ಬೆಂಗ್ಲೂರು: ಅರಮನೆ ಮೈದಾನಡ್ ನಿರ್ಮಾಣ ಮಲ್ತಿನ ಬೆಂಗ್ಲೂರು ಕಂಬುಲ ನಮ್ಮ ಕಂಬುಲ ಕಚೇರಿ ಉದಿಪನ ಆಂಡ್.
ಈ ಪೊರ್ತುಡು ಕಂಬುಲ ಸಮಿತಿದ ಗುರ್ಕಾರೆ, ಪುತ್ತೂರು ಶಾಸಕೆರ್ ಅಶೋಕ್ ರೈ, ಉಪಾಧ್ಯಕ್ಷೆರ್ ಗುಣರಂಜನ್ ಶೆಟ್ಟಿ, ದಿನೇಶ್‌ ಹೆಗಡೆ, ಕಾರ್ಯಾಧ್ಯಕ್ಷೆರ್ ಗುರುಕಿರಣ್, ಖಜಾಂಚಿ ಸುಂದರ್ ರಾಜ್ ರೈ, ಪ್ರಧಾನ ಕಾರ್ಯದರ್ಶಿ ಕೆ.ವಿ.ರಾಜೇಂದ್ರಕುಮಾರ್, ಕಾರ್ಯಾಧ್ಯಕ್ಷೆರ್ ಉಮೇಶ್ ಶೆಟ್ಟಿ, ಉದಯ್‌ ಶೆಟ್ಟಿ, ಜಿ.ಶ್ರೀನಿವಾಸ್ ಸೇರಿನಂಚೆನೆ ಪದುಕೆರ್ ಪಾಲ್ ಪಡೆದಿತ್ತೆರ್.
ತೆಲಂಗಾಣ, ರಾಜಸ್ಥಾನ, ಛತ್ತೀಸ್ ಗಢ, ಮಿಜೋರಾಂ ಬೊಕ್ಕ ಮಧ್ಯಪ್ರದೇಶ ವಿಧಾನಸಭೆ ವೋಟುಗು ಅಭ್ಯರ್ಥಿಲೆನ್ ಆಯ್ಕೆ ಮಲ್ಪರೆ ಇನಿ ಬಿಜೆಪಿ ಕೇಂದ್ರ ಚುನಾವಣಾ ಸಮಿತಿ ಸಭೆ ನಡಪರೆ ಉಂಡು.
ಡೆಲ್ಲಿಡ್ ನಡಪುನ ಈ ಸಭೆಟ್ಟ್ ಅಮಿತ್ ಶಾ, ಜೆಪಿ ನಡ್ಡಾ ಸೇರಿನಂಚೆನೆ ಸುಮಾರ್ ಜನ ಸದಸ್ಯೆರ್ ಪಾಲ್ ಪಡೆಯೆರೆ ಉಲ್ಲೆರ್. ಬಿಜೆಪಿ ಇತ್ತೆನೇ ಎಂಪಿಗ್ 136, ರಾಜಸ್ಥಾನಗ್ 41 ಬೊಕ್ಕ ಛತ್ತೀಸ್ ಗಢನ್ 85 ಅಭ್ಯರ್ಥಿನ್ ಘೋಷಣೆ ಮಲ್ದ್ಂಡ್. ಒರಿನ ತಾನಗ್ ಇನಿಯೇ ಅಭ್ಯರ್ಥಿಲೆನ್ ಆಯ್ಕೆ ಮಲ್ಪುನ ಅಂದಾಜಿ ಉಂಡು.
ಕುಡ್ಲ: ನೀರುಮಾರ್ಗ ಮಾಣೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯಗ್ ಪ್ರತಿದಿನೊಲ ಬತ್ತ್ ದ್ ನಲಿಪುನ ನವಿಲ್ ಗ್ ಮುಲ್ಪದ ಅರ್ಚಕೆರ್ ಇತ್ತೆ ಗೆಜ್ಜೆ ಕಟ್ಟ್ ದೆರ್. ನವಿಲ್ ಖುಷಿರ್ದ್ ನಲಿಪುನ ವಿಡಿಯೋ ಇತ್ತೆ ಸಾಮಾಜಿಕ ಜಾಲತಾಣಡ್ ವೈರಲ್‌ ಆತ್ಂಡ್.
ಗೆಜ್ಜೆ ಕಟ್ಟೊಂದು ಗಲ್ ಗಲ್ ನಲಿಪುನ ನಾಟ್ಯ ಮಯೂರಿನ ಡ್ಯಾನ್ಸ್ ತೂಯೆರೆ ಪಂದೇ ದೇವಲ್ಯದ ಭಕ್ತೆರ್ ಕಾತ್ ಕುಲ್ಲುದು ದೇವಲ್ಯಗ್ ಬರ್ಪೆರ್. ದೇವಲ್ಯದೊಲಯಿ ಬತ್ತ್ ದ್ ಡ್ಯಾನ್ಸ್ ಮಲ್ಪುನ ಈ ನವಿಲ್ ಬಯ್ಯ ಆನಗ ಅರ್ಚಕೆರೆನ ಇಲ್ಲಗ್ ಪೋದು ಅಲ್ಪ ಡ್ಯಾನ್ಸ್ ಮಲ್ಪುಂಡು.
ಉಲ್ಲಂಜೆ ಶ್ರೀ ಕ್ಷೇತ್ರ ಕೊರಗಜ್ಜ ಮಂತ್ರಾದೇವತಾ ಚಾಮುಂಡೇಶ್ವರಿ ಗುಳಿಗ ಭದ್ರಕಾಳಿ ಸನ್ನಿಧಿಡ್ ಲಲಿತಾ ಪಂಚೆಮಿ ಆಚರಣೆ ನಡತ್ಂಡ್.
ನವರಾತ್ರಿ ಲೆಕ್ಕೊಡು ಶ್ರೀ ಸನ್ನಿಧಿಡ್ ಲಲಿತಾ ಪಂಚೆಮಿದ ದಿನ ಬೊಲ್ಪುಗು ದೇವೆರೆಗ್ ಬೊಂಡದ ಅಭಿಷೇಕ ನಡತ್ಂಡ್. ಒಂಜಿ ಸಾರರ್ದ್ಲ ಎಚ್ಚ ಪೊಂಜೊವುಲು ಶ್ರೀ ದೇವೆರೆನ ಸೀರೆನ್ ಪ್ರಸಾದ ರೂಪಡ್ ಪಡೆಯೆರ್. ಈ ಪೊರ್ತುಡು ಧರ್ಮದರ್ಶಿಲು ಹರೀಶ್ ಪೂಜಾರಿ ಪಾಲ್ ಪಡೆದಿತ್ತೆರ್.
ಪಂಜ ಕೊಯಿಕುಡೆ: ಶ್ರೀ ಚಾಮುಂಡೇಶ್ವರಿ ದೇವಿ ಸನ್ನಿಧಿಡ್ ಶರನ್ನವರಾತ್ರಿ ಉಚ್ಚಯದ ಲೆಕ್ಕೊಡು ಅ.19 ಗುರುವಾರ ಲಲಿತ ಪಂಚಮಿಗ್ ಚಂಡಿಕಾ ಹೋಮ ಬೊಕ್ಕ ಮಹಾಪೂಜೆ ನಡತ್ಂಡ್.
ವಿದ್ವಾನ್ ಪ್ರಸನ್ನ ತಂತ್ರಿಲೆನ ಮಾರ್ಗದರ್ಶನಡ್ ಪಂಜ ಮಹಾಗಣಪತಿ ಮಂದಿರದ ಅರ್ಚಕೆರ್ ಸುರೇಶ್ ಭಟ್ ಪಂಜ ಬೊಕ್ಕ ಕಾರ್ತಿಕೇಯ ಭಾರ್ಗವ ಮೊಕ್ಲೆನ ಮುತಾಲಿಕೆಡ್ ಪೂಜೆದ ವೈದಿಕ ವಿಧಿ ವಿಧಾನಲು ನಡತ್ಂಡ್. ಮಧ್ಯಾಹ್ನ ದೇವಿನ ದರ್ಶನ ಮಹಾಪೂಜೆ ಬೊಕ್ಕ ಅನ್ನ ಪ್ರಸಾದ ಸೇವೆ ಇತ್ತ್ಂಡ್.
ಈ ಪೊರ್ತುಡು ಚಾಮುಂಡೇಶ್ವರಿ ಸನ್ನಿಧಿದ ಮುಖ್ಯಸ್ಥೆರ್ ಸೀತಾರಾಮ ಆಮೀನ್ ಬೊಕ್ಕ ದೇವಿನ ಭಕ್ತ ವೃಂದದಕುಲು, ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.
ಬೊಂಬೈ: ಮೀರಾ ಭಾಯಂದರ್ ದ ಪಲಿಮಾರ್ ಮಠ ಶ್ರೀ ಬಾಲಾಜಿ ಸನ್ನಿಧಿಡ್ ಅ.15-24 ಮುಟ್ಟ ಮಾರ್ನೆಮಿ ಉಚ್ಚಯ ನಡಪರೆ ಉಂಡು.
ಈ 10 ದಿನ ನಡಪುನ ಮಾರ್ನೆಮಿ ಉಚ್ಚಯಡ್ ಶ್ರೀರಾಮ ದೇವೆರೆನ ಪೂಜೆದ ವಿಧಿ ವಿಧಾನಲು ನಡಪುಂಡು ಪಂದ್ ಬೊಂಬೈ ಶ್ರೀ ಪಲಿಮಾರು ಮಠತ್ತ ವ್ಯವಸ್ಥಾಪಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 ಮೆಗಾ ಹರ್ಟ್ಸ್ ಡ್ ಡೆಂಗ್ಯೂ ಜ್ವರತ್ತ ಬಗೆಟ್ಟ್ ಇಸೇಸ ಲೇಸ್ ಅ.19 ಗುರುವಾರ ಬಯ್ಯಗ್ 6 ಗಂಟೆಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಮಣಿಪಾಲ ಕೆ.ಎಂ.ಸಿದ ಸಮುದಾಯ ವೈದ್ಯಕೀಯ ವಿಭಾಗಡ್ ಸಹಾಯಕ ಪ್ರಾಧ್ಯಾಪಕೆರಾಯಿನ ಡಾ.ಸಂಜಯ್ ಕಿಣಿ ಪಾಲ್ ಪಡೆಯೆರೆ ಉಲ್ಲೆರ್. ಅ.20 ಕ್ಕ್ ಮಧ್ಯಾಹ್ನ 2 ಗಂಟೆಗ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕಾರ್ಲ ಶ್ರೀ ರಾಮ ಮಂದಿರಡ್ ಅ.15-24 ಮುಟ್ಟ ಮಾರ್ನೆಮಿ ಉಚ್ಚಯ ನಡಪರೆ ಉಂಡು.
ಅಂಚೆನೆ ಪ್ರತಿದಿನೊಲ ಬಯ್ಯಗ್ ಭಜನೆ, ಶ್ರೀ ರಾಮ ಪರಿವಾರ ದೇವೆರೆಗ್ ಮಹಾಪೂಜೆ ಬೊಕ್ಕ ಪ್ರಸಾದ ಪಟ್ಟುನ ಲೇಸ್ ನಡಪರೆ ಉಂಡು. ಈ ಲೇಸ್ ಡ್ ಭಕ್ತಾದಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶ್ರೀ ರಾಮ ಪರಿವಾರ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕಾರ್ಲ ಶ್ರೀ ರಾಮ ಮಂದಿರದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಕುಡ್ಲ ಪೇಂಟೆದ ಸೋಮೇಶ್ವರದ ಶ್ರೀ ಸೋಮೇಶ್ವರ ದೇವಲ್ಯಡ್ ಆಳುಪ ಅರಸೆರ್ ಸುರುತ್ತ ಕುಲಶೇಖರ ಆಳುಪೇಂದ್ರನ ಮರಣ ಶಾಸನ ಪತ್ತೆ ಆತ್ಂಡ್ ಪಂದ್ ತುಳುನಾಡ್ ದ ಪಿರಾಕ್ ದ ವಿದ್ವಾಂಸೆರ್ ಪ್ರೊ.ಟಿ. ಮುರುಗೇಶಿ ತೆರಿಪಾದೆರ್.
ಆಯತಾಕಾರದ ಶಿಲೆತ್ತ ಮಿತ್ತ್ ರಡ್ಡ್ ಆಕರ್ಷಕ ಚಿತ್ರಪಟ್ಟಿಕೆಲು ಉಂಡು. ನೆತ್ತ ಪಟ್ಟಿದ ಮಿತ್ತ್ ಶಾಸನದ ಸುರುತ್ತ ಸಾಲ್ ನ್ ಬರೆತೆರ್. ಬೊಕ್ಕ ಚಿತ್ರಪಟ್ಟಿದ ತಿರ್ತ್ 11 ಸಾಲ್ ದ ಶಾಸನ್ ಬರೆತೆರ್. ಶಾಸನದ ಸುರುತ್ತ ಸಾಲ್ ಡ್ ಸೋಮೇಶ್ವರ ದೇವಲ್ಯದ ಸೋಮೇಶ್ವರನ್ ಸೋಮಪ್ರಭು ಮುಲ್ಪ ಉಲ್ಲೆರ್ ಪಂದ್ ಬರೆತೆರ್.
ಬೊಕ್ಕ ಸುರುತ್ತ ಕುಲಶೇಖರನ್ ಸೋಮಕುಲತಿಲಕ, ಪಾಂಡ್ಯ ಮಹಾರಾಜಾಧಿ ರಾಜ, ಪರಮೇಶ್ವರ, ಪರಮಭಟ್ಟಾರಕ ಪಂದ್ ವರ್ಣಿಸಾದೆರ್. ಬೊಕ್ಕ ಶಾಸನದ 5 ಬೊಕ್ಕ 6 ನೇ ಸಾಲ್ ಡ್ ಸೈತಿನ ಬಗೆಟ್ಟ್ ಉಲ್ಲೇಖ ಉಂಡು.
ಬೊಂಬೈ: ನವಿ ಬೊಂಬೈ ಬಿಲ್ಲವ ಅಸೋಸಿಯೇಷನ್ ಕೈತಲ್ ಕಚೇರಿದ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯ ಅ.21ಸನಿಯಾರ ನವಿ ಮುಂಬೈ ಖರ್ಘರ್ ಸಾಯಿ ಲೀಲಾ ಬ್ಯಾಂಕ್ವೆಟ್ ಹಾಲ್ ಡ್ ನಡಪರೆ ಉಂಡು.
ಆನಿ ಈ ಲೇಸ್ ದೊಟ್ಟಿಗೆ ದಾಂಡಿಯಾ ರಾಸ್ ನ್ ಆಯೋಜನೆ ಮಲ್ದೆರ್. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಬಿಲ್ಲವ ಅಸೋಸಿಯೇಶನ್ ನವಿ ಬೊಂಬೈ ಕೈತಲ್ ದ ಕಚೇರಿದ ಮಾನಾದಿಗೆದ ಗುರ್ಕಾರೆ ಧರ್ಮದರ್ಶಿಲು ರಮೇಶ ಎಂ ಪೂಜಾರಿ, ಗುರ್ಕಾರೆ ವಿಶ್ವನಾಥ ಕೆ ಪೂಜಾರಿ, ಸರ್ವ ಸಮಿತಿದ ಸದಸ್ಯೆರ್, ಮಹಿಳಾ ವಿಭಾಗ, ಯುವ ಸಮನ್ವಯಾಧಿಕಾರಿ ಲೆಪ್ಪೋಲೆಡ್ ತೆರಿಪಾದೆರ್.
