ಬೊಂಬೈ: ಪಟಾಕಿ ಗೋದಾಮುಡ್ ತೂ ಪೊತ್ತ್ ದ್, 6 ಕಾರ್, 7 ಬೈಕ್‌ ಸೇರ್ದ್ 14 ಗಾಡಿಲು ಕರೆಂಚಿನ ಘಟನೆ ಬೊಂಬೈದ ಗಿರ್ಗಾಂವ್‌ಡ್ ನಡತ್ಂಡ್.
ಗೋದಾಮುದ ಪಿದಯಿ ಈ ಗಾಡಿಲೆನ್ ಉಂತಾದಿತ್ತೆರ್. ಜಾಗೆಗ್ ಅಗ್ನಿಶಾಮಕ ದಳದ ಸಿಬ್ಬಂದಿ ಬತ್ತ್ ದ್, ಟ್ಯಾಂಕರ್‌ ಡ್ ನೀರ್ ಪಾಡ್ದ್ ತೂ ಕಮ್ಮಿ ಮಲ್ದೆರ್. ಸುಮಾರ್ ವರ್ಷೋರ್ದಿಂಚ ಈ ಗೋದಾಮು ಮುಚ್ಚಿದ್ ಇತ್ಂಡ್, ಈ ಬಗೆಟ್ ತನಿಖೆ ನಡಪರೆ ಉಂಡು.
ಹೈದರಾಬಾದ್: ಮೂಜಿನೇ ಕ್ಲಾಸ್ ದ ಕೌಶಿಕ್(9) ಪನ್ಪಿನ ಆಣ್ ಬಾಲೆ ಶಾಲೆಡ್ ವನಸ್ ದ ಪೊರ್ತುಡು ತಿಗಲೆ ಬೇನೆ ಆದ್ ತೀರ್ ಪೋಯಿನ ಘಟನೆ ರಾಜಣ್ಣ ಸಿರ್ಸಿಲ್ಲಾ ಜಿಲ್ಲೆದ ಬೊಯ್ನಪಲ್ಲಿ ಮಂಡಲದ ವೆಂಕಟರಾವ್ಪಲ್ಲಿ ಗ್ರಾಮಡ್ ನಡತ್ಂಡ್.
ಏಪಲದಲೆಕ್ಕನೇ ಬೊಲ್ಪುಗು ಶಾಲೆಗ್ ಬತ್ತ್ ಇತ್ತಿನ ಮೇರ್ ಶಾಲೆಡ್ ಮಧ್ಯಾಹ್ನ ಮುಟ್ಟ ಪಾಠ ಕೇನ್ದೆರ್. ಮಧ್ಯಾಹ್ನ ವನಸ್ ಗ್ ದೋಸ್ತಿಲೆನೊಟ್ಟಿಗೆ ಸಾಲ್ ಡ್ ಉಂತುದು ಇಪ್ಪುನ ಪೊರ್ತುಡು ಈ ಘಟನೆ ನಡತ್ಂಡ್. ನೆನ್ ತೂಯಿನ ಬೇತೆ ಜೋಕುಲು ಕೂಡ್ಲೆ ಶಿಕ್ಷಕೆರೆಗ್ ತೆರಿಪಾದೆರ್. ಶಿಕ್ಷಕೆರ್ ವಿದ್ಯಾರ್ಥಿನ್ ವೈದ್ಯೆರೆನ ಕೈತಡೆ ಲೆತೊಂದು ಪೋತೆರ್. ಅಲ್ತ್ ರ್ದ್ ಮಲ್ಲ ಆಸ್ಪತ್ರೆಗ್ ಲೆತೊಂದು ಪೋಯೆರೆ ಪನ್ತೆರ್. ಬೊಕ್ಕ ಕರೀಂ ಪೇಂಟೆದ ಆಸ್ಪತ್ರೆಗ್ ಲೆತೊಂದು ಪೋನಗ, ತಾದಿ ನಡುಟ್ ಮೇರ್ ತೀರ್ ಪೋತೆರ್ ಪಂದ್ ವೈದ್ಯೆರ್ ತೆರಿಪಾದೆರ್ ಪಂದ್ ತೆರಿದ್ ಬೈದ್ಂಡ್.
ಟೆಹರಾನ್: ದಕ್ಷಿಣ ಇರಾನ್ ದ ಶಿಯಾ ಮುಸ್ಲಿಂ ಪಲ್ಲಿದ ಮಿತ್ತ್ ಬುಧಾರ ಉಗ್ರೆರ್ ಪೊಗ್ಗುದು ದಾಳಿ ಮಲ್ತಿನೆರ್ದಾವರ 15 ಜನ ತೀರ್ ಪೋತೆರ್.
ಶಿರಾಜ್ ಪೇಂಟೆದ ಶಾ ಚೆರಾಗ್ ಡ್ ಬಯ್ಯಗ್ ಪ್ರಾರ್ಥನೆದ ಪೊರ್ತುಡು ಈ ಘಟನೆ ನಡತ್ಂಡ್.
ಭಯೋತ್ಪಾದಕೆರ್ ನಡಪಾಯಿನ ದಾಳಿರ್ದ್ 40 ಜನಕ್ ಪೆಟ್ಟಾತ್ಂಡ್ ಪಂದ್ ವರದಿ ಆತ್ಂಡ್. ಪಲ್ಲಿಡ್ ಇತ್ತಿನಕಲೆನ ಮಿತ್ತ್ ಉಗ್ರೆರ್ ಮನಸ್ ಬತ್ತಿಲೆಕ್ಕ ಗುಂಡು ಪಾಡ್ದೆರ್ ಪಂದ್ ಕೈತಲ್ ದ ಗವರ್ನರ್ ಮೊಹಮ್ಮದ್-ಹಾದಿ ಇಮಾನಿಹ್ ತೆರಿಪಾದೆರ್.
ಪ್ರಯಾಗ್ ರಾಜ್: ಕರೆಂಟ್ ಕಂಬಗ್ ಕಾರ್ ತಾಂಟ್ ದ್ ಐನ್ ಜನ ತೀರ್ ಪೋಯಿನ ಘಟನೆ ಉತ್ತರಪ್ರದೇಶದ ಪ್ರಯಾಗ್ ರಾಜ್ ಡ್ ನಡತ್ಂಡ್.
ಈ ಕಾರ್ ಡ್ ಪತ್ತ್ ಜನ ಇತ್ತೆರ್. ಪೆಟ್ಟಾಯಿನ ಐನ್ ಜನನ್ ಆಸ್ಪತ್ರೆಗ್ ಸೇರ್ಸಾದೆರ್. ಪೆಟ್ಟಾಯಿನಕಲೆನ ಸ್ಥಿತಿ ಗಂಭೀರ ಉಂಡು ಪಂದ್ ವರದಿ ಆತ್ಂಡ್.
ಅಮೇಥಿ: ಎಟಿಎಂ ಮಿಷನ್‌ ಡ್ 200 ರೂ.ದ ಕಲ್ವ ನೋಟುಲು ವಿತ್‌ ಡ್ರಾ ಆಪುನ ವಿಡಿಯೋ ಸೋಶಿಯಲ್‌ ಮೀಡಿಯಾಡ್ ವೈರಲ್ ಆತ್ಂಡ್.
ಈ ಸಂಗತಿ ನಡತ್ ದಿನಿ ಉತ್ತರಪ್ರದೇಶದ ಅಮೇಥಿಡ್.
ಅಮೇಥಿದ ಮುನ್ಷಿಗಂಜ್ ಮಾರ್ಗ ಸಬ್ಜಿ ಮಂಡಿ ಪ್ರದೇಶದ ಎಟಿಎಂ ಒಂಜೇಟ್ ಕಲ್ವ 200 ರೂ. ನೋಟುಲು ಬರೊಂದು ಉಂಡು. ತುಡರ್ ಪರ್ಬದ ಶಾಪಿಂಗ್‌ ಗಾದ್ ಎಟಿಎಂ ಡ್ ಕಾಸ್ ದೆಪ್ಪೆರೆ ಪೋನಗ ಕೆಲವೆರೆಗ್ ಕಲ್ವ 200 ರೂ. ನೋಟುಲು ವಿತ್‌ ಡ್ರಾ ಆದ್ ಬೈದ್ಂಡ್. ನೆನ್ ತೂದು ಬೆಚ್ಚ ಆಯಿನ ಜನ ಪೊಲೀಸೆರೆಗ್ ದೂರು ಕೊರ್ತೆರ್. ಪೊಲೀಸೆರ್ ದೂರು ದೆತ್ತೊಂದು ಕೇಸ್ ದಾಖಲ್ ಮಲ್ದೆರ್. ಈ ನೋಟುದ ಮಿತ್ತ್ ಫುಲ್‌ ಆಫ್ ಫನ್ , ಚಿಲ್ಡ್ರನ್ ಬ್ಯಾಂಕ್ ಆಫ್ ಇಂಡಿಯಾ ಪಂದ್ ಬರೆತ್ಂಡ್. ಎಟಿಎಂಡ್ 5000 ರೂ. ವಿತ್‌ ಡ್ರಾ ಮಲ್ತೆ, ಆಯಿಟ್ ಒಂಜಿ ಕಲ್ವ 200 ರೂ. ನೋಟು ಇತ್ಂಡ್. ನನೊರಿಯಗ್ಲಾ ಇಂಚನೆ ಆತ್ಂಡ್. ಪೊಲೀಸೆರೆಗ್ ದೂರು ಕೊರ್ತ ಪಂದ್ ಕಿಶನ್‌ ವಿಶ್ವಕರ್ಮ ಪಂತೆರ್. ವರದಿದ ಪ್ರಕಾರ ಈ ಎಟಿಎಂ ಮಿಷನ್‌ ಕೈತಲ್ ಸೆಕ್ಯೂರಿಟಿ ಗಾರ್ಡ್‌ ಇಜ್ಜಿ. ಈ ಮಿಷನ್‌ ಇಂಡಿಯಾ 1 ಸಂಸ್ಥೆಗ್ ಸೇರ್ನವು, 2021 ಟ್ ಇಂಡಿಯಾ 1 ಸಂಸ್ಥೆ ಇಡೀ ದೇಶಡ್ ಸುಮಾರ್ 3000 ರ್ದ್ ಹೆಚ್ಚ ಮಿಷನ್‌ ಲು ಉಂಡು.
ಪುತ್ತೂರ್: ಪುತ್ತೂರ್-ದರ್ಬೆ ಮಾರ್ಗದ ಕಲ್ಲಾರೆಡ್ ರಿಕ್ಷಾ ಡ್ರೈವರ್ ಒರಿ ಪರ್ತಿನ ಅಮಲ್ಡ್ ಗಾಡಿನ್ ನಡುಮಾರ್ಗಡ್ ಉಂತಾದ್ ಜೆತ್ತಿನ ಘಟನೆ ನಡತ್ಂಡ್.
ಈ ಘಟನೆನ್ ತೂಯಿನ ಸಾರ್ವಜನಿಕೆರ್ ಪುತ್ತೂರ್ ಟ್ರಾಫಿಕ್ ಪೊಲೀಸೆರೆಗ್ ದೂರು ಕೊರ್ದು ಅಪಾಯ ತಪ್ಪಾದೆರ್. ಘಟನೆದ ಜಾಗೆಗ್ ಬತ್ತಿನ ಪೊಲೀಸೆರ್ ಪರಿಶೀಲನೆ ಮಲ್ಪುನಗ ಪರ್ತಿನವು ಗೊತ್ತ್ ದ್, ರಿಕ್ಷಾ ಡ್ರೈವರ್ ನ ಮಿತ್ತ್ ಕೇಸ್ ದಾಖಲ್ ಮಲ್ತ್ ದ್, ಗಾಡಿನ್ ವಶಕ್ ಪಡೆತೆರ್ ಪಂದ್ ತೆರಿದ್ ಬೈದ್ಂಡ್.
ಜಕಾರ್ತಾ: ಪೊಂಜೋವ್ ಒರ್ತಿನ್ 16 ಅಡಿ ಉದ್ದದ ಪೆರ್ಮರಿ ಇಡಿಕ್ಕ ದಿಂಗ್ ದಿನ ಘಟನೆ ಇಂಡೋನೇಷ್ಯಾದ ಜಾಂಬಿ ಪ್ರದೇಶಡ್ ನಡತ್ಂಡ್.
ರಬ್ಬರ್ ತೋಟಡ್ ಟ್ಯಾಪಿಂಗ್ ಕಜ್ಜಗ್ ಪೋಯಿನ ಜಹ್ರಾಹ್ (52) ಪನ್ಪಿನಾರೆನ್ ಪೆರ್ಮರಿ ದಿಂಗ್ ದ್ಂಡ್ ಪಂದ್ ತೆರಿದ್ ಬೈದ್ಂಡ್. ಕೆಲಸೊಗು ಪೋದಿತ್ತಿನ ಮೇರ್ ಇಲ್ಲಗ್ ಬರಂದಿನ ತೂದು ಕುಟುಂಬದಕುಲು ಪೊಲೀಸೆರೆಗ್ ದೂರು ಕೊರ್ತೆರ್. ಪೊಂಜೋವ್ ನ್ ರಬದಬರ್ ತೋಟೊಡು ನಾಡೊಂದು ಪೋನಗ ಮಲ್ಲ ಬಂಜಿದ ಪೆರ್ಮರಿ ತಿಕ್ಕ್ಂಡ್. ಕೈತಲ್ಡೆ ರಬ್ಬರ್ ಟ್ಯಾಪಿಂಗ್ ಬೇಲೆದ ಸೊತ್ತುಲು ತಿಕ್ ದಿತ್ತ್ಂಡ್. ಸಂಸಯೊಡು ಪೆರ್ಮರಿದ ಬಂಜಿನ್ ತಿಗ್ ತ್ ತೂನಗ ಬಂಜಿದುಲಾಯಿ ಜಹ್ರಾಹ್ ಮೆರೆನ ಪುಣ ಇತ್ತ್ಂಡ್.
ಪಾಲಡ್ಕ : ಕಡಂದಲೆ ಪಾಲಡ್ಕ ಪೂಪಾಡಿಕಲ್ಲ್ ಡ್ ಉಪ್ಪುನ ಪುಗರ್ತೆದ ಹೋಟೆಲ್ ನಿರೆಲ್ ಲಂಚ್ ಹೋಮ್ ಡ್ ತುಡರ್ ಪರ್ಬ ಭಾರಿ ಗೌಜಿಡ್ ಆಚರಣೆ ಮಲ್ತೆರ್.
ಪೂಜೆ ಆಯಿ ಬೊಕ್ಕ ಹೋಟೆಲ್ ದ ಮಾಲಿಕೆರ್
ಭೋಜ ಪೂಜಾರ್ಲು ಸೇರ್ದಿನ ಮಾತೆರೆಗ್ಲಾ ಉಪಾಹಾರದ ವ್ಯವಸ್ಥೆ ಮಲ್ತ್ ದ್ ಮಾತೆರೆಗ್ಲಾ ಸೊಲ್ಮೆ ಸಂದಾಯೆರ್.
ನ್ಯೂಯಾರ್ಕ್: ಅಮೆರಿಕಾ ಉಪಾಧ್ಯಕ್ಷೆರ್, ಭಾರತ ಮೂಲದ ಕಮಲಾ ಹ್ಯಾರಿಸ್ ಅಮೇರಿಕಡ್ ಇಪ್ಪುನ ಭಾರತೀಯೆರೆನೊಟ್ಟಿಗೆ ಸೇರ್ದ್ ತುಡರ್ ಪರ್ಬ ಆಚರಣೆ ಮಲ್ತೆರ್.
ಭಾರತೀಯೆರ್ ಬೊಲ್ಪುದ ಪರ್ಬ ಆಚರಣೆ ಮಲ್ತೊಂದು ಇಪ್ಪುನ ಪೊರ್ತುಡು ಕಮಲಾ ಹ್ಯಾರೀಸ್ ಜನತ ಸಂಭ್ರಮಡ್ ಪಾಲ್ ಪಡೆತೆರ್.
ಮೇರ್ ದೀಪ ಪೊತ್ತಾದ್, ಡ್ಯಾನ್ಸ್ ಮಲ್ತ್ ದ್, ತುಡರ್ ಪರ್ಬದ ಸಂಭ್ರಮನ್ ಹೆಚ್ಚ ಮಲ್ತೆರ್. ಅಂಚನೆ ಶ್ವೇತಭವನಡ್ ಅಮೆರಿಕ ಅಧ್ಯಕ್ಷೆರ್ ಜೋ ಬೈಡನ್ ಬೊಕ್ಕ ಸುರುತ ಪೊಂಜೋವ್ ಜಿಲ್ ಬೈಡನ್ ಲ ತುಡರ್ ಪರ್ಬ ಆಚರಣೆ ಮಲ್ದೆರ್. ಶ್ವೇತಭವನ ಜನತ ಇಲ್ಲ್. ಅಧ್ಯಕ್ಷೆರ್ ಬೊಕ್ಕ ಮೇರೆನ ಬೊಡೆದಿ ನಮ್ಮೊಟ್ಟಿಗೆ ಸೇರ್ದ್ ನಮ್ಮ ಪರ್ಬ ಆಚರಣೆ ಮಲ್ತಿನವು ಖುಷಿ ಆತ್ಂಡ್ ಪಂದ್ ಹ್ಯಾರೀಸ್ ಪಂತೆರ್ಂದ್ ವರದಿ ಆತ್ಂಡ್.
ಲಂಡನ್: ಬ್ರಿಟನ್ ದ ಪೊಸ ಪ್ರಧಾನಿ ರಿಷಿ ಸುನಾಕ್ ತುಡರ್ ಪರ್ಬಡ್ ಪಾಲ್ ಪಡೆಯೆರ್.
ಮೇರ್ ಪ್ರಧಾನಿಯಾದ್ ಅಧಿಕಾರ ದೆತ್ತೊನ್ನ ಬೊಕ್ಕ ಪಾಲ್ ಪಡೆಯಿನ ಸುರುತ ಧಾರ್ಮಿಕ ಲೇಸ್ ಉಂದು ಆದುಂಡು.
ಈ ಪೊರ್ತುಡು ಮೇರ್ ಬ್ರಿಟನ್ ಡ್ ಬೊಲ್ಪುದ ವಾತಾವರಣ ನಿರ್ಮಾಣ ಮಲ್ಪರೆ ಶಕ್ತಿ ಮೀರ್ ದ್ ಪ್ರಯತ್ನ ಮಲ್ಪುನೆ ಪಂದ್ ತೆರಿಪಾಯೆರ್. ರಿಷಿ ಸುನಾಕ್ ಬ್ರಿಟನ್ ಡ್ ಇತ್ತ್ಂಡಲ ಹಿಂದೂ ಧರ್ಮದ ಆಚರಣೆಲೆನ್ ಮಲ್ಪುವೆರೆ. ಕಚೇರಿದ ಟೇಬಲ್ ದ ಮಿತ್ತ್ ಗಣಪತಿ ಮೂರ್ತಿ ದೀತೆರ್.
