲೆಪಾವೊಡು ಪಂದ್ ಪಂಡೆರ್.‌

ಈ ಪೊರ್ತುಡು ನಿಕಟಪೂರ್ವ ಅಧ್ಯಕ್ಷೆರ್ ಧರ್ಮಪಾಲ ಯು. ದೇವಾಡಿಗ, ವಿಜಯಲಕ್ಷ್ಮೀ ಬಿ. ಶೆಟ್ಟಿ ಜಯಂತಿ ಬಂಗೇರ, ಗಂಗಾಧರ ಕಿದಿಯೂರು, ಮೋಹನ್‌ದಾಸ್ ಹಿರಿಯಡ್ಕ, ಪ್ರದೀಪ್ ಆಳ್ವ ಕದ್ರಿ, ರಾಜೇಶ್ ಆಳ್ವ ಇತ್ತೆರ್. ಪ್ರಧಾನ ಕಾರ್ಯದರ್ಶಿ ಮುಲ್ಕಿ ಕರುಣಾಕರ ಶೆಟ್ಟಿ ದುಂಬುದ ಸಭೆತ್ತ ನಡಾವಳಿ, ನಿರ್ಣಯನ್ ತೆರಿಪಾಯೆರ್. ಚಂದ್ರಶೇಖರ್ ಸುವರ್ಣ ಲೆಕ್ಕ ಪತ್ರನ್ ಪರಿಶೀಲನೆ ಮಲ್ತೆರ್. ಕೋಶಾಧಿಕಾರಿ ಚಂದ್ರಹಾಸ ದೇವಾಡಿಗ ಓದಿಯೆರ್. ಜತೆ ಕಾರ್ಯದರ್ಶಿ ಪಿ.ಎ.ಪೂಜಾರಿ ಸೊಲ್ಮೆ ಸಂದಾಯೆರ್.

9 ನೇ ಕ್ಲಾಸ್ ಗ್ ಸೇರಿನ 78 ವರ್ಷದ ಜನ

ಎಲ್ಯ ಇಪ್ಪುನಗನೇ ಅಮ್ಮೆರೆನ್ ಕಳೆವೊಂದು ಶಾಲೆ ಬುಡ್ದ್ ಕೆಲಸಗ್ ಪೋವೊಂದು ಇತ್ತಿನ ಮಗೆ ಇತ್ತೆ 78 ವರ್ಷಗ್ 9ನೇ ಕ್ಲಾಸ್ ಗ್ ಸೇರ್ದೆರ್.‌

ಭದ್ರತಾ ಸಿಬ್ಬಂದಿಯಾದ್ ಬೇಲೆ ಮಲ್ತೊಂದು ಇತ್ತಿನ ಮಿಜೋರಾಂದ ಹ್ರುಕಾನ್ ಗ್ರಾಮದ ಲಾಲ್ ರಿಂಗ್ತಾರ ಪನ್ಪುನಾರ್ ಶಾಲೆಗ್ ಸೇರ್ಪಡೆ ಆತೆರ್. ಶಿಕ್ಷಣದ ಮಿತ್ತ್ ಮೆರೆಗ್ ಇಪ್ಪುನ ಪ್ರೀತಿನೇ ಮೆರೆನ್ ಶಾಲೆಗ್ ಸೇರುಲೆಕ್ಕ ಮಲ್ದ್ಂಡ್. ಸಮವಸ್ತ್ರ ಪಾಡ್ದ್, ಮೂಜಿ ಕಿ.ಮೀ ನಡತ್ ದ್ ಶಾಲೆಗ್ ಬರೊಂದು ಉಲ್ಲೆರ್.

ರೇಡಿಯೋ ಮಣಿಪಾಲಡ್ ವಿಶ್ವ ಸ್ತನ್ಯಪಾನ ಸಪ್ತಾಹದ ಲೆಕ್ಕೊಡು ಇಸೇಸ ಪೊಲಬು ಕೊರ್ಪುನ ಲೇಸ್

ಮಣಿಪಾಲ: ರೇಡಿಯೋ ಮಣಿಪಾಲ ಸಮುದಾಯ ಬಾನುಲಿ ಕೇಂದ್ರಡ್ ಆಗಸ್ಟ್ 1-7 ಮುಟ್ಟ ವಿಶ್ವ ಸ್ತನ್ಯಪಾನ ಸಪ್ತಾಹದ ಲೆಕ್ಕೊಡು ಇಸೇಸ ಪೊಲಬು ಕೊರ್ಪುನ ಲೇಸ್ ಆಗಸ್ಟ್ 3 ಗುರುವಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಮಣಿಪಾಲ್ ಕಾಲೇಜ್ ಆಫ್ ನರ್ಸಿಂಗ್ ಸಂಸ್ಥೆದ ಜೋಕುಲೆನ ಶುಶ್ರೂಷಾ ವಿಭಾಗದ ಸಹಾಯಕ ಪ್ರಾಧ್ಯಾಪಕೆರ್ ಡಾ.ಯಶೋದ ಸತೀಶ್ ಮೇರ್ ಪಾಲ್ ಪಡೆದ್ ಇಸೇಸ ಪೊಲಬು ಕೊರಿಯೆರೆ ಉಲ್ಲೆರ್. ಉಂದು ಸುಕ್ರಾರ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು

ತಿರುಪತಿ ದೇವಲ್ಯಗ್ 7 ತಿಂಗೊಲ್ಡ್ 827 ಕೋಟಿ ರೂ.‌ ಕಾಣಿಕೆ

ತಿರುಪತಿ ವೆಂಕಟೇಶ್ವರ ದೇವಲ್ಯಗ್ ಕರಿನ 7 ತಿಂಗೊಲ್ಡ್ ಭಾರೀ ಕಾಣಿಕೆ ಬೈದ್ಂಡ್.

ಕಾಣಿಕೆದ ಬಿಲೆ 827 ಕೋಟಿ ರೂ. ಆತ್ಂಡ್. ಜುಲೈ ತಿಂಗೊಲ್ ಒಂಜೇಟ್ ಸುಮಾರ್ 23 ಲಕ್ಷ ಭಕ್ತೆರ್ ಈ ದೇವಲ್ಯಗ್ ಬೈದೆರ್ ಪಂದ್ ವರದಿ ಆತ್ಂಡ್. ಈ ದೇವಲ್ಯನ್ ಪ್ರಪಂಚದ ಮಾಸ್ತ್ ಮಲ್ಲ ಶ್ರೀಮಂತ ದೇವಲ್ಯ ಪಂದ್ ಲೆಪ್ಪೋಲಿ. ಈ ದೇವಲ್ಯಗ್ ಪ್ರತಿ ವರ್ಷ ಕಾಸ್ ದ ಕಾಣಿಕೆ ಬೊಕ್ಕ ಲಡ್ಡು ಮಾರುನೆರ್ದ್ ಆದಾಯ ಬರ್ಪುಂಡು.

ಇನಿರ್ದ್ ಏಷ್ಯಾನ್ ಚಾಂಪಿಯನ್ ಶಿಪ್ ಹಾಕಿ ಪಂತೊ

ಏಷ್ಯನ್ ಚಾಂಪಿಯನ್ ಶಿಪ್ ಹಾಕಿ ಪಂತೊ ಇನಿ ಚೆನ್ನೈದ ರಾಧಾಕೃಷ್ಣನ್ ಕ್ರೀಡಾಂಗಣಡ್ ನಡಪರೆ ಉಂಡು.

ಈ ಟೂರ್ನಿ ಆಗಸ್ಟ್ 12 ಮುಟ್ಟ ನಡಪರೆ ಉಂಡು. ಭಾರತ, ಪಾಕಿಸ್ತಾನ, ಕೊರಿಯಾ, ಚೀನಾ, ಮಲೇಷ್ಯಾ ಬೊಕ್ಕ ಜಪಾನ್ ಕೂಟಲು ಪಾಲ್ ಪಡೆಯರೆ ಉಂಡು. ಸುರುತ್ತ ಪಂತೊಡು ಜಪಾನ್ ಕೂಟ, ಹಾಲಿ ಚಾಂಪಿಯನ್ ಕೊರಿಯಾದೊಟ್ಟುಗು ಗೊಬ್ಬೆರೆ ಉಂಡು. ರಾತ್ರೆ 8:30 ಕ್ಕ್ ನಡಪರೆ ಇಪ್ಪುನ ಮೂಜಿನೇ ಲೀಗ್ ಪಂತೊಡು ಭಾರತ, ‌ಚೀನಾ ಕೂಟದಕ್ಲೆನೊಟ್ಟುಗು ಗೊಬ್ಬೆರೆ ಉಂಡು. ‌

ಕಿನ್ನಿಗೋಳಿ: ಪಟ್ಲ ಫೌಂಡೇಶನ್ ದ ಪೊಸ ಯೋಜನೆ ಯಕ್ಷ ಧ್ರುವ ಯಕ್ಷ ಶಿಕ್ಷಣ ಉದಿಪನ

ಕಿನ್ನಿಗೋಳಿ: ಭಾರತದ ಸಂಸ್ಕೃತಿದ ಮಾತ ಕಲೆರ್ದ್ ನಮ್ಮ ತುಳುನಾಡ್ ದ ಗಂಡುಕಲೆ ಆಟ ಇಸೇಸಲೆಡ್ ವಿಶಿಷ್ಟ ಕಲೆ ಆತ್ಂಡ್. ಈ ಯಕ್ಷಗಾನ ಕಲೆಟ್ಟ್ ಲಯಬದ್ದವಾದ್ ಪದ ಪನ್ಪುನವು , ವೇಷಗಾರಿಕೆ, ನೃತ್ಯ, ಸ್ಪಷ್ಟ ಉಚ್ಚಾರದ ಮಾತುಗಾರಿಕೆ ಬೊಕ್ಕ ದೈಹಿಕ ವ್ಯಾಯಾಮ ಉಂಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.

ಮೇರ್ ಕಿನ್ನಿಗೋಳಿ ಕೈತಲ್ ದ ಕಮ್ಮಾಜೆದ ಮೊರಾರ್ಜಿ ದೇಸಾಯಿ ವಸತಿ ಶಾಲೆದ ಯಕ್ಷ ಶಿಕ್ಷಣ ಉದಿಪನ ಲೇಸ್ ಡ್ ಪಾತೆರ್ದ್, ಯಕ್ಷಗಾನ ಕಲ್ಪರೆ ಎಕುಲು ಕ್ಲಾಸ್ ನಾಡೊಂದು ಪೋಪುನ ಪೊರ್ತುಡು ಶಾಲೆಗ್ ಬತ್ತ್ ದ್ ಆಟ ಕಲ್ಪಾಯೆರೆ ದುಂಬು ಬತ್ತಿನ ಪಟ್ಲ ಸತೀಶ್ ಶೆಟ್ಟಿ ಮೆರೆನ್ ಬೊಕ್ಕ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಕಾರ್ಯನ್ ಮೆಚ್ಚೊಡಾಯಿನವು ಪಂದ್ ಪಂಡೆರ್.

ಈ ಪೊರ್ತುಡು ಯಕ್ಷಗಾನ ವಿದ್ವಾಂಸೆರ್ ಡಾ. ಪ್ರಭಾಕರ ಜೋಷಿ, ಎಂ.ಎಲ್ ಸಾಮಗ, ಯಕ್ಷ ಶಿಕ್ಷಣದ ರೂವಾರಿ ಬೊಕ್ಕ ಸಂಚಾಲಕೆರ್ ಪಣಂಬೂರು ವಾಸು ಐತಾಳ್, ಯುಗಪುರುಷದ ಭುವನಾಭಿರಾಮ ಉಡುಪ, ಬಿಸಿಎಂ ಇಲಾಖೆದ ಜಿಲ್ಲಾ ಅಧಿಕಾರಿ ಸಚಿನ್ ಕುಮಾರ್, ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ ಪುರುಷೋತ್ತಮ ಭಂಡಾರಿ ಅಡ್ಯಾರ್, ಕೋಶಾಧಿಕಾರಿ ಸಿಎ ಸುದೇಶ್ ಕುಮಾರ್ ರೈ, ಶಾಲೆದ ಪ್ರಿನ್ಸಿಪಾಲ್ ಪುಟ್ಟಸ್ವಾಮಿ ಇತ್ತೆರ್.

ಶಾಸಕೆರ್ ಉಮಾನಾಥ ಕೋಟ್ಯಾನ್ ಮೆರೆಗ್ ಮಾನಾದಿಗೆ ನಡತ್ಂಡ್. ಚಿತ್ರಕಲೆ ಶಿಕ್ಷಕೆರ್ ಭವನ್ ಪಿ.ಜಿ ಮೇರ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಮೆರೆನ ಚಿತ್ರ ಬುಡ್ಪಾದ್ ಆಯಿನ್ ಶಾಸಕೆರೆಗ್ ಕೊರಿಯೆರ್. ಮುಂಡಾಜೆ ಮೊರಾರ್ಜಿ ದೇಸಾಯಿ ವಸತಿ ಶಾಲೆದ ಪ್ರಾಂಶುಪಾಲೆರ್ ಮುರಳೀಧರ್ ಜಿ.ಎನ್ ಎದ್ಕೊನಿಯೆರ್. ಶಿಕ್ಷಕೆರ್ ಮಂಜುನಾಥ ಕೆ ಸೊಲ್ಮೆ ಸಂದಾಯೆರ್. ‌ಶಿಕ್ಷಕೆರ್ ಪ್ರವೀಣ್ ಪೂಜಾರಿ ಈ ಲೇಸ್ ದ ಸುಧಾರಿಕೆ ಮಲ್ತೆರ್.

ಇನಿ ಸಿಎಂ ಸಿದ್ದರಾಮಯ್ಯರೆನ 76 ನೇ ವರ್ಷದ ಪುಟ್ಟುಪರ್ಬ

ಸಿಎಂ ಸಿದ್ದರಾಮಯ್ಯ ಮೆರೆಗ್ ಇನಿ 76 ನೇ ವರ್ಷದ ಪುಟ್ಟುಪರ್ಬದ ಗೌಜಿ.

1947 ನೇ ಇಸವಿ ಆಗಸ್ಟ್ 3 ಕ್ಕ್ ಮೈಸೂರ್ ದ ವರುಣಾದಲ್ಪ ಇಪ್ಪುನ ಸಿದ್ದರಾಮನ ಹುಂಡಿಡ್ ಮೇರ್ ಪುಟ್ಟುದೆರ್. ಹಂತ ಹಂತವಾದ್ ರಾಜಕೀಯ ಕ್ಷೇತ್ತೊಡು ಬುಲೆಯಿನ ಮೇರ್ 2 ಸರ್ತಿ ಕರ್ನಾಟಕದ ಮುಖ್ಯಮಂತ್ರಿ ಆತೆರ್.

ಅತ್ತಂದೆ ಕ್ಷೀರಭಾಗ್ಯ, ಅನ್ನಭಾಗ್ಯ, ಗೃಹಜ್ಯೋತಿ, ಗೃಹಲಕ್ಷ್ಮೀ ದಂಚಿನ ಯೋಜನೆನ್ ಜಾರಿಗ್ ಕನ್ಪುನೆಟ್ಟ್ ಮಲ್ಲ ಪಾತ್ರ ಮೆರೆನ ಉಂಡು. 9 ಸರ್ತಿ ಕರ್ನಾಟಕ (ಉಪಚುನಾವಣೆ ಸೇರ್ದ್) ವಿಧಾನಸಭೆಗ್ ಜನಕ್ಲೆರ್ದ್ ಆಯ್ಕೆಯಾಯಿನ ರಾಜಕಾರಣಿ ಮೇರ್.

ವೀರರಾಣಿ ಅಬ್ಬಕ್ಕ ಜೈನ ಮಹಿಳಾ ಸಂಘದ ಮುತಾಲಿಕೆಡ್ ಡಾ. ಅಕ್ಷತಾ ಆದರ್ಶ್ ಮೆರೆಗ್ ಮಾನಾದಿಗೆ

ಕುಡ್ಲ: ವೀರರಾಣಿ ಅಬ್ಬಕ್ಕ ಜೈನ ಮಹಿಳಾ ಸಂಘದ ಮುತಾಲಿಕೆಡ್ ಡಾ. ಅಕ್ಷತಾ ಆದರ್ಶ್ ಮೆರೆಗ್ ಮಾನಾದಿಗೆ ಲೇಸ್ ಇಂಚೊಗು ನಡತ್ಂಡ್.

ಮಾನಾದಿಗೆ ಸ್ವೀಕಾರ ಮಲ್ತ್‌ದ್ ಪಾತೆರ್ನ ಡಾ. ಅಕ್ಷತಾ ಆದರ್ಶ್, ಇನಿ ವೀರರಾಣಿ ಅಬ್ಬಕ್ಕ ಜೈನ ಮಹಿಳಾ ಸಂಘದ ಮುತಾಲಿಕೆಡ್ ಎಂಕ್ ಭಾರೀ ಪ್ರೀತಿಡ್ ಸನ್ಮಾನ ಮಲ್ದರ್. ಆಂಡ ಎಂಕ್ ಸನ್ಮಾನ ಪಂಡ ಒಂಜಿ ರೀತಿದ ಪೋಡಿಗೆ, ದಾಯೆ ಪಂಡ ಸನ್ಮಾನ ಮಲ್ತ್ಂಡ ಸಮಾಜಡ್ ಜಬದಾರಿ ಎಚ್ಚಾಪುಂಡು ಪನ್ಪುನ ಭಾವನೆ. ಆಂಡಲ ನಿಕುಲು ಪೂರ ಸೇರ್ದ್ ಎಂಕ್ ಸನ್ಮಾನ ಮಲ್ದರ್. ನಿಕ್ಲೆನ ಈ ಪ್ರೀತಿಗ್ ಯಾನ್ ಸೊಲ್ಮೆ ಸಂದಾವೆ ಪಂದ್ ಪಂಡೆರ್. ಅಂಚೆನೆ ಎನ್ನ ಈ ಸಾಧನೆದ ಪಿರವುಡು ಸುಮಾರ್ ಜನತ್ತ ಸಹಕಾರ ಉಂಡು, ಪ್ರೋತ್ಸಾಹ ಉಂಡು. ಮೊಕ್ಲೆನ್ ಯಾನ್ ಈ ಪೊರ್ತುಡು ನೆಂಪು ಮಲ್ತಿಜಿಂಡ ತಪ್ಪಾಪುಂಡು. ದಾಯೇ ಪಂಡ ಎಂಕ್ ಇಡೆ ಮುಟ್ಟ ಮಾತ ಇಸಯಡ್ಲಾ ಸಪೋರ್ಟ್ ಮಲ್ತಿನ ಎನ್ನ ಇಲ್ಲಲ್‌ದಕುಲು, ಪೊಪ್ಪ ಅಮ್ಮ, ಕಂಡನಿ, ಮಾಮಿ ಮಾಮು, ಸಂಬಂಧಿಕೆರ್, ದೋಸ್ತಿಲು, ಸಮಾಜದಕುಲು ಅತ್ತಂದೆ, ಧರ್ಮಸ್ಥಳ ಮಂಜುನಾಥೇಶ್ವರ ಕಾಲೇಜ್‌ದ ಮ್ಯಾನೇಜ್ ಮೆಂಟ್‌ದಕುಲು, ಗುರುಕುಲು, ಲೈಬ್ರೆರಿಯನ್ ಸಂತೋಷ್, ಲೆಕ್ಚರರ್ ಬಾಲಿಕ, ಅಜ್ಜ ಅಜ್ಜಿ, ಅಲೈಯನ್ಸ್ ಯುನಿವರ್ಸಿಟಿ, ಬೊಕ್ಕ ಎನ್ನ ಸಂಶೋಧನೆಗ್ ಸಹಕಾರ ಕೊರ್ನ ದಿಲ್ಲಿ ಯುನಿವರ್ಸಿಟಿ ಲೈಬ್ರೆರಿದಕ್ಲೆನ್ ನೆಂಪು ಮಲ್ತೊಂದು, ನಿಕ್ಲೆನ ಮಾತೆರೆಗ್ಲಾ ಈ ಪೊರ್ತುಡು ಚಿರಋಣಿ ಆದಿಪ್ಪುವೆ. ಎಂಕ್ ನಿಕ್ಲೆನ ಪ್ರೀತಿ ಈ ಡಾಕ್ಟರೇಟ್ ಪದವಿರ್ದ್‌ಲ ಮಸ್ತ್ ಮಲ್ಲ. ಅಂಚಾದ್ ನಿಕ್ಲೆಗ್ ಮಾತೆರೆಗ್ಲಾ ಸೊಲ್ಮೆ ಸಂದಾವೆ ಪಂದ್ ಪಂಡೆರ್.

ರೇಡಿಯೊ ಮಣಿಪಾಲದಲ್ಲಿ ‘ಚಿಣ್ಣರ ದನಿ’ ಲೇಸ್

ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಮುತಾಲಿಕೆಡ್ ‘ಚಿಣ್ಣರ ದನಿ ಲೇಸ್ ಆ.2 ಕ್ಕ್ ಬುಧಾರ ಬಯ್ಯಗ್ 5.30 ಕ್ಕ್ ನಡಪರೆ ಉಂಡು.

ಆ.3 ಗುರುವಾರ ಮಧ್ಯಾಹ್ನ 1.30 ಕುಡೊರ ಪ್ರಸಾರ ಆಪುಂಡು. ಇನಿ ಪ್ರಸಾರ ಆಪುನ ಲೇಸ್ ದ 20ನೇ ಸಂಚಿಕೆಡ್ ಬಾಲ ಪ್ರತಿಭೆ ಶ್ಲೋಕ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ರೇಡಿಯೊ ಮಣಿಪಾಲದ ಪ್ರಕಟಣೆ ತೆರಿಪಾದ್ಂಡ್.