Times of kudla

ದಿ.ಚಂದ್ರಾವತಿ ಸೋಮಪ್ಪ ಸುವರ್ಣ ಮೆರೆನ 10ನೇ ವರ್ಷದ ನೆಂಪು ಲೇಸ್

ದಿ.ಚಂದ್ರಾವತಿ ಸೋಮಪ್ಪ ಸುವರ್ಣ ಮೆರೆನ 10ನೇ ವರ್ಷದ ನೆಂಪು ಲೇಸ್ ಇಂಚೊಗು ನಡತ್‌ಂಡ್.

ಈ ಪೊರ್ತುಡು ವಿಕಲಚೇತನ ಜೋಕ್ಲೆನ ಸಾಲೆದ ಜೋಕುಲೆಗ್ ಇಸೇಸ ವನಸ್ ದ ವ್ಯವಸ್ಥೆ ಅಂಚೆನೆ
ತುಡರ್ ಪರ್ಬದ ಲೆಕ್ಕೊಡು ಚೀಪೆ ತಿಂಡಿಲೆನ್ ಡಾ.ಪ್ರಕಾಶ್ ಕುಮಾರ್ ಬೆದ್ರ ಬೊಕ್ಕ ಯಶೋಧರ ಪ್ರಕಾಶ್ ದಂಪತಿಲು ಪಟ್ಟಿಯೆರ್.

ಈ ಪೊರ್ತುಡು “ಬದಲಾಗದವರು ಜೀವನದಲ್ಲಿ ಬದಲಾಗುವರೇ” ಪನ್ಪುನ ಕನ್ನಡ ಪಿಕ್ಚರ್ ದ ನಿರ್ಮಾಪಕೆರ್, ನಟೆ ಬೊಕ್ಕ ಭಾರತ್ ಬ್ಯಾಂಕ್ ನಿವೃತ್ತ ಮ್ಯಾನೇಜರ್ ಡಾ.ಸತೀಶ್ ಬಂಗೇರ, ಹೆಜಮಾಡಿಕೋಡಿ, ಮಾಜಿ ಅಧ್ಯಕ್ಷೆರ್ ವಿಶಾಲಾಕ್ಷಿ ಪುತ್ರನ್, ವಿಜಯ ಪೂಜಾರಿ, ಪುತ್ತಿಗೆ ಬೆದ್ರ ಮಾಜಿ ಗ್ರಾಮ ಪಂಚಾಯತ್ ಸದಸ್ಯೆರ್ ಶಶಿಧರ್ ಎಸ್ ಅಂಚನ್, ಪ್ರಭಾಕರ್ ಬೆಳುವಾಯಿ ಇತ್ತೆರ್.

ಬೊಲ್ತೇರ್: ಜ್ವರಟ್ಟ್ ತೀರ್ ಪೋಯಿನ ಒಂಜೇ ಇಲ್ಲದ ರಡ್ಡ್ ಜೋಕುಲು

ಬೊಲ್ತೇರ್: ಜ್ವರ ಬತ್ತ್ ದಿತ್ತಿನ ಒಂಜೇ ಇಲ್ಲದ ಜೋಕುಲು ರಡ್ಡ್ ಜನ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯಿನ ಘಟನೆ ಬೊಲ್ತೇರ್ ದ ಮದ್ದಡ್ಕದ ಲಾಡಿಡ್ ನಡತ್ಂಡ್.

ಲಾಡಿದ ನಿವಾಸಿ ಅಬ್ಬಾಸ್ ಮೇರೆನ ಜೋಕುಲು ಸಫ್ವಾನ್ ( 8 ) ಬೊಕ್ಕ ಸಿನಾನ್ ( 4 ) ತೀರ್ ಪೋತೆರ್.ಸಫ್ವಾನ್ ಬೊಕ್ಕ ಸಿನಾನ್ ಕೆಲವು ದಿನೊರ್ದಿಂಚಿ ಜ್ವರ ಇತ್ತ್ಂಡ್. ಕೈತಲ್ ದ ವೈದ್ಯೆರೆಡ ಚಿಕಿತ್ಸೆ ದೆತೊಂಡಲ ಜೋಕುಲೆನ ಜ್ವರ ಕಮ್ಮಿ ಆಯಿಜಿ. ಕೂಡ್ಲೆ ಕುಡ್ಲ ಆಸ್ಪತ್ರೆಗ್ ದಾಖಲ್ ಮಲ್ತೆರ್. ಆಂಡ ಚಿಕಿತ್ಸೆಗ್ ಸ್ಪಂದನೆ ಮಲ್ಪದೆ ಒರಿ ಆನ್ ಕೋಡೆ ರಾತ್ರೆ ನನೊರಿ ಆನ್ ಇನಿ ತೀರ್ ಪೋಯೆರ್. ಇಲ್ಲದ ರಡ್ಡ್ ಜೋಕುಲೆನ್ಲಾ ಕಲೆವೊನ್ನ ಕುಟುಂಬದಕುಲೆನ ದುಃಖ ತಡೆವೊನೆರೆ ಆಪುಜಿ.

ಬಿಜೆಪಿ ಕುಡ್ಲ ಪೇಂಟೆದ ದಕ್ಷಿಣ ಮಂಡಲದ ವತಿರ್ದ್ ತುಡರ್ ಪರ್ಬ

ಪ್ರಧಾನಿ ನರೇಂದ್ರ ಮೋದಿ ಪಂಡಿನಂಚನೆ ಬಿಜೆಪಿ ಕುಡ್ಲ ಪೇಂಟೆದ ದಕ್ಷಿಣ ಮಂಡಲದ ವತಿರ್ದ್ ಈ ಸರ್ತಿ ತುಡರ್ ಪರ್ಬನ್ ಆಚರಣೆ ಮಲ್ತೆರ್.

ಭಾರತೀಯ ಸೇನೆಡ್ 13 ವರ್ಷ ಸೇವೆ ಮಲ್ತ್ ದ್, ಇತ್ತೆ ನಿವೃತ್ತೆರಾಯಿನ ಪಡೀಲ್ ವೀರನಗರ ನಿವಾಸಿ ಮೇಜರ್ ವಿಜಯಚಂದ್ರ ಮೇರೆಗ್ ತಮ್ಮನ ಮಲ್ತ್ ದ್, ಮೇರೆನ ಕುಟುಂಬದ ಸದಸ್ಯೆರ್ ನೊಟ್ಟಿಗೆ ಮೇರೆನ ಇಲ್ಲಲ್ ಶಾಸಕೆರ್ ವೇದವ್ಯಾಸ್ ಕಾಮತ್ ಬೊಕ್ಕ ಮಂಡಲ ಅಧ್ಯಕ್ಷೆರ್ ವಿಜಯ್ ಕುಮಾರ್ ಶೆಟ್ಟಿ ನ ಮುತಾಲಿಕೆಡ್ ಬಿಜೆಪಿ ಕಾರ್ಯಕರ್ತೆರ್ ತುಡರ್ ಪರ್ಬ ಆಚರಣೆ ಮಲ್ತೆರ್. ಈ ಪೊರ್ತುಡು ಪಾತೆರಿನ ಶಾಸಕೆರ್ ಕಾಮತ್, ಮೋದಿಜೀ ಪನ್ನ ಪಾತೆರದಂಚನೆ ಕರಿನ ರಡ್ಡ್ ವರ್ಷೊರ್ದಿಂಚ ಬಿಜೆಪಿ ಕಾರ್ಯಕರ್ತೆರ್ ಗಡಿಟ್ ಸೇವೆ ಸಂದಾವೊಂದು ಇಪ್ಪುನ ಯೋಧರೆನ ಕುಟುಂಬದೊಟ್ಟಿಗೆ ತುಡರ್ ಪರ್ಬನ್ ಆಚರಣೆ ಮಲ್ತೊಂದು ಉಲ್ಲೆರ್. ಇಲ್ಲದ ಜೋಕುಲೆನ್ ದೇಶ ಸೇವೆಗಾದ್ ಕಡಪಾಯಿನ ಆ ಕುಟುಂಬದೊಟ್ಟಿಗೆ ಇಲ್ಲದ ಜೋಕುಲಾದ್ ಪರ್ಬನ್ ಪೊರ್ಲುಡು ಮಲ್ತೊಂದು ಉಲ್ಲ. ದೇಶದ ಭದ್ರತೆಗಾದ್ ತನ್ನ ಸರ್ವೊನ್ಲ ಬುಡ್ದು ಪೋಪಿನ ಯೋಧರೆನ್ ಗೌರವಿಸುನ ನಿಲೆಟ್ ಸ್ವತಃ ಪ್ರಧಾನಿ ನರೇಂದ್ರ ಮೋದಿ ಗಡಿಟ್ ಯೋಧೆರೆನ ಒಟ್ಟಿಗೆ ತುಡರ್ ಪರ್ಬ ಆಚರಣೆ ಮಲ್ಪುವೆರ್. ರಾಷ್ಟ್ರ ರಕ್ಷಣೆಗಾದ್ ತನ್ನನ್ ತಾನೇ
ಅರ್ಪಣೆ ಮಲ್ತಿನ ಯೋಧರೆನ ಕುಟುಂಬದೊಟ್ಟಿಗೆ ಸೇರ್ದ್ ಪರ್ಬನ್ ಆಚರಣೆ ಮಲ್ಪುನ ಒಟ್ಟಿಗೆ ಸೈನಿಕೆರೆನ ಆತ್ಮಸ್ಥೈರ್ಯ ಹೆಚ್ಚ ಮಲ್ಪುನ ಕಾರ್ಯ ಎಂಕ್ಲೆರ್ದ್ ಆವೊಂದು ಉಂಡು ಪಂಡ್ ಪಂಡೆರ್.
ಬಿಜೆಪಿ ಕುಡ್ಲ ಪೇಂಟೆದ ದಕ್ಷಿಣ ಮಂಡಲ ಅಧ್ಯಕ್ಷೆರ್ ವಿಜಯ್ ಕುಮಾರ್ ಶೆಟ್ಟಿ ಪಾತೆರ್ದ್, ಕರಿನ 13 ವರ್ಷೊರ್ದಿಂಚ ದೇಶ ಸೇವೆ ಮಲ್ತ್ ದ್ ಇತ್ತೆ ನಿವೃತ್ತೆರಾಯಿನ ಮೇಜರ್ ವಿಜಯಚಂದ್ರ ಮೇರ್ ಕುಟುಂಬದ ಒಟ್ಟಿಗೆ ಮಂಡಲದ ಪ್ರಮುಖೆರ್ ಬೊಕ್ಕ ಕಾರ್ಯಕರ್ತೆರ್ ತುಡರ್ ಪರ್ಬ ಆಚರಣೆ ಮಲ್ಪುನ ಒಟ್ಟಿಗೆ ಸೈನಿಕೆರೆನೊಟ್ಟಿಗೆ, ಮೇರೆನ ಕುಟುಂಬದೊಟ್ಟಿಗೆ ಪರ್ಬನ್ ಆಚರಣೆ ಮಲ್ಪುನವು ಪರ್ಬದ ಪೊರ್ಲುನ್ ಹೆಚ್ಚ ಮಲ್ದ್ಂಡ್ ಪಂದ್ ಪಂಡೆರ್.
ಈ ಪೊರ್ತುಡು ಮಂಡಲ ಪ್ರಧಾನ ಕಾರ್ಯದರ್ಶಿ ರೂಪ ಡಿ ಬಂಗೇರ, ಉಪಾಧ್ಯಕ್ಷೆರ್ ರಮೇಶ್ ಹೆಗ್ಡೆ, ಕೈತಲ್ ದ ಕಾರ್ಪೋರೇಟರ್ ಚಂದ್ರಾವತಿ ವಿಶ್ವನಾಥ್, ಪಾಲಿಕೆ ನಾಮ ನಿರ್ದೇಶಿತ ಸದಸ್ಯೆರ್ ಭಾಸ್ಕರಚಂದ್ರ ಶೆಟ್ಟಿ, ಮಂಡಲ ಸಮಿತಿ ಸದಸ್ಯೆರ್ ಮೋಹನ್ ಪೂಜಾರಿ, ಮಂಡಲ ಸಾಮಾಜಿಕ ಜಾಲತಾಣ ಸಂಚಾಲಕೆರ್ ನಿಲೇಶ್ ಕಾಮತ, ಸಹ ಸಂಚಾಲಕೆರ್ ಅಶ್ವಿತ್ ಕೊಟ್ಟಾರಿ, ಪ್ರಮುಖೆರ್ ಶಬರೀಶ್, ಶಕ್ತಿ ಕೇಂದ್ರದ ಪ್ರಮುಖೆರ್ ಗೀತಾನಂದ್ ಶೆಟ್ಟಿ, ಬೂತ್ ಅಧ್ಯಕ್ಷೆರ್ ಸಂದೀಪ್ ಶೆಟ್ಟಿ, ಒಬಿಸಿ ಮೋರ್ಚಾ ಸದಸ್ಯೆರ್ ಯಶವಂತ್ ಅಮೀನ್ ಬೊಕ್ಕ ಕಣ್ಣೂರ್ ವಾರ್ಡ್‌ ದ ಕಾರ್ಯಕರ್ತೆರ್ ಇತ್ತೆರ್.

ಮುಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರಾದ್ ಪತ್ರಕರ್ತೆರ್ ಪ್ರಕಾಶ್ ಸುವರ್ಣ ಆಯ್ಕೆ

ಮುಲ್ಕಿ: ದ.ಕ. ಜಿಲ್ಲಾ ಪ್ರಶಸ್ತಿ ಪಡೆದಿನ ಬಿಲ್ಲವ ಸಮಾಜ ಸೇವಾ ಸಂಘ (ರಿ) ಮುಲ್ಕಿ ನೆತ್ತ 2022-24 ನೇ ಸಾಲ್ ದ ಅಧ್ಯಕ್ಷೆರಾದ್ ಪತ್ರಕರ್ತೆರ್ ಪ್ರಕಾಶ್ ಸುವರ್ಣ (ವಿಕ್ಕಿ) ಆಯ್ಕೆ ಆತೆರ್.

1987 ನೇ ಇಸ್ವಿಡ್ ಡ್ ವಿಕ್ಕಿ ವಿಡಿಯೋ ಸಂಸ್ಥೆ ಸುರು ಮಲ್ತ್ ದ್ ಬೊಕ್ಕ ಕೇಬಲ್ ಬಿಸಿನೆಸ್ ಸುರು ಮಲ್ದಿನ ಮೇರ್ ಇತ್ತೆ ಕನ್ನಡ ಪ್ರಭ ಪತ್ರಿಕೆದ ಮುಲ್ಕಿ ತಾಲೂಕು ವರದಿಗಾರೆರಾದ್ ಸೇವೆ ಮಲ್ತೊಂದುಲ್ಲೆರ್. ನೆರ್ದ್ ದುಂಬು ಆರ್ ಮುಲ್ಕಿ ಬಿಲ್ಲವ ಸಂಘದ ಕೋಶಾಧಿಕಾರಿ ಆದಿತ್ತೆರ್.
ಅವ್ವತ್ತಾಂದೆ ಮುಲ್ಕಿ ತಾಲೂಕು ಕಾರ್ಯನಿರತ ಪತ್ರಕರ್ತೆರೆನ ಪ್ರಧಾನ ಕಾರ್ಯದರ್ಶಿ ಆದ್, ಕೊಳಚಿ ಕಂಬುಲ ಜಾರಂದಾಯ ದೇವಲ್ಯದ ಅಧ್ಯಕ್ಷೆರಾದ್ ಸೇವೆ ಮಲ್ತೊಂದುಲ್ಲೆರ್.
ನೆರ್ದ್ ದುಂಬು ಮುಲ್ಕಿ ಲಯನ್ಸ್ ಕ್ಲಬ್, ಲಯನ್ಸ್ ವಲಯಾಧ್ಯಕ್ಷೆರ್, ಮುಲ್ಕಿ ಶಾಂಭವಿ ಜೇಸಿ ಅಧ್ಯಕ್ಷೆರಾದ್, ಮಾನಿಷ್ ಕ್ರಿಕೆಟ್ ಕ್ಲಬ್ ಅಧ್ಯಕ್ಷೆರಾದ್,ಮುಲ್ಕಿ ವಲಯ ಪತ್ರಕರ್ತೆರೆ ಸಂಘದ ಅಧ್ಯಕ್ಷೆರಾದ್ ಸೇವೆ ಮಲ್ದೆರ್.
ಮುಲ್ಕಿ ಬಿಲ್ಲವ ಸಂಘದ ಉಪಾಧ್ಯಕ್ಷೆರಾದ್ ಶಶೀಂದ್ರ ಎಂ. ಸಾಲ್ಯಾನ್ ಬೊಕ್ಕ ನರೇಂದ್ರ ಕೆರೆಕಾಡು,ಪ್ರಧಾನ ಕಾರ್ಯದರ್ಶಿಯಾದ್ ಜಯಕುಮಾರ್ ಕುಬೆವೂರು, ಜತೆ ಕಾರ್ಯದರ್ಶಿಲಾದ್ ವಾಮನ ಕೋಟ್ಯಾನ್ ನಡಿಕುದ್ರು ಬೊಕ್ಕ ಜಯ ಸಿ. ಪೂಜಾರಿ ಮಾನಂಪಾಡಿ ಆಯ್ಕೆ ಆತೆರ್. ಕೋಶಾಧಿಕಾರಿಲಾದ್ ಕಮಲಾಕ್ಷ ಬಡಗುಹಿತ್ಲು
ಸಹ ಕೋಶಾಧಿಕಾರಿಯಾದ್ ಇಂದಿರಾ ಸಿ. ಅಮೀನ್ ಆಯ್ಕೆ ಆತೆರ್.

ವಾಟ್ಸ್ಯಾಪ್ ಸರ್ವರ್ ಡೌನ್

ದಿಲ್ಲಿ : ಭಾರತ ಸೇರ್ದ್ ಜಗತ್ತ್ ದ ಸುಮಾರ್ ಕಡೆಟ್ ವಾಟ್ಸ್ ಆ್ಯಪ್ ದ ಸರ್ವರ್ ಡೌನ್ ಆತ್ಂಡ್.

ನೇರ್ದಾವೆರ ಮೆಸೇಜ್ ಮಲ್ಪರೆ ಗಲಸುನಕುಲು ಬಂಗ ಬತ್ತೆರ್. ಮಧ್ಯಾಹ್ನ 12.30 ರ್ದ್ ಈ ಸಮಸ್ಯೆ ಸುರು ಆತ್ಂಡ್. ಭಾರತಡ್ ಶೇ.69ದಾತ್ ಜನಕುಲು ಈ ವಾಟ್ಸ್ ಆ್ಯಪ್ ಡೌನ್ ಬಗೆಟ್ ದೂರುದೆರ್. ಆಂಡ ಈ ಬಗೆಟ್ ವಾಟ್ಸ್ ಆ್ಯಪ್ ಒವ್ವೇ ಪ್ರತಿಕ್ರಿಯೆ ಕೊರ್ತಿಜಿ.

ಎಐಸಿಸಿ ಅಧ್ಯಕ್ಷೆರಾದ್ ಮಲ್ಲಿಕಾರ್ಜುನ ಖರ್ಗೆ ಎಲ್ಲೆ ಅಧಿಕಾರ ದೆತೊನರೆ

ದಿಲ್ಲಿ: ಕಾಂಗ್ರೆಸ್ ಅಧ್ಯಕ್ಷೆರ್ನ ಜಾಗೆಗ್ ನಡತಿನ ವೋಟುಡು ಆಯ್ಕೆ ಆಯಿನ ಹಿರಿಯ ನಾಯಕೆರ್ ಮಲ್ಲಿಕಾರ್ಜುನ ಖರ್ಗೆ ಎಲ್ಲೆ ಅಧಿಕಾರ ಸ್ವೀಕಾರ ಮಲ್ಪೆರೆ ಉಲ್ಲೆರ್.

ಮಾಜಿ ಮುಖ್ಯಮಂತ್ರಿ ಸಿದ್ಧರಾಮಯ್ಯ ಸೇರ್ದ್ ಸುಮಾರ್ ಕಾಂಗ್ರೆಸ್ ನಾಯಕೆರ್ ಲೇಸ್ ಡ್ ಪಾಲ್ ಪಡೆವರೆ ಉಲ್ಲೆರ್. ಉಂದುವೇ ಸುರುತ ಸರ್ತಿ ಗಾಂಧಿ ಪರಿವಾರ ಅತ್ತಂದಿನ ನಾಯಕೆರ್ ಒರಿ ಕಾಂಗ್ರೆಸ್ ಅಧ್ಯಕ್ಷೆರಾದ್ ಅಧಿಕಾರ ದೆತೊನೊಂದುಲ್ಲೆರ್.

ಉಬಾರ್ : ಪರ್ತಿನ ಅಮಲ್ ಡ್ ಬಸ್ ಕ್ ಕಲ್ಲ್ ದಕ್ಕ್ ದ್ ಗ್ಲಾಸ್ ಪೊಡಿ ಮಲ್ತಿನ ಕೂಲಿ ಬೇಲೆದಾಯೆ

ಉಬಾರ್ : ಪರ್ತಿನ ಅಮಲ್ ಡ್ ಇತ್ತಿನ ಪ್ರಯಾಣಿಕೆ ಒರಿ ತಾನ್ ಎನ್ನಿನ ಜಾಗೆಗ್ ಕೆಎಸ್‌ಆರ್‌ಟಿಸಿ ಬಸ್ಸ್ ನ್ ಉಂತಾಯಿಜೆರ್ ಪನ್ಪುನ ಕಾರಣಗ್ ಬೆಚ್ಚ ಆದ್ ಬಸ್ ತ ಗ್ಲಾಸ್ ಗ್ ಕಲ್ಲ್ ದಕ್ ದ್ ಪೊಡಿ ಮಲ್ತಿನ ಘಟನೆ ಅ. 24 ದಾನಿ ಉಬಾರ್ ಡ್ ನಡತ್ಂಡ್.

ರಾಜ್ಯ ಮಾರ್ಗದ ವಿಸ್ತರಣೆ ಕಾಮಗಾರಿಡ್ ಕೆಲಸ ಮಲ್ತೊಂದಿತ್ತಿನ ಕೂಲಿ ಕಾರ್ಮಿಕೆ ಒರಿ ಕಲ್ಲ್ ದಕ್ ದಿನಾಯೆ ಪಂದ್ ತೆರಿದ್ ಬೈದ್ಂಡ್. ಕಲ್ಲ್ ದಕ್ಕಿನ ಆರೋಪಿನ್ ಪೋಲಿಸ್ ಗ್ ಕೊರ್ತೆರ್.

“ಕಾಂತಾರ” ರಾಜ್ಯಡ್ ಮಸ್ತ್ ಜನ ತೂಯಿನ ಪಿಕ್ಚರ್ ಪನ್ಪಿನ ದಾಖಲೆ

ಸಿನಿಮಾ ಲೋಕೊಡು ಪೊಸ ಟ್ರೆಂಡದ ಪುಟ್ಟಾಯಿನ ಪಿಕ್ಚರ್ ಕಾಂತಾರ. ಹೊಂಬಾಳೆ ಫಿಲಮ್ಸ್ ನಿರ್ಮಾಣದ ಕಾಂತಾರ ಪೊಸ ಪೊಸ ದಾಖಲೆನ್ ಮಲ್ತೊಂದು ಉಂಡು.

ಪಿಕ್ಚರ್ ಬುಡುಗಡೆ ಆದ್ 25 ನೇ ದಿನಕ್ ರಾಜ್ಯಡ್ 77 ಲಕ್ಷ ಜನ ತೂತೆರ್. ಉಂದು ಕರ್ನಾಟಕಡ್ ಮಸ್ತ್ ಜನ ತೂಯಿನ ಕನ್ನಡ ಪಿಕ್ಚರ್ ಪನ್ಪುನ ದಾಖಲೆ ಆತ್ಂಡ್. ನಟೆ ರಿಷಬ್ ಶೆಟ್ಟಿ, ನಿರ್ದೇಶಕೆರಾದ್ ಕಾಂತಾರನ್ ನಿರ್ದೇಶನ ಮಲ್ದೆರ್. ಉಂದೆಕ್ಕ್ ಭಾರತ ಮಾತ್ರ ಅತ್ತಂದೆ ಪಿದಯಿ ದೇಸೊಡ್ಲಾ ಎಡ್ಡೆ ಅಭಿಪ್ರಾಯ ಬೈದ್ಂಡ್.

ಶಿವಮೊಗ್ಗ : ದಿ.ಹರ್ಷನ ಕುಟುಂಬದ ಸದಸ್ಯೆರೆಗ್ ಕೊಲೆ ಬೆದರಿಕೆ

ಶಿವಮೊಗ್ಗ: ಗಾಡಿ ಲಗಾಡಿ ಮಲ್ತಿನ ಆರೋಪದ ಮಿತ್ತ್ ದಿ. ಹರ್ಷನ ಪಲಿ ಅಶ್ವಿನಿ ಸೇರ್ದ್ ಕೆಲವೆರೆನ ವಿರುದ್ಧ ಕೇಸ್ ದಾಖಲ್ ಆಯಿನ ಪೊರ್ತುಡೇ, ಬಚ್ಚಾಲಿಲು ಜೂವ ಬೆದರಿಕೆ ಪಾಡ್ದೆರ್, ಎಂಕಲೆಗ್ ರಕ್ಷಣೆ ಬೋಡು ಪಂದ್ ಹರ್ಷನ ಪಲಿ ಅಶ್ವಿನಿ ದೂರು ಕೊರ್ನ ಘಟನೆ ನಡತ್ಂಡ್.

ರಾತ್ರೆ 11:15 ತ್ತ ಪೊರ್ತುಡು 2 ಬೈಕ್ ಡ್ 6 ಜನ ಜವನೆರ್ ತಲ್ವಾರ್ ಪತೊಂದು, ಹರ್ಷನ್ ದೆತ್ತಿನ ಯಾವಂದಾ, ನಿಕಲೆನ್ಲಾ ದೆಪ್ಪೊಡ? ನಿಕಲೆನ್ಲಾ ಪೊಕ್ಕಡೆ ಬುಡುಪುಜ ಪಂದ್ ಬೆದರಿಕೆ ಪಾಡ್ದೆರ್, ಬೊಕ್ಕ ಕಲ್ಲ್ ದಕ್ಕಿನೆರ್ದಾವರ ಪ್ರಕಾಶ್ (25) ಮೇರೆಗ್ ಪೆಟ್ಟಾತ್ಂಡ್. ಮೇರೆನ್ ಮೆಗ್ಗಾನ್ ಆಸ್ಪತ್ರೆಗ್ ದಾಖಲ್ ಮಲ್ತ್ ದ್ ಚಿಕಿತ್ಸೆ ಕೊರೊಂದು ಉಂಡು. ಈ ಘಟನೆದ ಬಗೆಟ್ ಜಾಗೆಗ್ ಬತ್ತಿನ ಎಸ್ ಪಿ ಮಿಥುನ್ ಕುಮಾರ್ ತನಿಖೆ ಸುರು ಮಲ್ದೆರ್.

ಹಿಂದು ಜಾಗರಣ ವೇದಿಕೆ ಕಡೇಶಿವಾಲಯ, ಶ್ರೀರಾಮ ಭಜನಾ ಮಂದಿರ ಪ್ರತಾಪನಗರ ಒಟ್ಟು ಸೇರಿಗೆಡ್ ತುಡರ್ ಪರ್ಬದ ಕ್ರೀಡಾಕೂಟ ಪಂತೊ

ಹಿಂದು ಜಾಗರಣ ವೇದಿಕೆ ಕಡೇಶಿವಾಲಯ ಶ್ರೀರಾಮ ಭಜನಾ ಮಂದಿರ ಪ್ರತಾಪನಗರದ ಒಟ್ಟು ಸೇರಿಗೆಡ್ ತುಡರ್ ಪರ್ಬದ ಕ್ರೀಡಾಕೂಟ ಪಂತೊ ಅ.23 ಐತಾರದಾನಿ ಶ್ರೀರಾಮ ಭಜನಾ ಮಂದಿರ ಪ್ರತಾಪನಗರ ಕಡೇಶಿವಾಲಯಡ್ ನಡತ್ಂಡ್.

ಮಂದಿರದ ಹಿರಿಯ ಕಾರ್ಯಕರ್ತೆರ್ ಶಂಕರ ಶೆಟ್ಟಿಗಾರ್ ತುಡರ್ ಅರ್ಲಾವುನ ಮುಖೇನ ಲೇಸ್ ನ್ ಉದಿಪನ ಮಲ್ತೆರ್. ಅಯಿರ್ದ್ ಬೊಕ್ಕ ಬಲ್ಲ್ ಒಯಿಪುನ ಗೊಬ್ಬು, ಲಗೋರಿ, ಖೋ ಖೋ ಗೊಬ್ಬುಲೆದ ಪಂತೊ ಬೊಕ್ಕ ಬಯ್ಯಗ್ ಧಾರ್ಮಿಕ ಸಭಾ ಕಾರ್ಯಕ್ರಮ ನಡತ್ಂಡ್. ಈ ಸಭೆಟ್ ಧಾರ್ಮಿಕ ಭಾಷಣಕಾರೆ ಪ್ರಥ್ವೀಶ ಧರ್ಮಸ್ಥಳ ಪಾತೆರ್ದ್, ಸಂಘಟನೆದ ಕಾರಣರ್ದ್ ಇನಿ ಸಮಾಜ ಒಂಜಾವೊಂಡಾತ್ಂಡ್. ಲವ್ ಜಿಹಾದ್, ನಕ್ಸಲ್, ಮತಾಂತರ ಈ ರೀತಿದ ಮಾತಾ ಸಮಸ್ಯೆಲೆನ್ ಇನಿ ಹಿಂದೂ ಸಮಾಜ ಎದುರಿಸಾವೊಂದು ಉಂಡು. ನಮ ಮುಖ್ಯವಾದ್ ಸಜ್ಜನ ಶಕ್ತಿದ ನಿರ್ಮಾಣ ಆವೊಡು, ಸಜ್ಜನ ಶಕ್ತಿದ ಮುಖೇನ ಸಮಾಜದ ಮಾತಾ ಕೆಡುಕುಲೆನ್ ನಿವಾರಣೆ ಮಲ್ತ್ ದ್, ಸಾಮಾಜಿಕ ಸಮಾನತೆನ್ ನಮ ತೂವೊಡು ಪನ್ಪುನ ಪಾತೆರೊನು ಪಂಡೆರ್. 

ಈ ಪೊರ್ತುಡು ಪಂತೊಡು ಗೆಂದಿನಕ್ಲೆಗ್ ಹಿಂದೂ ಜಾಗರಣ ವೇದಿಕೆದ ಪ್ರಮುಖ್ ಮನೋಜ್ ಪೆರ್ನೆ ಇನಾಮುನ್ ಪಟ್ಟಿಯೆರ್. ಯೋಧೆರ್ ಪ್ರಶಾಂತ್ ಶೆಟ್ಟಿ ತೋಟ ಬುಕ್ಕ ಸಂಘಟನೆಲೆದ ಮಾತಾ ಸದಸ್ಯೆರ್, ಗ್ರಾಮಸ್ದೆರ್ ಪಾಲ್ ಪಡೆದಿತ್ತೆರ್.
ಗೂಡು ದೀಪ ಪಂತೊಗು ಉಂದುವೇ ತೇದಿ 30 ಗ್ ಮುಗಿತಲ ನಡಪರೆ ಉಂಡು. ಈ ಪಂತೊಡು ಪಾಲ್ ಪಡೆಪಿನಕುಲು ಇಲ್ಲಡ್ ಮಲ್ತಿನ ಗೂಡುದೀಪನ್ ಸಂಘಟಕೆರೆಗ್ ಕಡಪುಡಾದ್ ಕೊರ್ಪಿನ ವ್ಯವಸ್ಥೆ ಮನ್ಪೊಡು ಪಂದ್ ಅಕುಲು ತೆರಿಪಾದೆರ್.