ಕರ್ನಾಟಕ ರಾಜ್ಯ ಪರಿವರ್ತನಾ ಸಂಸ್ಥೆದ (ಯೋಜನಾ ಮಂಡಳಿ) ಉಪಾಧ್ಯಕ್ಷೆರಾದ್ ರಾಜ್ಯಸಭೆತ್ತ ಮಾಜಿ ಸದಸ್ಯೆರ್ ಎಂ.ವಿ. ರಾಜೀವ್ ಗೌಡ ನೇಮಕ ಆತೆರ್.
ರಾಜೀವ್ ಮೆರೆಗ್ ಸಂಪುಟ ದರ್ಜೆದ ಸಚಿವೆರೆ ತಾನ ಕೊರ್ದು, ಸರ್ಕಾರ ಆದೇಶ ಕೊರ್ತುಂಡು. ಆರ್ಥಿಕ ಬೊಕ್ಕ ಶಿಕ್ಷಣ ತಜ್ಞೆರಾಯಿನ ಮೇರ್ ಬೆಂಗ್ಲೂರ್ ದ ಐಐಎಂ ಪ್ರಾಧ್ಯಾಪಕೆರಾದ್, ಸಾರ್ವಜನಿಕ ನೀತಿ ಕೇಂದ್ರದ ಮುಖ್ಯಸ್ಥೆರಾದ್, ಆರ್ ಬಿಐ ಕೇಂದ್ರ ಮಂಡಳಿ ನಿರ್ದೇಶಕೆರಾದ್ ಸೇವೆ ಸಂದಾದೆರ್. ಕಾಂಗ್ರೆಸ್ ದ ವೋಟುದ ಪ್ರಣಾಳಿಕೆದ ಸಂಚಾಲಕೆರಾದಿತ್ತೆರ್.
ಭಾರತೀಯ ವಿಜ್ಞಾನಿಲು ಅಕ್ಕಸೊಡು ಪೊಸತೊಂಜಿ ಬೊಲ್ಲಿ (ನಕ್ಷತ್ರ) ನ್ ನಾಡ್ ಪತ್ ದೆರ್.
ಬೆಂಗ್ಲೂರ್ ದ ಇಂಡಿಯನ್ ಇನ್ ಸ್ಟಿಟ್ಯೂಟ್ ಆಫ್ ಆಸ್ಟ್ರೋ ಫಿಸಿಕ್ಸ್ ವಿಭಾಗದ ವಿಜ್ಞಾನಿಲು ಸಂಶೋಧನೆಡ್ ಈ ಪೊಸ ನಕ್ಷತ್ರನ್ ನಾಡ್ ಪತ್ ದೆರ್.
ಈ ನಕ್ಷತ್ರಗ್ HE 1005-1439 ಪಂದ್ ಪುದರ್ ದೀತೆರ್. ನೆನ್ ಕಾರ್ಬನ್ ಡ್ ಆತಿನ ಲೋಹದ ನಕ್ಷತ್ರ ಪಂದ್ ವರ್ಗೀಕರಿಸಾದೆರ್ ಪಂದ್ ವರದಿ ಆತ್ಂಡ್.
ಹಾಸನಾಂಬೆ ಜಾತ್ರೆ ಉಚ್ಚಯ ಈ ಸರ್ತಿ ನವೆಂಬರ್ 2-15 ಮುಟ್ಟ ನಡಪರೆ ಉಂಡು.
ಈ ಬಗೆಟ್ಟ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ಕೆ.ಎನ್. ರಾಜಣ್ಣ ಮೆರೆನ ಮುತಾಲಿಕೆಡ್ ನಡತಿನ ಅಟ್ಟಣೆದ ಸಭೆಟ್ಟ್ ತೀರ್ಮಾನ ಆಂಡ್. ಅತ್ತಂದೆ ಇತ್ತೆನೇ ಉಚ್ಚಯಗ್ ತಯಾರ್ ಮಲ್ಪರೆ ತೆರಿಪಾಯೆರ್.
ಆತೆ ಅತ್ತಂದೆ ಆ ಪೊರ್ತುಡು ದಿನತ್ತ 24 ಗಂಟೆಲ ದೇವಿನ ದರ್ಶನಗ್ ಅವಕಾಶ ಕೊರಿಯೆರೆ ತೀರ್ಮಾನ ಆಂಡ್. ಅಂಚೆನೆ ಸುರುತ್ತ ಬೊಕ್ಕ ಅಕೇರಿದ ದಿನತಾನಿ ಸಾರ್ವಜನಿಕೆರೆಗ್ ನಿರ್ಬಂಧ ಪಾಡಿಯೆರೆ ತೀರ್ಮಾನ ಮಲ್ತೆರ್.
ತಜಕಿಸ್ತಾನಡ್ ಕೋಡೆ ರಾತ್ರೆ 4.2 ಬಿರ್ಸ್ ದ ಭೂಕಂಪ ಆತ್ಂಡ್ ಪಂದ್ ಭೂಕಂಪನದ ರಾಷ್ಟ್ರೀಯ ಕೇಂದ್ರ ತೆರಿಪಾದ್ಂಡ್.
ಈ ಭೂಕಂಪರ್ದ್ ಇಡೆ ಮುಟ್ಟ ಒವ್ವೇ ಪ್ರಾಣಗ್ ತೊಂದರೆ ಅತ್ತ್ಂಡ ಆಸ್ತಿಗ್ ತೊಂದರೆ ಆಯಿನ ಬಗೆಟ್ಟ್ ವರದಿ ಆತಿಜಿ. ನೆತ್ತ ಗುಂಡಿ ಭೂಮಿರ್ದ್ 95 ಕಿ.ಮೀ ತಿರ್ತ್ ಉಂಡು.
ಬೆಂಗ್ಲೂರ್: ದೇಶ ಇಡೀ ಇನಿ ನಡಪುನ 77ನೇ ಸ್ವಾತಂತ್ರ್ಯ ದಿನಾಚರಣೆದ ಅಂಗವಾದ್ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೇರ್ ಬೆಂಗ್ಲೂರ್ ದ ಮಾಣಿಕ್ ಶಾ ಮೈದಾನಡ್ ರಾಷ್ಟ್ರ ದ ಕೊಡಿನ್ ರಾಪಾಯೆರ್.
ಬೊಕ್ಕ ಮೇರ್ ಪಾತೆರ್ದ್, ನಾಡ್ ದ ಪ್ರತಿಯೊರಿ ಪ್ರಜೆಕದಕ್ ಲ ಘನತೆಡ್ ಬದುಕುನ ಸ್ವಾತಂತ್ರ್ಯನ್ ಸಾಕಾರ ಮಲ್ಪೆರೆ ನಮ್ಮ ಸರ್ಕಾರ ಗ್ಯಾರೆಂಟಿ ಯೋಜನೆನ್ ರೂಪಿಸಾದ್ಂಡ್. ಸ್ವಾತಂತ್ರ್ಯ ಪಂಡ ಘನತೆದ ಬದ್ ಕ್ ದ ಗ್ಯಾರಂಟಿ, ನಾಡ್ ದ ಜನಕ್ಲೆಗ್ ಕುಡೊರ 77ನೇ ಸ್ವಾತಂತ್ರ್ಯೋತ್ಸವದ ಎಡ್ಡೆಪ್ಪುಲು ಪಂದ್ ಪಂಡೆರ್.
ನನಲ ಸಾರರ್ದ್ ಎಚ್ಚ ಜನತ್ತ ತ್ಯಾಗ, ಬಲಿದಾನದ ಫಲವಾದ್ ಇನಿ ನಮ ಸ್ವಾತಂತ್ರ್ಯಡ್ ಉಲ್ಲ. ಜೂವದ ಪೋಡಿಗೆ ಇಜ್ಜಂದೆ ದಾಸ್ಯದ ಸಂಕೋಲೆರ್ದ್ ದೇಶನ್ ಬುಡುಗಡೆ ಮಲ್ಪರೆ ಪೊರ್ಂಬಾಟ ಮಲ್ತಿನ ಮಾತ ಮಹಾನ್ ಚೇತನರೆಗ್ ಗೌರವ ಸಂದಾವೆ ಪಂದ್ ಪಂಡೆರ್.
ಸ್ವತಂತ್ರ ಭಾರತಡ್ ಬದ್ಕೊಂದು ಇಪ್ಪುನ ನಮಕ್ ಸ್ವಾತಂತ್ರ್ಯ ಪನ್ಪುನವು ಎತ್ ದುಬಾರಿ ಆಯಿನ ಸಂಗತಿ ಪನ್ಪುನವು ತೆರಿವೊಡು. ಇಜ್ಜಿಂಡ ನಮ್ಮ ಹಿರಿಯೆರೆನ ತ್ಯಾಗ ಬಲಿದಾನಗ್ ಅರ್ಥನೇ ಇಪ್ಪುಜಿ. ಸ್ವಾತಂತ್ರ್ಯ ಪನ್ಪುನವು ಮನುಷ್ಯೆರೆನ ಜೀವರ್ದ್ ಎಚ್ಚ ಪಂದ್ ಸ್ವಾತಂತ್ರ್ಯ ಹೋರಾಟಗಾರೆರ್ ಎನ್ನಿದ್ ಇತ್ತೆರ್. ಅಂಚಾದೇ ಮಾತ ಮಹನೀಯೆರ್ ತನ್ನ ಸರ್ವಸ್ವನೇ ತ್ಯಾಗ ಮಲ್ತ್ ದ್ ಸ್ವಾತಂತ್ರ್ಯ ಚಳವಳಿಡ್ ಪಾಲ್ ಪಡೆದಿತ್ತೆರ್. ಮೊಕ್ಲೆನ ತ್ಯಾಗ ಬಲಿದಾನನ್ ದೇಶವು ಶ್ರದ್ಧಾಪೂರ್ವಕವಾದ್ ನೆಂಪು ಮಲ್ಪೊಡು ಪಂದ್ ಪಂಡೆರ್.
ಕುಡ್ಲ: ರಾಷ್ಟ್ರೀಯ ವಿಪತ್ತು ಉಪ ಶಮನ ನಿಧಿರ್ದ್ ಗುಡ್ಡೆ ಜರಿನೆಕ್ಕ್ ಬೊಕ್ಕ ಬರ್ಸರ್ದ್ ತೊಂದರೆ ಆಯಿನಕ್ಲೆಗ್ ದಕ್ಷಿಣ ಕನ್ನಡ ಜಿಲ್ಲೆ ಸೇರ್ದ್ 5 ಜಿಲ್ಲೆಗ್, 721 ಕೋಟಿ ರೂ. ಪರಿಹಾರ ಕೊರ್ಪ ಪಂದ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ಪಂಡೆರ್.
ಮೇರ್ ಕುಡ್ಲದ ನೆಹರೂ ಮೈದಾನಡ್ ಜಿಲ್ಲಾಡಳಿತದ ಮುತಾಲಿಕೆಡ್ ನಡತಿನ 77ನೇ ಸ್ವಾತಂತ್ರ್ಯ ದಿನಾಚರಣೆಡ್ ರಾಷ್ಟ್ರ ಕೊಡಿನ್ ರಾಪಾದ್, ಮಾನಾದಿಗೆ ಸ್ವೀಕಾರ ಮಲ್ತ್ ದ್ ಪಾತೆರಿಯೆರ್.
ಸುರತ್ಕಲ್ ಕೈತಲ್ದ ಸಸಿಹಿತ್ಲು ಬೀಚ್ ನ್ ಅಂತಾರಾಷ್ಟ್ರೀಯ ಸರ್ಫಿಂಗ್ ತಾಣ ಮಲ್ಪೆರೆ ಪಿಪಿಪಿ ಮಾದರಿಡ್ ಯೋಜನೆ ರೂಪಿಸಾಯೆರೆ ಕ್ರಮ ದೆತೊನಿಯೆರೆ ಉಂಡು. ದಕ್ಷಿಣ ಕನ್ನಡ, ಒಡಿಪು, ಉತ್ತರ ಕನ್ನಡ ಜಿಲ್ಲೆಡ್ ಬೀಚ್ ಟೂರಿಸಂ ಅಭಿವೃದ್ಧಿಗ್ ಕಾರ್ಯಪಡೆ ರಚನೆ ಆವರೆ ಉಂಡು. ದಕ್ಷಿಣ ಕನ್ನಡ ಜಿಲ್ಲೆದ ಜಿಲ್ಲಾಧಿಕಾರಿ ಕಚೇರಿ ಸಂಕೀರ್ಣದ ಬೇಲೆ ಈ ವರ್ಷ ಮುಗಿದ್, ಮಾತ ಸೇವೆನ್ ಒಂಜೇ ಕುಬಲ್ದಡಿಟ್ಟ್ ಕೊರ್ತುಂಡು ಪಂದ್ ಪಂಡೆರ್.
ನಮ್ಮ ಜಿಲ್ಲೆದ ಪ್ರಮುಖ ಬೇಲೆ ಮೀನುಗಾರಿಕೆ ಆತ್ಂಡ್. ಒಟ್ಟು 42 ಕಿ.ಮೀ. ಕಡಲ್ ದ ಬರಿಟ್ಟ್ ಇಪ್ಪುನ ಜಿಲ್ಲೆಡ್ 66 ಸಾರರ್ದ್ ಎಚ್ಚದ ಮೀನುಗಾರೆರ್ ಉಲ್ಲೆರ್. ಅಕ್ಲೆನ ಅನುಕೂಲಗಾದ್ ವೋಟುದ ಪ್ರಣಾಳಿಕೆಡ್ ಕೊರಿನ ಗ್ಯಾರಂಟಿಲೆಡ್ ಈ ಸರ್ತಿದ ಆಯವ್ಯಯಡ್ ಸುಮಾರ್ ಕ್ರಮನ್ ದೆತೊನಿಯೆರೆ ಉಂಡು. ಮೀನುಗಾರ ಪೊಂಜೋವ್ ಲೆನ ಆರ್ಥಿಕ ಸ್ವಾವಲಂಬನೆ ಬೊಕ್ಕ ವೈವಾಟ್ ವಿಸ್ತರಣೆಗ್ ಸಕಾಯ ಆಯೆರೆ ಬ್ಯಾಂಕ್‍ಡ್ 3 ಲಕ್ಷ ರೂ. ಮುಟ್ಟ ಬಡ್ಡಿದೊಟ್ಟಿಗೆ ಸಾಲ ಕೊರ್ಪೆರ್. ಮೀನುಗಾರೆರೆನ ಓಡಲೆಗ್ ರಿಯಾಯಿತಿ ದರಟ್ಟ್ ಕೊರೊಂದು ಇಪ್ಪುನ ಚಿಮಿನಿದೆಣ್ಣೆನ್ 1.50 ಲಕ್ಷ ಕಿಲೋ ಲೀಟರ್ ರ್ದ್ 2 ಲಕ್ಷ ಕಿಲೋ ಲೀಟರ್ ಮುಟ್ಟ ಎಚ್ಚ ಮಲ್ಪುನ ರಾಜ್ಯ ಸರ್ಕಾರದ ಪ್ರಸ್ತಾವನೆ ಮೀನುಗಾರೆರೆಗ್ ಮಸ್ತ್ ಅನುಕೂಲ ಆತ್ಂಡ್. ನೆಕ್ಕಾದ್ 250 ಕೋಟಿ ರೂ.ನ್ ಮೀಸಲ್ ದೀತ್ಂಡ್. ಇತ್ತೆದ ಚಿಮಿನಿದೆಣ್ಣೆದ ಎಂಜಿನ್‍ ದ ಬೋಟ್‍ನ್ ಪೆಟ್ರೋಲ್ ಅತ್ತಂಡ ಡೀಸೆಲ್ ಎಂಜಿನಾದ್ ಬದಲ್ ಮಲ್ತ್ಂಡ ತಲಾ 50 ಸಾರ ರೂ. ಮುಟ್ಟ ಪನವುದ ಕೊರಿಯೆರೆ ಉಂಡು. ಈ ವರ್ಷಡ್ ಇಂಚಿನ ನಾಲ್ ಸಾರ ಮೀನುಗಾರಿಕಾ ಓಡಲೆಡ್ ಎಂಜಿನ್‍ನ್ ಬದಲ್ ಮಲ್ಪರೆ 20 ಕೋಟಿನ್ ಒದಗಿಸಾಯೆರೆ ಕ್ರಮ ದೆತೊನಿಯೆರೆ ಉಂಡು ಪಂದ್ ಪಂಡೆರ್.
ಮೀನುಗಾರಿಕೆ ಇಲಾಖೆ ಮೀನು ಉತ್ಪಾದನೆನ್ ಎಚ್ಚ ಮಲ್ಪುಂಡು. ಮೀನುಗಾರೆರೆನ್ ಆರ್ಥಿಕ-ಸಾಮಾಜಿಕವಾದ್ ಅಭಿವೃದ್ದಿ ಮಲ್ಪರೆ ಉಂಡು ಬೊಕ್ಕ ತಾಂತ್ರಿಕ, ವೈಜ್ಞಾನಿಕ ಪೊಲಬು ಕೊರ್ಪುನ ಮುಖ್ಯ ಧ್ಯೇಯೋದ್ದೇಶರ್ದ್ 1967 ಟ್ಟ್ ಮೀನುಗಾರಿಕೆ ಇಲಾಖೆ ಅಸ್ತಿತ್ವಗ್ ಬೈದ್ಂಡ್. ಜಿಲ್ಲೆಡ್ 23 ಮೀನುಗಾರೆರೆನ ಸಹಕಾರಿ ಸಂಘಲು ಬೊಕ್ಕ ಮೀನುಗಾರಿಕಾ ಫೆಡರೇಶನ್ ಉಂಡು. ಆಯಿಟ್ಟ್ ಒಟ್ಟು 35,970 ಸದಸ್ಯೆರ್ ಉಲ್ಲೆರ್. ನೆಟ್ಟ್ 4 ಮೀನುಗಾರೆರೆನ ಪೊಂಜೋವ್ ಲೆನ ಸಹಕಾರಿ ಸಂಘಲು ಉಂಡು. ಇತ್ತೆ ಜಿಲ್ಲೆಡ್ ಸುಮಾರ್ 102 ಪರ್ಸೀನ್ ಬೋಟ್ 1,354 ಟ್ರಾಲ್‍ ಬೋಟ್, 1,674 ಯಾಂತ್ರೀಕೃತ ನಾಡದೋಣಿ ಬೊಕ್ಕ 318 ನಾಡದೋಣಿಲು ಉಂಡು. 2022-23ನೇ ಸಾಲ್ ಡ್ 4,154 ಕೋಟಿ ರೂ. ಬಿಲೆತ್ತ 3.33 ಲಕ್ಷ ಮೆಟ್ರಿಕ್ ಟನ್ ಮೀನು ಉತ್ಪಾದನೆ ಆತ್ಂಡ್ ಪಂದ್ ಸಚಿವೆರ್ ತೆರಿಪಾದೆರ್.
ಈ ಪೊರ್ತುಡು ವಿಧಾನ ಪರಿಷತ್ ಶಾಸಕೆರ್ ಹರೀಶ್ ಕುಮಾರ್, ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್ ಎಂ.ಪಿ., ನಗರ ಪೊಲೀಸ್ ಆಯುಕ್ತೆರ್ ಕುಲದೀಪ್ ಕುಮಾರ್ ಜೈನ್, ಎಸ್ಪಿ ರಿಷ್ಯಂತ್ ಸೇರಿನಂಚೆನೆ ಅಧಿಕಾರಿಲು, ಜನಪ್ರತಿನಿಧಿಲು ಇತ್ತೆರ್.
ಕಾರ್ಲ: ಮುಲ್ತ ಸರ್ಕಾರಿ ಆಸ್ಪತ್ರೆಡ್ ಸ್ವತಂತ್ರ ದಿನಾಚರಣೆ ನಡತ್ಂಡ್.
ಈ ಲೇಸ್ ಡ್ ಕಾರ್ಲ ಸಾರ್ವಜನಿಕೆರೆನ ಆಸ್ಪತ್ರೆದ ತಾಲೂಕ್ ವೈದ್ಯಾಧಿಕಾರಿ ಡಾಕ್ಟರ್ ಶಶಿಕಲಾ, ಹಾಸ್ಪಿಟಲ್ ಸಿಬ್ಬಂದಿಲು, ಆರೋಗ್ಯ ಕವಚ 108 ಸಿಬ್ಬಂದಿಲು, EMT ರಾಜಶೇಖರ್ ಬೊಕ್ಕ pilot ಕೊಟ್ರಪ್ಪ ಜಿ ಪಾಲ್ ಪಡೆದಿತ್ತೆರ್.
ಒಡಿಪು: ಜಿಲ್ಲಾ ಸಶಸ್ತ್ರ ಮೀಸಲು ಪೊಲೀಸ್ ಪಡೆಟ್ಟ್ ಕರ್ತವ್ಯ ಮಲ್ತೊಂದು ಇತ್ತಿನ ಶಂಕರ್ ಮೆರೆನ್ ಅತ್ಯುತ್ತಮ ಸೇವೆಗಾದ್ ರಾಷ್ಟ್ರಪತಿಲೆನ ಪದಕ ಪುರಸ್ಕಾರಗ್ ಆಯ್ಕೆ ಮಲ್ದೆರ್.
ಬೈಂದೂರು ತಾಲೂಕ್ ಬಿಜೂರು ಗ್ರಾಮದ ಕಾಡಿನತಾರುದ ನಿವಾಸಿ ಆಯಿನ ಮೇರ್ ಎಂ.ಎ. ಕಲ್ತ್ ದ್ 1999ಟ್ಟ್ ಇಲಾಖೆಗ್ ಸೇರ್ಪಡೆ ಆಯೆರ್. ಒಡಿಪು ಜಿಲ್ಲೆಡ್ ಬುನಾದಿ ತರಬೇತಿ ಪಡೆದ್ ಜಿಲ್ಲಾ ಸಶಸ್ತ್ರ ಮೀಸಲು ಪೊಲೀಸ್ ಘಟಕಡ್ ಸಶಸ್ತ್ರ ಪೊಲೀಸ್ ಕಾನ್ ಸ್ಟೆಬಲ್ ಬೇಲೆನ್ ಸುರು ಮಲ್ತೆರ್. ಬೊಕ್ಕ ಬೆಂಗ್ಲೂರ್ ದ ಪಿಡಿಎಂಎಸ್‌ಡ್ ವಾಹನ ಚಾಲನ ತರಬೇತಿ ಪಡೆದ್ ಇತ್ತೆ ಗಾಡಿದ ಡ್ರೈವರಾದ್ ಬೇಲೆ ಮಲ್ತೊಂದು ಉಲ್ಲೆರ್.
ಎಲ್ಯೆರ್ದೆ ಕ್ರೀಡಾಪಟು ಆಯಿನ ಸಮಯ ಇಜ್ಜಿಂಡಲ ಬೇಲೆದ ನಡುಟ್ ಕ್ರೀಡಾಭ್ಯಾಸ ಮಲ್ತ್ ದ್ ಹಿರಿಯೆರೆನ ಕ್ರೀಡಾಕೂಟಡ್ ರಾಷ್ಟ್ರೀಯ ಬೊಕ್ಕ ಅಂತಾರಾಷ್ಟ್ರೀಯ ಮಟ್ಟಡ್ ಸುಮಾರ್ ಬಂಗಾರ್, ಬೊಳ್ಳಿ ಬೊಕ್ಕ ಕಂಚ್ ದ ಪದಕನ್ ಗೆಂದ್ ದೆರ್.
ಬಂಟ್ವಾಳ: ಪ್ರತಿಭಾನ್ವಿತ ಚಿತ್ರ ಕಲಾವಿದೆಯೊರಿ ಗುವೆಲ್ ಲಾಗಿದ್ ಜೂವ ಕಳೆವೊನ್ನ ಘಟನೆ ಬಂಟ್ವಾಳ ತಾಲೂಕ್ ದ ಸಜೀಪ ಮೂಡ ಗ್ರಾಮದ ಮಿತ್ತಮಜಲ್ ಡ್ ನಡತ್ಂಡ್.
ಮಿತ್ತಮಜಲ್ ನಿವಾಸಿ ಚಿತ್ರಕಾರ ಸಾಗರ್ ಆಚಾರ್ಯ ಆತ್ಮಹತ್ಯೆ ಮಲ್ತೊನ್ನ ಜವನೆ. ಮೇರ್ ಬೊಲ್ಪುಗು ಇಲ್ಲದ ಜಾಲ್ ಡ್ ಇಪ್ಪುನ ಗುವೆಲ್ ಗ್ ಲಾಗಿದೆರ್ ಪಂದ್ ತೆರಿದ್ ಬೈದ್ಂಡ್.
ಮೆರೆನ ಸಾವುಗ್ ಸರಿಯಾಯಿನ ಕಾರಣ ದಾದ ಪಂದ್ ತೆರಿದ್ ಬೈದಿಜಿ. ಆಂಡ ಹುಷಾರ್ ಇಜ್ಜಂದೆ ಇತ್ತಿನವು ಬೊಕ್ಕ ಬಡಪತ್ತ್ ಜೂವ ಕಲೆವೊನೊಯೆರೆ ಕಾರಣ ಆದಿಪ್ಪು ಪಂದ್ ಅಂದಾಜಿ ಮಲ್ದೆರ್.
ಮೇರ್ ಕರಿನ ರಡ್ಡ್ ವರ್ಷದ ಪಿರವು ಬಿಸಿರೋಡ್ ದ ಸಿ.ಡಿ.ಪಿ.ಒ.ಕಚೇರಿಡ್ ಹೊರಗುತ್ತಿಗೆಡ್ ಬೇಲೆ ಮಲ್ತೊಂದು ಇತ್ತೆರ್. ಅವೆರ್ದ್ ಬೊಕ್ಕ ದುಂಬೇ ಇತ್ತಿನ ಕಿಡ್ನಿ ಸಮಸ್ಯೆ ಜಾಸ್ತಿ ಆಂಡ್ ಪಂದ್ ಇಲ್ಲಲೆ ಇತ್ತೆರ್.
ಅಗ್ನಿಶಾಮಕ ಠಾಣೆದ ಠಾಣಾಧಿಕಾರಿ ಸುನಿಲ್ ಕುಮಾರ್, ಸಿಬ್ಬಂದಿಲಾಯಿನ ರೋಹಿತ್, ಕಿರಣ್ ಕುಮಾರ್, ರಾಜೇಶ್, ಸುರೇಂದ್ರ ಬೊಕ್ಕ ನಾಗರಾಜ್ ಮೊಕುಲು ಬತ್ತಿತ್ತೆರ್ .
ಡೆಲ್ಲಿ: 77ನೇ ವರ್ಷದ ಸ್ವಾತಂತ್ರ್ಯೋತ್ಸವದ ಅಂಗವಾದ್ ಪ್ರಧಾನಿ ನರೇಂದ್ರ ಮೋದಿ ಮೇರ್ ಇನಿ ಡೆಲ್ಲಿದ ಕೆಂಪುಕೋಟೆಡ್ ರಾಷ್ಟ್ರ ಕೊಡಿನ್ ರಾಪಾಯೆರ್.
ಪ್ರಧಾನ ಮಂತ್ರಿಯಾದ್ ನರೇಂದ್ರ ಮೋದಿ 10 ನೇ ಸರ್ತಿ ಕೆಂಪುಕೋಟೆಡ್ ಕೊಡಿನ್ ರಾಪಾದೆರ್.
ಕೆಂಪು ಕೋಟೆಗ್ ಬತ್ತಿನ ಪ್ರಧಾನಿ ಮೋದಿನ್ ರಕ್ಷಣಾ ಸಚಿವೆರ್ ರಾಜನಾಥ್ ಸಿಂಗ್, ರಕ್ಷಣಾ ರಾಜ್ಯ ಮಂತ್ರಿ ಅಜಯ್ ಭಟ್ ಬೊಕ್ಕ ರಕ್ಷಣಾ ಕಾರ್ಯದರ್ಶಿ ಗಿರಿಧರ್ ಅರಮನೆ ಮೊಕುಲು ಎದ್ಕೊನಿಯೆರ್.
ಪ್ರಧಾನಿ ಮೋದಿ ಟ್ವೀಟ್:
“ಸ್ವಾತಂತ್ರ್ಯ ದಿನತ್ತ ಎಡ್ಡೆಪ್ಪುಲು. ನಮ್ಮ ಮಹಾನ್ ಸ್ವಾತಂತ್ರ್ಯ ಹೋರಾಟಗಾರೆರೆಗ್ ನಮ ಗೌರವ ಸಂದಾವ. ಬೊಕ್ಕ ಅಕ್ಲೆನ ಆಸೆನ್ ಮಲ್ಪಾದ್ ಕೊರ್ಪಿನ ನಮ್ಮ ಬದ್ಧತೆನ್ ನೆಂಪು ಮಲ್ತೊನುವ. ಜೈ ಹಿಂದ್!” ಪಂದ್ ಪ್ರಧಾನಿ ಮೋದಿ ಟ್ವೀಟ್ ಮಲ್ದೆರ್.
