ಕುಡ್ಲ: ಕುಂಪಲ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಲ್ಯಡ್ ಮಾರ್ನೆಮಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಅಂಚೆನೆ ಮಾರ್ನೆಮಿ ಪೂಜೆದ ಲೆಕ್ಕೊಡು ಪ್ರತಿ ದಿನೊಲ ರಾತ್ರೆ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಬೆಂಡೆಕಾಯಿನ್ ಒಂತೆ ಒಂತೆನ್ ತಿನ್ಪುನೆರ್ದ್ ಸುಮಾರ್ ಪ್ರಯೋಜನಲು ಉಂಡು.
ನೆಟ್ಟ್ ವಿಟಮಿನ್ ಎ, ಸಿ, ಪೊಟ್ಯಾಸಿಯಮ್‌, ಕ್ಯಾಲ್ಸಿಯಂ ಪೋಷಕಾಂಶ ಉಂಡು. ನೆರ್ದ್ ರೋಗನಿರೋಧಕ ಶಕ್ತಿ ಎಚ್ಚಾಪುಂಡು. ದೃಷ್ಟಿ ದೋಷ ನಿವಾರಣೆ ಆಪುಂಡು. ಎಲು ಗಟ್ಟಿ ಆಪುಂಡು ಬೊಕ್ಕ ಚರ್ಮ ಆರೋಗ್ಯವಾದ್ ಇಪ್ಪುಂಡು. ನೆಕ್ಕ್ ಫೈಬರ್ ಜೀರ್ಣಕ್ರಿಯೆ ಸಕಾಯ ಮಲ್ಪುಂಡು. ಅತ್ತಂದೆ ನೆತ್ತೆರ್ ಡ್ ಇಪ್ಪುನ ಸೆಕ್ಕರೆ ಬೊಕ್ಕ ಕೊಲೆಸ್ಟ್ರಾಲ್ ಮಟ್ಟನ್ ಕಮ್ಮಿ ಮಲ್ಪುಂಡು.
ಜೆಡಿಎಸ್ ಪಕ್ಷದ ಪೊಸ ರಾಜ್ಯಾಧ್ಯಕ್ಷೆರಾದ್ ಮಾಜಿ ಸಿಎಂ ಹೆಚ್ ಡಿ ಕುಮಾರಸ್ವಾಮಿ ಮೇರ್ ನೇಮಕ ಆತೆರ್.
ಬೆಂಗ್ಲೂರ್ ದ ಜೆಪಿ ಭವನಡ್ ನಡತಿನ ಪಕ್ಷದ ಕೋರ್ ಕಮಿಟಿ ಸಭೆಟ್ಟ್ ಹೆಚ್ ಡಿಕೆ ಮೆರೆನ್ ರಾಜ್ಯಾಧ್ಯಕ್ಷೆರಾದ್ ನೇಮಕ ಮಲ್ದೆರ್.
ಇತ್ತೆ ಜೆಡಿಎಸ್ ಶಾಸಕಾಂಗ ಪಕ್ಷದ ನಾಯಕೆ ಆಯಿನ ಮೇರ್, ನೆರ್ದ್ ದುಂಬು ರಾಜ್ಯಾಧ್ಯಕ್ಷೆರಾದ್ ಪಕ್ಷನ್ ಸಂಘಟನೆ ಮಲ್ತ್ ದ್ ಇತ್ತೆರ್.
ಕೇಂದ್ರ ಸರ್ಕಾರ ಉಜ್ವಲಾ ಯೋಜನೆದ ಮುಖೇನ ಧರ್ಮೊಗು ಎಲ್ ಪಿಜಿ ಗ್ಯಾಸ್ ಸಂಪರ್ಕ ಕೊರೊಂದು ಉಂಡು.
ಬಿಪಿಎಲ್ ಕಾರ್ಡ್ ಇಪ್ಪುನಕುಲು ಈ ಯೋಜನೆದ ಲಾಭ ಪಡೆವೊಲಿ. ಅಂಚಾದ್, ಬಿಪಿಎಲ್ ರೇಷನ್ ಕಾರ್ಡ್ ಜೆರಾಕ್ಸ್, ಇಲ್ಲದ ಮಾತ ಸದಸ್ಯೆರೆನ ಆಧಾರ್ ಕಾರ್ಡ್ ಜೆರಾಕ್ಸ್, ಇಲ್ಲದ ಯಜಮಾನಿನ ಬ್ಯಾಂಕ್ ಪಾಸ್ ಬುಕ್ ಜೆರಾಕ್ಸ್, ಪಾಸ್ ಪೋರ್ಟ್ ಸೈಜ್ ಪೋಟೋ, ಆಧಾರ್ ಕಾರ್ಡ್ ಗ್ ಲಿಂಕ್ ಆಯಿನ ಮೊಬೈಲ್ ಪತೊಂದು ಸರ್ಕಾರಿ ಸ್ವಾಮ್ಯದ ಗ್ಯಾಸ್ ಏಜೆನ್ಸಿದ ಕಚೇರಿಗ್ ಪೋದು ಅರ್ಜಿ ಸಂದಾವೊಲಿ.
ಮುಲ್ಕಿ : ಸಮಾಜ ಸರಿಯಾಯಿನ ಸಾದಿಡ್ ನಡಪೊಡು. ಜೋಕುಲೆನ ಭವಿಷ್ಯ ಹಾಳ್ ಮಲ್ಪುನ ಮಾದಕವಸ್ತು ಬೊಕ್ಕ ಬೊಡ್ಚಾಂದಿನ ಚಟುವಟಿಕೆನ್ ತಡೆಪರೆ ಮಾತೆರ್ಲ ಸಹಕಾರ ಕೊರೊಡು ಪಂದ್ ಮುಲ್ಕಿ ಪೊಲೀಸ್ ಠಾಣೆದ ಇನ್ಸ್ ಪೆಕ್ಟರ್ ವಿದ್ಯಾಧರ್ ಡಿ. ಬೈಕೇರಿಕರ್ ತೆರಿಪಾಯೆರ್.
ಆರ್ ಮುಲ್ಕಿ ಹಿಂದೂ ಯುವ ಸೇನೆ ಬೊಕ್ಕ ಮಹಿಳಾ ಮಂಡಳಿದ ನಿರೆಲ್ಡ್ ಮುಲ್ಕಿದ ಶಿವಾಜಿ ಮಂಟಪಡ್ ಗುರುವಾರದಾನಿ 25 ನೇ ವರ್ಷದ ಬೊಳ್ಳಿ ಪರ್ಬದ ಶಾರದಾ ಮಹೋತ್ಸವದ ಮೂರ್ತಿ ಪ್ರತಿಷ್ಠಾಪನೆ ಲೇಸ್ ರ್ದ್ ಬೊಕ್ಕ ಭಗವಾಧ್ವಜ ಉದಿಪನ ಮಲ್ತ್ ದ್ ಪಾತೆರಿಯೆರ್.
ಡಾ. ಅರುಣ್ ಕುಡ್ವ ಅಧ್ಯಕ್ಷತೆ ಒಯಿಸ್ ದಿತ್ತೆರ್. ಮಲ್ಲ ಬಿನ್ನೆರಾದ್ ಮುಲ್ಕಿ ಅರಸು ಕಂಬುಲ ಸಮಿತಿ ದ ಅಧ್ಯಕ್ಷೆರ್ ಕೊಲ್ನಾಡುಗುತ್ತು ಕಿರಣ್ ಶೆಟ್ಟಿ, ಉದ್ಯಮಿ ಬೊಕ್ಕ ದಾನಿಲಾಯಿನ ಪ್ರಕಾಶ್ ಶೆಣೈ, ಪ್ರಭೋದ್ ಕುಡ್ವ, ಹಿಂದೂ ಯುವ ಸೇನೆ ಮುಲ್ಕಿ ಘಟಕದ ಅಧ್ಯಕ್ಷೆರ್ ದಿನೇಶ್ ಕೊಲ್ನಾಡ್, ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಲತಾ ಶೇಖರ್ ಮಿತ್ತರ್ಮೆಡ್ ಇತ್ತೆರ್.
ಈ ಪೊರ್ತುಡು ನಾಗಸ್ವರ ವಾದಕೆರ್ ನಾಗೇಶ್ ಎ. ಬಪ್ಪನಾಡು ಮೆರೆಗ್ ಮಾನಾದಿಗೆ ನಡತ್ಂಡ್. ಶಂಕರ್ ಭಟ್ ಪ್ರಾರ್ಥನೆ ಮಲ್ತೆರ್.
ದಿನೇಶ್ ಕೊಲ್ನಾಡ್ ಪ್ರಸ್ತಾವಿಕವಾದ್ ಪಾತೆರ್ದ್ ಬಿನ್ನೆರೆನ್ ಎದ್ಕೊಂಡೆರ್. ಹರ್ಷರಾಜ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ಶಿವಶಂಕರ್ ನಿರೂಪಣೆ ಮಲ್ತೆರ್. ಅವರ್ದ್ ಬೊಕ್ಕ ಮಾತೃ ಮಂಡಳಿ ಬಪ್ಪನಾಡು ಮೊಕ್ಲೆರ್ದ್ ಭಜನಾ ಸೇವೆ ನಡತ್ಂಡ್.
UPSC ಕೇಂದ್ರ ಸಶಸ್ತ್ರ ಪೊಲೀಸ್ ಪಡೆಟ್ಟ್ (CAPF) ಸಹಾಯಕ ಕಮಾಂಡೆಂಟ್ ಬೇಲೆಗ್ ಅರ್ಜಿ ಸಂದಾವೊಲಿ.
ಬಿಎಸ್ಎಫ್, ಐಟಿಬಿಪಿ ಬೊಕ್ಕ ಎಸ್ಎಸ್ ಬಿಡ್ ಖಾಲಿ ಇಪ್ಪುನ 322 ಬೇಲೆಗ್ ನೇಮಕಾತಿ ನಡಪರೆ ಉಂಡು.
ಅಪ್ಲಿಕೇಶನ್ ಪ್ರಕಿಯೆ ಸುರು ಆತ್ಂಡ್. ಆಸಕ್ತ ಅಭ್ಯರ್ಥಿಲು ಅಧಿಕೃತ ವೆಬ್‌ಸೈಟ್‌ upsconline.nic.in ಗ್ ಭೇಟಿ ಕೊರ್ಪುನ ಮುಖೇನ ಅ.25 ತ್ತೊಲಯಿ ಅರ್ಜಿ ಸಂದಾವೊಲಿ.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ಸರಣಿ ಲೇಸ್ ಇನಿ ಬಯ್ಯಗ್ (ಅ.19) 5 ಗಂಟೆಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾಲ್ ಪಡೆದ್ ಪಾತೆರಿಯೆರೆ ಉಲ್ಲೆರ್. ಅ.20 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಮೀರಾ ಭಾಯಂದರ್ ಟೀಮ್ ಯುವ ಬ್ರಿಗೇಡ್ ದ ಮುತಾಲಿಕೆಡ್, ಪಾವಂಜೆ ಮೇಳದಕ್ಲೆರ್ದ್ ಶ್ರೀ ದೇವಿ ಮಹಾತ್ಮೆ ಆಟ ನ.4 ಸನಿಯಾರ ಬಯ್ಯಗ್ ಮೀರಾ ಭಾಯಂದರ್ ಇಂದ್ರಲೋಕದ ಸ್ಪರ್ಗೀಯ ಬಾಳ ಸಾಹೇಬ್ ಠಾಕ್ರೆ ಮೈದಾನಡ್ ನಡಪರೆ ಉಂಡು.
ಈ ಆಟ ತ್ರಿರಂಗ ಸಂಗಮದ ಒಟ್ಟುಸೇರಿಗೆಡ್, ಯಕ್ಷ ಕಾಮಧೇನು, ಯಕ್ಷಧ್ರುವ ಪಟ್ಲ ಸತೀಶ್ ಶೆಟ್ಟಿ ಮೆರೆನ ಭಾಗವತಿಕೆಡ್ ನಡಪರೆ ಉಂಡು ಪಂದ್ ಮೀರಾ ಭಾಯಂದರ್ ಟೀಮ್ ಯುವ ಬ್ರಿಗೇಡ್ ದ ಗುರ್ಕಾರೆ ಅರುಣ್ ಶೆಟ್ಟಿ ಪಡೆಯೂರು, ಮಾರ್ಗದರ್ಶಕೆರ್ ಸಚ್ಚಿದಾನಂದ್ ಶೆಟ್ಟಿ, ಪದುಕೆರ್, ಮಹಿಳಾ ವಿಭಾಗ ಬೊಕ್ಕ ಯುವ ವಿಭಾಗ ಲೆಪ್ಪೋಲೆಡ್ ತೆರಿಪಾದೆರ್.
ಪುಣೆ: ಪುಣೆ ತುಳು ಕೂಟದ ಮುತಾಲಿಕೆಡ್ ವರ್ಷೊದ ಸಭೆ, ದಸರಾ ಪೂಜೆ, ಕುರಲ್ ಪರ್ಬ, ದಾಂಡಿಯ ರಾಸ್ (ಅ.19) ಇನಿ ಬಯ್ಯಗ್ ಕರ್ವೆ ನಗರದ ಹೋಟೆಲ್ ರತ್ನದ ಬ್ಯಾಂಕ್ವೆಟ್ ಹಾಲ್ ಡ್ ನಡಪರೆ ಉಂಡು.
ಈ ಲೇಸ್ ಗುರ್ಕಾರೆ ಮೋಹನ್ ಶೆಟ್ಟಿ ಎಣ್ಣೆಹೊಳೆ ಮೆರೆನ ಗುರ್ಕಾರ್ಮೆನ್ ಡ್, ಮಹಿಳಾ ವಿಭಾಗದ ಗುರ್ಕಾರ್ದಿ ಸುಜಾತ ಡಿ ಶೆಟ್ಟಿ, ಯುವ ವಿಭಾಗದ ಗುರ್ಕಾರೆ ಅಭಿಜಿತ್ ಶೆಟ್ಟಿ ಬೊಕ್ಕ ತುಳುಕೂಟದ ಪದುಕೆರೆನ ಪಾಲ್ವಿಕೆಡ್ ನಡಪರೆ ಉಂಡು.
ಅಂಚೆನೆ ಶ್ರೀ ದುರ್ಗಾ ಪೂಜೆ, ಕುರಲ್ ಪೂಜೆ, ಪುಣೆದ ಶ್ರೀ ಗುರುದೇವ ಚಿಣ್ಣರ ಬಳಗದ ಜೋಕುಲೆರ್ದ್ ಭಜನೆ, ಮಹಾ ಮಂಗಳಾರತಿ, ಪ್ರಸಾದ ಪಟ್ಟಿಯೆರೆ ಉಂಡು. ಬೊಕ್ಕ ದಾಂಡಿಯಾ ರಾಸ್ ಅಂಚೆನೆ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಗುರ್ಕಾರೆ ಮೋಹನ್ ಶೆಟ್ಟಿ ಎಣ್ಣೆಹೊಳೆ, ಕಾರ್ಯದರ್ಶಿ ಸಂತೋಷ್ ಶೆಟ್ಟಿ ಎಣ್ಣೆಹೊಳೆ, ಕೋಶಾಧಿಕಾರಿ ದಿವಾಕರ ಶೆಟ್ಟಿ ಮಾಣಿಬೆಟ್ಟು, ಮಹಿಳಾ ವಿಭಾಗದ ಗುರ್ಕಾರ್ದಿ ಸುಜಾತ.ಡಿ ಶೆಟ್ಟಿ, ಯುವ ಭಾಗದ ಗುರ್ಕಾರೆ ಅಭಿಜಿತ್ ಶೆಟ್ಟಿ ಬೊಕ್ಕ ಪದುಕೆರ್ ಪ್ರಕಟಣೆಡ್ ತೆರಿಪಾದೆರ್.
ಮುಲ್ಕಿ: ಕೆರೆಕಾಡು ಶ್ರೀ ವಿನಾಯಕ ಯಕ್ಷ ಕಲಾ ಕೂಟ (ರಿ.) ಮೊಕ್ಲೆರ್ದ್ 9 ನೇ ವರ್ಷೊದ ಬೊಂಬೈ ಪ್ರವಾಸದ ಲೆಕ್ಕೊಡು ಅ.26-31 ಮುಟ್ಟ ಬೊಂಬೈ ಬೊಕ್ಕ ನವಿಬೊಂಬೈಡ್ 7 ಯಕ್ಷಗಾನ ಪ್ರದರ್ಶನ ಆಯೆರೆ ಉಂಡು.
ಈ ಲೇಸ್ ಪೆರ್ಣಂಕಿಲ ಹರಿದಾಸ ಭಟ್, ಧರ್ಮದರ್ಶಿಲು ರಮೇಶ್ ಯಂ ಪೂಜಾರಿ, ಹಿರಿಯ ಕಲಾವಿದೆ ಕೆ ಶೆಟ್ಟಿ ಮೊಕ್ಲೆನ ಆಶೀರ್ವಾದದೊಟ್ಟಿಗೆ ನಡಪರೆ ಉಂಡು.
ಅ.26 ಗುರುವಾರ ಬಯ್ಯಗ್ ಘನ್ಸೋಲಿ ಶ್ರೀ ಮೂಕಾಂಬಿಕಾ ಮಂದಿರಡ್ ಶ್ರೀ ದೇವಿ ಬನಶಂಕರಿ, ಅ.27 ಸುಕ್ರಾರ ಕರ್ನಾಟಕ ಸಂಘ ಪನ್ವೇಲ್ ಡ್ ಮಕರಾಕ್ಷ ಇಂದ್ರಜಿತು ಕಾಳಗ, ಅ.28 ಸನಿಯಾರ ಮರೋಳಿ ಹೆಗ್ಗಡೆ ಭವನಡ್ ಮದನ ಮೋಹಿನಿ (ತುಳು), ಅ.29 ಐತಾರ ವಾಶಿ, ನವಿಬೊಂಬೈ ಕನ್ನಡ ಸಂಘದ ಯಂ ಬಿ ಕುಕ್ಕಾನ್ ಸಭಾಗೃಹಡ್ ಮಹಾಶೂರ ಕರ್ಣ, ಬೊಕ್ಕ ಖರ್ಘರ್ ಶ್ರೀ ಆದಿಮಾತಾ ಮಂದಿರದ ಸಭಾಂಗಣಡ್ ಗರುಡೋದ್ಭವ, ಅ.30 ಸೋಮಾರ ವಿದ್ಯಾವಿಹಾರ ಶ್ರೀ ಅಂಬಿಕಾ, ಶ್ರೀ ಆದಿನಾಥೇಶ್ವರ, ಶ್ರೀ ಮಹಾಗಣಪತಿ ಮಂದಿರಡ್ ಏಕಾದಶಿ ದೇವಿ ಮಹಾತ್ಮೆ, ಅ.31 ಅಂಗಾರೆ ನೆರುಲ್ ಶ್ರೀ ಶನೀಶ್ವರ ಮಂದಿರಡ್ ಜಾಂಬವತಿ ಕಲ್ಯಾಣ ನಡಪರೆ ಉಂಡು ಪಂದ್ ಕೂಟದ ಗುರ್ಕಾರೆ ಜಯಂತ್ ಅಮೀನ್ ಲೆಪ್ಪೋಲೆಡ್ ತೆರಿಪಾದೆರ್.
