ಬೊಂಬೈ: ಸಾಂತಕ್ರೂಜ್ ನಾರಾಯಣ ಗುರು ಮಾರ್ಗದ ಬಿಲ್ಲವ ಭವನಡ್ ಡಿ.2 ಸನಿಯಾರ ಪಿರಾವುಡು ಒರಿ ಉಲ್ಲೆ..! ಜಾಗ್ರತೆ ತುಳು ನಾಟಕ ನಡಪರೆ ಉಂಡು.
ಈ ನಾಟಕ ಬೊಂಬೈ ಶ್ರೀ ಸಸಿಹಿತ್ಲು ಭಗವತೀ ತೀಯಾ ಸಂಘ (ರಿ.) ದ ಮುತಾಲಿಕೆಡ್, ಕಿನ್ನಿಗೋಳಿದ ವಿಜಯಾ ಕಲಾವಿದೆರ್ ಕೂಟದ ಉದಯ್ ಕುಮಾರ್ ಹಳೆಯಂಗಡಿ ಅಂಚೆನೆ ಪುಗರ್ತೆದ ಕಲಾವಿದೆರೆರ್ನ ಅಭಿನಯಡ್ ನಡಪರೆ ಉಂಡು.
ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ನಿ. ಬೊಕ್ಕ ನವೋದಯ ಗ್ರಾಮ ವಿಕಾಸ ಚಾರಿಟೇಬಲ್ ಟ್ರಸ್ಟ್ (ರಿ.) ಕುಡ್ಲದ ಒಟ್ಟುಸೇರಿಗೆಡ್ ಜಿಲ್ಲಾ ಮಟ್ಟದ ಕ್ರೀಡಾಕೂಟ ನ.30 ಗುರುವಾರ ಪುತ್ತೂರ್ ಕೊಂಬೆಟ್ಟು ಸಹಕಾರಿ ಪದವಿ ಪೂರ್ವ ಕಾಲೇಜ್ ಡ್ ನಡಪರೆ ಉಂಡು.
ಈ ಕ್ರೀಡಾಕೂಟಡ್ ಪೊಂಜೋವುನಕ್ಲೆಗ್ ಬೊಕ್ಕ ಆಂಜೋವುನಕ್ಲೆಗ್ 100 ಮೀಟರ್ ಬಲಿಪೆರೆ, ಶಾಟ್ ಪುಟ್ ದಕ್ಕೆರೆ ಬೊಕ್ಕ ಬಲ್ಲ್ ಒಯಿಪುನ ಪಂತೊ ನಡಪರೆ ಉಂಡು. ಈ ಕ್ರೀಡಾಕೂಟಡ್ ಸಹಕಾರಿ ಸಂಘಲೆನ ಸದಸ್ಯೆರ್, ಸಿಬ್ಬಂದಿಲು, ನವೋದಯ ಸ್ವಸಹಾಯ ಸಂಘಲೆನ ಸದಸ್ಯೆರ್, ಪ್ರೇರಕೆರ್, ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ದ ಸಿಬ್ಬಂದಿ ವರ್ಗದಕುಲು ಸೇರಿನಂಚೆನೆ ಜಿಲ್ಲೆದ ಬೇತೆ ಬೇತೆ ತಾಲೂಕ್ ದ ಕ್ರೀಡಾಪಟುಕ್ಕುಲು ಪಾಲ್ ಪಡೆಯೆರೆ ಉಲ್ಲೆರ್.
ಪತ್ರಿಕೋದ್ಯಮಡ್ ಮಸ್ತ್ ವರ್ಷ ಸೇವೆ ಮಲ್ತೊಂದಿಪ್ಪುನ ಪೇರೂರು ಜಾರು ಮೇರ್ ಡಾ. ರಾಜ್ ಕುಮಾರ್ ಮೆರೆನ ಬಗೆಟ್ಟ್ ಬರೆತಿನ ಅಪರೂಪದ ಒಂಜಿ ಬೂಕು ಬುಡುಗಡೆ ಆತ್ಂಡ್.
ಡಾ. ರಾಜ್ ಬಗೆಟ್ಟ್ ಇಡೆ ಮುಟ್ಟ ಸುಮಾರ್ ಬೂಕು ಬೈದ್ಂಡ್. ನನಲ ಬರೊಂದೇ ಉಂಡು. ಅವು ಮಾತ ಗದ್ಯ ರೂಪಡ್ ಉಂಡು. ಆಂಡ ಪೇರೂರು ಜಾರು ಮೇರ್ ಸುಮಾರ್ ರಡ್ಡರೆ ವರ್ಷ ಡಾ. ರಾಜ್ ಕುಮಾರ್ ಬಗೆಟ್ಟ್ ಅಧ್ಯಯನ ಮಲ್ತ್ ದ್ ಆರೆನ ಜೀವನ ಬೊಕ್ಕ ಸಾಧನೆದ ಬಗೆಟ್ಟ್ ಕನ್ನಡ ಕಣ್ಮಣಿ ಡಾ. ರಾಜಕುಮಾರ್ ಪನ್ಪಿನ ಮಹಾಕಾವ್ಯನ್ ಬರೆತೆರ್.
ಬೆಂಗ್ಲೂರ್ ರ್ದ್ ಶಬರಿಮಲೆಕ್ಕ್ ಕೆಎಸ್ ಆರ್ ಟಿಸಿ ವೋಲ್ಟ್ ಬಸ್ ಸೇವೆ ಸುರು ಆತ್ಂಡ್.
ಡಿ.1 ರ್ದ್ ಈ ಬಸ್ ಸಂಚಾರ ಸುರು ಆಪುಂಡು. ಬೆಂಗ್ಲೂರ್- ನೀಲಕ್ಕಲ್ (ಪಂಪಾ, ಶಬರಿಮಲೈ) ನಡುಟ್ಟ್ ಸಂಚಾರ ಮಲ್ಪುಂಡು. ಬೆಂಗ್ಲೂರ್ ದ ಶಾಂತಿನಗರ ಬಸ್ ನಿಲ್ದಾಣರ್ದ್ ಏಪಲ ಮಧ್ಯಾಹ್ನ 1.50 ಕ್ಕ್ ಪಿದಾಡುನ ಬಸ್ ಮಾನದಾನಿ ಬೊಲ್ಪುಗು 6.45 ಕ್ಕ್ ಪಂಪಾ ಎತ್ತುಂಡು. ಅಂಚೆನೆ ಬಯ್ಯಗ್ 6 ಗಂಟೆರ್ದ್ ಪಂಪಾರ್ದ್ ಪಿದಾಡ್ ದ್ ಮಾನದಾನಿ ಬೊಲ್ಪುಗು 10 ಗಂಟೆಗ್ ಬೆಂಗ್ಲೂರ್ ಗ್ ಎತ್ತುಂಡು.
ಚಳಿತ್ತ ಸೀಸನ್ ಡ್ ನರಮಾನಿ ಕ್ಯಾರೆಟ್ ತಿಂಡ ಆರೋಗ್ಯಗ್ ಮಸ್ತ್ ಎಡ್ಡೆ.
ದಾಯೆ ಪಂಡ ಕ್ಯಾರೆಟ್ ಡ್ ಬೀಟಾ-ಕ್ಯಾರೋಟಿನ್, ವಿಟಮಿನ್-ಎ, ವಿಟಮಿನ್-ಬಿ, ವಿಟಮಿನ್-ಕೆ, ವಿಟಮಿನ್-ಸಿ ಬೊಕ್ಕ ಪೊಟ್ಯಾಸಿಯಂ ಸಮೃದ್ಧ ಆಪುಂಡು.
ಅತ್ತಂದೆ ಚರ್ಮದ ಆರೋಗ್ಯಗ್ ಸಹಾಯಕಾರಿ ಆಪುಂಡು. ಯುವಿ ಕಿರಣರ್ದ್ ಚರ್ಮಗ್ ಆಪುನ ತೊಂದರೆನ್ ತಪ್ಪಾವುಂಡು. ಬೊಕ್ಕ ಕಣ್ಣ್ ದ ದೃಷ್ಟಿನ್ ಸರಿ ಮಲ್ಪುಂಡು, ಕಣ್ಣ್ ದ ಪೊರೆ ಬೊಕ್ಕ ಬೇತೆ ಸಮಸ್ಯೆನ್ ಪರಿಹಾರ ಮಲ್ಪುಂಡು. ಅಂಚೆನೆ ಸೆಕ್ಕರೆ ಸೀಕ್ ಕಮ್ಮಿ ಮಲ್ಪುಂಡು ಅತ್ತಂದೆ, ಹೃದಯದ ಆರೋಗ್ಯನ್ ಕಾಪಾಡೊಂಡು.
ಗುಜರಾತ್ ಡ್ ಬತ್ತಿನ ತೆಡಿಲ್ ಬರ್ಸರ್ದಾವರ ಒಂಜೇ ದಿನ ತೆಡಿಲ್ ಹಾಕ್ ದ್ 27 ಜನ ತೀರ್ ಪೋಯೆರ್.
ದಾಹೋದ್, ಭರೂಜ್, ತಾಪಿ, ಅಹಮದಾಬಾದ್, ಅಮ್ರೇಲಿ, ಬನಸ್ಕಾಂತ, ಬೋಟಡ್, ಖೇಡಾ, ಮೆಹಸಾನ, ಪಂಚಮಹಲ್, ಸಬರ ಕಾಂತ, ಸೂರತ್, ಸುರೇಂದ್ರನಗರ, ದೇವಭೂಮಿ ದ್ವಾರಕಾ ಜಿಲ್ಲೆಡ್ ತೆಡಿಲ್ ಹಾಕ್ ದ್ ಜನ ತೀರ್ ಪೋಯೆರ್.
ಇಂಚೆನೆ ಸುಮಾರ್ ಜಿಲ್ಲೆಡ್ ಬರ್ಸ ಬತ್ತ್ ದ್ ಜನಜೀವನ ಹಾಳಾತ್ಂಡ್. ಅತ್ತಂದೆ ಸುಮಾರ್ ಪ್ರಮಾಣಡ್ ಬುಲೆ ನಷ್ಟ ಆತ್ಂಡ್. ರೈತೆರ್ ಕಂಗಾಲಾತೆರ್.
ರಾಜ್ಯ ಮಾನವ ಹಕ್ಕು ಆಯೋಗದ ಗುರ್ಕಾರೆಯಾದ್ ಹಿಮಾಚಲ ಪ್ರದೇಶ ಹೈಕೋರ್ಟ್ ದ ನಿವೃತ್ತ ನ್ಯಾಯಮೂರ್ತಿ ಎಲ್ ನಾರಾಯಣ ಸ್ವಾಮಿ ನೇಮಕ ಆತೆರ್.
ಮೆರೆನೊಟ್ಟಿಗೆ ನಿವೃತ್ತ ಜಿಲ್ಲಾ ನ್ಯಾಯಾಧೀಶೆರ್ ಎಸ್ ಕೆ. ವಂಟಿಗೋಡಿ ಬೊಕ್ಕ ಕೆಪಿಎಸ್ ಸಿ ಮಾಜಿ ಗುರ್ಕಾರೆ ಟಿ. ಶ್ಯಾಂ ಭಟ್ ಮೇರ್ ಆಯೋಗದ ಸದಸ್ಯೆರಾದ್ ನೇಮಕ ಆಯೆರ್. ಈ ಮೂಜಿ ಜನತ್ತ ಅಧಿಕಾರಾವಧಿ 5 ವರ್ಷ ಅತ್ತಂಡ 70 ವರ್ಷ ಪ್ರಾಯ ಆಪುನ ಮುಟ್ಟ ಇಪ್ಪುಂಡು.
ಕುಡ್ಲ: ಅತ್ತಾವರದ ಫ್ಲ್ಯಾಟ್ ಒಂಜೆಟ್ಟ್ ತೂ ಪೊತ್ತ್ ದ್ ಪೊಂಜೋವು ತೀರ್ ಪೋಯಿನ ನಡಕೆ ನಡತ್ಂಡ್.
ಸಹೈನ್ ಮುಸಾಬ್ (57) ತೀರ್ ಪೋಯಿನಾರ್ ಪಂದ್ ತೆರಿದ್ ಬೈದ್ಂಡ್. ಬೊಲ್ಪುಗು ಶಾರ್ಟ್ ಸರ್ಕ್ಯಿಟ್ ರ್ದ್ ಈ ಘಟನೆ ನಡತ್ಂಡ್. ಆ ಪೊರ್ತುಡು ಇಲ್ಲಲ್ ಇತ್ತಿನಕುಲು ಪಿದಾಯಿ ಬೈದೆರ್. ಆಂಡ ಮುಸಾಬ್ ಶೌಚಾಲಯಡ್ ಇತ್ತಿನೆರ್ದಾವರ ಪಿದಾಯಿ ಬರಿಯೆರೆ ಅವಂದೆ ಮತಿ ತತ್ತ್ ದೆರ್. ಅರೆನ್ ಕೂಡ್ಲೆ ಆಸ್ಪತ್ರೆಗ್ ಸಾಗಾದ್ ಚಿಕಿತ್ಸೆ ಕೊರ್ತೆರ್. ಆಂಡ ಚಿಕಿತ್ಸೆ ಫಲಕಾರಿ ಅವಂದೆ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.
ಅತ್ತಂದೆ ಇಲ್ಲಲ್ ಇತ್ತಿನ ಸೊತ್ತುಲು ಕರೆಂಚಿದ್ಂಡ್. ನೆರ್ದ್ ಮಸ್ತ್ ನಷ್ಟ ಆತ್ಂಡ್. ಈ ಬಗೆಟ್ಟ್ ಪಾಂಡೇಶ್ವರ ಅಗ್ನಿಶಾಮಕ ದಳತ್ತಕುಲು ಕಾರ್ಯಾಚರಣೆ ನಡಪಾದೆರ್.
ಕೈಕಂಬ: ಕರ್ನಾಟಕ ಸಂಘ ಶಾರ್ಜಾದ ಮುತಾಲಿಕೆಡ್ ನ.18 ಕ್ಕ್ ಶಾರ್ಜಾ ಈವಾನ್ ಹೋಟೆಲ್ ಡ್ ಅಟ್ಟಣೆ ಮಲ್ತಿನ ಕರ್ನಾಟಕ ರಾಜ್ಯೋತ್ಸವ, ಕರ್ನಾಟಕ ಸಂಘ ಶಾರ್ಜಾದ 21ನೇ ವರ್ಷದ ಉಚ್ಚಯ ಬೊಕ್ಕ ಮಯೂರ ವಿಶ್ವಮಾನ್ಯ ಕನ್ನಡಿಗೆ ಪ್ರಶಸ್ತಿ ಪ್ರದಾನ ಲೇಸ್ ಡ್ ಅನಿವಾಸಿ ಭಾರತೀಯೆರೆಗ್ ನಡಪುನ ರಾಷ್ಟ್ರ ಮಟ್ಟದ ದೇಹರ್ದಾಡ್ಯ ಪಂತೊಗು ಮುಖ್ಯ ತೀರ್ಪುಗಾರೆರಾದ್ ಕುಡ್ಲರ್ದ್ ಮಿಸ್ಟರ್ ಇಂಡಿಯಾ ಜಗದೀಶ್ ಪೂಜಾರಿ ಮೆರೆನ್ ಲೆತ್ತ್ ದ್ ಇತ್ತೆರ್.
ಈ ಲೇಸ್ ದ ಪೊರ್ತುಡು ಚಾವಡಿಡ್ ಪ್ರದರ್ಶನ ಕೊರ್ನ ಅನಿವಾಸಿ ಕನ್ನಡಿಗೆ ದೇಹರ್ದಾಡ್ಯ ಕಲಿಲೆನ ಅಂಗ ಸೌಷ್ಟವ್ಯಗ್ ತೀರ್ಪು ಕೊರ್ನ ಬೊಕ್ಕ ಸ್ವತಃ ಜಗದೀಶ್ ಪೂಜಾರಿ ಚಾವಡಿಡ್ ದೇಹರ್ದಾಡ್ಯದ ಪ್ರದರ್ಶನ ಕೊರಿಯೆರ್.
ಜಗದೀಶ್ ಪೂಜಾರಿ ಮೆರೆನ ಸಾಧನೆಗ್ ಕರ್ನಾಟಕ ಸಂಘ ಶಾರ್ಜಾ ವತಿರ್ದ್ ಮಯೂರ ಶ್ರೀ ಬಿರ್ದ್ ಕೊರ್ದು ಸನ್ಮಾನ ಮಲ್ತೆರ್.
ಜಗದೀಶ್ ಕರ್ನಾಟಕದ ತುಳುನಾಡ್ ದ ಕುಡ್ಲ ಅಡ್ಯಾರ್ ಪದವುದ ಲಿಂಗಪ್ಪ ಪೂಜಾರಿ ಬೊಕ್ಕ ಯಮುನಾ ಪೂಜಾರಿ ದಂಪತಿಲೆನ ಮಗೆ. ಅಂಗ ವೈಕಲ್ಯತೆ ಇತ್ತ್ಂಡಲ ಕಠಿಣ ದೈಹಿಕ ಕಸರತ್ತು ಮಲ್ತ್ ದ್ ರಾಷ್ಟ್ರದ ಗಮನ ಸೆಳೆಯಿನ ಛಲವಾದಿ. ಜಿಲ್ಲೆ, ರಾಜ್ಯ, ರಾಷ್ಟ್ರಮಟ್ಟದ ದೇಹರ್ದಾಡ್ಯ ಪಂತೊಡು ಪಾಲ್ ಪಡೆತೆರ್.
ಅತ್ತಂದೆ ಮಿಸ್ಟರ್ ಕದಂಬ, ಮಿಸ್ಟರ್ ವಜ್ರದೇಹಿ, ಕರ್ನಾಟಕ ಭೂಷಣ, ಮಿಸ್ಟರ್ ಕಾಸರಗೋಡು, ಮಿಸ್ಟರ್ ಕರಾವಳಿ, ಮಿಸ್ಟರ್ ಸರ್ವೋತ್ತಮ ಸಾಧಕ, ಮಿಸ್ಟರ್ ಸ್ವಾಭಿಮಾನ್, ಮಡಿಲು ಸನ್ಮಾನ 2019, ಬೆದ್ರ ಕ್ಲಾಸಿಕ 2022, ಕರ್ನಾಟಕ ಅಚೀವರ್ಸ್ ಬುಕ್ ಅಫ್ ರೆಕಾರ್ಡ್, ಫ್ಯೂಚರ್ ಕಲಾಂ ಯೂನಿವರ್ಸಲ್ ಬುಕ್ ಅಫ್ ರೆಕಾರ್ಡ್ಸ್ ಪ್ರಶಸ್ತಿನ್ ಪಡೆತೆರ್.
ಇತ್ತೆ ಸಹ್ಯಾದ್ರಿ ಇಂಜಿನಿಯರಿಂಗ್ ಕಾಲೇಜ್ ಡ್ ಕಲ್ಪಾರ್ಥಿಯಾದ್ ಜಿಮ್ ಟ್ರೈನರ್ ಆದ್ ಬೇಲೆ ಮಲ್ತೊಂದು ಉಲ್ಲೆರ್.
ಬೈಂದೂರು: ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಕೂಟದಕ್ಲೆರ್ದ್ ಶ್ರೀನಿವಾಸ ಕಲ್ಯಾಣೋತ್ಸವ ಆಟ ನೇತ್ರಾವತಿ ಬೊಕ್ಕ ದಿವಾಕರ ಶೆಟ್ಟಿ ನೆಲ್ಯಾಡಿ ಸ್ವಗೃಹದ ವಠಾರಡ್ ಡಿ.1 ಸುಕ್ರಾರ ಬಯ್ಯಗ್ 7 ಗಂಟೆಗ್ ನಡಪರೆ ಉಂಡು.
ದಿವಾಕರ ಶೆಟ್ಟಿ ನೆಲ್ಯಾಡಿ ಮೇರ್ ಪಾತೆರ್ದ್, ಯಕ್ಷಗಾನನ್ ಪ್ರೋತ್ಸಾಹ ಮಲ್ಪುನ ಉದ್ದೇಶರ್ದ್ ಪ್ರತಿ ವರ್ಷಲ ಒಂಜೊಂಜಿ ಯಕ್ಷಗಾನನ್ ಆಯೋಜನೆ ಮಲ್ತೊಂದು ಬೈದ. ಅಂಚೆನೆ ಈ ವರ್ಷಲ ಸ್ವಗೃಹಡ್ ಬಯ್ಯಗ್ ನಡಪುನ ಸತ್ಯನಾರಾಯಣ ಪೂಜೆ ರಾತ್ರೆ ನಡಪುನ ನುಪ್ಪು ಪ್ರಸಾದ ಸೇವೆ ಬೊಕ್ಕ ಯಕ್ಷಗಾನ ಬಯಲಾಟಗ್ ಮಾತೆರ್ಲಾ ಬರೊಡು ಪಂದ್ ಪಂಡೆರ್.
ಈ ಪೊರ್ತುಡು ಕುಟುಂಬಸ್ಥೆರ್, ಆಟದ ಅಭಿಮಾನಿಲು, ಊರುದ ಗ್ರಾಮಸ್ಥೆರ್ ಪಾಲ್ ಪಡೆಯೆರೆ ಉಲ್ಲೆರ್.
