ಲೋಕಸಭೆ ವೋಟುಗು ಜೆಡಿಎಸ್ ಬೊಕ್ಕ ಬಿಜೆಪಿ ಒಟ್ಟಿಗೆ ಸ್ವರ್ಧೆ ಮಲ್ಪುಂಡು ಪಂದ್ ಬಿಎಸ್ ವೈ ಘೋಷಣೆ ಮಲ್ದೆರ್ ಪಂದ್ ರಾಷ್ಟ್ರೀಯ ಸುದ್ದಿವಾಹಿನಿ ವರದಿ ಮಲ್ದ್ಂಡ್.
ಜೆಡಿಎಸ್ ಚಿಕ್ಕಬಳ್ಳಾಪುರ, ಬೆಂಗ್ಲೂರ್ ಗ್ರಾಮಾಂತರ, ಹಾಸನ ಬೊಕ್ಕ ಮಂಡ್ಯ ಕ್ಷೇತ್ರನ್ ಪಡೆಪುಂಡು. ಅತ್ತಂದೆ ಕೋಲಾರ ಕ್ಷೇತ್ರಗ್ಲಾ ಜೆಡಿಎಸ್ ಬೇಡಿಕೆ ದೀತ್ಂಡ್. ಆಂಡ ಈ ಬಗೆಟ್ಟ್ ಅಕೇರಿದ ತೀರ್ಮಾನ ಆತಿಜಿ. ಬಿಜೆಪಿ ಒರಿನ ಕಡೆಟ್ ಜೆಡಿಎಸ್ ದ ಬೆಂಬಲ ದೆತೊಂದು, ಅಭ್ಯರ್ಥಿಲೆನ್ ವೋಟುಗು ಉಂತಾವುಂಡು ಪಂದ್ ವರದಿ ಆತ್ಂಡ್.
ಸುಬ್ರಹ್ಮಣ್ಯ: ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯದ ಫಲಸೊತ್ತುದ ಅಂಗಡಿಲೆನ ಕುಡ ಏಲಂ ನಡಪಾಯೆರೆ ಹೈಕೋರ್ಟ್ ಆದೇಶ ಕೊರ್ತುಂಡು.
ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯದ ರಥಬೀದಿಡ್ ಇಪ್ಪುನ ಫಲಸೊತ್ತು, ಬಂಗಾರ್ ಬೊಳ್ಳಿ ಪರಕೆ ಸೊತ್ತುಲೆನ್ ಮಾರುನ ಅಂಗಡಿ, ಆದಿಸುಬ್ರಹ್ಮಣ್ಯದ ಫಲಸೊತ್ತುದ ಅಂಗಡಿಲೆಗ್ ಕ್ರಮವಾದ್ ಗುರುಪಾದ, ವಿಜಯಕುಮಾರ್ ಬೊಕ್ಕ ಕಾರ್ತಿಕ್ ಪನ್ಪುನಕುಲು ಒಂಜಿ ವರ್ಷೊದ ಅವಧಿಗ್ ಏಲಂಡ್ ದೆತೊಂದು ಇತ್ತೆರ್. ಕರಾರುಪತ್ರದ ಅವಧಿ ಕರಿನ ಏಪ್ರಿಲ್ ತಿಂಗೊಲ್ಡ್ ಅಕೇರಿ ಆಂಡಲ ವೋಟುರ್ದಾವೆರ ಕುಡ ಏಲಂ ನಡಪಾಯೆರೆ ಸಾಧ್ಯ ಆದಿಜ್ಜಂಡ್.
ಆಂಡ ಸದ್ರಿ ಗುತ್ತಿಗೆದಾರೆರ್ ಅಂಗಡಿಲೆನ್ ದೆಪ್ಪಂದೆ ಕಾನೂನುಬಾಹಿರವಾದ್ ವ್ಯಾಪಾರ ನಡಪಾವೊಂದುಲ್ಲೆರ್. ಅತ್ತಂದೆ ಅಂಗಡಿನ್ ನನದ 4 ವರ್ಷೊದ ಅವಧಿಗ್ ದುಂಬರಿಸಾಯೆರೆ ಅವಕಾಶ ಕೊರೊಡು ಪಂದ್ ಗುತ್ತಿಗೆದಾರೆರ್ ಸರಕಾರಗ್ ಬಿನ್ನಾಪು ಸಂದಾದ್ ಇತ್ತೆರ್. ಮಾಸ್ಟರ್ ಪ್ಲಾನ್ ಕಾಮಗಾರಿಲು ನಡಪರೆ ಇಪ್ಪುನ ಕಾರಣ ಗುತ್ತಿಗೆ ಅವಧಿ ದುಂಬಾರಿಸಾಯೆರೆ ಸಾಧ್ಯ ಇಜ್ಜಿ ಪಂದ್ ಕುಡ ಬರೆದ್ ಕೊರ್ನ ಸರ್ಕಾರದ ಕಾರ್ಯದರ್ಶಿ ಮೇರ್ ಗುತ್ತಿಗೆದಾರೆರೆನ ಅರ್ಜಿನ್ ತಿರಸ್ಕಾರ ಮಲ್ತ್ ದ್ ಆದೇಶ ಕೊರ್ತೆರ್.
ಗುತ್ತಿಗೆದಾರೆರ್ ಸದ್ರಿ ಆದೇಶನ್ ಪ್ರಶ್ನೆ ಮಲ್ತ್ ದ್ ದೇವಲ್ಯದ ಮಿತ್ತ್ ಹೈಕೋರ್ಟುಡ್ ದಾವೆ ಪಾಡ್ದ್ ತಡೆಯಾಜ್ಞೆ ಕನದೆರ್. ಈ ಪೊರ್ತುಡು ಸುಬ್ರಹ್ಮಣ್ಯದ ಗ್ರಾಮ ಪಂಚಾಯಿತಿದ ಸದಸ್ಯೆರ್ ಬೊಕ್ಕ ಕಾಂಗ್ರೆಸ್ ದ ಗ್ರಾಮ ಸಮಿತಿದ ಅಧ್ಯಕ್ಷೆರ್ ಹರೀಶ ಇಂಜಾಡಿ ಮೇರ್ ಸದ್ರಿ ಅಂಗಡಿಲೆನ್ ನಿಯಮದ ಪ್ರಕಾರ ಏಲಂ ನಡಪಾವೊಡು ಪಂದ್ ಸರಕಾರ ನಿರ್ದೇಶನ ಕೊರೊಡು ಪಂದ್ ಸಾರ್ವಜನಿಕ ಹಿತಾಸಕ್ತಿ ದಾವೆ ಪಾಡ್ದೆರ್.
ಕಾಲಿ 15 ದಿನಟ್ಟ್ ಸದ್ರಿ ಕೇಸ್ ನ್ ಇತ್ಯರ್ಥ ಮಲ್ತಿನ ಮಾನ್ಯ ನ್ಯಾಯಾಲಯ ಗುತ್ತಿಗೆದಾರೆರೆನ ಅರ್ಜಿಗ್ ತಡೆಯಾಜ್ಞೆ ಕೊರಿಯೆರೆ ನಿರಾಕರಿಸಾದ್ ಕೂಡ್ಲೆ ಅಂಗಡಿನ್ ದೆತ್ತ್ ದ್ ಏಲಂ ನಡಪಾಯೆರೆ ಸರಕಾರಗ್ ನಿರ್ದೇಶನ ಕೊರ್ತುಂಡು. ಅತ್ತಂದೆ ಲೈಸೆನ್ಸ್ ಇಜ್ಜಂದೆ ವ್ಯಾಪಾರ ಮಲ್ತಿನ ಮೂಜರೆ ತಿಂಗೊಲ್ದ ಬಾಡಿಗೆಗ್ ಶೇ.10 ದಂಡ ಪಾಡಿಯೆರೆ ಆದೇಶ ಕೊರ್ತುಂಡು.
ದೇವಲ್ಯದ ಪರವಾದ್ ವೈಶಾಲಿ ಹೆಗ್ಡೆ ಬೊಕ್ಕ ಹರೀಶ ಇಂಜಾಡಿ ಮೇರ್ ಸಾರ್ವಜನಿಕ ಹಿತಾಸಕ್ತಿದ ಅರ್ಜಿದ ಪರವಾದ್ ಹೈಕೋರ್ಟುದ ನ್ಯಾಯವಾದಿ ಪುತ್ತೂರುದ ಸೂರ್ಯಂಬೈಲು ರಾಜಾರಾಮ್ ಮೇರ್ ವಾದ ಮಲ್ತೆರ್. ಹೈಕೋರ್ಟುದ ಆದೇಶದಂಚೆನೆ ಇತ್ತೆ ಅಂಗಡಿಲೆನ್ ದೆತ್ತ್ಂಡ್ ಪಂದ್ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಸದಸ್ಯೆರ್ ಹರೀಶ್ ಇಂಜಾಡಿ ಮೇರ್ ಮಾಧ್ಯಮಗ್ ಪೊಲಬು ಕೊರ್ತೆರ್.
ವರದಿ: ಗೋಪಿಚಂದನ್ ಕೆಎಸ್
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ನೇಮಕಾತಿಗಾದ್ ನೋಂದಣಿ ಪ್ರಕ್ರಿಯೆ ಸುರು ಆತ್ಂಡ್. ಪ್ರೊಬೇಷನರಿ ಆಫೀಸರ್ (PO) ಬೇಲೆಗ್ 2 ಸಾರ ಬೇಲೆ ಖಾಲಿ ಉಂಡು.
ಸೆ. 7 ರ್ದ್ ಅರ್ಜಿ ಸಂದಾಯೆರೆ ಅವಕಾಶ ಉಂಡು. ಆಸಕ್ತೆರ್ ಬ್ಯಾಂಕ್ ದ ಪೋರ್ಟಲ್ sbi.co.in/web/careers/ ಗ್ ಭೇಟಿ ಕೊರ್ಪುನ ಮುಖೇನ ಆನ್‌ಲೈನ್‌ಡ್ ಅರ್ಜಿ ಸಂದಾವೊಲಿ. ಅರ್ಜಿ ಸಂದಾಯೆರೆ ಸುರುಕು, sbi.co.in/web/careers ಗ್ ಭೇಟಿ ಕೊರೊಡು. ಬೊಕ್ಕ, PO 2023 ನೋಂದಣಿ ಲಿಂಕ್ ಕ್ಲಿಕ್ ಮಲ್ತ್ ದ್ ಅಪ್ಲಿಕೇಶನ್ ಪ್ರಕ್ರಿಯೆನ್ ದುಂಬಾರಿಸಾವೊಡು. ಬೊಕ್ಕ ಫಾರ್ಮ್ ನ್ ಭರ್ತಿ ಮಲ್ತ್ ದ್ ಅರ್ಜಿ ಸಂದಾವೊಡು.
ಅಂಚೆನೆ ಸಾಮಾನ್ಯ, EWS ಬೊಕ್ಕ OBC ಅಭ್ಯರ್ಥಿಲೆಗ್ ಅರ್ಜಿ ಶುಲ್ಕ 750 ರೂ. ಆತ್ಂಡ್, SC, ST ಬೊಕ್ಕ PWBD ಅಭ್ಯರ್ಥಿಲೆಗ್ ಒವ್ವೇ ಅರ್ಜಿ ಶುಲ್ಕ ಇಪ್ಪುಜಿ.
ಅಭ್ಯರ್ಥಿಗ್ ಇಪ್ಪೊಡಾಯಿನ ಅರ್ಹತೆಲು:
# ಏಪ್ರಿಲ್ 1, 2023 ದಲೆಕ್ಕ ಅಭ್ಯರ್ಥಿನ ಪ್ರಾಯ 21 ವರ್ಷೊರ್ದ್ ಕಮ್ಮಿ ಇಪ್ಪೆರೆ ಬಲ್ಲಿ.
# 30 ವರ್ಷೊರ್ದ್ ಎಚ್ಚ ಇಪ್ಪೆರೆ ಬಲ್ಲಿ. ಮೀಸಲಾತಿ ವರ್ಗದ ಅಭ್ಯರ್ಥಿಲೆಗ್ ಗರಿಷ್ಠ ವಯೋಮಿತಿಡ್ ಸಡಿಲಿಕೆ ಇಪ್ಪುಂಡು.
# SBI PO ಬೇಲೆಗ್ ಅರ್ಜಿ ಸಂದಾಯೆರೆ, ಒವ್ವೇ ವಿಭಾಗಡ್ ಪದವಿ ಆದಿಪೊಡು.
# ಪದವಿದ ಅಕೇರಿದ ವರ್ಷ ಇಜ್ಜಿಂಡ ಅಕೇರಿದ ಸೆಮಿಸ್ಟರ್‌ಡ್ ಇಪ್ಪುನಕ್ಲ ಅರ್ಜಿ ಸಂದಾಯೆರೆ ಅವಕಾಶ ಉಂಡು. ಆಂಡ ಸಂದರ್ಶನಗ್ ಆಯ್ಕೆ ಅಕುಲು ಡಿಸೆಂಬರ್ 12, 2023 ಕ್ಕ್ ಅತ್ತಂಡ ಸುರುಕು ಪದವಿನ್ ಪಡೆಯಿನ ಪುರಾವೆನ್ ಕೊರೊಡು.
# ವೈದ್ಯಕೀಯ, ಇಂಜಿನಿಯರಿಂಗ್, ಚಾರ್ಟರ್ಡ್ ಅಕೌಂಟೆಂಟ್, ಕಾಸ್ಟ್ ಅಕೌಂಟೆಂಟ್ ದಂಚಿನ ವಿದ್ಯಾರ್ಹತೆ ಇಪ್ಪುನ ಅಭ್ಯರ್ಥಿಲ ಈ ಬೇಲೆಗ್ ಅರ್ಜಿ ಸಂದಾವೊಲಿ.
SBI PO ಪರೀಕ್ಷೆ 2023 ಮೂಜಿ ಹಂತಡ್ ನಡಪರೆ ಉಂಡು. ಪೂರ್ವಭಾವಿ, ಮುಖ್ಯ ಬೊಕ್ಕ ಸಂದರ್ಶನ ನಡಪರೆ ಉಂಡು. ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಪ್ರೊಬೇಷನರಿ ಆಫೀಸರ್ ಪ್ರಿಲಿಮಿನರಿ ಪರೀಕ್ಷೆ ನವೆಂಬರ್‌ ಡ್ ನಡಪುಂಡು.
ಮುಲ್ಕಿ : ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ (ರಿ.) ಕುಡ್ಲ ನೆತ್ತ ಆಡಳಿತ ಮಂಡಳಿದ ಸದಸ್ಯೆರೆನ ಸಭೆ ಮುಲ್ಕಿದ ಶ್ರೀ ಕನ್ಯಾನ ಸದಾಶಿವ ಶೆಟ್ಟಿ ಸಂಕೀರ್ಣಡ್ ಇಪ್ಪುನ ಪ್ರವೀಣ್ ಭೋಜ ಶೆಟ್ಟಿ ಆಡಳಿತ ಕಚೇರಿಡ್ ಇಂಚೊಗು ನಡತ್ಂಡ್.
ಸಭೆತ್ತ ಗುರ್ಕಾರ್ಮೆನ್ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ರ್ ಒಯಿಸ್ ದಿತ್ತೆರ್. ಸಭೆಟ್ಟ್ ದುಂಬುದ ಆಡಳಿತ ಮಂಡಳಿ ಸಭೆತ್ತ ನಿರ್ಣಯನ್ ದಾಖಲ್ ಮಲ್ತೆರ್. ಬೊಕ್ಕ ಲೆಕ್ಕಪತ್ರ ಮಂಡನೆ ಬೊಕ್ಕ ಮಂಜೂರಾತಿ ಪಡೆಯೆರ್. ಜತೆ ಕಾರ್ಯದರ್ಶಿ ಪ್ರವೀಣ್ ಭೋಜ ಶೆಟ್ಟಿ ಮೆರೆನ ತಾನಗ್ ಚಂದ್ರಹಾಸ ಶೆಟ್ಟಿ ರಂಗೋಲಿ ಮೆರೆನ್ ನೇಮಕ ಮಲ್ತೆರ್. ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ ಮೇರ್ ಎದ್ಕೊಂದು ವರದಿ ಓದಿಯೆರ್. ಕೋಶಾಧಿಕಾರಿ ಉಳ್ತೂರು ಮೋಹನದಾಸ ಶೆಟ್ಟಿ ಮೇರ್ ಲೆಕ್ಕಪತ್ರನ್ ಓದಿಯೆರ್.
ಗುರ್ಕಾರ್ಮೆನ್ ಒಯಿಸೊಂದು ಐಕಳ ಹರೀಶ್ ಶೆಟ್ಟಿ ಮೇರ್ ಪಾತೆರ್ದ್, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟ ಸಮಾಜದ ಅಭಿವೃದ್ದಿ ಬೊಕ್ಕ ಏಳಿಗೆಗಾದ್ ಕೆಲಸ ಮಲ್ತೊಂದು ಉಂಡು. ನೆಕ್ಕ್ ದಾನಿಲು ಎಡ್ಡೆ ರೀತಿಡ್ ಸಹಾಕಾರ ಕೊರ್ದು, ಸ್ಪಂದಿಸಾದೆರ್ ಪಂದ್ ಪಂಡೆರ್. ಬೊಕ್ಕ ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ್ ಶೆಟ್ಟಿ ಮೇರ್ ಅಕ್ಟೋಬರ್ ತಿಂಗೊಲ್ ಡ್ ನಡಪರೆ ಇಪ್ಪುನ ವಿಶ್ವ ಬಂಟರ ಸಮ್ಮೇಳನದ ಬಗೆಟ್ಟ್ ಪಾತೆರಿಯೆರ್.
ಸಭೆಟ್ಟ್ ಪಾಲ್ ಪಡೆದಿತ್ತಿನ ಒಕ್ಕೂಟದ ಮಹಾದಾನಿ ಕನ್ಯಾನ ಸದಾಶಿವ ಶೆಟ್ಟಿ ಮೇರ್ ಅ.28 ಬೊಕ್ಕ 29 ಕ್ಕ್ ಒಡಿಪುದ ಅಜ್ಜರಕಾಡು ಮೈದಾನಡ್ ನಡಪುನ ವಿಶ್ವ ಬಂಟರ ಸಮ್ಮೇಳನದ ಲೆಪ್ಪೋಲೆನ್ ಬುಡುಗಡೆ ಮಲ್ತೆರ್. ಸಮ್ಮೇಳನಡ್ ನಡಪುನ ಸಾಂಸ್ಕೃತಿಕ ಪಂತೊ ಬೊಕ್ಕ ಕ್ರೀಡಾಕೂಟದ ಪಂತೊಗು ಸಮಾಜ ಬಾಂಧವೆರೆನ ಸಹಕಾರ ಬೋಡು ಪಂದ್ ಪಂಡೆರ್.
ಕ್ರೀಡೋತ್ಸವ ಸಮಿತಿದ ಸಂಚಾಲಕೆರ್, ಒಕ್ಕೂಟದ ಪೋಷಕ ಸದಸ್ಯೆರ್ ಗಿರೀಶ್ ಶೆಟ್ಟಿ ತೆಳ್ಳಾರ್ ಪಾತೆರ್ದ್, ಕಬ್ಬಡಿ, ವಾಲಿಬಾಲ್, ಬಲ್ಲ್ ಒಯಿಪುನ, ತ್ರೋಬಾಲ್, ಪಂದ್ಯಾಟಗ್ ಎಡ್ಡೆ ನಗದು ಇನಾಮುನ್ ಕೊರಿಯೆರೆ ಉಂಡು. ಅತ್ತಂದೆ ಪಥ ಸಂಚಲನಡ್ ಪಾಲ್ ಪಡೆಪುನ ಕೂಟಲೆಗ್ ಪಂತೊ ಉಂಡು. ಸುರುತ್ತ ಇನಾಮು 1 ಲಕ್ಷ ರೂಪಾಯಿ, ರಡ್ಡನೇ ಇನಾಮು 75 ಸಾರ, ಮೂಜಿನೇ ಇನಾಮು 50 ಸಾರ ಬೊಕ್ಕ ನಾಲ್ ನೇ ಇನಾಮು 25 ಸಾರ ನಗದು ಕೊರಿಯೆರೆ ಉಂಡು ಪಂದ್ ಪಂಡೆರ್.
ಸಾಂಸ್ಕೃತಿಕ ಸಮಿತಿದ ಸಂಚಾಲಕೆರ್, ಒಕ್ಕೂಟದ ಪೋಷಕ ಸದಸ್ಯೆರ್ ಚಂದ್ರಹಾಸ ಡಿ.ಶೆಟ್ಟಿ ಪಾತೆರ್ದ್, ಸಾಂಸ್ಕೃತಿಕ ಸಮಿತಿಗ್ ಸದಸ್ಯೆರೆನ್ ಸೇರ್ಸಾದ್ ಒಂಜಿ ಕೂಟನ್ ರಚನೆ ಮಲ್ದ್ಂಡ್. ಐನ್ ನಿಮಿಷದ ಕಾಲಾವಧಿದ ನೃತ್ಯ ಪಂತೊಡು ಸುರುತ್ತ ಒಂಜಿ ಲಕ್ಷ ರೂಪಾಯಿ, ರಡ್ಡನೇದ 75 ಸಾರ, ಮೂಜಿನೇದ 50 ಸಾರ ಬೊಕ್ಕ ನಾಲ್ ನೇ ಬೊಕ್ಕ ಐನ್ ನೇ ಪ್ರಶಸ್ತಿನ್ ಕೊರಿಯೆರೆ ಉಂಡು ಪಂದ್ ಸಭೆಕ್ಕ್ ತೆರಿಪಾಯೆರ್.
ಈ ಪೊರ್ತುಡು ಮಹಾ ಪೋಷಕೆರ್ ಶಶಿಧರ್ ಶೆಟ್ಟಿ ಇನ್ನಂಜೆ, ಪೋಷಕೆರ್ ಪುರುಷೋತ್ತಮ ಶೆಟ್ಟಿ, ನಾಗೇಶ್ ಹೆಗ್ಡೆ, ಸುಧೀರ್ ಶೆಟ್ಟಿ, ಅಶೋಕ್ ಕುಮಾರ್ ಶೆಟ್ಟಿ ಮೈರ್ಮಾಡಿ, ಶ್ರೀಧರ್ ಶೆಟ್ಟಿ ಆರೂರು ಬೊಕ್ಕ ಸುಮಾರ್ 50 ಬಂಟರ ಸಂಘಲೆನ ಅಧ್ಯಕ್ಷೆರ್, ಪದಾಧಿಕಾರಿಲು, ಸಾಂಸ್ಕೃತಿಕ ಬೊಕ್ಕ ಕ್ರೀಡಾ ಸಮಿತಿದ ಸದಸ್ಯೆರ್, ಮಹಿಳಾ ವಿಭಾಗದ ಅಧ್ಯಕ್ಷೆರ್, ಸದಸ್ಯೆರ್ ಪಾಲ್ ಪಡೆದಿತ್ತೆರ್.
ಕರ್ನಾಟಕದ 7 ಜಿಲ್ಲೆಡ್ ಒಂಜಿ ವಾರ ಭಾರೀ ಬರ್ಸ ಬರ್ಪುನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ಎಚ್ಚರಿಕೆ ಕೊರ್ತುಂಡು.
ದಕ್ಷಿಣ ಕನ್ನಡ, ಒಡಿಪು, ಉತ್ತರ ಕನ್ನಡ, ಚಿಕ್ಕಮಗಳೂರು, ಬೀದರ್, ಕಲಬುರ್ಗಿ ಬೊಕ್ಕ ಕೊಡಗು ಜಿಲ್ಲೆಡ್ ಯೆಲ್ಲೋ ಅಲರ್ಟ್ ಘೋಷಣೆ ಮಲ್ದೆರ್. ಅತ್ತಂದೆ ರಾಜ್ಯದ ಸುಮಾರ್ ಜಿಲ್ಲೆಡ್ ಈ ತಿಂಗೊಲ್ 15 ತಾರೀಕ್ ಮುಟ್ಟ ಬರ್ಸ ಬರ್ಪುಂಡು ಪಂದ್ ಐಎಂಡಿ ಪಂತ್ಂಡ್.
ಒಂಜಿ ತಿಂಗೊಲ್ದ ಪಿರವು ಒರನೆ ಏರಿನ ಟೊಮೆಟೊ ಕಿರಯ ಇತ್ತೆ ಕಮ್ಮಿ ಆತ್ಂಡ್.
ಕೋಲಾರ APMC ಮಾರ್ಕೆಟ್ ಡ್ 15 ಕೆಜಿ ನಾಟಿ ಟೊಮೆಟೊ ಬಾಕ್ಸ್ ಗ್ ಇತ್ತೆ ಕನಿಷ್ಠ 50 ರೂ. ಬೊಕ್ಕ ಗರಿಷ್ಠ 150 ರೂ.ಗ್ ಮಾರೊಂದು ಉಲ್ಲೆರ್. ಕಮ್ಮಿ ಗುಣಮಟ್ಟದ ಕೆಜಿ ಟೊಮೆಟೊಗ್ ಸರಾಸರಿ ಕನಿಷ್ಟ 3 ರೂ. ಬೊಕ್ಕ ಗುಣಮಟ್ಟದ ಟೊಮೆಟೊಗ್ ಗರಿಷ್ಠ 10 ರೂ. ಗ್ ತಿಕೊಂದು ಉಂಡು. ಚಿಲ್ಲರೆ ಮಾರ್ಕೆಟ್ ಡ್ ಟೊಮೆಟೊ ಕಿರಯ ಕೆಜಿಗ್ 10-15 ರೂ. ಉಂಡು. 15 ಕೆಜಿ ಸೀಡ್ ಟೊಮೆಟೊ ಬಾಕ್ಸ್ ದ ಕಿರಯಿ ಬಜೀ 100 ರೂ. ಆತ್ಂಡ್.
ಕುಡ್ಲ: ತುಳುನಾಡ್ ಭಾಗದ ಕೊಂಕಣಿ ಕೆಥೋಲಿಕ್ ಪೊರ್ಬುನಕ್ಲೆಗ್ (ಸೆ.8) ಇನಿ ಪರ್ಬದ ದಿನ.
ಆನಿ ಯೇಸು ಕ್ರಿಸ್ತನ ಅಪ್ಪೆ ಮೇರಿ ಮೆರೆನ ಪುಟ್ಟುನ ದಿನ. ಈ ದಿನೊನು ದ.ಕ ಬೊಕ್ಕ ಒಡಿಪು ಜಿಲ್ಲೆದ ಕೊಂಕಣಿ ಕೆಥೋಲಿಕೆರ್ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ರೀತಿಡ್ ಆಚರಣೆ ಮಲ್ಪುವೆರ್.
ಚರ್ಚ್ ಲೆಡ್ ಬಲಿ ಪೂಜೆ, ಪೊಸ ಕುರಲ್ ಪಟ್ಟುನ ಲೇಸ್, ಮೆರವಣಿಗೆ, ಬೊಕ್ಕ ಪುಷ್ಪಾರ್ಚನೆದ ಮುಖೇನ ಮೇರಿ ಅಪ್ಪೆಗ್ ನಮನ ಸಂದಾಯೆರೆ ಉಂಡು. ಬೊಕ್ಕ ಧರ್ಮ ಗುರುಕುಲು ಪರ್ಬದ ಪೊಲಬು ಕೊರ್ದು ಎಡ್ಡೆಪ್ಪು ಬಯಕುವೆರ್. ಬೊಕ್ಕ ಚೀಪೆ ತಿಂಡಿ, ಕರ್ಂಬು ಪಟ್ಟುವೆರ್. ಅವೆರ್ದ್ ಬೊಕ್ಕ ಇಲ್ಲಲ್ ಪರ್ಬದ ವನಸ್ ಮಲ್ಪುವೆರ್.
ಕುಡ್ಲ ಪೇಂಟೆದ ಮಿಲಾಗ್ರಿಸ್, ಬೆಂದೂರು, ಜಪ್ಪು, ವೆಲೆನ್ಸಿಯಾ, ಕಾಸ್ಸಿಯಾ, ಬಿಜೈ, ಆಂಜೆಲೋರ್, ಉರ್ವ, ಅಶೋಕನಗರ, ಬೋಂದೆಲ್, ಕುಲಶೇಖರ, ಕೂಳೂರು ಚರ್ಚ್ ಡ್ ಬೊಲ್ಪುಗು ಮೊಂತಿ ಪರ್ಬದ ಬಲಿಪೂಜೆಲು ನಡಪರೆ ಉಂಡು.
ಪರ್ಬದ ತಯಾರಿಗಾದ್ ಚರ್ಚ್ ಲೆಡ್ 9 ದಿನತ್ತ ನೊವೇನಾ ಪ್ರಾರ್ತನೆ ನಡತ್ ದ್ಂಡ್. ಜೋಕುಲು ಪೂವು ಕನತ್ ದ್ ಮೇರಿ ಅಪ್ಪೆಗ್ ಅರ್ಚನೆ ಮಲ್ತ್ ದ್ ಪ್ರಾರ್ತನೆ ಸಂದಾದೆರ್.
ಇನಿ ತರಕಾರಿದ ತೆನಸ್ ಈ ಪರ್ಬದ ಇಸೇಸ ಆತ್ಂಡ್. ಕಮ್ಮಿ ಆಂಡಲ 5 ಬಗೆತ್ತ ಕಜಿಪು ಇಪ್ಪೊಡು. ಆಯಿಟ್ಲಾ ಚೇವುದ ದಂಡ್, ದೆಂಟೊ (ಪದ್ ಪೆ ದಂಟು) ಪೀರೆ, ಬೆಂಡೆಕಾಯಿ ಇನಿತ್ತ ಕಜಿಪು ಆತ್ಂಡ್. ಆಯಿತ್ತೊಟ್ಟಿಗೆ ಪಾಯಿಸಲ ಮಲ್ಪುವೆರ್.
ಬೆಂಗಳೂರುದ “ಕರ್ನಾಟಕ ಚಲನಚಿತ್ರ ಕಲಾವಿದೆರೆನ ಸಂಘ” ದ ಮುತಾಲಿಕೆಡ್ “ತುಳು ಸಿನೆಮಾದ ಸುವರ್ಣ ಪಯಣ” ವಿಶೇಷ ಲೇಸ್ ಸೆ.3 ಐತಾರ “ರಾಜ್ ಕುಮಾರ್ ಭವನಡ್ ನಡತ್ಂಡ್.
ತುಳು ಚಿತ್ರರಂಗದ ಸವ್ಯಸಾಚಿ, ಹಿರಿಯ ರಂಗಕರ್ಮಿ ‘ತಮ್ಮಲಕ್ಷ್ಮಣ’ ಮೆರೆನ ಮುತಾಲಿಕೆಡ್, ದೃಶ್ಯಾಲಯ ಮಂಗಳೂರು ಬೊಕ್ಕ ಸ್ವಯಂಪ್ರಭ ಟಾಕೀಸ್ ಯಾಪ್ ಬೆಂಗಳೂರು ಮೊಕ್ಲೆನ ಒಟ್ಟುಸೇರಿಗೆಡ್ 50 ವರ್ಸೊದ ತುಳು ಸಿನೆಮಾದ ಚರಿತ್ರೆನ್ ಬೊಲ್ಪುಗು ಕನಪಿನ, ಬೊಕ್ಕ ಪೊಸ ಪೀಳಿಗೆಗ್ ಮುಟ್ಟಾವುನ ಮಹಾತ್ವಾಕಾಂಕ್ಷೆದ ಕಾರ್ಯಕ್ರಮ ನಡತ್ಂಡ್.
ಸಿನೆಮಾ ಬೊಕ್ಕ ಸಾಹಿತ್ಯ ಕ್ಷೇತ್ರದ ದಿಗ್ಗಜೆರಾಯಿನ ಡಾ. ಗಿರೀಶ್ ಕಾಸರವಳ್ಳಿ, ಡಾ. ಜಯಮಾಲ, ಡಾ. ಸತೀಶ್ ಕುಮಾರ್ ಎಸ್. ಹೊಸಮನಿ, ಭಾ.ಮಾ. ಹರೀಶ್, ವಿ. ಮನೋಹರ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್. ಅತ್ತಂದೆ ತುಳುಕೂಟ, ತುಳುವೆರೆಂಕುಲು, ತುಳುವೆರೆ ಚಾವಡಿ, ಐ-ಲೇಸಾ, ತುಳುನಾಡ ಜವನೆರ್, ಜೈ ತುಳುನಾಡ್ ಸಂಘಟನೆದ ಪ್ರಮುಖೆರ್ ಬೊಕ್ಕ ಸುಮಾರ್ ಚಲನಚಿತ್ರ ರಂಗದ ಕಲಾವಿದೆರ್, ತಾಂತ್ರಿಕೆರ್ ಈ ಪೊರ್ತುಡು ಪಾಲ್ ಪಡೆದಿತ್ತೆರ್.
ಬೆಂಗಳೂರುದ ಸಂಘಟಕೆ ಪಳ್ಳಿ ವಿಶ್ವನಾಥ್ ಶೆಟ್ಟಿ ಮಾತೆರೆನ್ಲಾ ಮೋಕೆಡ್ ಮಾನಾದಿಗೆಡ್ ಎದ್ಕೊನಿಯೆರ್. ಪ್ರಾಸ್ತಾವಿಕವಾದ್ ಪಾತೆರ್ನ ತಮ್ಮಲಕ್ಷ್ಮಣ ಮೇರ್, 50 ವರ್ಸೊದ ತುಳು ಸಿನೆಮಾ ರಂಗದ ಚರಿತ್ರೆನ್ ಮಹಾತ್ವಾಕಾಂಕ್ಷೆಡ್ ಪೊಸ ಪೀಳಿಗೆಗ್ ತೆರಿಪಾವುನ ಪ್ರಯತ್ನ ಮಲ್ದ್ಂಡ್ ಪಂದ್ ಪಂಡೆರ್. ಈ ಪೊರ್ತುಡು ತಮ್ಮಲಕ್ಷ್ಮಣ ಮೇರ್ ಬರೆತಿನ “ತುಳು ಬೆಳ್ಳಿ ತೆರೆಯ ಸುವರ್ಣಯಾನ” ಬುಕುನ್ ಮಲ್ಲ ಬಿನ್ನೆರ್ ಬುಡುಗಡೆ ಮಲ್ತೆರ್.
ಬೊಕ್ಕ ಕರಿನ 50 ವರ್ಸೊಲೆಡ್ ಬೊಳ್ಳಿ ಪರ್ದೆಗ್ ಬತ್ತಿನ ಜನ ಮೆಚ್ಚಿನ ತುಳು ಸಿನೆಮಾಲೆನ ಬಗೆಟ್ಟ್, ಹಿರಿಯ ನಟೆ ನಟಿ, ಕಲಾವಿದೆರ್, ತಾಂತ್ರಿಕೆರೆನ ಬಗೆಟ್ಟ್ ಪೊಲಬು ಇಪ್ಪುನ ವಿಶೇಷ ಕೃತಿನ್ ಪುಗರಿಯೆರ್. ತುಳು ರಂಗಭೂಮಿಗಾದ್, ಚಿತ್ರ ರಂಗೋಗಾದ್ ಸುಮಾರ್ 50 ವರ್ಸೊ ಸೇವೆ ಮಲ್ತಿನ ‘ತಮ್ಮ ಲಕ್ಷ್ಮಣ’ ಮೇರ್ ಪೊಸ ಪೀಳಿಗೆಗ್ ಆದರ್ಶ ಪಂದ್ ಪಂಡೆರ್.
ಕರಿನ 50 ವರ್ಸೊದಿಂಚ ಬೊಳ್ಳಿ ಪರ್ದೆಗ್ ಬಯ್ಯಿದಿನ ತುಳು ಸಿನೆಮಾಲೆನ ಕಿರು ಸಾಕ್ಷ್ಯ ಚಿತ್ರ “ಸುವರ್ಣ ತುಳು ಚಿತ್ರಮಾಲಾ” ಸಿನೆಮಾ ಪ್ರದರ್ಶನ ಯಶಸ್ವಿಡ್ ನಡತ್ಂಡ್. ಮಾನಾದಿಗೆದ ಬಿನ್ನೆರೆನ ಒಟ್ಟುಗು ಸುಮಾರ್ ಅಭಿಮಾನಿಲು, ತುಳು ಬಂಧುಲು ಚಿತ್ರಮಾಲಾ ಪ್ರದರ್ಶನ ತೂದು ಮೆಚ್ಚಿಯೆರ್. ಪಳ್ಳಿ ವಿಶ್ವನಾಥ್ ಶೆಟ್ಟಿ ಬೊಕ್ಕ ಶ್ರೀತಿಕಾ ಶೆಟ್ಟಿ ಲೇಸ್ ದ ಸುಧಾರಿಕೆ ಮಲ್ತೆರ್. ಗೋಪಾಲ್ ಪೂಜಾರಿ ಪಟ್ಟೆ, ನಿಧಿಶ್ ಶೆಟ್ಟಿ, ಸದಾನಂದ ಕಾರ್ಲ ಲೇಸ್ ಸುಧಾರಿಕೆಗ್ ಸಕಾಯ ಮಲ್ತೆರ್. ತಮ್ಮಲಕ್ಷ್ಮಣ ಮಾತೆರೆಗ್ಲಾ ಸೊಲ್ಮೆ ಸಂದಾಯೆರ್.
ವರದಿ: ಪಳ್ಳಿ ವಿಶ್ವನಾಥ್ ಶೆಟ್ಟಿ, ಬೆಂಗಳೂರು
ಕುಡ್ಲ: ದತ್ತ ನಗರ ಡ್ ಪೊಸತಾದ್ ನಿರ್ಮಾಣ ಆಯಿನ ದತ್ತ ನಗರ ರಂಗ ಮಂದಿರನ್ ಶಾಸಕೆರ್ ವೇದವ್ಯಾಸ ಕಾಮತ್ ಬುಧಾರ ಉದಿಪನ ಮಲ್ತೆರ್.
ಬೊಕ್ಕ ಮೇರ್ ಪಾತೆರ್ದ್, ದತ್ತ ನಗರ ಸ್ವಚ್ಛತೆ ಒಗ್ಗಟು ಬೊಕ್ಕ ಬೇತೆ ಬೇತೆ ಸಾಮಾಜಿಕ, ಧಾರ್ಮಿಕ ಲೇಸ್ ನ್ ನಡಪಾವೊಂದು ಬರೊಂದು ಉಂಡು.
ದತ್ತ ನಗರಡ್ ಕೈತಲ್ ನುಂಗೆಲ್ ಕಜವುನ್ ಬೊಕ್ಕ ಪಜ್ಜಿ ಕಜವುನ್ ಸಂಸ್ಕರಣೆ ಮಲ್ಪುನ ಸಲುವಾದ್ ಸಂಸ್ಕರಣ ಘಟಕನ್ ನಿರ್ಮಾಣ ಮಲ್ಪುನಲ್ಪ ಕುಡ್ಲ ಮಹಾನಗರ ಪಾಲಿಕೆರ್ದ್ ಸಂಪೂರ್ಣ ಸಹಕಾರ ಕೊರ್ಪ ಪಂದ್ ಭರವಸೆ ಕೊರಿಯೆರ್.
ಕರ್ನಾಟಕದ ಕಾಂಗ್ರೆಸ್ ಸರ್ಕಾರ ಪರ್ಬದ ಆಚರಣೆಗ್ ಸಮಯದ ಮಿತಿನ್ 10 ಗಂಟೆಗ್ ಸೀಮಿತ ಮಲ್ತ್ ದ್ ನಮ್ಮ ಧಾರ್ಮಿಕ ಆಚರಣೆಗ್ ತಡೆ ಪಾಡಿಯೆರೆ ದುಂಬಾತ್ಂಡ್. ಇಂಚಿನೆನ್ ಬಿಜೆಪಿ ವಿರೋಧ ಮಲ್ಪುಂಡು. ಅತ್ತಂದೆ ಪರ್ಬನ್ ಎಂಕುಲು ಪೊರ್ಲುಡೆ ಆಚರಣೆ ಮಲ್ಪುವ, ಒವ್ವೇ ಕಾರಣಗ್ಲಾ ಇಂಚಿನ ಪೊಳ್ಳು ಬೆದರಿಕೆನ್ ತರೆತಗ್ಗವುಜ. ಪೊಲೀಸೆರೆನ ಮುಖೇನ ಕಾಂಗ್ರೆಸ್ ಸರಕಾರ ಅಡ್ಡಿ ಮಲ್ಪರೆ ದುಂಬಾಂಡ ಸ್ವತಃ ಯಾನೇ ಪಾಲ್ ಪಡೆದ್ ರೋಡ್ ರೋಡ್ ಡ್ ಪರ್ಬ ಆಚರಣೆ ಮಲ್ಪುವೆ ಪಂದ್ ಪಂಡೆರ್. ಅಂಚೆನೆ
ವಿಶ್ವವಿದ್ಯಾನಿಲಯಡ್ ಆಚರಣೆ ಮಲ್ತೊಂದು ಬರೊಂದು ಇಪ್ಪುನ ಗಣೇಶ ಉತ್ಸವನ್ ಉಂತಾವಂದಿಲೆಕ್ಕ ಬಿನ್ನಾಪು ಮಲ್ದೆ. ನಮ್ಮ ಪರಂಪರೆ ಧಾರ್ಮಿಕ ಉತ್ಸವದಿಲು ಯಥಾಸ್ಥಿತಿಡ್ ನಡಪುಲೆಕ್ಕ ಆವೊಡು ಪಂದ್ ಪಂಡೆರ್.
ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ಶಕೀಲಾ ಕಾವಾ ಪಾತೆರ್ದ್, ರಂಗಮಂದಿರ ಮಾತೆರೆಗ್ಲಾ ಸದುಪಯೋಗ ಅವಡ್, ನೆರ್ದ್ ಎಡ್ಡೆ ಪ್ರತಿಭೆಲು ಪುಟ್ಟಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ರಂಗ ಮಂದಿರದ ನಿರ್ಮಾಣಗ್ ಸಹಕಾರ ಮಲ್ತಿನ ಶಾಸಕೆರೆನ್, ಸ್ಥಾಯಿ ಸಮಿತಿ ಅಧ್ಯಕ್ಷೆರೆನ್, ದತ್ತ ನಗರ ನಿವಾಸಿ ಸಂಘದ ಪ್ರಮುಖೆರ್, ಕುಡ್ಲ ಜಿಲ್ಲೆದ ವಿಶ್ವ ಹಿಂದೂ ಪರಿಷತ್ ಅಧ್ಯಕ್ಷೆರ್ ಎಚ್. ಕೆ ಪುರುಷೋತ್ತಮ್, ಮನಪಾ ಸದಸ್ಯೆರ್ ಸುಧೀರ್ ಶೆಟ್ಟಿ ಕಣ್ಣೂರು, ಸ್ಥಳೀಯ ಮನಪಾ ಸದಸ್ಯೆ ವನಿತಾ ಪ್ರಸಾದ್ ಮೊಕ್ಲೆಗ್ ಸನ್ಮಾನ ಮಲ್ತೆರ್. ಶ್ರೀ ಕೃಷ್ಣ ಜನ್ಮಾಷ್ಟಮಿದ ಲೆಕ್ಕೊಡು ದತ್ತ ನಗರ ನಿವಾಸಿಲೆರ್ದ್ ಆಟೋ ಪಂತೊ, ಶ್ರೀ ಕೃಷ್ಣ ಏಸ ಪಂತೊ ಬೊಕ್ಕ ಕಾಸ್ರೋಡುದ ಶ್ರೀ ಸುಧಾಕರ ಕೋಟೆ ಮೆರೆರ್ದ್ ಸೀತ ಕಲ್ಯಾಣ ಬೊಕ್ಕ ಭಕ್ತ ಸುಧಾಮ ಹರಿಕಥ ಸತ್ಸಂಗ ನಡತ್ಂಡ್.
ಈ ಪೊರ್ತುಡು ದತ್ತ ನಗರ ನಿವಾಸಿ ಸಂಘದ ಅಧ್ಯಕ್ಷೆರ್ ವಿಜಯಕುಮಾರ್ ಆಳ್ವ, ಸಂಚಾಲಕೆರ್ ಪ್ರವೀಣ್ ಶೆಟ್ಟಿ, ಕಾರ್ಯದರ್ಶಿ ರಾಜೇಶ್ ನಾಯ್ಕ್, ಕೋಶಾಧಿಕಾರಿ ಕರುಣಾಕರ ಶೆಟ್ಟಿ ಪಾಲ್ ಪಡೆದಿತ್ತೆರ್.
ಶಾಲೆದ ಜೋಕುಲೆಗ್ ಕೊರೊಂದು ಇತ್ತಿನ ದಸರಾ ರಜೆ ಈ ಸರ್ತಿಲ ಕಮ್ಮಿ ಆತ್ಂಡ್.
ಸಾಮಾನ್ಯ ಶಾಲೆಗ್ ಅ.8-24 ಮುಟ್ಟ ದಸರಾ ರಜೆ ಉಂಡು. ವಿಶೇಷ ಶಾಲೆದ ಜೋಕುಲೆಗ್ ದಸರಾ ರಜೆ ಕ್ಯಾನ್ಸಲ್ ಆತ್ಂಡ್. ನೆರ್ದ್ ದುಂಬು ಅ.2-29 ಮುಟ್ಟ ರಜೆನ್ ಕೊರೊಂದು ಇತ್ತೆರ್.
ಆಂಡ ಕೊರೊನಾ ಇಪ್ಪುನಗ ಪಾಠ ಮುಗಿಪೆರೆ ರಜೆ ಕಮ್ಮಿ ಮಲ್ತ್ ದ್ ಇತ್ತ್ಂಡ್. ಅಂಚೆನೆ ಈ ಸರ್ತಿಲ ಪಾಠ ಮುಗಿವೊಡು ಪಂದ್ ಶಿಕ್ಷಣ ಇಲಾಖೆ ಈ ನಿರ್ಧಾರ ದೆತೊಂದುಂಡು.
