Tulu News

ನನದ ಪೀಳ್ಯದಕ್ಲೆಡ ಸಂಸ್ಕೃತಿ ಒರಿಯೆರೆ ಉತ್ಸವಲು ಅಡಿಪಾಯ ಆಪುಂಡು: ಡಾ.ನಿಂಗಯ್ಯ

ಸುಬ್ರಹ್ಮಣ್ಯ: ಪ್ರಾಚೀನ ಆಚರಣೆಲೆಡ್ ಸಹೋದರತೆ ಉಂಡು. ಪ್ರತಿ ಆಚರಣೆನೆನ್ ಸಾಮೂಹಿಕವಾದ್ ಆಚರಣೆ ಮಲ್ಪುನ ಮುಖೇನ ಸಂಬಂಧಲು ಪುಟ್ಟುಂಡು.ನನದ ಪೀಳ್ಯದಕ್ಲೆಡ ಸಂಸ್ಕೃತಿದ ಇಚಾರ ಒರಿಯೆರೆ ಉತ್ಸವಲು ಅಡಿಪಾಯ ಆಪುಂಡು. ಪ್ರಾಚೀನ ವಿಚಾರಲೆನ ಜ್ಞಾನ ಪುನರುತ್ಥಾನ ಆಯೆರೆ ಉತ್ಸವಲೆನ ಪಾತ್ರ ಮುಖ್ಯ. ಜೋಕುಲೆಗ್ ಉತ್ಸವಲೆನ ಬಗೆಟ್ಟ್ ಎಚ್ಚದ ಪೊಲಬು ಬೊಕ್ಕ ಆಯಿತ್ತ ಆಚರಣೆದ ಅಗತ್ಯತೆದ ಬಗೆಟ್ಟ್ ತೆರಿಪಾವೊನ ವಿಚಾರಲು ನಡಪೊಡು. ನೆರ್ದ್ ಜೋಕುಲೆನ ಮನಸ್ ಡ್ ಪ್ರಾಚೀನ ಆಚರಣೆಲು ಒರಿಯೆರೆ ಸಾಧ್ಯ ಪಂದ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ ಪಂಡೆರ್.

ಸಾರ್ವಜನಿಕ ಶ್ರೀಕೃಷ್ಣ ಜನ್ಮಾಷ್ಟಮಿ ಉತ್ಸವ ಸಮಿತಿ ಸುಬ್ರಹ್ಮಣ್ಯ ನೆತ್ತ ಮುತಾಲಿಕೆಡ್ ಕುಕ್ಕೆ ದೇವಲ್ಯದ ಸವಾರಿ ಮಂಟಪಡ್ ಬುಧಾರ ನಡತಿನ 19ನೇ ವರ್ಷೊದ ಮೊಸರು ಕುಡಿಕೆ ಪಂತೊ ಬೊಕ್ಕ ಸುರುತ್ತ ವರ್ಷೊದ ಅಟ್ಟಿ ಮಡಿಕೆ ಉತ್ಸವನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ಸಾರ್ವಜನಿಕ ಶ್ರೀಕೃಷ್ಣ ಜನ್ಮಾಷ್ಟಮಿ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಪ್ರಶಾಂತ್ ಆಚಾರ್ಯ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದಿತ್ತೆರ್. ಉತ್ಸವ ಸಮಿತಿದ ಸ್ಥಾಪಕಾಧ್ಯಕ್ಷೆರ್ ಉಮೇಶ್ ಕೆ.ಎನ್, ಕಾರ್ಯದರ್ಶಿ ವಿನ್ಯಾಸ್ ಹೊಸೋಳಿಕೆ ಚಾವಡಿಡ್ ಇತ್ತೆರ್.

ಈ ಪೊರ್ತುಡು ದಶಮಾನೋತ್ಸವ ಸಮಿತಿದ ಅಧ್ಯಕ್ಷೆರ್ ರಾಜೇಶ್ ಎನ್.ಎಸ್, ಪೂರ್ವಾಧ್ಯಕ್ಷೆರ್ ಲೋಕೇಶ್ ಬಿ.ಎನ್, ರವಿ ಕಕ್ಕೆಪದವು, ಶ್ರೀಕೃಷ್ಣ ಶರ್ಮ, ಡಾ.ಸಿದ್ದಲಿಂಗ ಎಸ್.ಎಸ್ ವೆಂಕಟೇಶ್ ಎಚ್.ಎಲ್, ಶಿವರಾಮ.ಕೆ, ನಿತಿನ್ ಭಟ್, ಆದರ್ಶ ಕೆ.ಆರ್, ವೇಣುಗೋಪಾಲ ಎನ್.ಎಸ್, ನಿಕಟಪೂರ್ವಾಧ್ಯಕ್ಷೆರ್ ಪ್ರಕಾಶ್ ಸುಬ್ರಹ್ಮಣ್ಯ ಪಾಲ್ ಪಡೆದಿತ್ತೆರ್.

ಕಾರ್ಯದರ್ಶಿ ವಿನ್ಯಾಸ್ ಹೊಸೋಳಿಕೆ ಎದ್ಕೊನಿಯೆರ್. ಪೂರ್ವಾಧ್ಯಕ್ಷೆರ್ ದೀಪಕ್ ನಂಬಿಯಾರ್ ಸೊಲ್ಮೆ ಸಂದಾಯೆರ್. ಸಮಿತಿದ ಸಂಚಾಲಕೆರ್ ರತ್ನಾಕರ.ಎಸ್ ಲೇಸ್ ದ ಸುಧಾರಿಕೆ ಮಲ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ಗ್ ಕೃಷ್ಣೋತ್ಸವ ಪ್ರಶಸ್ತಿ-2023

ಬೆದ್ರದ ಮೊಸರು ಕುಡಿಕೆ ಉಚ್ಚಯದ ಲೆಕ್ಕೊಡು ಜವನೆರ್ ಬೆದ್ರ ಅರ್ಪಣೆ ಮಲ್ಪುನ ಕೃಷ್ಣೋತ್ಸವ ಯಕ್ಷ ಸಂಭ್ರಮ 2023 ಲೇಸ್ ಡ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ಕೂಟದ ಸಮಾಜ ಸೇವೆನ್ ಗುರುತಿಸಾದ್ ಈ ಸಂಸ್ಥೆಗ್ ಕೃಷ್ಣೋತ್ಸವ ಪ್ರಶಸ್ತಿನ್ ಕೊರಿಯೆರೆ ಉಂಡು.

ಈ ಲೇಸ್ (ಸೆ.7) ಇನಿ ಬಯ್ಯಗ್ ಬೆದ್ರ ಅಮರನಾಥ ಶೆಟ್ಟಿ ವೃತ್ತದ ಕೈತಲ್ ದ ಭಾಗವತ ಬಲಿಪ ನಾರಾಯಣ ವೇದಿಕೆಡ್ ನಡಪರೆ ಉಂಡು.

ಸೆ.10: ಬೊಂಬೈ ತೀಯಾ ಸಮಾಜ ನಿರೆಲ್ಡ್ ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿ ಆಚರಣೆ

ಬೊಂಬೈ: ತೀಯಾ ಸಮಾಜ ಬೊಂಬೈದ ಮುತಾಲಿಕೆಡ್ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ 169 ನೇ ಜಯಂತಿ ಆಚರಣೆ ಸೆ.10 ಐತಾರ ಡೊಮ್ನಿಕ್ ಹೈಸ್ಕೂಲ್ ದಲ್ಪದ ಪಂತ್ ನಗರ ನಾರ್ತ್ ಘಾಟ್ಕೋಪರ್ ಪೂರ್ವಡ್ ನಡಪರೆ ಉಂಡು.

ಈ ಲೇಸ್ ದ ಉದಿಪನನ್ ತುಡರ್ ಅರ್ಲಾದ್ ಸುರು ಮಲ್ಪುವೆರ್. ಭಜನೆ, ಮಂಗಳಾರತಿ, ಪ್ರಸಾದ ಪಟ್ಟುನ ಲೇಸ್, ಬೊಕ್ಕ ಲಘ ಉಪಹಾರದೊಟ್ಟಿಗೆ ಮುಗಿತಲ ಆಪುಂಡು.

ಈ ಲೇಸ್ ಡ್ ಸಮಾಜದ ಭಾಂದವೆರ್ ಪಾಲ್ ಪಡೆದ್, ತೀರ್ಥ ಪ್ರಸಾದ ದೆತೊಂದು, ಗುರುಕುಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಅಧ್ಯಕ್ಷೆರ್, ಪದಾಧಿಕಾರಿಲು, ಸದಸ್ಯೆರ್, ಉಪಸಮಿತಿದ ಸರ್ವಸದಸ್ಯೆರ್ ಪ್ರಕಟಣೆಡ್ ತೆರಿಪಾದೆರ್.

ರೇಡಿಯೋ ಮಣಿಪಾಲ್ ಡ್ ಆರೋಗ್ಯ ದರ್ಶನ ಸರಣಿ ಲೇಸ್

ಮಣಿಪಾಲ: ರೇಡಿಯೋ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲ ಬೊಕ್ಕ ಮಣಿಪಾಲ್ ಇನಸ್ಟಿಟ್ಯೂಟ್ ಆಫ್ ಕಮ್ಯೂನಿಕೇಶನ್ ದ ಒಟ್ಟುಸೇರಿಗೆಡ್ ಆರೋಗ್ಯ ದರ್ಶನ ಸರಣಿ ಲೇಸ್ ಸೆ.6 ಬುಧಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಂಡ್.

ಈ ಲೇಸ್ ಡ್ ನಾರಿನಾಂಶ ಇಪ್ಪುನ ತೆನಸ್ ಲೆನ ಪ್ರಾಮುಖ್ಯತೆದ ಬಗೆಟ್ಟ್ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲದ ಪೌಷ್ಠಿಕ ಬೊಕ್ಕ ಪಥ್ಯಹಾರ ವಿಭಾಗಡ್ ಪಥ್ಯಹಾರ ತಜ್ಞೆರ್ ಶಾಂತಿ ಮೇರ್ ಪೊಲಬು ಕೊರಿಯೆರ್. ಗುರುವಾರ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಸೆ.9: ಪೊವಾಯಿ ಶ್ರೀ ಮಹಾಶೇಷ ರುಂಡಮಾಲಿನಿ ದೇವಲ್ಯದ ಚಾವಡಿಡ್ ಶ್ರೀ ರಾಮ ಪಟ್ಟಾಭಿಷೇಕ ಆಟ

ಕನ್ನಡ ಸೇವಾ ಸಂಘ ಪೊವಾಯಿ (ರಿ.) ದ ದುಂಬಾತ್ತಿಗೆಡ್ ಸೆ.9 ಸನಿಯಾರ ಪೊವಾಯಿ ಪಂಚಕುಟೀರ ಶ್ರೀ ಮಹಾಶೇಷ ರುಂಡಮಾಲಿನಿ ದೇವಲ್ಯದ ಚಾವಡಿಡ್ ಶ್ರೀ ರಾಮ ಪಟ್ಟಾಭಿಷೇಕ ಯಕ್ಷಗಾನ ಬಯಲಾಟ ನಡಪರೆ ಉಂಡು.

ಅಂಚೆನೆ ಈ ಲೇಸ್ ಶ್ರೀ ಸುವರ್ಣ ಬಾಬಾ ಮೆರೆನ ಆಶೀರ್ವಾದದೊಟ್ಟಿಗೆ, ಕಲಾಪ್ರಕಾಶ ಪ್ರತಿಷ್ಠಾನ ಬೊಂಬೈದ ಮುತಾಲಿಕೆಡ್, ಊರುದ ಪುಗರ್ತೆದ ಕಲಾವಿದೆರೆನ ಒಟ್ಟುಸೇರಿಗೆಡ್ ಆಟ ನಡಪುಂಡು.

ಈ ಲೇಸ್ ಗ್ ಮಲ್ಲ ಬಿನ್ನೆರಾದ್ ಪೊವಾಯಿ ಮಂತ್ರ ಹೋಟೆಲ್ ದ ಧಣಿ ಅಣ್ಣಪ್ಪ ಶೆಟ್ಟಿ, ಬೊಂಬೈ ಬಂಟರ ಸಂಘದ ಕಾರ್ಯಾಧ್ಯಕ್ಷೆರ್ ರವೀಂದ್ರ ಆರ್ ಶೆಟ್ಟಿ, ಪೊವಾಯಿ ಕನ್ನಡ ಸೇವಾ ಸಂಘದ ಮಾಜಿ ಅಧ್ಯಕ್ಷೆರ್ ಡಿ.ಕೆ ಶೆಟ್ಟಿ, ಪೊವಾಯಿ ಸತ್ಕಾರ್ ಕಿಚನ್ ದ ಆಡಳಿತ ನಿರ್ದೇಶಕೆರ್ ಹರೀಶ್ ಬಂಗೇರ, ನಿಖಿಲ್ ಹೈಡ್ರೋಲಿಕ್ಸ್ ಧಣಿ ಅಶೋಕ್ ಕೋಟ್ಯಾನ್, ಉದ್ಯಮಿ ಪೇತ್ರಿ ವಿಶ್ವನಾಥ ಶೆಟ್ಟಿ, ರವಿರಾಜ್ ಪ್ಯಾಕೇಜಿಂಗ್ ಆಡಳಿತ ನಿರ್ದೇಶಕೆರ್ ಸುರೇಂದ್ರ ಶೆಟ್ಟಿ, ಸುಜಾತಾ ಎಂಟರ್ ಪ್ರೈಸೆಸ್ ದ ಧಣಿ ಅಮರ್ ಎಂ. ಶೆಟ್ಟಿ, ಉದ್ಯಮಿ ರಾಮು ಅಮೀನ್, ಮ್ಯರೇಜ್ ಸೆಲ್ ಅಂಧೇರಿ- ಬಾಂದ್ರಾ ಪ್ರಾದೇಶಿಕ ಸಮಿತಿದ ಕಾರ್ಯಾಧ್ಯಕ್ಷೆರ್ ಕೃಷ್ಣ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಆಡಳಿತ ಸಮಿತಿದ ಸರ್ವಸದಸ್ಯೆರ್ ಬೊಕ್ಕ ಮಹಿಳಾ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಸೆ.19-20: ಕುಡ್ತಮುಗೇರು -ಮಂಕುಡೆ ಶ್ರೀ ವಿಷ್ಣುಮೂರ್ತಿ ಭಜನಾ ಮಂದಿರದ ಕಲಾ ಮಂಟಪಡ್ ಸಾರ್ವಜನಿಕ ಶ್ರೀ ಗಣೇಶೋತ್ಸವ

ವಿಟ್ಲ: ಕುಡ್ತಮುಗೇರು -ಮಂಕುಡೆ ಶ್ರೀ ವಿಷ್ಣುಮೂರ್ತಿ ಭಜನಾ ಮಂದಿರ (ರಿ.) ಬೊಕ್ಕ ಹಳೆ ವಿದ್ಯಾರ್ಥಿ ಯುವಕ ಮಂಡಲ (ರಿ.) ದ ಒಟ್ಟುಸೇರಿಗೆಡ್ 47 ನೇ ವರ್ಷೊದ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸೆ.19 ಬೊಕ್ಕ 20 ಕ್ಕ್ ಕುಡ್ತಮುಗೇರು -ಮಂಕುಡೆ ಶ್ರೀ ವಿಷ್ಣುಮೂರ್ತಿ ಭಜನಾ ಮಂದಿರದ ಕಲಾ ಮಂಟಪಡ್ ನಡಪರೆ ಉಂಡು.

ಸೆ.19 ಅಂಗಾರೆ ಬೊಲ್ಪುಗು ಗಣಪತಿ ಹೋಮ, ಗಣೇಶ ಪ್ರತಿಷ್ಠೆ, ಭಜನೆ, ಮಧ್ಯಾಹ್ನ ಮಹಾಪೂಜೆ, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು. ವನಸ್ ಆದ್ ಭಜನೆ ಸಂಕೀರ್ತನೆ ಸೇವೆ, ಬಯ್ಯಗ್ ಮಹಾಪೂಜೆ, ರಾತ್ರೆ ಅಭಿನಯ ಕಲಾವಿದೆರ್ ಮಂಕುಡೆ ಕುಡ್ತಮುಗೇರ್ ಮೊಕುಲು ಅಭಿನಯ ಮಲ್ಪುನ “ಪೊರ್ತು ಕಂತಿ ಬೊಕ್ಕ” ತುಳು ನಾಟಕ ನಡಪರೆ ಉಂಡು.

ಸೆ.20 ಬುಧಾರ ಬೊಲ್ಪುಗು ಭಜನೆ, ಸಾಂಸ್ಕೃತಿಕ ಲೇಸ್, ಸಭಾ ಲೇಸ್ ಮಧ್ಯಾಹ್ನ ಮಹಾಪೂಜೆ, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು. ಅವೆರ್ದ್ ಬೊಕ್ಕ ಶ್ರೀ ಯಕ್ಷಭಾರತ ಸೇವಾ ಪ್ರತಿಷ್ಠಾನ (ರಿ.) ವಿಟ್ಲ ಮೊಕ್ಲೆನ ಕಲ್ಪಾರ್ಥಿಲೆರ್ದ್ ಶಾಂಭವಿ ವಿಲಾಸ ಆಟ ನಡಪರೆ ಉಂಡು. ಬಯ್ಯಗ್ ಮಹಾಪೂಜೆ, ಪ್ರಸಾದ ಪಟ್ಟ್ ದ್, ಬೊಕ್ಕ ಶ್ರೀ ಗಣಪತಿನ ದಿಗ್ವಿಜಯ ಮೆರವಣಿಗೆ ಆದ್ ಜಲಸ್ತಂಭನ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ಮಹಾಗಣಪತಿ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕುಡ್ತಮುಗೇರು -ಮಂಕುಡೆ ಶ್ರೀ ವಿಷ್ಣುಮೂರ್ತಿ ಭಜನಾ ಮಂದಿರ (ರಿ.) ಬೊಕ್ಕ ಹಳೆ ವಿದ್ಯಾರ್ಥಿ ಯುವಕ ಮಂಡಲ (ರಿ.) ದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.