ಇನಿ ಭಾರತ- ಬಾಂಗ್ಲಾ ಕ್ರಿಕೆಟ್
ವಿಶ್ವಕಪ್‌ ಡ್ ಇನಿ ಮಧ್ಯಾಹ್ನ ಭಾರತ-ಬಾಂಗ್ಲಾದೇಶ ಪಂತೊ ನಡಪರೆ ಉಂಡು.
ಭಾರತ 3 ಸಲ ಗೆಂದ್ ದ್ಂಡ್. ಬಾಂಗ್ಲಾದೇಶ 2 ಸಲ ಸೋತುದು 1 ಸಲ ಗೆಂದ್ಂದ್ ಇತ್ತೆ ಭಾರತದ ವಿರುದ್ಧ ಗೊಬ್ಬೆರೆ ಉಂಡು.
Tulu News
ಎನ್.ಸಿ.ಪಿ. ಉಪಾಧ್ಯಕ್ಷೆರಾದ್ ಲಕ್ಷ್ಮಣ ಸಿ. ಪೂಜಾರಿ ಆಯ್ಕೆ
ಬೊಂಬೈ: ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷದ (ಎನ್ ಸಿಪಿ) ಅಖಿಲ ಭಾರತ ಗುರ್ಕಾರೆ ಶರದ್ ಪವಾರ್ ಬೊಕ್ಕ ರಾಜ್ಯಾಧ್ಯಕ್ಷೆರ್ ಜಯಂತ್ ಪಾಟೀಲ್ ಮೆರೆನ ಮುತಾಲಿಕೆಡ್ ಅ.15ನೇ ನಡತಿನ ಸಭೆಟ್ಟ್ ಎನ್.ಸಿ.ಪಿ. ಬೊಂಬೈದ ಹಿರಿಯ ಉಪಾಧ್ಯಕ್ಷೆರಾದ್ ಹಿರಿಯ ರಾಜಕಾರಿಣಿ, ಸಮಾಜ ಸೇವಕೆರ್ ಲಕ್ಷ್ಮಣ ಸಿ. ಪೂಜಾರಿ ಮೇರ್ ಅವಿರೋಧವಾದ್ ಆಯ್ಕೆ ಆತೆರ್.
ರಾಖಿ ಜಾಧವ್ ಮೇರ್ ಬೊಂಬೈ ಪ್ರಾದೇಶಿಕ ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷದ ಗುರ್ಕಾರೆಯಾದ್, ಎನ್.ಸಿ.ಪಿ. ಚುನಾವಣಾಧಿಕಾರಿಯಾದ್ ನ್ಯಾ.ಹರೀಶ್ ಸನಾಸ್ ಆಯ್ಕೆ ಆತೆರ್.
ಅ.15-23: ಉಳ್ಳಾಲ ಶ್ರೀ ಚೀರುಂಭ ಭಗವತೀ ಕ್ಷೇತ್ರಡ್ ಮಾರ್ನೆಮಿ ಉಚ್ಚಯ
ಉಳ್ಳಾಲ ಶ್ರೀ ಚೀರುಂಭ ಭಗವತೀ ಕ್ಷೇತ್ರಡ್ ಅ.15-23 ಮುಟ್ಟ ಮಾರ್ನೆಮಿ ಉಚ್ಚಯ ನಡಪರೆ ಉಂಡು.
ಅ.15 ಐತಾರ ಪೊಸ ಸಭಾಗೃಹದ ಉದಿಪನ ಆಂಡ್. ಅ.17 ಅಂಗಾರೆ ಬೊಲ್ಪುಗು ಕೈ ಕಡ್ತೆರ್. ಅಂಚೆನೆ ಪ್ರತಿದಿನೊಲ ಮಧ್ಯಾಹ್ನ ಬೊಕ್ಕ ರಾತ್ರೆ ಮಹಾಪೂಜೆ ನಡಪುಂಡು.
ಅಂಚೆನೆ ಅ.27 ಸುಕ್ರಾರ ತುಲಾಪತ್ ಉಚ್ಚಯ, ಬೊಲ್ಪುಗು ಭಂಡಾರ ಬರ್ಪುಂಡು. ಬಯ್ಯಗ್ ಬಲಿ, ಮೂರ್ತಿ ದರ್ಶನ, ಪರಕೆ, ರಾತ್ರೆ ಪೊಸ ಅರಿತ್ತ ವನಸ್, ಭಂಡಾರ ಪೋಯೆರೆ ಉಂಡು ಪಂದ್ ಉಳ್ಳಾಲ ಶ್ರೀ ಚೀರುಂಭ ಭಗವತೀ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಗಂಗಾಧರ ಉಳ್ಳಾಲ್, ಗುರ್ಕಾರೆ ಚಂದ್ರಹಾಸ್ ಉಳ್ಳಾಲ್ ಲೆಪ್ಪೋಲೆಡ್ ತೆರಿಪಾದೆರ್.
ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯಡ್ ವಾಲಿಮೋಕ್ಷ ಹರಿಕಥೆ
ಸಸಿಹಿತ್ಲು ಶ್ರೀ ಭಗವತೀ ದೇವಲ್ಯಡ್ ಮಾರ್ನೆಮಿ ಉಚ್ಚಯದ ಲೆಕ್ಕೊಡು ಅ.15 ಐತಾರ ವಾಲಿಮೋಕ್ಷ ಹರಿಕಥೆ ನಡತ್ಂಡ್.
ಈ ಲೇಸ್ ಕಲಾ ಸಾರಥಿ ತೋನ್ಸೆ ಪುಷ್ಕಳ ಕುಮಾರ್ ಮೆರೆರ್ದ್ ನಡತ್ಂಡ್. ಹಾರ್ಮೋನಿಯಂಡ್ ಸುದೇಶ್ ಹೊಸಬೆಟ್ಟು, ತಬಲಡ್ ದೀಪಕ್ ರಾಜ್ ಉಳ್ಳಾಲ್ ಪಾಲ್ ಪಡೆದಿತ್ತೆರ್.
ಅ.15-22: ಪೊಳಲಿ ಶ್ರೀ ರಾಜರಾಜೇಶ್ವರೀ ದೇವಲ್ಯಡ್ ಮಾರ್ನೆಮಿ ಉಚ್ಚಯ
ಪೊಳಲಿ ಶ್ರೀ ರಾಜರಾಜೇಶ್ವರೀ ದೇವಲ್ಯಡ್ ಮಾರ್ನೆಮಿ ಉಚ್ಚಯ ಅ.15-22 ಮುಟ್ಟ ನಡಪರೆ ಉಂಡು.
ಅಂಚೆನೆ ಪ್ರತಿದಿನೊಲ ರಾತ್ರೆ ಮಾರ್ನೆಮಿಪೂಜೆ ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪುಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಗೋಡ್ವಿನ್ಸ್ ನಿರ್ಮಲ್ ಆಟೋ ಕನ್ಸಲ್ಟೆಂಟ್ಸ್ ಡ್ ದಸರಾ ಲೆಕ್ಕೊಡು ಗ್ರಾಹಕೆರೆಗ್ ಉಡುಗಿರ
ಕುಡ್ಲ: ಗಲಸಿನ ರಡ್ಡ್ ಚಕ್ರ ಗಾಡಿಲೆನ ಮಳಿಗೆ ಗೋಡ್ವಿನ್ಸ್ ನಿರ್ಮಲ್ ಆಟೋ ಕನ್ಸಲ್ಟೆಂಟ್ಸ್ ಎಡ್ಡೆ ಸೇವೆರ್ದ್ ರಾಜ್ಯ ಇಡೀ ಪುದರ್ ಪಡೆತ್ಂಡ್.
ಕುದ್ರೋಳಿ ಅಳಕೆ ಪ್ರದೇಶಡ್ ಸುರು ಆಯಿನ ಶೋರೂಂ 25 ವರ್ಷೊಲೆನ ಸೇವೆನ್ ಕರ್ನಾಟಕದ ಮಾತ ಜಿಲ್ಲೆದ ಜನಕ್ಲೆಗ್ ಕೊರೊಂದು ಉಂಡು. ಮಾತ ವರ್ಗಲೆನ ಕಮ್ಮಿ ಕಿರಯಡ್ ಗಾಡಿಲು ಮುಲ್ಪ ತಿಕ್ಕುಂಡು.
ಅತ್ತಂದೆ ದಸರಾ ಪರ್ಬದ ಲೆಕ್ಕೊಡು ಒಂಜಿ ತಿಂಗೊಲ್ದ ಹೊಸ ಗಾಡಿಲು ಶೇ.30 ದಾತ್ ಕಮ್ಮಿ ಕಿರಯಡ್ ಉಂಡು. ರಡ್ಡ್ ಚಕ್ರದ ಗಾಡಿಲೆಗ್ ಭಾರೀ ಕಮ್ಮಿ ಬಡ್ಡಿಡ್ ಸಾಲ ತಿಕ್ಕುಂಡು. ಪರತ್ ಗಾಡಿಲೆನ್ ಬೇತೆ ಮಾತ ಶೋರೂಂರ್ದ್ ಎಚ್ಚ ಕಿರಯಡ್ ದೆತೊನೊವೆರ್. ಅತ್ತಂದೆ ಮಾರಾಟ ಮಲ್ತಿನ ಗಾಡಿನ್ ಕಡ್ಡಾಯವಾದ್ ಆರ್ ಸಿ ಟ್ರಾನ್ ಫರ್ ಮಲ್ತ್ ದ್ ಆಯಿನ ಪ್ರತಿನ್ ಗ್ರಾಹಕೆರೆಗ್ ಕೊರ್ಪೆರ್. ಮುಲ್ಪ ಕಮ್ಮಿ ಡೌನ್ ಪೇಮೆಂಟ್ ಡ್ ಗ್ರಾಹಕೆರೆಗ್ ಇಷ್ಟ ಇಪ್ಪುನ ಗಾಡಿನ್ ದೆತೊನೊಲಿ. ಒಂಜೇ ಸಂಸ್ಥೆದ ಮುಖೇನ ಆರ್ ಸಿ ವರ್ಗಾವಣೆ, ಇನ್ಸೂರೆನ್ಸ್ ಸಾಲ ಸೌಲಭ್ಯ ಉಂಡು. ಆಕರ್ಷಕ ಕಿರಯಿಡ್ ಎಕ್ಸ್ ಚೇಂಜ್ ಆಫರ್ ಉಂಡು.
ಮಾತ ಕಂಪೆನಿದ ಗಾಡಿಲು ಮುಲ್ಪ ತಿಕ್ಕುಂಡು. ಒಂಜಿ ತಿಂಗೊಲ್ ಆಯಿನ ಬ್ಯಾಟರಿ ಗಾಡಿಲು, ಶೇ.40 ಕಿರಯಿಡ್ ತಿಕ್ಕುಂಡು. ಗ್ರಾಹಕೆರ್ ನೆತ್ತ ಸದುಪಯೋಗನ್ ಪಡೆವೊಲಿ ಪಂದ್ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಗೋಡ್ವಿನ್ ಕಾರಿಯಪ್ಪ ಪ್ರಕಟಣೆಡ್ ತೆರಿಪಾದೆರ್.
ಅ.15-23: ಸುಭಾಷ್ ನಗರ ಶ್ರೀ ದತ್ತಾತ್ರೇಯ ದುರ್ಗಾಂಬಿಕಾ ದೇವಲ್ಯಡ್ 58ನೇ ವರ್ಷೊದ ಮಾರ್ನೆಮಿ ಉಚ್ಚಯ
ಬೊಂಬೈ: ಘಾಟ್ ಕೋಪರ್ ದ ಸುಭಾಷ್ ನಗರ ಶ್ರೀ ದತ್ತಾತ್ರೇಯ ದುರ್ಗಾಂಬಿಕಾ ದೇವಲ್ಯಡ್ 58ನೇ ವರ್ಷೊದ ಮಾರ್ನೆಮಿ ಉಚ್ಚಯ ಅ.15-23 ಮುಟ್ಟ ನಡಪರೆ ಉಂಡು.
ಅಂಚೆನೆ ಪ್ರತಿದಿನೊಲ ಬೇತೆ ಬೇತೆ ಧಾರ್ಮಿಕ, ವೈದಿಕ ವಿಧಿ ವಿಧಾನಲು ನಡಪುಂಡು. ಈ ಲೇಸ್ ಡ್ ಭಕ್ತಾಭಿಮಾನಿಲು ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು, ಶ್ರೀ ಗುರು ದತ್ತಾತ್ರೇಯ, ಆದಿಮಾತೆ ಶ್ರೀ ದುರ್ಗಾಂಬಿಕೆ, ಶ್ರೀ ಅಂಜನೇಯ, ಶ್ರೀ ನಾಗಶೇಷ ಬೊಕ್ಕ ಅಪ್ಪೆ ಚಾಮುಂಡಿ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ದತ್ತಾತ್ರೇಯ ಮಿತ್ರ ಭಜನಾ ಮಂಡಳಿ (ರಿ.) ದ ಗುರ್ಕಾರೆ, ಧರ್ಮದರ್ಶಿಲು ದೇವ್ ಬಿ ಪೂಜಾರಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಇನಿ ಮೈಸೂರ್ ದಸರಾಡ್ ನಡಪುನ ಫಿಲ್ಮ್ ಫೆಸ್ಟಿವಲ್ ಡ್ ಕೊರಮ್ಮ ತುಳು ಪಿಕ್ಚರ್ ಪ್ರದರ್ಶನ
ಶಿವಧ್ವಜ್ ಶೆಟ್ಟಿ ಕಥೆ, ಚಿತ್ರಕಥೆ, ನಿರ್ದೇಶನದ ಕೊರಮ್ಮ ತುಳು ಪಿಕ್ಚರ್ ಇನಿ (ಅ.18) ಬಯ್ಯಗ್ ಮೈಸೂರ್ ದಸರಾ ಫಿಲ್ಮ್ ಫೆಸ್ಟಿವಲ್ ಡ್ ಪ್ರದರ್ಶನ ಆಂಡ್.
ಈ ಪಿಕ್ಚರ್ ಗ್ ಈಶ್ವರಿದಾಸ್ ಶೆಟ್ಟಿ, ರಾಜೇಶ್ವರಿ ರೈ ನಿರ್ಮಾಪಕೆರಾತೆರ್. ಕ್ಯಾಮರ ಮ್ಯಾನ್ ಸುರೇಶ್ ಬೈರಸಂದ್ರ, ಸಂಗೀತ ಶಿನೋಯ್ ವಿ ಜೋಸೆಫ್, ಸಂಕಲನ ಗಣೇಶ್ ನೀರ್ಚಾಲ್, ಸಂಭಾಷಣೆ ಶ್ರೀನಿಧಿ ಡಿ.ಎಸ್, ಅನುವಾದ ಬೊಕ್ಕ ಸಾಹಿತ್ಯ ಕೆ. ಮಹೇಂದ್ರನಾಥ್ ಸಾಲೆತ್ತೂರ್, ಕಲೆ ಸಂತೋಷ್ ಪೂಜಾರಿ ವೇಣೂರ್, ಸಹ ನಿರ್ದೇಶನ ಹರ್ಸಿವ್ ಭಗೀರ, ಪ್ರಸಾದನ ಕುಮಾರ್ ನೊಣವಿನಕೆರೆ, ನಿರ್ಮಾಣ, ನಿರ್ವಹಣೆ ವೀರೇಶ್ ಎಸ್ ಎ, ಕಲೆ ಪರಿಕಾರಲು ಸುಧಾಕರ ಶೆಟ್ಟಿ, ಪ್ರಚಾರ ವಿನ್ಯಾಸ ಯಶ್ವಿನ್ ಕೆ. ಶೆಟ್ಟಿಗಾರ್ ಮಲ್ದೆರ್.
ಸೃಜನಾ ಬೊಂಬೈ ಕನ್ನಡ ಲೇಖಕಿಯೆರೆನ ಬಳಗದ ಮುತಾಲಿಕೆಡ್ ಪ್ರವಾಸಿಗರ “ಅಂತರಂಗ ಬೂಕು ಬುಡುಗಡೆ
ಬೊಂಬೈ: ಸೃಜನಾ ಬೊಂಬೈ ಕನ್ನಡ ಲೇಖಕಿಯೆರೆನ ಬಳಗದ ಮುತಾಲಿಕೆಡ್ ಪ್ರವಾಸಿಗರ ಅಂತರಂಗ ಬೂಕು ಬುಡುಗಡೆ ಲೇಸ್ ಅ.14 ಸನಿಯಾರ ಬಯ್ಯಗ್ ಬೊಂಬೈದ ಮಾಟುಂಗಾದ ಮೈಸೂರ್ ಅಸೋಸಿಯೇಶನ್ ದ ಸಭಾಗೃಹಡ್ ನಡತ್ಂಡ್.
ಈ ಲೇಸ್ ದ ಗುರ್ಕಾರ್ಮೆನ್ ಸೃಜನಾ ಬಳಗದ ಸಂಚಾಲಕಿ ಪದ್ಮಜಾ ಮಣ್ಣೂರು ಒಯಿಸ್ ದಿತ್ತೆರ್. ಸಹ ಸಂಚಾಲಕಿ ಡಾ.ಜಿ.ಪಿ ಕುಸುಮಾ ಎದ್ಕೊಂದು ಪ್ರಸ್ತಾವನೆ ಭಾಷಣ ಮಲ್ತೆರ್.
ಸಾಹಿತಿ, ಪತ್ರಕರ್ತೆರ್ ಶ್ರೀನಿವಾಸ ಜೋಕಟ್ಟೆ ಬೂಕು ಬುಡುಗಡೆ ಮಲ್ತೆರ್. ಕಬಿ, ಸಾಹಿತಿ, ರಂಗನಟೆ ಗೋಪಾಲ ತ್ರಾಸಿ ಬೂಕುದ ಪರಿಚಯ ಮಲ್ತೆರ್.
ಈ ಪೊರ್ತುಡು ಶ್ಯಾಮಲಾ ಮಾಧವ, ಸುಶೀಲಾ ದೇವಾಡಿಗ, ಸರೋಜಾ ಅಮಾತಿ, ಪ್ರವಾಸಿಗರ ಅಂತರಂಗ ಸಂಪಾದಕೆರ್ ಲತಾ ಸಂತೋಷ್ ಶೆಟ್ಟಿ ಮುದ್ದುಮನೆ ಪಾಲ್ ಪಡೆದಿತ್ತೆರ್. ಸೃಜನಾ ಬಳಗದ ಜತೆ ಕೋಶಾಧಿಕಾರಿ ಸರೋಜಾ ಅಮಾತಿ ಲೇಸ್ ದ ಸುಧಾರಿಕೆ ಮಲ್ತೆರ್.
ಅ.21: ಸಾಂತಾಕ್ರೂಜ್ ದ ಬಿಲ್ಲವ ಭವನಡ್ ಮಾರ್ನೆಮಿ ಉಚ್ಚಯ
ಬಿಲ್ಲವರ ಸಂಘ ಬೊಂಬೈದ ಪೊಂಜೋವ್ ಲೆನ ವಿಭಾಗದ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯ ಅ.21ಸನಿಯಾರ ಸಾಂತಾಕ್ರೂಜ್ ದ ಬಿಲ್ಲವ ಭವನಡ್ ನಡಪರೆ ಉಂಡು.
ಆನಿ ಮಧ್ಯಾಹ್ನ 3 ಗಂಟೆಗ್ ಲಲಿತಾ ಸಹಸ್ರನಾಮ, ದಾಂಡಿಯಾ ರಾಸ್ ನಡಪರೆ ಉಂಡು. ಈ ಲೇಸ್ ಗ್ ಕುಟುಂಬ ಸಮೇತೆರಾದ್ ಬರೊಡು ಪಂದ್ ಬಿಲ್ಲವರ ಸಂಘ ಬೊಂಬೈದ ಗುರ್ಕಾರೆ ಹರೀಶ್ ಜಿ ಅಮೀನ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.